6. மஹாவக்³கோ³

1. ஸோணஸுத்தவண்ணனா

55. ச²ட்ட²ஸ்ஸ பட²மே நிஸீதி³ ப⁴க³வா பஞ்ஞத்தே ஆஸனேதி ஏத்த² கிம் தம் ஆஸனம் பட²மமேவ பஞ்ஞத்தம், உதா³ஹு ப⁴க³வந்தம் தி³ஸ்வா பஞ்ஞத்தந்தி சே? ப⁴க³வதோ த⁴ரமானகாலே பதா⁴னிகபி⁴க்கூ²னம் வத்தமேதம், யதி³த³ம் அத்தனோ வஸனட்டா²னே பு³த்³தா⁴ஸனம் பஞ்ஞபேத்வாவ நிஸீத³னந்தி த³ஸ்ஸேந்தோ ஆஹ ‘‘பதா⁴னிகபி⁴க்கூ²’’திஆதி³. பு³த்³த⁴காலே கிர யத்த² யத்த² ஏகோபி பி⁴க்கு² விஹரதி, ஸப்³ப³த்த² பு³த்³தா⁴ஸனம் பஞ்ஞத்தமேவ ஹோதி. கஸ்மா? ப⁴க³வா ஹி அத்தனோ ஸந்திகே கம்மட்டா²னம் க³ஹேத்வா பா²ஸுகட்டா²னே விஹரந்தே மனஸி கரோதி – ‘‘அஸுகோ மய்ஹம் ஸந்திகே கம்மட்டா²னம் க³ஹேத்வா க³தோ, அஸக்கி² நு கோ² விஸேஸம் நிப்³ப³த்தேதும், நோ’’தி. அத² நம் பஸ்ஸதி கம்மட்டா²னம் விஸ்ஸஜ்ஜேத்வா அகுஸலவிதக்கம் விதக்கயமானம், ததோ ‘‘கத²ஞ்ஹி நாம மாதி³ஸஸ்ஸ ஸத்து² ஸந்திகே கம்மட்டா²னம் க³ஹேத்வா விஹரந்தம் இமம் குலபுத்தம் அகுஸலவிதக்கா அதி⁴ப⁴வித்வா அனமதக்³கே³ வட்டது³க்கே² ஸம்ஸாரேஸ்ஸந்தீ’’தி தஸ்ஸ அனுக்³க³ஹத்த²ம் தத்தே²வ அத்தானம் த³ஸ்ஸேத்வா தம் குலபுத்தம் ஓவதி³த்வா ஆகாஸம் உப்பதித்வா புன அத்தனோ வஸனட்டா²னமேவ க³ச்ச²தி. அதே²வம் ஓவதி³யமானா தே பி⁴க்கூ² சிந்தயிம்ஸு ‘‘ஸத்தா² அம்ஹாகம் மனம் ஜானித்வா ஆக³ந்த்வா அம்ஹாகம் ஸமீபே டி²தம்யேவ அத்தானம் த³ஸ்ஸேதி. தஸ்மிம் க²ணே, ‘ப⁴ந்தே, இத⁴ நிஸீத³த² நிஸீத³தா²’தி ஆஸனபரியேஸனம் நாம பா⁴ரோ’’தி. தே ஆஸனம் பஞ்ஞபேத்வாவ விஹரந்தி. யஸ்ஸ பீட²ம் அத்தி², ஸோ தம் பஞ்ஞபேதி. யஸ்ஸ நத்தி², ஸோ மஞ்சம் வா ப²லகம் வா பாஸாணம் வா வாலிகாபுஞ்ஜம் வா பஞ்ஞபேதி. தம் அலப⁴மானா புராணபண்ணானிபி ஸம்கட்³டி⁴த்வா தத்த² பம்ஸுகூலம் பத்த²ரித்வா ட²பேந்தி.

ஸத்த ஸராதி – ச²ஜ்ஜோ, உஸபோ⁴, க³ந்தா⁴ரோ, மஜ்ஜி²மோ, பஞ்சமோ, தே⁴வதோ, நிஸாதோ³தி ஏதே ஸத்த ஸரா. தயோ கா³மாதி – ச²ஜ்ஜகா³மோ, மஜ்ஜி²மகா³மோ, ஸாதா⁴ரணகா³மோதி தயோ கா³மா, ஸமூஹாதி அத்தோ². மனுஸ்ஸலோகே வீணாவாத³னா ஏகேகஸ்ஸ ஸரஸ்ஸ வஸேன தயோ தயோ முச்ச²னாதி கத்வா ஏகவீஸதி முச்ச²னா. தே³வலோகே வீணாவாத³னா பன ஸமபஞ்ஞாஸ முச்ச²னாதி வத³ந்தி. தத்த² ஹி ஏகேகஸ்ஸ ஸரஸ்ஸ வஸேன ஸத்த ஸத்த முச்ச²னா, அந்தரஸ்ஸ ஸரஸ்ஸ ச ஏகாதி ஸமபஞ்ஞாஸ முச்ச²னா. தேனேவ ஸக்கபஞ்ஹஸுத்தஸம்வண்ணனாயம் (தீ³. நி. அட்ட². 2.345) ‘‘ஸமபஞ்ஞாஸ முச்ச²னா முச்சே²த்வா’’தி பஞ்சஸிக²ஸ்ஸ வீணாவாத³னம் த³ஸ்ஸேந்தேன வுத்தம். டா²னா ஏகூனபஞ்ஞாஸாதி ஏகேகஸ்ஸேவ ஸரஸ்ஸ ஸத்த ஸத்த டா²னபே⁴தா³, யதோ ஸரஸ்ஸ மண்ட³லதாவவத்தா²னம் ஹோதி. ஏகூனபஞ்ஞாஸட்டா²னவிஸேஸோ திஸ்ஸோ து³வே சதஸ்ஸோ சதஸ்ஸோ திஸ்ஸோ து³வே சதஸ்ஸோதி த்³வாவீஸதி ஸுதிபே⁴தா³ ச இச்சி²தா.

அதிகா³ள்ஹம் ஆரத்³த⁴ந்தி தி²னமித்³த⁴ச²ம்பி⁴தத்தானம் வூபஸமத்த²ம் அதிவிய ஆரத்³த⁴ம். ஸப்³ப³த்த² நியுத்தா ஸப்³ப³த்தி²கா. ஸப்³பே³ன வா லீனுத்³த⁴ச்சபக்கி²யேன அத்தே²தப்³பா³ ஸப்³ப³த்தி²கா. ஸமதோ²யேவ ஸமத²னிமித்தம். ஏவம் ஸேஸேஸுபி. க²யா ராக³ஸ்ஸ வீதராக³த்தாதி ஏத்த² யஸ்மா பா³ஹிரகோ காமேஸு வீதராகோ³ ந க²யா ராக³ஸ்ஸ வீதராகோ³ ஸப்³ப³ஸோ அவிப்பஹீனராக³த்தா. விக்க²ம்பி⁴தராகோ³ ஹி ஸோ. அரஹா பன க²யா ஏவ, தஸ்மா வுத்தம் ‘‘க²யா ராக³ஸ்ஸ வீதராக³த்தா’’தி. ஏஸ நயோ தோ³ஸமோஹேஸுபி.

லாப⁴ஸக்காரஸிலோகம் நிகாமயமானோதி ஏத்த² லப்³ப⁴தி பாபுணீயதீதி லாபோ⁴, சதுன்னம் பச்சயானமேதம் அதி⁴வசனம். ஸக்கச்சம் காதப்³போ³தி ஸக்காரோ. பச்சயா ஏவ ஹி பணீதபணீதா ஸுந்த³ரஸுந்த³ரா அபி⁴ஸங்க²ரித்வா கதா ‘‘ஸக்காரோ’’தி வுச்சதி, யா ச பரேஹி அத்தனோ கா³ரவகிரியா, புப்பா²தீ³ஹி வா பூஜா. ஸிலோகோதி வண்ணப⁴ணனம். தம் லாப⁴ஞ்ச, ஸக்காரஞ்ச, ஸிலோகஞ்ச, நிகாமயமானோ, பவத்தயமானோதி அத்தோ². தேனேவாஹ ‘‘சதுபச்சயலாப⁴ஞ்ச…பே… பத்த²யமானோ’’தி.

தூ²ணந்தி பஸூனம் ப³ந்த⁴னத்தா²ய நிகா²தத்த²ம்ப⁴ஸங்கா²தம் தூ²ணம். ஸேஸம் ஸுவிஞ்ஞேய்யமேவ.

ஸோணஸுத்தவண்ணனா நிட்டி²தா.

2. ப²க்³கு³னஸுத்தவண்ணனா

56. து³தியே ஸமதோ⁴ஸீதி ஸமந்ததோ அதோ⁴ஸி. ஸப்³ப³பா⁴கே³ன பரிப²ந்த³னசலனாகாரேன அபசிதிம் த³ஸ்ஸேதி. வத்தம் கிரேதம் பா³ள்ஹகி³லானேனபி வுட்³ட⁴தரம் தி³ஸ்வா உட்டி²தாகாரேன அபசிதி த³ஸ்ஸேதப்³பா³. தேன பன ‘‘மா சலி மா சலீ’’தி வத்தப்³போ³, தம் பன சலனம் உட்டா²னாகாரத³ஸ்ஸனம் ஹோதீதி ஆஹ ‘‘உட்டா²னாகாரம் த³ஸ்ஸேதீ’’தி. ஸந்திமானி ஆஸனானீதி பட²மமேவ பஞ்ஞத்தா²ஸனம் ஸந்தா⁴ய வத³தி. பு³த்³த⁴காலஸ்மிஞ்ஹி ஏகஸ்ஸபி பி⁴க்கு²னோ வஸனட்டா²னே – ‘‘ஸசே ஸத்தா² ஆக³ச்சி²ஸ்ஸதி, ஆஸனம் பஞ்ஞத்தமேவ ஹோதூ’’தி அந்தமஸோ ப²லகமத்தம்பி பண்ணஸந்தா²ரமத்தம்பி பஞ்ஞத்தமேவ. க²மனீயம் யாபனீயந்தி கச்சி து³க்க²ம் க²மிதும், இரியாபத²ம் வா யாபேதும் ஸக்காதி புச்ச²தி. ஸீஸவேத³னாதி குதோசி நிக்க²மிதும் அலப⁴மானேஹி வாதேஹி ஸமுட்டா²பிதா ப³லவதியோ ஸீஸவேத³னா ஹோந்தி.

ப²க்³கு³னஸுத்தவண்ணனா நிட்டி²தா.

2. ச²ளபி⁴ஜாதிஸுத்தவண்ணனா

57. ததியே அபி⁴ஜாதியோதி ஏத்த² அபி⁴-ஸத்³தோ³ உபஸக்³க³மத்தம், ந அத்த²விஸேஸஜோதகோதி ஆஹ ‘‘ச² ஜாதியோ’’தி. அபி⁴ஜாயதீதி ஏத்தா²பி ஏஸேவ நயோ.

உரப்³பே⁴ ஹனந்தீதி ஓரப்³பி⁴கா. ஏவம் ஸூகரிகாத³யோ வேதி³தப்³பா³. ரோதே³ந்தி குருரகம்மந்ததாய ஸப்படிப³த்³தே⁴ ஸத்தே அஸ்ஸூனி மோசேந்தீதி ருத்³தா³, தே ஏவ லுத்³தா³ ர-காரஸ்ஸ ல-காரம் கத்வா. இமினா அஞ்ஞேபி யே கேசி மாக³விகா நேஸாதா³ வுத்தா, தே பாபகம்மப்பஸுததாய ‘‘கண்ஹாபி⁴ஜாதீ’’தி வத³தி.

பி⁴க்கூ²தி ச பு³த்³த⁴ஸாஸனே பி⁴க்கூ². தே கிர ஸச்ச²ந்த³ராகே³ன பரிபு⁴ஞ்ஜந்தீதி அதி⁴ப்பாயேன சதூஸு பச்சயேஸு கண்டகே பக்கி²பித்வா கா²த³ந்தீதி ‘‘கண்டகவுத்திகா’’தி வத³தி. கஸ்மாதி சே? யஸ்மா தே பணீதே பச்சயே படிஸேவந்தீதி தஸ்ஸ மிச்சா²கா³ஹோ. ஞாயலத்³தே⁴பி பச்சயே பு⁴ஞ்ஜமானா ஆஜீவகஸமயஸ்ஸ விலோமக்³கா³ஹிதாய பச்சயேஸு கண்டகே பக்கி²பித்வா கா²த³ந்தி நாமாதி வத³தீதி. அத² வா கண்டகவுத்திகா ஏவம்னாமகா ஏகே பப்³ப³ஜிதா, யே ஸவிஸேஸம் அத்தகிலமதா²னுயோக³ம் அனுயுத்தா. ததா² ஹி தே கண்டகே வத்தந்தா விய ஹோந்தீதி ‘‘கண்டகவுத்திகா’’தி வுத்தா. இமமேவ ச அத்த²விகப்பம் ஸந்தா⁴யாஹ ‘‘கண்டகவுத்திகாதி ஸமணா நாமேதே’’தி.

