5. த⁴ம்மிகவக்³கோ³
1. நாக³ஸுத்தவண்ணனா
43. பஞ்சமஸ்ஸ பட²மே பரிஸிஞ்சிதுந்தி (ம. நி. அட்ட². 1.272) யோ சுண்ணமத்திகாதீ³ஹி க³த்தானி உப்³ப³ட்டேந்தோ மல்லகமுட்டா²தீ³ஹி வா க⁴ம்ஸந்தோ நஹாயதி, ஸோ ‘‘நஹாயதீ’’தி வுச்சதி. யோ ததா² அகத்வா பகதியாவ நஹாயதி, ஸோ ‘‘பரிஸிஞ்சதீ’’தி வுச்சதி. ப⁴க³வதோ ச ஸரீரே ததா² ஹரிதப்³ப³ம் ரஜோஜல்லம் நாம நுபலிம்பதி அச்ச²ச²விபா⁴வதோ, உதுக்³க³ஹணத்த²ம் பன ப⁴க³வா கேவலம் உத³கே ஓதரதி. தேனாஹ ‘‘க³த்தானி பரிஸிஞ்சிது’’ந்தி.
புப்³ப³கோட்ட²கோதி பாசீனகோட்ட²கோ. ஸாவத்தி²யம் கிர ஜேதவனவிஹாரோ கதா³சி மஹா, கதா³சி கு²த்³த³கோ. ததா² ஹி ஸோ விபஸ்ஸிஸ்ஸ ப⁴க³வதோ காலே யோஜனிகோ அஹோஸி, ஸிகி²ஸ்ஸ திகா³வுதோ, வேஸ்ஸபு⁴ஸ்ஸ அட்³ட⁴யோஜனிகோ, ககுஸந்த⁴ஸ்ஸ கா³வுதப்பமாணோ, கோணாக³மனஸ்ஸ அட்³ட⁴கா³வுதப்பமாணோ, கஸ்ஸபஸ்ஸ வீஸதிஉஸப⁴ப்பமாணோ, அம்ஹாகம் ப⁴க³வதோ காலே அட்ட²கரீஸப்பமாணோ ஜாதோ. தம்பி நக³ரம் தஸ்ஸ விஹாரஸ்ஸ கதா³சி பாசீனதோ ஹோதி, கதா³சி த³க்கி²ணதோ, கதா³சி பச்சி²மதோ, கதா³சி உத்தரதோ. ஜேதவனக³ந்த⁴குடியம் பன சதுன்னம் மஞ்சபாதா³னம் பதிட்டி²தட்டா²னம் அசலமேவ. சத்தாரி ஹி அசலசேதியட்டா²னானி நாம மஹாபோ³தி⁴பல்லங்கட்டா²னம், இஸிபதனே த⁴ம்மசக்கப்பவத்தனட்டா²னம், ஸங்கஸ்ஸனக³ரே தே³வோரோஹனகாலே ஸோபானஸ்ஸ பதிட்டா²னட்டா²னம், மஞ்சபாத³ட்டா²னந்தி. அயம் பன புப்³ப³கோட்ட²கோ கஸ்ஸபத³ஸப³லஸ்ஸ வீஸதிஉஸப⁴விஹாரகாலே பாசீனத்³வாரகோட்ட²கோ அஹோஸி. ஸோ இதா³னி ‘‘புப்³ப³கோட்ட²கோ’’த்வேவ பஞ்ஞாயதி.
கஸ்ஸபத³ஸப³லஸ்ஸ காலே அசிரவதீ நக³ரம் பரிக்கி²பித்வா ஸந்த³மானா புப்³ப³கோட்ட²கம் பத்வா உத³கேன பி⁴ந்தி³த்வா மஹந்தம் உத³கரஹத³ம் மாபேஸி ஸமதித்திகம் அனுபுப்³ப³க³ம்பீ⁴ரம். தத்த² ஏகம் ரஞ்ஞோ ந்ஹானதித்த²ம், ஏகம் நாக³ரானம், ஏகம் பி⁴க்கு²ஸங்க⁴ஸ்ஸ, ஏகம் பு³த்³தா⁴னந்தி ஏவம் பாடிஏக்கானி ந்ஹானதித்தா²னி ஹோந்தி ரமணீயானிவிப்பகிண்ணரஜதபட்டஸதி³ஸவாலுகானி. இதி ப⁴க³வதா ஆயஸ்மதா ஆனந்தே³ன ஸத்³தி⁴ம் யேன அயம் ஏவரூபோ புப்³ப³கோட்ட²கோ, தேனுபஸங்கமி க³த்தானி பரிஸிஞ்சிதும். அதா²யஸ்மா ஆனந்தோ³ உத³கஸாடிகம் உபனாமேஸி. ப⁴க³வா ஸுரத்தது³பட்டம் அபனேத்வா உத³கஸாடிகம் நிவாஸேஸி. தே²ரோ து³பட்டேன ஸத்³தி⁴ம் மஹாசீவரம் அத்தனோ ஹத்த²க³தம் அகாஸி. ப⁴க³வா உத³கம் ஓதரி, ஸஹோதரணேனேவஸ்ஸ உத³கே மச்ச²கச்ச²பா ஸப்³பே³ ஸுவண்ணவண்ணா அஹேஸும், யந்தனாளிகாஹி ஸுவண்ணரஸதா⁴ரானி ஸிஞ்சனகாலோ விய ஸுவண்ணபடப்பஸாரணகாலோ விய ச அஹோஸி. அத² ப⁴க³வதோ நஹானவத்தம் த³ஸ்ஸேத்வா பச்சுத்திண்ணஸ்ஸ தே²ரோ ஸுரத்தது³பட்டம் உபனாமேஸி. ப⁴க³வா தம் நிவாஸேத்வா விஜ்ஜுல்லதாஸதி³ஸம் காயப³ந்த⁴னம் ப³ந்தி⁴த்வா மஹாசீவரம் அந்தந்தேன ஸம்ஹரித்வா பது³மக³ப்³ப⁴ஸதி³ஸம் கத்வா உபனீதம் த்³வீஸு கண்ணேஸு க³ஹேத்வா அட்டா²ஸி. தேன வுத்தம் ‘‘புப்³ப³கோட்ட²கே க³த்தானி பரிஸிஞ்சித்வா ஏகசீவரோ அட்டா²ஸீ’’தி.
