5. மஹாயஞ்ஞவக்³கோ³

1. ஸத்தவிஞ்ஞாணட்டி²திஸுத்தவண்ணனா

44. பஞ்சமஸ்ஸ பட²மே யஸ்மா நித³ஸ்ஸனத்தே² நிபாதோ (தீ³. நி. டீ. 2.127) தஸ்மா ஸேய்யதா²பி மனுஸ்ஸாதி யதா² மனுஸ்ஸாதி வுத்தம் ஹோதி. விஸேஸோ ஹோதியேவ ஸதிபி பா³ஹிரஸ்ஸ காரணஸ்ஸ அபே⁴தே³ அஜ்ஜ²த்திகஸ்ஸ பி⁴ன்னத்தா. நானத்தம் காயே ஏதேஸம், நானத்தோ வா காயோ ஏதேஸந்தி நானத்தகாயா. இமினா நயேன ஸேஸபதே³ஸுபி அத்தோ² வேதி³தப்³போ³. நேஸந்தி மனுஸ்ஸானம். நானத்தா ஸஞ்ஞா ஏதேஸம் அத்தீ²தி நானத்தஸஞ்ஞினோ. ஸுக²ஸமுஸ்ஸயதோ வினிபாதோ ஏதேஸம் அத்தீ²தி வினிபாதிகா ஸதிபி தே³வபா⁴வே தி³ப்³ப³ஸம்பத்தியா அபா⁴வதோ. அபாயேஸு வா க³தோ நத்தி² நிபாதோ ஏதேஸந்தி வினிபாதிகா. தேனாஹ ‘‘சதுஅபாயவினிமுத்தா’’தி. பியங்கரமாதாதீ³னம் வியாதி பியங்கரமாதா கிர யக்கி²னீ பச்சூஸஸமயே அனுருத்³த⁴த்தே²ரஸ்ஸ த⁴ம்மம் ஸஜ்ஜா²யதோ ஸுத்வா –

‘‘மா ஸத்³த³மகரீ பியங்கர, பி⁴க்கு² த⁴ம்மபதா³னி பா⁴ஸதி;

அபி த⁴ம்மபத³ம் விஜானிய, படிபஜ்ஜேம ஹிதாய நோ ஸியா.

‘‘பாணேஸு ச ஸம்யமாமஸே, ஸம்பஜானமுஸா ந ப⁴ணாமஸே;

ஸிக்கே²ம ஸுஸீல்யமத்தனோ, அபி முச்சேம பிஸாசயோனியா’’தி. (ஸம். நி. 1.240) –

ஏவம் புத்தகம் ஸஞ்ஞாபேத்வா தம் தி³வஸம் ஸோதாபத்திப²லம் பத்தா. உத்தரமாதா பன ப⁴க³வதோ த⁴ம்மம் ஸுத்வாவ ஸோதாபன்னா ஜாதா.

ப்³ரஹ்மகாயே பட²மஜ்ஜா²னனிப்³ப³த்தே ப்³ரஹ்மஸமூஹே, ப்³ரஹ்மனிகாயே வா ப⁴வாதி ப்³ரஹ்மகாயிகா. மஹாப்³ரஹ்முனோ பரிஸாய ப⁴வாதி ப்³ரஹ்மபாரிஸஜ்ஜா தஸ்ஸ பரிசாரகட்டா²னே டி²தத்தா. மஹாப்³ரஹ்முனோ புரோஹிதட்டா²னே டி²தாதி ப்³ரஹ்மபுரோஹிதா. ஆயுவண்ணாதீ³ஹி மஹந்தா ப்³ரஹ்மானோதி மஹாப்³ரஹ்மானோ. ஸதிபி தேஸம் திவிதா⁴னம்பி பட²மேன ஜா²னேன க³ந்த்வா நிப்³ப³த்தபா⁴வே ஜா²னஸ்ஸ பன பவத்திபே⁴தே³ன அயம் விஸேஸோதி த³ஸ்ஸேதும் ‘‘ப்³ரஹ்மபாரிஸஜ்ஜா பனா’’திஆதி³ வுத்தம். பரித்தேனாதி ஹீனேன. ஸா சஸ்ஸ ஹீனதா ச²ந்தா³தீ³னம் ஹீனதாய வேதி³தப்³பா³. படிலத்³த⁴மத்தம் வா ஹீனம். கப்பஸ்ஸாதி அஸங்க்²யேய்யகப்பஸ்ஸ. ஹீனபணீதானம் மஜ்ஜே² ப⁴வத்தா மஜ்ஜி²மம். ஸா சஸ்ஸ மஜ்ஜி²மதா ச²ந்தா³தீ³னம் மஜ்ஜி²மதாய வேதி³தப்³பா³. படிலபி⁴த்வா நாதிஸுபா⁴விதம் வா மஜ்ஜி²மம். உபட்³ட⁴கப்போதி அஸங்க்²யேய்யகப்பஸ்ஸ உபட்³ட⁴கப்போ. விப்பா²ரிகதரோதி ப்³ரஹ்மபாரிஸஜ்ஜேஹி பமாணதோ விபுலதரோ ஸபா⁴வதோ உளாரதரோ ச ஹோதி. ஸபா⁴வேனபி ஹி உளாரதமோவ. தம் பனேத்த² அப்பமாணம். தஸ்ஸ ஹி பரித்தாபா⁴தீ³னம் பரித்தஸுபா⁴தீ³னஞ்ச காயே ஸதிபி ஸபா⁴வவேமத்தே ஏகத்தவஸேனேவ வவத்த²பீயதீதி ‘‘ஏகத்தகாயா’’த்வேவ தே வுச்சந்தி. பணீதேனாதி உக்கட்டே²ன. ஸா சஸ்ஸ உக்கட்ட²தா ச²ந்தா³தீ³னம் உக்கட்ட²தாய வேதி³தப்³பா³. ஸுபா⁴விதம் வா, ஸம்மதே³வ, வஸிபா⁴வம் பாபிதம் பணீதம் ‘‘பதா⁴னபா⁴வம் நீத’’ந்தி கத்வா. இதா⁴பி கப்போ அஸங்க்²யேய்யகப்பவஸேனேவ வேதி³தப்³போ³ பரிபுண்ணமஹாகப்பஸ்ஸ அஸம்ப⁴வதோ. இதீதி ஏவம் வுத்தப்பகாரேன. தேதி ‘‘ப்³ரஹ்மகாயிகா’’தி வுத்தா திவிதா⁴பி ப்³ரஹ்மானோ. ஸஞ்ஞாய ஏகத்தாதி திஹேதுகபா⁴வேன ஏகஸபா⁴வத்தா. ந ஹி தஸ்ஸா ஸம்பயுத்தத⁴ம்மவஸேன அஞ்ஞோபி கோசி பே⁴தோ³ அத்தி². ஏவந்தி இமினா நானத்தகாயா ஏகத்தஸஞ்ஞினோ க³ஹிதாதி த³ஸ்ஸேதி.

