9. ஸீதிவக்³கோ³

1. ஸீதிபா⁴வஸுத்தவண்ணனா

85. நவமஸ்ஸ பட²மே ஸீதிபா⁴வந்தி நிப்³பா³னம், கிலேஸவூபஸமம் வா. நிக்³க³ண்ஹாதீதி அச்சாரத்³த⁴வீரியதாதீ³ஹி உத்³த⁴தம் சித்தம் உத்³த⁴ச்சபக்க²தோ ரக்க²ணவஸேன நிக்³க³ண்ஹாதி. பக்³க³ண்ஹாதீதி அதிஸிதி²லவீரியதாதீ³ஹி லீனம் சித்தம் கோஸஜ்ஜபாததோ ரக்க²ணவஸேன பக்³க³ண்ஹாதி. ஸம்பஹம்ஸேதீதி ஸமப்பவத்தசித்தம் ததா²பவத்தியம் பஞ்ஞாய தோஸேதி உத்தேஜேதி வா. யதா³ வா பஞ்ஞாபயோக³மந்த³தாய உபஸமஸுகா²னதி⁴க³மேன வா நிரஸ்ஸாத³ம் சித்தம் பா⁴வனாய ந பக்க²ந்த³தி, ததா³ ஜாதிஆதீ³னி ஸம்வேக³வத்தூ²னி பச்சவேக்கி²த்வா ஸம்பஹம்ஸேதி ஸமுத்தேஜேதி. அஜ்ஜு²பேக்க²தீதி யதா³ பன சித்தம் அலீனம் அனுத்³த⁴தம் அனிரஸ்ஸாத³ம் ஆரம்மணே ஸமப்பவத்தம் ஸம்மதே³வ பா⁴வனாவீதிம் ஓதிண்ணம் ஹோதி, ததா³ பக்³க³ஹனிக்³க³ஹஸம்பஹம்ஸனேஸு கிஞ்சி ப்³யாபாரம் அகத்வா ஸமப்பவத்தேஸு அஸ்ஸேஸு ஸாரதீ² விய அஜ்ஜு²பேக்க²தி, உபேக்க²கோவ ஹோதி. பணீதாதி⁴முத்திகோதி பணீதே உத்தமே மக்³க³ப²லே அதி⁴முத்தோ நின்னபோணபப்³பா⁴ரோ.

ஸீதிபா⁴வஸுத்தவண்ணனா நிட்டி²தா.

2-11. ஆவரணஸுத்தாதி³வண்ணனா

86-95. து³தியே அச்ச²ந்தி³கோதி கத்துகம்யதாகுஸலச்ச²ந்த³ரஹிதோ. உத்தரகுருகா மனுஸ்ஸா அச்ச²ந்தி³கட்டா²னம் பவிட்டா². து³ப்பஞ்ஞோதி ப⁴வங்க³பஞ்ஞாய பரிஹீனோ. ப⁴வங்க³பஞ்ஞாய பன பரிபுண்ணாயபி யஸ்ஸ ப⁴வங்க³ம் லோகுத்தரஸ்ஸ பச்சயோ ந ஹோதி, ஸோபி து³ப்பஞ்ஞோ ஏவ நாம. அப⁴ப்³போ³ நியாமம் ஓக்கமிதும் குஸலேஸு த⁴ம்மேஸு ஸம்மத்தந்தி குஸலேஸு த⁴ம்மேஸு ஸம்மத்தனியாமஸங்கா²தம் அரியமக்³க³ம் ஓக்கமிதும் அதி⁴க³ந்தும் அப⁴ப்³போ³. ந கம்மாவரணதாயாதிஆதீ³ஸு அப⁴ப்³ப³விபரியாயேன அத்தோ² வேதி³தப்³போ³. சதுத்தா²தீ³னி உத்தானத்தா²னி.

ஆவரணஸுத்தாதி³வண்ணனா நிட்டி²தா.

ஸீதிவக்³க³வண்ணனா நிட்டி²தா.