7. த⁴ம்மகதா²வண்ணனா

887-888. த⁴ம்மகதா²யம் ரூபட்ட²தோ அஞ்ஞஸ்ஸ ரூபஸ்ஸ அபா⁴வாதி யோ ரூபஸ்ஸ நியாமோ வுச்சேய்ய, ஸோ ரூபட்டோ² நாம கோசி ரூபதோ அஞ்ஞோ நத்தீ²தி ரூபட்ட²தோ அஞ்ஞம் ரூபஞ்ச ந ஹோதி, தஸ்மா ரூபம் ரூபமேவ, ந வேத³னாதி³ஸபா⁴வந்தி அதி⁴ப்பாயேன ‘‘ரூபம் ரூபட்டே²ன நியத’’ந்தி வத்தப்³ப³ம், ந அஞ்ஞதா² ரூபட்டே²ன நியாமேனாதி அதி⁴ப்பாயோ. தத்த² ரூபதோ அஞ்ஞஸ்ஸ ரூபட்ட²ஸ்ஸ அபா⁴வே த³ஸ்ஸிதே ரூபட்ட²தோ அஞ்ஞஸ்ஸ ரூபஸ்ஸ அபா⁴வோ த³ஸ்ஸிதோயேவ நாம ஹோதீதி தமேவ ரூபதோ அஞ்ஞஸ்ஸ ரூபட்ட²ஸ்ஸ அபா⁴வம் த³ஸ்ஸேந்தோ ‘‘ரூபஸபா⁴வோ ஹீ’’திஆதி³மாஹ. ஏஸ வோஹாரோதி ரூபஸ்ஸ ஸபா⁴வோ ரூபஸபா⁴வோ, ரூபஸ்ஸ அத்தோ² ரூபட்டோ²தி ஏவம் அஞ்ஞத்தம் க³ஹேத்வா விய பவத்தோ ரூபஸபா⁴வவோஹாரோ ரூபட்ட²வோஹாரோ வா வேத³னாதீ³ஹி நானத்தமேவ ஸோ ஸபா⁴வோதி நானத்தஸஞ்ஞாபனத்த²ம் ஹோதீதி அத்தோ². தஸ்மாதி ரூபஸ்ஸ ரூபட்டே²ன அனஞ்ஞத்தா. ‘‘ரூபம் ரூபமேவ, ந வேத³னாதி³ஸபா⁴வ’’ந்தி அவத்வா ‘‘ரூபம் ரூபட்டே²ன நியத’’ந்தி வத³தோ தஞ்ச வசனம் வுத்தப்பகாரேன ஸதோ³ஸம், அத² கஸ்மா ‘‘ரூபஞ்ஹி ரூபட்டே²ன நியதந்தி ரூபம் ரூபமேவ, ந வேத³னாதி³ஸபா⁴வந்தி அதி⁴ப்பாயேன வத்தப்³ப³’’ந்தி வத³ந்தோ ‘‘ரூபம் ரூபட்டே²ன நியத’’ந்தி படிஜானாதீதி அத்தோ² த³ட்ட²ப்³போ³. நனு சேதம் அத்தனாவ வுத்தம், ந பரேனாதி படிஜானாதீதி ந வத்தப்³ப³ந்தி? ந, அத்தானம்பி பரம் விய வசனதோ. வத்தப்³ப³ந்தி வா ஸகவாதி³னா வத்தப்³ப³ந்தி வுத்தம் ஹோதி. யதி³ ச தேன வத்தப்³ப³ம் படிஜானாதி ச ஸோ ஏதமத்த²ந்தி, அத² கஸ்மா படிஜானாதி ஸகவாதீ³தி அயமேத்த² அத்தோ². அத்த²ந்தரவஸேனாதி தத்த² வுத்தமேவ காரணம் நிகூ³ஹித்வா பரேன சோதி³தந்தி தமேவ காரணம் த³ஸ்ஸேத்வா சோத³னம் நிவத்தேதி. இதோ அஞ்ஞதா²தி ரூபாதி³ஸபா⁴வமத்தம் முஞ்சித்வா தேன பரிகப்பிதம் நியதம் நத்தீ²தி தஸ்ஸ பரிகப்பிதஸ்ஸ நிவத்தனத்த²ம் புன தேனேவ நயேன சோதே³தும் ‘‘மிச்ச²த்தனியத’’ந்திஆதி³மாஹாதி அத்தோ².

த⁴ம்மகதா²வண்ணனா நிட்டி²தா.

ஏகவீஸதிமவக்³க³வண்ணனா நிட்டி²தா.