4. அட்ட²கதா²கண்ட³ம்

திகஅத்து²த்³தா⁴ரவண்ணனா

1384. நயமக்³க³ந்தி ஸுத்தந்தபா⁴ஜனீயாதி³னயக³மனம் அனுலோமாதி³னயக³மனஞ்ச. தம்பி ஹி ஏத்த² அத்தே²ஸு நிச்சி²தேஸு ஸுக²ம் ஸமானேந்தி. பஞ்ஹுத்³தா⁴ரந்தி ஏகூனபஞ்ஞாஸாய ஏகூனபஞ்ஞாஸாய நவஸு நவஸு ச பஞ்ஹேஸு லப்³ப⁴மானஸ்ஸ உத்³த⁴ரணம், தேஸுயேவ லப்³ப⁴மானானம் க³ணனானம் ட²பனம் க³ணனாசாரோ. அத்து²த்³தா⁴ரந்தி ‘‘இமே நாம சித்துப்பாதா³த³யோ அத்தா² குஸலாதி³கா’’தி உத்³த⁴ரணம். கண்ணிகம் கண்ணிகந்தி சித்துப்பாத³கண்ட³ரூபகண்டே³ஸு விப⁴த்தே பஸடே த⁴ம்மே ‘‘சதூஸு பூ⁴மீஸு குஸலம் த்³வாத³ஸாகுஸலசித்துப்பாதா³’’திஆதி³னா ராஸிராஸிவஸேன ஸஹ க³ந்தே²த்வாதி அத்தோ². க⁴டகோ³ச்ச²கா கண்ணிகவேவசனானேவ. ஏத்த² பன சதூஸு பூ⁴மீஸு குஸலந்தி ஏகவசனனித்³தே³ஸோ சதுபூ⁴மகானம் குஸலப²ஸ்ஸாதீ³னம் குஸலபா⁴வே ஏகத்தூபக³மனதோ. சித்துப்பாத³கண்ட³ரூபகண்டே³ஸு சதுபூ⁴மிசித்துப்பாதா³தி³வஸேன விஞ்ஞாதத⁴ம்மஸ்ஸ வஸேனாயம் அத்து²த்³தா⁴ரதே³ஸனா ஆரத்³தா⁴தி தத்த² யம் சதூஸு பூ⁴மீஸு குஸலம் விப⁴த்தம் யாவ விஞ்ஞாதம், இமே த⁴ம்மா குஸலாதி அத்தோ².

யதி³பி குஸலத்திகவித்தா²ரோ புப்³பே³ விஞ்ஞாதோ, ததா²பி தத்த² த⁴ம்மா ஸமயவஸேன ப²ஸ்ஸாதி³ஸபா⁴வவஸேன ச விப⁴த்தா பி⁴ன்னா விஞ்ஞாதா, ந பன ஏகஸ்மிம் லக்க²ணே ஸமானேத்வா, தஸ்மா தத்த² வுத்தம் ஸமயாதி³பே⁴த³ம் வஜ்ஜேத்வா ஸப்³ப³பே⁴த³பி⁴ன்னானம் ஏகஸ்மிம் குஸலாதி³லக்க²ணே ஸமானேத்வா போ³த⁴னத்த²ம் இத⁴ குஸலத்திகனித்³தே³ஸோ புன விப⁴த்தோ. ஏத்த² ச ஏகவசனேன குஸலனித்³தே³ஸம் கத்வா ப³ஹுவசனேன நிக³மனஸ்ஸ காரணம் வுத்தமேவ. யதி³ த⁴ம்மானம் குஸலத்தே ஏகத்தூபக³மனம், கஸ்மா ஏகவசனேன புச்சா²பி ந கதா? உத்³தே³ஸே குஸல-ஸத்³த³ஸ்ஸ த⁴ம்மவிஸேஸனபா⁴வதோ தப்³பி³ஸேஸனானம் த⁴ம்மானம் புச்சி²தத்தா தேஸஞ்ச அனித்³தா⁴ரிதஸங்கா²விஸேஸத்தா, நித்³தே³ஸே பன சதூஹி பூ⁴மீஹி வித்தா²ரதோ விஞ்ஞாதாஹி குஸலே விஸேஸேத்வா த³ஸ்ஸேதீதி யுத்தம் ‘‘சதூஸு பூ⁴மீஸு குஸல’’ந்தி ஏகத்தம் நேத்வா வசனம். குஸலபத³ஞ்ஹி ஏத்த² பதா⁴னம், தஞ்ச விஸேஸிதப்³பா³னபேக்க²ம் குஸலாகாரமேவ அத்தனோ ஸபா⁴வே டி²தம் க³ஹேத்வா பவத்தமானம் ஏகத்தமேவ உபாதா³ய பவத்ததி, ந பே⁴த³ந்தி.

1385. த்³வாத³ஸ அகுஸலசித்துப்பாதா³தி ஏத்தா²பி பட²மாகுஸலசித்துப்பாதோ³ ஸமயப²ஸ்ஸாதி³வஸேன பே⁴த³ம் அனாமஸித்வா ஸோமனஸ்ஸஸஹக³ததி³ட்டி²க³தஸம்பயுத்தசித்துப்பாத³பா⁴வே ஏகத்தம் நேத்வா வுத்தோ, ஏவம் யாவ த்³வாத³ஸமோதி ‘‘த்³வாத³ஸ அகுஸலசித்துப்பாதா³’’தி வுத்தம். ஏவம் சதூஸு பூ⁴மீஸு விபாகோதிஆதீ³ஸுபி யதா²யோக³ம் யோஜேதப்³ப³ம். சித்துப்பாதா³தி ஏத்த² உப்பஜ்ஜதி ஏத்தா²தி உப்பாதோ³, கிம் உப்பஜ்ஜதி? சித்தம், சித்தஸ்ஸ உப்பாதோ³ சித்துப்பாதோ³தி ஏவம் அவயவேன ஸமுதா³யோபலக்க²ணவஸேன அத்தோ² ஸம்ப⁴வதி. ஏவஞ்ஹி ஸதி சித்தசேதஸிகராஸி சித்துப்பாதோ³தி ஸித்³தோ⁴ ஹோதி. அட்ட²கதா²யம் பன ‘‘சித்தமேவ உப்பாதோ³ சித்துப்பாதோ³’’தி அஞ்ஞஸ்ஸுப்பஜ்ஜனகஸ்ஸ நிவத்தனத்த²ம் சித்தக்³க³ஹணம் கதம், சித்தஸ்ஸ அனுப்பஜ்ஜனகபா⁴வனிவத்தனத்த²ம் உப்பாத³க்³க³ஹணம், சித்துப்பாத³கண்டே³ வா ‘‘சித்தம் உப்பன்னம் ஹோதீ’’தி சித்தஸ்ஸ உப்பஜ்ஜனகபா⁴வோ பாகடோதி கத்வா ‘‘சித்தமேவ உப்பாதோ³’’தி வுத்தம், சித்தஸ்ஸ அனுப்பஜ்ஜனகஸ்ஸ நிவத்தேதப்³ப³ஸ்ஸ ஸப்³பா⁴வா உப்பாத³க்³க³ஹணம் கதந்தி வேதி³தப்³ப³ம். அயஞ்சத்தோ² ‘‘த்³வேபஞ்சவிஞ்ஞாணானீ’’திஆதீ³ஸு விய சித்தப்பதா⁴னோ நித்³தே³ஸோதி கத்வா வுத்தோதி த³ட்ட²ப்³போ³.

