1. அனுலோமபச்சனீகவண்ணனா

1. மாயாய அமணிஆத³யோ மணிஆதி³ஆகாரேன தி³ஸ்ஸமானா ‘‘மாயா’’தி வுத்தா. அபூ⁴தேன மணிஉத³காதி³ஆகாரேன க³ய்ஹமானா மாயாமரீசிஆத³யோ அபூ⁴தஞ்ஞேய்யாகாரத்தா அஸச்சிகட்டா². யோ ததா² ந ஹோதி, ஸோ ஸச்சிகட்டோ²தி த³ஸ்ஸேந்தோ ஆஹ ‘‘மாயா…பே… பூ⁴தத்தோ²’’தி. அனுஸ்ஸவாதி³வஸேன க³ய்ஹமானோ ததா²பி ஹோதி அஞ்ஞதா²பீதி தாதி³ஸோ ஞேய்யோ ந பரமத்தோ², அத்தபச்சக்கோ² பன பரமத்தோ²தி த³ஸ்ஸேந்தோ ஆஹ ‘‘அனுஸ்ஸவா…பே… உத்தமத்தோ²’’தி.

ச²லவாத³ஸ்ஸாதி அத்தீ²தி வசனஸாமஞ்ஞேன அத்தீ²தி வுத்தேஹி ரூபாதீ³ஹி ஸாமஞ்ஞவசனஸ்ஸாதி அதி⁴ப்பாயோ. ‘‘ஸோ ஸச்சி…பே… லத்³தி⁴ம் க³ஹேத்வா ஆமந்தாதி படிஜானாதீ’’தி வசனதோ பன ‘‘ச²லவாத³ஸ்ஸா’’தி ந ஸக்கா வத்தும். ந ஹி லத்³தி⁴ ச²லந்தி. ஓகாஸம் அத³த³மானோதி பதிட்ட²ம் பச்சி²ந்த³ந்தோ. யதி³ ஸச்சிகட்டே²ன உபலப்³ப⁴தி, ரூபாத³யோ விய உபலப்³பே⁴ய்ய, ததா² அனுபலப்³ப⁴னீயதோ ந தவ வாதோ³ திட்ட²தீதி நிவத்தேந்தோதி அதி⁴ப்பாயோ. தம் ஸந்தா⁴யாதி ‘‘யோ ஸச்சிகட்டோ²’’தி ஏத்த² வுத்தோ யோ ஸச்சிகட்டோ², ஸோ ஸப்பச்சயாதி³பா⁴வேன தீ³பிதோ ‘‘ரூபஞ்ச உபலப்³ப⁴தீ’’திஆதீ³ஸு ஆக³தோ த⁴ம்மப்பபே⁴தோ³தி த³ஸ்ஸேதி.

‘‘தேன ஸச்சிகட்ட²பரமத்தே²னா’’தி வத்வா ‘‘தேனாகாரேனா’’தி வத³தோ அயமதி⁴ப்பாயோ – ஸச்சிகட்ட²பரமத்தா²காரேன உபலப்³ப⁴மானம் ஸச்சிகட்ட²பரமத்தே²ன உபலப்³ப⁴மானம் நாம ஹோதீதி. அஞ்ஞதா² ததோதி தஸ்ஸ தேனாகாரேனாதி வத்தப்³ப³ம் ஸியா. கோ பனேதிஸ்ஸா புரிமபுச்சா²ய ச விஸேஸோதி? புரிமபுச்சா²ய ஸத்தபஞ்ஞாஸவிதோ⁴ த⁴ம்மப்பபே⁴தோ³ யதா² பூ⁴தேன ஸபா⁴வத்தே²ன உபலப்³ப⁴தி, ஏவம் புக்³க³லோ உபலப்³ப⁴தீதி வுத்தம். இத⁴ பன பூ⁴தஸபா⁴வத்தே²ன உபலப்³ப⁴மானோ ஸோ த⁴ம்மப்பபே⁴தோ³ யேன ருப்பனாதி³ஸப்பச்சயாதி³ஆகாரேன உபலப்³ப⁴தி, கிம் தேனாகாரேன புக்³க³லோபி உபலப்³ப⁴தீதி ஏஸ விஸேஸோ. யதா² பன ரூபம் விய பூ⁴தஸபா⁴வத்தே²ன உபலப்³ப⁴மானா வேத³னா ந ருப்பனாகாரேன உபலப்³ப⁴தி, ஏவம் த⁴ம்மப்பபே⁴தோ³ விய பூ⁴தஸபா⁴வத்தே²ன உபலப்³ப⁴மானோ புக்³க³லோ ந ருப்பனாதி³ஸப்பச்சயாதி³ஆகாரேன உபலப்³ப⁴தீதி ஸக்கா பரவாதி³னா வத்துந்தி அசோத³னீயம் ஏதம் ஸியா. அவஜானனஞ்ச தஸ்ஸ யுத்தந்தி நிக்³க³ஹோ ச ந காதப்³போ³. த⁴ம்மப்பபே⁴த³தோ பன அஞ்ஞஸ்ஸ ஸச்சிகட்ட²ஸ்ஸ அஸித்³த⁴த்தா த⁴ம்மப்பபே⁴தா³காரேனேவ சோதே³தி. அவஜானனேனேவ நிக்³க³ஹம் த³ஸ்ஸேதி. அனுஜானனாவஜானனபக்கா² ஸாமஞ்ஞவிஸேஸேஹி படிஞ்ஞாபடிக்கே²பபக்கா² அனுலோமபடிலோமபக்கா² பட²மது³தியனயாதி அயமேதேஸம் விஸேஸோ வேதி³தப்³போ³.

‘‘தேன வத ரே வத்தப்³பே³’’தி வத³ந்தோ வத்தப்³ப³ஸ்ஸ அவசனே தோ³ஸம் பாபேதீதி இமினா அதி⁴ப்பாயேன ‘‘நிக்³க³ஹஸ்ஸ பாபிதத்தா’’தி வுத்தந்தி த³ட்ட²ப்³ப³ம். ‘‘ஏவமேதம் நிக்³க³ஹஸ்ஸ ச அனுலோமபடிலோமதோ சதுன்னம் பாபனாரோபனஞ்ச வுத்தத்தா உபலப்³ப⁴தீதிஆதி³கம் அனுலோமபஞ்சகம் நாமா’’தி வுத்தம், அனுலோமபடிலோமதோ பன த்³வீஹி ட²பனாஹி ஸஹ ஸத்தகேன ப⁴விதப்³ப³ம், தம்வஜ்ஜனே வா காரணம் வத்தப்³ப³ம். யம் பன வக்க²தி ‘‘ட²பனா நாம பரவாதீ³பக்க²ஸ்ஸ ட²பனதோ ‘அயம் தவ தோ³ஸோ’தி த³ஸ்ஸேதும் ட²பனமத்தமேவ ஹோதி, ந நிக்³க³ஹஸ்ஸ வா படிகம்மஸ்ஸ வா பாகடபா⁴வகரண’’ந்தி (கதா². அட்ட². 2). தேனாதி⁴ப்பாயேன இதா⁴பி ட²பனாத்³வயம் வஜ்ஜேதி. யதா² பன தத்த² படிகம்மபஞ்சகபா⁴வம் அவத்வா படிகம்மசதுக்கபா⁴வம் வக்க²தி, ஏவமிதா⁴பி நிக்³க³ஹசதுக்கபா⁴வோ வத்தப்³போ³ ஸியா. ஸுத்³தி⁴கனிக்³க³ஹஸ்ஸ பன நிக்³க³ஹப்பதா⁴னத்தா உத்³தே³ஸபா⁴வேன வுத்தோ நிக்³க³ஹோவ விஸும் வுத்தோதி த³ட்ட²ப்³போ³. யே பன ‘‘அயதா²பூ⁴தனிக்³க³ஹத்தா தத்த² படிகம்மம் விஸும் ந வுத்த’’ந்தி வத³ந்தி, தேஸம் து³தியே வாத³முகே² நிக்³க³ஹசதுக்கபா⁴வோ படிகம்மபஞ்சகபா⁴வோ ச ஆபஜ்ஜதி.