ஏவம் டி²தஸ்ஸ பன ப⁴க³வதோ ஸரீரம் விகஸிதபது³மபுப்ப²ஸதி³ஸம் ஸப்³ப³பாலிபு²ல்லம் பாரிச்ச²த்தகம், தாராமரீசிவிகஸிதஞ்ச க³க³னதலம் ஸிரியா அவஹஸமானம் விய விரோசித்த², ப்³யாமப்பபா⁴பரிக்கே²பவிலாஸினீ சஸ்ஸ த்³வத்திம்ஸவரலக்க²ணமாலா க³ந்தி²த்வா ட²பிதா த்³வத்திம்ஸ சந்தி³மா விய, த்³வத்திம்ஸ ஸூரியா விய, படிபாடியா ட²பிதத்³வத்திம்ஸசக்கவத்தித்³வத்திம்ஸதே³வராஜத்³வத்திம்ஸமஹாப்³ரஹ்மானோ விய ச அதிவிய விரோசித்த². யஸ்மா ச ப⁴க³வதோ ஸரீரம் ஸுத⁴ந்தசாமீகரஸமானவண்ணம், ஸுபரிஸோதி⁴தபவாளருசிரதோரணம், ஸுவிஸுத்³த⁴னீலரதனாவலிஸதி³ஸகேஸதனுருஹம், தஸ்மா தஹம் தஹம் வினிக்³க³தஸுஜாதஜாதிஹிங்கு³லகரஸூபஸோபி⁴தம் உபரி ஸதமேக⁴ரதனாவலிஸுச்சா²தி³தம் ஜங்க³மமிவ கனககி³ரிஸிக²ரம் விரோசித்த². தஸ்மிஞ்ச ஸமயே த³ஸப³லஸ்ஸ ஸரீரதோ நிக்க²மித்வா ச²ப்³ப³ண்ணரஸ்மியோ ஸமந்ததோ அஸீதிஹத்த²ப்பமாணே பதே³ஸே ஆதா⁴வந்தீ விதா⁴வந்தீ ரதனாவலிரதனதா³மரதனசுண்ணவிப்பகிண்ணம் விய பஸாரிதரதனசித்தகஞ்சனபட்டமிவ ஆஸிஞ்சமானலாகா²ரஸதா⁴ராசித்தமிவ உக்காஸதனிபாதஸமாகுலமிவ நிரந்தரவிப்பகிண்ணகணிகாரகிங்கிணிகபுப்ப²மிவ வாயுவேக³ஸமுத்³த⁴தசினபிட்ட²சுண்ணரஞ்ஜிதமிவ இந்த³த⁴னுவிஜ்ஜுல்லதாவிதானஸந்த²தமிவ ச க³க³னதலம், தம் டா²னம் பவனஞ்ச ஸம்மா ப²ரந்தி. வண்ணபூ⁴மி நாமேஸா. ஏவரூபேஸு டா²னேஸு பு³த்³தா⁴னம் ஸரீரவண்ணம் வா கு³ணவண்ணம் வா சுண்ணியபதே³ஹி வா கா³தா²ஹி வா அத்த²ஞ்ச உபமாயோ ச காரணானி ச ஆஹரித்வா படிப³லேன த⁴ம்மகதி²கேன பூரேத்வா கதே²தும் வட்டதி. ஏவரூபேஸு ஹி டா²னேஸு த⁴ம்மகதி²கஸ்ஸ தா²மோ வேதி³தப்³போ³. புப்³ப³ஸதி³ஸானி குருமானோதி நிருத³கானி குருமானோ, ஸுக்கா²பயமானோதி அத்தோ². ஸோத³கே க³த்தே சீவரம் பாருபந்தஸ்ஸ ஹி சீவரே கண்ணிகானி உட்ட²ஹந்தி, பரிக்கா²ரப⁴ண்ட³ம் து³ஸ்ஸதி, பு³த்³தா⁴னம் பன ஸரீரே ரஜோஜல்லம் ந உபலிம்பதி, பது³மபத்தே உக்கி²த்தஉத³கபி³ந்து³ விய உத³கம் வினிவட்டேத்வா க³ச்ச²தி. ஏவம் ஸந்தேபி ஸிக்கா²கா³ரவதாய ப⁴க³வா ‘‘பப்³ப³ஜிதவத்தம் நாமேத’’ந்தி மஹாசீவரம் உபோ⁴ஸு கண்ணேஸு க³ஹேத்வா புரதோ காயம் படிச்சா²தே³த்வா அட்டா²ஸி.
தாளிதஞ்ச வாதி³தஞ்ச தாளிதவாதி³தம், தூரியானம் தாளிதவாதி³தம் தூரியதாளிதவாதி³தம். மஹந்தஞ்ச தம் தூரியதாளிதவாதி³தஞ்சாதி மஹாதூரியதாளிதவாதி³தம். தேனாஹ ‘‘மஹந்தேனா’’திஆதி³. அத² வா பே⁴ரிமுதி³ங்க³பணவாதி³தூரியானம் தாளிதம் வீணாவேளுகோ³முகி²ஆதீ³னம் வாதி³தஞ்ச தூரியதாளிதவாதி³தந்தி வா ஏவமேத்த² அத்தோ² த³ட்ட²ப்³போ³.