1420. ச²ஸு த்³வாரேஸூதி ஏத்த² பஞ்சத்³வாரே வத்தப்³ப³மேவ நத்தி², மனோத்³வாரேபி பரித்தாரம்மணமேவ ஜவனம் ததா³ரம்மணஸங்கா²தம் ப⁴வங்க³ம் அனுப³ந்த⁴தி. தஞ்ஹி பரித்தஸ்ஸ கம்மஸ்ஸ விபாகோ, விபாகோ ச இட்டா²னிட்டா²ரம்மணானுப⁴வனம், கம்மானுரூபோ ச விபாகோ ஹோதீதி பரித்தகம்மவிபாகோ பரித்தாரம்மணஸ்ஸேவ அனுப⁴வனம் ஹோதி. தஸ்மா ஸப்³ப³ம் ததா³ரம்மணம் ‘‘பரித்தாரம்மண’’ந்தி வுத்தம். யதி³ ஏவம் மஹக்³க³தவிபாகோபி மஹக்³க³தானுப⁴வனமேவ ஆபஜ்ஜதீதி சே? ந, ஸமாதி⁴ப்பதா⁴னஸ்ஸ கம்மஸ்ஸ அப்பனாப்பத்தஸ்ஸ ஸஞ்ஞாவஸாரம்மணஸ்ஸ தாதி³ஸேனேவ விபாகேன ப⁴விதப்³ப³த்தா. தஸ்மா ஸமாதி⁴ ஸுகா²னுப⁴வனபூ⁴தோ, ஸோபி கம்மானுரூபதோயேவ கம்மாரம்மணோ ஹோதீதி த³ட்ட²ப்³போ³. கம்மானுரூபதோ ஏவ ச ததா³ரம்மணம் பரித்தாரம்மணம்பி மஹக்³க³தஜவனம் நானுப³ந்த⁴தி. ததோ ஏவ படிஸந்தி⁴ஆதி³பூ⁴தோ காமாவசரவிபாகோ கம்மனிமித்தம்பி பரித்தமேவ ஆரம்மணம் கரோதி, ந மஹக்³க³தம் அப்பமாணம் வா. யஸ்மா பன வுத்தம் ‘‘மஹக்³க³தாரம்மணோ த⁴ம்மோ பரித்தாரம்மணஸ்ஸ த⁴ம்மஸ்ஸ கம்மபச்சயேன பச்சயோ, அப்பமாணாரம்மணோ த⁴ம்மோ பரித்தாரம்மணஸ்ஸ த⁴ம்மஸ்ஸ கம்மபச்சயேன பச்சயோ’’தி, ந ச மஹக்³க³தப்பமாணவிபாகோ பரித்தாரம்மணோ அத்தி², இத⁴ ச ஸப்³ப³காமாவசரவிபாகானம் பரித்தாரம்மணதாவ வுத்தா, தஸ்மா கம்மானுரூபதோ மஹக்³க³தப்பமாணாரம்மணம்பி பரித்தகம்மம் யதி³ படிஸந்தி⁴ம் தே³தி, கம்மக³தினிமித்தாரம்மணமேவ தே³தி. பவத்திவிபாகம்பி ரூபாதி³பரித்தாரம்மணமேவாதி வேதி³தப்³ப³ம். கீ²ணாஸவானம் வாஸனாவஸேன ஸதிவிப்பயுத்தஹஸனம் பவத்தமானம் பரித்தேஸ்வேவ பவத்ததி, ந இதரேஸு கிலேஸவிரஹே தாதி³ஸஹஸனபச்சயபா⁴வாபா⁴வதோ. தஸ்மா தஸ்ஸ பரித்தாரம்மணதா வுத்தா. கீ²ணாஸவானம் அஸக்கச்சதா³னாதீ³னி ஆத³ராகரணவஸேனேவ வேதி³தப்³பா³னி, ந கோஸஜ்ஜாதி³அகுஸலவஸேன. படிப்பஸ்ஸத்³த⁴ஸப்³பு³ஸ்ஸுக்கா ஹி தே உத்தமபுரிஸாதி. தேஸம் ஆத³ராகரணஞ்ச நிருஸ்ஸுக்கதா ஏவாதி வேதி³தப்³பா³.

1421. அதிபகு³ணானந்தி வசனம் நிராத³ரஸ்ஸ ஞாணவிப்பயுத்தபச்சவேக்க²ணஸ்ஸ விஸயத³ஸ்ஸனம், ந தஸ்ஸேவாதி விஸயனியமனம். ஞாணஸம்பயுத்தஸ்ஸபி ஹி அதிபகு³ணானம் விஸயதா ஸுட்டு²தரம் ஹோதி ஏவ. யதா² பகு³ணம் க³ந்த²ம் ஸஜ்ஜா²யந்தோ த்³வே தயோ வாசனாமக்³கே³ க³தேபி ந ஸல்லக்கே²தி ஞாணவிப்பயுத்தஸதிமந்தேன ஸஜ்ஜா²யிதத்தா, ஏவம் பகு³ணஜ்ஜா²னேஸுபி பவத்தி ஹோதீதி ஆஹ ‘‘அதிபகு³ணான’’ந்திஆதி³. கஸிணனிமித்தாதி³பஞ்ஞத்தீதி புப்³பே³ த³ஸ்ஸிதம் ஸப்³ப³ம் உபாதா³பஞ்ஞத்திமாஹ. தம் பன ரூபாத³யோ விய அவிஜ்ஜமானோ விஜ்ஜமானோ ச அத்தோ²தி ஆசரியா வத³ந்தி. ஸம்முதிஸச்சே பன வுச்சமானானம் கஸிணனிமித்தாதி³ வாசாவத்து²மத்ததோ வசனவோஹாரேனேவ பஞ்ஞத்தீதி வுச்சதி. தஸ்ஸ ஹி பஞ்ஞாபனம் அவிஜ்ஜமானபஞ்ஞத்தீதி தஸ்ஸ அவிஜ்ஜமானத்தம் அட்ட²கதா²யம் வுத்தந்தி. அவிஜ்ஜமானம்பி பன தம் விஜ்ஜமானமிவ க³ஹேத்வா பவத்தமானாய ஸஞ்ஞாய பரித்தாதீ³ஸு ‘‘அயம் நாம த⁴ம்மோ ஆரம்மண’’ந்தி ந ஸக்கா வத்தும் தே ஏவ த⁴ம்மே உபாதா³ய பவத்தமானாயபி த⁴ம்மேஸ்வேவ அட்டா²னதோ. தஸ்மா ஸா ஸஸம்பயுத்தா பரித்தாதி³ஆரம்மணாதி ந வத்தப்³பா³தி வுத்தா. நவத்தப்³பா³ரம்மணாதி இத³ம் பன வசனம் யதா²க³ஹிதாகாரஸ்ஸ ஸஞ்ஞாவிஸயஸ்ஸ நவத்தப்³ப³தம் ஸந்தா⁴ய நவத்தப்³ப³ம் ஆரம்மணம் ஏதேஸந்தி நவத்தப்³பா³ரம்மணா, சித்துப்பாதா³தி அஞ்ஞபத³த்த²ஸமாஸம் கத்வா அட்ட²கதா²யம் வுத்தம்.

சதுபஞ்ஞாஸசித்துப்பாதா³னம் ரூபஸ்ஸ ச வஸேன பஞ்சபண்ணாஸாய. கேவலந்தி வினா பராமஸனேன. அனிட்ட²ங்க³தவஸேனாதி அனிச்ச²யக³மனவஸேன, அனிச்ச²யம் வா த்³வேள்ஹம் க³தோ சித்துப்பாதோ³ அனிட்ட²ங்க³தோ, தேனாகாரேன பவத்தி ‘‘அனிட்ட²ங்க³தவஸேன பவத்தீ’’தி வுத்தா. நானாரம்மணேஸு சித்தஸ்ஸ விக்கி²பனம் விக்கே²போ. அனவட்டா²னம் அவூபஸமோ. கோ³த்ரபு⁴வோதா³னே கோ³த்ரபூ⁴தி க³ஹேத்வா ‘‘கோ³த்ரபு⁴காலே’’தி ஆஹ.

ஸப்³ப³த்த²பாத³கசதுத்த²ந்தி இத⁴ ஸப்³ப³த்த²-ஸத்³தோ³ ஸாமிஅத்தோ² த³ட்ட²ப்³போ³, ஸப்³பே³ஸு வா விபஸ்ஸனாதீ³ஸு பாத³கம் காரணம் ஸப்³ப³த்த²பாத³கந்தி ப²லஸ்ஸ விஸயபா⁴வேன நித்³தே³ஸோ. ஆகாஸகஸிணசதுத்த²ந்தி பரிச்சே²தா³காஸகஸிணசதுத்த²மாஹ. தஞ்ஹி ரூபாவசரம், ந இதரந்தி. குஸலதோபி த்³வாத³ஸவித⁴ம் கிரியதோபீதி சதுவீஸதிவித⁴தா வுத்தா ஹோதி. வட்டஸ்ஸபி பாத³கம் ஹோதியேவாதி குஸலம் கிரியஞ்ச ஏகதோ கத்வா ஸப்³ப³த்த²பாத³கம் வுத்தந்தி கிரியஜ்ஜா²னஸ்ஸ அவட்டபாத³கத்தா ஸாஸங்கம் வத³தி. மஹக்³க³தசித்தே ஸமோத³ஹதீதி இத³ம் ‘‘ஸோ ஏவம் ஸமாஹிதே சித்தே’’திஆதி³னா நயேன வுத்தம் பாகடம் பாத³கஜ்ஜா²னசித்தம் பரிகம்மேஹி க³ஹேத்வா சித்தே ரூபகாயம் அதி⁴ட்டா²னசித்தேன ஸமோத³ஹதீதி கத்வா வுத்தம். பாத³கஜ்ஜா²னசித்தம் ரூபகாயே ஸமோத³ஹதீதி இத³ம்பி யதா²வுத்தம் பாத³கஜ்ஜா²னசித்தம் ஆரம்மணம் கத்வா சித்தஸந்தானம் ரூபகாயே ஸமோத³ஹிதம் தத³னுக³திகம் கத்வா அதி⁴ட்டா²தீதி கத்வா வுத்தம், இத³ம் பன அதி⁴ட்டா²னத்³வயம் அதி³ஸ்ஸமானகாயதம் தி³ஸ்ஸமானகாயதஞ்ச ஆபாதே³தி. க³ந்துகாமதாபரிகம்மவஸேன தம்ஸம்பயுத்தாய ஸஞ்ஞாய ஸுக²ஸஞ்ஞாலஹுஸஞ்ஞாபா⁴வதோ க³மனம்பி நிப்பா²தே³தீதி த³ட்ட²ப்³ப³ம்.

