4. மஹாவக்³கோ³

1. அனுபுப்³ப³விஹாரஸுத்தவண்ணனா

32. சதுத்த²ஸ்ஸ பட²மே அனுபுப்³ப³தோ விஹரிதப்³பா³தி அனுபுப்³ப³விஹாரா. அனுபடிபாடியாதி அனுக்கமேன. ஸமாபஜ்ஜிதப்³ப³விஹாராதி ஸமாபஜ்ஜித்வா ஸமங்கி³னோ ஹுத்வா விஹரிதப்³ப³விஹாரா.

அனுபுப்³ப³விஹாரஸுத்தவண்ணனா நிட்டி²தா.

2-3. அனுபுப்³ப³விஹாரஸமாபத்திஸுத்தாதி³வண்ணனா

33-34. து³தியே சா²தம் வுச்சதி தண்ஹாதி³ட்டி²யோ காமானம் பாதப்³ப³தோ தாஸம் வஸேன வத்தனதோ, தன்னின்னத்தா நத்தி² ஏதேஸு சா²தந்தி நிச்சா²தா. தேனாஹ ‘‘தண்ஹாதி³ட்டி²ச்சா²தான’’ந்திஆதி³. ததியே நத்தி² வத்தப்³ப³ம்.

அனுபுப்³ப³விஹாரஸமாபத்திஸுத்தாதி³வண்ணனா நிட்டி²தா.

4. கா³வீஉபமாஸுத்தவண்ணனா

35. சதுத்தே² பப்³ப³தசாரினீதி பகதியா பப்³ப³தே ப³ஹுலசாரினீ. அகே²த்தஞ்ஞூதி (விஸுத்³தி⁴. மஹாடீ. 1.77) அகோ³சரஞ்ஞூ. ஸமாதி⁴பரிபந்தானம் விஸோத⁴னானபி⁴ஞ்ஞதாய பா³லோ. ஜா²னஸ்ஸ பகு³ணபா⁴வாபாத³னவேய்யத்தியஸ்ஸ அபா⁴வேன அப்³யத்தோ. உபரிஜா²னஸ்ஸ பத³ட்டா²னபா⁴வானவபோ³தே⁴ன அகே²த்தஞ்ஞூ. ஸப்³ப³தா²பி ஸமாபத்திகோஸல்லாபா⁴வேன அகுஸலோ. ஸமாதி⁴னிமித்தஸ்ஸ வா அனாஸேவனாய பா³லோ. அபா⁴வனாய அப்³யத்தோ. அப³ஹுலீகாரேன அகே²த்தஞ்ஞூ. ஸம்மதே³வ அனதி⁴ட்டா²னதோ அகுஸலோதி யோஜேதப்³ப³ம். உப⁴தோ ப⁴ட்டோ²தி உப⁴யதோ ஜா²னதோ ப⁴ட்டோ². ஸோ ஹி அப்பகு³ணதாய ந ஸுப்பதிட்டி²ததாய ஸஉஸ்ஸாஹோபி வினாஸதோ அஸாமத்தி²யதோ ச ஜா²னத்³வயதோ பரிஹீனோ.

கா³வீஉபமாஸுத்தவண்ணனா நிட்டி²தா.

