17. ஜா²னபச்சயனித்³தே³ஸவண்ணனா

17. விதக்கவிசாரபீதிஸோமனஸ்ஸதோ³மனஸ்ஸுபேக்கா²சித்தேகக்³க³தாஸங்கா²தானீதி ஏத்த² யதி³பி ஸோமனஸ்ஸதோ³மனஸ்ஸஸங்கா²தானி ஜா²னங்கா³னி நத்தி², ஸுக²து³க்க²ஸங்கா²தானி பன ஸோமனஸ்ஸதோ³மனஸ்ஸபூ⁴தானேவ ஜா²னங்கா³னி, ந காயிகஸுக²து³க்க²பூ⁴தானீதி இமஸ்ஸ த³ஸ்ஸனத்த²ம் ஸோமனஸ்ஸதோ³மனஸ்ஸக்³க³ஹணம் கதம். நனு ச ‘‘த்³விபஞ்சவிஞ்ஞாணவஜ்ஜேஸூ’’தி வசனேனேவ காயிகஸுக²து³க்கா²னி வஜ்ஜிதானீதி ஸுக²து³க்க²க்³க³ஹணமேவ கத்தப்³ப³ந்தி? ந, ஜா²னங்க³ஸுக²து³க்கா²னம் ஜா²னங்க³பா⁴வவிஸேஸனதோ. ‘‘த்³விபஞ்சவிஞ்ஞாணவஜ்ஜேஸு ஸுக²து³க்கு²பேக்கா²சித்தேகக்³க³தாஸங்கா²தானீ’’தி ஹி வுத்தே த்³விபஞ்சவிஞ்ஞாணேஸு உபேக்கா²சித்தேகக்³க³தாஹி ஸத்³தி⁴ம் காயிகஸுக²து³க்கா²னிபி வஜ்ஜிதானீதி ஏத்தகமேவ விஞ்ஞாயதி, ந பன யானி ஸுக²து³க்கா²னி ஜா²னங்கா³னி ஹோந்தி, தேஸம் ஜா²னங்க³பூ⁴தோ ஸுக²பா⁴வோ து³க்க²பா⁴வோ ச விஸேஸிதோ, தஸ்மா ஸோமனஸ்ஸதோ³மனஸ்ஸபா⁴வவிஸிட்டோ²யேவ ஸுக²து³க்க²பா⁴வோ ஸுக²து³க்கா²னம் ஜா²னங்க³பா⁴வோதி த³ஸ்ஸனத்த²ம் ஸோமனஸ்ஸதோ³மனஸ்ஸக்³க³ஹணம் கரோதி. தேன ‘‘த்³விபஞ்சவிஞ்ஞாணவஜ்ஜேஸூ’’தி வசனேன வஜ்ஜியமானானம்பி ஸுக²து³க்கா²னம் ஸோமனஸ்ஸதோ³மனஸ்ஸபா⁴வாபா⁴வதோ ஜா²னங்க³பா⁴வாபா⁴வோதி த³ஸ்ஸிதம் ஹோதி. யதா²வஜ்ஜிதா பன ஸுக²து³க்கோ²பேக்கே²கக்³க³தா கஸ்மா வஜ்ஜிதாதி? யத்த² ஜா²னங்கா³னி உத்³த⁴ரீயந்தி சித்துப்பாத³கண்டே³, தத்த² ச ஜா²னங்க³ந்தி அனுத்³த⁴டத்தா. கஸ்மா பன ந உத்³த⁴டாதி தம் த³ஸ்ஸேதும் ‘‘பஞ்சன்னம் பன விஞ்ஞாணகாயான’’ந்திஆதி³மாஹ.

அபி⁴னிபாதமத்தத்தாதி ஏதேன ஆவஜ்ஜனஸம்படிச்ச²னமத்தாயபி சிந்தனாபவத்தியா அபா⁴வம் த³ஸ்ஸேதி. ‘‘தேஸு விஜ்ஜமானானிபி உபேக்கா²ஸுக²து³க்கா²னீ’’தி போராணபாடோ². தத்த² உபேக்கா²ஸுக²து³க்கே²ஹேவ தம்ஸமானலக்க²ணாய சித்தேகக்³க³தாயபி யதா²வுத்தேனேவ காரணேன அனுத்³த⁴டபா⁴வோ த³ஸ்ஸிதோதி த³ட்ட²ப்³போ³. புப்³பே³ பன ஸத்த அங்கா³னி த³ஸ்ஸேந்தேன சத்தாரி அங்கா³னி வஜ்ஜிதானீதி தேஸம் வஜ்ஜனே காரணம் த³ஸ்ஸேந்தேன ந ஸமானலக்க²ணேன லேஸேன த³ஸ்ஸேதப்³ப³ம். அட்ட²கதா² ஹேஸாதி. யதி³ ச லேஸேன த³ஸ்ஸேதப்³ப³ம், யதா²வுத்தேஸுபி தீஸு ஏகமேவ வத்தப்³ப³ம் ஸியா, திண்ணம் பன வசனேன ததோ அஞ்ஞஸ்ஸ ஜா²னங்க³ந்தி உத்³த⁴டபா⁴வோ ஆபஜ்ஜதி, யதா²வுத்தகாரணதோ அஞ்ஞேன காரணேன அனுத்³த⁴டபா⁴வோ வா, தஸ்மா தம்தோ³ஸபரிஹரணத்த²ம் ‘‘உபேக்கா²சித்தேகக்³க³தாஸுக²து³க்கா²னீ’’தி பட²ந்தி. யே பன ‘‘ஜா²னங்க³பூ⁴தேஹி ஸோமனஸ்ஸாதீ³ஹி ஸுக²து³க்கே²ன அவிபூ⁴தபா⁴வேன பாகடதாய இந்த்³ரியகிச்சயுத்ததாய ச ஸமானானம் ஸுகா²தீ³னம் ஜா²னங்க³ந்தி அனுத்³த⁴டபா⁴வே காரணம் வத்தப்³ப³ம், ந சித்தேகக்³க³தாயாதி ஸா ஏத்த² ந க³ஹிதா’’தி வத³ந்தி, தேஸம் தம் ருசிமத்தம். யதி³ ஜா²னங்க³ஸமானானம் ஜா²னங்க³ந்தி அனுத்³த⁴டபா⁴வே காரணம் வத்தப்³ப³ம், சித்தேகக்³க³தா சேத்த² ஜா²னங்க³பூ⁴தாய விசிகிச்சா²யுத்தமனோதா⁴துஆதீ³ஸு சித்தேகக்³க³தாய ஸமானாதி தஸ்ஸா அனுத்³த⁴டபா⁴வே காரணம் வத்தப்³ப³மேவாதி. ஸேஸாஹேதுகேஸுபி ஜா²னங்க³ம் உத்³த⁴டமேவ உத்³த⁴ரணட்டா²னே சித்துப்பாத³கண்டே³தி அதி⁴ப்பாயோ.

ஜா²னபச்சயனித்³தே³ஸவண்ணனா நிட்டி²தா.