6. படிச்சஸமுப்பாத³வண்ணனா

61. ‘‘புச்ச²ம் அனாரபி⁴த்வா அவிஜ்ஜா ஏகேன க²ந்தே⁴ன, அவிஜ்ஜாபச்சயா ஸங்கா²ரா ஏகேன க²ந்தே⁴னா’’தி லிகி²தப்³பே³பி பமாத³வஸேன ‘‘அவிஜ்ஜா ஏகேன க²ந்தே⁴னா’’தி இத³ம் ந லிகி²தந்தி த³ட்ட²ப்³ப³ம். ஸரூபேகஸேஸம் வா கத்வா அவிஜ்ஜாவசனேன அவிஜ்ஜாவிஸ்ஸஜ்ஜனம் த³ஸ்ஸிதந்தி. ஸப்³ப³ம்பி விபாகவிஞ்ஞாணந்தி ஏத்த² விபாகக்³க³ஹணேன விஸேஸனம் ந காதப்³ப³ம். குஸலாதீ³னம்பி ஹி விஞ்ஞாணானம் தா⁴துகதா²யம் ஸங்கா²ரபச்சயாவிஞ்ஞாணாதி³பதே³ஹி ஸங்க³ஹிததா விப்பயுத்தேனஸங்க³ஹிதாஸங்க³ஹிதபத³னித்³தே³ஸே ‘‘விபாகா த⁴ம்மா’’தி இமஸ்ஸ விஸ்ஸஜ்ஜனாஸதி³ஸேன தேஸம் விஸ்ஸஜ்ஜனேன த³ஸ்ஸிதா, இத⁴ ச நாமரூபஸ்ஸ ஏகாத³ஸஹாயதனேஹி ஸங்க³ஹவசனேன அகம்மஜானம்பி ஸங்க³ஹிததா விஞ்ஞாயதீதி.

71. ஜாயமானபரிபச்சமானபி⁴ஜ்ஜமானானம் ஜாயமானாதி³பா⁴வமத்தத்தா ஜாதிஜராமரணானி பரமத்த²தோ வினிப்³பு⁴ஜ்ஜித்வா அனுபலப்³ப⁴மானானி பரமத்தா²னம் ஸபா⁴வமத்தபூ⁴தானி, தானி ரூபஸ்ஸ நிப்³ப³த்திபாகபே⁴த³பூ⁴தானி ருப்பனபா⁴வேன க³ய்ஹந்தீதி ரூபக்க²ந்த⁴த⁴ம்மஸபா⁴கா³னி, அரூபானம் பன நிப்³ப³த்திஆதி³பூ⁴தானி ரூபகலாபஜாதிஆதீ³னி விய ஸஹுப்பஜ்ஜமானசதுக்க²ந்த⁴கலாபனிப்³ப³த்திஆதி³பா⁴வதோ ஏகேகபூ⁴தானி வேதி³யனஸஞ்ஜானனவிஜானனேஹி ஏகந்தபரமத்த²கிச்சேஹி அக³ய்ஹமானானி ஸங்க²தாபி⁴ஸங்க²ரணேன அனேகந்தபரமத்த²கிச்சேன க³ய்ஹந்தீதி ஸங்கா²ரக்க²ந்த⁴த⁴ம்மஸபா⁴கா³னி, ததா² து³விதா⁴னிபி தானி சக்கா²யதனாதீ³ஹி ஏகந்தபரமத்த²கிச்சேஹி அக³ய்ஹமானானி நிஸ்ஸத்தட்டே²ன த⁴ம்மாயதனத⁴ம்மதா⁴துத⁴ம்மேஹி ஸபா⁴கா³னி, தேன தேஹி க²ந்தா⁴தீ³ஹி ஸங்க³ய்ஹந்தீதி ‘‘ஜாதி த்³வீஹி க²ந்தே⁴ஹீ’’திஆதி³மாஹ.

பட²மனயஸங்க³ஹாஸங்க³ஹபத³வண்ணனா நிட்டி²தா.