5. ஜா²னஸுத்தவண்ணனா

36. பஞ்சமே அனிச்சதோதி இமினா நிச்சப்படிக்கே²பதோ தேஸம் அனிச்சதமாஹ. ததோ ஏவ உத³யவயவந்ததோ விபரிணாமதோ தாவகாலிகதோ ச தே அனிச்சாதி ஜோதிதம் ஹோதி. யஞ்ஹி நிச்சம் ந ஹோதி, தம் உத³யவயபரிச்சி²ன்னஜராய மரணேன சாதி த்³வேதா⁴ விபரிணதம் இத்தரக்க²ணமேவ ச ஹோதி. து³க்க²தோதி ந ஸுக²தோ. இமினா ஸுக²ப்படிக்கே²பதோ தேஸம் து³க்க²தமாஹ. ததோ ஏவ ச அபி⁴ண்ஹப்படிபீளனதோ து³க்க²வத்து²தோ ச தே து³க்கா²தி ஜோதிதம் ஹோதி. உத³யவயவந்ததாய ஹி தே அபி⁴ண்ஹப்படிபீளனதோ நிரந்தரது³க்க²தாய து³க்க²ஸ்ஸேவ ச அதி⁴ட்டா²னபூ⁴தோ. பச்சயயாபனீயதாய ரோக³மூலதாய ச ரோக³தோ. து³க்க²தாஸூலயோக³தோ கிலேஸாஸுசிபக்³க⁴ரதோ உப்பாத³ஜராப⁴ங்கே³ஹி உத்³து⁴மாதபக்கபி⁴ஜ்ஜனதோ ச க³ண்ட³தோ. பீளாஜனனதோ அந்தோதுத³னதோ து³ன்னீஹரணதோ ச ஸல்லதோ. அவட்³டி⁴ஆவஹனதோ அக⁴வத்து²தோ ச அக⁴தோ. அஸேரிபா⁴வஜனனதோ ஆபா³த⁴ப்பதிட்டா²னதாய ச ஆபா³த⁴தோ. அவஸவத்தனதோ அவிதே⁴ய்யதாய ச பரதோ. ப்³யாதி⁴ஜராமரணேஹி பலுஜ்ஜனீயதாய பலோகதோ. ஸாமினிவாஸீகாரகவேத³கஅதி⁴ட்டா²யகவிரஹதோ ஸுஞ்ஞதோ. அத்தப்படிக்கே²பட்டே²ன அனத்ததோ. ரூபாதி³த⁴ம்மாபி யதா² ந ஏத்த² அத்தா அத்தீ²தி அனத்தா, ஏவம் ஸயம்பி அத்தா ந ஹோந்தீதி அனத்தா. தேன அப்³யாபாரதோ நிரீஹதோ துச்ச²தோ அனத்தாதி தீ³பிதம் ஹோதி.

லக்க²ணத்தயமேவ ஸுகா²வபோ³த⁴னத்த²ம் ஏகாத³ஸஹி பதே³ஹி விப⁴ஜித்வா க³ஹிதந்தி த³ஸ்ஸேதும் ‘‘யஸ்மா அனிச்சதோ’’திஆதி³ வுத்தம். அந்தோஸமாபத்தியந்தி ஸமாபத்தீனம் ஸஹஜாததாய ஸமாபத்தீனம் அப்³ப⁴ந்தரே சித்தம் படிஸம்ஹரதீதி தப்படிப³த்³த⁴ச²ந்த³ராகா³தி³கிலேஸவிக்க²ம்ப⁴னேன விபஸ்ஸனாசித்தம் படிஸம்ஹரதி. தேனாஹ ‘‘மோசேதி அபனேதீ’’தி. ஸவனவஸேனாதி ‘‘ஸப்³ப³ஸங்கா²ரஸமதோ²’’திஆதி³னா ஸவனவஸேன. து²திவஸேனாதி ததே²வ தோ²மனாவஸேன கு³ணதோ ஸம்கித்தனவஸேன. பரியத்திவஸேனாதி தஸ்ஸ த⁴ம்மஸ்ஸ பரியாபுணனவஸேன. பஞ்ஞத்திவஸேனாதி தத³த்த²ஸ்ஸ பஞ்ஞாபனவஸேன. ஆரம்மணகரணவஸேனேவ உபஸம்ஹரதி மக்³க³சித்தம், ‘‘ஏதம் ஸந்த’’ந்திஆதி³ பன அவதா⁴ரணனிவத்திதத்த²த³ஸ்ஸனம். யதா² விபஸ்ஸனா ‘‘ஏதம் ஸந்தம் ஏதம் பணீத’’ந்திஆதி³னா அஸங்க²தாய தா⁴துயா சித்தம் உபஸம்ஹரதி, ஏவம் மக்³கோ³ நிப்³பா³னம் ஸச்சி²கிரியாபி⁴ஸமயவஸேன அபி⁴ஸமேந்தோ தத்த² லப்³ப⁴மானே ஸப்³பே³பி விஸேஸே அஸம்மோஹதோ படிவிஜ்ஜ²ந்தோ தத்த² சித்தம் உபஸம்ஹரதி. தேனாஹ ‘‘இமினா பன ஆகாரேனா’’திஆதி³.

