2. ஸாரணீயவக்³கோ³

1. பட²மஸாரணீயஸுத்தவண்ணனா

11. து³தியஸ்ஸ பட²மே ஸரிதப்³ப³யுத்தகாதி அனுஸ்ஸரணாரஹா. மிஜ்ஜதி ஸினிய்ஹதி ஏதாயாதி மேத்தா, மித்தபா⁴வோ. மேத்தா ஏதஸ்ஸ அத்தீ²தி மேத்தம், காயகம்மம். தம் பன யஸ்மா மேத்தாஸஹக³தசித்தஸமுட்டா²னம், தஸ்மா வுத்தம் ‘‘மேத்தேன சித்தேன காதப்³ப³ம் காயகம்ம’’ந்தி. ஏஸ நயோ ஸேஸத்³வயேபி. இமானீதி மேத்தகாயகம்மாதீ³னி. பி⁴க்கூ²னம் வஸேன ஆக³தானி தேஸம் ஸேட்ட²பரிஸபா⁴வதோ. யதா² பன பி⁴க்கு²னீஸுபி லப்³ப⁴ந்தி, ஏவம் கி³ஹீஸுபி லப்³ப⁴ந்தி சதுபரிஸஸாதா⁴ரணத்தாதி தம் த³ஸ்ஸேந்தோ ‘‘பி⁴க்கூ²னஞ்ஹீ’’திஆதி³மாஹ. பி⁴க்கு²னோ ஸப்³ப³ம்பி அனவஜ்ஜகாயகம்மம் ஆபி⁴ஸமாசாரிககம்மந்தோக³த⁴மேவாதி ஆஹ ‘‘மேத்தேன சித்தேன…பே… காயகம்மம் நாமா’’தி. ப⁴த்திவஸேன பவத்தியமானா சேதியபோ³தீ⁴னம் வந்த³னா மேத்தாஸித்³தா⁴தி கத்வா தத³த்தா²ய க³மனம் ‘‘மேத்தம் காயகம்ம’’ந்தி வுத்தம். ஆதி³-ஸத்³தே³ன சேதியபோ³தி⁴பி⁴க்கூ²ஸு வுத்தாவஸேஸாபசாயனாதி³வஸேன பவத்தமேத்தாவஸேன பவத்தம் காயிகம் கிரியம் ஸங்க³ண்ஹாதி.

தேபிடகம்பி பு³த்³த⁴வசனம் கதி²யமானந்தி அதி⁴ப்பாயோ. தேபிடகம்பி பு³த்³த⁴வசனம் பரிபுச்ச²னஅத்த²கத²னவஸேன பவத்தியமானமேவ மேத்தம் வசீகம்மம் நாம ஹிதஜ்ஜா²ஸயேன பவத்திதப்³ப³தோ. தீணி ஸுசரிதானீதி காயவசீமனோஸுசரிதானி. சிந்தனந்தி ஏவம் சிந்தனமத்தம்பி மனோகம்மம், பகே³வ படிபன்னா பா⁴வனாதி த³ஸ்ஸேதி.

ஆவீதி பகாஸம். பகாஸபா⁴வோ சேத்த² யம் உத்³தி³ஸ்ஸ தம் காயகம்மம் கரீயதி, தஸ்ஸ ஸம்முக²பா⁴வதோதி ஆஹ ‘‘ஸம்முகா²’’தி. ரஹோதி அப்பகாஸம். அப்பகாஸதா ச யம் உத்³தி³ஸ்ஸ தம் காயகம்மம் கரீயதி, தஸ்ஸ அபச்சக்க²பா⁴வதோதி ஆஹ ‘‘பரம்முகா²’’தி. ஸஹாயபா⁴வக³மனம் தேஸம் புரதோ. தேஸு கரோந்தேஸுயேவ ஹி ஸஹாயபா⁴வக³மனம் ஸம்முகா² காயகம்மம் நாம ஹோதி. உப⁴யேஹீதி நவகேஹி தே²ரேஹி ச. பக்³க³ய்ஹாதி பக்³க³ண்ஹித்வா உத்³த⁴ம் கத்வா கேவலம் ‘‘தே³வோ’’தி அவத்வா கு³ணேஹி தி²ரபா⁴வஜோதனம் ‘‘தே³வத்தே²ரோ’’தி வசனம் பக்³க³ய்ஹ வசனம். மமத்தபோ³த⁴னம் வசனம் மமாயனவசனம். ஏகந்தபரம்முக²ஸ்ஸ மனோகம்மஸ்ஸ ஸம்முக²தா நாம விஞ்ஞத்திஸமுட்டா²பனவஸேன ஹோதி, தஞ்ச கோ² லோகே காயகம்மந்தி பாகடம் பஞ்ஞாதம். ஹத்த²விகாராதீ³னி அனாமஸித்வா ஏவ த³ஸ்ஸேந்தோ ‘‘நயனானி உம்மீலேத்வா’’திஆதி³மாஹ. காமம் மேத்தாஸினேஹஸினித்³தா⁴னம் நயனானம் உம்மீலனா பஸன்னேன முகே²ன ஓலோகனஞ்ச மேத்தம் காயகம்மமேவ, யஸ்ஸ பன சித்தஸ்ஸ வஸேன நயனானம் மேத்தாஸினேஹஸினித்³த⁴தா முக²ஸ்ஸ ச பஸன்னதா, தம் ஸந்தா⁴ய வுத்தம் ‘‘மேத்தம் மனோகம்மம் நாமா’’தி.

