8-9. வாசாஸுத்தாதி³வண்ணனா

198-9. அட்ட²மே அங்கே³ஹீதி காரணேஹி. அங்கீ³யந்தி ஹேதுபா⁴வேன ஞாயந்தீதி அங்கா³னி, காரணானி. காரணத்தே² ச அங்க³-ஸத்³தோ³. பஞ்சஹீதி ஹேதும்ஹி நிஸ்ஸக்கவசனம். ஸமன்னாக³தாதி ஸமனுஆக³தா பவத்தா யுத்தா ச. வாசாதி ஸமுல்லபன-வாசா. யா ‘‘வாசா கி³ரா ப்³யப்பதோ²’’தி (த⁴. ஸ. 636) ச, ‘‘நேலா கண்ணஸுகா²’’தி (தீ³. நி. 1.9) ச ஆக³ச்ச²தி. யா பன ‘‘வாசாய சே கதம் கம்ம’’ந்தி (த⁴. ஸ. அட்ட². 1 காயகம்மத்³வார) ஏவம் விஞ்ஞத்தி ச, ‘‘யா சதூஹி வசீது³ச்சரிதேஹி ஆரதி…பே… அயம் வுச்சதி ஸம்மாவாசா’’தி (த⁴. ஸ. 299) ஏவம் விரதி ச, ‘‘ப²ருஸவாசா, பி⁴க்க²வே, ஆஸேவிதா பா⁴விதா ப³ஹுலீகதா நிரயஸம்வத்தனிகா ஹோதீ’’தி (அ. நி. 8.40) ஏவம் சேதனா ச வாசாதி ஆக³தா, ந ஸா இத⁴ அதி⁴ப்பேதா. கஸ்மா? அபா⁴ஸிதப்³ப³தோ. ‘‘ஸுபா⁴ஸிதா ஹோதி, நோ து³ப்³பா⁴ஸிதா’’தி ஹி வுத்தம். ஸுபா⁴ஸிதாதி ஸுட்டு² பா⁴ஸிதா. தேனஸ்ஸா அத்தா²வஹதம் தீ³பேதி. அனவஜ்ஜாதி ராகா³தி³அவஜ்ஜரஹிதா. இமினாஸ்ஸ காரணஸுத்³தி⁴ம் அக³திக³மனாதி³ப்பவத்ததோ³ஸாபா⁴வஞ்ச தீ³பேதி. ராக³தோ³ஸாதி³விமுத்தஞ்ஹி யம் பா⁴ஸதோ அனுரோத⁴விவஜ்ஜனதோ அக³திக³மனம் து³ரஸமுஸ்ஸிதமேவாதி. அனனுவஜ்ஜாதி அனுவாத³விமுத்தா. இமினாஸ்ஸா ஸப்³பா³காரஸம்பத்திம் தீ³பேதி. ஸதி ஹி ஸப்³பா³காரஸம்பத்தியம் அனனுவஜ்ஜதாதி. விஞ்ஞூனந்தி பண்டி³தானம். தேன நிந்தா³பஸம்ஸாஸு பா³லா அப்பமாணாதி தீ³பேதி.