ஸோ தத்த² டி²தோதி ஸோ அத³ந்த⁴விபஸ்ஸகோ யோகீ³ தத்த² தாய அனிச்சாதி³லக்க²ணத்தயாரம்மணாய விபஸ்ஸனாய டி²தோ. ஸப்³ப³ஸோதி ஸப்³ப³த்த² தஸ்ஸ தஸ்ஸ மக்³க³ஸ்ஸ அதி⁴க³மாய நிப்³ப³த்திதஸமத²விபஸ்ஸனாஸு. அஸக்கோந்தோ அனாகா³மீ ஹோதீதி ஹேட்டி²மமக்³கா³வஹாஸு ஏவ ஸமத²விபஸ்ஸனாய ச²ந்த³ராக³ம் பஹாய அக்³க³மக்³கா³வஹாஸு நிகந்திம் பரியாதா³தும் அஸக்கோந்தோ அனாகா³மிதாயமேவ ஸண்டா²தி.

ஸமதிக்கந்தத்தாதி ஸமத²வஸேன விபஸ்ஸனாவஸேன சாதி ஸப்³ப³தா²பி ரூபஸ்ஸ ஸமதிக்கந்தத்தா. தேனாஹ ‘‘அயம் ஹீ’’திஆதி³. அனேனாதி யோகி³னா. தம் அதிக்கம்மாதி இத³ம் யோ பட²மம் பஞ்சவோகாரஏகவோகாரபரியாபன்னே த⁴ம்மே ஸம்மதே³வ ஸம்மஸித்வா தே விஸ்ஸஜ்ஜேத்வா ததோ அரூபஸமாபத்திம் ஸமாபஜ்ஜித்வா அரூபத⁴ம்மே ஸம்மஸதி, தம் ஸந்தா⁴ய வுத்தம். தேனாஹ ‘‘இதா³னி அரூபம் ஸம்மஸதீ’’தி.

ஜா²னஸுத்தவண்ணனா நிட்டி²தா.

6. ஆனந்த³ஸுத்தவண்ணனா

37. ச²ட்டே² ஓகாஸம் அவஸரம் அதி⁴க³ச்ச²தி ஏதேனாதி ஓகாஸாதி⁴க³மோ, மக்³க³ப²லஸுகா²தி⁴க³மாய ஓகாஸபா⁴வதோ வா ஓகாஸோ, தஸ்ஸ அதி⁴க³மோ ஓகாஸாதி⁴க³மோ. ஏத்த² ச தீ³க⁴னிகாயேனேவ (தீ³. நி. 2.288) பன ஸுத்தந்ததே³ஸனாயம் பட²மஜ்ஜா²னம், சதுத்த²ஜ்ஜா²னம், அரஹத்தமக்³கோ³தி தயோ ஓகாஸாதி⁴க³மா ஆக³தா. தத்த² (தீ³. நி. அட்ட². 2.288) பட²மம் ஜா²னம் பஞ்ச நீவரணானி விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி ‘‘பட²மோ ஓகாஸாதி⁴க³மோ’’தி வுத்தம். சதுத்த²ஜ்ஜா²னம் பன ஸுக²து³க்க²ம் விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி து³தியோ ஓகாஸாதி⁴க³மோ. அரஹத்தமக்³கோ³ ஸப்³ப³கிலேஸே விக்க²ம்பே⁴த்வா அத்தனோ ஓகாஸம் க³ஹேத்வா திட்ட²தீதி ‘‘ததியோ ஓகாஸாதி⁴க³மோ’’தி வுத்தோ. இத⁴ பன வக்க²மானானி தீணி அரூபஜ்ஜா²னானி ஸந்தா⁴ய ‘‘ஓகாஸாதி⁴க³மோ’’தி வுத்தம். தேஸம்யேவ ச க³ஹணே காரணம் ஸயமேவ வக்க²தி.