லோஹிதாபி⁴ஜாதி நாம நிக³ண்டா² ஏகஸாடகாதி வுத்தா. தே கிர ட²த்வா பு⁴ஞ்ஜனனஹானப்படிக்கே²பாதி³வதஸமாயோகே³ன புரிமேஹி த்³வீஹி பண்ட³ரதரா.

அசேலகஸாவகாதி ஆஜீவகஸாவகே வத³தி. தே கிர ஆஜீவகலத்³தி⁴யா ஸுவிஸுத்³த⁴சித்ததாய நிக³ண்டே²ஹிபி பண்ட³ரதரா. ஏவஞ்ச கத்வா அத்தனோ பச்சயதா³யகே நிக³ண்டே²ஹிபி ஜேட்ட²கதரே கரோதி.

ஆஜீவகா ஆஜீவகினியோ ‘‘ஸுக்காபி⁴ஜாதீ’’தி வுத்தா. தே கிர புரிமேஹி சதூஹி பண்ட³ரதரா. நந்தா³த³யோ ஹி ததா²ரூபம் ஆஜீவகப்படிபத்திம் உக்கம்ஸம் பாபேத்வா டி²தா, தஸ்மா நிக³ண்டே²ஹி ஆஜீவகஸாவகேஹி ச பண்ட³ரதராதி ‘‘பரமஸுக்காபி⁴ஜாதீ’’தி வுத்தா.

பி³லம் ஓலக்³கே³ய்யுந்தி மம்ஸபா⁴க³ம் ந்ஹாருனா வா கேனசி வா க³ந்தி²த்வா புரிஸஸ்ஸ ஹத்தே² வா கேஸே வா ஓலம்ப³னவஸேன ப³ந்தே⁴ய்யும். இமினா ஸத்த²த⁴ம்மம் நாம த³ஸ்ஸேதி. ஸத்த²வாஹோ கிர மஹாகந்தாரம் படிபன்னோ அந்தராமக்³கே³ கோ³ணே மதே மம்ஸம் க³ஹேத்வா ஸப்³பே³ஸம் ஸத்தி²கானம் ‘‘இத³ம் கா²தி³த்வா ஏத்தகம் மூலம் தா³தப்³ப³’’ந்தி கோட்டா²ஸம் ஓலம்ப³தி. கோ³ணமம்ஸம் நாம கா²த³ந்தாபி அத்தி², அகா²த³ந்தாபி அத்தி², கா²த³ந்தாபி மூலம் தா³தும் ஸக்கோந்தாபி அஸக்கோந்தாபி. ஸத்த²வாஹோ யேன மூலேன கோ³ணோ க³ஹிதோ, தம் மூலம் ஸத்தி²கேஹி தா⁴ரணத்த²ம் ஸப்³பே³ஸம் ப³லக்காரேன கோட்டா²ஸம் த³த்வா மூலம் க³ண்ஹாதி. அயம் ஸத்த²த⁴ம்மோ.

கண்ஹாபி⁴ஜாதியோ ஸமானோதி கண்ஹே நீசகுலே ஜாதோ ஹுத்வா. கண்ஹத⁴ம்மந்தி பச்சத்தே உபயோக³வசனந்தி ஆஹ ‘‘கண்ஹஸபா⁴வோ ஹுத்வா அபி⁴ஜாயதீ’’தி, தம் அந்தோக³த⁴ஹேதுஅத்த²ம் பத³ம், உப்பாதே³தீதி அத்தோ². தஸ்மா கண்ஹம் த⁴ம்மம் அபி⁴ஜாயதீதி காளகம் த³ஸது³ஸ்ஸீல்யத⁴ம்மம் உப்பாதே³தி. ஸுக்கம் த⁴ம்மம் அபி⁴ஜாயதீதி ஏத்தா²பி இமினா நயேன அத்தோ² வேதி³தப்³போ³. ஸோ ஹி ‘‘அஹம் புப்³பே³பி புஞ்ஞானம் அகதத்தா நீசகுலே நிப்³ப³த்தோ, இதா³னி புஞ்ஞம் கரிஸ்ஸாமீ’’தி புஞ்ஞஸங்கா²தம் பண்ட³ரத⁴ம்மம் கரோதி.

அகண்ஹம் அஸுக்கம் நிப்³பா³னந்தி ஸசே கண்ஹம் ப⁴வேய்ய, கண்ஹவிபாகம் த³தே³ய்ய யதா² த³ஸவித⁴ம் து³ஸ்ஸீல்யத⁴ம்மம். ஸசே ஸுக்கம், ஸுக்கவிபாகம் த³தே³ய்ய யதா² தா³னஸீலாதி³குஸலகம்மம். த்³வின்னம்பி அப்பதா³னதோ ‘‘அகண்ஹம் அஸுக்க’’ந்தி வுத்தம். நிப்³பா³னஞ்ச நாம இமஸ்மிம் அத்தே² அரஹத்தம் அதி⁴ப்பேதம் ‘‘அபி⁴ஜாயதீ’’தி வசனதோ. தஞ்ஹி கிலேஸனிப்³பா³னந்தே ஜாதத்தா நிப்³பா³னம் நாம யதா² ‘‘ராகா³தீ³னம் க²யந்தே ஜாதத்தா ராக³க்க²யோ, தோ³ஸக்க²யோ, மோஹக்க²யோ’’தி. படிப்பஸ்ஸம்ப⁴னவஸேன வா கிலேஸானம் நிப்³பா³பனதோ நிப்³பா³னம். தம் ஏஸ அபி⁴ஜாயதி பஸவதி. இதா⁴பி ஹி அந்தோக³த⁴ஹேது அத்த²ம் ‘‘ஜாயதீ’’தி பத³ம். அட்ட²கதா²யம் பன ‘‘ஜாயதீ’’தி இமஸ்ஸ பாபுணாதீஹி அத்த²ம் க³ஹேத்வாவ ‘‘நிப்³பா³னம் பாபுணாதீ’’தி வுத்தம். ஸுக்காபி⁴ஜாதியோ ஸமானோதி ஸுக்கே உச்சகுலே ஜாதோ ஹுத்வா. ஸேஸமேத்த² ஸுவிஞ்ஞேய்யமேவ.

ச²ளபி⁴ஜாதிஸுத்தவண்ணனா நிட்டி²தா.

4. ஆஸவஸுத்தவண்ணனா

58. சதுத்தே² ஸம்வரேனாதி ஸம்வரேன ஹேதுபூ⁴தேன வா. இதா⁴தி அயம் இத⁴-ஸத்³தோ³ ஸப்³பா³காரதோ இந்தி³யஸம்வரஸம்வுதஸ்ஸ புக்³க³லஸ்ஸ ஸன்னிஸ்ஸயபூ⁴தஸாஸனபரிதீ³பனோ, அஞ்ஞஸ்ஸ ததா²பா⁴வப்படிஸேத⁴னோ வாதி வுத்தம் ‘‘இதா⁴தி இத⁴ஸ்மிம் ஸாஸனே’’தி. படிஸங்கா²தி படிஸங்கா²ய. ஸங்கா²-ஸத்³தோ³ ஞாணகோட்டா²ஸபஞ்ஞத்திக³ணனாதீ³ஸு தி³ஸ்ஸதி ‘‘ஸங்கா²யேகம் படிஸேவதீ’’திஆதீ³ஸு (ம. நி. 2.168) ஹி ஞாணே தி³ஸ்ஸதி. ‘‘பபஞ்சஸஞ்ஞாஸங்கா² ஸமுதா³சரந்தீ’’திஆதீ³ஸு (ம. நி. 1.202, 204) கோட்டா²ஸே. ‘‘தேஸம் தேஸம் த⁴ம்மானம் ஸங்கா² ஸமஞ்ஞா’’திஆதீ³ஸு (த⁴. ஸ. 1313-1315) பஞ்ஞத்தியம். ‘‘ந ஸுகரம் ஸங்கா²து’’ந்திஆதீ³ஸு (ஸம். நி. 2.128) க³ணனாய. இத⁴ பன ஞாணே த³ட்ட²ப்³போ³. தேனேவாஹ ‘‘படிஸஞ்ஜானித்வா பச்சவேக்கி²த்வாதி அத்தோ²’’தி. ஆதீ³னவபச்சவேக்க²ணா ஆதீ³னவபடிஸங்கா²தி யோஜனா. ஸம்பலிமட்ட²ந்தி க⁴ம்ஸிதம். அனுப்³யஞ்ஜனஸோதி ஹத்த²பாத³ஸிதஆலோகிதவிலோகிதாதி³ப்பகாரபா⁴க³ஸோ. தஞ்ஹி அயோனிஸோமனஸிகரோதோ கிலேஸானம் அனுப்³யஞ்ஜனதோ ‘‘அனுப்³யஞ்ஜன’’ந்தி வுச்சதி. நிமித்தக்³கா³ஹோதி இத்தி²புரிஸனிமித்தஸ்ஸ ஸுப⁴னிமித்தாதி³கஸ்ஸ வா கிலேஸவத்து²பூ⁴தஸ்ஸ நிமித்தஸ்ஸ கா³ஹோ. ஆதி³த்தபரியாயேனாதி ஆதி³த்தபரியாயே (ஸம். நி. 4.28; மஹாவ. 54) ஆக³தனயேன வேதி³தப்³போ³.

யதா² இத்தி²யா இந்த்³ரியம் இத்தி²ந்த்³ரியம், ந ஏவமித³ம், இத³ம் பன சக்கு²மேவ இந்த்³ரியந்தி சக்கு²ந்த்³ரியம். தேனாஹ ‘‘சக்கு²மேவ இந்த்³ரிய’’ந்தி. யதா² ஆவாடே நியதட்டி²திகோ கச்ச²போ ‘‘ஆவாடகச்ச²போ’’தி வுச்சதி, ஏவம் தப்படிப³த்³த⁴வுத்திதாய தம் டா²னோ ஸம்வரோ சக்கு²ந்த்³ரியஸம்வரோ. தேனாஹ ‘‘சக்கு²ந்த்³ரியே ஸம்வரோ சக்கு²ந்த்³ரியஸம்வரோ’’தி. நனு ச சக்கு²ந்த்³ரியே ஸம்வரோ வா அஸம்வரோ வா நத்தி². ந ஹி சக்கு²பஸாத³ம் நிஸ்ஸாய ஸதி வா முட்ட²ஸ்ஸச்சம் வா உப்பஜ்ஜதி. அபிச யதா³ ரூபாரம்மணம் சக்கு²ஸ்ஸ ஆபாத²ம் ஆக³ச்ச²தி, ததா³ ப⁴வங்கே³ த்³விக்க²த்தும் உப்பஜ்ஜித்வா நிருத்³தே⁴ கிரியமனோதா⁴து ஆவஜ்ஜனகிச்சம் ஸாத⁴யமானா உப்பஜ்ஜித்வா நிருஜ்ஜ²தி. ததோ சக்கு²விஞ்ஞாணம் த³ஸ்ஸனகிச்சம், ததோ விபாகமனோதா⁴து ஸம்படிச்ச²னகிச்சம், ததோ விபாகமனோவிஞ்ஞாணதா⁴து ஸந்தீரணகிச்சம், ததோ கிரியாஹேதுகமனோவிஞ்ஞாணதா⁴து வோட்ட²ப்³ப³னகிச்சம் ஸாத⁴யமானா உப்பஜ்ஜித்வா நிருஜ்ஜ²தி, தத³னந்தரம் ஜவனம் ஜவதி. தத்தா²பி நேவ ப⁴வங்க³ஸமயே, ந ஆவஜ்ஜனாதீ³னம் அஞ்ஞதரஸமயே ச ஸம்வரோ வா அஸம்வரோ வா அத்தி². ஜவனக்க²ணே பன ஸசே து³ஸ்ஸீல்யம் வா முட்ட²ஸ்ஸச்சம் வா அஞ்ஞாணம் வா அக்க²ந்தி வா கோஸஜ்ஜம் வா உப்பஜ்ஜதி, அஸம்வரோ ஹோதி. தஸ்மிம் பன ஸீலாதீ³ஸு உப்பன்னேஸு ஸம்வரோ ஹோதி, தஸ்மா ‘‘சக்கு²ந்த்³ரியே ஸம்வரோ’’தி கஸ்மா வுத்தந்தி ஆஹ ‘‘ஜவனே உப்பஜ்ஜமானோபி ஹேஸ…பே… சக்கு²ந்த்³ரியஸம்வரோதி வுச்சதீ’’தி.