2. அத்தனா அதி⁴ப்பேதம் ஸச்சிகட்ட²மேவாதி ஸம்முதிஸச்சம் ஸந்தா⁴யாதி அதி⁴ப்பாயோ. வக்க²தி ஹி ‘‘ஸுத்³த⁴ஸம்முதிஸச்சம் வா பரமத்த²மிஸ்ஸகம் வா ஸம்முதிஸச்சம் ஸந்தா⁴ய ‘யோ ஸச்சிகட்டோ²’தி புன அனுயோகோ³ பரவாதி³ஸ்ஸா’’தி (கதா². அட்ட². 6). தத்த² யதி³ பரவாதி³னா அத்தனா அதி⁴ப்பேதஸச்சிகட்டோ² ஸம்முதிஸச்சம், ஸம்முதிஸச்சாகாரேன புக்³க³லோ உபலப்³ப⁴தீதி வத³ந்தேன ஸமானலத்³தி⁴கோ நப்படிஸேதி⁴தப்³போ³, கதா² ஏவாயம் நாரபி⁴தப்³பா³. அத² ஸகவாதி³னா அத்தனா ச அதி⁴ப்பேதஸச்சிகட்ட²ம்யேவ ஸந்தா⁴ய பரவாதீ³ ‘‘யோ ஸச்சிகட்டோ²’’திஆதி³மாஹாதி அயமத்தோ². ஸகவாதி³னா ஸம்முதிஸச்சம்யேவ ஸச்சிகட்டோ²தி அதி⁴ப்பேதந்தி ஆபஜ்ஜதி. யதி³ உப⁴யம் அதி⁴ப்பேதம், புன ‘‘ஸம்முதிஸச்சபரமத்த²ஸச்சானி வா ஏகதோ கத்வாபி ஏவமாஹா’’தி ந வத்தப்³ப³ம் ஸியாதி. யதி³ ச த்³வேபி ஸச்சானி ஸச்சிகட்ட²பரமத்தா², ஸச்சிகட்டே²கதே³ஸேன உபலத்³தி⁴ம் இச்ச²ந்தேன ‘‘புக்³க³லோ உபலப்³ப⁴தி ஸச்சிகட்ட²பரமத்தே²னா’’திஆதி³ அனுயோகோ³ ந காதப்³போ³, ந ச ஸச்சிகட்டே²கதே³ஸேன அனுயோகோ³ யுத்தோ. ந ஹி வேத³யிதாகாரேன உபலப்³ப⁴மானா வேத³னா ருப்பனாகாரேன உபலப்³ப⁴தீதி அனுயுஞ்ஜிதப்³பா³, ந ச பரவாதீ³ ருப்பனாதி³ஸபா⁴வம் புக்³க³லம் இச்ச²தி, அத² கோ² ஸச்சிகட்ட²பரமத்த²மேவாதி. பரமத்த²ஸச்சதோ அஞ்ஞஸ்மிம் ஸச்சிகட்டே² விஜ்ஜமானே நாஸ்ஸ பரமத்த²ஸச்சதா அனுயுஞ்ஜிதப்³பா³. அஸச்சிகட்டே² ஸச்சிகட்ட²வோஹாரம் ஆரோபேத்வா தம் ஸந்தா⁴ய புச்ச²தீதி வத³ந்தானம் வோஹரிதஸச்சிகட்ட²ஸ்ஸ அத்தனா அதி⁴ப்பேதஸச்சிகட்ட²தா ந யுத்தா. வோஹரிதபரமத்த²ஸச்சிகட்டா²னஞ்ச த்³வின்னம் ஸச்சிகட்ட²பா⁴வே வுத்தனயோவ தோ³ஸோ. ஸம்முதிஸச்சாகாரேன உபலப்³ப⁴மானஞ்ச பூ⁴தஸபா⁴வத்தே²ன உபலப்³பே⁴ய்ய வா ந வா. யதி³ பூ⁴தஸபா⁴வத்தே²ன உபலப்³ப⁴தி, புக்³க³லோபி உபலப்³ப⁴தி ஸச்சிகட்ட²பரமத்தே²னாதி அனுஜானந்தோ நானுயுஞ்ஜிதப்³போ³. அத² ந பூ⁴தஸபா⁴வத்தே²ன, தம்வினிமுத்தோ ஸம்முதிஸச்சஸ்ஸ ஸச்சிகட்ட²பரமத்தா²காரோ ந வத்தப்³போ³ அஸித்³த⁴த்தா. வக்க²தி ச ‘‘யதா² ரூபாத³யோ பச்சத்தலக்க²ணஸாமஞ்ஞலக்க²ணவஸேன அத்தி², ந ஏவம் புக்³க³லோ’’தி. தஸ்மா மக்³கி³தப்³போ³ ஏத்த² அதி⁴ப்பாயோ.

த்³வின்னம் ஸச்சானந்தி ஏத்த² ஸச்சத்³வயாகாரேன அனுபலப்³ப⁴னீயதோ அனுஞ்ஞேய்யமேதம் ஸியா, ந வா கிஞ்சி வத்தப்³ப³ம். யதா² ஹி ஏகதே³ஸேன பரமத்தா²காரேன அனுபலப்³ப⁴னீயதா அனுஜானனஸ்ஸ ந காரணம், ஏவம் ஏகதே³ஸேன ஸம்முதியாகாரேன உபலப்³ப⁴னீயதா படிக்கே²பஸ்ஸ சாதி மக்³கி³தப்³போ³ ஏத்தா²பி அதி⁴ப்பாயோ. நுபலப்³ப⁴தீதி வசனஸாமஞ்ஞமத்தந்தி நுபலப்³ப⁴தீதி இத³மேவ வசனம் அனுஞ்ஞாதம் படிக்கி²த்தஞ்சாதி ஏதம் ச²லவாத³ம் நிஸ்ஸாயாதி அதி⁴ப்பாயோ. யதா² உபலப்³ப⁴தீதி ஏதஸ்ஸேவ அனுஜானனபடிக்கே²பேஹி அஹம் நிக்³க³ஹேதப்³போ³, ஏவம் நுபலப்³ப⁴தீதி ஏதஸ்ஸேவ அனுஜானனபடிக்கே²பேஹி த்வந்தி ஏவம் ஸம்ப⁴வந்தஸ்ஸ ஸாமஞ்ஞேன அஸம்ப⁴வந்தஸ்ஸ கப்பனம் பனேத்த² ச²லவாதோ³ ப⁴விதும் அரஹதி. தேன நுபலப்³ப⁴தீதி வசனஸாமஞ்ஞமத்தம் ச²லவாத³ஸ்ஸ காரணத்தா ‘‘ச²லவாதோ³’’தி வுத்தந்தி த³ட்ட²ப்³ப³ம். வசனஸாமஞ்ஞமத்தஞ்ச ச²லவாத³ஞ்ச நிஸ்ஸாயாதி வா அத்தோ². ட²பனா நிக்³க³ஹப்படிகம்மானம் பாகடபா⁴வகரணம் ந ஹோதீதி இத³ம் விசாரேதப்³ப³ம். ந ஹி பக்க²ட்ட²பனேன வினா புரிமம் அனுஜானித்வா பச்சி²மஸ்ஸ அவஜானனம், பச்சி²மம் வா அவஜானந்தஸ்ஸ புரிமானுஜானனம் மிச்சா²தி ஸக்கா ஆரோபேதுந்தி.

3. தவாதி, படிஜானந்தந்தி ச பச்சத்தே ஸாமிஉபயோக³வசனானீதி அதி⁴ப்பாயேன ‘‘த்வம்யேவ படிஜானந்தோ’’தி ஆஹ.

4-5. சதூஹி பாபனாரோபனாஹி நிக்³க³ஹஸ்ஸ உபனீதத்தாதி ‘‘து³ன்னிக்³க³ஹிதா ச ஹோம, ஹஞ்சீ’’திஆதி³னா தயா மம கதோ நிக்³க³ஹோ, மயா தவ கதோ நிக்³க³ஹோ விய மிச்சா²தி ஏவம் தேன அனுலோமபஞ்சகே சதூஹி பாபனாரோபனாஹி கதஸ்ஸ நிக்³க³ஹஸ்ஸ தேன நியாமேன து³க்கடபா⁴வஸ்ஸ அத்தனா கதனிக்³க³ஹேன ஸஹ உபனீதத்தா அனிக்³க³ஹபா⁴வஸ்ஸ வா உபக³மிதத்தாதி அத்தோ² த³ட்ட²ப்³போ³. ஏவமேவ தேன ஹி யம் நிக்³க³ண்ஹாஸி ஹஞ்சி…பே… இத³ம் தே மிச்சா²தி ஏதஸ்ஸ அனிக்³க³ஹபா⁴வனிக³மனஸ்ஸேவ நிக்³க³மனசதுக்கதா வேதி³தப்³பா³.

அனுலோமபச்சனீகவண்ணனா நிட்டி²தா.

2. பச்சனீகானுலோமவண்ணனா

7-10. ‘‘அத்தனோ லத்³தி⁴ம் நிஸ்ஸாய படிஞ்ஞா பரவாதி³ஸ்ஸா’’தி வத்வா புன ‘‘பரமத்த²வஸேன புக்³க³லஸ்ஸ அபா⁴வதோ படிக்கே²போ பரவாதி³ஸ்ஸா’’தி வுத்தம். தத்ராயம் படிக்கே²போ அத்தனோ லத்³தி⁴யா யதி³ கதோ, பரமத்த²தோ அஞ்ஞேன ஸச்சிகட்ட²பரமத்தே²ன புக்³க³லோ உபலப்³ப⁴தீதி அயமஸ்ஸ லத்³தீ⁴தி ஆபஜ்ஜதி. ததா² ச ஸதி நாயம் ஸம்முதிஸச்சவஸேன உபலத்³தி⁴ம் இச்ச²ந்தேன நிக்³க³ஹேதப்³போ³. அத² அத்தனோ லத்³தி⁴ம் நிக்³கூ³ஹித்வா பரஸ்ஸ லத்³தி⁴வஸேன படிக்கி²பதி, புரிமபடிஞ்ஞாய அவிரோதி⁴தத்தா ந நிக்³க³ஹேதப்³போ³. ந ஹி அத்தனோ ச பரஸ்ஸ ச லத்³தி⁴ம் வத³ந்தஸ்ஸ தோ³ஸோ ஆபஜ்ஜதீதி. அத்தனோ பன லத்³தி⁴யா படிஜானித்வா பரலத்³தி⁴யா படிக்கி²பந்தேன அத்தனோ லத்³தி⁴ம் ச²ட்³டே³த்வா பரலத்³தி⁴ க³ஹிதா ஹோதீதி நிக்³க³ஹேதப்³போ³தி அயமேத்த² அதி⁴ப்பாயோ ஸியா.

பச்சனீகானுலோமவண்ணனா நிட்டி²தா.