அபி⁴ஞ்ஞாபாரம் க³தோதி அபி⁴ஞ்ஞாபாரகூ³. ஏவம் ஸேஸேஸுபி. ஸோ ஹி ப⁴க³வா ஸப்³ப³த⁴ம்மே அபி⁴ஜானந்தோ க³தோதி அபி⁴ஞ்ஞாபாரகூ³. தேஸு பஞ்சுபாதா³னக்க²ந்தே⁴ பரிஜானந்தோ க³தோதி பரிஞ்ஞாபாரகூ³. ஸப்³ப³கிலேஸே பஜஹந்தோ க³தோதி பஹானபாரகூ³. சத்தாரோ மக்³கே³ பா⁴வேந்தோ க³தோதி பா⁴வனாபாரகூ³. நிரோத⁴ம் ஸச்சி²கரோந்தோ க³தோதி ஸச்சி²கிரியாபாரகூ³. ஸப்³ப³ஸமாபத்திம் ஸமாபஜ்ஜந்தோ க³தோதி ஸமாபத்திபாரகூ³. ஸுப்³ரஹ்மதே³வபுத்தாத³யோதி ஏத்த² ஸோ கிர தே³வபுத்தோ அச்ச²ராஸங்க⁴பரிவுதோ நந்த³னகீளிதம் கத்வா பாரிச்ச²த்தகமூலே பஞ்ஞத்தாஸனே நிஸீதி³. தம் பஞ்சஸதா பரிவாரேத்வா நிஸின்னா, பஞ்சஸதா ருக்க²ம் அபி⁴ருஹித்வா மது⁴ரஸ்ஸரேன கா³யித்வா புப்பா²னி பாதேந்தி. தானி க³ஹேத்வா இதரா ஏகதோவண்டிகமாலாவ க³ந்தே²ந்தி. அத² ருக்க²ம் அபி⁴ருள்ஹா உபச்சே²த³கவஸேன ஏகப்பஹாரேனேவ காலம் கத்வா அவீசிம்ஹி நிப்³ப³த்தா மஹாது³க்க²ம் அனுப⁴வந்தி. அத² காலே க³ச்ச²ந்தே தே³வபுத்தோ ‘‘இமாஸம் நேவ ஸத்³தோ³ ஸுய்யதி, ந புப்பா²னி பாதேந்தி, கஹம் நு கோ² க³தா’’தி ஆவஜ்ஜேந்தோ நிரயே நிப்³ப³த்தபா⁴வம் தி³ஸ்வா பியவத்து²கஸோகேன ருப்பமானோ சிந்தேஸி – ‘‘ஏதா தாவ யதா²கம்மேன க³தா, மய்ஹம் ஆயுஸங்கா²ரோ கித்தகோ’’தி. ஸோ ‘‘ஸத்தமே தி³வஸே மயாபி அவஸேஸாஹி பஞ்சஸதாஹி ஸத்³தி⁴ம் காலம் கத்வா தத்தே²வ நிப்³ப³த்திதப்³ப³’’ந்தி தி³ஸ்வா ப³லவதரேன ஸோகேன ஸமப்பிதோ. ‘‘இமம் மய்ஹம் ஸோகம் ஸதே³வகே லோகே அஞ்ஞத்ர ததா²க³தா நிப்³பா³பேதும் ஸமத்தோ² நத்தீ²’’தி சிந்தேத்வா ஸத்து² ஸந்திகம் க³ந்த்வா வந்தி³த்வா ஏகமந்தம் டி²தோ –
‘‘நிச்சம் உத்ரஸ்தமித³ம் சித்தம், நிச்சம் உப்³பி³க்³க³மித³ம் மனோ;
அனுப்பன்னேஸு கிச்சே²ஸு, அதோ² உப்பதிதேஸு ச;
ஸசே அத்தி² அனுத்ரஸ்தம், தம் மே அக்கா²ஹி புச்சி²தோ’’தி. (ஸம். நி. 1.98) –
இமம் கா³த²மபா⁴ஸி. ப⁴க³வாபிஸ்ஸ –
‘‘நாஞ்ஞத்ர போ³ஜ்ஜா² தபஸா, நாஞ்ஞத்ரிந்த்³ரியஸம்வரா;
நாஞ்ஞத்ர ஸப்³ப³னிஸ்ஸக்³கா³, ஸோத்தி²ம் பஸ்ஸாமி பாணின’’ந்தி. (ஸம். நி. 1.98) –
த⁴ம்மம் தே³ஸேஸி. ஸோ தே³ஸனாபரியோஸானே விக³தஸோகோ பஞ்சஹி அச்ச²ராஸதேஹி ஸத்³தி⁴ம் ஸோதாபத்திப²லே பதிட்டா²ய ப⁴க³வந்தம் நமஸ்ஸமானோ அட்டா²ஸி. தம் ஸந்தா⁴யேதம் வுத்தம் ‘‘து³க்க²ப்பத்தா ஸுப்³ரஹ்மதே³வபுத்தாத³யோ’’தி. ஆதி³-ஸத்³தே³ன சந்த³ஸூரியதே³வபுத்தாத³யோ ஸங்க³ண்ஹாதி. சதூஹி காரணேஹீதி ஆரகத்தா, அரீனம் அரானஞ்ச ஹதத்தா, பச்சயாதீ³னம் அரஹத்தா, பாபகரணே ரஹாபா⁴வாதி இமேஹி சதூஹி காரணேஹி.
த³ஸவித⁴ஸம்யோஜனானீதி ஓரம்பா⁴கி³யுத்³த⁴ம்பா⁴கி³யபே⁴த³தோ த³ஸவித⁴ஸம்யோஜனானி. ஸப்³பே³ அச்சருசீதி ஸப்³ப³ஸத்தே அதிக்கமித்வா பவத்தருசி. அட்ட²மகந்தி ஸோதாபத்திமக்³க³ட்ட²ம் ஸந்தா⁴ய வத³தி. ஸோதாபன்னோதி ப²லட்டோ² க³ஹிதோ.
ஸோரச்சந்தி ‘‘தத்த² கதமம் ஸோரச்சம்? யோ காயிகோ அவீதிக்கமோ, வாசஸிகோ அவீதிக்கமோ, காயிகவாசஸிகோ அவீதிக்கமோ, இத³ம் வுச்சதி ஸோரச்சம், ஸப்³பா³பி ஸீலஸம்வரோ ஸோரச்ச’’ந்தி (த⁴. ஸ. 1349) வசனதோ ஸுசிஸீலம் ‘‘ஸோரச்ச’’ந்தி வுத்தம். கரூணாதி கருணாப்³ரஹ்மவிஹாரமாஹ. கருணாபுப்³ப³பா⁴கோ³தி தஸ்ஸ புப்³ப³பா⁴க³ம் உபசாரஜ்ஜா²னம் வத³தி.