த³ண்ட³உக்காயாதி த³ண்ட³தீ³பிகாய. ஸரதி தா⁴வதி, விஸ்ஸரதி விப்பகிண்ணா விய தா⁴வதி. த்³வே கப்பாதி த்³வே மஹாகப்பா. இதோ பரேஸுபி ஏஸேவ நயோ. இதா⁴தி இமஸ்மிம் ஸுத்தே. உக்கட்ட²பரிச்சே²த³வஸேன ஆப⁴ஸ்ஸரக்³க³ஹணேனேவ ஸப்³பே³பி தே பரித்தாபா⁴அப்பமாணாபா⁴பி க³ஹிதா.

ஸுந்த³ரா பபா⁴ ஸுபா⁴, தாய கிண்ணா ஸுபா⁴கிண்ணாதி வத்தப்³பே³. பா⁴-ஸத்³த³ஸ்ஸ ரஸ்ஸத்தம் அந்திம-ண-காரஸ்ஸ ஹ-காரஞ்ச கத்வா ‘‘ஸுப⁴கிண்ஹா’’தி வுத்தா. அட்ட²கதா²யம் பன நிச்சலாய ஏகக்³க⁴னாய பபா⁴ய ஸுபோ⁴தி பரியாயவசனந்தி ‘‘ஸுபே⁴ன ஓகிண்ணா விகிண்ணா’’தி அத்தோ² வுத்தோ. ஏத்தா²பி அந்திம-ண-காரஸ்ஸ ஹ-காரகரணம் இச்சி²தப்³ப³மேவ. ந சி²ஜ்ஜித்வா பபா⁴ க³ச்ச²தி ஏகக்³க⁴னத்தா. சதுத்த²விஞ்ஞாணட்டி²திமேவ ப⁴ஜந்தி காயஸ்ஸ ஸஞ்ஞாய ச ஏகரூபத்தா. விபுலஸந்தஸுகா²யுவண்ணாதி³ப²லத்தா வேஹப்ப²லா. ஏத்தா²தி விஞ்ஞாணட்டி²தியம்.

விவட்டபக்கே² டி²தா அபுனராவத்தனதோ. ‘‘ந ஸப்³ப³காலிகா’’தி வத்வா தமேவ அஸப்³ப³காலிகத்தம் விபா⁴வேதும் ‘‘கப்பஸதஸஹஸ்ஸம்பீ’’திஆதி³ வுத்தம். ஸோளஸகப்பஸஹஸ்ஸச்சயேன உப்பன்னானம் ஸுத்³தா⁴வாஸப்³ரஹ்மானம் பரினிப்³பா³யனதோ அஞ்ஞேஸஞ்ச தத்த² அனுப்பஜ்ஜனதோ பு³த்³த⁴ஸுஞ்ஞே லோகே ஸுஞ்ஞம் தம் டா²னம் ஹோதி, தஸ்மா ஸுத்³தா⁴வாஸா ந ஸப்³ப³காலிகா. க²ந்தா⁴வாரட்டா²னஸதி³ஸா ஹோந்தி ஸுத்³தா⁴வாஸபூ⁴மியோ. இமினா ஸுத்தேன ஸுத்³தா⁴வாஸானம் ஸத்தாவாஸபா⁴வதீ³பனேனேவ விஞ்ஞாணட்டி²திபா⁴வோபி தீ³பிதோ ஹோதி, தஸ்மா ஸுத்³தா⁴வாஸாபி ஸத்தஸு விஞ்ஞாணட்டி²தீஸு சதுத்த²விஞ்ஞாணட்டி²திம், நவஸு ஸத்தாவாஸேஸு சதுத்த²ஸத்தாவாஸஞ்ச ப⁴ஜந்தி.