ஸோதாபன்னஸ்ஸ சித்தந்தி ஸோதாபன்னஸ்ஸ பாடிபுக்³க³லிகம் மக்³க³ப²லசித்தந்தி வேதி³தப்³ப³ம். மாராதீ³னஞ்ஹி ப⁴க³வதோ சித்தஜானனம் வுத்தந்தி சேதோபரியஞாணலாபீ⁴ கஸ்மா ஸாஸவசித்தம் ந ஜானிஸ்ஸதீதி. சி²ன்னவடுமகா சி²ன்னஸம்ஸாரவட்டா பு³த்³தா⁴. மக்³க³ப²லனிப்³பா³னபச்சவேக்க²ணதோபீதி ஏத்த² மக்³க³ப²லபச்சவேக்க²ணானி தாவ புப்³பே³னிவாஸானுஸ்ஸதிஞாணேன மக்³க³ப²லேஸு ஞாதேஸு பவத்தந்தி, நிப்³பா³னபச்சவேக்க²ணஞ்ச நிப்³பா³னாரம்மணேஸு அப்பமாணத⁴ம்மேஸு ஞாதேஸூதி மக்³கா³தி³பச்சவேக்க²ணானி புப்³பே³னிவாஸானுஸ்ஸதிஞாணஸ்ஸ அப்பமாணாரம்மணதம் ஸாதே⁴ந்தீதி வேதி³தப்³பா³னி. ‘‘அப்பமாணா க²ந்தா⁴ புப்³பே³னிவாஸானுஸ்ஸதிஞாணஸ்ஸ ஆரம்மணபச்சயேன பச்சயோ’’இச்சேவ (பட்டா². 2.12.58) ஹி வுத்தம், ந நிப்³பா³னந்தி. தஸ்மா புப்³பே³னிவாஸானுஸ்ஸதிஞாணேன ஏவ மக்³க³ப²லபச்சவேக்க²ணகிச்சே வுச்சமானேபி நிப்³பா³னபச்சவேக்க²ணதா ந ஸக்கா வத்தும், அட்ட²கதா²யம் பன தஸ்ஸபி நிப்³பா³னாரம்மணதா அனுஞ்ஞாதாதி தி³ஸ்ஸதி. காமாவசரேனிப்³ப³த்திஸ்ஸதீதி நிப்³ப³த்தக்க²ந்த⁴ஜானனமாஹ. நிப்³பா³னதா⁴துயா பரினிப்³பா³யிஸ்ஸதீதி நிப்³பா³னாரம்மணேஹி மக்³க³ப²லேஹி கிலேஸபரினிப்³பா³னபூ⁴தேஹி பரினிப்³பா³யிஸ்ஸதீதி அத்தோ² ஸம்ப⁴வதி.

1429. அஸஹஜாதத்தாதி அஸம்பயுத்தத்தாதி அத்தோ². ந ஹி அரூபத⁴ம்மானம் அரூபத⁴ம்மேஹி ஸஹஜாததா ஸம்பயோக³தோ அஞ்ஞா அத்தீ²தி. ‘‘அஞ்ஞத⁴ம்மாரம்மணகாலே’’தி வுத்தம், மக்³கா³ரம்மணகாலேபி பன க³ரும் அகரணே மக்³கா³தி⁴பதிபா⁴வேன நவத்தப்³ப³தா யோஜேதப்³பா³.

1433. நியோகா³தி நியோக³தோதி இமமத்த²ம் ஸந்தா⁴ய ‘‘நியமேனா’’தி ஆஹ, நியோக³வந்தோ வா நியோகா³, நியதாதி அத்தோ². சித்துப்பாத³கண்டே³ ஹி போ³தி⁴தேஸு சித்துப்பாதே³ஸு ஏகந்தேன அனாக³தாரம்மணோ கோசி நத்தீ²தி.

1434. கம்மம் வா கம்மனிமித்தம் வா ஆரப்³ப⁴ பவத்தியம் அதீதாரம்மணாவாதி வுத்தம், கம்மனிமித்தம் பன ஆரப்³ப⁴ பவத்தியம் பச்சுப்பன்னாரம்மணபா⁴வஞ்ச படிஸந்தி⁴யா படிச்சஸமுப்பாத³விப⁴ங்க³வண்ணனாயம் வக்க²தி. தஸ்மா இத³ம் மனோத்³வாரசுதியம் அதீதகம்மனிமித்தம் மனோத்³வாரே ஆபாத²க³தம் ஸந்தா⁴ய வுத்தந்தி வேதி³தப்³ப³ம். ஸததா³ரம்மணாய சுதியா பஞ்சசித்தக்க²ணாவஸிட்டா²யுகே க³தினிமித்தே படிஸந்தி⁴யா பவத்தாய சத்தாரி ப⁴வங்கா³னி பச்சுப்பன்னாரம்மணானி, இதரத்த² ச ச² ஸந்தா⁴யாஹ ‘‘ததோ பரம் ப⁴வங்க³காலே சா’’தி. யதா³ ஹி க³தினிமித்தாரம்மணே ஜவனே பவத்தே அனுப்பன்னே ஏவ ததா³ரம்மணே சுதி ஹோதி ரூபாவசராரூபாவசரஸத்தஸ்ஸ விய காமதா⁴தும் உபபஜ்ஜந்தஸ்ஸ, ததா³ படிஸந்தி⁴தோ பரானி ச² ப⁴வங்கா³னி பச்சுப்பன்னாரம்மணானி ஹோந்தீதி. தி³ட்டி²ஸம்பயுத்தேஹி அஸ்ஸாத³னாதீ³னி ஸபராமாஸானேவ த³ட்ட²ப்³பா³னி. பண்ணத்தினிப்³பா³னாரம்மணானஞ்ச ஜவனானம் புரேசாரிககாலேதி யேஸம் புரேசாரிககாலே ஏகந்தேன ஆவஜ்ஜனாய அதீதாதி³ஆரம்மணபா⁴வேன நவத்தப்³ப³தா, தேஸம் வஸேன நயம் த³ஸ்ஸேதி. நிப்³பா³னாரம்மணானம்பி ஜவனானம் புரேசாரிககாலே ஸா ததா² ந வத்தப்³பா³, ந பன ஏகந்தேன மக்³க³ப²லவீதீ²ஸு தஸ்ஸா அனிப்³பா³னாரம்மணத்தா.

இமே க³ந்தா⁴தி நனு பச்சுப்பன்னா க³ந்தா⁴ க³ஹிதா, கத²ம் ஏத்த² அனாக³தாரம்மணதா ஹோதீதி? ‘‘அட்டா²ரஸவஸ்ஸாதி⁴கானி த்³வே வஸ்ஸஸதானி மா ஸுஸ்ஸிம்ஸூ’’தி பவத்திதோ, அனாக³தே மா ஸுஸ்ஸிம் ஸூதி ஹி அனாக³தம் க³ந்த⁴ம் க³ஹேத்வா பவத்ததீதி அதி⁴ப்பாயோ. சித்தவஸேன காயம் பரிணாமேந்தோ அபி⁴முகீ²பூ⁴தம் ததா³ விஜ்ஜமானமேவ காயம் ஆரம்மணம் கரோதீதி பச்சுப்பன்னாரம்மணம் அதி⁴ட்டா²னசித்தம் ஹோதி. ததா² அத்தனோ காயஸ்ஸ தீ³க⁴ரஸ்ஸாணுதூ²லனீலாதி³பா⁴வாபாத³னவஸேன அஞ்ஞஸ்ஸ ச பாடிஹாரியஸ்ஸ கரணே யோஜேதப்³ப³ம். ஏத்த²ந்தரே ஏகத்³வேஸந்ததிவாரா வேதி³தப்³பா³தி ஏத்த²ந்தரே பவத்தா ரூபஸந்ததிஅரூபஸந்ததிவாரா ஏகத்³வேஸந்ததிவாரா நாமாதி வேதி³தப்³பா³தி அத்தோ². அதிபரித்தஸபா⁴வஉதுஆதி³ஸமுட்டா²னா வா ‘‘ஏகத்³வேஸந்ததிவாரா’’தி வுத்தா. உப⁴யமேதம் பச்சுப்பன்னந்தி அத்³தா⁴பச்சுப்பன்னம் ஹோந்தம் ஏதம் உப⁴யம் ஹோதீதி அத்தோ². ஸம்ஹீரதீதி தண்ஹாதி³ட்டா²பி⁴னந்த³னாஹி ஆகட்³டீ⁴யதி.