லாப⁴-ஸத்³தோ³ கம்மஸாத⁴னோ ‘‘லாபா⁴ வத, போ⁴, லத்³தோ⁴’’திஆதீ³ஸு விய. ஸோ சேத்த² ‘‘த⁴ம்மலத்³தா⁴’’தி வசனதோ அதீதகாலிகோதி ஆஹ ‘‘சீவராத³யோ லத்³த⁴பச்சயா’’தி. த⁴ம்மதோ ஆக³தாதி த⁴ம்மிகா, பரிஸுத்³த⁴க³மனா பச்சயா. தேனாஹ ‘‘த⁴ம்மலத்³தா⁴’’தி. இமமேவ ஹி அத்த²ம் த³ஸ்ஸேதும் ‘‘குஹனாதீ³’’திஆதி³ வுத்தம். ந ஸம்மா க³ய்ஹமானா ஹி த⁴ம்மலத்³தா⁴ நாம ந ஹோந்தீதி தப்படிஸேத⁴னத்த²ம் பாளியம் ‘‘த⁴ம்மலத்³தா⁴’’தி வுத்தம். தே³ய்யம் த³க்கி²ணேய்யஞ்ச அப்படிவிப⁴த்தம் கத்வா பு⁴ஞ்ஜதீதி அப்படிவிப⁴த்தபோ⁴கீ³ நாம ஹோதி. தேனாஹ ‘‘த்³வே படிவிப⁴த்தானி நாமா’’திஆதி³. சித்தேன விப⁴ஜனந்தி ஏதேன சித்துப்பாத³மத்தேனபி விப⁴ஜனம் படிவிப⁴த்தம் நாம, பகே³வ பயோக³தோதி த³ஸ்ஸேதி. சித்தேன விப⁴ஜனபுப்³ப³கம் வா காயேன விப⁴ஜனந்தி மூலமேவ த³ஸ்ஸேதும் ‘‘ஏவம் சித்தேன விப⁴ஜன’’ந்தி வுத்தம். தேன சித்துப்பாத³மத்தேன படிவிபா⁴கோ³ காதப்³போ³தி த³ஸ்ஸேதி. அப்படிவிப⁴த்தந்தி பா⁴வனபும்ஸகனித்³தே³ஸோ, அப்படிவிப⁴த்தம் லாப⁴ம் பு⁴ஞ்ஜதீதி கம்மனித்³தே³ஸோ வா. தம் நேவ கி³ஹீனம் தே³தி அத்தனோ ஆஜீவஸோத⁴னத்த²ம். ந அத்தனா பரிபு⁴ஞ்ஜதி ‘‘மய்ஹம் அஸாதா⁴ரணபோ⁴கி³தா மா ஹோதூ’’தி. படிக்³க³ண்ஹந்தோ ச…பே… பஸ்ஸதீதி இமினா ஆக³மனதோ பட்டா²ய ஸாதா⁴ரணபு³த்³தி⁴ம் உபட்டா²பேதி. ஏவம் ஹிஸ்ஸ ஸாதா⁴ரணபோ⁴கி³தா ஸுகரா, ஸாரணீயத⁴ம்மோ சஸ்ஸ பூரோ ஹோதி.

அத² வா படிக்³க³ண்ஹந்தோ ச…பே… பஸ்ஸதீதி இமினா தஸ்ஸ லாப⁴ஸ்ஸ தீஸு காலேஸு ஸாதா⁴ரணதோ ட²பனம் த³ஸ்ஸிதம். படிக்³க³ண்ஹந்தோ ச ஸங்கே⁴ன ஸாதா⁴ரணம் ஹோதூதி இமினா படிக்³க³ஹணகாலோ த³ஸ்ஸிதோ. க³ஹேத்வா…பே… பஸ்ஸதீதி இமினா படிக்³க³ஹிதகாலோ. தது³ப⁴யம் பன தாதி³ஸேன புப்³ப³பா⁴கே³ன வினா ந ஹோதீதி அத்த²ஸித்³தோ⁴ புரிமகாலோ. தயித³ம் படிக்³க³ஹணதோ புப்³பே³வஸ்ஸ ஹோதி ‘‘ஸங்கே⁴ன ஸாதா⁴ரணம் ஹோதூதி படிக்³க³ண்ஹிஸ்ஸாமீ’’தி, படிக்³க³ண்ஹந்தஸ்ஸ ஹோதி ‘‘ஸங்கே⁴ன ஸாதா⁴ரணம் ஹோதூதி படிக்³க³ண்ஹாமீ’’தி, படிக்³க³ஹேத்வா ஹோதி ‘‘ஸங்கே⁴ன ஸாதா⁴ரணம் ஹோதூதி ஹி படிக்³க³ஹிதம் மயா’’தி. ஏவம் திலக்க²ணஸம்பன்னம் கத்வா லத்³த⁴ம் லாப⁴ம் ஓஸாரணலக்க²ணம் அவிகோபேத்வா பரிபு⁴ஞ்ஜந்தோ ஸாதா⁴ரணபோ⁴கீ³ அப்படிவிப⁴த்தபோ⁴கீ³ ச ஹோதி.

