7. பட²மஸமயஸுத்தவண்ணனா

27. ஸத்தமே வட்³டே⁴தீதி மனஸோ விவட்டனிஸ்ஸிதம் வட்³டி⁴ம் ஆவஹதி. மனோபா⁴வனீயோதி வா மனஸா பா⁴விதோ ஸம்பா⁴விதோ. யஞ்ச ஆவஜ்ஜதோ மனஸி கரோதோ சித்தம் வினீவரணம் ஹோதி. இமஸ்மிம் பக்கே² கம்மஸாத⁴னோ ஸம்பா⁴வனத்தோ² பா⁴வனீய-ஸத்³தோ³. ‘‘தி²னமித்³த⁴வினோத³னகம்மட்டா²ன’’ந்தி வத்வா ததே³வ விபா⁴வேந்தோ ‘‘ஆலோகஸஞ்ஞம் வா’’திஆதி³மாஹ. வீரியாரம்ப⁴வத்து²ஆதீ³னம் வாதி ஏத்த² ஆதி³-ஸத்³தே³ன இத⁴ அவுத்தானம் அதிபோ⁴ஜனே நிமித்தக்³கா³ஹாதீ³னம் ஸங்க³ஹோ த³ட்ட²ப்³போ³. வுத்தஞ்ஹேதம் ‘‘ச² த⁴ம்மா தி²னமித்³த⁴ஸ்ஸ பஹானாய ஸம்வத்தந்தி அதிபோ⁴ஜனே நிமித்தக்³கா³ஹோ, இரியாபத²ஸம்பரிவத்தனதா, ஆலோகஸஞ்ஞாமனஸிகாரோ, அப்³போ⁴காஸவாஸோ, கல்யாணமித்ததா, ஸப்பாயகதா²’’தி (இதிவு. அட்ட². 111). அந்தராயஸத்³த³பரியாயோ இத⁴ அந்தரா-ஸத்³தோ³தி ஆஹ ‘‘அனந்தராயேனா’’தி.

பட²மஸமயஸுத்தவண்ணனா நிட்டி²தா.