ஸுகு²மத்தாதி ஸங்கா²ராவஸேஸஸுகு²மபா⁴வப்பத்தத்தா. பரிப்³யத்தவிஞ்ஞாணகிச்சாபா⁴வதோ நேவ விஞ்ஞாணம், ந ஸப்³ப³ஸோ அவிஞ்ஞாணம் ஹோதீதி நாவிஞ்ஞாணம், தஸ்மா பரிப்பு²தவிஞ்ஞாணகிச்சவந்தீஸு விஞ்ஞாணட்டி²தீஸு ந வுத்தம்.

ஸத்தவிஞ்ஞாணட்டி²திஸுத்தவண்ணனா நிட்டி²தா.

2. ஸமாதி⁴பரிக்கா²ரஸுத்தவண்ணனா

45. து³தியே ஸமாதி⁴பரிக்கா²ராதி ஏத்த² தயோ பரிக்கா²ரா. ‘‘ரதோ² ஸீலபரிக்கா²ரோ, ஜா²னக்கோ² சக்கவீரியோ’’தி (ஸம். நி. 5.4) ஹி ஏத்த² அலங்காரோ பரிக்கா²ரோ நாம. ‘‘ஸத்தஹி நக³ரபரிக்கா²ரேஹி ஸுபரிக்க²தம் ஹோதீ’’தி (அ. நி. 7.67) ஏத்த² பரிவாரோ பரிக்கா²ரோ நாம. ‘‘கி³லானபச்சய…பே… ஜீவிதபரிக்கா²ரா’’தி (ம. நி. 1.191-192) ஏத்த² ஸம்பா⁴ரோ பரிக்கா²ரோ நாம. ஸோ இத⁴ அதி⁴ப்பேதோதி ஆஹ ‘‘மக்³க³ஸமாதி⁴ஸ்ஸ ஸம்பா⁴ரா’’தி. பரிவாரபரிக்கா²ரோபி வட்டதியேவ. பரிவாரோ ஹி ஸம்மாதி³ட்டா²த³யோ மக்³க³த⁴ம்மா ஸம்மாஸமாதி⁴ஸ்ஸ ஸஹஜாதாதி³பச்சயபா⁴வேன பரிகரணதோ அபி⁴ஸங்க²ரணதோ. பரிக்க²தாதி பரிவாரிதா. அயம் வுச்சதி அரியோ ஸம்மாஸமாதீ⁴தி அயம் ஸத்தஹி ரதனேஹி பரிவுதோ சக்கவத்தீ விய ஸத்தஹி அங்கே³ஹி பரிவுதோ அரியோ ஸம்மாஸமாதீ⁴தி வுச்சதி. உபேச்ச நிஸ்ஸீயதீதி உபனிஸா, ஸஹ உபனிஸாயாதி ஸஉபனிஸோ, ஸஉபனிஸ்ஸயோ அத்தோ², ஸபரிவாரோயேவாதி வுத்தம் ஹோதி. ஸஹகாரிகாரணபூ⁴தோ ஹி த⁴ம்மஸமூஹோ இத⁴ ‘‘உபனிஸோ’’தி அதி⁴ப்பேதோ.

ஸமாதி⁴பரிக்கா²ரஸுத்தவண்ணனா நிட்டி²தா.

3. பட²மஅக்³கி³ஸுத்தவண்ணனா

46. ததியே அனுட³ஹனட்டே²னாதி காமம் ஆஹுனேய்யக்³கி³ஆத³யோ தயோ அக்³கீ³ ப்³ராஹ்மணேஹிபி இச்சி²தா ஸந்தி. தே பன தேஹி இச்சி²தமத்தாவ, ந ஸத்தானம் தாதி³ஸா அத்த²ஸாத⁴கா. யே பன ஸத்தானம் அத்த²ஸாத⁴கா, தே த³ஸ்ஸேதும் ‘‘ஆஹுனம் வுச்சதீ’’திஆதி³ வுத்தம். தத்த² ஆனேத்வா ஹுனனம் பூஜனம் ‘‘ஆஹுன’’ந்தி வுத்தம், தம் ஆஹுனம் அரஹந்தீ மாதாபிதரோ. தேனாஹ ப⁴க³வா – ‘‘ஆஹுனேய்யாதி, பி⁴க்க²வே, மாதாபிதூனம் ஏதம் அதி⁴வசன’’ந்தி (இதிவு. 106). யத³க்³கே³ன ச தே புத்தானம் ப³ஹூபகாரதாய ஆஹுனேய்யாதி, தேஸு ஸம்மாபடிபத்தி நேஸம் ஹிதஸுகா²வஹா, தத³க்³கே³ன தேஸு மிச்சா²படிபத்தி அஹிதது³க்கா²வஹாதி ஆஹ ‘‘தேஸு…பே… நிப்³ப³த்தந்தீ’’தி.