இமம் பன ஸாரணீயத⁴ம்மந்தி இமம் சதுத்த²ம் ஸரிதப்³ப³யுத்தத⁴மம். ந ஹி…பே… க³ண்ஹந்தி, தஸ்மா ஸாதா⁴ரணபோ⁴கி³தா து³ஸ்ஸீலஸ்ஸ நத்தீ²தி ஆரம்போ⁴பி தாவ ந ஸம்ப⁴வதி, குதோ பூரணந்தி அதி⁴ப்பாயோ. பரிஸுத்³த⁴ஸீலோதி இமினா லாப⁴ஸ்ஸ த⁴ம்மிகபா⁴வம் த³ஸ்ஸேதி. வத்தம் அக²ண்டே³ந்தோதி இமினா அப்படிவிப⁴த்தபோ⁴கி³தம் ஸாதா⁴ரணபோ⁴கி³தஞ்ச த³ஸ்ஸேதி. ஸதி பன தது³ப⁴யே ஸாரணீயத⁴ம்மோ பூரிதோ ஏவ ஹோதீதி ஆஹ ‘‘பூரேதீ’’தி. ஓதி³ஸ்ஸகம் கத்வாதி ஏதேன அனோதி³ஸ்ஸகம் கத்வா பிதுனோ, ஆசரியுபஜ்ஜா²யாதீ³னம் வா தே²ராஸனதோ பட்டா²ய தே³ந்தஸ்ஸ ஸாரணீயத⁴ம்மோயேவ ஹோதீதி த³ஸ்ஸேதி. தா³தப்³ப³ந்தி அவஸ்ஸம் தா³தப்³ப³ம். ஸாரணீயத⁴ம்மோ பனஸ்ஸ ந ஹோதி படிஜக்³க³ட்டா²னே ஓதி³ஸ்ஸகம் கத்வா தி³ன்னத்தா. தேனாஹ ‘‘பலிபோ³த⁴ஜக்³க³னம் நாம ஹோதீ’’தி. முத்தபலிபோ³த⁴ஸ்ஸ வட்டதி அமுத்தபலிபோ³த⁴ஸ்ஸ பூரேதும் அஸக்குணேய்யத்தா. யதி³ ஏவம் ஸப்³பே³ன ஸப்³ப³ம் ஸாரணீயத⁴ம்மம் பூரேந்தஸ்ஸ ஓதி³ஸ்ஸகதா³னம் வட்டதி, ந வட்டதீதி? நோ ந வட்டதி யுத்தட்டா²னேதி த³ஸ்ஸேந்தோ ‘‘தேன பனா’’திஆதி³மாஹ. இமினா ஓதி³ஸ்ஸகதா³னம் பனஸ்ஸ ந ஸப்³ப³த்த² வாரிதந்தி த³ஸ்ஸேதி. கி³லானாதீ³னஞ்ஹி ஓதி³ஸ்ஸகம் கத்வா தா³னம் அப்படிவிபா⁴க³பக்கி²கம் ‘‘அஸுகஸ்ஸ ந த³ஸ்ஸாமீ’’தி படிக்கே²பஸ்ஸ அபா⁴வதோ. ப்³யதிரேகப்பதா⁴னோ ஹி படிபா⁴கோ³. தேனாஹ ‘‘அவஸேஸ’’ந்திஆதி³. அதா³தும்பீதி பி-ஸத்³தே³ன தா³தும்பி வட்டதீதி த³ஸ்ஸேதி. தஞ்ச கோ² கருணாயனவஸேன, ந வத்தபரிபூரணவஸேன, தஸ்மா து³ஸ்ஸீலஸ்ஸபி அத்தி²கஸ்ஸ ஸதி ஸம்ப⁴வே தா³தப்³ப³ம். தா³னஞ்ஹி நாம ந கஸ்ஸசி நிவாரிதம்.

ஸுஸிக்கி²தாயாதி ஸாரணீயபூரணவிதி⁴ம்ஹி ஸுஸிக்கி²தாய, ஸுகுஸலாயாதி அத்தோ². இதா³னி தஸ்ஸ கோஸல்லம் த³ஸ்ஸேதும் ‘‘ஸுஸிக்கி²தாய ஹீ’’திஆதி³ வுத்தம். த்³வாத³ஸஹி வஸ்ஸேஹி பூரேஹி, ந ததோ ஓரந்தி இமினா தஸ்ஸ து³ப்பூரதம் த³ஸ்ஸேதி. ததா² ஹி ஸோ மஹப்ப²லோ மஹானிஸம்ஸோ தி³ட்ட²த⁴ம்மிகேஹிபி தாவக³ருதரேஹி ப²லானிஸம்ஸேஹி அனுக³தோதி தம்ஸமங்கீ³ ச புக்³க³லோ விஸேஸலாபீ⁴ அரியபுக்³க³லோ விய லோகே அச்ச²ரியப்³பு⁴தத⁴ம்மஸமன்னாக³தோ ஹோதி. ததா² ஹி ஸோ து³ப்பஜஹதா³னமயஸ்ஸ ஸீலமயஸ்ஸ புஞ்ஞஸ்ஸ படிபக்க²த⁴ம்மம் ஸுதூ³ரே விக்க²ம்பி⁴தம் கத்வா விஸுத்³தே⁴ன சேதஸா லோகே பாகடோ பஞ்ஞாதோ ஹுத்வா விஹரதி. தஸ்ஸிமமத்த²ம் ப்³யதிரேகதோ அன்வயதோ ச விபா⁴வேதும் ‘‘ஸசே ஹீ’’திஆதி³ வுத்தம். தம் ஸுவிஞ்ஞேய்யமேவ.

இதா³னிஸ்ஸ ஸம்பராயிகே தி³ட்ட²த⁴ம்மிகே ச ஆனிஸம்ஸே த³ஸ்ஸேதும் ‘‘ஏவம் பூரிதஸாரணீயத⁴ம்மஸ்ஸா’’திஆதி³ வுத்தம். நேவ இஸ்ஸா ந மச்ச²ரியம் ஹோதி சிரகாலபா⁴வனாய விது⁴தபா⁴வதோ. மனுஸ்ஸானம் பியோ ஹோதி பரிச்சாக³ஸீலதாய விஸ்ஸுதத்தா. தேனாஹ ‘‘த³த³ம் பியோ ஹோதி ப⁴ஜந்தி நம் ப³ஹூ’’திஆதி³ (அ. நி. 5.34). ஸுலப⁴பச்சயோ ஹோதி தா³னவஸேன உளாரஜ்ஜா²ஸயானம் பச்சயலாப⁴ஸ்ஸ இதா⁴னிஸம்ஸஸபா⁴வதோ தா³னஸ்ஸ. பத்தக³தமஸ்ஸ தி³ய்யமானம் ந கீ²யதி பத்தக³தஸ்ஸேவ த்³வாத³ஸவஸ்ஸிகஸ்ஸ மஹாவத்தஸ்ஸ அவிச்சே²தே³ன பூரிதத்தா. அக்³க³ப⁴ண்ட³ம் லப⁴தி தே³வஸிகம் த³க்கி²ணேய்யானம் அக்³க³தோ பட்டா²ய தா³னஸ்ஸ தி³ன்னத்தா. ப⁴யே வா…பே… ஆபஜ்ஜந்தி தே³ய்யப்படிக்³கா³ஹகவிகப்பம் அகத்வா அத்தனி நிரபேக்க²சித்தேன சிரகாலம் தா³னஸ்ஸ பூரிததாய பஸாரிதசித்தத்தா.