ஸத்தானம் விஸுத்³தி⁴ம் பாபனத்தா²யாதி ராகா³தீ³ஹி மலேஹி அபி⁴ஜ்ஜா²விஸமலோபா⁴தீ³ஹி ச உபக்கிலேஸேஹி கிலிட்ட²சித்தானம் ஸத்தானம் விஸுத்³தி⁴பாபனத்தா²ய ஸமதிக்கமனத்தா²ய. ஆயதிம் அனுப்பஜ்ஜனஞ்ஹி இத⁴ ‘‘ஸமதிக்கமோ’’தி வுத்தம். அத்த²ம் க³மனத்தா²யாதி காயிகது³க்க²ஸ்ஸ ச சேதஸிகதோ³மனஸ்ஸஸ்ஸ சாதி இமேஸம் த்³வின்னம் அத்த²ங்க³மாய, நிரோதா⁴யாதி அத்தோ². ஞாயதி நிச்ச²யேன கமதி நிப்³பா³னம், தம் வா ஞாயதி படிவிஜ்ஜீ²யதி ஏதேனாதி ஞாயோ, ஸமுச்சே²த³பா⁴வோ அரியமக்³கோ³தி ஆஹ ‘‘ஸஹவிபஸ்ஸனகஸ்ஸ மக்³க³ஸ்ஸா’’தி. பச்சக்க²கரணத்தா²யாதி அத்தபச்சக்க²தாய. பரபச்சயேன வினா பச்சக்க²கரணஞ்ஹி ‘‘ஸச்சி²கிரியா’’தி வுச்சதி. அஸம்பி⁴ன்னந்தி பித்தஸேம்ஹாதீ³ஹி அபலிபு³த்³த⁴ம் அனுபஹதம்.

ராகா³னுக³தோ ஸமாதி⁴ அபி⁴னதோ நாம ஹோதி ஆரம்மணே அபி⁴முகா²பா⁴வேன பவத்தியா, தோ³ஸானுக³தோ பன அபனதோ அபக³மனவஸேன பவத்தியா, தது³ப⁴யப்படிக்கே²பேன ‘‘ந சாபி⁴னதோ ந சாபனதோ’’தி வுத்தந்தி ஆஹ ‘‘ராக³வஸேனா’’திஆதி³. ந ஸஸங்கா²ரனிக்³க³ய்ஹவாரிதக³தோதி லோகியஜ்ஜா²னசித்தானி விய ந ஸஸங்கா²ரேன ஸப்பயோகே³ன தத³ங்க³ப்பஹானவிக்க²ம்ப⁴னப்பஹானவஸேன ச நிக்³க³ஹேத்வா வாரேத்வா டி²தோ. கிஞ்சரஹி கிலேஸானம் சி²ன்னந்தே உப்பன்னோ. ததா²பூ⁴தம் ப²லஸமாதி⁴ம் ஸந்தா⁴யேதம் வுத்தம். தேனாஹ ‘‘ந ஸஸங்கா²ரேன…பே… சி²ன்னந்தே உப்பன்னோ’’தி.

ஆனந்த³ஸுத்தவண்ணனா நிட்டி²தா.

7. லோகாயதிகஸுத்தவண்ணனா

38. ஸத்தமே லோகாயதவாத³காதி ஆயதிம் ஹிதம் லோகோ ந யததி ந விருஹதி ஏதேனாதி லோகாயதம், விதண்ட³ஸத்த²ம். தஞ்ஹி க³ந்த²ம் நிஸ்ஸாய ஸத்தா புஞ்ஞகிரியாய சித்தம்பி ந உப்பாதே³ந்தி, தம் வத³ந்தீதி லோகாயதவாத³கா.