இத³ம் வுத்தம் ஹோதி – யதா² நக³ரே சதூஸு த்³வாரேஸு அஸம்வுதேஸு கிஞ்சாபி அந்தோக⁴ரத்³வாரகோட்ட²கக³ப்³பா⁴த³யோ ஸுஸம்வுதா, ததா²பி அந்தோனக³ரே ஸப்³ப³ம் ப⁴ண்ட³ம் அரக்கி²தம் அகோ³பிதமேவ ஹோதி. நக³ரத்³வாரேன ஹி பவிஸித்வா சோரா யதி³ச்ச²கம் கரேய்யும், ஏவமேவம் ஜவனே து³ஸ்ஸீல்யாதீ³ஸு உப்பன்னேஸு தஸ்மிம் அஸம்வரே ஸதி த்³வாரம்பி அகு³த்தம் ஹோதி ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² பன நக³ரத்³வாரேஸு ஸம்வுதேஸு கிஞ்சாபி அந்தோக⁴ராத³யோ அஸம்வுதா, ததா²பி அந்தோனக³ரே ஸப்³ப³ம் ப⁴ண்ட³ம் ஸுரக்கி²தம் ஸுகோ³பிதமேவ ஹோதி. நக³ரத்³வாரேஸு ஹி பிஹிதேஸு சோரானம் பவேஸோ நத்தி², ஏவமேவம் ஜவனே ஸீலாதீ³ஸு உப்பன்னேஸு த்³வாரம்பி ஸுகு³த்தம் ஹோதி ப⁴வங்க³ம்பி ஆவஜ்ஜனாதீ³னி வீதி²சித்தானிபி, தஸ்மா ஜவனக்க²ணே உப்பஜ்ஜமானோபி சக்கு²ந்த்³ரியஸம்வரோதி வுத்தோதி.

ஸம்வரேன ஸமன்னாக³தோ புக்³க³லோ ஸம்வுதோதி ஆஹ ‘‘உபேதோ’’தி. அயமேவேத்த² அத்தோ² ஸுந்த³ரதரோதி உபரி பாளியம் ஸந்தி³ஸ்ஸனதோ வுத்தம். தேனாஹ ‘‘ததா² ஹீ’’திஆதி³.

யந்தி ஆதே³ஸோதி இமினா லிங்க³விபல்லாஸேன ஸத்³தி⁴ம் வசனவிபல்லாஸோ கதோதி த³ஸ்ஸேதி, நிபாதபத³ம் வா ஏதம் புது²வசனத்த²ம். விகா⁴தகராதி சித்தவிகா⁴தகரா, காயசித்தது³க்க²னிப்³ப³த்தகா வா. யதா²வுத்தகிலேஸஹேதுகா தா³ஹானுப³ந்தா⁴ விபாகா ஏவ விபாகபரிளாஹா. யதா² பனேத்த² ஆஸவா அஞ்ஞே ச விகா⁴தகரா கிலேஸபரிளாஹா ஸம்ப⁴வந்தி, தம் த³ஸ்ஸேதும் ‘‘சக்கு²த்³வாரஸ்மிஞ்ஹீ’’திஆதி³ வுத்தம். தம் ஸுவிஞ்ஞேய்யமேவ. ஏத்த² ச ஸம்வரணூபாயோ, ஸம்வரிதப்³ப³ம், ஸம்வரோ, யதோ ஸோ ஸம்வரோ, யத்த² ஸம்வரோ, யதா² ஸம்வரோ, யஞ்ச ஸம்வரப²லந்தி அயம் விபா⁴கோ³ வேதி³தப்³போ³. கத²ம்? ‘‘படிஸங்கா² யோனிஸோ’’தி ஹி ஸம்வரணூபாயோ. சக்கு²ந்த்³ரியம் ஸம்வரிதப்³ப³ம். ஸம்வரக்³க³ஹணேன க³ஹிதா ஸதி ஸம்வரோ. ‘‘அஸம்வுதஸ்ஸா’’தி ஸம்வரணாவதி⁴. அஸம்வரதோ ஹி ஸம்வரணம். ஸம்வரிதப்³ப³க்³க³ஹணஸித்³தோ⁴ இத⁴ ஸம்வரவிஸயோ. சக்கு²ந்த்³ரியஞ்ஹி ஸம்வரணம் ஞாணம் ரூபாரம்மணே ஸம்வரயதீதி அவுத்தஸித்³தோ⁴யமத்தோ². ஆஸவதன்னிமித்தகிலேஸபரிளாஹாபா⁴வோ ப²லம். ஏவம் ஸோதத்³வாராதீ³ஸு யோஜேதப்³ப³ம். ஸப்³ப³த்தே²வாதி மனோத்³வாரே பஞ்சத்³வாரே சாதி ஸப்³ப³ஸ்மிம் த்³வாரே.

படிஸங்கா² யோனிஸோ சீவரந்திஆதீ³ஸு ‘‘ஸீதஸ்ஸ படிகா⁴தாயா’’திஆதி³னா பச்சவேக்க²ணமேவ யோனிஸோ படிஸங்கா². ஈதி³ஸந்தி ஏவரூபம் இட்டா²ரம்மணம். ப⁴வபத்த²னாய அஸ்ஸாத³யதோதி ப⁴வபத்த²னாமுகே²ன பா⁴விதம் ஆரம்மணம் அஸ்ஸாதே³ந்தஸ்ஸ. சீவரந்தி நிவாஸனாதி³ யம் கிஞ்சிசீவரம். படிஸேவதீதி நிவாஸனாதி³வஸேன பரிபு⁴ஞ்ஜதி. யாவதே³வாதி பயோஜனபரிமாணனியமனம். ஸீதப்படிகா⁴தாதி³யேவ ஹி யோகி³னோ சீவரப்படிஸேவனப்பயோஜனம். ஸீதஸ்ஸாதி ஸீததா⁴துக்கோ²ப⁴தோ வா உதுபரிணாமதோ வா உப்பன்னஸ்ஸ ஸீதஸ்ஸ. படிகா⁴தாயாதி படிகா⁴தனத்த²ம் தப்பச்சயஸ்ஸ விகாரஸ்ஸ வினோத³னத்த²ம். உண்ஹஸ்ஸாதி அக்³கி³ஸந்தாபதோ உப்பன்னஸ்ஸ உண்ஹஸ்ஸ. ட³ம்ஸாத³யோ பாகடாயேவ. புன யாவதே³வாதி நியதப்பயோஜனபரிமாணனியமனம். நியதஞ்ஹி பயோஜனம் சீவரம் படிஸேவந்தஸ்ஸ ஹிரிகோபீனப்படிச்சா²த³னம், இதரம் கதா³சி. ஹிரிகோபீனந்தி ஸம்பா³த⁴ட்டா²னம். யஸ்மிஞ்ஹி அங்கே³ விவடே ஹிரீ குப்பதி வினஸ்ஸதி, தம் ஹிரியா கோபனதோ ஹிரிகோபீனம், தம்படிச்சா²த³னத்த²ம் சீவரம் படிஸேவதி.

பிண்ட³பாதந்தி யம் கிஞ்சி ஆஹாரம். ஸோ ஹி பிண்டோ³ல்யேன பி⁴க்கு²னோ பத்தே பதனதோ, தத்த² தத்த² லத்³த⁴பி⁴க்கா²பிண்டா³னம் பாதோ ஸன்னிபாதோதி வா ‘‘பிண்ட³பாதோ’’தி வுச்சதி. நேவ த³வாயாதி ந கீளனாய. ந மதா³யாதி ந ப³லமத³மானமத³புரிஸமத³த்த²ம். ந மண்ட³னாயாதி ந அங்க³பச்சங்கா³னம் பீணனபா⁴வத்த²ம். ந விபூ⁴ஸனாயாதி ந தேஸம்யேவ ஸோப⁴த்த²ம், ச²விஸம்பத்திஅத்த²ந்தி அத்தோ². இமானி யதா²க்கமம் மோஹதோ³ஸஸண்டா²னவண்ணராகூ³பனிஸ்ஸயப்பஹானத்தா²னி வேதி³தப்³பா³னி. புரிமம் வா த்³வயம் அத்தனோ ஸம்கிலேஸுப்பத்தினிஸேத⁴னத்த²ம், இதரம் பரஸ்ஸபி. சத்தாரிபி காமஸுக²ல்லிகானுயோக³ஸ்ஸ பஹானத்த²ம் வுத்தானீதி வேதி³தப்³பா³னி. காயஸ்ஸாதி ரூபகாயஸ்ஸ. டி²தியா யாபனாயாதி பப³ந்த⁴ட்டி²தத்த²ஞ்சேவ பவத்தியா அவிச்சே²த³னத்த²ஞ்ச, சிரகாலட்டி²தத்த²ம் ஜீவிதிந்த்³ரியஸ்ஸ பவத்தாபனத்த²ம். விஹிம்ஸூபரதியாதி ஜிக⁴ச்சா²து³க்க²ஸ்ஸ உபரமத்த²ம். ப்³ரஹ்மசரியானுக்³க³ஹாயாதி ஸாஸனமக்³க³ப்³ரஹ்மசரியானம் அனுக்³க³ண்ஹனத்த²ம். இதீதி ஏவம் இமினா உபாயேன. புராணஞ்ச வேத³னம் படிஹங்கா²மீதி புராணம் அபு⁴த்தபச்சயா உப்பஜ்ஜனகவேத³னம் படிஹனிஸ்ஸாமி. நவஞ்ச வேத³னம் ந உப்பாதே³ஸ்ஸாமீதி நவம் பு⁴த்தபச்சயா உப்பஜ்ஜனகவேத³னம் ந உப்பாதே³ஸ்ஸாமி. தஸ்ஸா ஹி அனுப்பஜ்ஜனத்த²மேவ ஆஹாரம் பரிபு⁴ஞ்ஜதி. ஏத்த² அபு⁴த்தபச்சயா உப்பஜ்ஜனகவேத³னா நாம யதா²வுத்தஜிக⁴ச்சா²னிமித்தா வேத³னா. ஸா ஹி அபு⁴ஞ்ஜந்தஸ்ஸ பி⁴ய்யோ பி⁴ய்யோபவட்³ட⁴னவஸேன உப்பஜ்ஜதி, பு⁴த்தபச்சயா அனுப்பஜ்ஜனகவேத³னாபி கு²தா³னிமித்தாவ அங்க³தா³ஹஸூலாதி³வேத³னா அப்பவத்தா. ஸா ஹி பு⁴த்தபச்சயா அனுப்பன்னாவ ந உப்பஜ்ஜிஸ்ஸதி. விஹிம்ஸானிமித்ததா சேதாஸம் விஹிம்ஸாய விஸேஸோ.

யாத்ரா ச மே ப⁴விஸ்ஸதீதி யாபனா ச மே சதுன்னம் இரியாபதா²னம் ப⁴விஸ்ஸதி. ‘‘யாபனாயா’’தி இமினா ஜீவிதிந்த்³ரியயாபனா வுத்தா, இத⁴ சதுன்னம் இரியாபதா²னம் அவிச்சே²த³ஸங்கா²தா யாபனாதி அயமேதாஸம் விஸேஸோ. அனவஜ்ஜதா ச பா²ஸுவிஹாரோ சாதி அயுத்தபரியேஸனப்படிக்³க³ஹணபரிபோ⁴க³பரிவஜ்ஜனேன அனவஜ்ஜதா, பரிமிதபரிபோ⁴கே³ன பா²ஸுவிஹாரோ. அஸப்பாயாபரிமிதபோ⁴ஜனபச்சயா அரதிதந்தீ³விஜம்பி⁴தாவிஞ்ஞுக³ரஹாதி³தோ³ஸாபா⁴வேன வா அனவஜ்ஜதா. ஸப்பாயபரிமிதபோ⁴ஜனபச்சயா காயப³லஸம்ப⁴வேன பா²ஸுவிஹாரோ. யாவத³த்த²ம் உத³ராவதே³ஹகபோ⁴ஜனபரிவஜ்ஜனேன வா ஸேய்யஸுக²பஸ்ஸஸுக²மித்³த⁴ஸுகா²தீ³னம் அபா⁴வதோ அனவஜ்ஜதா. சதுபஞ்சாலோபமத்தஊனபோ⁴ஜனேன சதுஇரியாபத²யோக்³யதாபாத³னதோ பா²ஸுவிஹாரோ. வுத்தஞ்ஹேதம் –

‘‘சத்தாரோ பஞ்ச ஆலோபே, அபு⁴த்வா உத³கம் பிவே;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³. 983; மி. ப. 6.5.10);

ஏத்தாவதா ச பயோஜனபரிக்³க³ஹோ, மஜ்ஜி²மா ச படிபதா³ தீ³பிதா ஹோதி. யாத்ரா ச மே ப⁴விஸ்ஸதீதி பயோஜனபரிக்³க³ஹதீ³பனா. யாத்ரா ஹி நம் ஆஹாரூபயோக³ம் பயோஜேதி. த⁴ம்மிகஸுகா²பரிச்சாக³ஹேதுகோ பா²ஸுவிஹாரோ மஜ்ஜி²மா படிபதா³ அந்தத்³வயபரிவஜ்ஜனதோ.