ஸ்வாயமத்தோ² (தீ³. நி. அட்ட². 3.305) மித்தவிந்த³கவத்து²னா வேதி³தப்³போ³. மித்தவிந்த³கோ ஹி மாதரா, ‘‘தாத, அஜ்ஜ உபோஸதி²கோ ஹுத்வா விஹாரே ஸப்³ப³ரத்திம் த⁴ம்மஸ்ஸவனம் ஸுணோஹி, ஸஹஸ்ஸம் தே த³ஸ்ஸாமீ’’தி வுத்தோ த⁴னலோபே⁴ன உபோஸத²ம் ஸமாதா³ய விஹாரம் க³ந்த்வா ‘‘இத³ம் டா²னம் அகுதோப⁴ய’’ந்தி ஸல்லக்கே²த்வா த⁴ம்மாஸனஸ்ஸ ஹேட்டா² நிபன்னோ ஸப்³ப³ரத்திம் நித்³தா³யித்வா க⁴ரம் அக³மாஸி. மாதா பாதோவ யாகு³ம் பசித்வா உபனாமேஸி. ஸோ ஸஹஸ்ஸம் க³ஹேத்வாவ பிவி. அத²ஸ்ஸ ஏதத³ஹோஸி ‘‘த⁴னம் ஸம்ஹரிஸ்ஸாமீ’’தி. ஸோ நாவாய ஸமுத்³த³ம் பக்க²ந்தி³துகாமோ அஹோஸி. அத² நம் மாதா, ‘‘தாத, இமஸ்மிம் குலே சத்தாலீஸகோடித⁴னம் அத்தி², அலம் க³மனேனா’’தி நிவாரேதி. ஸோ தஸ்ஸா வசனம் அனாதி³யித்வா க³ச்ச²தி ஏவ. ஸா புரதோ அட்டா²ஸி. அத² நம் குஜ்ஜி²த்வா ‘‘அயம் மய்ஹம் புரதோ திட்ட²தீ’’தி பாதே³ன பஹரித்வா பதிதம் அந்தரம் கத்வா அக³மாஸி.

மாதா உட்ட²ஹித்வா ‘‘மாதி³ஸாய மாதரி ஏவரூபம் கம்மம் கத்வா க³தஸ்ஸ தே க³தட்டா²னே ஸுக²ம் ப⁴விஸ்ஸதீதி ஏவம்ஸஞ்ஞீ நாம த்வம் புத்தா’’தி ஆஹ. தஸ்ஸ நாவம் ஆருய்ஹ க³ச்ச²தோ ஸத்தமே தி³வஸே நாவா அட்டா²ஸி. அத² தே மனுஸ்ஸா ‘‘அத்³தா⁴ ஏத்த² பாபபுக்³க³லோ அத்தி², ஸலாகம் தே³தா²’’தி ஆஹம்ஸு. ஸலாகா தீ³யமானா தஸ்ஸேவ திக்க²த்தும் பாபுணி. தே தஸ்ஸ உளும்பம் த³த்வா தம் ஸமுத்³தே³ பக்கி²பிம்ஸு. ஸோ ஏகம் தீ³பம் க³ந்த்வா விமானபேதீஹி ஸத்³தி⁴ம் ஸம்பத்திம் அனுப⁴வந்தோ தாஹி ‘‘புரதோ புரதோ மா அக³மாஸீ’’தி வுச்சமானோபி தத்³தி³கு³ணம் தத்³தி³கு³ணம் ஸம்பத்திம் பஸ்ஸந்தோ அனுபுப்³பே³ன கு²ரசக்கத⁴ரம் ஏகம் அத்³த³ஸ. தம் சக்கம் பது³மபுப்ப²ம் விய உபட்டா²ஸி. ஸோ தம் ஆஹ, ‘‘அம்போ⁴, இத³ம் தயா பிளந்தி⁴தம் பது³மம் மய்ஹம் தே³ஹீ’’தி. ந இத³ம், ஸாமி, பது³மம், கு²ரசக்கம் ஏதந்தி. ஸோ ‘‘வஞ்சேஸி மம் த்வம், கிம் மயா பது³மம் ந தி³ட்ட²புப்³ப³’’ந்தி வத்வா ‘‘த்வம் லோஹிதசந்த³னம் விலிம்பித்வா பிளந்த⁴னம் பது³மபுப்ப²ம் மய்ஹம் ந தா³துகாமோ’’தி ஆஹ. ஸோ சிந்தேஸி ‘‘அயம்பி மயா கதஸதி³ஸம் கம்மம் கத்வா தஸ்ஸ ப²லம் அனுப⁴விதுகாமோ’’தி. அத² நம் ‘‘க³ண்ஹ, ரே’’தி வத்வா தஸ்ஸ மத்த²கே சக்கம் கி²பி. தேன வுத்தம் –