த³ள்ஹம் தி²ரம் த⁴னு ஏதஸ்ஸாதி த³ள்ஹத⁴ன்வா (அ. நி. டீ. 2.4.45-46; ஸம். நி. டீ. 1.1.107), ஸோ ஏவ ‘‘த³ள்ஹத⁴ம்மா’’தி வுத்தோ. படிஸத்துவித⁴மனத்த²ம் த⁴னும் க³ண்ஹாதீதி த⁴னுக்³க³ஹோ. ஸோ ஏவ உஸும் ஸரம் அஸதி கி²பதீதி இஸ்ஸாஸோ. த்³விஸஹஸ்ஸதா²மந்தி லோஹாதி³பா⁴ரம் வஹிதும் ஸமத்த²ம் த்³விஸஹஸ்ஸதா²மம். தேனாஹ ‘‘த்³விஸஹஸ்ஸதா²மம் நாமா’’திஆதி³. த³ண்டே³தி த⁴னுத³ண்டே³. யாவ கண்ட³ப்பமாணாதி தீ³க⁴தோ யத்தகம் கண்ட³ஸ்ஸ பமாணம், தத்தகே த⁴னுத³ண்டே³ உக்கி²த்தமத்தே ஆரோபிதேஸுயேவ ஜியாத³ண்டே³ஸு ஸோ சே பா⁴ரோ பத²விதோ முச்சதி, ஏவம் இத³ம் த்³விஸஹஸ்ஸதா²மம் நாம த⁴னூதி த³ட்ட²ப்³ப³ம். உக்³க³ஹிதஸிப்போதி உக்³க³ஹிதத⁴னுஸிப்போ. கதஹத்தோ²தி தி²ரதரம் லக்கே²ஸு அவிரஜ்ஜ²னஸரக்கே²போ. ஈதி³ஸோ பன தத்த² வஸிபூ⁴தோ கதஹத்தோ² நாம ஹோதீதி ஆஹ ‘‘சிண்ணவஸிபா⁴வோ’’தி. கதம் ராஜகுலாதீ³ஸு உபேச்ச அஸனம் ஏதேன ஸோ கதூபாஸனோதி ஆஹ ‘‘ராஜகுலாதீ³ஸு த³ஸ்ஸிதஸிப்போ’’தி. ஏவம் கதந்தி ஏவம் அந்தோஸுஸிரகரணாதி³னா ஸல்லஹுகம் கதம்.

லோகாயதிகஸுத்தவண்ணனா நிட்டி²தா.

8-9. தே³வாஸுரஸங்கா³மஸுத்தாதி³வண்ணனா

39-40. அட்ட²மே அபி⁴யிம்ஸூதி கதா³ அபி⁴யிம்ஸு? யதா³ ப³லவந்தோ அஹேஸும், ததா³. தத்ராயமனுபுப்³பி³கதா² (ஸம். நி. அட்ட². 1.1.247; ஸாரத்த². டீ. 1.வேரஞ்ஜகண்ட³வண்ணனா) – ஸக்கோ கிர மக³த⁴ரட்டே² மசலகா³மகே மகோ⁴ நாம மாணவோ ஹுத்வா தேத்திம்ஸ புரிஸே க³ஹேத்வா கல்யாணகம்மம் கரோந்தோ ஸத்த வதபதா³னி பூரேத்வா தத்த² காலங்கதோ தே³வலோகே நிப்³ப³த்தி. தம் ப³லவகம்மானுபா⁴வேன ஸபரிஸம் ஸேஸதே³வதா த³ஸஹி டா²னேஹி அதி⁴க³ண்ஹந்தம் தி³ஸ்வா ‘‘ஆக³ந்துகதே³வபுத்தா ஆக³தா’’தி நேவாஸிகா க³ந்த⁴பானம் ஸஜ்ஜயிம்ஸு. ஸக்கோ ஸகபரிஸாய ஸஞ்ஞம் அதா³ஸி ‘‘மாரிஸா மா க³ந்த⁴பானம் பிவித்த², பிவனாகாரமத்தமேவ த³ஸ்ஸேதா²’’தி. தே ததா² அகம்ஸு. நேவாஸிகதே³வதா ஸுவண்ணஸரகேஹி உபனீதம் க³ந்த⁴பானம் யாவத³த்த²ம் பிவித்வா மத்தா தத்த² தத்த² ஸுவண்ணபத²வியம் பதித்வா ஸயிம்ஸு. ஸக்கோ ‘‘க³ண்ஹத² புத்தஹதாய புத்தே’’தி தே பாதே³ஸு க³ஹேத்வா ஸினேருபாதே³ கி²பாபேஸி. ஸக்கஸ்ஸ புஞ்ஞதேஜேன தத³னுவத்தகாபி ஸப்³பே³ தத்தே²வ பதிம்ஸு. தே ஸினேருவேமஜ்ஜ²காலே ஸஞ்ஞம் லபி⁴த்வா, ‘‘தாதா, ஸுரம் ந பிவிம்ஹ, ஸுரம் ந பிவிம்ஹா’’தி ஆஹம்ஸு. ததோ பட்டா²ய அஸுரா நாம ஜாதா. அத² நேஸம் கம்மபச்சயஉதுஸமுட்டா²னம் ஸினேருஸ்ஸ ஹேட்டி²மதலே த³ஸயோஜனஸஹஸ்ஸம் அஸுரப⁴வனம் நிப்³ப³த்தி. ஸக்கோ தேஸம் நிவத்தித்வா அனாக³மனத்தா²ய ஆரக்க²ம் ட²பேஸி. யம் ஸந்தா⁴ய வுத்தம் –