ஸுத்³த⁴ஸச்சிகட்ட²வண்ணனா நிட்டி²தா.

2. ஓகாஸஸச்சிகட்டோ²

1. அனுலோமபச்சனீகவண்ணனா

11. ஸப்³ப³த்தா²தி ஸப்³ப³ஸ்மிம் ஸரீரேதி அயமத்தோ²தி த³ஸ்ஸேந்தோ ஆஹ ‘‘ஸரீரம் ஸந்தா⁴யா’’தி. தத்தா²தி தஸ்மிம் ஸம்கி²த்தபாடே². யஸ்மா ஸரீரம் ஸந்தா⁴ய ‘‘ஸப்³ப³த்த² ந உபலப்³ப⁴தீ’’தி வுத்தே ஸரீரதோ ப³ஹி உபலப்³ப⁴தீதி ஆபஜ்ஜதி, தஸ்மா பச்சனீகே படிக்கே²போ ஸகவாதி³ஸ்ஸாதி ஏதேன ந கேனசி ஸபா⁴வேன புக்³க³லோ உபலப்³ப⁴தீதி அயமத்தோ² வுத்தோ ஹோதி. ந ஹி கேனசி ஸபா⁴வேன உபலப்³ப⁴மானஸ்ஸ ஸரீரதத³ஞ்ஞாவிமுத்தோ உபலத்³தி⁴ஓகாஸோ அத்தீ²தி.

3. காலஸச்சிகட்டோ²

1. அனுலோமபச்சனீகவண்ணனா

12. புரிமபச்சி²மஜாதிகாலஞ்சாதி மஜ்ஜி²மஜாதிகாலே உபலப்³ப⁴மானஸ்ஸ தஸ்ஸேவ புரிமபச்சி²மஜாதிகாலேஸு உபலத்³தி⁴ம் ஸந்தா⁴யாதி அதி⁴ப்பாயோ. ஸேஸம் பட²மனயே வுத்தஸதி³ஸமேவாதி இமேஸு தீஸு பட²மே ‘‘ஸப்³ப³த்தா²’’தி ஏதஸ்மிம் நயே வுத்தஸதி³ஸமேவ, கிம் தம்? பாட²ஸ்ஸ ஸம்கி²த்ததாதி அத்தோ². இதா⁴பி ஹி யஸ்மா ‘‘ஸப்³ப³தா³ ந உபலப்³ப⁴தீ’’தி வுத்தே ஏகதா³ உபலப்³ப⁴தீதி ஆபஜ்ஜதி, தஸ்மா பச்சனீகே படிக்கே²போ ஸகவாதி³ஸ்ஸாதி யோஜேதப்³ப³ந்தி.

4. அவயவஸச்சிகட்டோ²

1. அனுலோமபச்சனீகவண்ணனா

13. ததியனயே ச யஸ்மா ‘‘ஸப்³பே³ஸு ந உபலப்³ப⁴தீ’’தி வுத்தே ஏகஸ்மிம் உபலப்³ப⁴தீதி ஆபஜ்ஜதி, தஸ்மா பச்சனீகே படிக்கே²போ ஸகவாதி³ஸ்ஸாதி யோஜேதப்³ப³ம். தேனாஹ ‘‘தாதி³ஸமேவா’’தி.

ஓகாஸாதி³ஸச்சிகட்டோ²

2. பச்சனீகானுலோமவண்ணனா

14. தத்த² அனுலோமபஞ்சகஸ்ஸாதிஆதி³ம்ஹி அனுலோமபஞ்சகந்தி நிக்³க³ஹபஞ்சகம், பச்சனீகந்தி ச படிகம்மம் வுத்தந்தி த³ட்ட²ப்³ப³ம். தத்த² அனுலோமபஞ்சகஸ்ஸ ‘‘ஸப்³ப³த்த² புக்³க³லோ நுபலப்³ப⁴தீ’’திஆதி³கஸ்ஸ அத்தோ² ‘‘ஸப்³ப³த்த² புக்³க³லோ நுபலப்³ப⁴தீ’’திஆதி³பாளிம் ஸம்கி²பித்வா ஆக³தே ஸரூபேன அவுத்தே ‘‘யஸ்மா ஸரீரம் ஸந்தா⁴யா’’திஆதி³னா (கதா². அட்ட². 11) வுத்தனயேன வேதி³தப்³போ³, பச்சனீகஸ்ஸ ச ‘‘ஸப்³ப³த்த² புக்³க³லோ உபலப்³ப⁴தீ’’திஆதி³கஸ்ஸ படிகம்மகரணவஸேன வுத்தஸ்ஸ அத்தோ² படிகம்மாதி³பாளிம் ஸம்கி²பித்வா ஆதி³மத்தத³ஸ்ஸனேன ஆக³தே ‘‘புக்³க³லோ உபலப்³ப⁴தீ’’திஆதி³ம்ஹி அனுலோமே ‘‘ஸப்³ப³த்தா²தி ஸரீரம் ஸந்தா⁴ய அனுயோகோ³ ஸகவாதி³ஸ்ஸா’’திஆதி³னா (கதா². அட்ட². 11) வுத்தனயேன வேதி³தப்³போ³தி ஏவமத்தோ² த³ட்ட²ப்³போ³. அத² வா தத்தா²தி யம் ஆரத்³த⁴ம், தஸ்மிந்தி ஏவம் அத்த²ம் அக்³க³ஹேத்வா தத்த² தேஸு தீஸு முகே²ஸூதி அத்தோ² க³ஹேதப்³போ³. அனுலோமபஞ்சகமூலகா சேத்த² ஸப்³பா³னுலோமபச்சனீகபஞ்சகபாளி அனுலோமபஞ்சகஸ்ஸ பாளீதி வுத்தா, ததா² பச்சனீகானுலோமபஞ்சகபாளி ச பச்சனீகஸ்ஸ பாளீதி. தம் ஸம்கி²பித்வா படிகம்மவஸேன ஆக³தே ஸரூபேன அவுத்தே ‘‘புக்³க³லோ நுபலப்³ப⁴தீ’’திஆதி³கே பச்சனீகே ‘‘உபலப்³ப⁴தீ’’திஆதி³கே அனுலோமே ச அத்தோ² ஹேட்டா² ஸுத்³தி⁴கஸச்சிகட்டே² வுத்தனயேனேவ வேதி³தப்³போ³தி வுத்தம் ஹோதி.

ஸச்சிகட்ட²வண்ணனா நிட்டி²தா.

5. ஸுத்³தி⁴கஸம்ஸந்த³னவண்ணனா

17-27. ரூபாதீ³ஹி ஸத்³தி⁴ம் ஸச்சிகட்ட²ஸம்ஸந்த³னந்தி ஸச்சிகட்ட²ஸ்ஸ புக்³க³லஸ்ஸ ரூபாதீ³ஹி ஸத்³தி⁴ம் ஸம்ஸந்த³னம், ஸச்சிகட்டே² வா ரூபாதீ³ஹி ஸத்³தி⁴ம் புக்³க³லஸ்ஸ ஸம்ஸந்த³னந்தி அதி⁴ப்பாயோ. புக்³க³லோ ரூபஞ்சாதி ச-காரஸ்ஸ ஸமுச்சயத்த²த்தா யதா² ரூபந்தி ஏவம் நித³ஸ்ஸனவஸேன வுத்தோ அத்தோ² விசாரேதப்³போ³. ரூபாதீ³ஹி அஞ்ஞோ அனஞ்ஞோ ச புக்³க³லோ ந வத்தப்³போ³தி லத்³தி⁴ ஸமயோ. ‘‘அஞ்ஞம் ஜீவம் அஞ்ஞம் ஸரீரந்தி அப்³யாகதமேதம் ப⁴க³வதா’’திஆதி³கம் (ஸம். நி. 4.416) ஸுத்தம். அனுஞ்ஞாயமானே தது³ப⁴யவிரோதோ⁴ ஆபஜ்ஜதீதி இமமத்த²ம் ஸந்தா⁴யாஹ ‘‘ஸமயஸுத்தவிரோத⁴ம் தி³ஸ்வா’’தி.

த⁴ம்மதோதி பாளிதோ. ‘‘படிகம்மசதுக்காதீ³னி ஸம்கி²த்தானி. பரவாதீ³…பே… த³ஸ்ஸிதானீ’’தி வத³ந்தேஹி புக்³க³லோ நுபலப்³ப⁴தி…பே… ஆஜானாஹி படிகம்மந்தி ஏத்த² ஆஜானாஹி நிக்³க³ஹந்தி பாடோ² தி³ட்டோ² ப⁴விஸ்ஸதி. அஞ்ஞத்தம் படிஜானாபனத்த²ந்தி யதா² மயா அஞ்ஞத்தம் வத்தப்³ப³ம், ததா² ச தயாபி தம் வத்தப்³ப³ந்தி அஞ்ஞத்தபடிஞ்ஞாய சோத³னத்த²ந்தி அத்தோ². ஸம்முதிபரமத்தா²னம் ஏகத்தனானத்தபஞ்ஹஸ்ஸ ட²பனீயத்தாதி அப்³யாகதத்தாதி அத்தோ². யதி³ ட²பனீயத்தா படிக்கி²பிதப்³ப³ம், பரேனபி ட²பனீயத்தா லத்³தி⁴மேவ நிஸ்ஸாய படிக்கே²போ கதோதி ஸோபி ந நிக்³க³ஹேதப்³போ³ ஸியா. பரோ பன புக்³க³லோதி கஞ்சி ஸபா⁴வம் க³ஹேத்வா தஸ்ஸ ட²பனீயத்தம் இச்ச²தி, ஸதி ச ஸபா⁴வே ட²பனீயதா ந யுத்தாதி நிக்³க³ஹேதப்³போ³. ஸம்முதி பன கோசி ஸபா⁴வோ நத்தி². தேனேவஸ்ஸ ஏகத்தனானத்தபஞ்ஹஸ்ஸ ட²பனீயதம் வத³ந்தோ ந நிக்³க³ஹேதப்³போ³தி ஸகவாதி³னா படிக்கே²போ கதோதி அயமேத்த² அதி⁴ப்பாயோ யுத்தோ.