‘‘சதுப்³பி⁴ அட்ட²ஜ்ஜ²க³மா, அட்டா²ஹி பிச ஸோளஸ;

ஸோளஸாஹி ச பா³த்திம்ஸ, அத்ரிச்ச²ம் சக்கமாஸதோ³;

இச்சா²ஹதஸ்ஸ போஸஸ்ஸ, சக்கம் ப⁴மதி மத்த²கே’’தி. (ஜா. 1.1.104; 1.5.103);

ஸோதி கே³ஹஸாமிகோ ப⁴த்தா. புரிமனயேனேவாதி அனுட³ஹனஸ்ஸ பச்சயதாய. தத்ரித³ம் வத்து² – கஸ்ஸபபு³த்³த⁴காலே ஸோதாபன்னஸ்ஸ உபாஸகஸ்ஸ ப⁴ரியா அதிசாரம் சரதி. ஸோ தம் பச்சக்க²தோ தி³ஸ்வா ‘‘கஸ்மா ஏவம் கரோஸீ’’தி ஆஹ. ஸா ‘‘ஸசாஹம் ஏவரூபம் கரோமி, அயம் மே ஸுனகோ² விலுப்பமானோ கா²த³தூ’’தி வத்வா காலகதா கண்ணமுண்ட³கத³ஹே வேமானிகபேதீ ஹுத்வா நிப்³ப³த்தா தி³வா ஸம்பத்திம் அனுப⁴வதி, ரத்திம் து³க்க²ம். ததா³ பா³ராணஸிராஜா மிக³வம் சரந்தோ அரஞ்ஞம் பவிஸித்வா அனுபுப்³பே³ன கண்ணமுண்ட³கத³ஹம் ஸம்பத்தோ தாய ஸத்³தி⁴ம் ஸம்பத்திம் அனுப⁴வதி. ஸா தம் வஞ்சேத்வா ரத்திம் து³க்க²ம் அனுப⁴வதி. ஸோ ஞத்வா ‘‘கத்த² நு கோ² க³ச்ச²தீ’’தி பிட்டி²தோ பிட்டி²தோ க³ந்த்வா அவிதூ³ரே டி²தோ கண்ணமுண்ட³கத³ஹதோ நிக்க²மித்வா தம் ‘‘படபட’’ந்தி கா²த³மானம் ஏகம் ஸுனக²ம் தி³ஸ்வா அஸினா த்³விதா⁴ சி²ந்தி³, த்³வே அஹேஸும். புன சி²ன்னே சத்தாரோ, புன சி²ன்னே அட்ட², புன சி²ன்னே ஸோளஸ அஹேஸும். ஸா ‘‘கிம் கரோஸி, ஸாமீ’’தி ஆஹ. ஸோ ‘‘கிம் இத³’’ந்தி ஆஹ. ஸா ‘‘ஏவம் அகத்வா கே²ளபிண்ட³ம் பூ⁴மியம் நிட்டு²பி⁴த்வா பாதே³ன க⁴ம்ஸாஹீ’’தி ஆஹ. ஸோ ததா² அகாஸி. ஸுனகா² அந்தரதா⁴யிம்ஸு. முட்டி²யோகோ³ கிராயம் தஸ்ஸ ஸுனக²ந்தரதா⁴னஸ்ஸ, யதி³த³ம் கே²ளபிண்ட³ம் பூ⁴மியம் நிட்டு²பி⁴த்வா பாதே³ன க⁴ம்ஸனம், தம் தி³வஸம் தஸ்ஸா கம்மம் கீ²ணம். ராஜா விப்படிஸாரீ ஹுத்வா க³ந்தும் ஆரத்³தோ⁴. ஸா ‘‘மய்ஹம், ஸாமி, கம்மம் கீ²ணம், மா அக³மாஸீ’’தி ஆஹ. ராஜா அஸ்ஸுத்வாவ க³தோ.

த³க்கி²ணாதி சத்தாரோ பச்சயா தீ³யமானா த³க்க²ந்தி ஏதேஹி ஹிதஸுகா²னீதி, தம் த³க்கி²ணம் அரஹதீதி த³க்கி²ணேய்யோ, பி⁴க்கு²ஸங்கோ⁴.

பட²மஅக்³கி³ஸுத்தவண்ணனா நிட்டி²தா.

4-5. து³தியஅக்³கி³ஸுத்தாதி³வண்ணனா

47-48. சதுத்தே² யஞ்ஞவாடம் ஸம்பாதே³த்வா மஹாயஞ்ஞம் உத்³தி³ஸ்ஸ ஸவிஞ்ஞாணகானி அவிஞ்ஞாணகானி ச யஞ்ஞூபகரணானி ஸஜ்ஜிதானீதி ஆஹ பாளியம் ‘‘மஹாயஞ்ஞோ உபக்க²டோ’’தி. தம் உபகரணம் தேஸம் ததா²ஸஜ்ஜனந்தி ஆஹ ‘‘உபக்க²டோதி பச்சுபட்டி²தோ’’தி. வச்ச²தரஸதானீதி யுவபா⁴வப்பத்தானி நாதிப³லவவச்ச²ஸதானி. தே பன வச்சா² ஏவ ஹோந்தி, ந த³ம்மா, ப³லீப³த்³தா³ வா. உரப்³பா⁴தி தருணமேண்ட³கா வுச்சந்தி. உபனீதானீதி ட²பனத்தா²ய உபனீதானி. விஹிம்ஸட்டே²னாதி ஹிம்ஸனட்டே²ன. உபவாயதூதி உபக³ந்த்வா ஸரீரத³ரத²ம் நிப்³பா³பேந்தோ ஸண்ஹஸீதலா வாதோ வாயது. ஸேஸம் ஸுவிஞ்ஞேய்யமேவ. பஞ்சமே நத்தி² வத்தப்³ப³ம்.