ஸேனாஸனந்தி ஸேனஞ்ச ஆஸனஞ்ச. யத்த² விஹாராதி³கே ஸேதி நிபஜ்ஜதி ஆஸதி நிஸீத³தி, தம் ஸேனாஸனம். உதுபரிஸ்ஸயவினோத³னப்படிஸல்லானாராமத்த²ந்தி உதுயேவ பரிஸஹனட்டே²ன பரிஸ்ஸயோ ஸரீராபா³த⁴சித்தவிக்கே²பகரோ, தஸ்ஸ வினோத³னத்த²ம், அனுப்பன்னஸ்ஸ அனுப்பாத³னத்த²ம், உப்பன்னஸ்ஸ வூபஸமனத்த²ஞ்சாதி அத்தோ². அத² வா யதா²வுத்தோ உது ச ஸீஹப்³யக்³கா⁴தி³பாகடபரிஸ்ஸயோ ச ராக³தோ³ஸாதி³படிச்ச²ன்னபரிஸ்ஸயோ ச உதுபரிஸ்ஸயோ, தஸ்ஸ வினோத³னத்த²ஞ்சேவ ஏகீபா⁴வபா²ஸுகத்த²ஞ்ச. சீவரப்படிஸேவனே ஹிரீகோபீனப்படிச்சா²த³னம் விய தம் நியதபயோஜனந்தி புன ‘‘யாவதே³வா’’தி வுத்தம்.

கி³லானபச்சயபே⁴ஸஜ்ஜபரிக்கா²ரந்தி ரோக³ஸ்ஸ பச்சனீகப்பவத்தியா கி³லானபச்சயோ, ததோ ஏவ பி⁴ஸக்கஸ்ஸ அனுஞ்ஞாதவத்து²தாய பே⁴ஸஜ்ஜம், ஜீவிதஸ்ஸ பரிவாரஸம்பா⁴ரபா⁴வேஹி பரிக்கா²ரோ சாதி கி³லானபச்சயபே⁴ஸஜ்ஜபரிக்கா²ரோ, தம். வேய்யாபா³தி⁴கானந்தி வேய்யாபா³த⁴தோ தா⁴துக்கோ²ப⁴தோ ச தம்னிப்³ப³த்தகுட்ட²க³ண்ட³பீளகாதி³ரோக³தோ உப்பன்னானம். வேத³னானந்தி து³க்க²வேத³னானம். அப்³யாப³ஜ்ஜ²பரமதாயாதி நித்³து³க்க²பரமபா⁴வாய. யாவ தம் து³க்க²ம் ஸப்³ப³ம் பஹீனம் ஹோதி, தாவ படிஸேவாமீதி யோஜனா. ஏவமேத்த² ஸங்கே²பேனேவ பாளிவண்ணனா வேதி³தப்³பா³. நவவேத³னுப்பாத³தோபீதி ந கேவலம் ஆயதிம் ஏவ விபாகபரிளாஹா, அத² கோ² அதிபோ⁴ஜனபச்சயா அலம்ஸாடகாதீ³னம் விய நவவேத³னுப்பாத³தோபி வேதி³தப்³பா³.

கம்மட்டா²னிகஸ்ஸ சலனம் நாம கம்மட்டா²னபரிச்சாகோ³தி ஆஹ ‘‘சலதி கம்பதி கம்மட்டா²னம் விஜஹதீ’’தி. ‘‘க²மோ ஹோதி ஸீதஸ்ஸ உண்ஹஸ்ஸா’’தி ஏத்த² ச லோமஸனாக³த்தே²ரஸ்ஸ வத்து² கதே²தப்³ப³ம். தே²ரோ கிர சேதியபப்³ப³தே பியங்கு³கு³ஹாய பதா⁴னக⁴ரே விஹரந்தோ அந்தரட்ட²கே ஹிமபாதஸமயே லோகந்தரிகனிரயம் பச்சவேக்கி²த்வா கம்மட்டா²னம் அவிஜஹந்தோவ அப்³போ⁴காஸே வீதினாமேஸி. கி³ம்ஹஸமயே ச பச்சா²ப⁴த்தம் ப³ஹிசங்கமே கம்மட்டா²னம் மனஸிகரோதோ ஸேதா³பிஸ்ஸ கச்சே²ஹி முச்சந்தி. அத² நம் அந்தேவாஸிகோ ஆஹ – ‘‘இத⁴, ப⁴ந்தே, நிஸீத³த², ஸீதலோ ஓகாஸோ’’தி. தே²ரோ ‘‘உண்ஹப⁴யேனேவம்ஹி, ஆவுஸோ, இத⁴ நிஸின்னோ’’தி அவீசிமஹானிரயம் பச்சவேக்கி²த்வா நிஸீதி³யேவ. உண்ஹந்தி சேத்த² அக்³கி³ஸந்தாபோவ வேதி³தப்³போ³ ஸூரியஸந்தாபஸ்ஸ பரதோ வுச்சமானத்தா. ஸூரியஸந்தாபவஸேன பனேதம் வத்து² வுத்தம்.

யோ ச த்³வே தயோ வாரே ப⁴த்தம் வா பானீயம் வா அலப⁴மானோபி அனமதக்³கே³ ஸம்ஸாரே அத்தனோ பேத்திவிஸயூபபத்திம் பச்சவேக்கி²த்வா அவேத⁴ந்தோ கம்மட்டா²னம் ந விஜஹதியேவ. ட³ம்ஸமகஸவாதாதபஸம்ப²ஸ்ஸேஹி பு²ட்டோ² சேபி திரச்சா²னூபபத்திம் பச்சவேக்கி²த்வா அவேத⁴ந்தோ கம்மட்டா²னம் ந விஜஹதியேவ. ஸரீஸபஸம்ப²ஸ்ஸேன பு²ட்டோ² சாபி அனமதக்³கே³ ஸம்ஸாரே ஸீஹப்³யக்³கா⁴தி³முகே²ஸு அனேகவாரம் பரிவத்திதபுப்³ப³பா⁴வம் பச்சவேக்கி²த்வா அவேத⁴ந்தோ கம்மட்டா²னம் ந விஜஹதியேவ பதா⁴னியத்தே²ரோ விய, அயம் ‘‘க²மோ ஜிக⁴ச்சா²ய…பே… ஸரீஸபஸம்ப²ஸ்ஸான’’ந்தி வேதி³தப்³போ³. தே²ரம் கிர க²ண்ட³சேலவிஹாரே கணிகாரபதா⁴னியக⁴ரே அரியவம்ஸத⁴ம்மம் ஸுணந்தஞ்ஞேவ கோ⁴ரவிஸோ ஸப்போ ட³ம்ஸி. தே²ரோ ஜானித்வாபி பஸன்னசித்தோ நிஸின்னோ த⁴ம்மம்யேவ ஸுணாதி, விஸவேகோ³ த²த்³தோ⁴ அஹோஸி. தே²ரோ உபஸம்பத³மாளம் ஆதி³ம் கத்வா ஸீலம் பச்சவேக்கி²த்வா ‘‘விஸுத்³த⁴ஸீலோம்ஹீ’’தி பீதிம் உப்பாதே³ஸி, ஸஹ பீதுப்பாதா³ விஸம் நிவத்தித்வா பத²விம் பாவிஸி. தே²ரோ தத்தே²வ சித்தேகக்³க³தம் லபி⁴த்வா விபஸ்ஸனம் வட்³டே⁴த்வா அரஹத்தம் பாபுணி.

யோ பன அக்கோஸவஸேன து³ருத்தே து³ருத்தத்தாயேவ ச து³ராக³தே அபி அந்திமவத்து²ஸஞ்ஞிதே வசனபதே² ஸுத்வா க²ந்திகு³ணம்யேவ பச்சவேக்கி²த்வா ந வேத⁴தி தீ³க⁴பா⁴ணகஅப⁴யத்தே²ரோ விய, அயம் ‘‘க²மோ து³ருத்தானம் து³ராக³தானம் வசனபதா²ன’’ந்தி வேதி³தப்³போ³. தே²ரோ கிர பச்சயஸந்தோஸபா⁴வனாராமதாய மஹாஅரியவம்ஸப்படிபத³ம் கதே²ஸி, ஸப்³போ³ மஹாகா³மோ ஆக³ச்ச²தி, தே²ரஸ்ஸ மஹாஸக்காரோ உப்பஜ்ஜி. தம் அஞ்ஞதரோ மஹாதே²ரோ அதி⁴வாஸேதும் அஸக்கோந்தோ ‘‘தீ³க⁴பா⁴ணகோ ‘அரியவம்ஸம் கதே²மீ’தி ஸப்³ப³ரத்திம் கோலாஹலம் கரோதீ’’திஆதீ³ஹி அக்கோஸி. உபோ⁴பி ச அத்தனோ அத்தனோ விஹாரம் க³ச்ச²ந்தா கா³வுதமத்தம் ஏகபதே²ன அக³மம்ஸு. ஸகலகா³வுதம்பி ஸோ தம் அக்கோஸியேவ. ததோ யத்த² த்³வின்னம் விஹாரானம் மக்³கோ³ பி⁴ஜ்ஜதி, தத்த² ட²த்வா தீ³க⁴பா⁴ணகத்தே²ரோ தம் வந்தி³த்வா ‘‘ஏஸோ, ப⁴ந்தே, தும்ஹாகம் மக்³கோ³’’தி ஆஹ. ஸோ அஸ்ஸுணந்தோ விய அக³மாஸி. தே²ரோபி விஹாரம் க³ந்த்வா பாதே³ பக்கா²லேத்வா நிஸீதி³. தமேனம் அந்தேவாஸிகோ ‘‘கிம், ப⁴ந்தே, ஸகலகா³வுதம் பரிபா⁴ஸந்தம் ந கிஞ்சி அவோசுத்தா²’’தி ஆஹ. தே²ரோ ‘‘க²ந்தியேவாவுஸோ, மய்ஹம் பா⁴ரோ, ந அக்க²ந்தி, ஏகபது³த்³தா⁴ரேபி கம்மட்டா²னவியோக³ம் ந பஸ்ஸாமீ’’தி ஆஹ.

வசனமேவ தத³த்த²ம் ஞாபேதுகாமானஞ்ச பதோ² உபாயோதி ஆஹ ‘‘வசனமேவ வசனபதோ²’’தி. அஸுக²ட்டே²ன வா திப்³பா³. யஞ்ஹி ந ஸுக²ம், தம் அனிட்ட²ம் திப்³ப³ந்தி வுச்சதி. அதி⁴வாஸகஜாதிகோ ஹோதீதி யதா²வுத்தவேத³னானம் அதி⁴வாஸகஸபா⁴வோ ஹோதி. சித்தலபப்³ப³தே பதா⁴னியத்தே²ரஸ்ஸ கிர ரத்திம் பதா⁴னேன வீதினாமேத்வா டி²தஸ்ஸ உத³ரவாதோ உப்பஜ்ஜதி. ஸோ தம் அதி⁴வாஸேதும் அஸக்கோந்தோ ஆவத்ததி பரிவத்ததி. தமேனம் சங்கமனபஸ்ஸே டி²தோ பிண்ட³பாதியத்தே²ரோ ஆஹ – ‘‘ஆவுஸோ, பப்³ப³ஜிதோ நாம அதி⁴வாஸனஸீலோ ஹோதீ’’தி. ஸோ ‘‘ஸாது⁴, ப⁴ந்தே’’தி அதி⁴வாஸேத்வா நிச்சலோ ஸயி. வாதோ நாபி⁴தோ யாவ ஹத³யம் பா²லேஸி. தே²ரோ வேத³னம் விக்க²ம்பே⁴த்வா விபஸ்ஸந்தோ முஹுத்தேன அனாகா³மீ ஹுத்வா பரினிப்³பா³யி. ஏவம் ஸப்³ப³த்தா²தி ‘‘உண்ஹேன பு²ட்ட²ஸ்ஸ ஸீதம் பத்த²யதோ’’திஆதி³னா ஸப்³ப³த்த² உண்ஹாதி³னிமித்தம் காமாஸவுப்பத்தி வேதி³தப்³பா³. நத்தி² ஸுக³திப⁴வே ஸீதம் வா உண்ஹம் வாதி அனிட்ட²ம் ஸீதம் வா உண்ஹம் வா நத்தீ²தி அதி⁴ப்பாயோ. அத்தக்³கா³ஹே ஸதி அத்தனியக்³கா³ஹோதி ஆஹ ‘‘மய்ஹம் ஸீதம் உண்ஹந்தி கா³ஹோ தி³ட்டா²ஸவோ’’தி.