ஸுத்³தி⁴கஸம்ஸந்த³னவண்ணனா நிட்டி²தா.

6. ஓபம்மஸம்ஸந்த³னவண்ணனா

28-36. உபலத்³தி⁴ஸாமஞ்ஞேன அஞ்ஞத்தபுச்சா² சாதி இத³ஞ்ச த்³வின்னம் ஸமானதா நோ அஞ்ஞத்தஸ்ஸ காரணம் யுத்தம், அத² கோ² விஸும் அத்தனோ ஸபா⁴வேன ஸச்சிகட்ட²பரமத்தே²ன உபலப்³ப⁴னீயதாதி விசாரேதப்³ப³ம். ‘‘ஏகவீஸாதி⁴கானீ’’தி புரிமபாடோ², வீஸாதி⁴கானீதி பன படி²தப்³ப³ம்.

37-45. ‘‘அத்தி² புக்³க³லோ’’தி ஸுத்தம் அனுஜானாபேந்தேன உபலத்³தி⁴ அனுஜானிதா ஹோதீதி மஞ்ஞமானோ ஆஹ ‘‘உபலத்³தி⁴ஸாமஞ்ஞம் ஆரோபேத்வா’’தி. வீஸாதி⁴கானி நவ படிகம்மபஞ்சகஸதானி த³ஸ்ஸிதானீதி ஏதேன ஸுத்³தி⁴கஸம்ஸந்த³னேபி ‘‘ஆஜானாஹி படிகம்ம’’மிச்சேவ பாடோ²தி விஞ்ஞாயதி. யஞ்ச வாத³முகே²ஸு ஸுத்³தி⁴கஸச்சிகட்டே² ‘‘படிகம்மசதுக்க’’ந்தி வுத்தம், தம்பி ‘‘படிகம்மபஞ்சக’’ந்தி.

ஓபம்மஸம்ஸந்த³னவண்ணனா நிட்டி²தா.

7. சதுக்கனயஸம்ஸந்த³னவண்ணனா

46-52. ஏகத⁴ம்மதோபி அஞ்ஞத்தம் அனிச்ச²ந்தோ ரூபாதி³ஏகேகத⁴ம்மவஸேன நானுயுஞ்ஜிதப்³போ³. ஸமுதா³யதோ ஹி அயம் அஞ்ஞத்தம் அனிச்ச²ந்தோ ஏகதே³ஸதோ அனஞ்ஞத்தம் படிக்கி²பந்தோ ந நிக்³க³ஹாரஹோ ஸியாதி ஏதம் வசனோகாஸம் நிவத்தேதும் ‘‘அயஞ்ச அனுயோகோ³’’திஆதி³மாஹ. ஸகலந்தி ஸத்தபஞ்ஞாஸவிதோ⁴ த⁴ம்மப்பபே⁴தோ³ புக்³க³லோதி வா பரமத்த²ஸச்சம் புக்³க³லோதி வா ஏவம் ஸகலம் ஸந்தா⁴யாதி அத்தோ². ஏவம் ஸகலம் பரமத்த²ம் சிந்தேத்வா தந்திவஸேன அனுயோக³லக்க²ணஸ்ஸ ட²பிதத்தா ஸகலபரமத்த²தோ ச அஞ்ஞஸ்ஸ ஸச்சிகட்ட²ஸ்ஸ அபா⁴வா ஸச்சிகட்டே²ன புக்³க³லேன ததோ அஞ்ஞேன ந ப⁴விதப்³ப³ந்தி ‘‘ரூபம் புக்³க³லோ’’தி இமம் பஞ்ஹம் படிக்கி²பந்தஸ்ஸ நிக்³க³ஹாரோபனம் யுத்தந்தி அத்தோ².

ஸபா⁴க³வினிப்³போ⁴க³தோதி ரூபதோ அஞ்ஞஸபா⁴க³த்தாதி வுத்தம் ஹோதி. ஸப்³ப³த⁴ம்மாதி ரூபவஜ்ஜே ஸப்³ப³த⁴ம்மே வத³தி. ‘‘ரூபஸ்மிம் புக்³க³லோ’’தி ஏத்த² நிஸ்ஸயவினாஸே வினாஸாபத்திப⁴யேன படிக்கி²பதீதி அதி⁴ப்பாயேனாஹ ‘‘உச்சே²த³தி³ட்டி²ப⁴யேன சேவா’’தி. தீஸு பன ஸமயவிரோதே⁴ன படிக்கே²போ அதி⁴ப்பேதோ. ந ஹி ஸோ ஸக்காயதி³ட்டி²ம் இச்ச²தி, அபிச ஸஸ்ஸததி³ட்டி²ப⁴யேன படிக்கி²பதீதி யுத்தம் வத்தும். ஸக்காயதி³ட்டீ²ஸு ஹி பஞ்சேவ உச்சே²த³தி³ட்டி²யோ, ஸேஸாஸஸ்ஸததி³ட்டி²யோதி. அஞ்ஞத்ர ரூபாதி ஏத்த² ச ரூபவா புக்³க³லோதி அயமத்தோ² ஸங்க³ஹிதோதி வேதி³தப்³போ³.

சதுக்கனயஸம்ஸந்த³னவண்ணனா நிட்டி²தா.

நிட்டி²தா ச ஸம்ஸந்த³னகதா²வண்ணனா.

8. லக்க²ணயுத்திவண்ணனா

54. பச்சனீகானுலோமேதி இத³ம் யம் வக்க²தி ‘‘ச²லவஸேன பன வத்தப்³ப³ம் ‘ஆஜானாஹி படிகம்ம’ந்திஆதீ³’’தி (கதா². அட்ட². 54), தேன பன ந ஸமேதி. பச்சனீகானுலோமே ஹி பச்சனீகே ‘‘ஆஜானாஹி நிக்³க³ஹ’’ந்தி வத்தப்³ப³ம், ந பன ‘‘படிகம்ம’’ந்தி.

லக்க²ணயுத்திவண்ணனா நிட்டி²தா.

9. வசனஸோத⁴னவண்ணனா

55-59. புக்³க³லோ உபலப்³ப⁴தீதி பத³த்³வயஸ்ஸ அத்த²தோ ஏகத்தேதி ஏத்த² ததே³வ ஏகத்தம் பரேன ஸம்படிச்சி²தம் அஸம்படிச்சி²தந்தி விசாரேதப்³ப³மேதம். புக்³க³லஸ்ஸ ஹி அவிப⁴ஜிதப்³ப³தம், உபலப்³ப⁴தீதி ஏதஸ்ஸ விப⁴ஜிதப்³ப³தம் வத³ந்தோ விப⁴ஜிதப்³பா³விப⁴ஜிதப்³ப³த்தா²னம் உபலப்³ப⁴திபுக்³க³ல-ஸத்³தா³னம் கத²ம் அத்த²தோ ஏகத்தம் ஸம்படிச்சே²ய்யாதி? யதா² ச விப⁴ஜிதப்³பா³விப⁴ஜிதப்³ப³த்தா²னம் உபலப்³ப⁴தி-ரூப-ஸத்³தா³னம் தம் விபா⁴க³ம் வத³தோ ரூபம் கிஞ்சி உபலப்³ப⁴தி, கிஞ்சி ந உபலப்³ப⁴தீதி அயம் பஸங்கோ³ நாபஜ்ஜதி, ஏவம் ஏதஸ்ஸபி யதா²வுத்தவிபா⁴க³ம் வத³தோ யதா²ஆபாதி³தேன பஸங்கே³ன ந ப⁴விதப்³ப³ந்தி மக்³கி³தப்³போ³ ஏத்த² அதி⁴ப்பாயோ.

60. ‘‘ஸுஞ்ஞதோ லோகம் அவேக்க²ஸ்ஸூ’’தி (ஸு. நி. 1125) ஏதேன அத்த²தோ புக்³க³லோ நத்தீ²தி வுத்தம் ஹோதீதி ஆஹ ‘‘நத்தீ²திபி வுத்த’’ந்தி.

வசனஸோத⁴னவண்ணனா நிட்டி²தா.

10. பஞ்ஞத்தானுயோக³வண்ணனா

61-66. ரூபகாயாவிரஹம் ஸந்தா⁴ய ‘‘ரூபகாயஸப்³பா⁴வதோ’’தி ஆஹ. ‘‘ரூபினோ வா அரூபினோ வா’’தி (இதிவு. 90) ஸுத்தே ஆக³தபஞ்ஞத்திம் ஸந்தா⁴ய ‘‘ததா²ரூபாய ச பஞ்ஞத்தியா அத்தி²தாயா’’தி. வீதராக³ஸப்³பா⁴வதோதி காமீபா⁴வஸ்ஸ அனேகந்திகத்தா காமதா⁴துயா ஆயத்தத்தாபா⁴வதோ ச ‘‘காமீ’’தி ந வத்தப்³போ³தி படிக்கி²பதீதி அதி⁴ப்பாயோ.