கேசீதி அப⁴யகி³ரிவாஸினோதி வத³ந்தி, தே பன சித்தஸ்ஸ டி²திக்க²ணம் ந இச்ச²ந்தீதி ‘‘டி²திக்க²ணே வா படிவிஜ்ஜ²தீ’’தி ந வத்தப்³ப³ம் ஸியா. ததா² யே ‘‘இத்³தி⁴மஸ்ஸ ச பரஸ்ஸ ச ஏகக்க²ணே வத்தமானம் சித்தம் உப்பஜ்ஜதீ’’தி வத³ந்தி, தேஸம் ‘‘டி²திக்க²ணே வா ப⁴ங்க³க்க²ணே வா படிவிஜ்ஜ²தீ’’தி வசனம் ந ஸமேதி. ந ஹி தஸ்மிம் க²ணத்³வயே உப்பஜ்ஜமானம் பரசித்தேன ஸஹ ஏகக்க²ணே உப்பஜ்ஜதி நாமாதி. டி²திப⁴ங்க³க்க²ணேஸு ச உப்பஜ்ஜமானம் ஏகதே³ஸம் பச்சுப்பன்னாரம்மணம், ஏகதே³ஸம் அதீதாரம்மணம் ஆபஜ்ஜதி. யஞ்ச வுத்தம் ‘‘பரஸ்ஸ சித்தம் ஜானிஸ்ஸாமீதி ராஸிவஸேன மஹாஜனஸ்ஸ சித்தே ஆவஜ்ஜிதே’’தி, ஏத்த² ச மஹாஜனோ அத்தனா பரே அனேகே புக்³க³லாதி பரேஸம் சித்தம் ஜானிஸ்ஸாமீதி ஆவஜ்ஜனப்பவத்தி வத்தப்³பா³ ஸியா. அதா²பி பரஸ்ஸாதி மஹாஜனஸ்ஸாதி அத்தோ² ஸம்ப⁴வேய்ய, ததா²பி தஸ்ஸ புக்³க³லஸ்ஸேவ வா சித்தராஸிம் ஆவஜ்ஜித்வா ஏகஸ்ஸ படிவிஜ்ஜ²னம் அயுத்தம். ந ஹி ராஸிஆவஜ்ஜனம் ஏகதே³ஸாவஜ்ஜனம் ஹோதீதி. தஸ்மா தேஹி ‘‘மஹாஜனஸ்ஸ சித்தே ஆவஜ்ஜிதே’’திஆதி³ ந வத்தப்³ப³ம்.

யம் பன தே வத³ந்தி ‘‘யஸ்மா இத்³தி⁴மஸ்ஸ ச பரஸ்ஸ ச ஏகக்க²ணே சித்தம் உப்பஜ்ஜதீ’’தி, தத்தா²யம் அதி⁴ப்பாயோ ஸியா – சேதோபரியஞாணலாபீ⁴ பரஸ்ஸ சித்தம் ஞாதுகாமோ பாத³கஜ்ஜா²னம் ஸமாபஜ்ஜித்வா வுட்டா²ய அதீதாதி³விபா⁴க³ம் அகத்வா சித்தஸாமஞ்ஞேன ‘‘இமஸ்ஸ சித்தம் ஜானாமீ’’தி பரிகம்மம் கத்வா புன பாத³கஜ்ஜா²னம் ஸமாபஜ்ஜித்வா வுட்டா²ய ஸாமஞ்ஞேனேவ சித்தம் ஆவஜ்ஜித்வா திண்ணம் சதுன்னம் வா பரிகம்மானம் அனந்தரா சேதோபரியஞாணேன பரசித்தம் படிவிஜ்ஜ²தி விபா⁴வேதி ரூபம் விய தி³ப்³ப³சக்கு²னா. ததோ பரம் பன காமாவசரசித்தேஹி ஸராகா³தி³வவத்தா²னம் ஹோதி நீலாதி³வவத்தா²னம் விய. தத்த² தி³ப்³ப³சக்கு²னா தி³ட்ட²ஹத³யவத்து²ரூபஸ்ஸ ஸத்தஸ்ஸ அபி⁴முகீ²பூ⁴தஸ்ஸ சித்தஸாமஞ்ஞேன சித்தம் ஆவஜ்ஜயமானம் ஆவஜ்ஜனம் அபி⁴முகீ²பூ⁴தம் விஜ்ஜமானம் சித்தம் ஆரம்மணம் கத்வா சித்தம் ஆவஜ்ஜேதி. பரிகம்மானி ச தம் தம் விஜ்ஜமானம் சித்தம் சித்தஸாமஞ்ஞேனேவ ஆரம்மணம் கத்வா சித்தஜானனபரிகம்மானி ஹுத்வா பவத்தந்தி. சேதோபரியஞாணம் பன விஜ்ஜமானம் சித்தம் படிவிஜ்ஜ²ந்தம் விபா⁴வேந்தம் தேன ஸஹ ஏகக்க²ணே ஏவ உப்பஜ்ஜதி. தத்த² யஸ்மா ஸந்தானஸ்ஸ ஸந்தானக்³க³ஹணதோ ஏகத்தவஸேன ஆவஜ்ஜனாதீ³னி சித்தந்த்வேவ பவத்தானி, தஞ்ச சித்தமேவ, யம் சேதோபரியஞாணேன விபா⁴விதம், தஸ்மா ஸமானாகாரப்பவத்திதோ ந அனிட்டே² மக்³க³ப²லவீதி²தோ அஞ்ஞஸ்மிம் டா²னே நானாரம்மணதா ஆவஜ்ஜனஜவனானம் ஹோதி. பச்சுப்பன்னாரம்மணஞ்ச பரிகம்மம் பச்சுப்பன்னாரம்மணஸ்ஸ சேதோபரியஞாணஸ்ஸ ஆஸேவனபச்சயோதி ஸித்³த⁴ம் ஹோதி. அதீதத்திகோ ச ஏவம் அபி⁴ன்னோ ஹோதி. அஞ்ஞதா² ஸந்ததிபச்சுப்பன்னே அத்³தா⁴பச்சுப்பன்னே ச பச்சுப்பன்னந்தி இத⁴ வுச்சமானே அதீதானாக³தானஞ்ச பச்சுப்பன்னதா ஆபஜ்ஜேய்ய, ததா² ச ஸதி ‘‘பச்சுப்பன்னோ த⁴ம்மோ பச்சுப்பன்னஸ்ஸ த⁴ம்மஸ்ஸ அனந்தரபச்சயேன பச்சயோ’’திஆதி³ வத்தப்³ப³ம் ஸியா, ந ச தம் வுத்தம். ‘‘அதீதோ த⁴ம்மோ பச்சுப்பன்னஸ்ஸ த⁴ம்மஸ்ஸ அனந்தரபச்சயேன பச்சயோ, புரிமா புரிமா அதீதா க²ந்தா⁴ பச்சி²மானம் பச்சி²மானம் பச்சுப்பன்னானம் க²ந்தா⁴னம் அனந்தர…பே… அனுலோமம் கோ³த்ரபு⁴ஸ்ஸா’’திஆதி³வசனதோ (பட்டா². 2.18.5) பன அத்³தா⁴ஸந்ததிபச்சுப்பன்னேஸ்வேவ அனந்தராதீதா சத்தாரோ க²ந்தா⁴ அதீதாதி விஞ்ஞாயந்தி, ந ச அபி⁴த⁴ம்மமாதிகாய ஆக³தஸ்ஸ பச்சுப்பன்னபத³ஸ்ஸ அத்³தா⁴ஸந்ததிபச்சுப்பன்னபத³த்த²தா கத்த²சி பாளியம் வுத்தா. தஸ்மா தேஹி இத்³தி⁴மஸ்ஸ ச பரஸ்ஸ ச ஏகக்க²ணே சித்துப்பத்தியா சேதோபரியஞாணஸ்ஸ பச்சுப்பன்னாரம்மணதா வுத்தா. யதா³ பன ‘‘யம் இமஸ்ஸ சித்தம் பவத்தம், தம் ஜானாமி. யம் ப⁴விஸ்ஸதி, தம் ஜானிஸ்ஸாமீ’’தி வா ஆபோ⁴க³ம் கத்வா பாத³கஜ்ஜா²னஸமாபஜ்ஜனாதீ³னி கரோதி, ததா³ ஆவஜ்ஜனபரிகம்மானி சேதோபரியஞாணஞ்ச அதீதானாக³தாரம்மணானேவ ஹோந்தி ஆவஜ்ஜனேனேவ விபா⁴க³ஸ்ஸ கதத்தா.

யே பன ‘‘இத்³தி⁴மா பரஸ்ஸ சித்தம் ஜானிதுகாமோ ஆவஜ்ஜேதி, ஆவஜ்ஜனம் க²ணபச்சுப்பன்னம் ஆரம்மணம் கத்வா தேனேவ ஸஹ நிருஜ்ஜ²தி, ததோ சத்தாரி பஞ்ச வா ஜவனானி. யேஸம் பச்சி²மம் இத்³தி⁴சித்தம், ஸேஸானி காமாவசரானி, தேஸம் ஸப்³பே³ஸம்பி ததே³வ நிருத்³த⁴ம் சித்தமாரம்மணம் ஹோதி, ந ச தானி நானாரம்மணானி ஹோந்தி, அத்³தா⁴வஸேன பச்சுப்பன்னாரம்மணத்தா’’தி இத³ம் வசனம் நிஸ்ஸாய ‘‘ஆவஜ்ஜனஜவனானம் பச்சுப்பன்னாதீதாரம்மணபா⁴வேபி நானாரம்மணத்தாபா⁴வோ விய ஏகத்³விதிசதுபஞ்சசித்தக்க²ணானாக³தேஸுபி சித்தேஸு ஆவஜ்ஜிதேஸு ஆவஜ்ஜனஜவனானம் யதா²ஸம்ப⁴வம் அனாக³தபச்சுப்பன்னாதீதாரம்மணபா⁴வேபி நானாரம்மணதா ந ஸியா, தேன சதுபஞ்சசித்தக்க²ணானாக³தே ஆவஜ்ஜிதே அனாக³தாரம்மணபரிகம்மானந்தரம் க²ணபச்சுப்பன்னாரம்மணம் சேதோபரியஞாணம் ஸித்³த⁴’’ந்தி வத³ந்தி, தேஸம் வாதோ³ ‘‘அனாக³தாரம்மணோ த⁴ம்மோ பச்சுப்பன்னாரம்மணஸ்ஸ த⁴ம்மஸ்ஸ ஆஸேவனபச்சயேன பச்சயோ, பச்சுப்பன்னாரம்மணோ த⁴ம்மோ அதீதாரம்மணஸ்ஸ த⁴ம்மஸ்ஸ ஆஸேவனபச்சயேன பச்சயோ’’தி இமேஸம் பஞ்ஹானம் அனுத்³த⁴டத்தா க³ணனாய ச ‘‘ஆஸேவனே தீணீ’’தி வுத்தத்தா ந ஸிஜ்ஜ²தி. ந ஹி குஸலகிரியமஹக்³க³தம் அனாஸேவனம் அத்தீ²தி.

