9. உபனிஸ்ஸயபச்சயனித்³தே³ஸவண்ணனா

9. தே தயோபி ராஸயோதி உபனிஸ்ஸயே தயோ அனேகஸங்கா³ஹகதாய ராஸயோதி வத³தி. ஏதஸ்மிம் பன உபனிஸ்ஸயனித்³தே³ஸே யே புரிமா யேஸம் பச்சி²மானம் அனந்தரூபனிஸ்ஸயா ஹோந்தி, தே தேஸம் ஸப்³பே³ஸம் ஏகந்தேனேவ ஹோந்தி, ந கேஸஞ்சி கதா³சி, தஸ்மா யேஸு பதே³ஸு அனந்தரூபனிஸ்ஸயோ ஸங்க³ஹிதோ, தேஸு ‘‘கேஸஞ்சீ’’தி ந ஸக்கா வத்துந்தி ந வுத்தம். யே பன புரிமா யேஸம் பச்சி²மானம் ஆரம்மணபகதூபனிஸ்ஸயா ஹோந்தி, தே தேஸம் ந ஸப்³பே³ஸம் ஏகந்தேன ஹோந்தி, யேஸம் உப்பத்திபடிபா³ஹிகா பச்சயா ப³லவந்தோ ஹோந்தி, தேஸம் ந ஹோந்தி, இதரேஸம் ஹோந்தி. தஸ்மா யேஸு பதே³ஸு அனந்தரூபனிஸ்ஸயோ ந லப்³ப⁴தி, தேஸு ‘‘கேஸஞ்சீ’’தி வுத்தம். ஸித்³தா⁴னம் பச்சயத⁴ம்மானம் யேஹி பச்சயுப்பன்னேஹி அகுஸலாதீ³ஹி ப⁴விதப்³ப³ம், தேஸம் கேஸஞ்சீதி அயஞ்சேத்த² அத்தோ², ந பன அவிஸேஸேன அகுஸலாதீ³ஸு கேஸஞ்சீதி.

புரிமா புரிமா குஸலா…பே… அப்³யாகதானம் த⁴ம்மானந்தி யேஸம் உபனிஸ்ஸயபச்சயேன ப⁴விதப்³ப³ம், தேஸம் அப்³யாகதானம் பச்சி²மானந்தி த³ட்ட²ப்³ப³ம். ந ஹி ரூபாப்³யாகதம் உபனிஸ்ஸயம் லப⁴தீதி. கத²ம்? ஆரம்மணானந்தரூபனிஸ்ஸயே தாவ ந லப⁴தி அனாரம்மணத்தா புப்³பா³பரனியமேன அப்பவத்திதோ ச, பகதூபனிஸ்ஸயஞ்ச ந லப⁴தி அசேதனேன ரூபஸந்தானேன பகதஸ்ஸ அபா⁴வதோ. யதா² ஹி அரூபஸந்தானேன ஸத்³தா⁴த³யோ நிப்பா²தி³தா உதுபோ⁴ஜனாத³யோ ச உபஸேவிதா, ந ஏவம் ரூபஸந்தானேன. யஸ்மிஞ்ச உதுபீ³ஜாதி³கே கம்மாதி³கே ச ஸதி ரூபம் பவத்ததி, ந தம் தேன பகதம் ஹோதி. ஸசேதனஸ்ஸேவ ஹி உப்பாத³னுபத்த²ம்ப⁴னுபயோகா³தி³வஸேன சேதனம் பகப்பனம் பகரணம், ரூபஞ்ச அசேதனந்தி. யதா² ச நிரீஹகேஸு பச்சயாயத்தேஸு த⁴ம்மேஸு கேஸஞ்சி ஸாரம்மணஸபா⁴வதா ஹோதி, கேஸஞ்சி ந, ஏவம் ஸப்பகரணஸபா⁴வதா நிப்பகரணஸபா⁴வதா ச த³ட்ட²ப்³பா³. உதுபீ³ஜாத³யோ பன அங்குராதீ³னம் தேஸு அஸந்தேஸு அபா⁴வதோ ஏவ பச்சயா, ந பன உபனிஸ்ஸயாதி³பா⁴வதோதி. புரிமபுரிமானம்யேவ பனேத்த² உபனிஸ்ஸயபச்சயபா⁴வோ பா³ஹுல்லவஸேன பாகடவஸேன ச வுத்தோ. ‘‘அனாக³தே க²ந்தே⁴ பத்த²யமானோ தா³னம் தே³தீ’’திஆதி³வசனதோ (பட்டா². 2.18.8) பன அனாக³தாபி உபனிஸ்ஸயபச்சயா ஹோந்தி, தே புரிமேஹி ஆரம்மணபகதூபனிஸ்ஸயேஹி தம்ஸமானலக்க²ணதாய இத⁴ ஸங்க³ய்ஹந்தீதி த³ட்ட²ப்³பா³.