67. காயானுபஸ்ஸனாயாதி காரணவசனமேதம், காயானுபஸ்ஸனாய காரணபூ⁴தாய ஏவம்லத்³தி⁴கத்தாதி அத்தோ². ஆஹச்ச பா⁴ஸிதந்தி ‘‘அஞ்ஞம் ஜீவம் அஞ்ஞம் ஸரீரந்தி அப்³யாகதமேதம் மயா’’தி (ம. நி. 2.128) ஆஹச்ச பா⁴ஸிதம்.

பஞ்ஞத்தானுயோக³வண்ணனா நிட்டி²தா.

11. க³திஅனுயோக³வண்ணனா

69-72. ‘‘த³ஸ்ஸேந்தோ ‘தேன ஹி புக்³க³லோ ஸந்தா⁴வதீ’திஆதி³மாஹா’’தி வுத்தம், ‘‘த³ஸ்ஸேந்தோ ‘ந வத்தப்³ப³ம் புக்³க³லோ ஸந்தா⁴வதீ’திஆதி³மாஹா’’தி பன ப⁴விதப்³ப³ம், த³ஸ்ஸேத்வாதி வா வத்தப்³ப³ம்.

91. யேன ரூபஸங்கா²தேன ஸரீரேன ஸத்³தி⁴ம் க³ச்ச²தீதி ஏத்த² ‘‘ரூபேன ஸத்³தி⁴ம் க³ச்ச²தீ’’தி வத³ந்தேன ‘‘ரூபம் புக்³க³லோ’’தி அனனுஞ்ஞாதத்தா யேனாகாரேன தம் ஜீவம் தம் ஸரீரந்தி இத³ம் ஆபஜ்ஜதி, ஸோ வத்தப்³போ³. அஸஞ்ஞூபபத்திம் ஸந்தா⁴யாதி நிரயூபக³ஸ்ஸ புக்³க³லஸ்ஸ அஸஞ்ஞூபக³ஸ்ஸ அரூபூபக³ஸ்ஸ ச அந்தராப⁴வம் ந இச்ச²தீதி சுதிதோ அனந்தரம் உபபத்திம் ஸந்தா⁴யாதி அத்தோ² த³ட்ட²ப்³போ³. யே பன சுதிகாலே உபபத்திகாலே ச அஸஞ்ஞூபபத்திகாலே ச அஸஞ்ஞஸத்தேஸு ஸஞ்ஞா அத்தீ²தி க³ஹேத்வா அஸஞ்ஞூபக³ஸ்ஸ ச அந்தராப⁴வம் இச்சே²ய்யும், தேஸம் அந்தராப⁴வபா⁴வதோ ‘‘அஸஞ்ஞூபபத்தி அவேத³னா’’தி ந ஸக்கா வத்துந்தி.

92. அவேத³னோதிஆதீ³ஸு தத³ஞ்ஞந்தி ஸஞ்ஞப⁴வதோ அஞ்ஞம் அஸஞ்ஞானேவஸஞ்ஞானாஸஞ்ஞாயதனுபபத்திம். நேவஸஞ்ஞானாஸஞ்ஞாயதனேபி ஹி ந வத்தப்³ப³ம் ஸஞ்ஞா அத்தீ²தி இச்ச²ந்தி.

93. யஸ்மா ரூபாதி³த⁴ம்மே வினா புக்³க³லோ நத்தீ²தி இந்த⁴னுபாதா³னோ அக்³கி³ விய இந்த⁴னேன ரூபாதி³உபாதா³னோ புக்³க³லோ ரூபாதி³னா வினா நத்தீ²தி லத்³தி⁴வஸேன வத³தி.

க³திஅனுயோக³வண்ணனா நிட்டி²தா.

12. உபாதா³பஞ்ஞத்தானுயோக³வண்ணனா

97. நீலம் ரூபம் உபாதா³ய நீலோதிஆதீ³ஸூதி ‘‘நீலம் ரூபம் உபாதா³ய நீலகஸ்ஸ புக்³க³லஸ்ஸ பஞ்ஞத்தீ’’தி ஏத்த² யோ புட்டோ² நீலம் உபாதா³ய நீலோதி, ததா³தீ³ஸூதி அத்தோ².

98. சே²கட்ட²ம் ஸந்தா⁴யாதி சே²கட்ட²ம் ஸந்தா⁴ய வுத்தம், ந குஸலபஞ்ஞத்திம். ‘‘குஸலம் வேத³னம் உபாதா³யா’’தி மஞ்ஞமானோ படிஜானாதீதி அத்தோ² த³ட்ட²ப்³போ³.

112. இதா³னி …பே… த³ஸ்ஸேதும் ‘‘யதா² ருக்க²’’ந்திஆதி³மாஹாதி புப்³ப³பக்க²ம் த³ஸ்ஸேத்வா உத்தரமாஹாதி வுத்தம் ஹோதி.

115. ‘‘யஸ்ஸ ரூபம் ஸோ ரூபவா’’தி உத்தரபக்கே² வுத்தம் வசனம் உத்³த⁴ரித்வா ‘‘யஸ்மா’’திஆதி³மாஹ.

116. சித்தானுபஸ்ஸனாவஸேனாதி சித்தானுபஸ்ஸனாவஸேன பரிதீ³பிதஸ்ஸ ஸராகா³தி³சித்தயோக³ஸ்ஸ வஸேனாதி அதி⁴ப்பாயோ.

118. யேனாதி சக்கு²ந்தி ‘‘யேனா’’தி வுத்தம் கரணம் சக்கு²ந்தி அத்தோ². சக்கு²மேவ ரூபம் பஸ்ஸதீதி விஞ்ஞாணனிஸ்ஸயபா⁴வூபக³மனமேவ சக்கு²ஸ்ஸ த³ஸ்ஸனம் நாம ஹோதீதி ஸந்தா⁴ய வத³தி.

உபாதா³பஞ்ஞத்தானுயோக³வண்ணனா நிட்டி²தா.

13. புரிஸகாரானுயோக³வண்ணனா

123. கரணமத்தந்தி கம்மானம் நிப்பா²த³கப்பயோஜகபா⁴வேன பவத்தா க²ந்தா⁴.

124. புரிமகம்மேன வினா புக்³க³லஸ்ஸ ஜாதி, ஜாதஸ்ஸ ச விஜ்ஜட்டா²னாதீ³ஸு ஸம்மா மிச்சா² வா பவத்தி நத்தீ²தி ஸந்தா⁴ய ‘‘புரிமகம்மமேவ தஸ்ஸா’’திஆதி³மாஹ.

125. கம்மவட்டஸ்ஸாதி ஏத்த² கம்மகாரகஸ்ஸ யோ காரகோ, தேனபி அஞ்ஞம் கம்மம் காதப்³ப³ம், தஸ்ஸ காரகேனபி அஞ்ஞந்தி ஏவம் கம்மவட்டஸ்ஸ அனுபச்சே²த³ம் வத³ந்தி. புக்³க³லஸ்ஸ காரகோ கம்மஸ்ஸ காரகோ ஆபஜ்ஜதீதி விசாரேதப்³ப³மேதம். மாதாபிதூஹி ஜனிததாதி³னா தஸ்ஸ காரகம் இச்ச²ந்தஸ்ஸ கம்மகாரகானம் காரகபரம்பரா ஆபஜ்ஜதீதி இத³ஞ்ச விசாரேதப்³ப³ம்.

170. ஸுத்தவிரோத⁴ப⁴யேனாதி ‘‘ஸோ கரோதி ஸோ படிஸம்வேத³யதீதி கோ², ப்³ராஹ்மண, அயமேகோ அந்தோ’’திஆதீ³ஹி (ஸம். நி. 2.46) விரோத⁴ப⁴யா.

171. ‘‘இத⁴ நந்த³தி பேச்ச நந்த³தீ’’தி (த⁴. ப. 18) வசனதோ கம்மகரணகாலே விபாகபடிஸம்வேத³னகாலே ச ஸோயேவாதி படிஜானாதீதி அதி⁴ப்பாயோ. ஸயம்கதம் ஸுக²து³க்க²ந்தி ச புட்டோ² ‘‘கிம் நு கோ², போ⁴ கோ³தம, ஸயம்கதம் ஸுக²ம் து³க்க²ந்தி? மா ஹேவம் கஸ்ஸபா’’திஆதி³ஸுத்தவிரோதா⁴ (ஸம். நி. 2.18) படிக்கி²பதி.

176. லத்³தி⁴மத்தமேவேதந்தி ஸோயேவேகோ நேவ ஸோ ஹோதி ந அஞ்ஞோதி இத³ம் பன நத்தே²வ, தஸ்மா ஏவம்வாதி³னோ அஸயம்காரந்திஆதி³ ஆபஜ்ஜதீதி அதி⁴ப்பாயோ. அபிசாதிஆதி³னா இத³ம் த³ஸ்ஸேதி – ந பரஸ்ஸ இச்சா²வஸேனேவ ‘‘ஸோ கரோதீ’’திஆதி³ அனுயோகோ³ வுத்தோ, அத² கோ² ‘‘ஸோ கரோதீ’’திஆதீ³ஸு ஏகம் அனிச்ச²ந்தஸ்ஸ இதரம், தஞ்ச அனிச்ச²ந்தஸ்ஸ அஞ்ஞம் ஆபன்னந்தி ஏவம் காரகவேத³கிச்சா²ய ட²த்வா ‘‘ஸோ கரோதீ’’திஆதீ³ஸு தம் தம் அனிச்சா²ய ஆபன்னவஸேனாபீதி. அத² வா ந கேவலம் ‘‘ஸோ கரோதீ’’திஆதீ³னம் ஸப்³பே³ஸம் ஆபன்னத்தா, அத² கோ² ஏகேகஸ்ஸேவ ச ஆபன்னத்தா அயம் அனுயோகோ³ கதோதி த³ஸ்ஸேதி. புரிமனயேனேவாதி ஏதேன ‘‘இத⁴ நந்த³தீ’’திஆதி³ ஸப்³ப³ம் படிஜானனாதி³காரணம் ஏகதோ யோஜேதப்³ப³ந்தி த³ஸ்ஸேதி.