ஏதஸ்ஸ ச வாத³ஸ்ஸ நிஸ்ஸயபா⁴வோ ஆவஜ்ஜனஜவனானம் க²ணபச்சுப்பன்னனிருத்³தா⁴ரம்மணதாவசனஸ்ஸ ந ஸிஜ்ஜ²தி, யம் பவத்தம் யம் பவத்திஸ்ஸதீதி வா விஸேஸம் அகத்வா க³ஹணே ஆவஜ்ஜனஸ்ஸ அனாக³தக்³க³ஹணபா⁴வம், தத³பா⁴வா ஜவனானம்பி வத்தமானக்³க³ஹணாபா⁴வஞ்ச ஸந்தா⁴யேவ தஸ்ஸ வுத்தத்தா. ததா³ ஹி ப⁴வங்க³சலனானந்தரம் அபி⁴முகீ²பூ⁴தமேவ சித்தம் ஆரப்³ப⁴ ஆவஜ்ஜனா பவத்ததீதி. ஜானனசித்தஸ்ஸபி வத்தமானாரம்மணபா⁴வே ஆவஜ்ஜனஜானனசித்தானம் ஸஹட்டா²னதோ³ஸாபத்தியா ராஸிஏகதே³ஸாவஜ்ஜனபடிவேதே⁴ ஸம்பத்தஸம்பத்தாவஜ்ஜனஜானனே ச அனிட்டே² டா²னே ஆவஜ்ஜனஜவனானம் நானாரம்மணபா⁴வதோ³ஸாபத்தியா ச யம் வுத்தம் ‘‘க²ணபச்சுப்பன்னம் சித்தம் சேதோபரியஞாணஸ்ஸ ஆரம்மணம் ஹோதீ’’தி, தம் அயுத்தந்தி படிக்கி²பித்வா யதா²வுத்ததோ³ஸானாபத்திகாலவஸேனேவ அத்³தா⁴ஸந்ததிபச்சுப்பன்னாரம்மணத்தா நானாரம்மணதாபா⁴வம் தி³ஸ்வா ஆவஜ்ஜனஜவனானம் வத்தமானதம் நிருத்³தா⁴ரம்மணபா⁴வோ வுத்தோதி, தம்பி வசனம் புரிமவாதி³னோ நானுஜானேய்யும். தஸ்மிஞ்ஹி ஸதி ஆவஜ்ஜனா குஸலானந்திஆதீ³ஸு விய அஞ்ஞபத³ஸங்க³ஹிதஸ்ஸ அனந்தரபச்சயவிதா⁴னதோ ‘‘பச்சுப்பன்னாரம்மணா ஆவஜ்ஜனா அதீதாரம்மணானம் க²ந்தா⁴னம் அனந்தரபச்சயேன பச்சயோ’’தி வத்தப்³ப³ம் ஸியா, ந ச வுத்தந்தி.

கஸ்மா பனேவம் சேதோபரியஞாணஸ்ஸ பச்சுப்பன்னாரம்மணதா விசாரிதா, நனு ‘‘அதீதோ த⁴ம்மோ பச்சுப்பன்னஸ்ஸ த⁴ம்மஸ்ஸ, அனாக³தோ த⁴ம்மோ பச்சுப்பன்னஸ்ஸ த⁴ம்மஸ்ஸ ஆரம்மணபச்சயேன பச்சயோ’’தி ஏதேஸம் விப⁴ங்கே³ஸு ‘‘அதீதா க²ந்தா⁴ இத்³தி⁴வித⁴ஞாணஸ்ஸசேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ யதா²கம்மூபக³ஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.18.2), ‘‘அனாக³தா க²ந்தா⁴ இத்³தி⁴வித⁴ஞாணஸ்ஸ சேதோபரியஞாணஸ்ஸ அனாக³தம்ஸஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.17.3-4), உப்பன்னத்திகே ச ‘‘அனுப்பன்னாக²ந்தா⁴, உப்பாதி³னோ க²ந்தா⁴ இத்³தி⁴வித⁴ஞாணஸ்ஸ சேதோபரியஞாணஸ்ஸ அனாக³தம்ஸஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி சேதோபரியஞாணக்³க³ஹணம் கத்வா ‘‘பச்சுப்பன்னோ த⁴ம்மோ பச்சுப்பன்னஸ்ஸா’’தி ஏதஸ்ஸ விப⁴ங்கே³ ‘‘பச்சுப்பன்னா க²ந்தா⁴ இத்³தி⁴வித⁴ஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.18.3), உப்பன்னத்திகே ச ‘‘உப்பன்னா க²ந்தா⁴ இத்³தி⁴வித⁴ஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.17.2) ஏத்தகஸ்ஸேவ வுத்தத்தா ‘‘பச்சுப்பன்னசித்தே சேதோபரியஞாணம் நப்பவத்ததீ’’தி விஞ்ஞாயதி. யதி³ ஹி பவத்தேய்ய, புரிமேஸு விய இதரேஸு ச சேதோபரியஞாணக்³க³ஹணம் கத்தப்³ப³ம் ஸியாதி? ஸச்சம் கத்தப்³ப³ம், நயத³ஸ்ஸனவஸேன பனேதம் ஸம்கி²த்தந்தி அஞ்ஞாய பாளியா விஞ்ஞாயதி. ‘‘அதீதாரம்மணோ த⁴ம்மோ பச்சுப்பன்னாரம்மணஸ்ஸ த⁴ம்மஸ்ஸ ஆரம்மணபச்சயேன பச்சயோ (பட்டா². 2.19.20), அனாக³தாரம்மணோ த⁴ம்மோ பச்சுப்பன்னாரம்மணஸ்ஸ. பச்சுப்பன்னாரம்மணோ த⁴ம்மோ பச்சுப்பன்னாரம்மணஸ்ஸா’’தி (பட்டா². 2.19.22) ஏதேஸஞ்ஹி விப⁴ங்கே³ஸு ‘‘சேதோபரியஞாணேன அதீதாரம்மணபச்சுப்பன்னசித்தஸமங்கி³ஸ்ஸ சித்தம் ஜானாதி. அதீதாரம்மணா பச்சுப்பன்னா க²ந்தா⁴ சேதோபரியஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.19.22), ‘‘சேதோபரியஞாணேன அனாக³தாரம்மணபச்சுப்பன்னசித்தஸமங்கி³ஸ்ஸ சித்தம்…பே… சேதோபரியஞாணேன பச்சுப்பன்னாரம்மணபச்சுப்பன்னசித்தஸமங்கி³ஸ்ஸ சித்தம் ஜானாதி. பச்சுப்பன்னாரம்மணா பச்சுப்பன்னா க²ந்தா⁴ சேதோபரியஞாணஸ்ஸ ஆவஜ்ஜனாய ஆரம்மணபச்சயேன பச்சயோ’’தி (பட்டா². 2.19.21) சேதோபரியஞாணஸ்ஸ பச்சுப்பன்னாரம்மணே பவத்தி வுத்தாதி. தேனேவாயம் விசாரணா கதாதி வேதி³தப்³பா³.