தத்ராதி தேஸு ஆனிஸம்ஸேஸு விபா⁴வேதப்³பே³ஸு. இமானி ப²லானி வத்தூ²னி காரணானி. மஹாகி³ரிகா³மோ நாம நாக³தீ³பபஸ்ஸே ஏகோ கா³மோவ. அலப⁴ந்தாபீதி அப்பபுஞ்ஞதாய அலாபி⁴னோ ஸமானாபி. பி⁴க்கா²சாரமக்³க³ஸபா⁴க³ந்தி ஸபா⁴க³ம் தப்³பா⁴கி³யம் பி⁴க்கா²சாரமக்³க³ம் ஜானந்தி. அனுத்தரிமனுஸ்ஸத⁴ம்மத்தா தே²ரானம் ஸம்ஸயவினோத³னத்த²ஞ்ச ‘‘ஸாரணீயத⁴ம்மோ மே, ப⁴ந்தே, பூரிதோ’’தி ஆஹ. ததா² ஹி து³தியவத்து²ஸ்மிம்பி தே²ரேன அத்தா பகாஸிதோ. த³ஹரகாலே ஏவம் கிர ஸாரணீயத⁴ம்மபூரகோ அஹோஸி. மனுஸ்ஸானம் பியதாய ஸுலப⁴பச்சயதாயபி இத³ம் வத்து²மேவ. பத்தக³தாகீ²யனஸ்ஸ பன விஸேஸம் விபா⁴வனதோ ‘‘இத³ம் தாவ…பே… ஏத்த² வத்தூ²’’தி வுத்தம்.

கி³ரிப⁴ண்ட³மஹாபூஜாயாதி சேதியகி³ரிம்ஹி ஸகலலங்காதீ³பே யோஜனப்பமாணே ஸமுத்³தே³ ச நாவாஸங்கா⁴டாதி³கே ட²பேத்வா தீ³பபுப்ப²க³ந்தா⁴தீ³ஹி கரியமானாய மஹாபூஜாய. தஸ்ஸா ச படிபத்தியா அவஞ்ஜ²பா⁴வவிபா⁴வனத்த²ம் ‘‘ஏதே மய்ஹம் பாபுணிஸ்ஸந்தீ’’தி ஆஹ. பரியாயேனபி லேஸேனபி. அனுச்ச²விகந்தி ‘‘ஸாரணீயத⁴ம்மபூரகோ’’தி யதா²பூ⁴தபவேத³னம் தும்ஹாகம் அனுச்ச²விகந்தி அத்தோ².

அனாரோசேத்வாவ பலாயிம்ஸு சோரப⁴யேன. ‘‘அத்தனோ து³ஜ்ஜீவிகாயா’’திபி வத³ந்தி. அஹம் ஸாரணீயத⁴ம்மபூரிகா, மம பத்தபரியாபன்னேனபி ஸப்³பா³பிமா பி⁴க்கு²னியோ யாபேஸ்ஸந்தீதி ஆஹ ‘‘மா தும்ஹே தேஸம் க³தபா⁴வம் சிந்தயித்தா²’’தி. வட்டிஸ்ஸதீதி கப்பிஸ்ஸதி. தே²ரீ ஸாரணீயத⁴ம்மபூரிகா அஹோஸி, தே²ரஸ்ஸ பன ஸீலதேஜேனேவ தே³வதா உஸ்ஸுக்கம் ஆபஜ்ஜி.

