7. தி³ப்³ப³சக்கு²கதா²வண்ணனா

373. உபத்த²த்³த⁴ந்தி யதா² விஸயானுபா⁴வகோ³சரேஹி விஸிட்ட²ம் ஹோதி, ததா² பச்சயபூ⁴தேன கதப³லாதா⁴னந்தி அத்தோ². தம்மத்தமேவாதி புரிமம் மம்ஸசக்கு²மத்தமேவ த⁴ம்முபத்த²த்³த⁴ம் ந ஹோதீதி அத்தோ². அனாபாத²க³தந்தி மம்ஸசக்கு²னா க³ஹேதப்³ப³ட்டா²னம் ஆபாத²ம் நாக³தம். ஏத்த² ச விஸயஸ்ஸ தீ³பகம் ஆனுபா⁴வகோ³சரானமேவ அஸதி³ஸதம் வத³ந்தோ யாதி³ஸோ மம்ஸசக்கு²ஸ்ஸ விஸயோதி விஸயக்³க³ஹணம் ந விஸயவிஸேஸத³ஸ்ஸனத்த²ம், அத² கோ² யாதி³ஸே விஸயே ஆனுபா⁴வகோ³சரவிஸேஸா ஹோந்தி, தாதி³ஸஸ்ஸ ரூபவிஸயஸ்ஸ த³ஸ்ஸனத்த²ந்தி தீ³பேதி, ஸதி³ஸஸ்ஸ வா விஸயஸ்ஸ ஆனுபா⁴வகோ³சரவிஸேஸோவ விஸேஸம்.

ந ச மம்ஸசக்கு²மேவ தி³ப்³ப³சக்கூ²தி இச்ச²தீதி த⁴ம்முபத்த²த்³த⁴காலே புரிமம் மம்ஸசக்கு²மேவாதி ந இச்ச²தீதி அதி⁴ப்பாயோ. மம்ஸசக்கு²ஸ்ஸ உப்பாதோ³ மக்³கோ³தி மம்ஸசக்கு²பச்சயதாத³ஸ்ஸனத்த²மேவ வுத்தம், ந தேன அனுபாதி³ன்னதாஸாத⁴னத்த²ம். ரூபாவசரிகானந்தி ரூபாவசரஜ்ஜா²னபச்சயேன உப்பன்னானி மஹாபூ⁴தானி ரூபாவசரிகானீதி ஸோ இச்ச²தீதி அதி⁴ப்பாயோ. ஏஸ நயோ ‘‘அரூபாவசரிகான’’ந்தி ஏத்தா²பி. அரூபாவசரக்க²ணே ரூபாவசரசித்தஸ்ஸ அபா⁴வா படிக்கி²பதீதி தஸ்மிம்யேவ க²ணே ரூபாவசரம் ஹுத்வா அரூபாவசரம் ந ஜாதந்தி படிக்கி²பதீதி அதி⁴ப்பாயோ.

374. கிஞ்சாபி தி³ப்³ப³சக்கு²னோ த⁴ம்முபத்த²த்³த⁴ஸ்ஸ பஞ்ஞாசக்கு²பா⁴வம் ந இச்ச²தி, யேன தீணி சக்கூ²னி த⁴ம்முபத்த²ம்பே⁴ன சக்கு²ந்தரபா⁴வம் வத³தோ ப⁴வேய்யுந்தி அதி⁴ப்பாயோ.

தி³ப்³ப³சக்கு²கதா²வண்ணனா நிட்டி²தா.