தேஸந்தி தேஸு த்³வீஸு ஞாணேஸூதி நித்³தா⁴ரணே ஸாமிவசனம். குஸலா க²ந்தா⁴தி இத்³தி⁴வித⁴புப்³பே³னிவாஸானாக³தம்ஸஞாணாபேக்கோ² ப³ஹுவசனனித்³தே³ஸோ, ந சேதோபரியஞாணயதா²கம்மூபக³ஞாணாபேக்கோ²தி. தேஸம் சதுக்க²ந்தா⁴ரம்மணபா⁴வஸ்ஸ அஸாத⁴கோதி சே? ந, அஞ்ஞத்த² ‘‘அவிதக்கவிசாரமத்தா க²ந்தா⁴ ச விசாரோ ச சேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ அனாக³தம்ஸஞாணஸ்ஸ ஆரம்மணபச்சயேன பச்சயோ’’தி (பட்டா². 2.6.72) ‘‘ஸவிதக்கஸவிசாரா க²ந்தா⁴ ச விதக்கோ ச சேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ அனாக³தம்ஸஞாணஸ்ஸ ஆரம்மணபச்சயேன பச்சயோ’’தி (பட்டா². 2.6.69) ச வுத்தத்தா சேதோபரியஞாணாபேக்கோ²பி ப³ஹுவசனனித்³தே³ஸோதி இமஸ்ஸத்த²ஸ்ஸ ஸித்³தி⁴தோ. ஏவமபி யதா²கம்மூபக³ஞாணஸ்ஸ ‘‘அவிதக்கவிசாரமத்தா க²ந்தா⁴ ச விசாரோ சா’’திஆதீ³ஸு அவுத்தத்தா சதுக்க²ந்தா⁴ரம்மணதா ந ஸிஜ்ஜ²தீதி? ந, தத்த² அவசனஸ்ஸ அஞ்ஞகாரணத்தா. யதா²கம்மூபக³ஞாணேன ஹி கம்மஸம்ஸட்டா² சத்தாரோ க²ந்தா⁴ கம்மப்பமுகே²ன க³ய்ஹந்தி. தஞ்ஹி யதா² சேதோபரியஞாணம் புரிமபரிகம்மவஸேன ஸவிதக்காதி³விபா⁴க³ம் ஸராகா³தி³விபா⁴க³ஞ்ச சித்தம் விபா⁴வேதி, ந ஏவம் ஸவிபா⁴க³ம் விபா⁴வேதி, கம்மவஸேனேவ பன ஸமுதா³யம் விபா⁴வேதீதி ‘‘அவிதக்கவிசாரமத்தா க²ந்தா⁴ ச விசாரோ சா’’திஆதி³கே விபா⁴க³கரணே தம் ந வுத்தம், ந சதுக்க²ந்தா⁴னாரம்மணதோதி. இத³ம் பன அவசனஸ்ஸ காரணந்தி. கேசி தத்தா²பி ‘‘புப்³பே³னிவாஸானுஸ்ஸதிஞாணஸ்ஸ யதா²கம்மூபக³ஞாணஸ்ஸ அனாக³தம்ஸஞாணஸ்ஸா’’தி பட²ந்தி ஏவ. ந ஹி தம் குஸலாகுஸலவிபா⁴க³ம் விய ஸவிதக்காதி³விபா⁴க³ம் கம்மம் விபா⁴வேதும் அஸமத்த²ம். து³ச்சரிதஸுசரிதபா⁴வவிபா⁴வனம்பி ஹி லோபா⁴தி³அலோபா⁴தி³ஸம்பயோக³விஸேஸவிபா⁴வனம் ஹோதீதி.

1435. நியகஜ்ஜ²த்தபரியாயஸ்ஸ அபா⁴வேனாதி ஸபா⁴வத⁴ம்மத்தா கேனசி பரியாயேன நியகஜ்ஜ²த்தம் அஹோந்தம் ஸப்³ப³தா² ப³ஹித்³தா⁴பா⁴வேனேவ ‘‘ஏகந்தப³ஹித்³தா⁴’’தி வுத்தம், ந அஸபா⁴வத⁴ம்மத்தா ப³ஹித்³தா⁴பி அஹோந்தம் கஸிணாதி³ விய நியகஜ்ஜ²த்தமத்தஸ்ஸ அஸம்ப⁴வதோ. அஸபா⁴வத⁴ம்மத்தா ஏவ ஹி கஸிணாதி³அஜ்ஜ²த்தத⁴ம்மபூ⁴தோ ச கோசி பா⁴வோ ந ஹோதீதி அஜ்ஜ²த்தத்திகே ந வுத்தந்தி அதி⁴ப்பாயோ. தம் ஸப்³ப³ம் ஆகிஞ்சஞ்ஞாயதனாதி³ அதீதாரம்மணத்திகே ‘‘நவத்தப்³பா³ரம்மண’’ந்தி வுத்தந்தி ஸம்ப³ந்தோ⁴. ஏத்த² ச வுத்தந்தி அனுஞ்ஞாதத்தா வசனதோதி ஏதேஹி காரணேஹி பகாஸிதந்தி அத்தோ².

இதா³னி தந்தி ‘‘ஏதஞ்ஹி ஆகிஞ்சஞ்ஞாயதன’’ந்தி வுத்தம் ஆகிஞ்சஞ்ஞாயதனம் தம்-ஸத்³தே³ன ஆகட்³டி⁴த்வா வத³தி. யோ பனாயமேத்த² அத்தோ² வுத்தோ ‘‘ஆகிஞ்சஞ்ஞாயதனம் ஏகம்பி இத⁴ வுச்சமானம் அதீதாரம்மணத்திகே தேன ஸஹேகாரம்மணதம்பி ஸந்தா⁴ய காமாவசரகுஸலாதீ³னம் நவத்தப்³பா³ரம்மணதாய வுத்தத்தா இதா⁴பி தேஸம் நவத்தப்³பா³ரம்மணபா⁴வம் தீ³பேதீதி கத்வா தஸ்மிம் வுத்தே தானிபி வுத்தானேவ ஹோந்தி, தஸ்மா விஸும் ந வுத்தானீ’’தி, தமஞ்ஞே நானுஜானந்தி. ந ஹி ஈதி³ஸம் லேஸவசனம் அட்ட²கதா²கண்டே³ அத்தி². யதி³ ஸியா, பரித்தாரம்மணத்திகே யேஸம் ஸமானாரம்மணானம் பரித்தாதி³ஆரம்மணதா நவத்தப்³ப³தா ச வுத்தா. புன அதீதாரம்மணத்திகே தேஸு ஏகமேவ வத்வா அஞ்ஞம் ந வத்தப்³ப³ம் ஸியா. ததா² வேத³னாத்திகே ஸமானவேத³னானம் யேஸம் ஸுகா²ய வேத³னாய ஸம்பயுத்ததா வுத்தா, தேஸு ஏகமேவ பீதித்திகே ஸுக²ஸஹக³தனித்³தே³ஸே வத்வா அஞ்ஞம் ந வத்தப்³ப³ம் ஸியா. ஏவம் உபேக்கா²ஸஹக³தனித்³தே³ஸாதீ³ஸு யோஜேதப்³ப³ம். லேஸேன பன வினா அட்ட²கதா²கண்டே³ அத்து²த்³தா⁴ரஸ்ஸ கதத்தா ஆகிஞ்சஞ்ஞாயதனஸ்ஸ விய காமாவசரகுஸலாதீ³னம்பி அஜ்ஜ²த்தாரம்மணத்திகே நவத்தப்³ப³தாய ஸதி தானிபி நவத்தப்³பா³னீதி வத்தப்³பா³னி, ந பன வுத்தானி. தஸ்மா அபா⁴வனாஸாமஞ்ஞேபி யாய அபா⁴வனானிட்ட²ப்பவத்தியா ஆகிஞ்சஞ்ஞாயதனம் பவத்தமானம் நவத்தப்³ப³ம் ஜாதம், தஸ்ஸா பவத்தியா அபா⁴வேன தானி நவத்தப்³பா³னீதி ந வுத்தானி. க³ஹணவிஸேஸனிம்மிதானேவ ஹி கஸிணாதீ³னி ஸபா⁴வதோ அவிஜ்ஜமானானீதி ததா³ரம்மணானம் ப³ஹித்³தா⁴க³ஹணவஸேன ப³ஹித்³தா⁴ரம்மணதா வுத்தா. ஆகிஞ்சஞ்ஞாயதனம் பன ந ப³ஹித்³தா⁴க³ஹணபா⁴வேன பவத்ததி, நாபி அஜ்ஜ²த்தக்³க³ஹணபா⁴வேன பவத்ததீதி நவத்தப்³ப³ந்தி வுத்தம். யேன பன க³ஹணாகாரேன ஆகிஞ்சஞ்ஞாயதனம் பவத்ததி, ந தேன ஸப்³ப³ஞ்ஞுதஞ்ஞாணம்பி பவத்ததி. யதி³ பவத்தேய்ய, தம்பி ஆகிஞ்சஞ்ஞாயதனமேவ ப⁴வேய்ய. யதா² ஹி கிலேஸானம் கோ³சரம் பவத்திவிஸேஸஞ்ச ஸப்³ப³ம் ஜானந்தம் ஸப்³ப³ஞ்ஞுதஞ்ஞாணம் ந யதா² தே க³ண்ஹந்தி, ததா² க³ண்ஹாதி தஸ்ஸபி கிலேஸபா⁴வாபத்திதோ, ஏவம் ஆகிஞ்சஞ்ஞாயதனஸ்ஸ ச பவத்தனாகாரம் யதா²ஸபா⁴வதோ ஜானந்தம் தம் ஆகிஞ்சஞ்ஞாயதனமிவ ந க³ண்ஹாதி, கிமங்க³ம் பன அஞ்ஞந்தி. தேன காமாவசரகுஸலானம் நவத்தப்³ப³தா ந வுத்தாதி. அயம் ‘‘ஆகிஞ்சஞ்ஞாயதனஸ்ஸ விஸயபூ⁴தோ அபக³மோ நாம ஏகோ அத்தோ² அத்தீ²’’தி அனிச்ச²ந்தானம் ஆசரியானம் வினிச்ச²யோ.

