3. உக்³க³ஹஸுத்தவண்ணனா

33. ததியே ஸப்³ப³பட²மம் உட்டா²னஸீலாதி ரத்தியா விபா⁴யனவேலாய ஸாமிகே பரிஜனே ஸேய்யாய அவுட்டி²தே ஸப்³ப³பட²மம் உட்டா²னஸீலா. ஸாமிகம் தி³ஸ்வா நிஸின்னாஸனதோ அக்³கி³த³ட்³டா⁴ விய பட²மமேவ வுட்ட²ஹந்தீதி வா புப்³பு³ட்டா²யினியோ. கிம்காரந்தி கிம்கரணீயம், கிம்கரணபா⁴வேன புச்சி²த்வா காதப்³ப³வேய்யாவச்சந்தி அத்தோ². தம் படிஸ்ஸுணந்தா விசரந்தீதி கிம்காரப்படிஸ்ஸாவினியோ. மனாபம்யேவ கிரியம் கரோந்தி ஸீலேனாதி மனாபசாரினியோ. பியமேவ வத³ந்தி ஸீலேனாதி பியவாதி³னியோ.

தத்ருபாயாயாதி தத்ர கம்மே ஸாதே⁴தப்³ப³உபாயபூ⁴தாய வீமம்ஸாய. தேனாஹ ‘‘தஸ்மிம் உண்ணாகப்பாஸஸம்விதா⁴னே’’திஆதி³. அலம் காதுந்தி காதும் ஸமத்தா². அலம் ஸம்விதா⁴துந்தி விசாரேதும் ஸமத்தா². தேனாஹ ‘‘அலம் காதும் அலம் ஸம்விதா⁴துந்தி அத்தனா காதும்பி பரேஹி காராபேதும்பீ’’திஆதி³. ஸேஸமேத்த² ஸுவிஞ்ஞேய்யமேவ.

உக்³க³ஹஸுத்தவண்ணனா நிட்டி²தா.