அஹம் ஸமணோதி ‘‘அஹம் ஸமணோ, கிம் மம ஜீவிதேன வா மரணேன வா’’தி ஏவம் சிந்தேத்வாதி அதி⁴ப்பாயோ. பச்சவேக்கி²த்வாதி கா³மப்பவேஸப்பயோஜனாதி³ஞ்ச பச்சவேக்கி²த்வா. படிக்கமதீதி ஹத்தி²ஆதீ³னம் ஸமீபக³மனதோ அபக்கமதி. டா²யந்தி ஏத்தா²தி டா²னம், கண்டகானம் டா²னம் கண்டகட்டா²னம், யத்த² கண்டகானி ஸந்தி, தம் ஓகாஸந்தி வுத்தம் ஹோதி. அமனுஸ்ஸது³ட்டா²னீதி அமனுஸ்ஸஸஞ்சாரேன தூ³ஸிதானி, ஸபரிஸ்ஸயானீதி அத்தோ². அனியதவத்து²பூ⁴தந்தி அனியதஸிக்கா²பத³ஸ்ஸ காரணபூ⁴தம். வேஸியாதி³பே⁴த³தோதி வேஸியாவித⁴வாது²ல்லகுமாரிகாபண்ட³கபானாகா³ரபி⁴க்கு²னிபே⁴த³தோ. ஸமானந்தி ஸமம், அவிஸமந்தி அத்தோ². அகாஸி வாதி தாதி³ஸம் அனாசாரம் அகாஸி வா. ஸீலஸம்வரஸங்கா²தேனாதி கத²ம் பரிவஜ்ஜனம் ஸீலம்? அனாஸனபரிவஜ்ஜனேன ஹி அனாசாரபரிவஜ்ஜனம் வுத்தம். அனாசாராகோ³சரபரிவஜ்ஜனம் சாரித்தஸீலதாய ஸீலஸம்வரோ. ததா² ஹி ப⁴க³வதா ‘‘பாதிமோக்க²ஸம்வரஸம்வுதோ விஹரதீ’’தி (விப⁴. 508) ஸீலஸம்வரவிப⁴ஜனே ஆசாரகோ³சரஸம்பத்திம் த³ஸ்ஸேந்தேன ‘‘அத்தி² அனாசாரோ, அத்தி² அகோ³சரோ’’திஆதி³னா (விப⁴. 513-514) ஆசாரகோ³சரா விப⁴ஜித்வா த³ஸ்ஸிதா. ‘‘சண்ட³ம் ஹத்தி²ம் பரிவஜ்ஜேதீ’’தி வசனதோ ஹத்தி²ஆதி³பரிவஜ்ஜனம்பி ப⁴க³வதோ வசனானுட்டா²னந்தி கத்வா ஆசாரஸீலமேவாதி வேதி³தப்³ப³ம்.

இதிபீதி இமினாபி காரணேன அயோனிஸோமனஸிகாரஸமுட்டி²தத்தாபி, லோபா⁴தி³ஸஹக³தத்தாபி, குஸலப்படிபக்க²தோபீதிஆதீ³ஹி காரணேஹி அயம் விதக்கோ அகுஸலோதி அத்தோ². இமினா நயேன ஸாவஜ்ஜோதிஆதீ³ஸுபி அத்தோ² வேதி³தப்³போ³. ஏத்த² ச அகுஸலோதிஆதி³னா தி³ட்ட²த⁴ம்மிகம் காமவிதக்கஸ்ஸ ஆதீ³னவம் த³ஸ்ஸேதி, து³க்க²விபாகோதி இமினா ஸம்பராயிகம். அத்தப்³யாபா³தா⁴ய ஸம்வத்ததீதிஆதீ³ஸுபி இமினாவ நயேன ஆதீ³னவவிபா⁴வனா வேதி³தப்³பா³. உப்பன்னஸ்ஸ காமவிதக்கஸ்ஸ அனதி⁴வாஸனம் நாம புன தாதி³ஸஸ்ஸ அனுப்பாத³னம். தம் பனஸ்ஸ பஹானம் வினோத³னம் ப்³யந்திகரணம் அனபா⁴வக³மனந்தி ச வத்தும் வட்டதீதி பாளியம் – ‘‘உப்பன்னம் காமவிதக்கம் நாதி⁴வாஸேதீ’’தி வத்வா ‘‘பஜஹதீ’’திஆதி³ வுத்தந்தி தமத்த²ம் த³ஸ்ஸேந்தோ ‘‘அனதி⁴வாஸேந்தோ கிம் கரோதீ’’திஆதி³மாஹ. பஹானஞ்சேத்த² விக்க²ம்ப⁴னமேவ, ந ஸமுச்சே²தோ³தி த³ஸ்ஸேதும் ‘‘வினோதே³தீ’’திஆதி³ வுத்தந்தி விக்க²ம்ப⁴னவஸேனேவ அத்தோ² த³ஸ்ஸிதோ. உப்பன்னுப்பன்னேதி தேஸம் பாபவிதக்கானம் உப்பாதா³வத்தா²க³ஹணம் வா கதம் ஸியா அனவஸேஸக்³க³ஹணம் வா. தேஸு பட²மம் ஸந்தா⁴யாஹ ‘‘உப்பன்னமத்தே’’தி, ஸம்பதிஜாதேதி அத்தோ². அனவஸேஸக்³க³ஹணம் ப்³யாபனிச்சா²யம் ஹோதீதி த³ஸ்ஸேதும் ‘‘ஸதக்க²த்தும்பி உப்பன்னுப்பன்னே’’தி வுத்தம்.

ஞாதிவிதக்கோதி ‘‘அம்ஹாகம் ஞாதயோ ஸுக²ஜீவினோ ஸம்பத்தியுத்தா’’திஆதி³னா கே³ஹஸ்ஸிதபேமவஸேன ஞாதகே ஆரப்³ப⁴ உப்பன்னவிதக்கோ. ஜனபத³விதக்கோதி ‘‘அம்ஹாகம் ஜனபதோ³ ஸுபி⁴க்கோ² ஸம்பன்னஸஸ்ஸோ ரமணீயோ’’திஆதி³னா கே³ஹஸ்ஸிதபேமவஸேன ஜனபத³ம் ஆரப்³ப⁴ உப்பன்னவிதக்கோ. உக்குடிகப்பதா⁴னாதீ³ஹி து³க்கே² நிஜ்ஜிண்ணே ஸம்பராயே ஸத்தா ஸுகீ² ஹோந்தி அமராதி து³க்கரகாரிகாய படிஸம்யுத்தோ அமரத்தா²ய விதக்கோ. தம் வா ஆரப்³ப⁴ அமராவிக்கே²பதி³ட்டி²ஸஹக³தோ அமரோ ச ஸோ விதக்கோ சாதி அமராவிதக்கோ. பரானுத்³த³யதாபடிஸம்யுத்தோதி பரேஸு உபட்டா²காதீ³ஸு ஸஹனந்தி³தாதி³வஸேன பவத்தோ அனுத்³த³யதாபதிரூபகோ கே³ஹஸ்ஸிதபேமப்படிஸம்யுத்தோ விதக்கோ. லாப⁴ஸக்காரஸிலோகப்படிஸம்யுத்தோதி சீவராதி³லாபே⁴ன ச ஸக்காரேன ச கித்திஸத்³தே³ன ச ஆரம்மணகரணவஸேன படிஸம்யுத்தோ. அனவஞ்ஞத்திப்படிஸம்யுத்தோதி ‘‘அஹோ வத மம் பரே ந அவஜானேய்யும், ந ஹேட்டா² கத்வா மஞ்ஞேய்யும், பாஸாணச்ச²த்தம் விய க³ரும் கரேய்யு’’ந்தி உப்பன்னவிதக்கோ.

காமவிதக்கோ காமஸங்கப்பனஸபா⁴வதோ காமாஸவப்பத்தியா ஸாதிஸயத்தா ச காமனாகாரோதி ஆஹ ‘‘காமவிதக்கோ பனேத்த² காமாஸவோ’’தி. தப்³பி³ஸேஸோதி காமாஸவவிஸேஸோ ப⁴வஸபா⁴வத்தாதி அதி⁴ப்பாயோ. காமவிதக்காதி³கே வினோதே³தி அத்தனோ ஸந்தானதோ நீஹரதி ஏதேனாதி வினோத³னம், வீரியந்தி ஆஹ ‘‘வீரியஸம்வரஸங்கா²தேன வினோத³னேனா’’தி.

‘‘ஸத்த போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்தியோ பரிபூரேந்தீ’’தி வசனதோ விஜ்ஜாவிமுத்தீனம் அனதி⁴க³மோ ததோ ச ஸகலவட்டது³க்கா²னதிவத்தி அபா⁴வனாய ஆதீ³னவோ. வுத்தவிபரியாயேன ப⁴க³வதோ ஓரஸபுத்தபா⁴வாதி³வஸேன ச பா⁴வனாய ஆனிஸம்ஸோ வேதி³தப்³போ³. தோ²மேந்தோதி ஆஸவபஹானஸ்ஸ து³க்கரத்தா தாய ஏவ து³க்கரகிரியாய தம் அபி⁴த்த²வந்தோ. ஸம்வரேனேவ பஹீனாதி ஸம்வரேன பஹீனா ஏவ. தேன வுத்தம் ‘‘ந அப்பஹீனேஸுயேவ பஹீனஸஞ்ஞீ’’தி.

ஆஸவஸுத்தவண்ணனா நிட்டி²தா.

5. தா³ருகம்மிகஸுத்தவண்ணனா

59. பஞ்சமே புத்தஸம்பா³த⁴ஸயனந்தி புத்தேஹி ஸம்பா³த⁴ஸயனம். ஏத்த² புத்தஸீஸேன தா³ரபரிக்³க³ஹம் புத்ததா³ரேஸு உப்பிலோ விய. தேன தேஸம் ரோகா³தி³ஹேது ஸோகாபி⁴ப⁴வேன ச சித்தஸ்ஸ ஸம்கிலிட்ட²தம் த³ஸ்ஸேதி. காமபோ⁴கி³னாதி இமினா பன ராகா³பி⁴ப⁴வந்தி. உப⁴யேனபி விக்கி²த்தசித்ததம் த³ஸ்ஸேதி. காஸிகசந்த³னந்தி உஜ்ஜலசந்த³னம். தம் கிர வண்ணவிஸேஸஸமுஜ்ஜலம் ஹோதி பப⁴ஸ்ஸரம், தத³த்த²மேவ நம் ஸண்ஹதரம் கரோந்தி. தேனேவாஹ ‘‘ஸண்ஹசந்த³ன’’ந்தி, காஸிகவத்த²ஞ்ச சந்த³னஞ்சாதி அத்தோ². மாலாக³ந்த⁴விலேபனந்தி வண்ணஸோப⁴த்த²ஞ்சேவ ஸுக³ந்த⁴பா⁴வத்த²ஞ்ச மாலம், ஸுக³ந்த⁴பா⁴வத்தா²ய க³ந்த⁴ம், ச²விராக³கரணத்த²ஞ்சேவ ஸுப⁴த்த²ஞ்ச விலேபனம் தா⁴ரேந்தேன. ஜாதரூபரஜதந்தி ஸுவண்ணஞ்சேவ அவஸிட்ட²த⁴னஞ்ச ஸாதி³யந்தேன. ஸப்³பே³னபி காமேஸு அபி⁴கி³த்³த⁴பா⁴வமேவ பகாஸேதி.

தா³ருகம்மிகஸுத்தவண்ணனா நிட்டி²தா.

6. ஹத்தி²ஸாரிபுத்தஸுத்தவண்ணனா

60. ச²ட்டே² ஹத்தி²ம் ஸாரேதீதி ஹத்தி²ஸாரீ, தஸ்ஸ புத்தோதி ஹத்தி²ஸாரிபுத்தோ. ஸோ கிர ஸாவத்தி²யம் ஹத்தி²ஆசரியஸ்ஸ புத்தோ ப⁴க³வதோ ஸந்திகே பப்³ப³ஜித்வா தீணி பிடகானி உக்³க³ஹேத்வா ஸுகு²மேஸு க²ந்த⁴தா⁴துஆயதனாதீ³ஸு அத்த²ந்தரேஸு குஸலோ அஹோஸி. தேன வுத்தம் – ‘‘தே²ரானம் பி⁴க்கூ²னம் அபி⁴த⁴ம்மகத²ம் கதே²ந்தானம் அந்தரந்தரா கத²ம் ஓபாதேதீ’’தி. தத்த² அந்தரந்தரா கத²ம் ஓபாதேதீதி தே²ரேஹி வுச்சமானஸ்ஸ கதா²பப³ந்த⁴ஸ்ஸ அந்தரே அந்தரே அத்தனோ கத²ம் பவேஸேதீதி அத்தோ². பஞ்சஹி ஸம்ஸக்³கே³ஹீதி ஸவனஸம்ஸக்³கோ³, த³ஸ்ஸனஸம்ஸக்³கோ³, ஸமுல்லாபஸம்ஸக்³கோ³, ஸம்போ⁴க³ஸம்ஸக்³கோ³, காயஸம்ஸக்³கோ³தி இமேஹி பஞ்சஹி ஸம்ஸக்³கே³ஹி. கிட்ட²கா²த³கோதி கிட்ட²ட்டா²னே உப்பன்னஸஸ்ஸஞ்ஹி கிட்ட²ந்தி வுத்தம் காரணூபசாரேன. ஸிப்பியோ ஸுத்தியோ. ஸம்பு³காதி ஸங்க²மாஹ.