புரிஸகாரானுயோக³வண்ணனா நிட்டி²தா.

கல்யாணவக்³கோ³ நிட்டி²தோ.

14. அபி⁴ஞ்ஞானுயோக³வண்ணனா

193. அபி⁴ஞ்ஞானுயோகா³தி³வஸேன அரஹத்தஸாத⁴னாதி ஏத்த² ‘‘நனு அத்தி² கோசி இத்³தி⁴ம் விகுப்³ப³தீ’’தி அபி⁴ஞ்ஞாஅனுயோகோ³ ச ‘‘ஹஞ்சி அத்தி² கோசி இத்³தி⁴ம் விகுப்³ப³தீ’’தி ட²பனா ச ‘‘தேன வத ரே’’திஆதி³ பாபனா ச ஆதி³ஸத்³த³ஸங்க³ஹிதோ அத்தோ²வ த³ட்ட²ப்³போ³. ஆஸவக்க²யஞாணம் பனேத்த² அபி⁴ஞ்ஞா வுத்தாதி தத³பி⁴ஞ்ஞாவதோ அரஹதோ ஸாத⁴னம் ‘‘அரஹத்தஸாத⁴னா’’தி ஆஹ. அரஹதோ ஹி ஸாத⁴னா தப்³பா⁴வஸ்ஸ ச ஸாத⁴னா ஹோதியேவாதி.

அபி⁴ஞ்ஞானுயோக³வண்ணனா நிட்டி²தா.

15-18. ஞாதகானுயோகா³தி³வண்ணனா

209. ததா²ரூபஸ்ஸாதி ததியகோடிபூ⁴தஸ்ஸ ஸச்சிகட்ட²ஸ்ஸ அபா⁴வாதி அதி⁴ப்பாயோ. ஏவம் பன படிக்கி²பந்தோ அஸச்சிகட்ட²ம் ததியகோடிபூ⁴தம் புக்³க³லம் வதே³ய்யாதி தாதி³ஸம் புக்³க³லம் இச்ச²ந்தோ ஹி ஸுத்தேன நிக்³க³ஹேதப்³போ³ ஸியா. கஸ்மா? ததா²ரூபஸ்ஸ ஸச்சிகட்ட²ஸ்ஸ அபா⁴வதோதி, ததா²ரூபஸ்ஸ கஸ்ஸசி ஸபா⁴வஸ்ஸ அபா⁴வதோ படிக்கே²பாரஹத்தா அத்தனோ லத்³தி⁴ம் நிகூ³ஹித்வா படிக்கே²போ பரவாதி³ஸ்ஸாதி அயமத்தோ² த³ட்ட²ப்³போ³.

ஞாதகானுயோகா³தி³வண்ணனா நிட்டி²தா.

19. படிவேதா⁴னுயோகா³தி³வண்ணனா

218. பரிக்³க³ஹிதவேத³னோதி வசனேன அபரிக்³க³ஹிதவேத³னஸ்ஸ ‘‘ஸுகி²தோஸ்மி, து³க்கி²தோஸ்மீ’’தி ஜானனம் பஜானனம் நாம ந ஹோதீதி த³ஸ்ஸேதி யோகா³வசரஸ்ஸ ஸுகு²மானம்பி வேத³னானம் பரிச்சே²த³னஸமத்த²தஞ்ச.

228. லக்க²ணவசனந்தி ரூபப்³ப⁴ந்தரக³மனம் ஸஹரூபபா⁴வோ, ப³ஹித்³தா⁴ நிக்க²மனம் வினாரூபபா⁴வோதி அதி⁴ப்பாயோ.

237. இமா கோ²தி ஓளாரிகோ அத்தபடிலாபோ⁴ மனோமயோ அத்தபடிலாபோ⁴ அரூபோ அத்தபடிலாபோ⁴தி இமா லோகஸ்ஸ ஸமஞ்ஞா, யாஹி ததா²க³தோ வோஹரதி அபராமஸம், யோ ஸச்சோ மோகோ⁴ வா ஸியா, தஸ்மிம் அனுபலப்³ப⁴மானேபி அத்தனி தத³னுபலப்³ப⁴தோயேவ பராமாஸம் அத்ததி³ட்டி²ம் அனுப்பாதே³ந்தோ லோகே அத்தபடிலாபோ⁴தி பவத்தவோஹாரவஸேனேவ வோஹரதீதி அயமேத்த² அத்தோ². ஏத்த² ச பச்சத்தஸாமஞ்ஞலக்க²ணவஸேன புக்³க³லஸ்ஸ அத்தி²தம் படிக்கி²பித்வா லோகவோஹாரேன அத்தி²தம் வத³ந்தேன புக்³க³லோதி கோசி ஸபா⁴வோ நத்தீ²தி வுத்தம் ஹோதி. ஸதி ஹி தஸ்மிம் அத்தனோ ஸபா⁴வேனேவ அத்தி²தா வத்தப்³பா³ ஸியா, ந லோகவோஹாரேனாதி. இமினா பன யதா² ஸமேதி, யதா² ச பராமாஸோ ந ஹோதி, ஏவம் இதோ புரிமா ச அத்த²வண்ணனா யோஜேதப்³பா³.

லோகஸம்முதிகாரணந்தி யஸ்மா லோகஸம்முதிவஸேன பவத்தம், தஸ்மா ஸச்சந்தி வுத்தம் ஹோதி. தத²லக்க²ணந்தி தத²காரணம். யஸ்மா த⁴ம்மானம் தத²தாய பவத்தம், தஸ்மா ஸச்சந்தி த³ஸ்ஸேதி.

படிவேதா⁴னுயோகா³தி³வண்ணனா நிட்டி²தா.

புக்³க³லகதா²வண்ணனா நிட்டி²தா.

2. பரிஹானிகதா²

1. வாத³யுத்திபரிஹானிகதா²வண்ணனா

239. ‘‘த்³வேமே, பி⁴க்க²வே, த⁴ம்மா ஸேக்க²ஸ்ஸ பி⁴க்கு²னோ பரிஹானாய ஸம்வத்தந்தீ’’தி (அ. நி. 2.185) இத³ம் ஸுத்தம் அரஹதோ பரிஹானிலத்³தி⁴யா ந நிஸ்ஸயோ, அத² கோ² அனாகா³மிஆதீ³னம் பரிஹானிலத்³தி⁴யா, தஸ்மா அரஹதோபி பரிஹானிம் இச்ச²ந்தீதி ஏத்த² பி-ஸத்³தே³ன அனாகா³மிஸ்ஸபி ஸகதா³கா³மிஸ்ஸபீதி யோஜேதப்³ப³ம்.

‘‘ததியஸ்மிம்பி முதி³ந்த்³ரியாவ அதி⁴ப்பேதா. தேஸஞ்ஹி ஸப்³பே³ஸம்பி பரிஹானி ந ஹோதீதி தஸ்ஸ லத்³தீ⁴’’தி புரிமபாடோ², முதி³ந்த்³ரியேஸ்வேவ பன அதி⁴ப்பேதேஸு பரிக்கே²போ ந காதப்³போ³ ஸியா, கதோ ச, தஸ்மா ‘‘ததியஸ்மிம்பி திக்கி²ந்த்³ரியாவ அதி⁴ப்பேதா. தேஸஞ்ஹி ஸப்³பே³ஸம்பி பரிஹானி ந ஹோதீதி தஸ்ஸ லத்³தீ⁴’’தி பட²ந்தி.

அயோனிஸோ அத்த²ம் க³ஹேத்வாதி ஸோதாபன்னோயேவ நியதோதி வுத்தோதி ஸோயேவ ந பரிஹாயதி, ந இதரேதி அத்த²ம் க³ஹேத்வா. ‘‘உபரிமக்³க³த்தா²யா’’தி வுத்தம் அத்த²ம் அக்³க³ஹேத்வா நியதோதி ஸோதாபத்திப²லா ந பரிஹாயதீதி ஏதமத்த²ம் க³ண்ஹீதி பன வத³ந்தி.

வாத³யுத்திபரிஹானிகதா²வண்ணனா நிட்டி²தா.

2. அரியபுக்³க³லஸம்ஸந்த³னபரிஹானிவண்ணனா

241. யம் பனேத்தா²திஆதி³ம்ஹி த³ஸ்ஸனமக்³க³ப²லே டி²தஸ்ஸ அனந்தரம் அரஹத்தப்பத்திம், ததோ பரிஹாயித்வா தத்த² ச டா²னம் இச்ச²ந்தோ புன வாயாமேன தத³னந்தரம் அரஹத்தப்பத்திம் ந இச்ச²தீதி விசாரேதப்³ப³மேதம்.