நத்தி² ஏதேஸம் க²ண்ட³ந்தி அக²ண்டா³னி. தம் பன நேஸம் க²ண்ட³ம் த³ஸ்ஸேதும் ‘‘யஸ்ஸா’’திஆதி³ வுத்தம். தத்த² உபஸம்பன்னஸீலானம் உத்³தே³ஸக்கமேன ஆதி³அந்தா வேதி³தப்³பா³. தேனாஹ ‘‘ஸத்தஸூ’’திஆதி³. ந ஹி அஞ்ஞோ கோசி ஆபத்திக்க²ந்தா⁴னம் அனுக்கமோ அத்தி², அனுபஸம்பன்னஸீலானம் ஸமாதா³னக்கமேனபி ஆதி³அந்தா லப்³ப⁴ந்தி. பரியந்தே சி²ன்னஸாடகோ வியாதி தத்ரந்தே த³ஸந்தே வா சி²ன்னவத்த²ம் விய. விஸதி³ஸுதா³ஹரணஞ்சேதம் ‘‘அக²ண்டா³னீ’’தி இமஸ்ஸ அதி⁴கதத்தா. ஏவம் ஸேஸானம்பி உதா³ஹரணானி. க²ண்டி³கதா பி⁴ன்னதா க²ண்ட³ம், தம் ஏதஸ்ஸ அத்தீ²தி க²ண்ட³ம், ஸீலம். சி²த்³த³ந்திஆதீ³ஸுபி ஏஸேவ நயோ. வேமஜ்ஜே² பி⁴ன்னம் வினிவிஜ்ஜ²னவஸேன. விஸபா⁴க³வண்ணேன கா³வீ வியாதி ஸம்ப³ந்தோ⁴. விஸபா⁴க³வண்ணேன உபட்³ட⁴ம் ததியபா⁴க³க³தம் ஸம்பி⁴ன்னவண்ணம் ஸப³லம், விஸபா⁴க³வண்ணேஹேவ பி³ந்தூ³ஹி அந்தரந்தராஹி விமிஸ்ஸம் கம்மாஸம். அயம் இமேஸம் விஸேஸோ. ஸப³லரஹிதானி அஸப³லானி, ததா² அகம்மாஸானி. ஸீலஸ்ஸ தண்ஹாதா³ஸப்³யதோ மோசனம் விவட்டூபனிஸ்ஸயபா⁴வாபாத³னம், தஸ்மா தண்ஹாதா³ஸப்³யதோ மோசனவசனேன தேஸம் ஸீலானம் விவட்டூபனிஸ்ஸயதமாஹ. பு⁴ஜிஸ்ஸபா⁴வகரணதோதி இமினா பு⁴ஜிஸ்ஸகரானி பு⁴ஜிஸ்ஸானீதி உத்தரபத³லோபேனாயம் நித்³தே³ஸோதி த³ஸ்ஸேதி. யஸ்மா வா தம்ஸமங்கி³புக்³க³லோ ஸேரீ ஸயம்வஸீ பு⁴ஜிஸ்ஸோ நாம ஹோதி, தஸ்மாபி பு⁴ஜிஸ்ஸானி. அவிஞ்ஞூனம் அப்பமாணதாய ‘‘விஞ்ஞுப்பஸத்தா²னீ’’தி வுத்தம். ஸுபரிஸுத்³த⁴பா⁴வேன வா ஸம்பன்னத்தா விஞ்ஞூஹி பஸத்தா²னீதி விஞ்ஞுப்பஸத்தா²னி.

தண்ஹாதி³ட்டீ²ஹி அபராமட்ட²த்தாதி ‘‘இமினாஹம் ஸீலேன தே³வோ வா ப⁴விஸ்ஸாமி தே³வஞ்ஞதரோ வா’’தி தண்ஹாபராமாஸேன, ‘‘இமினாஹம் ஸீலேன தே³வோ ஹுத்வா தத்த² நிச்சோ து⁴வோ ஸஸ்ஸதோ ப⁴விஸ்ஸாமீ’’தி தி³ட்டி²பராமாஸேன ச அபராமட்ட²த்தா. பராமட்டு²ந்தி ‘‘அயம் தே ஸீலேஸு தோ³ஸோ’’தி சதூஸு விபத்தீஸு யாய காயசி விபத்தியா த³ஸ்ஸனேன பராமட்டு²ம், அனுத்³த⁴ம்ஸேதும் சோதே³துந்தி அத்தோ². ஸீலம் நாம அவிப்படிஸாராதி³பாரம்பரியேன யாவதே³வ ஸமாதி⁴ஸம்பாத³னத்த²ந்தி ஆஹ ‘‘ஸமாதி⁴ஸம்வத்தனிகானீ’’தி. ஸமாதி⁴ஸம்வத்தனப்பயோஜனானி ஸமாதி⁴ஸம்வத்தனிகானி.

ஸமானபா⁴வோ ஸாமஞ்ஞம், பரிபுண்ணசதுபாரிஸுத்³தி⁴பா⁴வேன மஜ்ஜே² பி⁴ன்னஸுவண்ணஸ்ஸ விய பே⁴தா³பா⁴வதோ ஸீலேன ஸாமஞ்ஞம் ஸீலஸாமஞ்ஞம், தம் க³தோ உபக³தோதி ஸீலஸாமஞ்ஞக³தோ. தேனாஹ ‘‘ஸமானபா⁴வூபக³தஸீலோ’’தி, ஸீலஸம்பத்தியா ஸமானபா⁴வம் உபக³தஸீலோ ஸபா⁴க³வுத்திகோதி அத்தோ². காமம் புது²ஜ்ஜனானம்பி சதுபாரிஸுத்³தி⁴ஸீலே நானத்தம் ந ஸியா, தம் பன ந ஏகந்திகம், இத³ம் ஏகந்திகம் நியதபா⁴வதோதி ஆஹ ‘‘நத்தி² மக்³க³ஸீலே நானத்த’’ந்தி. தம் ஸந்தா⁴யேதம் வுத்தந்தி மக்³க³ஸீலம் ஸந்தா⁴ய தம் ‘‘யானி தானி ஸீலானீ’’திஆதி³ வுத்தம்.

யாயந்தி யா அயம் மய்ஹஞ்சேவ தும்ஹாகஞ்ச பச்சக்க²பூ⁴தா. தி³ட்டீ²தி மக்³க³ஸம்மாதி³ட்டி². நித்³தோ³ஸாதி நித்³து⁴ததோ³ஸா, ஸமுச்சி²ன்னராகா³தி³பாபத⁴ம்மாதி அத்தோ². நிய்யாதீதி வட்டது³க்க²தோ நிஸ்ஸரதி நிக்³க³ச்ச²தி. ஸயம் நிய்யந்தீயேவ ஹி தம்ஸமங்கி³புக்³க³லம் வட்டது³க்க²தோ நிய்யாபேதீதி வுச்சதி. யா ஸத்து² அனுஸிட்டி², தம் கரோதீதி தக்கரோ, தஸ்ஸ, யதா²னுஸிட்ட²ம் படிபஜ்ஜந்தஸ்ஸாதி அத்தோ². ஸமானதி³ட்டி²பா⁴வந்தி ஸதி³ஸதி³ட்டி²பா⁴வம் ஸச்சஸம்படிவேதே⁴ன அபி⁴ன்னதி³ட்டி²பா⁴வம்.