விபாகம் பன ந கஸ்ஸசி ஆரம்மணம் ஹோதீதி விபாகம் ஆகாஸானஞ்சாயதனம் விபாகாதீ³ஸு விஞ்ஞாணஞ்சாயதனேஸு ந கஸ்ஸசி ஆரம்மணம் ஹோதீதி அத்தோ², ததா² ஆகிஞ்சஞ்ஞாயதனஞ்ச நேவஸஞ்ஞானாஸஞ்ஞாயதனஸ்ஸ. யதா² ஹி விபாகத்திகே விபாகத⁴ம்மத⁴ம்மனேவவிபாகனவிபாகத⁴ம்மத⁴ம்மமூலகேஸு பஞ்ஹேஸு ‘‘ஆகாஸானஞ்சாயதனகுஸலம் விஞ்ஞாணஞ்சாயதனகுஸலஸ்ஸ ஆரம்மணபச்சயேன பச்சயோ, ஆகிஞ்சஞ்ஞாயதனகுஸலம் நேவஸஞ்ஞானாஸஞ்ஞாயதனகுஸலஸ்ஸ, ததா² விபாகஸ்ஸ கிரியஸ்ஸ. ஆகாஸானஞ்சாயதனகிரியம் விஞ்ஞாணஞ்சாயதனகிரியஸ்ஸ. ஆகிஞ்சஞ்ஞாயதனகிரியம் நேவஸஞ்ஞானாஸஞ்ஞாயதனகிரியஸ்ஸ ஆரம்மணபச்சயேன பச்சயோ’’தி (பட்டா². 1.1.406, 410) வுத்தம், ந ததா² விபாகத⁴ம்மமூலகேஸு ‘‘ஆகாஸானஞ்சாயதனஆகிஞ்சஞ்ஞாயதனவிபாகா விஞ்ஞாணஞ்சாயதனனேவஸஞ்ஞானாஸஞ்ஞாயதனவிபாககுஸலகிரியானம் ஆரம்மணபச்சயேன பச்சயோ’’தி வுத்தா. விபாகதோ வுட்ட²ஹித்வா சித்தஸ்ஸ அபி⁴னீஹாராஸம்ப⁴வதோதி விபாகம் ஆரம்மணம் கத்வா அபி⁴னீஹாராஸம்ப⁴வதோதி அத்தோ². விபாகஸ்ஸ ஹி ஆரம்மணம் கத்வா நத்தி² அபி⁴னீஹாரோதி.

அத்தனோ க²ந்தா⁴தீ³னீதி அரூபக்க²ந்தே⁴ ‘‘க²ந்தா⁴’’தி க³ஹேத்வா ஆதி³-ஸத்³தே³ன ரூபம் க³ண்ஹாதி. அஜ்ஜ²த்தம் வா க³ய்ஹமானம் அஹந்தி பஞ்ஞத்திம் ஆதி³-ஸத்³தே³ன க³ண்ஹாதி. ஏஸ நயோ பரேஸம் க²ந்தா⁴தி³க்³க³ஹணே ச. புன பஞ்ஞத்திக்³க³ஹணேன கஸிணவிஹாராதி³அனிந்த்³ரியப³த்³து⁴பாதா³யபஞ்ஞத்திமாஹ. ஆதி³-ஸத்³தே³ன வா அஹம் பரம் பண்ணத்திக்³க³ஹணே ஸப்³ப³ம் உபாதா³யபஞ்ஞத்திம். கம்மாதீ³ஸு கம்மம் அஜ்ஜ²த்தம், கம்மனிமித்தம் உப⁴யம், க³தினிமித்தம் ப³ஹித்³தா⁴தி த³ட்ட²ப்³ப³ம். அத்தனோ ஸரீரே ஏவ கிமி ஹுத்வா நிப்³ப³த்தமானஸ்ஸ க³தினிமித்தம்பி அஜ்ஜ²த்தம் ஸியா. மல்லிகாய கும்மாஸம் த³த³மானாய ரஞ்ஞோ அக்³க³மஹேஸிட்டா²னலாப⁴ம், ஸந்ததிமஹாமத்தஸ்ஸ ஹத்தி²க்க²ந்த⁴க³தஸ்ஸ அரஹத்தப்பத்திம், ஸுமனமாலாகாரஸ்ஸ ச புப்ப²முட்டி²னா பூஜேந்தஸ்ஸ பச்சேகபோ³தி⁴ஸச்சி²கிரியம் நிஸ்ஸாய ப⁴க³வா ஸிதம் பாத்வாகாஸி.

இமஸ்மிம் திகே ஓகாஸம் லப⁴ந்தீதி பரித்தாரம்மணாதீதாரம்மணத்திகேஸு அலத்³தோ⁴காஸானி நவத்தப்³பா³னீதி வுத்தானி, இத⁴ பன நவத்தப்³பா³னி ந ஹோந்தி, அஜ்ஜ²த்தாதீ³ஸு ஏகாரம்மணதம் லப⁴ந்தீதி அத்தோ². ஏதானி ஹி பஞ்ச ஸப்³ப³த்த²பாத³காகாஸாலோககஸிணசதுத்தா²னம் கஸிணாரம்மணத்தா, ப்³ரஹ்மவிஹாரசதுத்த²ஸ்ஸ பஞ்ஞத்திஆரம்மணத்தா, ஆனாபானசதுத்த²ஸ்ஸ நிமித்தாரம்மணத்தா ப³ஹித்³தா⁴ரம்மணானீதி. ஸகாயசித்தானந்தி ஸககாயசித்தானம், தேன பயோஜனம் நத்தி², தஸ்மா ந தம் அஜ்ஜ²த்தாரம்மணந்தி அத்தோ². அனிந்த்³ரியப³த்³த⁴ஸ்ஸ வா ரூபஸ்ஸாதி ஏத்த² ‘‘திஸ்ஸன்னம் வா பஞ்ஞத்தீன’’ந்தி இத³ம்பி வா-ஸத்³தே³ன ஆஹரிதப்³ப³ம், நயத³ஸ்ஸனம் வா ஏதம் த³ட்ட²ப்³ப³ம். ஈதி³ஸே ஹி காலே ப³ஹித்³தா⁴ரம்மணந்தி.

திகஅத்து²த்³தா⁴ரவண்ணனா நிட்டி²தா.

து³கஅத்து²த்³தா⁴ரவண்ணனா

1473. மானோ …பே… ஏகதா⁴வாதி இத³ம் அவுத்தப்பகாரத³ஸ்ஸனவஸேன வுத்தம், அஞ்ஞதா² மானோ காமராகா³விஜ்ஜாஸஞ்ஞோஜனேஹி ஏகதோ உப்பஜ்ஜதீதி த்³விதா⁴தி வத்தப்³போ³ ஸியா. ஏஸ நயோ ப⁴வராகா³தீ³ஸு. ததா² விசிகிச்சா²தி ஏத்த² ததா²தி ஏதஸ்ஸ ஏகதா⁴வாதி அத்தோ².

1511. ஸஸங்கா²ரிகேஸூதி இத³ம் காமச்ச²ந்த³னீவரணஸ்ஸ தீஹி நீவரணேஹி ஸத்³தி⁴ம் உப்பஜ்ஜனட்டா²னத³ஸ்ஸனமத்தம் த³ட்ட²ப்³ப³ம், ந நியமதோ தத்த² தஸ்ஸ தேஹி உப்பத்தித³ஸ்ஸனத்த²ம் தி²னமித்³த⁴ஸ்ஸ அனியதத்தா. ஹேட்டி²மபரிச்சே²தே³னாதி உத்³த⁴ச்சஸ்ஸ ஸப்³பா³குஸலே உப்பஜ்ஜனதோ உத்³த⁴ச்சஸஹக³தே த்³வே, அஞ்ஞேஸு தி²னமித்³த⁴குக்குச்சவிரஹே தீணி ஹேட்டி²மந்ததோ உப்பஜ்ஜந்தீதி கத்வா ‘‘த்³வே தீணீ’’தி வுத்தந்தி அத்தோ². யத்தகானம் பன ஏகதோ உப்பத்தியம் நீவரணா சேவ நீவரணஸம்பயுத்தா சாதி அயமத்தோ² ஸம்ப⁴வதி, ஹேட்டி²மந்தேன தேஸம் த³ஸ்ஸனத்த²ம் ‘‘த்³வே’’தி வுத்தம். ததோ உத்³த⁴ம்பி பவத்தியம் அயமத்தோ² ஸம்ப⁴வதி ஏவாதி த³ஸ்ஸனத்த²ம் ‘‘தீணீ’’தி வுத்தம். த்³வே தீணீதி ச த்³வே வா தீணி வாதி அனியமனித்³தே³ஸோதி சத்தாரி வா பஞ்ச வாதிபி விஞ்ஞாயதி. யத்த² ஸஹுப்பத்தி, தத்த² நீவரணா சேவ நீவரணஸம்பயுத்தா ச ஹோந்தீதி ஏதஸ்ஸ வா லக்க²ணஸ்ஸ த³ஸ்ஸனமேதந்தி. யத்த² சத்தாரி பஞ்ச ச உப்பஜ்ஜந்தி, தத்த² சாயமத்தோ² ஸாதி⁴தோ ஹோதி. ஏவஞ்ச கத்வா கிலேஸகோ³ச்ச²கே ச ‘‘த்³வே தயோ’’தி வுத்தம். லக்க²ணத³ஸ்ஸனவஸேன ஹி கிலேஸா சேவ கிலேஸஸம்பயுத்தா ச வுத்தா, ந ஸப்³பே³ஸம் ஸம்ப⁴வந்தானம் ஸரூபேன த³ஸ்ஸனவஸேனாதி.