‘‘அந்தரா த்³வின்னம் அயுஜ்ஜ²புரானம்,

பஞ்சவிதா⁴ ட²பிதா அபி⁴ரக்கா²;

உரக³-கரோடி-பயஸ்ஸ ச ஹாரீ,

மத³னயுதா சதுரோ ச மஹத்தா²’’தி. (ஸம். நி. அட்ட². 1.1.247; ஸாரத்த². டீ. 1.1 வேரஞ்ஜகண்ட³வண்ணனா);

த்³வே நக³ரானி ஹி யுத்³தே⁴ன க³ஹேதும் அஸக்குணேய்யதாய அயுஜ்ஜ²புரானி நாம ஜாதானி தே³வனக³ரஞ்ச அஸுரனக³ரஞ்ச. யதா³ ஹி அஸுரா ப³லவந்தோ ஹோந்தி, அத² தே³வேஹி பலாயித்வா தே³வனக³ரம் பவிஸித்வா த்³வாரே பித³ஹிதே அஸுரானம் ஸதஸஹஸ்ஸம்பி கிஞ்சி காதும் ந ஸக்கோதி. யதா³ தே³வா ப³லவந்தோ ஹோந்தி, அதா²ஸுரேஹி பலாயித்வா அஸுரனக³ரஸ்ஸ த்³வாரே பித³ஹிதே ஸக்கானம் ஸதஸஹஸ்ஸம்பி கிஞ்சி காதும் ந ஸக்கோதி. இதி இமானி த்³வே நக³ரானி அயுஜ்ஜ²புரானி நாம. தேஸம் அந்தரா ஏதேஸு உரகா³தீ³ஸு பஞ்சஸு டா²னேஸு ஸக்கேன ஆரக்கா² ட²பிதா. தத்த² உரக³ஸத்³தே³ன நாகா³ க³ஹிதா. தே ஹி உத³கே ப³லவந்தோ ஹோந்தி, தஸ்மா ஸினேருஸ்ஸ பட²மாலிந்தே³ ஏதேஸம் ஆரக்கா². கரோடிஸத்³தே³ன ஸுபண்ணா க³ஹிதா. தேஸம் கிர கரோடி நாம பானபோ⁴ஜனம், தேன தம் நாமம் லபி⁴ம்ஸு, து³தியாலிந்தே³ தேஸம் ஆரக்கா². பயஸ்ஸஹாரிஸத்³தே³ன கும்ப⁴ண்டா³ க³ஹிதா, தா³னவரக்க²ஸா கிர தே, ததியாலிந்தே³ தேஸம் ஆரக்கா². மத³னயுதஸத்³தே³ன யக்கா² க³ஹிதா. விஸமசாரினோ கிர தே யுஜ்ஜ²ஸோண்டா³, சதுத்தா²லிந்தே³ தேஸம் ஆரக்கா². சதுரோ ச மஹத்தாதி சத்தாரோ மஹாராஜானோ வுத்தா, பஞ்சமாலிந்தே³ தேஸம் ஆரக்கா², தஸ்மா யதி³ அஸுரா குபிதாவிலசித்தா தே³வபுரம் உபயந்தி யுஜ்ஜி²தும். யம் கி³ரினோ பட²மம் பரிப⁴ண்ட³ம், தம் உரகா³ படிபா³ஹயந்தி. ஏவம் ஸேஸேஸு ஸேஸா.

