4. த⁴ம்மஞ்ஞூஸுத்தவண்ணனா

68. சதுத்தே² ஸுத்தகே³ய்யாதி³த⁴ம்மம் ஜானாதீதி த⁴ம்மஞ்ஞூ. தஸ்ஸ தஸ்ஸேவ ஸுத்தகே³ய்யாதி³னா பா⁴ஸிதஸ்ஸ தத³ஞ்ஞஸ்ஸ ஸுத்தபத³த்த²ஸ்ஸ போ³த⁴கஸ்ஸ ஸத்³த³ஸ்ஸ அத்த²குஸலதாவஸேன அத்த²ம் ஜானாதீதி அத்த²ஞ்ஞூ. ‘‘ஏத்தகோம்ஹி ஸீலேன ஸமாதி⁴னா பஞ்ஞாயா’’தி ஏவம் யதா² அத்தனோ பமாணஜானனவஸேன அத்தானம் ஜானாதீதி அத்தஞ்ஞூ. படிக்³க³ஹணபரிபோ⁴க³பரியேஸனவிஸ்ஸஜ்ஜனேஸு மத்தம் ஜானாதீதி மத்தஞ்ஞூ. நித்³தே³ஸே பன படிக்³க³ஹணமத்தஞ்ஞுதாய ஏவ பரிபோ⁴கா³தி³மத்தஞ்ஞுதா பபோ³தி⁴தா ஹோதீதி படிக்³க³ஹணமத்தஞ்ஞுதாவ த³ஸ்ஸிதா. ‘‘அயம் காலோ உத்³தே³ஸஸ்ஸ, அயம் காலோ பரிபுச்சா²ய, அயம் காலோ யோக³ஸ்ஸ அதி⁴க³மாயா’’தி ஏவம் காலம் ஜானாதீதி காலஞ்ஞூ. தத்த² பஞ்ச வஸ்ஸானி உத்³தே³ஸஸ்ஸ காலோ, த³ஸ பரிபுச்சா²ய, இத³ம் அதிஸம்பா³த⁴ம், அதிக்க²பஞ்ஞஸ்ஸ தாவதா காலேன தீரேதும் அஸக்குணேய்யத்தா த³ஸ வஸ்ஸானி உத்³தே³ஸஸ்ஸ காலோ, வீஸதி பரிபுச்சா²ய, ததோ பரம் யோகே³ கம்மம் காதப்³ப³ம். க²த்தியபரிஸாதி³கம் அட்ட²வித⁴ம் பரிஸம் ஜானாதீதி பரிஸஞ்ஞூ. பி⁴க்கு²பரிஸாதி³கம் சதுப்³பி³த⁴ம், க²த்தியபரிஸாதி³கம் மனுஸ்ஸபரிஸம்யேவ புன சதுப்³பி³த⁴ம் க³ஹேத்வா அட்ட²வித⁴ம் வத³ந்தி அபரே. நித்³தே³ஸே பனஸ்ஸ க²த்தியபரிஸாதி³சதுப்³பி³த⁴பரிஸக்³க³ஹணம் நித³ஸ்ஸனமத்தம் த³ட்ட²ப்³ப³ம். ‘‘இமம் மே ஸேவந்தஸ்ஸ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி, தஸ்மா அயம் புக்³க³லோ ஸேவிதப்³போ³, விபரியாயதோ அஞ்ஞோ அஸேவிதப்³போ³’’தி ஸேவிதப்³பா³ஸேவிதப்³ப³புக்³க³லம் ஜானாதீதி புக்³க³லபரோபரஞ்ஞூ. ஏவஞ்ஹி தேஸம் புக்³க³லானம் பரோபரம் உக்கட்ட²னிஹீனதம் ஜானாதி நாம. நித்³தே³ஸேபிஸ்ஸ ஸேவிதப்³பா³ஸேவிதப்³ப³புக்³க³லே விபா⁴வனமேவ ஸமணகதா²கதந்தி த³ட்ட²ப்³ப³ம்.

த⁴ம்மஞ்ஞூஸுத்தவண்ணனா நிட்டி²தா.