5-6. பாரிச்ச²த்தகஸுத்தாதி³வண்ணனா

69-70. பஞ்சமே பதிதபலாஸோதி பதிதபத்தோ. ஏத்த² பட²மம் பண்டு³பலாஸதம், து³தியம் பன்னபலாஸதஞ்ச வத்வா ததியம் ஜாலகஜாததா, சதுத்த²ம் கா²ரகஜாததா ச பாளியம் வுத்தா. தீ³க⁴னிகாயட்ட²கதா²யம் பன மஹாகோ³விந்த³ஸுத்தவண்ணனாயம் (தீ³. நி. அட்ட². 2.294) இமமேவ பாளிம் ஆஹரித்வா த³ஸ்ஸேந்தேன பட²மம் பண்டு³பலாஸதம், து³தியம் பன்னபலாஸதஞ்ச வத்வா ததியம் கா²ரகஜாததா, சதுத்த²ம் ஜாலகஜாததா ச த³ஸ்ஸிதா. ஏவஞ்ஹி தத்த² வுத்தம் – ‘‘பாரிச்ச²த்தகே புப்ப²மானே ஏகம் வஸ்ஸம் உபட்டா²னம் க³ச்ச²ந்தி, தே தஸ்ஸ பண்டு³பலாஸபா⁴வதோ பட்டா²ய அத்தமனா ஹோந்தி. யதா²ஹ –

யஸ்மிம், பி⁴க்க²வே, ஸமயே தே³வானம் தாவதிம்ஸானம் பாரிச்ச²த்தகோ கோவிளாரோ, பண்டு³பலாஸோ ஹோதி, அத்தமனா, பி⁴க்க²வே, தே³வா தாவதிம்ஸா தஸ்மிம் ஸமயே ஹோந்தி ‘பண்டு³பலாஸோ தா³னி பாரிச்ச²த்தகோ, கோவிளாரோ, ந சிரஸ்ஸேவ பன்னபலாஸோ ப⁴விஸ்ஸதீ’தி. யஸ்மிம் ஸமயே தே³வானம் தாவதிம்ஸானம் பாரிச்ச²த்தகோ, கோவிளாரோ, பன்னபலாஸோ ஹோதி, ஜாலகஜாதோ ஹோதி, கா²ரகஜாதோ ஹோதி, குடுமலகஜாதோ ஹோதி, கோரகஜாதோ ஹோதி, அத்தமனா, பி⁴க்க²வே, தே³வா தாவதிம்ஸா தஸ்மிம் ஸமயே ஹோந்தி ‘கோரகஜாதோ தா³னி பாரிச்ச²த்தகோ கோவிளாரோ, ந சிரஸ்ஸேவ ஸப்³ப³பாலிபு²ல்லோ ப⁴விஸ்ஸதீ’தி.

லீனத்த²ப்பகாஸினியம்பி (தீ³. நி. டீ. 2.294) ஏத்த² ஏவமத்தோ² த³ஸ்ஸிதோ – பன்னபலாஸோதி பதிதபத்தோ. கா²ரகஜாதோதி ஜாதகு²த்³த³கமகுளோ. யே ஹி நீலபத்தகா அதிவிய கு²த்³த³கா மகுளா, தே ‘‘கா²ரகா’’தி வுச்சந்தி. ஜாலகஜாதோதி தேஹியேவ கு²த்³த³கமகுளேஹி ஜாதஜாலகோ ஸப்³ப³ஸோ ஜாலோ விய ஜாதோ. கேசி பன ‘‘ஜாலகஜாதோதி ஏகஜாலோ விய ஜாதோ’’தி அத்த²ம் வத³ந்தி. பாரிச்ச²த்தகோ கிர கா²ரகக்³க³ஹணகாலே ஸப்³ப³த்த²கமேவ பல்லவிகோ ஹோதி, தே சஸ்ஸ பல்லவா பப⁴ஸ்ஸரபவாளவண்ணஸமுஜ்ஜலா ஹோந்தி. தேன ஸோ ஸப்³ப³ஸோ ஸமுஜ்ஜலந்தோ திட்ட²தி. குடுமலஜாதோதி ஸஞ்ஜாதமஹாமகுளோ. கோரகஜாதோதி ஸஞ்ஜாதஸூசிபே⁴தோ³ ஸம்பதிவிகஸமானாவத்தோ². ஸப்³ப³பாலிபு²ல்லோதி ஸப்³ப³ஸோ பு²ல்லிதவிகஸிதோதி. அயஞ்ச அனுக்கமோ தீ³க⁴பா⁴ணகானம் வளஞ்ஜனானுக்கமேன த³ஸ்ஸிதோ, ந ஏத்த² ஆசரியஸ்ஸ விரோதோ⁴ ஆஸங்கிதப்³போ³.

கந்தனகவாதோதி தே³வானம் புஞ்ஞகம்மபச்சயா புப்பா²னம் சி²ந்த³னகவாதோ. கந்ததீதி சி²ந்த³தி. ஸம்படிச்ச²னகவாதோதி சி²ன்னானம் சி²ன்னானம் புப்பா²னம் ஸம்படிக்³க³ண்ஹகவாதோ. சினந்தோதி நானாவித⁴ப⁴த்திஸன்னிவேஸவஸேன நிசினம் கரோந்தோ. அஞ்ஞதரதே³வதானந்தி நாமகோ³த்தவஸேன அபஞ்ஞாததே³வதானம். ரேணுவட்டீதி ரேணுஸங்கா⁴தோ. கண்ணிகம் ஆஹச்சாதி ஸுத⁴ம்மாய கூடம் ஆஹந்த்வா.

அனுப²ரணானுபா⁴வோதி கீ²ணாஸவஸ்ஸ பி⁴க்கு²னோ கித்திஸத்³த³ஸ்ஸ யாவ ப்³ரஹ்மலோகா அனுப²ரணஸங்கா²தோ ஆனுபா⁴வோ. பப்³ப³ஜ்ஜானிஸ்ஸிதம் ஹோதீதி பப்³ப³ஜ்ஜாய சதுபாரிஸுத்³தி⁴ஸீலம்பி த³ஸ்ஸிதமேவாதி அதி⁴ப்பாயோ. பட²மஜ்ஜா²னஸன்னிஸ்ஸிதந்திஆதீ³ஸுபி இமினாவ நயேன அத்தோ² வேதி³தப்³போ³. இத⁴ பன உப⁴யதோ பரிச்சே²தோ³ ஹேட்டா² ஸீலதோ உபரி அரஹத்ததோ ச பரிச்சே²த³ஸ்ஸ த³ஸ்ஸிதத்தா. தேனேதம் வுத்தந்தி தேன காரணேன ஏதம் ‘‘சதுபாரிஸுத்³தி⁴ஸீலம் பப்³ப³ஜ்ஜானிஸ்ஸிதம் ஹோதீ’’திஆதி³வசனம் வுத்தம். ச²ட்ட²ம் உத்தானமேவ.

பாரிச்ச²த்தகஸுத்தாதி³வண்ணனா நிட்டி²தா.