து³விதே⁴ன ஜா²னேனாதி ஆரம்மணூபனிஜ்ஜா²னலக்க²ணூபனிஜ்ஜா²னபே⁴த³தோ து³விதே⁴ன ஜா²னமனேன. பஞ்சவித⁴மிச்சா²ஜீவவஸேனாதி குஹனாலபனானேமித்திகதானிப்பேஸிகதாலாபே⁴னலாப⁴ம்னிஜிகீ³ஸனதாஸங்கா²த- பஞ்சவித⁴மிச்சா²ஜீவவஸேன. ந லிப்பதீதி ந அல்லீயதி அனுஸயதோ ஆரம்மணகரணதோ வா தண்ஹாதி³ட்டி²அபி⁴னிவேஸாபா⁴வதோ. ஸேஸமேத்த² உத்தானமேவ.
நாக³ஸுத்தவண்ணனா நிட்டி²தா.
2. மிக³ஸாலாஸுத்தவண்ணனா
44. து³தியே ஸமஸமக³தியாதி க-காரஸ்ஸ ய-காரவஸேன நித்³தே³ஸோதி ஆஹ ‘‘ஸமபா⁴வேனேவ ஸமக³திகா’’தி. ப⁴விஸ்ஸந்தீதி அதீதத்தே² அனாக³தவசனம் கதந்தி ஆஹ ‘‘ப⁴விஸ்ஸந்தீதி ஜாதா’’தி. புராணஸ்ஸ ஹி இஸித³த்தஸ்ஸ ச ஸமக³திகம் ஸந்தா⁴ய ஸா ஏவமாஹ.
அம்மகாதி மாதுகா³மோ. உபசாரவசனஞ்ஹேதம். இத்தீ²ஸு யதி³த³ம் அம்மகா மாதுகா³மோ ஜனனீ ஜனிகாதி. தேனாஹ ‘‘இத்தீ² ஹுத்வா இத்தி²ஸஞ்ஞாய ஏவ ஸமன்னாக³தா’’தி.
தி³ட்டி²யா படிவிஜ்ஜி²தப்³ப³ம் அப்படிவித்³த⁴ம் ஹோதீதி அத்த²தோ காரணதோ ச பஞ்ஞாய படிவிஜ்ஜி²தப்³ப³ம் அப்படிவித்³த⁴ம் ஹோதி, நிஜ்ஜடம் நிக்³கு³ம்ப³ம் கத்வா யாதா²வதோ அவிதி³தம் ஹோதி. ஸமயே ஸமயே கிலேஸேஹி விமுச்சனகம் பீதிபாமோஜ்ஜம் இத⁴ ஸாமாயிகம் ம-காரே அகாரஸ்ஸ தீ³க⁴ம் கத்வா. தேனாஹ – ‘‘ஸாமாயிகம்பி விமுத்திம் ந லப⁴தீதி காலானுகாலம் த⁴ம்மஸ்ஸவனம் நிஸ்ஸாய பீதிபாமோஜ்ஜம் ந லப⁴தீ’’தி. பமிணந்தீதி ஏத்த² ஆரம்ப⁴த்தோ² ப-ஸத்³தோ³தி ஆஹ ‘‘துலேதும் ஆரப⁴ந்தீ’’தி. பணீதோதி விஸிட்டோ².
தத³ந்தரந்தி வசனவிபல்லாஸேன உபயோக³த்தே² ஸாமிவசனம் கதந்தி ஆஹ ‘‘தம் அந்தரம் தம் காரண’’ந்தி. லோப⁴ஸ்ஸ அபராபருப்பத்தியா ப³ஹுவசனவஸேன ‘‘லோப⁴த⁴ம்மா’’தி வுத்தா. ஸீலேன விஸேஸீ அஹோஸி மேது²னத⁴ம்மவிரதியா ஸமன்னாக³தத்தா.
மிக³ஸாலாஸுத்தவண்ணனா நிட்டி²தா.
3-6. இணஸுத்தாதி³வண்ணனா
45-48. ததியே த³லித்³தோ³ நாம து³க்³க³தோ, தஸ்ஸ பா⁴வோ தா³லித்³தி³யம். ந ஏதஸ்ஸ ஸகம் ஸாபதேய்யந்தி அஸ்ஸகோ, அஸாபதேய்யோ. தேனாஹ ‘‘அத்தனோ ஸந்தகேன ரஹிதோ’’தி. ‘‘பு³த்³தோ⁴ த⁴ம்மோ ஸங்கோ⁴’’தி வுத்தே ‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி கேனசி அகம்பியபா⁴வேன ஓகப்பனம் ரதனத்தயகு³ணே ஓகா³ஹேத்வா கப்பனம் ஓகப்பனஸத்³தா⁴ நாம. ‘‘இத³ம் அகுஸலம் கம்மம் நோ ஸகம், இத³ம் பன கம்மம் ஸக’’ந்தி ஏவம் ப்³யதிரேகதோ அன்வயதோ ச கம்மஸ்ஸகதஜானனபஞ்ஞா கம்மஸ்ஸகதபஞ்ஞா. திவித⁴ஞ்ஹி து³ச்சரிதம் அத்தனா கதம்பி ஸககம்மம் நாம ந ஹோதி அத்த²ப⁴ஞ்ஜனதோ. ஸுசரிதம் ஸககம்மம் நாம அத்த²ஜனனதோ. இணாதா³னஸ்மிந்தி பச்சத்தவசனத்தே² ஏதம் பு⁴ம்மந்தி ஆஹ ‘‘இணக்³க³ஹணம் வதா³மீ’’தி.
