13. தேரஸமனயோ அஸங்க³ஹிதேனஸம்பயுத்தவிப்பயுத்தபத³வண்ணனா

448. தேரஸமனயவண்ணனாயம் யேஹி தீஹிபி ஸங்க³ஹேஹி அஸங்க³ஹிதம் விஞ்ஞாணமேவ ஹோதி, தே பாளியம் ‘‘ரூபஞ்ச த⁴ம்மாயதன’’ந்திஆதி³உத்³தா³னகா³தா²ய த³ஸ்ஸிதா பா³வீஸ த⁴ம்மா ‘‘ரூபக்க²ந்தே⁴ன ஸதி³ஸபஞ்ஹா த⁴ம்மா’’தி வுத்தா. யேஹி பன தீஹிபி ஸங்க³ஹேஹி அஸங்க³ஹிதானி அரூபப⁴வேன விய ஓளாரிகாயதனானேவ ஹோந்தி, தே வுத்தாவஸேஸா ஸப்³பே³ இத⁴ உத்³த⁴டா ‘‘அரூபப⁴வேன ஸதி³ஸா’’தி வுத்தா. ஸேஸாதி ஸேஸா பஞ்சமனயே ஆக³தா வேத³னாக்க²ந்தா⁴த³யோ ஸதிபி அஸங்கா³ஹகத்தே இத⁴ விஸ்ஸஜ்ஜனம் ந ருஹந்தீதி ந உத்³த⁴டா. யே பன அஸங்கா³ஹகா ஏவ ந ஹோந்தி து³க்க²ஸச்சாதி³த⁴ம்மா, தேஸு வத்தப்³ப³மேவ நத்தி². யதா² பன வேத³னாக்க²ந்தா⁴த³யோ ந ருஹந்தி, தம் த³ஸ்ஸேதும் ‘‘வேத³னாக்க²ந்தே⁴ன ஹீ’’திஆதி³மாஹ. தத்த² தேஸஞ்ச ஸம்பயோகோ³ நாம நத்தீ²தி ரூபாரூபத⁴ம்மானம் அஸம்பயோகே³ஹி வோமிஸ்ஸதாய ஸம்பயோகோ³ நத்தீ²தி அத்தோ².

யதி³ பன தே கதா³சி அஸப்³ப³விஞ்ஞாணதா⁴துஸம்பயுத்தா அரூபத⁴ம்மா ரூபத⁴ம்மா ச ஸியும், ந தேஸம் விப்பயோகோ³ நத்தீ²தி ‘‘விப்பயோகோ³ ச நத்தீ²’’தி ந வுத்தம், ந வேத³னாக்க²ந்தே⁴ன அஸங்க³ஹிதானம் விப்பயோக³ஸ்ஸ அத்தி²தாயாதி வேதி³தப்³ப³ம். உப⁴யாபா⁴வதோ ஹி வேத³னாக்க²ந்தா⁴த³யோ இத⁴ ந ருஹந்தீதி. ஏவம் பனேத்த² ஸியா ‘‘வேத³னாக்க²ந்தே⁴ன ஹி க²ந்தா⁴தி³வஸேன அனாரம்மணமிஸ்ஸகா ஸத்தவிஞ்ஞாணதா⁴துத⁴ம்மா அஸங்க³ஹிதா ஹோந்தி, தேஸஞ்ச ஸம்பயோகோ³ விப்பயோகோ³ ச நத்தீ²’’தி. அனாரம்மணஸஹிதானஞ்ஹி ஸப்³ப³விஞ்ஞாணதா⁴தூனம் ஸப்³ப³விஞ்ஞாணதா⁴துஸம்பயுத்தானம் தது³ப⁴யத⁴ம்மானஞ்ச வேத³னாக்க²ந்தா⁴தி³விஞ்ஞாணக்க²ந்தா⁴தி³சக்கா²யதனாதீ³ஹி தீஹிபி ஸங்க³ஹேஹி அஸங்க³ஹிதானம் ஸம்பயோக³விப்பயோகா³பா⁴வோ அருஹணே காரணம். ஜாதிவிப்பயோக³பூ⁴மிகாலஸந்தானவிப்பயோக³தோ சதுப்³பி³தோ⁴ விப்பயோகோ³. தத்த² ஜாதிவிப்பயோகோ³ ‘‘குஸலா த⁴ம்மா, அகுஸலா த⁴ம்மா’’திஆதி³, பூ⁴மிவிப்பயோகோ³ ‘‘காமாவசரா, ரூபாவசரா’’திஆதி³, காலவிப்பயோகோ³ ‘‘அதீதா த⁴ம்மா, அனாக³தா த⁴ம்மா’’திஆதி³, ஸந்தானவிப்பயோகோ³ ‘‘அஜ்ஜ²த்தா த⁴ம்மா, ப³ஹித்³தா⁴ த⁴ம்மா’’திஆதி³. ஏவம் விப்பயோகோ³ சதுதா⁴ வேதி³தப்³போ³.

தேரஸமனயஅஸங்க³ஹிதேனஸம்பயுத்தவிப்பயுத்தபத³வண்ணனா நிட்டி²தா.