7. பட²மவேரஸுத்தவண்ணனா

27. ஸத்தமே (ஸம். நி. டீ. 2.241) யதோதி யஸ்மிம் காலே. அயஞ்ஹி தோ-ஸத்³தோ³ தா³-ஸத்³தோ³ விய இத⁴ காலவிஸயோ, யதா³தி வுத்தம் ஹோதி. ப⁴யானி வேரானீதி பீ⁴யதே ப⁴யம், ப⁴யேன யோகா³, பா⁴யிதப்³பே³ன வா ப⁴யம் ஏவ வேரப்பஸவட்டே²ன வேரந்தி ச லத்³த⁴னாமா சேதனாத³யோ. பாணாதிபாதாத³யோ ஹி யஸ்ஸ பவத்தந்தி, யஞ்ச உத்³தி³ஸ்ஸ பவத்தீயந்தி, உப⁴யேஸஞ்ச வேராவஹா, ததோ ஏவ சேதே பா⁴யிதப்³பா³ வேரஸஞ்ஜனகா நாமாதி. ஸோதஸ்ஸ அரியமக்³க³ஸ்ஸ ஆதி³தோ பஜ்ஜனம் படிபத்தி அதி⁴க³மோ ஸோதாபத்தி. தத³த்தா²ய தத்த² பதிட்டி²தஸ்ஸ ச அங்கா³னி ஸோதாபத்தியங்கா³னி. து³வித⁴ஞ்ஹி (ஸம். நி. அட்ட². 2.2.41) ஸோதாபத்தியங்க³ம் ஸோதாபத்திஅத்தா²ய ச அங்க³ம் காரணம், யம் ஸோதாபத்திமக்³க³ப்படிலாப⁴தோ புப்³ப³பா⁴கே³ ஸோதாபத்திப்படிலாபா⁴ய ஸம்வத்ததி, ‘‘ஸப்புரிஸஸம்ஸேவோ ஸத்³த⁴ம்மஸ்ஸவனம் யோனிஸோமனஸிகாரோ த⁴ம்மானுத⁴ம்மபடிபத்தீ’’தி (தீ³. நி. 3.311) ஏவம் ஆக³தம். படிலத்³த⁴கு³ணஸ்ஸ ச ஸோதாபத்திம் பத்வா டி²தஸ்ஸ அங்க³ம், யம் ‘‘ஸோதாபன்னஸ்ஸ அங்க³’’ந்திபி வுச்சதி ‘‘ஸோதாபன்னோ அங்கீ³யதி ஞாயதி ஏதேனா’’தி கத்வா, பு³த்³தே⁴ அவேச்சப்பஸாதா³தீ³னம் ஏதம் அதி⁴வசனம். இத³மிதா⁴தி⁴ப்பேதம்.

கீ²ணனிரயோதிஆதீ³ஸு ஆயதிம் தத்த² அனுப்பஜ்ஜனதாய கீ²ணோ நிரயோ மய்ஹதி, ஸோ அஹம் கீ²ணனிரயோ. ஏஸ நயோ ஸப்³ப³த்த². ஸோதாபன்னோதி மக்³க³ஸோதம் ஆபன்னோ. அவினிபாதத⁴ம்மோதி ந வினிபாதஸபா⁴வோ. நியதோதி பட²மமக்³க³ஸங்கா²தேன ஸம்மத்தனியாமேன நியதோ. ஸம்போ³தி⁴பராயணோதி உபரிமக்³க³த்தயஸங்கா²தோ ஸம்போ³தி⁴ பரம் அயனம் மய்ஹந்தி ஸோஹம் ஸம்போ³தி⁴பராயணோ, ஸம்போ³தி⁴ம் அவஸ்ஸம் அபி⁴ஸம்பு³ஜ்ஜ²னகோதி அத்தோ².

