(14) 4. ராஜவக்³கோ³

1. பட²மசக்கானுவத்தனஸுத்தவண்ணனா

131. சதுத்த²ஸ்ஸ பட²மே அத்த²ஞ்ஞூதி ஹிதஞ்ஞூ. ஹிதபரியாயோ ஹேத்த² அத்த²-ஸத்³தோ³ ‘‘அத்தத்தோ² பரத்தோ²’’திஆதீ³ஸு (மஹானி. 69; சூளனி. மோக⁴ராஜமாணவபுச்சா²னித்³தே³ஸோ 85; படி. ம. 3.5) விய. யஸ்மா சேஸ பரேஸம் ஹிதம் ஜானந்தோ தே அத்தனி ரஞ்ஜேதி, தஸ்மா வுத்தம் ‘‘ரஞ்ஜிதும் ஜானாதீ’’தி. த³ண்டே³தி அபராதா⁴னுரூபே த³ண்ட³னே. ப³லம்ஹீதி ப³லகாயே. பஞ்ச அத்தே²தி அத்தத்தோ², பரத்தோ², உப⁴யத்தோ², தி³ட்ட²த⁴ம்மிகோ அத்தோ², ஸம்பராயிகோ அத்தோ²தி ஏவம் பஞ்சப்பபே⁴தே³ அத்தே². சத்தாரோ த⁴ம்மேதி சதுஸச்சத⁴ம்மே, காமரூபாரூபலோகுத்தரபே⁴தே³ வா சத்தாரோ த⁴ம்மே. படிக்³க³ஹணபரிபோ⁴க³மத்தஞ்ஞுதாய ஏவ பரியேஸனவிஸ்ஸஜ்ஜனமத்தஞ்ஞுதாபி போ³தி⁴தா ஹோந்தீதி ‘‘படிக்³க³ஹணபரிபோ⁴க³மத்தம் ஜானாதி’’இச்சேவ வுத்தம்.

உத்தரதி அதிக்கமதி, அபி⁴ப⁴வதீதி வா உத்தரம், நத்தி² ஏத்த² உத்தரந்தி அனுத்தரம். அனதிஸயம், அப்படிபா⁴க³ம் வா அனேகாஸு தே³வமனுஸ்ஸபரிஸாஸு அனேகஸதக்க²த்தும் தேஸம் அரியஸச்சப்படிவேத⁴ஸம்பாத³னவஸேன பவத்தா ப⁴க³வதோ த⁴ம்மதே³ஸனா த⁴ம்மசக்கம். அபிச ஸப்³ப³பட²மம் அஞ்ஞாதகோண்ட³ஞ்ஞப்பமுகா²ய அட்டா²ரஸபரிஸக³ணாய ப்³ரஹ்மகோடியா சதுஸச்சஸ்ஸ படிவேத⁴விதா⁴யினீ யா த⁴ம்மதே³ஸனா, தஸ்ஸா ஸாதிஸயா த⁴ம்மசக்கஸமஞ்ஞா. தத்த² ஸதிபட்டா²னாதித⁴ம்மோ ஏவ பவத்தனட்டே²ன சக்கந்தி த⁴ம்மசக்கம். சக்கந்தி வா ஆணா த⁴ம்மதோ அனபேதத்தா, த⁴ம்மஞ்ச தம் சக்கஞ்சாதி த⁴ம்மசக்கம். த⁴ம்மேன ஞாயேன சக்கந்திபி த⁴ம்மசக்கம். யதா²ஹ ‘‘த⁴ம்மஞ்ச பவத்தேதி சக்கஞ்சாதி த⁴ம்மசக்கம், சக்கஞ்ச பவத்தேதி த⁴ம்மஞ்சாதி த⁴ம்மசக்கம், த⁴ம்மேன பவத்தேதீதி த⁴ம்மசக்க’’ந்திஆதி³ (படி. ம. 2.40-41). அப்படிவத்தியந்தி த⁴ம்மிஸ்ஸரஸ்ஸ ப⁴க³வதோ ஸம்மாஸம்பு³த்³த⁴ஸ்ஸ த⁴ம்மசக்கஸ்ஸ அனுத்தரபா⁴வதோ அப்படிஸேத⁴னீயம். கேஹி பன அப்படிவத்தியந்தி ஆஹ – ‘‘ஸமணேன வா’’திஆதி³. தத்த² ஸமணேனாதி பப்³ப³ஜ்ஜம் உபக³தேன. ப்³ராஹ்மணேனாதி ஜாதிப்³ராஹ்மணேன. ஸாஸனபரமத்த²ஸமணப்³ராஹ்மணானஞ்ஹி படிலோமசித்தம்யேவ நத்தி². தே³வேனாதி காமாவசரதே³வேன. கேனசீதி யேன கேனசி அவஸிட்ட²பாரிஸஜ்ஜேன. ஏத்தாவதா அட்ட²ன்னம்பி பரிஸானம் அனவஸேஸபரியாதா³னம் த³ட்ட²ப்³ப³ம். லோகஸ்மிந்தி ஸத்தலோகே.