இமேஹி கோ²திஆதீ³னி தானி அங்கா³னி பச்சக்க²தோ த³ஸ்ஸேந்தோ தம் வாசம் நிக³மேதி. யஞ்ச அஞ்ஞே படிஞ்ஞாதீ³ஹி அவயவேஹி, நாமாதீ³ஹி பதே³ஹி, லிங்க³வசனவிப⁴த்திகாலகாரகஸம்பத்தீஹி ச ஸமன்னாக³தம் முஸாவாதா³தி³வாசம்பி ஸுபா⁴ஸிதந்தி மஞ்ஞந்தி, தம் படிஸேதே⁴தி. அவயவாதி³ஸமன்னாக³தாபி ஹி ததா²ரூபீ வாசா து³ப்³பா⁴ஸிதாவ ஹோதி அத்தனோ ச பரேஸஞ்ச அனத்தா²வஹத்தா. இமேஹி பன பஞ்சஹங்கே³ஹி ஸமன்னாக³தா ஸசேபி மிலக்கு²பா⁴ஸாபரியாபன்னா க⁴டசேடிகாகீ³திகபரியாபன்னாபி ஹோதி, ததா²பி ஸுபா⁴ஸிதாவ லோகியலோகுத்தரஹிதஸுகா²வஹத்தா. ததா² ஹி மக்³க³பஸ்ஸே ஸஸ்ஸம் ரக்க²ந்தியா ஸீஹளசேடிகாய ஸீஹளகேனேவ ஜாதிஜராமரணயுத்தம் கீ³திகம் கா³யந்தியா ஸத்³த³ம் ஸுத்வா மக்³க³ம் க³ச்ச²ந்தா ஸட்டி²மத்தா விபஸ்ஸகபி⁴க்கூ² அரஹத்தம் பாபுணிம்ஸு.

ததா² திஸ்ஸோ நாம ஆரத்³த⁴விபஸ்ஸகோ பி⁴க்கு² பது³மஸ்ஸரஸமீபேன க³ச்ச²ந்தோ பது³மஸ்ஸரே பது³மானி ப⁴ஞ்ஜித்வா –

‘‘பாதோவ பு²ல்லிதகோகனத³ம்,

ஸூரியாலோகேன பி⁴ஜ்ஜியதே;

ஏவம் மனுஸ்ஸத்தம் க³தா ஸத்தா,

ஜராபி⁴வேகே³ன மத்³தீ³யந்தீ’’தி. (ஸம். நி. அட்ட². 1.1.213; ஸு. நி. அட்ட². 2.452 ஸுபா⁴ஸிதஸுத்தவண்ணனா) –

இமம் கீ³திம் கா³யந்தியா சேடிகாய ஸுத்வா அரஹத்தம் பத்தோ.

பு³த்³த⁴ந்தரேபி அஞ்ஞதரோ புரிஸோ ஸத்தஹி புத்தேஹி ஸத்³தி⁴ம் அடவிதோ ஆக³ம்ம அஞ்ஞதராய இத்தி²யா முஸலேன தண்டு³லே கோட்டேந்தியா –

‘‘ஜராய பரிமத்³தி³தம் ஏதம், மிலாதசம்மனிஸ்ஸிதம்;

மரணேன பி⁴ஜ்ஜதி ஏதம், மச்சுஸ்ஸ கா⁴ஸமாமிஸம்.

‘‘கிமீனம் ஆலயம் ஏதம், நானாகுணபேன பூரிதம்;

அஸுசிபா⁴ஜனம் ஏதம், தத³லிக்க²ந்த⁴ஸமம் இத³’’ந்தி. (ஸம். நி. அட்ட². 1.1.213; ஸு. நி. அட்ட². 2.452 ஸுபா⁴ஸிதஸுத்தவண்ணனா) –

இமம் கீ³தம் ஸுத்வா பச்சவேக்க²ந்தோ ஸஹ புத்தேஹி பச்சேகபோ³தி⁴ம் பத்தோ. ஏவம் இமேஹி பஞ்சஹி அங்கே³ஹி ஸமன்னாக³தா வாசா ஸசேபி மிலக்கு²பா⁴ஸாய பரியாபன்னா க⁴டசேடிகாகீ³திகபரியாபன்னா வாசா ஹோதி, ததா²பி ஸுபா⁴ஸிதாதி வேதி³தப்³பா³. ஸுபா⁴ஸிதா ஏவ அனவஜ்ஜா அனனுவஜ்ஜா ச விஞ்ஞூனம் அத்த²த்தி²கானம் குலபுத்தானம் அத்த²ப்படிஸரணானம், நோ ப்³யஞ்ஜனப்படிஸரணானந்தி. நவமம் உத்தானமேவ.

வாசாஸுத்தாதி³வண்ணனா நிட்டி²தா.