கி³ஹிபா⁴வே வண்ணம் கதே²ஸீதி (தீ³. நி. அட்ட². 1.422) கஸ்ஸபஸம்மாஸம்பு³த்³த⁴ஸ்ஸ கிர ஸாஸனே த்³வே ஸஹாயகா அஹேஸும், அஞ்ஞமஞ்ஞம் ஸமக்³கா³ ஏகதோவ ஸஜ்ஜா²யந்தி. தேஸு ஏகோ அனபி⁴ரதோ கி³ஹிபா⁴வே சித்தம் உப்பாதே³த்வா இதரஸ்ஸ ஆரோசேஸி. ஸோ கி³ஹிபா⁴வே ஆதீ³னவம், பப்³ப³ஜ்ஜாய ஆனிஸம்ஸம் த³ஸ்ஸேத்வா ஓவதி³. ஸோ தம் ஸுத்வா அபி⁴ரமித்வா புன ஏகதி³வஸம் தாதி³ஸே சித்தே உப்பன்னே தம் ஏதத³வோச – ‘‘மய்ஹம், ஆவுஸோ, ஏவரூபம் சித்தம் உப்பஜ்ஜதி, இமாஹம் பத்தசீவரம் துய்ஹம் த³ஸ்ஸாமீ’’தி. ஸோ பத்தசீவரலோபே⁴ன தஸ்ஸ கி³ஹிபா⁴வே ஆனிஸம்ஸம் த³ஸ்ஸேத்வா பப்³ப³ஜ்ஜாய ஆதீ³னவம் கதே²ஸி. தஸ்ஸ தம் ஸுத்வாவ கி³ஹிபா⁴வதோ சித்தம் நிவத்தேத்வா பப்³ப³ஜ்ஜாயமேவ அபி⁴ரமி. ஏவமேஸ ததா³ ஸீலவந்தஸ்ஸ பி⁴க்கு²னோ கி³ஹிபா⁴வே ஆனிஸம்ஸகதா²ய கதி²தத்தா இதா³னி ச² வாரே விப்³ப⁴மித்வா ஸத்தமவாரே பப்³ப³ஜித்வா மஹாமோக்³க³ல்லானஸ்ஸ மஹாகோட்டி²கத்தே²ரஸ்ஸ ச அபி⁴த⁴ம்மகத²ம் கதே²ந்தானம் அந்தரந்தரா கத²ம் ஓபாதேஸி. அத² நம் மஹாகோட்டி²கத்தே²ரோ அபஸாதே³ஸி. ஸோ மஹாஸாவகஸ்ஸ கதி²தே பதிட்டா²தும் அஸக்கோந்தோ விப்³ப⁴மித்வா கி³ஹி ஜாதோ. போட்ட²பாத³ஸ்ஸ பனாயம் கி³ஹிஸஹாயகோ அஹோஸி, தஸ்மா விப்³ப⁴மித்வா த்³வீஹதீஹச்சயேன போட்ட²பாத³ஸ்ஸ ஸந்திகம் க³தோ. அத² நம் ஸோ தி³ஸ்வா – ‘‘ஸம்ம, கிம் தயா கதம், ஏவரூபஸ்ஸ நாம ஸத்து² ஸாஸனா அபஸக்கந்தோஸி, ஏஹி பப்³ப³ஜிதும் தா³னி தே வட்டதீ’’தி தம் க³ஹேத்வா ப⁴க³வதோ ஸந்திகம் அக³மாஸி. தஸ்மிம் டா²னே பப்³ப³ஜித்வா அரஹத்தம் பாபுணி. தேன வுத்தம் ‘‘ஸத்தமே வாரே பப்³ப³ஜித்வா அரஹத்தம் பாபுணீ’’தி.

ஹத்தி²ஸாரிபுத்தஸுத்தவண்ணனா நிட்டி²தா.

7. மஜ்ஜே²ஸுத்தவண்ணனா

61. ஸத்தமே மந்தாதி ய-காரலோபேன நித்³தே³ஸோ, கரணத்தே² வா ஏதம் பச்சத்தவசனம். தேனாஹ ‘‘தாய உபோ⁴ அந்தே விதி³த்வா’’தி. ப²ஸ்ஸவஸேன நிப்³ப³த்தத்தாதி த்³வயத்³வயஸமாபத்தியம் அஞ்ஞமஞ்ஞம் ஸம்ப²ஸ்ஸவஸேன நிப்³ப³த்தத்தா, ‘‘ப²ஸ்ஸபச்சயா தண்ஹா, தண்ஹாபச்சயா உபாதா³னம், உபாதா³னபச்சயா ப⁴வோ, ப⁴வபச்சயா ஜாதீ’’தி இமினா சானுக்கமேன ப²ஸ்ஸஸமுட்டா²னத்தா இமஸ்ஸ காயஸ்ஸ ப²ஸ்ஸவஸேன நிப்³ப³த்தத்தாதி வுத்தம். ஏகோ அந்தோதி ஏத்த² அயம் அந்த-ஸத்³தோ³ அந்தஅப்³ப⁴ந்தரமரியாத³லாமகஅபா⁴வகோட்டா²ஸபத³பூரணஸமீபாதீ³ஸு தி³ஸ்ஸதி. ‘‘அந்தபூரோ உத³ரபூரோ’’திஆதீ³ஸு (ஸு. நி. 197) ஹி அந்தே அந்தஸத்³தோ³. ‘‘சரந்தி லோகே பரிவாரச²ன்னா அந்தோ அஸுத்³தா⁴, ப³ஹி ஸோப⁴மானா’’திஆதீ³ஸு (ஸம். நி. 1.122) அப்³ப⁴ந்தரே. ‘‘காயப³ந்த⁴னஸ்ஸ அந்தோ ஜீரதி (சூளவ. 278) ஸா ஹரிதந்தம் வா பந்த²ந்தம் வா ஸேலந்தம் வா உத³கந்தம் வா’’திஆதீ³ஸு (ம. நி. 1.304) மரியாதா³யம். ‘‘அந்தமித³ம், பி⁴க்க²வே, ஜீவிகான’’ந்திஆதீ³ஸு (ஸம். நி. 3.80; இதிவு. 91) லாமகே. ‘‘ஏஸேவந்தோ து³க்க²ஸ்ஸா’’திஆதீ³ஸு (ம. நி. 3.393; ஸம். நி. 2.51) அபா⁴வே. ஸப்³ப³பச்சயஸங்க²யோ ஹி து³க்க²ஸ்ஸ அபா⁴வோ கோடீதிபி வுச்சதி. ‘‘தயோ அந்தா’’திஆதீ³ஸு (தீ³. நி. 3.305) கோட்டா²ஸே. ‘‘இங்க⁴ தாவ ஸுத்தந்தம் வா கா³தா²யோ வா அபி⁴த⁴ம்மம் வா பரியாபுணஸ்ஸு, ஸுத்தந்தே ஓகாஸம் காராபேத்வா’’தி (பாசி. 442) ச ஆதீ³ஸு பத³பூரணே. ‘‘கா³மந்தம் வா ஓஸடோ (பாரா. 409-410; சூளவ. 343) கா³மந்தஸேனாஸன’’ந்திஆதீ³ஸு (பாரா. அட்ட². 2.410) ஸமீபே. ஸ்வாயமித⁴ கோட்டா²ஸே வத்ததீதி அயமேகோ கோட்டா²ஸோதி.

ஸந்தோ பரமத்த²தோ விஜ்ஜமானோ த⁴ம்மஸமூஹோதி ஸக்காயோ, பஞ்சுபாதா³னக்க²ந்தா⁴. தேனாஹ ‘‘தேபூ⁴மகவட்ட’’ந்தி. ஸேஸமேத்த² ஸுவிஞ்ஞேய்யமேவ.

மஜ்ஜே²ஸுத்தவண்ணனா நிட்டி²தா.

8. புரிஸிந்த்³ரியஞாணஸுத்தவண்ணனா

62. அட்ட²மே நிப்³ப³த்திவஸேன அபாயஸம்வத்தனியேன வா கம்முனா அபாயேஸு நியுத்தோதி ஆபாயிகோ நேரயிகோதி ஏத்தா²பி ஏஸேவ நயோ. அவீசிம்ஹி உப்பஜ்ஜித்வா தத்த² ஆயுகப்பஸஞ்ஞிதம் அந்தரகப்பம் திட்ட²தீதி கப்பட்டோ². நிரயூபபத்திபரிஹரணவஸேன திகிச்சி²தும் அஸக்குணேய்யோதி அதேகிச்சோ². அக²ண்டா³னீதி ஏகதே³ஸேனபி அக²ண்டி³தானி. பி⁴ன்னகாலதோ பட்டா²ய பீ³ஜம் பீ³ஜத்தா²ய ந உபகப்பதி. அபூதீனீதி உத³கதேமனேன அபூதிகானி. பூதிகஞ்ஹி பீ³ஜம் பீ³ஜத்தா²ய ந உபகப்பதி. அவாதாதபஹதானீதி வாதேன ச ஆதபேன ச ந ஹதானி நிரோஜதம் ந பாபிதானி. நிரோஜஞ்ஹி கஸடம் பீ³ஜம் பீ³ஜத்தா²ய ந உபகப்பதி. ‘‘ஸாராதா³னீ’’தி வத்தப்³பே³ ஆ-காரஸ்ஸ ரஸ்ஸத்தம் கத்வா பாளியம் ‘‘ஸாரதா³னீ’’தி வுத்தந்தி ஆஹ ‘‘ஸாராதா³னீ’’தி. தண்டு³லஸாரஸ்ஸ ஆதா³னதோ ஸாராதா³னி, க³ஹிதஸாரானி பதிட்டி²தஸாரானி. நிஸ்ஸரஞ்ஹி பீ³ஜம் பீ³ஜத்தா²ய ந உபகப்பதி. ஸுக²ஸயிதானீதி சத்தாரோ மாஸே கோட்டே² பக்கி²த்தனியாமேனேவ ஸுக²ஸயிதானி ஸுட்டு² ஸன்னிசிதானி. மண்ட³கே²த்தேதி ஊஸகா²ராதி³தோ³ஸேஹி அவித்³த⁴ஸ்தே ஸாரக்கே²த்தே. அபி⁴தோ³தி அபி⁴-ஸத்³தே³ன ஸமானத்த²னிபாதபத³ந்தி ஆஹ ‘‘அபி⁴அட்³ட⁴ரத்த’’ந்தி. நத்தி² ஏதஸ்ஸ பி⁴தா³தி வா அபி⁴தோ³. ‘‘அபி⁴த³ம் அட்³ட⁴ரத்த’’ந்தி வத்தப்³பே³ உபயோக³த்தே² பச்சத்தவசனம். அட்³ட⁴ரத்தந்தி ச அச்சந்தஸம்யோக³வசனம், பு⁴ம்மத்தே² வா. தஸ்மா அபி⁴தோ³ அட்³ட⁴ரத்தந்தி அபி⁴ன்னே அட்³ட⁴ரத்தஸமயேதி அத்தோ². புண்ணமாஸியஞ்ஹி க³க³னமஜ்ஜ²ஸ்ஸ புரதோ வா பச்ச²தோ வா சந்தே³ டி²தே அட்³ட⁴ரத்தஸமயோ பி⁴ன்னோ நாம ஹோதி, மஜ்ஜே² ஏவ பன டி²தே அபி⁴ன்னோ நாம.

ஸுப்பபு³த்³த⁴ஸுனக்க²த்தாத³யோதி ஏத்த² (த⁴. ப. அட்ட². 2.127 ஸுப்பபு³த்³த⁴ஸக்யவத்து²) ஸுப்பபு³த்³தோ⁴ கிர ஸாகியோ ‘‘மம தீ⁴தரம் ச²ட்³டே³த்வா நிக்க²ந்தோ, மம புத்தம் பப்³பா³ஜேத்வா தஸ்ஸ வேரிட்டா²னே டி²தோ சா’’தி இமேஹி த்³வீஹி காரணேஹி ஸத்த²ரி ஆகா⁴தம் ப³ந்தி⁴த்வா ஏகதி³வஸம் ‘‘ந தா³னி நிமந்திதட்டா²னம் க³ந்த்வா பு⁴ஞ்ஜிதும் த³ஸ்ஸாமீ’’தி க³மனமக்³க³ம் பித³ஹித்வா அந்தரவீதி²யம் ஸுரம் பிவந்தோ நிஸீதி³. அத²ஸ்ஸ ஸத்த²ரி பி⁴க்கு²ஸங்க⁴பரிவுதே தம் டா²னம் ஆக³தே ‘‘ஸத்தா² ஆக³தோ’’தி ஆரோசேஸும். ஸோ ஆஹ – ‘‘புரதோ க³ச்சா²தி தஸ்ஸ வதே³த², நாயம் மயா மஹல்லகதரோ, நாஸ்ஸ மக்³க³ம் த³ஸ்ஸாமீ’’தி. புனப்புனம் வுச்சமானோபி ததே²வ நிஸீதி³. ஸத்தா² மாதுலஸ்ஸ ஸந்திகா மக்³க³ம் அலபி⁴த்வா ததோவ நிவத்தி. ஸோபி சரபுரிஸம் பேஸேஸி – ‘‘க³ச்ச² தஸ்ஸ கத²ம் ஸுத்வா ஏஹீ’’தி. ஸத்தா²பி நிவத்தந்தோ ஸிதம் கத்வா ஆனந்த³த்தே²ரேன – ‘‘கோ நு கோ², ப⁴ந்தே, ஸிதபாதுகம்மே பச்சயோ’’தி புட்டோ² ஆஹ – ‘‘பஸ்ஸஸி, ஆனந்த³, ஸுப்பபு³த்³த⁴’’ந்தி. பஸ்ஸாமி, ப⁴ந்தே. பா⁴ரியம் தேன கம்மம் கதம் மாதி³ஸஸ்ஸ பு³த்³த⁴ஸ்ஸ மக்³க³ம் அதே³ந்தேன, இதோ ஸத்தமே தி³வஸே ஹேட்டா²பாஸாதே³ பாஸாத³மூலே பத²வியா பவிஸிஸ்ஸதீ’’தி ஆசிக்கி².

