3. ஸங்கா³ரவஸுத்தவண்ணனா

193. ததியே (ஸம். நி. டீ. 2.5.236) பட²மஞ்ஞேவாதி புரேதரம்யேவ, அஸஜ்ஜா²யகதானம் மந்தானம் அப்படிபா⁴னம் பகே³வ பட²மம்யேவ ஸித்³த⁴ம், தத்த² வத்தப்³ப³மேவ நத்தீ²தி அதி⁴ப்பாயோ. பரியுட்டா²னம் நாம அபி⁴ப⁴வோ க³ஹணந்தி ஆஹ ‘‘காமராக³பரியுட்டி²தேனாதி காமராக³க்³க³ஹிதேனா’’தி. விக்க²ம்பே⁴தி அபனேதீதி விக்க²ம்ப⁴னம், படிபக்க²தோ நிஸ்ஸரதி ஏதேனாதி நிஸ்ஸரணம். விக்க²ம்ப⁴னஞ்ச தம் நிஸ்ஸரணஞ்சாதி விக்க²ம்ப⁴னனிஸ்ஸரணம். தேனாஹ ‘‘தத்தா²’’திஆதி³. ஸேஸபத³த்³வயேபி ஏஸேவ நயோ. அத்தனா அரணீயோ பத்தப்³போ³ அத்தோ² அத்தத்தோ². ததா² பரத்தோ² வேதி³தப்³போ³.

‘‘அனிச்சதோ அனுபஸ்ஸந்தோ நிச்சஸஞ்ஞம் பஜஹதீ’’திஆதீ³ஸு (படி. ம. 1.52) ப்³யாபாதா³தீ³னம் அனாக³தத்தா ப்³யாபாத³வாரே தத³ங்க³னிஸ்ஸரணம் ந க³ஹிதம். கிஞ்சாபி ந க³ஹிதம், படிஸங்கா²னவஸேன தஸ்ஸ வினோதே³தப்³ப³தாய தத³ங்க³னிஸ்ஸரணம்பி லப்³ப⁴தேவாதி ஸக்கா விஞ்ஞாதும். ஆலோகஸஞ்ஞா உபசாரப்பத்தா வா அப்பனாப்பத்தா வா. யோ கோசி கஸிணஜ்ஜா²னாதி³பே⁴தோ³ ஸமதோ². த⁴ம்மவவத்தா²னம் உபசாரப்பனாப்பத்தவஸேன க³ஹேதப்³ப³ம்.

குதி⁴தோதி தத்தோ. உஸ்ஸூரகஜாதோதி தஸ்ஸேவ குதி⁴தபா⁴வஸ்ஸ உஸ்ஸூரகம் அச்சுண்ஹதம் பத்தோ. தேனாஹ ‘‘உஸுமகஜாதோ’’தி. திலபீ³ஜகாதி³பே⁴தே³னாதி திலபீ³ஜகண்ணிககேஸராதி³பே⁴தே³ன ஸேவாலேன. பணகேனாதி உத³கபிச்சி²ல்லேன. அப்பஸன்னோ ஆகுலதாய. அஸன்னிஸின்னோ கலலுப்பத்தியா. அனாலோகட்டா²னேதி ஆலோகரஹிதே டா²னே.

ஸங்கா³ரவஸுத்தவண்ணனா நிட்டி²தா.