து³தியஅக்³கி³ஸுத்தாதி³வண்ணனா நிட்டி²தா.

6. து³தியஸஞ்ஞாஸுத்தவண்ணனா

49. ச²ட்டே² ந்ஹாருவிலேக²னந்தி சம்மம் லிக²ந்தானம் சம்மம் லிகி²த்வா ச²ட்³டி³தகஸடம். ‘‘ஏஸோஹமஸ்மீ’’திஆதி³னா அஹம்கரணம் அஹங்காரோ. ‘‘ஏதம் மமா’’தி மமம்கரணம் மமங்காரோ. தேனாஹ ‘‘அஹங்காரதி³ட்டி²தோ’’திஆதி³. திஸ்ஸோ விதா⁴தி ஸேய்யஸதி³ஸஹீனவஸேன தயோ மானா. ‘‘ஏகவிதே⁴ன ரூபஸங்க³ஹோ’’திஆதீ³ஸு (த⁴. ஸ. 584) கோட்டா²ஸோ ‘‘விதா⁴’’தி வுத்தோ. ‘‘கத²ம்வித⁴ம் ஸீலவந்தம் வத³ந்தி, கத²ம்வித⁴ம் பஞ்ஞவந்தம் வத³ந்தீ’’திஆதீ³ஸு (ஸம். நி. 1.95) பகாரோ. ‘‘திஸ்ஸோ இமா, பி⁴க்க²வே, விதா⁴. கதமா திஸ்ஸோ? ஸேய்யோஹமஸ்மீதி விதா⁴’’தி (விப⁴. 920) ஏத்த² மானோ ‘‘விதா⁴’’தி வுத்தோ. இதா⁴பி மானோவ அதி⁴ப்பேதோ. மானோ ஹி வித³ஹனதோ ஹீனாதி³வஸேன திவிதா⁴. தேனாகாரேன த³ஹனதோ உபத³ஹனதோ ‘‘விதா⁴’’தி வுச்சதி.

து³தியஸஞ்ஞாஸுத்தவண்ணனா நிட்டி²தா.

7-8. மேது²னஸுத்தாதி³வண்ணனா

50-51. ஸத்தமே இதா⁴தி இமஸ்மிம் லோகே. ஏகச்சோதி ஏகோ. ஸமணோ வா ப்³ராஹ்மணோ வாதி பப்³ப³ஜ்ஜாமத்தேன ஸமணோ வா, ஜாதிமத்தேன ப்³ராஹ்மணோ வா. த்³வயம்த்³வயஸமாபத்திந்தி த்³வீஹி த்³வீஹி ஸமாபஜ்ஜிதப்³ப³ம், மேது²னந்தி அத்தோ². ந ஹேவ கோ² ஸமாபஜ்ஜதீதி ஸம்ப³ந்தோ⁴. உச்சா²த³னம் உப்³ப³ட்டனம். ஸம்பா³ஹனம் பரிமத்³த³னம். ஸாதி³யதீதி அதி⁴வாஸேதி. தத³ஸ்ஸாதே³தீதி உச்சா²த³னாதி³ம் அபி⁴ரமதி. நிகாமேதீதி இச்ச²தி. வித்திந்தி துட்டி²ம். இத³ம்பி கோ²தி ஏத்த² இத³ந்தி யதா²வுத்தம் ஸாதி³யனாதி³ம் க²ண்டா³தி³பா⁴வவஸேன ஏகம் கத்வா வுத்தம். பி-ஸத்³தோ³ வக்க²மானம் உபாதா³ய ஸமுச்சயத்தோ², கோ²-ஸத்³தோ³ அவதா⁴ரணத்தோ². இத³ம் வுத்தம் ஹோதி – யதே³தம் ப்³ரஹ்மசாரிபடிஞ்ஞஸ்ஸ அஸதிபி த்³வயம்த்³வயஸமாபத்தியம் மாதுகா³மஸ்ஸ உச்சா²த³னனஹாபனஸம்பா³ஹனஸாதி³யனாதி³. இத³ம்பி ஏகம்ஸேன தஸ்ஸ ப்³ரஹ்மசரியஸ்ஸ க²ண்டா³தி³பா⁴வாபாத³னதோ க²ண்ட³ம்பி சி²த்³த³ம்பி ஸப³லம்பி கம்மாஸம்பீதி. ஏவம் பன க²ண்டா³தி³பா⁴வாபத்தியா ஸோ அபரிஸுத்³த⁴ம் ப்³ரஹ்மசரியம் சரதி, ந பரிஸுத்³த⁴ம், ஸம்யுத்தோ மேது²னஸம்யோகே³ன, ந விஸம்யுத்தோ. ததோ சஸ்ஸ ந ஜாதிஆதீ³ஹி பரிமுத்தீதி த³ஸ்ஸேந்தோ ‘‘அயம் வுச்சதீ’’திஆதி³மாஹ.

