8. அரஹத்தவக்³கோ³

1-3. து³க்க²ஸுத்தாதி³வண்ணனா

75-77. அட்ட²மஸ்ஸ பட²மாதீ³ஸு நத்தி² வத்தப்³ப³ம். ததியே திவித⁴ம் குஹனவத்து²ந்தி பச்சயப்படிஸேவனஸாமந்தஜப்பனஇரியாபத²ப்பவத்தனஸங்கா²தம் திவித⁴ம் குஹனவத்து²ம். உக்கி²பித்வாதி ‘‘மஹாகுடும்பி³கோ மஹானாவிகோ மஹாதா³னபதீ’’திஆதி³னா பக்³க³ண்ஹித்வா லபனம். அவக்கி²பித்வாதி ‘‘கிம் இமஸ்ஸ ஜீவிதம், பீ³ஜபோ⁴ஜனோ நாமாய’’ந்தி ஹீளேத்வா லபனம்.

து³க்க²ஸுத்தாதி³வண்ணனா நிட்டி²தா.

4. ஸுக²ஸோமனஸ்ஸஸுத்தவண்ணனா

78. சதுத்தே² யதா²வுத்தத⁴ம்மாதீ³ஸு தஸ்ஸ கிலேஸனிமித்தம் து³க்க²ம் அனவஸ்ஸனந்தி ‘‘ஸுக²ஸோமனஸ்ஸப³ஹுலோ விஹரதீ’’தி வுத்தம். காயிகஸுக²ஞ்சேவ சேதஸிகஸோமனஸ்ஸஞ்ச ப³ஹுலம் அஸ்ஸாதி ஸுக²ஸோமனஸ்ஸப³ஹுலோ. யவதி தேன ப²லம் மிஸ்ஸிதம் விய ஹோதீதி யோனி, ஏகந்திகம் காரணம். அஸ்ஸாதி யதா²வுத்தஸ்ஸ பி⁴க்கு²னோ. பரிபுண்ணந்தி அவிகலம் அனவஸேஸம்.

ஸுக²ஸோமனஸ்ஸஸுத்தவண்ணனா நிட்டி²தா.

5. அதி⁴க³மஸுத்தவண்ணனா

79. பஞ்சமே ஆக³ச்ச²ந்தி ஏதேன குஸலா வா அகுஸலா வாதி ஆக³மனம், குஸலாகுஸலானம் உப்பத்திகாரணம். தத்த² குஸலோதி ஆக³மனகுஸலோ. ஏவம் த⁴ம்மே மனஸிகரோதோ குஸலா வா அகுஸலா வா த⁴ம்மா அபி⁴வட்³ட⁴ந்தீதி ஏவம் ஜானந்தோ. அபக³ச்ச²ந்தி குஸலா வா அகுஸலா வா ஏதேனாதி அபக³மனம். தேஸம் ஏவ அனுப்பத்திகாரணம், தத்த² குஸலோதி அபக³மனகுஸலோ. ஏவம் த⁴ம்மே மனஸிகரோதோ குஸலா வா அகுஸலா வா த⁴ம்மா நாபி⁴வட்³ட⁴ந்தீதி ஏவம் ஜானந்தோ. உபாயகுஸலோதி டா²னுப்பத்திகபஞ்ஞாஸமன்னாக³தோ. இத³ஞ்ச அச்சாயிககிச்சே வா ப⁴யே வா உப்பன்னே தஸ்ஸ திகிச்ச²னத்த²ம் டா²னுப்பத்தியா காரணஜானனவஸேன வேதி³தப்³ப³ம்.

அதி⁴க³மஸுத்தவண்ணனா நிட்டி²தா.

6-7. மஹந்தத்தஸுத்தாதி³வண்ணனா

80-81. ச²ட்டே² ஸம்பத்தேதி கிலேஸே ஸம்பத்தே. ஸத்தமம் உத்தானமேவ.

மஹந்தத்தஸுத்தாதி³வண்ணனா நிட்டி²தா.

8-10. து³தியனிரயஸுத்தாதி³வண்ணனா

82-84. அட்ட²மே காயபாக³ப்³பி⁴யாதீ³ஹீதி ஆதி³-ஸத்³தே³ன வசீபாக³ப்³பி⁴யம் மனோபாக³ப்³பி⁴யஞ்ச ஸங்க³ண்ஹாதி. நவமாதீ³னி உத்தானத்தா²னேவ.

து³தியனிரயஸுத்தாதி³வண்ணனா நிட்டி²தா.

அரஹத்தவக்³க³வண்ணனா நிட்டி²தா.