பட²மசக்கானுவத்தனஸுத்தவண்ணனா நிட்டி²தா.

2. து³தியசக்கானுவத்தனஸுத்தவண்ணனா

132. து³தியே சக்கவத்திவத்தந்தி த³ஸவித⁴ம், த்³வாத³ஸவித⁴ம் வா சக்கவத்திபா⁴வாவஹம் வத்தம். தத்த² அந்தோஜனஸ்மிம் ப³லகாயே த⁴ம்மிகாயேவ ரக்கா²வரணகு³த்தியா ஸம்விதா⁴னம், க²த்தியேஸு, அனுயந்தேஸு, ப்³ராஹ்மணக³ஹபதிகேஸு, நேக³மஜானபதே³ஸு, ஸமணப்³ராஹ்மணேஸு, மிக³பக்கீ²ஸு, அத⁴ம்மிகபடிக்கே²போ, அத⁴னானம் த⁴னானுப்பதா³னம், ஸமணப்³ராஹ்மணே உபஸங்கமித்வா பஞ்ஹபுச்ச²னந்தி இத³ம் த³ஸவித⁴ம் சக்கவத்திவத்தம். இத³மேவ ச க³ஹபதிகே பக்கி²ஜாதே ச விஸும் கத்வா க³ஹணவஸேன த்³வாத³ஸவித⁴ம். பிதரா பவத்திதமேவ அனுப்பவத்தேதீதி த³ஸவித⁴ம் வா த்³வாத³ஸவித⁴ம் வா சக்கவத்திவத்தம் பூரேத்வா நிஸின்னஸ்ஸ புத்தஸ்ஸ அஞ்ஞம் பாதுப⁴வதி, ஸோ தம் பவத்தேதி. ரதனமயத்தா பன ஸதி³ஸட்டே²ன ததே³வேதந்தி கத்வா ‘‘பிதரா பவத்தித’’ந்தி வுத்தம். யஸ்மா வா ஸோ ‘‘அப்போஸ்ஸுக்கோ, த்வம் தே³வ, ஹோஹி, அஹமனுஸாஸிஸ்ஸாமீ’’தி ஆஹ. தஸ்மா பிதரா பவத்திதம் ஆணாசக்கம் அனுப்பவத்தேதி நாமாதி ஏவமேத்த² அத்தோ² த³ட்ட²ப்³போ³. யஞ்ஹி அத்தனோ புஞ்ஞானுபா⁴வஸித்³த⁴ம் சக்கரதனம், தம் நிப்பரியாயதோ தேன பவத்திதம் நாம, நேதரந்தி பட²மனயோ வுத்தோ. யஸ்மா பவத்திதஸ்ஸேவ அனுவத்தனம், பட²மனயோ ச தம்ஸதி³ஸே தப்³போ³ஹாரவஸேன வுத்தோதி தம் அனாதி³யித்வா து³தியனயோ வுத்தோ.