தே பன அஸுரா ஆயுவண்ணயஸஇஸ்ஸரியஸம்பத்தீஹி தாவதிம்ஸஸதி³ஸாவ, தஸ்மா அந்தரா அத்தானம் அஜானித்வா பாடலியா புப்பி²தாய ‘‘ந இத³ம் தே³வனக³ரம், தத்த² பாரிச்ச²த்தகோ புப்ப²தி, இத⁴ பன சித்தபாடலீ, ஜரஸக்கேனாம்ஹாகம் ஸுரம் பாயேத்வா வஞ்சிதா, தே³வனக³ரஞ்ச நோ க³ஹிதம், க³ச்சா²ம, தேன ஸத்³தி⁴ம் யுஜ்ஜி²ஸ்ஸாமா’’தி ஹத்தி²அஸ்ஸரதே² ஆருய்ஹ ஸுவண்ணரஜதமணிப²லகானி க³ஹேத்வா யுத்³த⁴ஸஜ்ஜா ஹுத்வா அஸுரபே⁴ரியோ வாதே³ந்தா மஹாஸமுத்³தே³ உத³கம் த்³விதா⁴ பே⁴த்வா உட்ட²ஹந்தி. தே தே³வே வுட்டே² வம்மிகமக்கி²கா வம்மிகம் விய ஸினேரும் ஆருஹிதும் ஆரப⁴ந்தி. அத² நேஸம் பட²மம் நாகே³ஹி ஸத்³தி⁴ம் யுத்³த⁴ம் ஹோதி. தஸ்மிம் கோ² பன யுத்³தே⁴ ந கஸ்ஸசி ச²வி வா சம்மம் வா சி²ஜ்ஜதி, ந லோஹிதம் உப்பஜ்ஜதி, கேவலம் குமாரகானம் தா³ருமேண்ட³கயுத்³த⁴ம் விய அஞ்ஞமஞ்ஞஸந்தாஸனமத்தமேவ ஹோதி. கோடிஸதாபி கோடிஸஹஸ்ஸாபி நாகா³ தேஹி ஸத்³தி⁴ம் யுஜ்ஜி²த்வா தே அஸுரபுரம்யேவ பவேஸேத்வா நிவத்தந்தி. யதா³ பன அஸுரா ப³லவந்தோ ஹோந்தி, அத² நாகா³ ஓஸக்கித்வா து³தியே ஆலிந்தே³ ஸுபண்ணேஹி ஸத்³தி⁴ம் ஏகதோவ ஹுத்வா யுஜ்ஜ²ந்தி. ஏஸ நயோ ஸுபண்ணாதீ³ஸுபி. யதா³ பன தானி பஞ்சபி டா²னானி அஸுரா மத்³த³ந்தி, ததா³ ஏகதோ ஸம்பிண்டி³தானிபி தானி பஞ்ச ப³லானி ஓஸக்கந்தி. அத² சத்தாரோ மஹாராஜானோ க³ந்த்வா ஸக்கஸ்ஸ தம் பவத்திம் ஆரோசேந்தி. ஸக்கோ தேஸம் வசனம் ஸுத்வா தி³யட்³ட⁴யோஜனஸதிகம் வேஜயந்தரத²ம் ஆருய்ஹ ஸயம் வா நிக்க²மதி, ஏகம் புத்தம் வா பேஸேதி. யதா³ தே³வா புன அபச்சாக³மனாய அஸுரே ஜினிம்ஸு, ததா³ ஸக்கோ அஸுரே பலாபேத்வா பஞ்சஸு டா²னேஸு ஆரக்க²ம் த³த்வா வேதி³யபாதே³ வஜிரஹத்தா² இந்த³படிமாயோ ட²பேஸி. அஸுரா காலேன காலம் உட்ட²ஹித்வா படிமாயோ தி³ஸ்வா ‘‘ஸக்கோ அப்பமத்தோ திட்ட²தீ’’தி ததோவ நிவத்தந்தி. இத⁴ பன யதா³ அஸுரானம் ஜயோ அஹோஸி, தே³வானம் பராஜயோ, தம் ஸந்தா⁴யேதம் வுத்தம் – ‘‘பராஜிதா ச, பி⁴க்க²வே, தே³வா அபயிம்ஸுயேவ உத்தரேனாபி⁴முகா², அபி⁴யிம்ஸு அஸுரா’’தி.