புக்³க³லோபி ஸேனாஸனம்பீதி புக்³க³லஸேனாஸனக்³க³ஹணவஸேன உபனிஸ்ஸயபா⁴வம் ப⁴ஜந்தே த⁴ம்மே த³ஸ்ஸேதி, பி-ஸத்³தே³ன சீவராரஞ்ஞருக்க²பப்³ப³தாதி³க்³க³ஹணவஸேன உபனிஸ்ஸயபா⁴வம் ப⁴ஜந்தே ஸப்³பே³ ஸங்க³ண்ஹாதி. ‘‘அப்³யாகதோ த⁴ம்மோ அப்³யாகதஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ’’திஆதீ³ஸு ஹி ‘‘ஸேனாஸனம் காயிகஸ்ஸ ஸுக²ஸ்ஸா’’திஆதி³வசனேன ஸேனாஸனக்³க³ஹணேன உபனிஸ்ஸயபா⁴வம் ப⁴ஜந்தாவ த⁴ம்மா உபனிஸ்ஸயபச்சயேன பச்சயோதி இமமத்த²ம் த³ஸ்ஸேந்தேன புக்³க³லாதீ³ஸுபி அயம் நயோ த³ஸ்ஸிதோ ஹோதீதி. பச்சுப்பன்னாபி ஆரம்மணபகதூபனிஸ்ஸயா பச்சுப்பன்னதாய ஸேனாஸனஸமானலக்க²ணத்தா ஏத்தே²வ ஸங்க³ஹிதாதி த³ட்ட²ப்³பா³. வக்க²தி ஹி ‘‘பச்சுப்பன்னம் உதும் போ⁴ஜனம் ஸேனாஸனம் உபனிஸ்ஸாய ஜா²னம் உப்பாதே³தீ’’திஆதி³னா ஸேனாஸனஸ்ஸ பச்சுப்பன்னபா⁴வம் விய பச்சுப்பன்னானம் உதுஆதீ³னம் பகதூபனிஸ்ஸயபா⁴வம், ‘‘பச்சுப்பன்னம் சக்கு²ம்…பே… வத்து²ம் பச்சுப்பன்னே க²ந்தே⁴ க³ரும் கத்வா அஸ்ஸாதே³தீ’’திஆதி³னா (பட்டா². 2.18.4) சக்கா²தீ³னம் ஆரம்மணூபனிஸ்ஸயபா⁴வஞ்சாதி. பச்சுப்பன்னானம்பி ச தாதி³ஸானம் புப்³பே³ பகதத்தா பகதூபனிஸ்ஸயதா த³ட்ட²ப்³பா³.

கஸிணாரம்மணாதீ³னி ஆரம்மணமேவ ஹோந்தி, ந உபனிஸ்ஸயோதி இமினா அதி⁴ப்பாயேன ‘‘ஏகச்சாயா’’தி ஆஹ.

அரூபாவசரகுஸலம்பி யஸ்மிம் கஸிணாதி³ம்ஹி ஜா²னம் அனுப்பாதி³தம், தஸ்மிம் அனுப்பன்னஜா²னுப்பாத³னே ஸப்³ப³ஸ்ஸ ச உப்பன்னஜா²னஸ்ஸ ஸமாபஜ்ஜனே இத்³தி⁴விதா⁴தீ³னம் அபி⁴ஞ்ஞானஞ்ச உபனிஸ்ஸயோதி இமமத்த²ம் ஸந்தா⁴யாஹ ‘‘தேபூ⁴மககுஸலோ சதுபூ⁴மகஸ்ஸபி குஸலஸ்ஸா’’தி. வுத்தம்பி சேதம் ‘‘அரூபாவசரம் ஸத்³த⁴ம் உபனிஸ்ஸாய ரூபாவசரம் ஜா²னம் விபஸ்ஸனம் மக்³க³ம் அபி⁴ஞ்ஞம் ஸமாபத்திம் உப்பாதே³தீ’’தி (பட்டா². 4.13.285). காமாவசரகுஸலம் ரூபாவசராரூபாவசரவிபாகானம்பி தது³ப்பாத³ககுஸலானம் உபனிஸ்ஸயபா⁴வவஸேன, படிஸந்தி⁴னியாமகஸ்ஸ சுதிதோ புரிமஜவனஸ்ஸ ச வஸேன உபனிஸ்ஸயோ, ரூபாவசரகுஸலம் அரூபாவசரவிபாகஸ்ஸ, அரூபாவசரகுஸலஞ்ச ரூபாவசரவிபாகஸ்ஸ தது³ப்பாத³ககுஸலூபனிஸ்ஸயபா⁴வேனாதி ஏவம் பச்சேகம் தேபூ⁴மககுஸலானம் சதுபூ⁴மகவிபாகஸ்ஸ தேபூ⁴மககிரியஸ்ஸ ச யதா²யோக³ம் பச்சயபா⁴வோ வேதி³தப்³போ³. பாளியம்பி ஹி பகதூபனிஸ்ஸயோ நயத³ஸ்ஸனமத்தேனேவ பஞ்ஹாவாரேஸு விஸ்ஸஜ்ஜிதோதி.