ஸுனக்க²த்தோபி (ம. நி. அட்ட². 1.147) புப்³பே³ ப⁴க³வந்தம் உபஸங்கமித்வா தி³ப்³ப³சக்கு²பரிகம்மம் புச்சி². அத²ஸ்ஸ ப⁴க³வா கதே²ஸி. ஸோ தி³ப்³ப³சக்கு²ம் நிப்³ப³த்தேத்வா ஆலோகம் வட்³டே⁴த்வா ஓலோகேந்தோ தே³வலோகே நந்த³னவனசித்தலதாவனபா²ருஸகவனமிஸ்ஸகவனேஸு தி³ப்³ப³ஸம்பத்திம் அனுப⁴வமானே தே³வபுத்தே ச தே³வதீ⁴தரோ ச தி³ஸ்வா – ‘‘ஏதேஸம் ஏவரூபாய அத்தபா⁴வஸம்பத்தியா டி²தானம் கிர மது⁴ரோ நு கோ² ஸத்³தோ³ ப⁴விஸ்ஸதீ’’தி ஸத்³த³ம் ஸோதுகாமோ ஹுத்வா த³ஸப³லம் உபஸங்கமித்வா தி³ப்³ப³ஸோததா⁴துபரிகம்மம் புச்சி². ப⁴க³வா பனஸ்ஸ – ‘‘தி³ப்³ப³ஸோததா⁴துஸ்ஸ உபனிஸ்ஸயோ நத்தீ²’’தி ஞத்வா பரிகம்மம் ந கதே²ஸி. ந ஹி பு³த்³தா⁴ யம் ந ப⁴விஸ்ஸதி, தஸ்ஸ பரிகம்மம் கதே²ந்தி. ஸோ ப⁴க³வதி ஆகா⁴தம் ப³ந்தி⁴த்வா சிந்தேஸி – ‘‘அஹம் ஸமணம் கோ³தமம் பட²மம் தி³ப்³ப³சக்கு²பரிகம்மம் புச்சி²ம், ஸோ மய்ஹம் ‘ஸம்பஜ்ஜது வா மா வா ஸம்பஜ்ஜதூ’தி கதே²ஸி. அஹம் பன பச்சத்தபுரிஸகாரேன தம் நிப்³ப³த்தேத்வா தி³ப்³ப³ஸோததா⁴துபரிகம்மம் புச்சி²ம், தம் மே ந கதே²ஸி. அத்³தா⁴ ஏவம் ஹோதி ‘அயம் ராஜபப்³ப³ஜிதோ தி³ப்³ப³சக்கு²ஞாணம் நிப்³ப³த்தேத்வா, தி³ப்³ப³ஸோதஞாணம் நிப்³ப³த்தேத்வா, சேதோபரியகம்மஞாணம் நிப்³ப³த்தேத்வா, ஆஸவானம் க²யே ஞாணம் நிப்³ப³த்தேத்வா, மயா ஸமஸமோ ப⁴விஸ்ஸதீ’தி இஸ்ஸாமச்ச²ரியவஸேன மய்ஹம் ந கதே²தீ’’தி பி⁴ய்யோஸோ ஆகா⁴தம் ப³ந்தி⁴த்வா காஸாயானி ச²ட்³டே³த்வா கி³ஹிபா⁴வம் பத்வாபி ந துண்ஹீபூ⁴தோ விஹாஸி. த³ஸப³லம் பன அஸதா துச்சே²ன அப்³பா⁴சிக்கி²த்வா அபாயூபகோ³ அஹோஸி. தம்பி ப⁴க³வா ப்³யாகாஸி. வுத்தஞ்ஹேதம் – ‘‘ஏவம்பி கோ², ப⁴க்³க³வ, ஸுனக்க²த்தோ லிச்ச²விபுத்தோ மயா வுச்சமானோ அபக்கமேவ இமஸ்மா த⁴ம்மவினயா, யதா² தம் ஆபாயிகோ’’தி (தீ³. நி. 3.6). தேன வுத்தம் ‘‘அபரேபி ஸுப்பபு³த்³த⁴ஸுனக்க²த்தாத³யோ ப⁴க³வதா ஞாதாவா’’தி. ஆதி³-ஸத்³தே³ன கோகாலிகாதீ³னம் ஸங்க³ஹோ த³ட்ட²ப்³போ³.

ஸுஸீமோ பரிப்³பா³ஜகோதி (ஸம். நி. அட்ட². 2.2.70) ஏவம்னாமகோ வேத³ங்கே³ஸு குஸலோ பண்டி³தோ பரிப்³பா³ஜகோ. அஞ்ஞதித்தி²யா ஹி பரிஹீனலாப⁴ஸக்காரஸிலோகா ‘‘ஸமணோ கோ³தமோ ந ஜாதிகோ³த்தாதீ³னி ஆரப்³ப⁴ லாப⁴க்³க³ப்பத்தோ ஜாதோ, கவிஸேட்டோ² பனேஸ உத்தமகவிதாய ஸாவகானம் ப³ந்த⁴ம் ப³ந்தி⁴த்வா தே³தி. தே தம் உக்³க³ண்ஹித்வா உபட்டா²கானம் உபனிஸின்னகத²ம்பி அனுமோத³னம்பி ஸரப⁴ஞ்ஞம்பீதி ஏவமாதீ³னி கதே²ந்தி. தே தேஸம் பஸன்னானம் லாப⁴ம் உபஸம்ஹரந்தி. ஸசே மயம் யம் ஸமணோ கோ³தமா ஜானாதி, ததோ தோ²கம் ஜானேய்யாம, அத்தனோ ஸமயம் தத்த² பக்கி²பித்வா மயம்பி உபட்டா²கானம் கதே²ய்யாம. ததோ ஏதேஹி லாபி⁴தரா ப⁴வேய்யாம. கோ நு கோ² ஸமணஸ்ஸ கோ³தமஸ்ஸ ஸந்திகே பப்³ப³ஜித்வா கி²ப்பமேவ உக்³க³ண்ஹிதும் ஸக்கி²ஸ்ஸதீ’’தி ஏவம் சிந்தேத்வா ‘‘ஸுஸிமோ படிப³லோ’’தி தி³ஸ்வா உபஸங்கமித்வா ஏவமாஹம்ஸு ‘‘ஏஹி த்வம், ஆவுஸோ ஸுஸீம, ஸமணே கோ³தமே ப்³ரஹ்மசரியம் சர, த்வம் த⁴ம்மம் பரியாபுணித்வா அம்ஹே வாசேய்யாஸி, தம் மயம் த⁴ம்மம் பரியாபுணித்வா கி³ஹீனம் பா⁴ஸிஸ்ஸாம, ஏவம் மயம்பி ஸக்கதா ப⁴விஸ்ஸாம க³ருகதா மானிதா பூஜிதா லாபி⁴னோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரான’’ந்தி (ஸம். நி. 2.70).

அத² ஸுஸீமோ பரிப்³பா³ஜகோ தேஸம் வசனம் ஸம்படிச்சி²த்வா யேனானந்தோ³ தேனுபஸங்கமி, உபஸங்கமித்வா பப்³ப³ஜ்ஜம் யாசி. தே²ரோ ச தம் ஆதா³ய ப⁴க³வந்தம் உபஸங்கமித்வா ஏதமத்த²ம் ஆரோசேஸி. ப⁴க³வா பன சிந்தேஸி ‘‘அயம் பரிப்³பா³ஜகோ தித்தி²யஸமயே ‘அஹம் பாடிஏக்கோ ஸத்தா²’தி படிஜானமானோ சரதி, ‘இதே⁴வ மக்³க³ப்³ரஹ்மசரியம் சரிதும் இச்சா²மீ’தி கிர வத³தி, கிம் நு கோ² மயி பஸன்னோ, உதா³ஹு மய்ஹம் வா மம ஸாவகானம் த⁴ம்மகதா²ய பஸன்னோ’’தி. அத²ஸ்ஸ ஏகட்டா²னேபி பஸாதா³பா⁴வம் ஞத்வா ‘‘அயம் மம ஸாஸனே ‘த⁴ம்மம் தே²னேஸ்ஸாமீ’தி பப்³ப³ஜதி, இதிஸ்ஸ ஆக³மனம் அபரிஸுத்³த⁴ம், நிப்ப²த்தி நு கோ² கீதி³ஸா’’தி ஓலோகேந்தோ ‘‘கிஞ்சாபி ‘த⁴ம்மம் தே²னேஸ்ஸாமீ’தி பப்³ப³ஜதி, கதிபாஹேனேவ பன க⁴டேத்வா அரஹத்தம் க³ண்ஹிஸ்ஸதீ’’தி ஞத்வா ‘‘தேனஹானந்த³, ஸுஸீமம் பப்³பா³ஜேதா²’’தி ஆஹ. தம் ஸந்தா⁴யேதம் வுத்தம் ‘‘ஏவம் ப⁴க³வதா கோ ஞாதோ? ஸுஸீமோ பரிப்³பா³ஜகோ’’தி.

ஸந்ததிமஹாமத்தோதி (த⁴. ப. அட்ட². 2.141 ஸந்ததிமஹாமத்தவத்து²) ஸோ கிர ஏகஸ்மிம் காலே ரஞ்ஞோ பஸேனதி³ஸ்ஸ பச்சந்தம் குபிதம் வூபஸமேத்வா ஆக³தோ. அத²ஸ்ஸ ராஜா துட்டோ² ஸத்த தி³வஸானி ரஜ்ஜம் த³த்வா ஏகம் நச்சகீ³தகுஸலம் இத்தி²ம் அதா³ஸி. ஸோ ஸத்த தி³வஸானி ஸுராமத³மத்தோ ஹுத்வா ஸத்தமே தி³வஸே ஸப்³பா³லங்காரப்படிமண்டி³தோ ஹத்தி²க்க²ந்த⁴வரக³தோ நஹானதித்த²ம் க³ச்ச²ந்தோ ஸத்தா²ரம் பிண்டா³ய பவிஸந்தம் த்³வாரந்தரே தி³ஸ்வா ஹத்தி²க்க²ந்த⁴வரக³தோவ ஸீஸம் சாலேத்வா வந்தி³. ஸத்தா² ஸிதம் கத்வா ‘‘கோ நு கோ², ப⁴ந்தே, ஸிதபாதுகரணே ஹேதூ’’தி ஆனந்த³த்தே²ரேன புட்டோ² ஸிதகாரணம் ஆசிக்க²ந்தோ ஆஹ – ‘‘பஸ்ஸஸி, ஆனந்த³, ஸந்ததிமஹாமத்தம், அஜ்ஜேவ ஸப்³பா³ப⁴ரணப்படிமண்டி³தோ மம ஸந்திகம் ஆக³ந்த்வா சாதுப்பதி³ககா³தா²வஸானே அரஹத்தம் பத்வா பரினிப்³பா³யிஸ்ஸதீ’’தி. தேன வுத்தம் ‘‘ஏவம் கோ ஞாதோ ப⁴க³வதாதி? ஸந்ததிமஹாமத்தோ’’தி.

புரிஸிந்த்³ரியஞாணஸுத்தவண்ணனா நிட்டி²தா.

9. நிப்³பே³தி⁴கஸுத்தவண்ணனா

63. நவமே பரிஹாயதி அத்தனோ ப²லம் பரிக்³க³ஹேத்வா வத்ததி, தஸ்ஸ வா காரணபா⁴வம் உபக³ச்ச²தீதி பரியாயோதி இத⁴ காரணம் வுத்தந்தி ஆஹ ‘‘நிப்³பி³ஜ்ஜ²னகாரண’’ந்தி.