பாணாதிபாதபச்சயாதி பாணாதிபாதகம்மஸ்ஸ கரணஹேது. ப⁴யம் வேரந்தி அத்த²தோ ஏகம். வேரம் வுச்சதி விரோதோ⁴, ததே³வ பா⁴யிதப்³ப³தோ ‘‘ப⁴ய’’ந்தி வுச்சதி. தஞ்ச பனேதம் து³வித⁴ம் ஹோதி – பா³ஹிரம், அஜ்ஜ²த்திகந்தி. ஏகேன ஹி ஏகஸ்ஸ பிதா மாரிதோ ஹோதி. ஸோ சிந்தேதி ‘‘ஏதேன கிர மே பிதா மாரிதோ, அஹம்பி தம்யேவ மாரேஸ்ஸாமீ’’தி நிஸிதம் ஸத்த²ம் ஆதா³ய சரதி. யா தஸ்ஸ அப்³ப⁴ந்தரே உப்பன்னா வேரசேதனா, இத³ம் பா³ஹிரம் வேரம் நாம தஸ்ஸ வேரஸ்ஸ மூலபூ⁴ததோ வேரகாரகபுக்³க³லதோ ப³ஹிபா⁴வத்தா. யா பன இதரஸ்ஸ ‘‘அயம் கிர மம் மாரேஸ்ஸாமீதி சரதி, அஹமேவ நம் பட²மதரம் மாரேஸ்ஸாமீ’’தி சேதனா உப்பஜ்ஜதி, இத³ம் அஜ்ஜ²த்திகம் வேரம் நாம. இத³ம் தாவ உப⁴யம்பி தி³ட்ட²த⁴ம்மிகமேவ. யா பன தம் நிரயே உப்பன்னம் தி³ஸ்வா ‘‘ஏதம் பஹரிஸ்ஸாமீ’’தி ஜலிதம் அயமுக்³க³ரம் க³ண்ஹந்தஸ்ஸ நிரயபாலஸ்ஸ சேதனா உப்பஜ்ஜதி, இத³மஸ்ஸ ஸம்பராயிகம் பா³ஹிரம் வேரம். யா சஸ்ஸ ‘‘அயம் நித்³தோ³ஸம் மம் பஹரிஸ்ஸாமீதி ஆக³ச்ச²தி, அஹமேவ நம் பட²மதரம் பஹரிஸ்ஸாமீ’’தி சேதனா உப்பஜ்ஜதி, இத³மஸ்ஸ ஸம்பராயிகம் அஜ்ஜ²த்தம் வேரம். யம் பனேதம் பா³ஹிரம் வேரம், தம் அட்ட²கதா²ஸு ‘‘புக்³க³லவேர’’ந்தி வுச்சதி. து³க்க²ம் தோ³மனஸ்ஸந்தி அத்த²தோ ஏகமேவ. யதா² சேத்த², ஏவம் ஸேஸேஸுபி ‘‘இமினா மம ப⁴ண்ட³ம் ஹடம், மய்ஹம் தா³ரேஸு சாரித்தம் ஆபன்னம், முஸா வத்வா அத்தோ² ப⁴க்³கோ³, ஸுராமத³மத்தேன இத³ம் நாம கத’’ந்திஆதி³னா நயேன வேரப்பவத்தி வேதி³தப்³பா³.

அவேச்சப்பஸாதே³னாதி அதி⁴க³தேன அசலப்பஸாதே³ன. அரியகந்தேஹீதி பஞ்சஹி ஸீலேஹி. தானி ஹி அரியானம் கந்தானி பியானி ப⁴வந்தி, ப⁴வந்தரக³தாபி அரியா தானி ந விஜஹந்தி, தஸ்மா ‘‘அரியகந்தானீ’’தி வுச்சந்தி. ஸேஸமேத்த² யம் வத்தப்³ப³ம் ஸியா, தம் ஸப்³ப³ம் விஸுத்³தி⁴மக்³கே³ அனுஸ்ஸதினித்³தே³ஸே வுத்தந்தி வேதி³தப்³ப³ம்.

பட²மவேரஸுத்தவண்ணனா நிட்டி²தா.