(17) 2. ஆகா⁴தவக்³கோ³

1-5. பட²மஆகா⁴தபடிவினயஸுத்தாதி³வண்ணனா

161-165. து³தியஸ்ஸ பட²மே நத்தி² வத்தப்³ப³ம். து³தியே ஆகா⁴தோ படிவினயதி ஏத்த², ஏதேஹீதி வா ஆகா⁴தபடிவினயா. தேனாஹ ‘‘ஆகா⁴தோ ஏதேஹி படிவினேதப்³போ³’’திஆதி³.

நந்தகந்தி அனந்தகம், அந்தவிரஹிதம் வத்த²க²ண்ட³ம். யதி³ ஹி தஸ்ஸ அந்தோ ப⁴வேய்ய, ‘‘பிலோதிகா’’தி ஸங்க²ம் ந க³ச்சே²ய்ய.

ஸேவாலேனாதி பீ³ஜகண்ணிககேஸராதி³பே⁴தே³ன ஸேவாலேன. உத³கபப்படகேனாதி நீலமண்டூ³கபிட்டி²வண்ணேன உத³கபிட்டி²ம் சா²தே³த்வா நிப்³ப³த்தேன உத³கபிட்டி²கேன. க⁴ம்மேன அனுக³தோதி க⁴ம்மேன பு²ட்டோ² அபி⁴பூ⁴தோ. சித்துப்பாத³ந்தி படிக⁴ஸம்பயுத்தசித்துப்பாத³ம்.

விஸபா⁴க³வேத³னுப்பத்தியா ககசேனேவ இரியாபத²பவத்தினிவாரணேன சி²ந்த³ந்தோ ஆபா³த⁴தி பீளேதீதி ஆபா³தோ⁴, ஸோ அஸ்ஸ அத்தீ²தி ஆபா³தி⁴கோ. தம்ஸமுட்டா²னேன து³க்கி²தோ ஸஞ்ஜாதது³க்கோ². பா³ள்ஹகி³லானோதி அதி⁴மத்தகி³லானோ. கா³மந்தனாயகஸ்ஸாதி கா³மந்தஸம்பாபகஸ்ஸ.

பஸன்னபா⁴வேன உத³கஸ்ஸ அச்ச²பா⁴வோ வேதி³தப்³போ³தி ஆஹ ‘‘அச்சோ²த³காதி பஸன்னோத³கா’’தி. ஸாது³ரஸதாய ஸாததாதி ஆஹ ‘‘மது⁴ரோத³கா’’தி. தனுகமேவ ஸலிலம் விஸேஸதோ ஸீதலம், ந ப³ஹலாதி ஆஹ ‘‘தனுஸீதஸலிலா’’தி. ஸேதகாதி நிக்கத்³த³மா. ஸசிக்க²ல்லாதி³வஸேன ஹி உத³கஸ்ஸ விவண்ணதா. ஸபா⁴வதோ பன தம் ஸேதவண்ணமேவ. ததியாதீ³னி உத்தானத்தா²னேவ.

பட²மஆகா⁴தபடிவினயஸுத்தாதி³வண்ணனா நிட்டி²தா.

6. நிரோத⁴ஸுத்தவண்ணனா

166. ச²ட்டே² அமரிஸனத்தே²தி அஸஹனத்தே². அனாக³தவசனம் கதந்தி அனாக³தஸத்³த³ப்பயோகோ³ கதோ, அத்தோ² பன வத்தமானகாலிகோவ. அக்க²ரசிந்தகா (பாணினி. 3.3.145-146) ஹி ஈதி³ஸேஸு டா²னேஸு அனோகப்பனாமரிஸனத்த²வஸேன அத்தி²ஸத்³தே³ உபபதே³ வத்தமானகாலேபி அனாக³தவசனம் கரோந்தி.

நிரோத⁴ஸுத்தவண்ணனா நிட்டி²தா.

7-9. சோத³னாஸுத்தாதி³வண்ணனா

167-9. ஸத்தமே வத்து²ஸந்த³ஸ்ஸனாதி யஸ்மிம் வத்து²ஸ்மிம் ஆபத்தி, தஸ்ஸ ஸரூபதோ த³ஸ்ஸனம். ஆபத்திஸந்த³ஸ்ஸனாதி யம் ஆபத்திம் ஸோ ஆபன்னோ, தஸ்ஸா த³ஸ்ஸனம். ஸம்வாஸப்படிக்கே²போதி உபோஸத²ப்பவாரணாதி³ஸம்வாஸஸ்ஸ படிக்கி²பனம் அகரணம். ஸாமீசிப்படிக்கே²போதி அபி⁴வாத³னாதி³ஸாமீசிகிரியாய அகரணம். சோத³யமானேனாதி சோதே³ந்தேன. சுதி³தகஸ்ஸ காலோதி சுதி³தகஸ்ஸ சோதே³தப்³ப³காலோ. புக்³க³லந்தி சோதே³தப்³ப³புக்³க³லம். உபபரிக்கி²த்வாதி ‘‘அயம் சுதி³தகலக்க²ணே திட்ட²தி, ந திட்ட²தீ’’தி வீமம்ஸித்வா. அயஸம் ஆரோபேதீதி ‘‘இமே மம் அபூ⁴தேன அப்³பா⁴சிக்க²ந்தா அயஸம் ப்³யஸனம் உப்பாதே³ந்தீ’’தி பி⁴க்கூ²னம் அயஸம் உப்பாதே³தி. அட்ட²மனவமானி உத்தானத்தா²னேவ.

சோத³னாஸுத்தாதி³வண்ணனா நிட்டி²தா.

10. ப⁴த்³த³ஜிஸுத்தவண்ணனா

170. த³ஸமே அபி⁴ப⁴வித்வா டி²தோ இமே ஸத்தேதி அதி⁴ப்பாயோ. யஸ்மா பன ஸோ ‘‘பாஸம்ஸபா⁴வேன உத்தமபா⁴வேன ச தே ஸத்தே அபி⁴ப⁴வித்வா டி²தோ’’தி அத்தானம் மஞ்ஞதி, தஸ்மா வுத்தம் ‘‘ஜேட்ட²கோ’’தி. அஞ்ஞத³த்து² த³ஸோதி த³ஸ்ஸனே அந்தராயாபா⁴வவசனேன ஞேய்யவிஸேஸபரிக்³கா³ஹிகபா⁴வேன ச அனாவரணத³ஸ்ஸாவிதம் படிஜானாதீதி ஆஹ ‘‘ஸப்³ப³ம் பஸ்ஸதீதி அதி⁴ப்பாயோ’’தி.

ப⁴த்³த³ஜிஸுத்தவண்ணனா நிட்டி²தா.

ஆகா⁴தவக்³க³வண்ணனா நிட்டி²தா.