து³தியசக்கானுவத்தனஸுத்தவண்ணனா நிட்டி²தா.

4. யஸ்ஸம்தி³ஸம்ஸுத்தவண்ணனா

134. சதுத்தே² ‘‘உப⁴தோ ஸுஜாதோ’’தி ஏத்தகே வுத்தே யேஹி கேஹிசி த்³வீஹி பா⁴கே³ஹி ஸுஜாததா பஞ்ஞாபேய்ய, ஸுஜாத-ஸத்³தோ³ ச ‘‘ஸுஜாதோ சாருத³ஸ்ஸனோ’’திஆதீ³ஸு (ம. நி. 2.399; ஸு. நி. 553; தே²ரகா³. 818) ஆரோஹஸம்பத்திபரியாயோதி ஜாதிவஸேன ஸுஜாததம் விபா⁴வேதும் ‘‘மாதிதோ ச பிதிதோ சா’’தி வுத்தம். அனோரஸபுத்தவஸேனபி லோகே மாதுபிதுஸமஞ்ஞா தி³ஸ்ஸதி, இத⁴ பன ஸா ஓரஸபுத்தவஸேன இச்சி²தாதி த³ஸ்ஸேதும் ‘‘ஸம்ஸுத்³த⁴க்³க³ஹணிகோ’’தி வுத்தம். க³ப்³ப⁴ம் க³ண்ஹாதி தா⁴ரேதீதி க³ஹணீ, க³ப்³பா⁴ஸயஸஞ்ஞிதோ மாதுகுச்சி²ப்பதே³ஸோ. தேனாஹ ‘‘ஸம்ஸுத்³தா⁴ய மாதுகுச்சி²யா ஸமன்னாக³தோ’’தி. யதா²பு⁴த்தஸ்ஸ ஆஹாரஸ்ஸ விபாசனவஸேன க³ண்ஹனதோ அச²ட்³ட³னதோ க³ஹணீ, தேஜோதா⁴து. பிதா ச மாதா ச பிதரோ. பிதூனம் பிதரோ பிதாமஹா. தேஸம் யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³, பிதாமஹத்³வந்தா³தி ஏவமேத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோதி ஸோ அட்ட²கதா²யம் விஸும் ந உத்³த⁴தோ. யுக³-ஸத்³தோ³ சேத்த² ஏகஸேஸனயேன த³ட்ட²ப்³போ³ ‘‘யுகோ³ ச யுகோ³ ச யுகோ³’’தி. ஏவஞ்ஹி தத்த² தத்த² த்³வின்னம் க³ஹிதமேவ ஹோதி. தேனாஹ ‘‘ததோ உத்³த⁴ம் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா’’தி. புரிஸக்³க³ஹணஞ்சேத்த² உக்கட்ட²னித்³தே³ஸவஸேன கதந்தி த³ட்ட²ப்³ப³ம். ஏவஞ்ஹி ‘‘மாதிதோ’’தி பாளிவசனம் ஸமத்தி²தம் ஹோதி.

அக்கி²த்தோதி அப்பத்தக்கே²போ. அனவக்கி²த்தோதி ஸம்பத்தவிவாதா³தீ³ஸு ந அவக்கி²த்தோ ந ச²ட்³டி³தோ. ஜாதிவாதே³னாதி ஹேதும்ஹி கரணவசனந்தி த³ஸ்ஸேதும் ‘‘கேன காரணேனா’’திஆதி³ வுத்தம். ஏத்த² ச ‘‘உப⁴தோ…பே… பிதாமஹயுகா³’’தி ஏதேன க²த்தியஸ்ஸ யோனிதோ³ஸாபா⁴வோ த³ஸ்ஸிதோ ஸம்ஸுத்³த⁴க்³க³ஹணிகபா⁴வகித்தனதோ. ‘‘அக்கி²த்தோ’’தி இமினா கிரியாபராதா⁴பா⁴வோ. கிரியாபராதே⁴ன ஹி ஸத்தா கே²பம் பாபுணந்தி. ‘‘அனுபக்குட்டோ²’’தி இமினா அயுத்தஸம்ஸக்³கா³பா⁴வோ. அயுத்தஸம்ஸக்³க³ஞ்ஹி படிச்ச ஸத்தா அக்கோஸம் லப⁴ந்தி.