262. அவஸிப்பத்தோ ஜா²னலாபீ⁴தி ஸேக்கோ² வுத்தோதி த³ட்ட²ப்³போ³. புது²ஜ்ஜனோ பன வஸிப்பத்தோ அவஸிப்பத்தோ ச ஸமயவிமுத்தஅஸமயவிமுத்ததந்தியா அக்³க³ஹிதோ, ப⁴ஜாபியமானோ பன ஸமாபத்திவிக்க²ம்பி⁴தானம் கிலேஸானம் வஸேன ஸமயவிமுத்தபா⁴வம் ப⁴ஜேய்யாதி வுத்தோதி.

அரியபுக்³க³லஸம்ஸந்த³னபரிஹானிவண்ணனா நிட்டி²தா.

3. ஸுத்தஸாத⁴னபரிஹானிவண்ணனா

265. உத்தமஹீனபே⁴தோ³ ‘‘தத்ர யாயம் படிபதா³ ஸுகா² கி²ப்பாபி⁴ஞ்ஞா, ஸா உப⁴யேனேவ பணீதா அக்கா²யதீ’’திஆதி³ஸுத்தவஸேன (தீ³. நி. 3.152) வுத்தோ. ‘‘தி³ட்ட²ம் ஸுதம் முத’’ந்தி ஏத்த² விய முதஸத்³தோ³ பத்தப்³ப³ம் வத³தீதி ஆஹ ‘‘பு²ஸனாரஹ’’ந்தி.

267. அப்பத்தபரிஹானாய சேவ ஸம்வத்தந்தி யதா²கதஸன்னிட்டா²னஸ்ஸ ஸமயவிமுத்தஸ்ஸாதி அதி⁴ப்பாயோ.

ஸுத்தஸாத⁴னபரிஹானிவண்ணனா நிட்டி²தா.

பரிஹானிகதா²வண்ணனா நிட்டி²தா.

3. ப்³ரஹ்மசரியகதா²

1. ஸுத்³த⁴ப்³ரஹ்மசரியகதா²வண்ணனா

269. ‘‘பரனிம்மிதவஸவத்திதே³வே உபாதா³ய தது³பரீ’’தி வுத்தம், ‘‘தீஹி, பி⁴க்க²வே, டா²னேஹீ’’தி (அ. நி. 9.21) பன ஸுத்தஸ்ஸ வசனேன ஹேட்டா²பி மக்³க³பா⁴வனம்பி ந இச்ச²ந்தீதி விஞ்ஞாயதி.

270. ‘‘கி³ஹீனஞ்சேவ ஏகச்சானஞ்ச தே³வானம் மக்³க³படிலாப⁴ம் ஸந்தா⁴ய படிக்கே²போ தஸ்ஸேவா’’தி வுத்தம், ‘‘யத்த² நத்தீ²’’தி பன ஓகாஸவஸேன புட்டோ² புக்³க³லவஸேன தஸ்ஸ படிக்கே²போ ந யுத்தோ. யதி³ ச தஸ்ஸாயம் அதி⁴ப்பாயோ, ஸகவாதி³னா ஸமானாதி⁴ப்பாயத்தா ந நிக்³க³ஹேதப்³போ³.

271. ஏகந்தரிகபஞ்ஹாதி பரவாதீ³ஸகவாதீ³னம் அஞ்ஞமஞ்ஞம் பஞ்ஹந்தரிகா பஞ்ஹா.

ஸுத்³த⁴ப்³ரஹ்மசரியகதா²வண்ணனா நிட்டி²தா.

2. ஸம்ஸந்த³னப்³ரஹ்மசரியகதா²வண்ணனா

273. ரூபாவசரமக்³கே³ன ஹி ஸோ இத⁴விஹாயனிட்டோ² நாம ஜாதோதி இத³ம் ‘‘இத⁴ பா⁴விதமக்³கோ³ ஹி அனாகா³மீ இத⁴விஹாயனிட்டோ² நாம ஹோதீ’’திஆதி³கேன லத்³தி⁴கித்தனேன கத²ம் ஸமேதீதி விசாரேதப்³ப³ம். புப்³பே³ பன அனாகா³மீ ஏவ அனாகா³மீதி வுத்தோ, இத⁴ ஜா²னானாகா³மிஸோதாபன்னாதி³கோதி அதி⁴ப்பாயோ. இத⁴ அரஹத்தமக்³க³ம் பா⁴வேத்வா இதே⁴வ ப²லம் ஸச்சி²கரோந்தம் ‘‘இத⁴பரினிப்³பா³யீ’’தி வத³தி, இத⁴ பன மக்³க³ம் பா⁴வேத்வா தத்த² ப²லம் ஸச்சி²கரோந்தம் ‘‘தத்த²பரினிப்³பா³யீ அரஹா’’தி.

ஸம்ஸந்த³னப்³ரஹ்மசரியகதா²வண்ணனா நிட்டி²தா.

ப்³ரஹ்மசரியகதா²வண்ணனா நிட்டி²தா.

4. ஓதி⁴ஸோகதா²வண்ணனா

274. ஓதி⁴ஸோ ஓதி⁴ஸோதி ஏதஸ்ஸ அத்த²ம் த³ஸ்ஸேந்தோ ‘‘ஏகதே³ஸேன ஏகதே³ஸேனா’’தி ஆஹ.

ஓதி⁴ஸோகதா²வண்ணனா நிட்டி²தா.

4. ஜஹதிகதா²வண்ணனா

1. நஸுத்தாஹரணகதா²வண்ணனா

280. கிச்சஸப்³பா⁴வந்தி தீஹி பஹாதப்³ப³ஸ்ஸ பஹீனதம். தம் பன கிச்சம் யதி³ தேனேவ மக்³கே³ன ஸிஜ்ஜ²தீதி லத்³தி⁴, புது²ஜ்ஜனகாலே ஏவ காமராக³ப்³யாபாதா³ பஹீனாதி லத்³தீ⁴தி ஏதம் ந ஸமேதி, தஸ்மா புது²ஜ்ஜனகாலே பஹீனானம்பி த³ஸ்ஸனமக்³கே³ உப்பன்னே புன கதா³சி அனுப்பத்திதோ திண்ணம் மக்³கா³னம் கிச்சம் ஸம்ப⁴வதீதி அதி⁴ப்பாயோ.

நஸுத்தாஹரணகதா²வண்ணனா நிட்டி²தா.

ஜஹதிகதா²வண்ணனா நிட்டி²தா.

5. ஸப்³ப³மத்தீ²திகதா²

1. வாத³யுத்திவண்ணனா

282. ஸப்³ப³ஸ்மிம் ஸரீரே ஸப்³ப³ந்தி ஸிரஸி பாதா³ பச்ச²தோ சக்கூ²னீதி ஏவம் ஸப்³ப³ம் ஸப்³ப³த்த² அத்தீ²தி அத்தோ². ஸப்³ப³ஸ்மிம் காலேதி பா³லகாலே யுவதா, வுட்³ட⁴காலே பா³லதா, ஏவம் ஸப்³ப³ஸ்மிம் காலே ஸப்³ப³ம். ஸப்³பே³னாகாரேனாதி நீலாகாரேன பீதம், பீதாகாரேன லோஹிதந்தி ஏவம். ஸப்³பே³ஸு த⁴ம்மேஸூதி சக்கு²ஸ்மிம் ஸோதம், ஸோதஸ்மிம் கா⁴னந்தி ஏவம். அயுத்தந்தி யோக³ரஹிதம் வத³தி, தம் பன ஏகஸபா⁴வம். கத²ம் பன ஏகஸபா⁴வஸ்ஸ யோக³ரஹிததாதி தம் த³ஸ்ஸேந்தோ ‘‘நானாஸபா⁴வானஞ்ஹீ’’திஆதி³மாஹ. த்³வின்னஞ்ஹி நானாஸபா⁴வானம் அங்கு³லீனம் மேண்ட³கானம் வா அஞ்ஞமஞ்ஞயோகோ³ ஹோதி, ந ஏகஸ்ஸேவ ஸதோ, தஸ்மா யோ நானாஸபா⁴வேஸு ஹோதி யோகோ³, தேன ரஹிதம் ஏகஸபா⁴வம் அயோக³ந்தி வுத்தம். இத³ம் புச்ச²தீதி பரவாதீ³தி³ட்டி²யா மிச்சா²தி³ட்டி²பா⁴வம் க³ஹேத்வா உப்பன்னாய அத்தனோ தி³ட்டி²யா ஸம்மாதி³ட்டி²பா⁴வோ அத்தீ²தி வுத்தம் ஹோதி.

வாத³யுத்திவண்ணனா நிட்டி²தா.

2. காலஸம்ஸந்த³னவண்ணனா

285. அதீதானாக³தம் பஹாய பச்சுப்பன்னரூபமேவ அப்பியம் அவிப⁴ஜிதப்³ப³ம் கரித்வாதி பச்சுப்பன்னஸத்³தே³ன ரூபஸத்³தே³ன சாதி உபோ⁴ஹிபி பச்சுப்பன்னரூபமேவ வத்தப்³ப³ம் கத்வாதி வுத்தம் ஹோதி. பஞ்ஞத்தியா அவிக³தத்தாதி ஏதேன இத³ம் விஞ்ஞாயதி ‘‘ந ரூபபஞ்ஞத்தி விய வத்த²பஞ்ஞத்தி ஸபா⁴வபரிச்சி²ன்னே பவத்தா விஜ்ஜமானபஞ்ஞத்தி, அத² கோ² புப்³பா³பரியவஸேன பவத்தமானம் ரூபஸமூஹம் உபாதா³ய பவத்தா அவிஜ்ஜமானபஞ்ஞத்தி, தஸ்மா வத்த²பா⁴வஸ்ஸ ஓதா³தபா⁴வவிக³மே விக³மாவத்தப்³ப³தா யுத்தா, ந பன ரூபபா⁴வஸ்ஸ பச்சுப்பன்னபா⁴வவிக³மே’’தி.