ஸஞ்ஜக்³க⁴தீதி கிலேஸவஸேன மஹாஹஸிதம் ஹஸதி. ஸம்கீளதீதி காயஸம்ஸக்³க³வஸேன கீளதி. ஸம்கேலாயதீதி ஸப்³ப³ஸோ மாதுகா³மம் கேலாயந்தோ விஹரதி. சக்கு²னாதி அத்தனோ சக்கு²னா. சக்கு²ந்தி மாதுகா³மஸ்ஸ சக்கு²ம். உபனிஜ்ஜா²யதீதி உபேச்ச நிஜ்ஜா²யதி ஓலோகேதி. திரோகுட்டந்தி குட்டஸ்ஸ பரதோ. ததா² திரோபாகாரம், ‘‘மத்திகாமயா பி⁴த்தி குட்டம், இட்ட²காமயா பாகாரோ’’தி வத³ந்தி. யா காசி வா பி⁴த்தி போரிஸகா தி³யட்³ட⁴ரதனப்பமாணா குட்டம், ததோ அதி⁴கோ பாகாரோ. அஸ்ஸாதி ப்³ரஹ்மசாரிபடிஞ்ஞஸ்ஸ. புப்³பே³தி வதஸமாதா³னதோ புப்³பே³. காமகு³ணேஹீதி காமகோட்டா²ஸேஹி. ஸமப்பிதந்தி ஸுட்டு² அப்பிதம் ஸஹிதம். ஸமங்கி³பூ⁴தந்தி ஸமன்னாக³தம். பரிசாரயமானந்தி கீளந்தம், உபட்ட²ஹியமானம் வா. பணிதா⁴யாதி பத்தே²த்வா. ஸீலேனாதிஆதீ³ஸு யமனியமாதி³ஸமாதா³னவஸேன ஸீலம், அவீதிக்கமவஸேன வதம். உப⁴யம்பி வா ஸீலம், து³க்கரசரியவஸேன பவத்திதம் வதம். தம்தம்அகிச்சஸம்மததோ வா நிவத்திலக்க²ணம் ஸீலம், தம்தம்ஸமாதா³னவதோ வேஸபோ⁴ஜனகிச்சகரணாதி³விஸேஸப்படிபத்தி வதம். ஸப்³ப³தா²பி து³க்கரசரியா தபோ. மேது²னா விரதி ப்³ரஹ்மசரியந்தி ஏவம்பேத்த² பாளிவண்ணனா வேதி³தப்³பா³. அட்ட²மம் உத்தானமேவ.

மேது²னஸுத்தாதி³வண்ணனா நிட்டி²தா.

