1-6. ஸாரஜ்ஜஸுத்தாதி³வண்ணனா

171-176. ததியஸ்ஸ பட²மது³தியததியசதுத்தே² நத்தி² வத்தப்³ப³ம். பஞ்சமே உபாஸகபச்சி²மகோதி உபாஸகனிஹீனோ. ‘‘இமினா தி³ட்டா²தி³னா இத³ம் நாம மங்க³லம் ப⁴விஸ்ஸதீ’’தி ஏவம் பா³லஜனபரிகப்பிதகோதூஹலஸங்கா²தேன தி³ட்ட²ஸுதமுதமங்க³லேன ஸமன்னாக³தோ கோதூஹலமங்க³லிகோ. தேனாஹ ‘‘இமினா இத³ம் ப⁴விஸ்ஸதீ’’திஆதி³. மங்க³லம் பச்சேதீதி தி³ட்ட²மங்க³லாதி³பே⁴த³ம் மங்க³லமேவ பத்தி²யாயதி. நோ கம்மந்தி கம்மஸ்ஸகதம் நோ பத்தி²யாயதி. இமம்ஹா ஸாஸனாதி இதோ ஸப்³ப³ஞ்ஞுபு³த்³த⁴ஸாஸனதோ. ப³ஹித்³தா⁴தி பா³ஹிரகஸமயே. த³க்கி²ணேய்யம் பரியேஸதீதி ‘‘து³ப்படிபன்னா த³க்கி²ணேய்யா’’தி ஸஞ்ஞீ க³வேஸதி. ஏத்த² த³க்கி²ணபரியேஸனபுப்³ப³காரே ஏகம் கத்வா பஞ்ச த⁴ம்மா வேதி³தப்³பா³. ச²ட்ட²ம் உத்தானமேவ.

ஸாரஜ்ஜஸுத்தாதி³வண்ணனா நிட்டி²தா.