கடக்³கா³ஹோதி கதம் ஸப்³ப³ஸோ ஸித்³த⁴மேவ கத்வா க³ஹணம். ஸோ பன விஜயலாபோ⁴ ஹோதீதி ஆஹ ‘‘ஜயக்³கா³ஹோ’’தி. ஹிரிமனோ ஏதஸ்ஸாதி ஹிரிமனோதி ஆஹ ‘‘ஹிரிஸம்பயுத்தசித்தோ’’தி, பாபஜிகு³ச்ச²னலக்க²ணாய ஹிரியா ஸம்பயுத்தசித்தோதி அத்தோ². ஓத்தப்பதி உப்³பி³ஜ்ஜதி பா⁴யதி ஸீலேனாதி ஓத்தப்பீ, ஓத்தப்பேன ஸமன்னாக³தோ. நிராமிஸம் ஸுக²ந்தி ததியஜ்ஜா²னஸுக²ம் தூ³ரஸமுஸ்ஸாரிதகாமாமிஸத்தா. உபேக்க²ந்தி சதுத்த²ஜ்ஜா²னுபேக்க²ம், ந யம் கிஞ்சி உபேக்கா²வேத³னந்தி ஆஹ ‘‘சதுத்த²ஜ்ஜா²னுபேக்க²’’ந்தி. ஆரத்³த⁴வீரியோதி பக்³க³ஹிதபரிபுண்ணகாயிகசேதஸிகவீரியோதி அத்தோ². யோ க³ணஸங்க³ணிகம் வினோதே³த்வா சதூஸு இரியாபதே²ஸு அட்ட²ஆரம்ப⁴வத்து²வஸேன ஏககோ ஹோதி, தஸ்ஸ காயிகம் வீரியம் ஆரத்³த⁴ம் நாம ஹோதி. சித்தஸங்க³ணிகம் வினோதே³த்வா அட்ட²ஸமாபத்திவஸேன ஏககோ ஹோதி. க³மனே உப்பன்னகிலேஸஸ்ஸ டா²னம் பாபுணிதும் ந தே³தி, டா²னே உப்பன்னகிலேஸஸ்ஸ நிஸஜ்ஜம், நிஸஜ்ஜாய உப்பன்னகிலேஸஸ்ஸ ஸயனம் பாபுணிதும் ந தே³தி, உப்பன்னட்டா²னேயேவ கிலேஸே நிக்³க³ண்ஹாதி. அயம் சேதஸிகம் வீரியம் ஆரத்³த⁴ம் நாம ஹோதி. படிபக்க²தூ³ரீபா⁴வேன ஸேட்ட²ட்டே²ன ச ஏகோ உதே³தீதி ஏகோதி³, ஏகக்³க³தா. தஸ்ஸ யோக³தோ ஏகக்³க³சித்தோ இத⁴ ஏகோதி³. படிபக்க²தோ அத்தானம் நிபாதி, தம் வா நிபயதி விஸோஸேதீதி நிபகோ. அஞ்ஞதரம் காயாதி³பே⁴த³ம் ஆரம்மணம் ஸாதிஸயாய ஸதியா ஸரதீதி ஸதோ. தேனாஹ ‘‘ஏகக்³க³சித்தோ’’திஆதி³.
அகுப்பா மே விமுத்தீதி மய்ஹம் அரஹத்தப²லவிமுத்தி அகுப்பதாய அகுப்பாரம்மணதாய ச அகுப்பா. ஸா ஹி ராகா³தீ³ஹி ந குப்பதீதி அகுப்பதாயபி அகுப்பா. அகுப்பம் நிப்³பா³னமஸ்ஸா ஆரம்மணந்தி அகுப்பாரம்மணதாயபி அகுப்பா. தேனேவாஹ ‘‘அகுப்பாரம்மணத்தா’’திஆதி³. ப⁴வஸம்யோஜனானந்தி காமராக³படிக⁴மானதி³ட்டி²விசிகிச்சா²ஸீலப்³ப³தபராமாஸப⁴வராக³இஸ்ஸாமச்ச²ரிய- அவிஜ்ஜாஸங்கா²தானம் த³ஸன்னம் ஸம்யோஜனானம். இமானி ஹி ஸத்தே ப⁴வேஸு ஸம்யோஜேந்தி உபனிப³ந்த⁴ந்தி ப⁴வாப⁴வேன ஸம்யோஜேந்தி, தஸ்மா ப⁴வஸம்யோஜனானீதி வுச்சந்தி. கீ²ணாஸவோ உத்தமஅணணோ கிலேஸஇணானம் அபா⁴வதோ. அஞ்ஞே ஹி ஸத்தா யாவ ந கிலேஸா பஹீயந்தி, தாவ ஸஇணா நாம அஸேரிவிஹாரபா⁴வதோ. சதுத்தா²தீ³னி உத்தானத்தா²னி.
இணஸுத்தாதி³வண்ணனா நிட்டி²தா.