9. தா³னமஹப்ப²லஸுத்தவண்ணனா

52. நவமே ‘‘ஸாஹு தா³ன’’ந்தி தா³னம் தே³தீதி ‘‘தா³னம் நாம ஸாது⁴ ஸுந்த³ர’’ந்தி தா³னம் தே³தீதி அத்தோ². தா³னஞ்ஹி த³த்வா தம் பச்சவேக்க²ந்தஸ்ஸ பாமோஜ்ஜபீதிஸோமனஸ்ஸாத³யோ உப்பஜ்ஜந்தி, லோப⁴தோ³ஸஇஸ்ஸாமச்சே²ராத³யோ விதூ³ரீப⁴வந்தி. இதா³னி தா³னம் அனுகூலத⁴ம்மபரிப்³ரூஹனேன பச்சனீகத⁴ம்மவிதூ³ரீகரணேன ச பா⁴வனாசித்தஸ்ஸ உபஸோப⁴னாய ச பரிக்கா²ராய ச ஹோதீதி ‘‘அலங்காரபூ⁴தஞ்சேவ பரிவாரபூ⁴தஞ்ச தே³தீ’’தி வுத்தம். ஜா²னானாகா³மீ நாம ஹோதி ஜா²னம் நிப்³ப³த்தேத்வா ப்³ரஹ்மலோகூபபன்னானம் அரியானம் ஹேட்டா² அனுப்பஜ்ஜனதோ. இமம் பேச்ச பரிபு⁴ஞ்ஜிஸ்ஸாமீதி ஸாபேக்க²ஸ்ஸ தா³னம் பரலோகப²லாஸாய ஸாதிஸயாய ச புப்³பா³சாரவஸேன உப்பஜ்ஜமானாய அனுப⁴வத்தா தண்ஹுத்தரம் நாம ஹோதீதி ஆஹ ‘‘பட²மம் தண்ஹுத்தரியதா³ன’’ந்தி. தா³னம் நாம பு³த்³தா⁴தீ³ஹி பஸத்த²ந்தி க³ரும் சித்தீகாரம் உபட்ட²பேத்வா தா³தப்³ப³த்தா ‘‘து³தியம் சித்தீகாரதா³ன’’ந்தி வுத்தம். புப்³ப³கேஹி பிதுபிதாமஹேஹி தி³ன்னபுப்³ப³ம் கதபுப்³ப³ம் ஜஹாபேதும் நாம நானுச்ச²விகந்தி அத்தபா⁴வஸபா⁴க³வஸேன ஹிரோத்தப்பம் பச்சுபட்ட²பேத்வா தா³தப்³ப³தோ ‘‘ததியம் ஹிரோத்தப்பதா³ன’’ந்தி வுத்தம். ‘‘அஹம் பசாமி, ந இமே பசந்தி, நாரஹாமி பசந்தோ அபசந்தானம் தா³னம் அதா³து’’ந்தி ஏவம்ஸஞ்ஞீ ஹுத்வா தே³ந்தோ நிரவஸேஸம் கத்வா தே³தீதி ஆஹ ‘‘சதுத்த²ம் நிரவஸேஸதா³ன’’ந்தி. ‘‘யதா² தேஸம் புப்³ப³கானம் இஸீனம் தானி மஹாயஞ்ஞகானி அஹேஸும், ஏவம் மே அயம் தா³னபரிபோ⁴கோ³ ப⁴விஸ்ஸதீ’’தி ஏவம்ஸஞ்ஞினோ தா³னம் த³க்கி²ணம் அரஹேஸு தா³தப்³ப³தோ ‘‘பஞ்சமம் த³க்கி²ணேய்யதா³ன’’ந்தி வுத்தம். ‘‘இமம் மே தா³னம் த³த³தோ சித்தம் பஸீத³தீ’’திஆதி³னா பீதிஸோமனஸ்ஸம் உப்பாதே³த்வா தே³ந்தஸ்ஸ தா³னம் ஸோமனஸ்ஸபா³ஹுல்லப்பத்தியா ஸோமனஸ்ஸுபசாரம் நாம ஹோதீதி ஆஹ ‘‘ச²ட்ட²ம் ஸோமனஸ்ஸுபவிசாரதா³ன’’ந்தி வுத்தம்.

தா³னமஹப்ப²லஸுத்தவண்ணனா நிட்டி²தா.

10. நந்த³மாதாஸுத்தவண்ணனா

53. த³ஸமே ‘‘வுத்த²வஸ்ஸோ பவாரேத்வா…பே… நிக்க²மீ’’தி அங்கு³த்தரபா⁴ணகானம் மதேனேதம் வுத்தம். மஜ்ஜி²மபா⁴ணகா பன வத³ந்தி ‘‘ப⁴க³வா உபகட்டா²ய வஸ்ஸூபனாயிகாய ஜேதவனதோ பி⁴க்கு²ஸங்க⁴பரிவுதோ சாரிகம் நிக்க²மி. தேனேவ ச அகாலே நிக்க²ந்தத்தா கோஸலராஜாத³யோ வாரேதும் ஆரபி⁴ம்ஸு. பவாரேத்வா ஹி சரணம் பு³த்³தா⁴சிண்ண’’ந்தி. புண்ணாய ஸம்மாபடிபத்திம் பச்சாஸீஸந்தோ ப⁴க³வா ‘‘மம நிவத்தனபச்சயா த்வம் கிம் கரிஸ்ஸஸீ’’தி ஆஹ. புண்ணாபி…பே… பப்³ப³ஜீதி ஏத்த² ஸேட்டி² ‘‘புண்ணாய ப⁴க³வா நிவத்திதோ’’தி ஸுத்வா தம் பு⁴ஜிஸ்ஸம் கத்வா தீ⁴துட்டா²னே ட²பேஸி. ஸா பப்³ப³ஜ்ஜம் யாசித்வா பப்³ப³ஜி, பப்³ப³ஜித்வா விபஸ்ஸனம் ஆரபி⁴. அத²ஸ்ஸா ஸத்தா² ஆரத்³த⁴விபஸ்ஸகபா⁴வம் ஞத்வா இமம் ஓபா⁴ஸகா³த²ம் விஸ்ஸஜ்ஜேஸி –

‘‘புண்ணே பூரஸ்ஸு ஸத்³த⁴ம்மம், சந்தோ³ பன்னரஸோ யதா²;

பரிபுண்ணாய பஞ்ஞாய, து³க்க²ஸ்ஸந்தம் கரிஸ்ஸஸீ’’தி. (தே²ரீகா³. 3);

ஸா கா³தா²பரியோஸானே அரஹத்தம் பத்வா அபி⁴ஞ்ஞாதா ஸாவிகா அஹோஸி. ஸேஸமேத்த² ஸுவிஞ்ஞேய்யமேவ.

நந்த³மாதாஸுத்தவண்ணனா நிட்டி²தா.

மஹாயஞ்ஞவக்³க³வண்ணனா நிட்டி²தா.

பட²மபண்ணாஸகம் நிட்டி²தம்.