பட²மஸாரணீயஸுத்தவண்ணனா நிட்டி²தா.

2. து³தியஸாரணீயஸுத்தவண்ணனா

12. து³தியே ஸப்³ரஹ்மசாரீனந்தி ஸஹத⁴ம்மிகானம். பியம் பியாயிதப்³ப³கம் கரோந்தீதி பியகரணா. க³ரும் க³ருட்டா²னியம் கரோந்தீதி க³ருகரணா. ஸங்க³ண்ஹனத்தா²யாதி ஸங்க³ஹவத்து²விஸேஸபா⁴வதோ ஸப்³ரஹ்மசாரீனம் ஸங்க³ஹணாய ஸம்வத்தந்தீதி ஸம்ப³ந்தோ⁴. அவிவத³னத்தா²யாதி ஸங்க³ஹவத்து²பா⁴வதோ ஏவ ந விவத³னத்தா²ய. ஸதி ச அவிவத³னஹேதுபூ⁴தஸங்க³ஹகத்தே தேஸம் வஸேன ஸப்³ரஹ்மசாரீனம் ஸமக்³க³பா⁴வோ பே⁴தா³பா⁴வோ ஸித்³தோ⁴யேவாதி ஆஹ ‘‘ஸாமக்³கி³யா’’திஆதி³.

து³தியஸாரணீயஸுத்தவண்ணனா நிட்டி²தா.

3. நிஸ்ஸாரணீயஸுத்தவண்ணனா

13. ததியே வட்³டி⁴தாதி பா⁴வனாபாரிபூரிவஸேன பரிப்³ரூஹிதா. புனப்புனம் கதாதி பா⁴வனாய ப³ஹுலீகரணேன அபராபரம் பவத்திதா. யுத்தயானஸதி³ஸா கதாதி யதா² யுத்தமாஜஞ்ஞயானம் சே²கேன ஸாரதி²னா அதி⁴ட்டி²தம் யதா²ருசி பவத்ததி, ஏவம் யதா²ருசி பவத்திரஹம் க³ஹிதா. வத்து²கதாதி வா அதி⁴ட்டா²னட்டே²ன வத்து² விய கதா, ஸப்³ப³ஸோ உபக்கிலேஸவிஸோத⁴னேன இத்³தி⁴விஸேஸதாய பவத்திட்டா²னபா⁴வதோ ஸுவிஸோதி⁴தபரிஸ்ஸயவத்து² விய கதாதி வுத்தம் ஹோதி. அதி⁴ட்டி²தாதி படிபக்க²தூ³ரீபா⁴வதோ ஸுபா⁴விதபா⁴வேன தம்தம்அதி⁴ட்டா²னயோக்³யதாய ட²பிதா. ஸமந்ததோ சிதாதி ஸப்³ப³பா⁴கே³ன பா⁴வனூபசயம் க³மிதா. தேனாஹ ‘‘உபசிதா’தி. ஸுட்டு² ஸமாரத்³தா⁴தி இத்³தி⁴பா⁴வனாஸிகா²ப்பத்தியா ஸம்மதே³வ ஸம்பா⁴விதா. அபூ⁴தப்³யாகரணம் ப்³யாகரோதீதி ‘‘மேத்தா ஹி கோ² மே சேதோவிமுத்தி பா⁴விதா’’திஆதி³னா அத்தனி அவிஜ்ஜமானகு³ணாபி⁴ப்³யாஹாரம் ப்³யாஹரதி. சேதோவிமுத்திஸத்³த³ம் அபேக்கி²த்வா ‘‘நிஸ்ஸடா’’தி வுத்தம். புன ப்³யாபாதோ³ நத்தீ²தி இதா³னி மம ப்³யாபாதோ³ நாம ஸப்³ப³ஸோ நத்தீ²தி ஞத்வா.

ப³லவவிபஸ்ஸனாதி ப⁴யதுபட்டா²னே ஞாணம், ஆதீ³னவானுபஸ்ஸனே ஞாணம் முச்சிதுகம்யதாஞாணம், ப⁴ங்க³ஞாணந்தி சதுன்னம் ஞாணானம் அதி⁴வசனம். யேஸம் நிமித்தானம் அபா⁴வேன அரஹத்தப²லஸமாபத்தியா அனிமித்ததா, தம் த³ஸ்ஸேதும் ‘‘ஸா ஹீ’’திஆதி³ வுத்தம். தத்த² ராக³ஸ்ஸ நிமித்தம், ராகோ³ ஏவ வா நிமித்தம் ராக³னிமித்தம். ஆதி³-ஸத்³தே³ன தோ³ஸனிமித்தாதீ³னம் ஸங்க³ஹோ த³ட்ட²ப்³போ³. ரூபவேத³னாதி³ஸங்கா²ரனிமித்தம் ரூபனிமித்தாதி³. தேஸம்யேவ நிச்சாதி³வஸேன உபட்டா²னம் நிச்சனிமித்தாதி³. தயித³ம் நிமித்தம் யஸ்மா ஸப்³பே³ன ஸப்³ப³ம் அரஹத்தப²லே நத்தி², தஸ்மா வுத்தம் ‘‘ஸா ஹி…பே… அனிமித்தா’’தி. நிமித்தம் அனுஸ்ஸரதி அனுக³ச்ச²தி ஆரப்³ப⁴ பவத்ததி ஸீலேனாதி நிமித்தானுஸாரீ. தேனாஹ ‘‘வுத்தப்பபே⁴த³ம் நிமித்தம் அனுஸரணஸபா⁴வ’’ந்தி.

