6. ஆனந்த³ஸுத்தவண்ணனா

37. ச²ட்டே² ஓகாஸம் அவஸரம் அதி⁴க³ச்ச²தி ஏதேனாதி ஓகாஸாதி⁴க³மோ, மக்³க³ப²லஸுகா²தி⁴க³மாய ஓகாஸபா⁴வதோ வா ஓகாஸோ, தஸ்ஸ அதி⁴க³மோ ஓகாஸாதி⁴க³மோ. ஏத்த² ச தீ³க⁴னிகாயேனேவ (தீ³. நி. 2.288) பன ஸுத்தந்ததே³ஸனாயம் பட²மஜ்ஜா²னம், சதுத்த²ஜ்ஜா²னம், அரஹத்தமக்³கோ³தி தயோ ஓகாஸாதி⁴க³மா ஆக³தா. தத்த² (தீ³. நி. அட்ட². 2.288) பட²மம் ஜா²னம் பஞ்ச நீவரணானி விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி ‘‘பட²மோ ஓகாஸாதி⁴க³மோ’’தி வுத்தம். சதுத்த²ஜ்ஜா²னம் பன ஸுக²து³க்க²ம் விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி து³தியோ ஓகாஸாதி⁴க³மோ. அரஹத்தமக்³கோ³ ஸப்³ப³கிலேஸே விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி ‘‘ததியோ ஓகாஸாதி⁴க³மோ’’தி வுத்தோ. இத⁴ பன வக்க²மானானி தீணி அரூபஜ்ஜா²னானி ஸந்தா⁴ய ‘‘ஓகாஸாதி⁴க³மோ’’தி வுத்தம். தேஸம்யேவ ச க³ஹணே காரணம் ஸயமேவ வக்க²தி.

ஸத்தானம் விஸுத்³தி⁴ம் பாபனத்தா²யாதி ராகா³தீ³ஹி மலேஹி அபி⁴ஜ்ஜா²விஸமலோபா⁴தீ³ஹி ச உபக்கிலேஸேஹி கிலிட்ட²சித்தானம் ஸத்தானம் விஸுத்³தி⁴பாபனத்தா²ய ஸமதிக்கமனத்தா²ய. ஆயதிம் அனுப்பஜ்ஜனஞ்ஹி இத⁴ ‘‘ஸமதிக்கமோ’’தி வுத்தம். அத்த²ம் க³மனத்தா²யாதி காயிகது³க்க²ஸ்ஸ ச சேதஸிகதோ³மனஸ்ஸஸ்ஸ சாதி இமேஸம் த்³வின்னம் அத்த²ங்க³மாய, நிரோதா⁴யாதி அத்தோ². ஞாயதி நிச்ச²யேன கமதி நிப்³பா³னம், தம் வா ஞாயதி படிவிஜ்ஜீ²யதி ஏதேனாதி ஞாயோ, ஸமுச்சே²த³பா⁴வோ அரியமக்³கோ³தி ஆஹ ‘‘ஸஹவிபஸ்ஸனகஸ்ஸ மக்³க³ஸ்ஸா’’தி. பச்சக்க²கரணத்தா²யாதி அத்தபச்சக்க²தாய. பரபச்சயேன வினா பச்சக்க²கரணஞ்ஹி ‘‘ஸச்சி²கிரியா’’தி வுச்சதி. அஸம்பி⁴ன்னந்தி பித்தஸேம்ஹாதீ³ஹி அபலிபு³த்³த⁴ம் அனுபஹதம்.

ராகா³னுக³தோ ஸமாதி⁴ அபி⁴னதோ நாம ஹோதி ஆரம்மணே அபி⁴முகா²பா⁴வேன பவத்தியா, தோ³ஸானுக³தோ பன அபனதோ அபக³மனவஸேன பவத்தியா, தது³ப⁴யப்படிக்கே²பேன ‘‘ந சாபி⁴னதோ ந சாபனதோ’’தி வுத்தந்தி ஆஹ ‘‘ராக³வஸேனா’’திஆதி³. ந ஸஸங்கா²ரனிக்³க³ய்ஹவாரிதக³தோதி லோகியஜ்ஜா²னசித்தானி விய ந ஸஸங்கா²ரேன ஸப்பயோகே³ன தத³ங்க³ப்பஹானவிக்க²ம்ப⁴னப்பஹானவஸேன ச நிக்³க³ஹேத்வா வாரேத்வா டி²தோ. கிஞ்சரஹி கிலேஸானம் சி²ன்னந்தே உப்பன்னோ. ததா²பூ⁴தம் ப²லஸமாதி⁴ம் ஸந்தா⁴யேதம் வுத்தம். தேனாஹ ‘‘ந ஸஸங்கா²ரேன…பே… சி²ன்னந்தே உப்பன்னோ’’தி.

ஆனந்த³ஸுத்தவண்ணனா நிட்டி²தா.