இமினா பன நயேனாதி லோகுத்தரனிப்³ப³த்தனம் உபனிஸ்ஸாய ஸினேஹுப்பாத³னலேஸேனாதி அத்தோ². லோகுத்தரா பன த⁴ம்மா அகுஸலானம் ந கேனசி பச்சயேன பச்சயோ ஹோந்தீதி ந இத³ம் ஸாரதோ த³ட்ட²ப்³ப³ந்தி அதி⁴ப்பாயோ. காமாவசராதி³திஹேதுகப⁴வங்க³ம் காயிகஸுகா²தி³ ச ரூபாவசராதி³குஸலானம் உபனிஸ்ஸயோ, அரூபாவசரவிபாகோ ரூபாவசரகுஸலஸ்ஸ தம் பத்தே²த்வா தன்னிப்³ப³த்தககுஸலுப்பாத³னத்த²ம் உப்பாதி³யமானஸ்ஸ, ரூபாவசரகிரியஸ்ஸ ச புப்³பே³ நிவுட்டா²தீ³ஸு அரூபாவசரவிபாகஜானனத்த²ம் ஜா²னாபி⁴ஞ்ஞாயோ உப்பாதே³ந்தஸ்ஸ அரஹதோ, சதுபூ⁴மகவிபாகானம் பன தது³ப்பாத³ககுஸலூபனிஸ்ஸயபா⁴வவஸேன ஸோ ஸோ விபாகோ உபனிஸ்ஸயோ. தேனாஹ ‘‘ததா² தேபூ⁴மகவிபாகோ’’தி. யதி³பி அரஹத்தப²லத்தம் ஜா²னவிபஸ்ஸனா உப்பாதே³தி அனாகா³மீ, ந பன தேன தம் கதா³சி தி³ட்ட²புப்³ப³ம் புது²ஜ்ஜனாதீ³ஹி ஸோதாபத்திப²லாதீ³னி விய, தஸ்மா தானி விய தேஸம் ஜா²னாதீ³னம் இமஸ்ஸ ச அக்³க³ப²லம் ந ஜா²னாதீ³னம் உபனிஸ்ஸயோ. உபலத்³த⁴புப்³ப³ஸதி³ஸமேவ ஹி அனாக³தம்பி உபனிஸ்ஸயோதி. தேனாஹ ‘‘உபரிட்டி²மம் குஸலஸ்ஸபீ’’தி.

கிரியஅத்த²படிஸம்பி⁴தா³தி³ம்பி பத்தே²த்வா தா³னாதி³குஸலம் கரோந்தஸ்ஸ தேபூ⁴மககிரியாபி சதுபூ⁴மகஸ்ஸபி குஸலஸ்ஸ உபனிஸ்ஸயபச்சயேன பச்சயோ. யோனிஸோமனஸிகாரே வத்தப்³ப³மேவ நத்தி², தம் உபனிஸ்ஸாய ராகா³தி³உப்பாத³னே அகுஸலஸ்ஸ, குஸலாகுஸலூபனிஸ்ஸயபா⁴வமுகே²ன சதுபூ⁴மகவிபாகஸ்ஸ. ஏவம் கிரியஸ்ஸபி யோஜேதப்³ப³ம். தேனாஹ ‘‘கிரியஸங்கா²தோபி பகதூபனிஸ்ஸயோ சதுபூ⁴மகானம் குஸலாதி³க²ந்தா⁴னம் ஹோதியேவா’’தி. நேவவிபாகனவிபாகத⁴ம்மத⁴ம்மேஸு பன உதுபோ⁴ஜனஸேனாஸனானமேவ திண்ணம் ராஸீனம் பகதூபனிஸ்ஸயபா⁴வத³ஸ்ஸனம் நயத³ஸ்ஸனமேவாதி. இமஸ்மிம் பட்டா²னமஹாபகரணே ஆக³தனயேனாதி இத³ம் ‘‘குஸலம் த⁴ம்மம் படிச்ச அப்³யாகதோ த⁴ம்மோ உப்பஜ்ஜதி ந உபனிஸ்ஸயபச்சயா, குஸலே க²ந்தே⁴ படிச்ச சித்தஸமுட்டா²னம் ரூப’’ந்தி (பட்டா². 1.1.91) ஏவமாதி³கம் உபனிஸ்ஸயபடிக்கே²பம், அனுலோமே ச அனாக³மனம் ஸந்தா⁴ய வுத்தம். ஸுத்தந்திகபரியாயேனாதி ‘‘விஞ்ஞாணூபனிஸம் நாமரூபம், நாமரூபனிஸம் ஸளாயதன’’ந்திஆதி³கேன (ஸம். நி. 2.23),

‘‘யதா²பி பப்³ப³தோ ஸேலோ, அரஞ்ஞஸ்மிம் ப்³ரஹாவனே;

தம் ருக்கா² உபனிஸ்ஸாய, வட்³ட⁴ந்தே தே வனப்பதீ’’தி (அ. நி. 3.49). –

ஆதி³கேன ச.

உபனிஸ்ஸயபச்சயனித்³தே³ஸவண்ணனா நிட்டி²தா.