அஸ்மிமானோதி ‘‘அஸ்மீ’’தி பவத்தோ அத்தவிஸயோ மானோ. அயம் நாம அஹமஸ்மீதி ரூபலக்க²ணோ வேத³னாதீ³ஸு வா அஞ்ஞதரலக்க²ணோ அயம் நாம அத்தா அஹம் அஸ்மீதி. அஸ்மிமானோ ஸமுக்³கா⁴தீயதி ஏதேனாதி அஸ்மிமானஸமுக்³கா⁴தோ, அரஹத்தமக்³கோ³. புன அஸ்மிமானோ நத்தீ²தி தஸ்ஸ அனுப்பத்தித⁴ம்மதாபாத³னம் கித்தேந்தோ ஸமுக்³கா⁴தத்தமேவ விபா⁴வேதி.

நிஸ்ஸாரணீயஸுத்தவண்ணனா நிட்டி²தா.

4-5. ப⁴த்³த³கஸுத்தாதி³வண்ணனா

14-15. சதுத்தே² ஆரமிதப்³ப³ட்டே²ன வா கம்மம் ஆராமோ ஏதஸ்ஸாதி கம்மாராமோ. கம்மே ரதோ ந க³ந்த²து⁴ரே விபஸ்ஸனாது⁴ரே வாதி கம்மரதோ. புனப்புனம் யுத்தோதி தப்பரபா⁴வேன அனு அனு யுத்தோ பஸுதோ. ஆலாபஸல்லாபோதி இத்தி²வண்ணபுரிஸவண்ணாதி³வஸேன புனப்புனம் லபனம். பஞ்சமே நத்தி² வத்தப்³ப³ம்.

ப⁴த்³த³கஸுத்தாதி³வண்ணனா நிட்டி²தா.

6. நகுலபிதுஸுத்தவண்ணனா

16. ச²ட்டே² விஸபா⁴க³வேத³னுப்பத்தியா ககசேனேவ சதுஇரியாபத²ம் சி²ந்த³ந்தோ ஆபா³த⁴யதீதி ஆபா³தோ⁴, ஸோ யஸ்ஸ அத்தீ²தி ஆபா³தி⁴கோ. தம்ஸமுட்டா²னது³க்கே²ன து³க்கி²தோ. அதி⁴மத்தகி³லானோதி தா⁴துஸங்க²யேன பரிக்கீ²ணஸரீரோ.

ஸப்படிப⁴யகந்தாரஸதி³ஸா ஸோளஸவத்து²கா அட்ட²வத்து²கா ச விசிகிச்சா² திண்ணா இமாயாதி திண்ணவிசிகிச்சா². விக³தா ஸமுச்சி²ன்னா பவத்திஆதீ³ஸு ‘‘ஏவம் நு கோ² ந நு கோ²’’தி ஏவம் பவத்திகா கத²ம்கதா² அஸ்ஸாதி விக³தகத²ம்கதா². ஸாரஜ்ஜகரானம் பாபத⁴ம்மானம் பஹீனத்தா ராக³விக்கே²பேஸு ஸீலாதி³கு³ணேஸு ச திட்ட²கத்தா வேஸாரஜ்ஜம், விஸாரத³பா⁴வம் வேய்யத்தியம் பத்தாதி வேஸாரஜ்ஜப்பத்தா. அத்தனா ஏவ பச்சக்க²தோ தி³ட்ட²த்தா ந பரம் பச்சேதி, நஸ்ஸ பரோ பச்சேதப்³போ³ அத்தீ²தி அபரப்பச்சயா.

கி³லானா வுட்டி²தோதி கி³லானபா⁴வதோ வுட்டா²ய டி²தோ. பா⁴வப்பதா⁴னோ ஹி அயம் நித்³தே³ஸோ. கி³லானோ ஹுத்வா வுட்டி²தோதி இத³ம் பன அத்த²மத்தனித³ஸ்ஸனம்.

நகுலபிதுஸுத்தவண்ணனா நிட்டி²தா.

7. ஸோப்பஸுத்தவண்ணனா

17. ஸத்தமே படிஸல்லானா வுட்டி²தோதி ஏத்த² படிஸல்லானந்தி தேஹி தேஹி ஸத்³தி⁴விஹாரிகஅந்தேவாஸிகஉபாஸகாதி³ஸத்தேஹி சேவ ரூபாரம்மணாதி³ஸங்கா²ரேஹி ச படினிவத்தித்வா அபஸக்கித்வா நிலீயனம் விவேசனம். காயசித்தேஹி ததோ விவித்தோ ஏகீபா⁴வோ பவிவேகோதி ஆஹ ‘‘ஏகீபா⁴வாயா’’திஆதி³. ஏகீபா⁴வதோதி ச இமினா காயவிவேகதோ வுட்டா²னமாஹ. த⁴ம்மனிஜ்ஜா²னக்க²ந்திதோதிஆதி³னா சித்தவிவேகதோ. வுட்டி²தோதி ததோ து³வித⁴விவேகதோ ப⁴வங்கு³ப்பத்தியா ஸப்³ரஹ்மசாரீஹி ஸமாக³மேன உபேதோ.

ஸோப்பஸுத்தவண்ணனா நிட்டி²தா.

8. மச்ச²ப³ந்த⁴ஸுத்தவண்ணனா

18. அட்ட²மே மச்ச²கா⁴தகந்தி மச்ச²ப³ந்த⁴ம் கேவட்டம். ஓரப்³பி⁴காதீ³ஸு உரப்³பா⁴ வுச்சந்தி ஏளகா, உரப்³பே⁴ ஹந்தீதி ஓரப்³பி⁴கோ. ஸூகரிகாதீ³ஸுபி ஏஸேவ நயோ.

மச்ச²ப³ந்த⁴ஸுத்தவண்ணனா நிட்டி²தா.