7. கே²மஸுத்தவண்ணனா
49. ஸத்தமே வுத்த²ப்³ரஹ்மசரியவாஸோதி நிவுத்த²ப்³ரஹ்மசரியவாஸோ. கதகரணீயோதி ஏத்த² கரணீயந்தி பரிஞ்ஞாபஹானபா⁴வனாஸச்சி²கிரியமாஹ. தம் பன யஸ்மா சதூஹி மக்³கே³ஹி பச்சேகம் சதூஸு ஸச்சேஸு கத்தப்³ப³த்தா ஸோளஸவித⁴ம் வேதி³தப்³ப³ம். தேனாஹ ‘‘சதூஹி மக்³கே³ஹி கத்தப்³ப³’’ந்தி. க²ந்த⁴கிலேஸஅபி⁴ஸங்கா²ரஸங்கா²தா தயோ ஓஸீதா³பனட்டே²ன பா⁴ரா வியாதி பா⁴ரா. தே ஓஹிதா ஓரோபிதா நிக்கி²த்தா பாதிதா ஏதேனாதி ஓஹிதபா⁴ரோ. தேனாஹ ‘‘க²ந்த⁴பா⁴ரம்…பே… ஓதாரேத்வா டி²தோ’’தி. அனுப்பத்தோ ஸத³த்த²ந்தி அனுப்பத்தஸத³த்தோ². ஸத³த்தோ²தி ச ஸகத்த²மாஹ க-காரஸ்ஸ த³-காரம் கத்வா. ஏத்த² ஹி அரஹத்தம் அத்தனோ யோனிஸோமனஸிகாராயத்தத்தா அத்தூபனிப³ந்த⁴ட்டே²ன ஸஸந்தானபரியாபன்னத்தா அத்தானம் அவிஜஹனட்டே²ன அத்தனோ உத்தமத்தே²ன ச அத்தனோ அத்த²த்தா ‘‘ஸகத்தோ²’’தி வுச்சதி. தேனாஹ ‘‘ஸத³த்தோ² வுச்சதி அரஹத்த’’ந்தி. ஸம்மத³ஞ்ஞா விமுத்தோதி ஸம்மா அஞ்ஞாய விமுத்தோ, அச்சி²ன்னபூ⁴தாய மக்³க³பஞ்ஞாய ஸம்மா யதா²பூ⁴தம் து³க்கா²தீ³ஸு யோ யதா² ஜானிதப்³போ³, ததா² ஜானித்வா விமுத்தோதி அத்தோ². தேனாஹ ‘‘ஸம்மா ஹேதுனா’’திஆதி³. விமுத்தோதி ச த்³வே விமுத்தியோ ஸப்³ப³ஸ்ஸ சித்தஸம்கிலேஸஸ்ஸ மக்³கோ³ நிப்³பா³னாதி⁴முத்தி ச. நிப்³பா³னே அதி⁴முச்சனம் தத்த² நின்னபோணபப்³பா⁴ரதாய. அரஹா ஸப்³ப³கிலேஸேஹி விமுத்தசித்தத்தா சித்தவிமுத்தியா விமுத்தோ. நிப்³பா³னம் அதி⁴முத்தத்தா நிப்³பா³னே விமுத்தோ. ஸேஸமேத்த² உத்தானமேவ.
கே²மஸுத்தவண்ணனா நிட்டி²தா.
8. இந்த்³ரியஸம்வரஸுத்தவண்ணனா
50. அட்ட²மே உபனிஸீத³தி ப²லம் ஏத்தா²தி காரணம் உபனிஸா. யதா²பூ⁴தஞாணத³ஸ்ஸனந்தி யதா²ஸபா⁴வஜானனஸங்கா²தம் த³ஸ்ஸனம். ஏதேன தருணவிபஸ்ஸனம் த³ஸ்ஸேதி. தருணவிபஸ்ஸனா ஹி ப³லவவிபஸ்ஸனாய பச்சயோ ஹோதி. தருணவிபஸ்ஸனாதி நாமரூபபரிக்³க³ஹே ஞாணம், பச்சயபரிக்³க³ஹே ஞாணம், ஸம்மஸனே ஞாணம், மக்³கா³மக்³கே³ வவத்த²பேத்வா டி²தஞாணந்தி சதுன்னம் ஞாணானம் அதி⁴வசனம். நிப்³பி³ந்த³தி ஏதாயாதி நிப்³பி³தா³. ப³லவவிபஸ்ஸனாதி ப⁴யதுபட்டா²னே ஞாணம் ஆதீ³னவானுபஸ்ஸனே ஞாணம் முச்சிதுகம்யதாஞாணம் ஸங்கா²ருபேக்கா²ஞாணந்தி சதுன்னம் ஞாணானம் அதி⁴வசனம். படிஸங்கா²னுபஸ்ஸனா பன முச்சிதுகம்யதாபக்கி²கா ஏவ. ‘‘யாவ மக்³கா³மக்³க³ஞாணத³ஸ்ஸனவிஸுத்³தி⁴, தாவ தருணவிபஸ்ஸனா’’தி ஹி வசனதோ உபக்கிலேஸவிமுத்தஉத³யப்³ப³யஞாணதோ ப³லவவிபஸ்ஸனா. விரஜ்ஜதி அரியோ ஸங்கா²ரதோ ஏதேனாதி விராகோ³, அரியமக்³கோ³. அரஹத்தப²லந்தி உக்கட்ட²னித்³தே³ஸதோ வுத்தம். இந்த்³ரியஸம்வரஸ்ஸ ஸீலரக்க²ணஹேதுத்தா வுத்தம் ‘‘ஸீலானுரக்க²ணஇந்த்³ரியஸம்வரோ கதி²தோ’’தி.
இந்த்³ரியஸம்வரஸுத்தவண்ணனா நிட்டி²தா.
9. ஆனந்த³ஸுத்தவண்ணனா
51. நவமே தே²ரா பி⁴க்கூ² விஹரந்தி ப³ஹுஸ்ஸுதா ஆக³தாக³மாதிஆதி³பாளிபதே³ஸு இமினாவ நயேன அத்தோ² த³ட்ட²ப்³போ³ – ஸீலாதி³கு³ணானம் தி²ரபா⁴வப்பத்தியா தே²ரா. ஸுத்தகே³ய்யாதி³ ப³ஹு ஸுதம் ஏதேஸந்தி ப³ஹுஸ்ஸுதா. வாசுக்³க³ததா⁴ரணேன ஸம்மதே³வ க³ரூனம் ஸந்திகே ஆக³மிதபா⁴வேன ஆக³தோ பரியத்தித⁴ம்மஸங்கா²தோ ஆக³மோ ஏதேஸந்தி ஆக³தாக³மா. ஸுத்தாதித⁴ம்மஸங்கா²தஸ்ஸ த⁴ம்மஸ்ஸ தா⁴ரணேன த⁴ம்மத⁴ரா. வினயதா⁴ரணேன வினயத⁴ரா. தேஸம்யேவ த⁴ம்மவினயானம் மாதிகாய தா⁴ரணேன மாதிகாத⁴ரா. தத்த² தத்த² த⁴ம்மபரிபுச்சா²ய பரிபுச்ச²தி. தம் அத்த²பரிபுச்சா²ய பரிபஞ்ஹதி வீமம்ஸதி விசாரேதி. இத³ம், ப⁴ந்தே, கத²ம், இமஸ்ஸ க்வத்தோ²தி பரிபுச்ச²னபஞ்ஹனாகாரத³ஸ்ஸனம். ஆவிவடஞ்சேவ பாளியா அத்த²ம் பதே³ஸந்தரபாளித³ஸ்ஸனேன ஆக³மதோ விவரந்தி. அனுத்தானீகதஞ்ச யுத்திவிபா⁴வனேன உத்தானீகரோந்தி. கங்கா²ட்டா²னியேஸு த⁴ம்மேஸு ஸம்ஸயுப்பத்தியா ஹேதுயா க³ண்டி²ட்டா²னபூ⁴தேஸு பாளிபதே³ஸு யாதா²வதோ வினிச்ச²யதா³னேன கங்க²ம் படிவினோதே³ந்தி.