த³க்கி²ணாபி⁴முகா² ஹுத்வாதி சக்கவாளபப்³ப³தாபி⁴முகா² ஹுத்வா. அஸுரா கிர தே³வேஹி பராஜிதா பலாயந்தா சக்கவாளபப்³ப³தாபி⁴முக²ம் க³ந்த்வா சக்கவாளமஹாஸமுத்³த³பிட்டி²யம் ரஜதபட்டவண்ணே வாலிகாபுலினே யத்த² பண்ணகுடியோ மாபேத்வா இஸயோ வஸந்தி, தத்த² க³ந்த்வா இஸீனம் அஸ்ஸமபதே³ன க³ச்ச²ந்தா ‘‘ஸக்கோ இமேஹி ஸத்³தி⁴ம் மந்தேத்வா அம்ஹே நாஸேதி, க³ண்ஹத² புத்தஹதாய புத்தே’’தி குபிதா அஸ்ஸமபதே³ பானீயக⁴டசங்கமனபண்ணஸாலாதீ³னி வித்³த⁴ம்ஸேந்தி. இஸயோ அரஞ்ஞதோ ப²லாப²லம் ஆதா³ய ஆக³தா தி³ஸ்வா புன து³க்கே²ன படிபாகதிகம் கரோந்தி, தேபி புனப்புனம் ததே²வ பராஜிதா க³ந்த்வா வினாஸேந்தி. தேன வுத்தம் – ‘‘பராஜிதா ச கோ², பி⁴க்க²வே, அஸுரா அபயிம்ஸுயேவ த³க்கி²ணேனாபி⁴முகா²’’தி. நவமம் உத்தானத்த²மேவ.

தே³வாஸுரஸங்கா³மஸுத்தாதி³வண்ணனா நிட்டி²தா.

10. தபுஸ்ஸஸுத்தவண்ணனா

41. த³ஸமே பக்க²ந்த³தீதி பவிஸதி. பஸீத³தீதி பஸாத³ம் அபி⁴ருசிம் ஆபஜ்ஜதி, பதிட்டா²தி விமுச்சதீதி அத்தோ². கதா²பாப⁴தந்தி கதா²ய மூலம். மூலஞ்ஹி ‘‘பாப⁴த’’ந்தி வுச்சதி. யதா²ஹ –

‘‘அப்பகேனபி மேதா⁴வீ, பாப⁴தேன விசக்க²ணோ;

ஸமுட்டா²பேதி அத்தானம், அணும் அக்³கி³ம்வ ஸந்த⁴ம’’ந்தி. (ஜா. 1.1.4);

தேனேவாஹ ‘‘கதா²பாப⁴தந்தி கதா²மூல’’ந்தி. விதக்கக்³க³ஹணேனேவ தம்ஸஹசரிதோ விசாரோபி க³ஹிதோ. தேனேவேத்த² ப³ஹுவசனனித்³தே³ஸோ கதோதி ஆஹ ‘‘விதக்கேஸூதி விதக்கவிசாரேஸூ’’தி.

தபுஸ்ஸஸுத்தவண்ணனா நிட்டி²தா.

மஹாவக்³க³வண்ணனா நிட்டி²தா.