‘‘அனுஜானாமி, பி⁴க்க²வே, அஹதானம் வத்தா²னம் தி³கு³ணம் ஸங்கா⁴டி’’ந்தி ஏத்த² ஹி படலட்டோ² கு³ணட்டோ². ‘‘அச்சேந்தி காலா தரயந்தி ரத்தியோ, வயோகு³ணா அனுபுப்³ப³ம் ஜஹந்தீ’’தி (ஸம். நி. 1.4) ஏத்த² ராஸட்டோ² கு³ணட்டோ². ‘‘ஸதகு³ணா த³க்கி²ணா பாடிகங்கி²தப்³பா³’’தி (ம. நி. 3.379) ஏத்த² ஆனிஸம்ஸட்டோ². ‘‘அந்தம் அந்தகு³ணம் (தீ³. நி. 2.377; ம. நி. 1.110; கு². பா. 3.த்³வத்திம்ஸாகாரோ), கயிரா மாலாகு³ணே ப³ஹூ’’தி (த⁴. ப. 53) ஏத்த² ப³ந்த⁴னட்டோ² கு³ணட்டோ². இதா⁴பி ஏஸோவ அதி⁴ப்பேதோதி ஆஹ ‘‘ப³ந்த⁴னட்டே²ன கு³ணா’’தி. காமராக³ஸ்ஸ ஸம்யோஜனஸ்ஸ பச்சயபா⁴வேன வத்து²காமேஸுபி ப³ந்த⁴னட்டோ² ராஸட்டோ² வா கு³ணட்டோ² த³ட்ட²ப்³போ³. சக்கு²விஞ்ஞேய்யாதி வா சக்கு²விஞ்ஞாணதம்த்³வாரிகவிஞ்ஞாணேஹி ஜானிதப்³பா³. ஸோதவிஞ்ஞேய்யாதிஆதீ³ஸுபி ஏஸேவ நயோ. இட்டா²ரம்மணபூ⁴தாதி ஸபா⁴வேனேவ இட்டா²ரம்மணஜாதிகா, இட்டா²ரம்மணபா⁴வம் வா பத்தா. கமனீயாதி காமேதப்³பா³. மனவட்³ட⁴னகாதி மனோஹரா. ஏதேன பரிகப்பனதோபி இட்டா²ரம்மணபா⁴வம் ஸங்க³ண்ஹாதி. பியஜாதிகாதி பியாயிதப்³ப³ஸபா⁴வா. காமூபஸஞ்ஹிதாதி காமராகே³ன உபேச்ச ஸம்ப³ந்த⁴னீயா ஸம்ப³ந்தா⁴ காதப்³பா³. தேனாஹ ‘‘ஆரம்மணம் கத்வா’’திஆதி³. ஸங்கப்பராகோ³தி வா ஸுபா⁴தி³வஸேன ஸங்கப்பிதவுத்த²ம்ஹி உப்பன்னராகோ³. ஏவமேத்த² வத்து²காமம் படிக்கி²பித்வா கிலேஸகாமோ வுத்தோ தஸ்ஸேவ வஸேன தேஸம்பி காமபா⁴வஸித்³தி⁴தோ, கிலேஸகாமஸ்ஸபி இட்ட²வேத³னா தி³ட்டா²தி³ஸம்பயோக³பே⁴தே³ன பவத்திஆகாரபே⁴தே³ன ச அத்தி² விசித்தகாதி ததோ விஸேஸேதும் ‘‘சித்ரவிசித்ராரம்மணானீ’’தி ஆஹ, நானப்பகாரானி ரூபாதி³ஆரம்மணானீதி அத்தோ².

அதே²த்த² தீ⁴ரா வினயந்தி ச²ந்த³ந்தி அத² ஏதேஸு ஆரம்மணேஸு தி⁴திஸம்பன்னா பண்டி³தா ச²ந்த³ராக³ம் வினயந்தி.

தஜ்ஜாதிகந்தி தம்ஸபா⁴வம், அத்த²தோ பன தஸ்ஸ காமஸ்ஸ அனுரூபந்தி வுத்தம் ஹோதி. புஞ்ஞஸ்ஸ பா⁴கோ³ புஞ்ஞபா⁴கோ³, புஞ்ஞகோட்டா²ஸோ. தேன நிப்³ப³த்தோ, தத்த² வா ப⁴வோதி புஞ்ஞபா⁴கி³யோ. அபுஞ்ஞபா⁴கி³யோதி ஏத்தா²பி ஏஸேவ நயோ. விபாகோயேவ வேபக்கந்தி ஆஹ ‘‘வோஹாரவிபாக’’ந்தி.

ஸப்³ப³ஸங்கா³ஹிகாதி குஸலாகுஸலஸாதா⁴ரணா. ஸம்வித³ஹனசேதனாதி ஸம்பயுத்தத⁴ம்மேஸு ஸம்வித³ஹனலக்க²ணா சேதனா. உரத்தாளிந்தி உரம் தாளேத்வா. ஏகபத³ந்தி ஏகபத³சிதம் மந்தம். தேனாஹ ‘‘ஏகபத³மந்தம் வா’’திஆதி³.

நிப்³பே³தி⁴கஸுத்தவண்ணனா நிட்டி²தா.

10. ஸீஹனாத³ஸுத்தவண்ணனா

64. த³ஸமே ததா²க³தப³லானீதி அஞ்ஞேஹி அஸாதா⁴ரணானி ததா²க³தஸ்ஸேவ ப³லானி. நனு சேதானி ஸாவகானம்பி ஏகச்சானி உப்பஜ்ஜந்தீதி? காமம் உப்பஜ்ஜந்தி, யாதி³ஸானி பன பு³த்³தா⁴னம் டா²னாட்டா²னஞாணாதீ³னி, ந தாதி³ஸானி தத³ஞ்ஞேஸம் கதா³சி உப்பஜ்ஜந்தீதி அஞ்ஞேஹி அஸாதா⁴ரணானி. இமமேவ ஹி யதா²வுத்தம் லேஸம் அபேக்கி²த்வா ஸாதா⁴ரணபா⁴வதோ ஆஸயானுஸயஞாணாதீ³ஸு ஏவ அஸாதா⁴ரணஸமஞ்ஞா நிருள்ஹா. யதா² புப்³ப³பு³த்³தா⁴னம் ப³லானி புஞ்ஞஸ்ஸ ஸம்பத்தியா ஆக³தானி, ததா² ஆக³தப³லானீதி வா ததா²க³தப³லானி. உஸப⁴ஸ்ஸ இத³ம் ஆஸப⁴ம், ஸேட்ட²ட்டா²னம். பமுக²னாத³ந்தி ஸேட்ட²னாத³ம். படிவேத⁴ஞாணஞ்சேவ தே³ஸனாஞாணஞ்சாதி ஏத்த² பஞ்ஞாய பபா⁴விதம் அத்தனோ அரியப²லாவஹம் படிவேத⁴ஞாணம். கருணாய பபா⁴விதம் ஸாவகானம் அரியப²லாவஹம் தே³ஸனாஞாணம். தத்த² படிவேத⁴ஞாணம் உப்பஜ்ஜமானம் உப்பன்னந்தி து³வித⁴ம். தஞ்ஹி அபி⁴னிக்க²மனதோ யாவ அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. துஸிதப⁴வனதோ யாவ மஹாபோ³தி⁴பல்லங்கே அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. தீ³பங்கரதோ பட்டா²ய யாவ அரஹத்தமக்³கா³ உப்பஜ்ஜமானம், ப²லக்க²ணே உப்பன்னம் நாம. தே³ஸனாஞாணம்பி பவத்தமானம் பவத்தந்தி து³வித⁴ம். தஞ்ஹி யாவ அஞ்ஞாதகோண்ட³ஞ்ஞஸ்ஸ ஸோதாபத்திமக்³கா³ பவத்தமானம், ப²லக்க²ணே பவத்தம் நாம. தேஸு படிவேத⁴ஞாணம் லோகுத்தரம், தே³ஸனாஞாணம் லோகியம். உப⁴யம்பி பனேதம் அஞ்ஞேஹி அஸாதா⁴ரணம், பு³த்³தா⁴னஞ்ஞேவ ஓரஸஞாணம்.

டா²னஞ்ச டா²னதோ பஜானாதீதி காரணஞ்ச காரணதோ பஜானாதி. யஸ்மா தத்த² ப²லம் திட்ட²தி ததா³யத்தவுத்திதாய உப்பஜ்ஜதி சேவ பவத்ததி ச, தஸ்மா டா²னந்தி வுச்சதி. ப⁴க³வா ‘‘யே யே த⁴ம்மா யேஸம் யேஸம் த⁴ம்மானம் ஹேதூ பச்சயா உப்பாதா³ய, தம் தம் டா²னம், யே யே த⁴ம்மா யேயம் யேயம் த⁴ம்மானம் ந ஹேதூ ந பச்சயா உப்பாதா³ய, தம் தம் அட்டா²ன’’ந்தி பஜானந்தோ டா²னதோ அட்டா²னதோ யதா²பூ⁴தம் பஜானாதி.

ஸமாதி³யந்தீதி ஸமாதா³னானி, தானி பன ஸமாதி³யித்வா கதானி ஹோந்தீதி ஆஹ ‘‘ஸமாதி³யித்வா கதான’’ந்தி. கம்மமேவ வா கம்மஸமாதா³னந்தி ஏதேன ‘‘ஸமாதா³ன’’ந்தி ஸத்³த³ஸ்ஸ அபுப்³ப³த்தா²பா⁴வம் த³ஸ்ஸேதி முத்தக³தஸத்³தே³ க³தஸத்³த³ஸ்ஸ விய. க³தீதி நிரயாதி³க³தியோ. உபதீ⁴தி அத்தபா⁴வோ. காலோதி கம்மஸ்ஸ விபச்சனாரஹகாலோ. பயோகோ³தி விபாகுப்பத்தியா பச்சயபூ⁴தா கிரியா.

சதுன்னம் ஜா²னானந்தி பச்சனீகஜ்ஜா²பனட்டே²ன ஆரம்மணூபனிஜ்ஜா²னட்டே²ன ச சதுன்னம் ரூபாவசரஜ்ஜா²னானம். சதுக்கனயேன ஹேதம் வுத்தம். அட்ட²ன்னம் விமோக்கா²னந்தி ‘‘ரூபீ ரூபானி பஸ்ஸதீ’’திஆதீ³னம் (ம. நி. 2.248; 3.312; த⁴. ஸ. 248; படி. ம. 1.209) அட்ட²ன்னம் விமோக்கா²னம். திண்ணம் ஸமாதீ⁴னந்தி ஸவிதக்கஸவிசாராதீ³னம் திண்ணம் ஸமாதீ⁴னம். நவன்னம் அனுபுப்³ப³ஸமாபத்தீனந்தி பட²மஜ்ஜா²னஸமாபத்திஆதீ³னம் நவன்னம் அனுபுப்³ப³ஸமாபத்தீனம். ஏத்த² ச படிபாடியா அட்ட²ன்னம் ஸமாதீ⁴திபி நாமம், ஸமாபத்தீதிபி சித்தேகக்³க³தாஸப்³பா⁴வதோ, நிரோத⁴ஸமாபத்தியா தத³பா⁴வதோ ந ஸமாதீ⁴தி நாமம். ஹானபா⁴கி³யம் த⁴ம்மந்தி அப்பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானம் காமாதி³பக்க²ந்த³னம். விஸேஸபா⁴கி³யம் த⁴ம்மந்தி பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானம் து³தியஜ்ஜா²னாதி³பக்க²ந்த³னம். இதி ஸஞ்ஞாமனஸிகாரானம் காமாதி³து³தியஜ்ஜா²னாதி³பக்க²ந்த³னானி ஹானபா⁴கி³யவிஸேஸபா⁴கி³யத⁴ம்மாதி த³ஸ்ஸிதானி. தேஹி பன ஜா²னானம் தம்ஸபா⁴வதா த⁴ம்மஸத்³தே³ன வுத்தா. தஸ்மாதி வுத்தமேவத்த²ம் ஹேதுபா⁴வேன பச்சாமஸதி. வோதா³னந்தி பகு³ணதாஸங்கா²தம் வோதா³னம். தஞ்ஹி பட²மஜ்ஜா²னாதீ³ஹி வுட்ட²ஹித்வா து³தியஜ்ஜா²னாதீ³னம் அதி⁴க³மஸ்ஸ பச்சயத்தா ‘‘வுட்டா²ன’’ந்தி வுத்தம். யே பன ‘‘நிரோத⁴தோ ப²லஸமாபத்தியா வுட்டா²னந்தி பாளி நத்தீ²’’தி வத³ந்தி. தே ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனம் ப²லஸமாபத்தியா அனந்தரபச்சயேன பச்சயோ’’தி இமாய பாளியம் (பட்டா². 1.1.417) படிஸேதே⁴தப்³பா³.

ஸீஹனாத³ஸுத்தவண்ணனா நிட்டி²தா.

மஹாவக்³க³வண்ணனா நிட்டி²தா.