ஆனந்த³ஸுத்தவண்ணனா நிட்டி²தா.
10. க²த்தியஸுத்தவண்ணனா
52. த³ஸமே போ⁴கே³ அதி⁴ப்பாயோ ஏதேஸந்தி போ⁴கா³தி⁴ப்பாயா. பஞ்ஞத்தா²ய ஏதேஸம் மனோ உபவிசரதீதி பஞ்ஞூபவிசாரா. பத²வியா தா³யத்தா²ய வா சித்தம் அபி⁴னிவேஸோ ஏதேஸந்தி பத²வீபி⁴னிவேஸா. மந்தா அதி⁴ட்டா²னம் பதிட்டா² ஏதேஸந்தி மந்தாதி⁴ட்டா²னா. இமினா நயேன ஸேஸபதா³னிபி வேதி³தப்³பா³னி. ஸேஸம் உத்தானமேவ.
க²த்தியஸுத்தவண்ணனா நிட்டி²தா.
11. அப்பமாத³ஸுத்தவண்ணனா
53. ஏகாத³ஸமே ஜங்க³லானந்தி ஏத்த² யோ நிபிச்ச²லோ ந அனூபோ நிருத³கதாய த²த்³த⁴லூகோ² பூ⁴மிப்பதே³ஸோ, ஸோ ‘‘ஜங்க³லோ’’தி வுச்சதி. தப்³ப³ஹுலதாய பன இத⁴ ஸப்³போ³ பூ⁴மிப்பதே³ஸோ ஜங்க³லோ. தஸ்மிம் ஜங்க³லே ஜாதா ப⁴வாதி வா ஜங்க³லா, தேஸம் ஜங்க³லானம். ஏவஞ்ஹி நதி³சரானம்பி ஹத்தீ²னம் ஸங்க³ஹோ கதோ ஹோதி ஸமோதா⁴தப்³பா³னம் விய ஸமோதா⁴யகானம்பி இத⁴ ஜங்க³லக்³க³ஹணேன க³ஹேதப்³ப³தோ. பத²வீதலசாரீனந்தி இமினா ஜலசாரினோ ச நிவத்தேதி அதி³ஸ்ஸமானபாத³த்தா. ‘‘பாணான’’ந்தி ஸாதா⁴ரணவசனம்பி ‘‘பத³ஜாதானீ’’தி ஸத்³த³ந்தரஸன்னிதா⁴னேன விஸேஸனிவிட்ட²மேவ ஹோதீதி ஆஹ ‘‘ஸபாத³கபாணான’’ந்தி. ‘‘முத்தக³த’’ந்திஆதீ³ஸு (ம. நி. 2.119; அ. நி. 9.11) க³த-ஸத்³தோ³ விய இத⁴ ஜாத-ஸத்³தோ³ அனத்த²ந்தரோதி ஆஹ ‘‘பத³ஜாதானீதி பதா³னீ’’தி. ஸமோதா⁴னந்தி ஸமவரோத⁴ம், அந்தோக³த⁴ம் வா. தேனாஹ ‘‘ஓதா⁴னம் உபனிக்கே²பம் க³ச்ச²ந்தீ’’தி. கூடங்க³மாதி பாரிமந்தேன கூடம் உபக³ச்ச²ந்தி. கூடனின்னாதி கூடச்சி²த்³த³மக்³கே³ பவிஸனவஸேன கூடே நின்னா. கூடஸமோஸரணாதி சி²த்³தே³ அனுபவிஸனவஸேன ச ஆஹச்ச அவத்தா²னேன ச கூடே ஸமோத³ஹித்வா டி²தா. வண்டே பதமானே ஸப்³பா³னி பூ⁴மியம் பதந்தீதி ஆஹ ‘‘வண்டானுவத்தகானி ப⁴வந்தீ’’தி.
அப்பமாத³ஸுத்தவண்ணனா நிட்டி²தா.
12. த⁴ம்மிகஸுத்தவண்ணனா
54. த்³வாத³ஸமே ஜாதிபூ⁴மியந்தி ஏத்த² ஜனனம் ஜாதி, ஜாதியா பூ⁴மி ஜாதிபூ⁴மி, ஜாதட்டா²னம். தம் கோ² பனேதம் நேவ கோஸலமஹாராஜாதீ³னம், ந சங்கிப்³ராஹ்மணாதீ³னம், ந ஸக்கஸுயாமஸந்துஸிதாதீ³னம், ந அஸீதிமஹாஸாவகானம், ந அஞ்ஞேஸம் ஸத்தானம் ‘‘ஜாதிபூ⁴மீ’’தி வுச்சதி. யஸ்ஸ பன ஜாததி³வஸே த³ஸஸஹஸ்ஸீ லோகதா⁴து ஏகத்³த⁴ஜமாலாவிப்பகிண்ணகுஸுமவாஸசுண்ணக³ணஸுக³ந்தா⁴ ஸப்³ப³பாலிபு²ல்லமிவ நந்த³னவனம் விரோசமானா பது³மினிபண்ணே உத³கபி³ந்து³ விய அகம்பித்த², ஜச்சந்தா⁴தீ³னஞ்ச ரூபத³ஸ்ஸனாதீ³னி அனேகானி பாடிஹாரியானி பவத்திம்ஸு. தஸ்ஸ ஸப்³ப³ஞ்ஞுபோ³தி⁴ஸத்தஸ்ஸ ஜாதட்டா²னம், ஸாதிஸயஸ்ஸ பன ஜனககபிலவத்து²ஸன்னிஸ்ஸயோ ‘‘ஜாதிபூ⁴மீ’’தி வுச்சதி. ஜாதிபூ⁴மகா உபாஸகாதி ஜாதிபூ⁴மிவாஸினோ உபாஸகா. ஸந்தனேத்வா ஸப்³ப³ஸோ தனேத்வா பத்த²ரித்வா டி²தமூலானி மூலஸந்தானகானி. தானி பன அத்த²தோ மூலானியேவாதி ஆஹ ‘‘மூலஸந்தானகானந்தி மூலான’’ந்தி.
