3. பரிஞ்ஞாவாரவண்ணனா

435-482. பரிஞ்ஞாவாரே லோகியஅப்³யாகதமிஸ்ஸகானி சாதி து³க்க²ஸச்சபரியாபன்னேஹி ஏகந்தபரிஞ்ஞேய்யேஹி லோகியஅப்³யாகதேஹி மிஸ்ஸகத்தா தானி உபாதா³ய மனிந்த்³ரியாதீ³னம் வேத³னாக்க²ந்தா⁴தீ³னம் விய பரிஞ்ஞேய்யதா ச வுத்தா. யதி³ பரிஞ்ஞேய்யமிஸ்ஸகத்தா பரிஞ்ஞேய்யதா ஹோதி, கஸ்மா த⁴ம்மயமகே ‘‘யோ குஸலம் த⁴ம்மம் பா⁴வேதி, ஸோ அப்³யாகதம் த⁴ம்மம் பரிஜானாதீ’’திஆதி³னா அப்³யாகதபதே³ன யோஜேத்வா யமகானி ந வுத்தானீதி? யதா² ‘‘குஸலம் பா⁴வேமி, அகுஸலம் பஜஹாமீ’’தி குஸலாகுஸலேஸு பா⁴வனாபஹானாபி⁴னிவேஸோ ஹோதி, ததா² ‘‘வேத³னாக்க²ந்தோ⁴ அனிச்சோ, த⁴ம்மாயதனம் அனிச்ச’’ந்திஆதி³னா க²ந்தா⁴தீ³ஸு பரிஜானாபி⁴னிவேஸோ ஹோதி, தத்த² வேத³னாக்க²ந்தா⁴த³யோ ‘‘அனிச்ச’’ந்திஆதி³னா பரிஜானிதப்³பா³, தே ச வேத³னாக்க²ந்தா⁴தி³பா⁴வம் க³ஹேத்வா பரிஜானிதப்³பா³, ந அப்³யாகதபா⁴வந்தி.

கஸ்மா பனேத்த² து³க்க²ஸச்சபா⁴ஜனீயே ஆக³தஸ்ஸ தோ³மனஸ்ஸஸ்ஸ பஹாதப்³ப³தாவ வுத்தா, ந பரிஞ்ஞேய்யதா, நனு து³க்க²ஸச்சபரியாபன்னா வேத³னாக்க²ந்தா⁴த³யோ குஸலாகுஸலபா⁴வேன அக்³க³ஹிதா குஸலாகுஸலாபி பரிஞ்ஞேய்யாதி? ஸச்சம், யதா² பன வேத³னாக்க²ந்தா⁴தி³பா⁴வோ பா⁴வேதப்³ப³பஹாதப்³ப³பா⁴வேஹி வினாபி ஹோதி, ந ஏவம் தோ³மனஸ்ஸிந்த்³ரியபா⁴வோ பஹாதப்³ப³பா⁴வேன வினா ஹோதீதி இமம் விஸேஸம் த³ஸ்ஸேதும் தோ³மனஸ்ஸிந்த்³ரியஸ்ஸ பஹாதப்³ப³தாவ இத⁴ வுத்தா, ந பரிஞ்ஞேய்யபா⁴வஸ்ஸ அபா⁴வதோதி த³ட்ட²ப்³போ³. அகுஸலம் ஏகந்ததோ பஹாதப்³ப³மேவாதி ஏதேன பஹாதப்³ப³மேவ, ந அப்பஹாதப்³ப³ந்தி அப்பஹாதப்³ப³மேவ நிவாரேதி, ந பரிஞ்ஞேய்யபா⁴வந்தி த³ட்ட²ப்³ப³ம். அஞ்ஞிந்த்³ரியம் பா⁴வேதப்³ப³னிட்ட²ம், ந பன ஸச்சி²காதப்³ப³னிட்ட²ந்தி பா⁴வேதப்³ப³பா⁴வோ ஏவ தஸ்ஸ க³ஹிதோதி. ‘‘த்³வே புக்³க³லா’’திஆதி³ ‘‘சக்கு²ந்த்³ரியம் ந பரிஜானாதீ’’திஆதி³கஸ்ஸ பரதோ லிகி²தப்³ப³ம் உப்படிபாடியா லிகி²தந்தி த³ட்ட²ப்³ப³ம். சக்கு²ந்த்³ரியமூலகஞ்ஹி அதிக்கமித்வா தோ³மனஸ்ஸிந்த்³ரியமூலகே இத³ம் வுத்தம் ‘‘த்³வே புக்³க³லா தோ³மனஸ்ஸிந்த்³ரியம் ந பஜஹந்தி நோ ச அஞ்ஞிந்த்³ரியம் ந பா⁴வேந்தீ’’தி (யம. 3.இந்த்³ரியயமக.440).