யதி³ உத்³த⁴ச்சம் ஸப்³பா³குஸலே உப்பஜ்ஜதி, கஸ்மா வுத்தம் ‘‘உத்³த⁴ச்சனீவரணம் உத்³த⁴ச்சஸஹக³தே சித்துப்பாதே³ உப்பஜ்ஜதீ’’தி? ஸுத்தந்தே வுத்தேஸு பஞ்சஸு நீவரணேஸு அஞ்ஞனீவரணரஹிதஸ்ஸ உத்³த⁴ச்சஸ்ஸ விஸயவிஸேஸத³ஸ்ஸனத்த²ம். ச²ட்ட²ம் பன நீவரணம் அபி⁴த⁴ம்மே இதரேஹி ஸஹக³தந்தி தஸ்ஸ அஞ்ஞனீவரணரஹிதஸ்ஸ ந கோசி விஸயவிஸேஸோ அத்தி², அத்தனா ஸஹக³தேஹி வினா உப்பஜ்ஜனட்டா²னாபா⁴வா தது³பலக்கி²தஸ்ஸ சித்துப்பாத³ஸ்ஸ அபா⁴வா ச நத்தே²வ விஸயவிஸேஸோ, தஸ்மா ‘‘தம் ஸப்³பா³குஸலே உப்பஜ்ஜதீ’’தி வுத்தம். உத்³த⁴ச்சஸஹக³தோ பன வுத்தசித்துப்பாதோ³ ஸேஸத⁴ம்மானம் உத்³த⁴ச்சானுவத்தனபா⁴வேன தது³பலக்கி²தோ உத்³த⁴ச்சஸ்ஸ விஸயவிஸேஸோ, தஸ்மா ஸப்³பா³குஸலே உப்பஜ்ஜமானம் உத்³த⁴ச்சம் ஸாமஞ்ஞேன ‘‘உத்³த⁴ச்சனீவரண’’ந்தி க³ஹேத்வாபி தம் அத்தனோ விஸயவிஸேஸேன பகாஸேதும் ‘‘உத்³த⁴ச்சஸஹக³தே சித்துப்பாதே³ உப்பஜ்ஜதீ’’தி ஆஹ. ஏவஞ்ச பகாஸனம் விஸயவிஸேஸேஸு லோப⁴தோ³மனஸ்ஸஸஹக³தஸஸங்கா²ரிகவிசிகிச்சு²த்³த⁴ச்சஸஹக³தேஸு பஞ்ச நீவரணானி வவத்த²பேத்வா தேஸம் ப்³யாபகபா⁴வேன ச²ட்ட²ம் பகாஸேதும் கதந்தி வேதி³தப்³ப³ம்.

கேசி பன ‘‘உத்³த⁴ச்சஸஹக³தேதி ஸாமஞ்ஞேன ஸப்³ப³ம் உத்³த⁴ச்சம் ‘உத்³த⁴ச்ச’ந்தி க³ஹேத்வா தேன ஸஹக³தே சித்துப்பாதே³’’தி வத³ந்தி, அயம் பனத்தோ² ந ப³ஹுமதோ த்³வாத³ஸமசித்துப்பாத³ஸ்ஸ விய ஸப்³பா³குஸலசித்துப்பாதா³னம் உத்³த⁴ச்சேன அனுபலக்கி²தத்தா, ஸதி ச உபலக்கி²தத்தே ‘‘அட்ட²ஸு லோப⁴ஸஹக³தேஸூ’’திஆதீ³ஸு விய அஞ்ஞேஸம் சித்துப்பாதா³னம் நிவத்தனத்த²ம் ‘‘த்³வாத³ஸஸு உத்³த⁴ச்சஸஹக³தேஸூ’’தி வத்தப்³ப³த்தா. உத்³த⁴ச்சானுபலக்கி²தத்தா பன ஸப்³பா³குஸலானம் அவிஜ்ஜானீவரணம் விய இத³ம்பி ‘‘ஸப்³பா³குஸலேஸு உப்பஜ்ஜதீ’’தி வத்தப்³ப³ம் ஸியா, ந பன வுத்தம், தஸ்மா வுத்தனயேனேவ அத்தோ² வேதி³தப்³போ³. யஸ்மா ச அவிஜ்ஜானீவரணம் விய உத்³த⁴ச்சனீவரணஞ்ச ஸப்³பா³குஸலேஸு உப்பஜ்ஜதி, தஸ்மா நிக்கே²பகண்டே³ ‘‘காமச்ச²ந்த³னீவரணம் உத்³த⁴ச்சனீவரணேன நீவரணஞ்சேவ நீவரணஸம்பயுத்தஞ்சா’’திஆதி³ வுத்தம். தேன ஏகஸ்மிம்யேவ சித்துப்பாதே³ உத்³த⁴ச்சனீவரணம் உப்பஜ்ஜதீதி அக்³க³ஹேத்வா அதி⁴ப்பாயோ மக்³கி³தப்³போ³தி.

கிலேஸகோ³ச்ச²கே லோபா⁴தீ³னி த³ஸ கிலேஸவத்தூ²னி இமினா அனுக்கமேன இதே⁴வ அபி⁴த⁴ம்மே ஆக³தானி. தஸ்மா இதே⁴வ வுத்தஸ்ஸ உத்³த⁴ச்சகிலேஸஸ்ஸ அத்தனா ஸஹ வுத்தேஹி கிலேஸேஹி ரஹிதஸ்ஸ விஸயவிஸேஸோ நத்தீ²தி விஸயவிஸேஸேன பகாஸனம் அகத்வா ‘‘உத்³த⁴ச்சஞ்ச அஹிரிகஞ்ச அனோத்தப்பஞ்ச ஸப்³பா³குஸலேஸு உப்பஜ்ஜதீ’’தி வுத்தம். கிலேஸா சேவ ஸம்கிலிட்ட²பத³னித்³தே³ஸே யஸ்மா ஸம்கிலிட்ட²பத³ம் கிலேஸஸம்பயுத்தபதே³ன அஸமானத்த²ம் கேவலம் மலேன உபதாபிததம் விபா³தி⁴ததஞ்ச தீ³பேதி, தஸ்மா கிலேஸா சேவ கிலேஸஸம்பயுத்தபத³னித்³தே³ஸேன ஸமானம் நித்³தே³ஸம் அகத்வா ‘‘தேவ கிலேஸா கிலேஸா சேவ ஸம்கிலிட்டா² சா’’தி வுத்தம்.

1577. த்³வே தயோ கிலேஸாதி ஏத்த² ‘‘த்³வே தயோதி ஹேதுகோ³ச்ச²காதீ³ஸு வுத்தாதி⁴காரவஸேன ருள்ஹியா வுத்த’’ந்தி கேசி வத³ந்தி. யதி³ அத்த²ம் அனபேக்கி²த்வா ருள்ஹியா வுச்சேய்ய, க³ந்த²கோ³ச்ச²கே ச ‘‘யத்த² த்³வே தயோ க³ந்தா² ஏகதோ உப்பஜ்ஜந்தீ’’தி வத்தப்³ப³ம் ஸியா. யஞ்ச வத³ந்தி ‘‘யத்த² த்³வே தயோ அஞ்ஞேஹி ஏகதோ உப்பஜ்ஜந்தீதி இமஸ்ஸத்த²ஸ்ஸ ஸம்ப⁴வதோ ஏகதோ-ஸத்³தோ³ கிலேஸகோ³ச்ச²கே ஸாத்த²கோ, ந ஹேதுகோ³ச்ச²காதீ³ஸு தேன வினாபி அதி⁴ப்பாயவிஜானனதோ’’தி, தம்பி ந, ஹேதுகோ³ச்ச²காதீ³ஸுபி நானாஉப்பத்தியம் ஹேதூ சேவ ஹேதுஸம்பயுத்தாதி³க்³க³ஹணனிவாரணத்த²த்தா ஏகதோ-ஸத்³த³ஸ்ஸ, தஸ்மா ருள்ஹீஅன்வத்த²கதா²ரோபனஞ்ச வஜ்ஜேத்வா யதா²வுத்தேனேவ நயேன அத்தோ² வேதி³தப்³போ³தி. லோபோ⁴ ச²தா⁴திஆதி³னா லோப⁴படிக⁴மோஹானம் அஞ்ஞேஹி ஏகதோ உப்பத்தித³ஸ்ஸனேனேவ தேஸம்பி லோபா⁴தீ³ஹி ஏகதோ உப்பத்தி த³ஸ்ஸிதாதி வேதி³தப்³பா³. ஸேஸம் உத்தானத்த²மேவாதி.

அட்ட²கதா²கண்ட³வண்ணனா நிட்டி²தா.

சத்தாரி ச ஸஹஸ்ஸானி, புன தீணி ஸதானி ச;

அட்ட²ஸாலினியா ஏதே, பதா³ லீனத்த²ஜோதகா.

த⁴ம்மமித்தோதி நாமேன, ஸக்கச்சம் அபி⁴யாசிதோ;

ஆனந்தோ³இதி நாமேன, கதா க³ந்தா² ஸுபு³த்³தி⁴னாதி.

இதி அட்ட²ஸாலினியா லீனத்த²பத³வண்ணனா

த⁴ம்மஸங்க³ணீ-மூலடீகா ஸமத்தா.