10. நிஸ்ஸாரணீயஸுத்தவண்ணனா

200. த³ஸமே நிஸ்ஸரந்தீதி நிஸ்ஸரணீயாதி வத்தப்³பே³ தீ³க⁴ம் கத்வா நித்³தே³ஸோ. கத்தரி ஹேஸ அனீய-ஸத்³தோ³ யதா² ‘‘நிய்யானியா’’தி. தேனாஹ ‘‘நிஸ்ஸடா’’தி. குதோ பன நிஸ்ஸடா? யதா²ஸகம் படிபக்க²தோ. நிஜ்ஜீவட்டே²ன தா⁴துயோதி ஆஹ ‘‘அத்தஸுஞ்ஞஸபா⁴வா’’தி. அத்த²தோ பன த⁴ம்மதா⁴துமனோவிஞ்ஞாணதா⁴துவிஸேஸோ. தாதி³ஸஸ்ஸ பி⁴க்கு²னோ கிலேஸவஸேன காமேஸு மனஸிகாரோ நத்தீ²தி ஆஹ ‘‘வீமம்ஸனத்த²’’ந்தி, ‘‘நேக்க²ம்மனியதம் இதா³னி மே சித்தம், கிம் நு கோ² காமவிதக்கோபி உப்பஜ்ஜிஸ்ஸதீ’’தி வீமம்ஸந்தஸ்ஸாதி அத்தோ². பக்க²ந்த³னம் நாம அனுப்பவேஸோ. ஸோ பன தத்த² நத்தீ²தி ஆஹ ‘‘நப்பவிஸதீ’’தி. பஸீத³னம் நாம அபி⁴ருசி. ஸந்திட்ட²னம் பதிட்டா²னம். விமுச்சனம் அதி⁴முச்சனந்தி. தம் ஸப்³ப³ம் படிக்கி²பந்தோ வத³தி ‘‘பஸாத³ம் நாபஜ்ஜதீ’’திஆதி³. ஏவம்பூ⁴தம் பனஸ்ஸ சித்தம் தஸ்ஸ கத²ம் திட்ட²தீதி ஆஹ ‘‘யதா²’’திஆதி³.

தந்தி பட²மஜ்ஜா²னம். அஸ்ஸாதி பி⁴க்கு²னோ. சித்தம் பக்க²ந்த³தீதி பரிகம்மசித்தேன ஸத்³தி⁴ம் ஜா²னசித்தம் ஏகத்தவஸேன ஏகஜ்ஜ²ம் கத்வா வத³தி. கோ³சரே க³தத்தாதி அத்தனோ ஆரம்மணே ஏவ பவத்தத்தா. அஹானபா⁴கி³யத்தாதி டி²திபா⁴கி³யத்தா. ஸுட்டு² விமுத்தந்தி விக்க²ம்ப⁴னவிமுத்தியா ஸம்மதே³வ விமுத்தம். சித்தஸ்ஸ ச காயஸ்ஸ ச விஹனனதோ விகா⁴தோ. து³க்க²ம் பரித³ஹனதோ பரிளாஹோ. காமவேத³னம் ந வேதி³யதி அனுப்பஜ்ஜனதோ. நிஸ்ஸரந்தி ததோதி நிஸ்ஸரணம். கே நிஸ்ஸரந்தி? காமா. ஏவஞ்ச காமானந்தி கத்துஸாமிவசனம் ஸுட்டு² யுஜ்ஜதி. யத³க்³கே³ன காமா ததோ நிஸ்ஸடாதி வுச்சந்தி, தத³க்³கே³ன ஜா²னம்பி காமதோ நிஸ்ஸடந்தி வத்தப்³ப³தம் லப⁴தீதி வுத்தம் ‘‘காமேஹி நிஸ்ஸடத்தா’’தி. ஏவம் விக்க²ம்ப⁴னவஸேன காமனிஸ்ஸரணம் வத்வா இதா³னி ஸமுச்சே²த³வஸேன அச்சந்ததோ நிஸ்ஸரணம் த³ஸ்ஸேதும் ‘‘யோ பனா’’திஆதி³ வுத்தம். ஸேஸபதே³ஸூதி ஸேஸகோட்டா²ஸேஸு.

அயம் பன விஸேஸோதி விஸேஸம் வத³ந்தேன தம் ஜா²னம் பாத³கம் கத்வாதிஆதி³கோ அவிஸேஸோதி கத்வா து³தியததியவாரேஸு ஸப்³ப³ஸோ அனாமட்டோ², சதுத்த²வாரே பன அயம்பி விஸேஸோதி த³ஸ்ஸேதும் ‘‘அச்சந்தனிஸ்ஸரணஞ்சேத்த² அரஹத்தப²லம் யோஜேதப்³ப³’’ந்தி வுத்தம். யஸ்மா அரூபஜ்ஜா²னம் பாத³கம் கத்வா அக்³க³மக்³க³ம் அதி⁴க³ந்த்வா அரஹத்தே டி²தஸ்ஸ சித்தம் ஸப்³ப³ஸோ ரூபேஹி நிஸ்ஸடம் நாம ஹோதி. தஸ்ஸ ஹி ப²லஸமாபத்திதோ வுட்டா²ய வீமம்ஸனத்த²ம் ரூபாபி⁴முக²ம் சித்தம் பேஸேந்தஸ்ஸ. இத³மக்கா²தந்தி ஸமத²யானிகானம் வஸேன ஹேட்டா² சத்தாரோ வாரா க³ஹிதா. இத³ம் பன ஸுக்க²விபஸ்ஸகஸ்ஸ வஸேனாதி ஆஹ ‘‘ஸுத்³த⁴ஸங்கா²ரே’’திஆதி³. ‘‘புன ஸக்காயோ நத்தீ²’’தி உப்பன்னந்தி ‘‘இதா³னி மே ஸக்காயப்பப³ந்தோ⁴ நத்தீ²’’தி வீமம்ஸந்தஸ்ஸ உப்பன்னம்.

நிஸ்ஸாரணீயஸுத்தவண்ணனா நிட்டி²தா.

ப்³ராஹ்மணவக்³க³வண்ணனா நிட்டி²தா.

சதுத்த²பண்ணாஸகம் நிட்டி²தம்.