ஏத்த² ச புது²ஜ்ஜனோ, அட்ட² ச அரியாதி நவ புக்³க³லா. தேஸு புது²ஜ்ஜனோ ப⁴ப்³பா³ப⁴ப்³ப³வஸேன து³விதோ⁴, ஸோ ‘‘புது²ஜ்ஜனோ’’தி ஆக³தட்டா²னேஸு ‘‘ச² புக்³க³லா சக்கு²ந்த்³ரியஞ்ச ந பரிஜானித்த² தோ³மனஸ்ஸிந்த்³ரியஞ்ச ந பஜஹித்தா²’’திஆதீ³ஸு ச அபி⁴ந்தி³த்வா க³ஹிதோ. ‘‘யே புது²ஜ்ஜனா மக்³க³ம் படிலபி⁴ஸ்ஸந்தீ’’தி (யம. 1.ஸச்சயமக.49, 51-52) ஆக³தட்டா²னேஸு ‘‘பஞ்ச புக்³க³லா சக்கு²ந்த்³ரியஞ்ச பரிஜானிஸ்ஸந்தி தோ³மனஸ்ஸிந்த்³ரியஞ்ச பஜஹிஸ்ஸந்தீ’’திஆதீ³ஸு (யம. 3.இந்த்³ரியயமக.451) ச ப⁴ப்³போ³ ஏவ பி⁴ந்தி³த்வா க³ஹிதோ. ‘‘யே ச புது²ஜ்ஜனா மக்³க³ம் ந படிலபி⁴ஸ்ஸந்தீ’’தி (யம. 1.ஸச்சயமக.51) ஆக³தட்டா²னேஸு ‘‘தயோ புக்³க³லா தோ³மனஸ்ஸிந்த்³ரியஞ்ச நப்பஜஹிஸ்ஸந்தி சக்கு²ந்த்³ரியஞ்ச ந பரிஜானிஸ்ஸந்தீ’’திஆதீ³ஸு (யம. 3.இந்த்³ரியயமக.455) ச அப⁴ப்³போ³ ஏவ. அக்³க³ப²லஸமங்கீ³ ச பட²மப²லஸமங்கீ³ அரஹா சாதி து³விதோ⁴. ஸோபி ‘‘அரஹா’’தி ஆக³தட்டா²னேஸு ‘‘தயோ புக்³க³லா அனஞ்ஞாதஞ்ஞஸ்ஸாமீதிந்த்³ரியஞ்ச பா⁴வித்த² தோ³மனஸ்ஸிந்த்³ரியஞ்ச பஜஹித்தா²’’திஆதீ³ஸு (யம. 3.இந்த்³ரியயமக.444) ச அபி⁴ந்தி³த்வா க³ஹிதோ. ‘‘யோ அக்³க³ப²லம் ஸச்சி²கரோதீ’’தி (யம. 3.இந்த்³ரியயமக.446) ஆக³தட்டா²னேஸு ‘‘தயோ புக்³க³லா தோ³மனஸ்ஸிந்த்³ரியம் பஜஹித்த², நோ ச அஞ்ஞாதாவிந்த்³ரியம் ஸச்சி²கரித்தா²’’திஆதீ³ஸு (யம. 3.இந்த்³ரியயமக.444) ச பட²மப²லஸமங்கீ³ ச பி⁴ந்தி³த்வா க³ஹிதோ. ‘‘யோ அக்³க³ப²லம் ஸச்சா²காஸீ’’தி (யம. 3.இந்த்³ரியயமக.443, 446) ஆக³தட்டா²னேஸு இதரோவாதி ஏவம் புக்³க³லபே⁴த³ம் ஞத்வா தத்த² தத்த² ஸன்னிட்டா²னேன க³ஹிதபுக்³க³லே நித்³தா⁴ரேத்வா விஸ்ஸஜ்ஜனம் யோஜேதப்³ப³ந்தி.

பரிஞ்ஞாவாரவண்ணனா நிட்டி²தா.

இந்த்³ரியயமகவண்ணனா நிட்டி²தா.

யமகபகரண-மூலடீகா ஸமத்தா.