ஜாததி³வஸே ஆவுதா⁴னம் ஜோதிதத்தா, ரஞ்ஞோ அபரிமிதஸ்ஸ ச ஸத்தகாயஸ்ஸ அனத்த²தோ பரிபாலனஸமத்த²தாய ச ‘‘ஜோதிபாலோ’’தி லத்³த⁴னாமத்தா வுத்தம் ‘‘நாமேன ஜோதிபாலோ’’தி. கோ³விந்தோ³தி கோ³விந்தி³யாபி⁴ஸேகேன அபி⁴ஸித்தோ, கோ³விந்த³ஸ்ஸ டா²னே ட²பனாபி⁴ஸேகேன அபி⁴ஸித்தோதி அத்தோ². தம் கிர தஸ்ஸ ப்³ராஹ்மணஸ்ஸ குலபரம்பராக³தம் டா²னந்தரம். தேனாஹ ‘‘டா²னேன மஹாகோ³விந்தோ³’’தி. க³வம் பஞ்ஞஞ்ச விந்த³தி படிலப⁴தீதி கோ³விந்தோ³, மஹந்தோ கோ³விந்தோ³தி மஹாகோ³விந்தோ³. கோ³தி ஹி பஞ்ஞாயேதம் அதி⁴வசனம் ‘‘க³ச்ச²தி அத்தே² பு³ஜ்ஜ²தீ’’தி கத்வா. மஹாகோ³விந்தோ³ ச அம்ஹாகம் போ³தி⁴ஸத்தோயேவ. ஸோ கிர தி³ஸம்பதிஸ்ஸ நாம ரஞ்ஞோ புரோஹிதஸ்ஸ கோ³விந்த³ப்³ராஹ்மணஸ்ஸ புத்தோ ஹுத்வா அத்தனோ பிதுஸ்ஸ ச ரஞ்ஞோ ச அச்சயேன தஸ்ஸ புத்தோ ரேணு, ஸஹாயா சஸ்ஸ ஸத்தபூ⁴, ப்³ரஹ்மத³த்தோ, வேஸ்ஸபூ⁴, ப⁴ரதோ, த்³வே த⁴தரட்டா²தி இமே ஸத்த ராஜானோ யதா² அஞ்ஞமஞ்ஞம் ந விவத³ந்தி. ஏவம் ரஜ்ஜே பதிட்டா²பேத்வா தேஸம் அத்த²த⁴ம்மே அனுஸாஸந்தே ஜம்பு³தீ³பதலே ஸப்³பே³ஸம் ராஜாவ ரஞ்ஞம், ப்³ரஹ்மாவ ப்³ராஹ்மணானம், தே³வோவ க³ஹபதிகானம் ஸக்கதோ க³ருகதோ மானிதோ பூஜிதோ அபசிதோ உத்தமகா³ரவட்டா²னம் அஹோஸி. தேன வுத்தம் ‘‘ரேணுஆதீ³னம் ஸத்தன்னம் ராஜூனம் புரோஹிதோ’’தி. இமேவ ஸத்த பா⁴ரதா⁴ரா மஹாராஜானோ. வுத்தஞ்ஹேதம் –
‘‘ஸத்தபூ⁴ ப்³ரஹ்மத³த்தோ ச, வேஸ்ஸபூ⁴ ப⁴ரதோ ஸஹ;
ரேணு த்³வே ச த⁴தரட்டா², ததா³ஸும் ஸத்த பா⁴ரதா⁴’’தி. (தீ³. நி. அட்ட². 2.308);
ரஞ்ஞோ தி³ட்ட²த⁴ம்மிகஸம்பராயிகத்தா²னம் புரோ விதா⁴னதோ புரே ஸம்விதா⁴னதோ புரோஹிதோ. கோதா⁴மக³ந்தே⁴னாதி கோத⁴ஸங்கா²தேன பூதிக³ந்தே⁴ன. கருணா அஸ்ஸ அத்தீ²தி கருணந்தி ஸபுப்³ப³பா⁴க³கருணஜ்ஜா²னம் வுத்தந்தி ஆஹ ‘‘கருணாய ச கருணாபுப்³ப³பா⁴கே³ ச டி²தா’’தி. யகாரோ ஸந்தி⁴வஸேன ஆக³தோதி ஆஹ ‘‘யேதேதி ஏதே’’தி. அரஹத்ததோ பட்டா²ய ஸத்தமோதி ஸகதா³கா³மீ. ஸகதா³கா³மிம் உபாதா³யாதி ஸகதா³கா³மிபா⁴வம் படிச்ச. ஸகதா³கா³மிஸ்ஸ ஹி பஞ்சிந்த்³ரியானி ஸகதா³கா³மிபா⁴வம் படிச்ச முதூ³னி நாம ஹோந்தி. ஸேஸமேத்த² ஸுவிஞ்ஞேய்யமேவ.
த⁴ம்மிகஸுத்தவண்ணனா நிட்டி²தா.
த⁴ம்மிகவக்³க³வண்ணனா நிட்டி²தா.
பட²மபண்ணாஸகம் நிட்டி²தம்.