9. பட²மமரணஸ்ஸதிஸுத்தவண்ணனா

19. நவமே ஏவம்னாமகே கா³மேதி நாதிகானாமகம் கா³மம் நிஸ்ஸாய. த்³வின்னம் சூளபிதிமஹாபிதிபுத்தானம் த்³வே கா³மா, தேஸு ஏகஸ்மிம் கா³மே. ஞாதீனஞ்ஹி நிவாஸட்டா²னபூ⁴தோ கா³மோ ஞாதிகோ, ஞாதிகோயேவ நாதிகோ ஞ-காரஸ்ஸ ந-காராதே³ஸோ ‘‘அனிமித்தா ந நாயரே’’திஆதீ³ஸு (விஸுத்³தி⁴. 1.174; ஸம். நி. அட்ட². 1.1.20; ஜா. அட்ட². 2.2.34) விய. ஸோ கிர கா³மோ யேஸம் ததா³ தேஸம் புப்³ப³புரிஸேன அத்தனோ ஞாதீனம் ஸாதா⁴ரணபா⁴வேன நிவஸிதோ, தேன ஞாதிகோதி பஞ்ஞாயித்த². அத² பச்சா² த்³வீஹி தா³யாதே³ஹி த்³விதா⁴ விப⁴ஜித்வா பரிபு⁴த்தோ. கி³ஞ்ஜகா வுச்சதி இட்ட²கா, கி³ஞ்ஜகாஹியேவ கதோ ஆவஸதோ²தி கி³ஞ்ஜகாவஸதோ². ஸோ ஹி ஆவாஸோ யதா² ஸுதா⁴பரிகம்மேன பயோஜனம் நத்தி², ஏவம் இட்ட²காஹி ஏவ சினித்வா சா²தே³த்வா கதோ. தஸ்மிம் கிர பதே³ஸே மத்திகா ஸக்க²ரமரும்பவாலுகாதீ³ஹி அஸம்மிஸ்ஸா கதி²னா ஸண்ஹஸுகு²மா, தாய கதானி குலாலபா⁴ஜனானிபி ஸிலாமயானி விய த³ள்ஹானி. தஸ்மா தே உபாஸகா தாய மத்திகாய தீ³க⁴புதூ² இட்ட²கா காரேத்வா ட²பேத்வா ட²பேத்வா த்³வாரவாதபானகவாடதுலாயோ ஸப்³ப³ம் த³ப்³ப³ஸம்பா⁴ரேன வினா தாஹி இட்ட²காஹியேவ பாஸாத³ம் காரேஸும். தேன வுத்தம் ‘‘இட்ட²காமயே பாஸாதே³’’தி.

ரத்திந்தி³வந்தி ஏகரத்திதி³வம். ப⁴க³வதோ ஸாஸனந்தி அரியமக்³க³ப்படிவேதா⁴வஹம் ஸத்து² ஓவாத³ம். ப³ஹு வத மே கதம் அஸ்ஸாதி ப³ஹு வத மயா அத்தஹிதம் பப்³ப³ஜிதகிச்சம் கதம் ப⁴வேய்ய.

தத³ந்தரந்தி தத்தகம் வேலம். ஏகபிண்ட³பாதந்தி ஏகம் தி³வஸம் யாபனப்பஹோனகம் பிண்ட³பாதம். யாவ அந்தோ பவிட்ட²வாதோ ப³ஹி நிக்க²மதி, ப³ஹி நிக்க²ந்தவாதோ வா அந்தோ பவிஸதீதி ஏகஸ்ஸேவ பவேஸனிக்க²மோ விய வுத்தம், தம் நாஸிகாவாதபா⁴வஸாமஞ்ஞேனாதி த³ட்ட²ப்³ப³ம்.

பட²மமரணஸ்ஸதிஸுத்தவண்ணனா நிட்டி²தா.

10. து³தியமரணஸ்ஸதிஸுத்தவண்ணனா

20. த³ஸமே நிக்க²ந்தேதி வீதிவத்தே. பதிக³தாயாதி பச்சாக³தாய, ஸம்பத்தாயாதி அத்தோ². தேனாஹ ‘‘படிபன்னாயா’’தி. ஸோ மமஸ்ஸ அந்தராயோதி யதா²வுத்தா ந கேவலம் காலகிரியாவ, மம அதிது³ல்லப⁴ம் க²ணம் லபி⁴த்வா தஸ்ஸ ஸத்து²ஸாஸனமனஸிகாரஸ்ஸ சேவ ஜீவிதஸ்ஸ ச ஸக்³க³மோக்கா²னஞ்ச அந்தராயோ அஸ்ஸ, ப⁴வேய்யாதி அத்தோ². தேனாஹ ‘‘திவிதோ⁴ அந்தராயோ’’திஆதி³. விபஜ்ஜேய்யாதி விபத்திம் க³ச்சே²ய்ய. ஸத்த²கேன விய அங்க³பச்சங்கா³னம் கந்தனகாரகா காயே ஸந்தி⁴ப³ந்த⁴னச்சே²த³கவாதா ஸத்த²கவாதா. கத்துகம்யதாச²ந்தோ³தி நிய்யானாவஹோ கத்துகம்யதாகுஸலச்ச²ந்தோ³. பயோக³வீரியந்தி பா⁴வனானுயோக³வீரியம். ந படிவாதி ந படினிவத்ததீதி அப்படிவானீ, அந்தரா வோஸானானாபஜ்ஜனவீரியம். தேனாஹ ‘‘அனுக்கண்ட²னா அப்படிஸங்க⁴ரணா’’தி.

து³தியமரணஸ்ஸதிஸுத்தவண்ணனா நிட்டி²தா.

ஸாரணீயவக்³க³வண்ணனா நிட்டி²தா.