காலஸம்ஸந்த³னவண்ணனா நிட்டி²தா.

வசனஸோத⁴னவண்ணனா

288. அனாக³தம் வா பச்சுப்பன்னம் வா ஹுத்வா ஹோதீதி வுத்தந்தி ஏத்த² அனாக³தம் அனாக³தம் ஹுத்வா புன பச்சுப்பன்னம் ஹோந்தம் ஹுத்வா ஹோதீதி, ததா² பச்சுப்பன்னம் பச்சுப்பன்னம் ஹோந்தம் புப்³பே³ அனாக³தம் ஹுத்வா பச்சுப்பன்னம் ஹோதீதி ஹுத்வா ஹோதீதி வுத்தந்தி த³ட்ட²ப்³ப³ம். கிம் தே தம்பி ஹுத்வா ஹோதீதி தப்³பா⁴வாவிக³மதோ ஹுத்வாஹோதிபா⁴வானுபரமம் அனுபச்சே²த³ம் புச்ச²தீதி அதி⁴ப்பாயோ யுத்தோ. ஹுத்வா பூ⁴தஸ்ஸ புன ஹுத்வா அபா⁴வதோதி அனாக³தம் ஹுத்வா பச்சுப்பன்னபூ⁴தஸ்ஸ புன அனாக³தம் ஹுத்வா பச்சுப்பன்னாபா⁴வதோ.

யஸ்மா தந்தி தம் ஹுத்வா பூ⁴தம் பச்சுப்பன்னம் யஸ்மா அனாக³தம் ஹுத்வா பச்சுப்பன்னம் ஹோந்தம் ‘‘ஹுத்வா ஹோதீ’’தி ஸங்க்²யம் க³தம், தஸ்மா து³தியம்பி ‘‘ஹுத்வா ஹோதீ’’தி வசனம் அரஹதீதி படிஜானாதீதி அதி⁴ப்பாயோ. ஏவம் பன த⁴ம்மே ஹுத்வாஹோதிபா⁴வானுபரமம் வத³ந்தஸ்ஸ அத⁴ம்மே ஸஸவிஸாணே நஹுத்வான ஹோதிபா⁴வானுபரமோ ஆபஜ்ஜதீதி அதி⁴ப்பாயேன ‘‘அத² ந’’ந்திஆதி³மாஹ.

படிக்கி²த்தனயேனாதி காலனானத்தேன. படிஞ்ஞாதனயேனாதி அத்தா²னானத்தேன. அத்தா²னானத்தம் இச்ச²ந்தோபி பன அனாக³தஸ்ஸ பச்சுப்பன்னே வுத்தம் ஹோதிபா⁴வம், பச்சுப்பன்னஸ்ஸ ச அனாக³தே வுத்தம் ஹுத்வாபா⁴வம் கத²ம் படிஜானாதீதி விசாரேதப்³ப³ம். அத்தா²னானத்தமேவ ஹி தேன அனுஞ்ஞாயதி, ந அனாக³தே பச்சுப்பன்னபா⁴வோ, பச்சுப்பன்னே வா அனாக³தபா⁴வோதி. புரிமம் படிக்கி²த்தபஞ்ஹம் பரிவத்தித்வாதி அனுஞ்ஞாதபஞ்ஹஸ்ஸ ஹுத்வா ஹோதி ஹுத்வா ஹோதீதி தோ³ஸோ வுத்தோதி அவுத்ததோ³ஸம் அதிக்கம்ம படிக்கி²த்தபஞ்ஹம் புன க³ஹேத்வா தேன சோதே³தீதி அத்தோ². ஏத்த² ச அத்தா²னானத்தேன ஹுத்வாஹோதீதி அனுஜானந்தஸ்ஸ தோ³ஸோ காலனானத்தாயேவ அனாக³தம் பச்சுப்பன்னந்தி படிக்கே²பேன கத²ம் ஹோதீதி? தஸ்ஸேவ அனுஜானனபடிக்கே²பதோதி அதி⁴ப்பாயோ.

ஏகேகந்தி அனாக³தம்பி ந ஹுத்வா ந ஹோதி பச்சுப்பன்னம்பீதி தது³ப⁴யம் க³ஹேத்வா ‘‘ஏகேகம் ந ஹுத்வா ந ஹோதி ந ஹுத்வா ந ஹோதீ’’தி வுத்தம், ந ஏகேகமேவ ந ஹுத்வா ந ஹோதி ந ஹுத்வா ந ஹோதீதி. ஏஸ நயோ புரிமஸ்மிம் ‘‘ஏகேகம் ஹுத்வா ஹோதி ஹுத்வா ஹோதீ’’தி வசனேபி. அனாக³தஸ்ஸ ஹி ‘‘ஹுத்வா ஹோதீ’’தி நாமம் பச்சுப்பன்னஸ்ஸ சாதி த்³வேபி நாமானி ஸங்க³ஹேத்வா ‘‘ஹுத்வா ஹோதி ஹுத்வா ஹோதீ’’தி சோதி³தம், ததா² ‘‘ந ஹுத்வா ந ஹோதி ந ஹுத்வா ந ஹோதீ’’தி சாதி அதி⁴ப்பாயோ. ஸப்³ப³தோ அந்த⁴காரேன பரியோனத்³தோ⁴ வியாதி ஏதேன அபரியோனத்³தே⁴ன படிஜானிதப்³ப³ம் ஸியாதி த³ஸ்ஸேதி. ஏத்த² ச புரிமனயே ஹுத்வா பூ⁴தஸ்ஸ புன ஹுத்வாஹோதிபா⁴வோ சோதி³தோ, து³தியனயே அனாக³தாதீ³ஸு ஏகேகஸ்ஸ ஹுத்வாஹோதினாமதாதி அயம் விஸேஸோ.

வசனஸோத⁴னவண்ணனா நிட்டி²தா.

அதீதஞாணாதி³கதா²வண்ணனா

290. புன புட்டோ²…பே… அத்தி²தாய படிஜானாதீதி ஏத்த² பச்சுப்பன்னம் ஞாணம் தேனாதி ஏதேன அனுவத்தமானாபேக்க²னவசனேன கத²ம் வுச்சதீதி விசாரேதப்³ப³ம்.

அதீதஞாணாதி³கதா²வண்ணனா நிட்டி²தா.

அரஹந்தாதி³கதா²வண்ணனா

291. யுத்திவிரோதோ⁴ அரஹதோ ஸராகா³தி³பா⁴வே புது²ஜ்ஜனேன அனானத்தம் ப்³ரஹ்மசரியவாஸஸ்ஸ அப²லதாதி ஏவமாதி³கோ த³ட்ட²ப்³போ³.

அரஹந்தாதி³கதா²வண்ணனா நிட்டி²தா.

பத³ஸோத⁴னகதா²வண்ணனா

295. தேன காரணேனாதி அதீதஅத்தி²ஸத்³தா³னம் ஏகத்த²த்தா அத்தி²ஸத்³த³த்த²ஸ்ஸ ச ந்வாதீதபா⁴வதோ ‘‘அதீதம் ந்வாதீதம், ந்வாதீதஞ்ச அதீதம் ஹோதீ’’தி வுத்தம் ஹோதி. ஏத்த² பன அதீதாதீ³னம் அத்தி²தம் வத³ந்தஸ்ஸ பரவாதி³ஸ்ஸேவாயம் தோ³ஸோ யதா² ஆபஜ்ஜதி, ந பன ‘‘நிப்³பா³னம் அத்தீ²’’தி வத³ந்தஸ்ஸ ஸகவாதி³ஸ்ஸ, ததா² படிபாதே³தப்³ப³ம்.

பத³ஸோத⁴னகதா²வண்ணனா நிட்டி²தா.

ஸப்³ப³மத்தீ²திகதா²வண்ணனா நிட்டி²தா.

7. ஏகச்சம்அத்தீ²திகதா²

1. அதீதாதி³ஏகச்சகதா²வண்ணனா

299. திண்ணம் ராஸீனந்தி அவிபக்கவிபாகவிபக்கவிபாகஅவிபாகானம். வோஹாரவஸேன அவிபக்கவிபாகானம் அத்தி²தம் வத³ந்தோ கத²ம் சோதே³தப்³போ³தி விசாரேதி ‘‘கம்முபசயம் சித்தவிப்பயுத்தம் ஸங்கா²ரம் இச்ச²ந்தீ’’தி.

ஏகச்சம்அத்தீ²திகதா²வண்ணனா நிட்டி²தா.

8. ஸதிபட்டா²னகதா²வண்ணனா

301. லோகுத்தரபா⁴வம் புச்ச²னத்தா²யாதி லோகியலோகுத்தராய ஸம்மாஸதியா ஸதிபட்டா²னத்தா, லோகுத்தராயயேவ வா பரமத்த²ஸதிபட்டா²னத்தா தஸ்ஸா வஸேன லோகுத்தரபா⁴வம் புச்ச²னத்தா²யாதி அத்தோ². பபே⁴த³புச்சா²வஸேனாதி லோகியலோகுத்தரஸதிபட்டா²னஸமுதா³யபூ⁴தஸ்ஸ ஸதிபட்டா²னஸ்ஸ பபே⁴தா³னம் புச்சா²வஸேன.

ஸதிபட்டா²னகதா²வண்ணனா நிட்டி²தா.