அட்³ட⁴தா நாம விப⁴வஸம்பன்னதா, ஸா தம் தம் உபாதா³யுபாதா³ய வுச்சதீதி ஆஹ ‘‘யோ கோசி அத்தனோ ஸந்தகேன விப⁴வேன அட்³டோ⁴ ஹோதீ’’தி. ததா² மஹத்³த⁴னதாபீதி தம் உக்கம்ஸக³தம் த³ஸ்ஸேதும் ‘‘மஹதா அபரிமாணஸங்கே²ன த⁴னேன ஸமன்னாக³தோ’’தி வுத்தம். பு⁴ஞ்ஜிதப்³ப³தோ பரிபு⁴ஞ்ஜிதப்³ப³தோ விஸேஸதோ காமா போ⁴கா³ நாமாதி ஆஹ ‘‘பஞ்சகாமகு³ணவஸேனா’’தி. கோட்ட²ம் வுச்சதி த⁴ஞ்ஞஸ்ஸ ஆவஸனட்டா²னம், கோட்ட²பூ⁴தம் அகா³ரம் கோட்டா²கா³ரம். தேனாஹ ‘‘த⁴ஞ்ஞேன ச பரிபுண்ணகோட்டா²கா³ரோ’’தி. ஏவம் ஸாரக³ப்³ப⁴ம் கோஸோ, த⁴ஞ்ஞபரிட்ட²பனட்டா²னஞ்ச கோட்டா²கா³ரந்தி த³ஸ்ஸேத்வா இதா³னி ததோ அஞ்ஞதா² தம் த³ஸ்ஸேதும் ‘‘அத² வா’’திஆதி³ வுத்தம். தத்த² யதா² அஸினோ திக்க²பா⁴வபரிஹாரகோ படிச்ச²தோ³ ‘‘கோஸோ’’தி வுச்சதி. ஏவம் ரஞ்ஞோ திக்க²பா⁴வபரிஹாரம் கத்வா சதுரங்கி³னீ ஸேனா கோஸோதி ஆஹ ‘‘சதுப்³பி³தோ⁴ கோஸோ ஹத்தீ² அஸ்ஸா ரதா² பத்தீ’’தி. வத்த²கோட்டா²கா³ரக்³க³ஹணேனேவ ஸப்³ப³ஸ்ஸபி ப⁴ண்ட³ட்ட²பனட்டா²னஸ்ஸ க³ஹிதத்தா ‘‘திவித⁴ம் கோட்டா²கா³ர’’ந்தி வுத்தம்.

யஸ்ஸா பஞ்ஞாய வஸேன புரிஸோ ‘‘பண்டி³தோ’’தி வுச்சதி, தம் பண்டி³ச்சந்தி ஆஹ ‘‘பண்டி³ச்சேன ஸமன்னாக³தோ’’தி. தம்தம்இதிகத்தப்³ப³தாஸு சே²கபா⁴வோ ப்³யத்தபா⁴வோ வேய்யத்தியம். ஸம்மோஹம் ஹிம்ஸதி வித⁴மதீதி மேதா⁴, ஸா ஏதஸ்ஸ அத்தீ²தி மேதா⁴வீ. டா²னே டா²னே உப்பத்தி ஏதிஸ்ஸா அத்தீ²தி டா²னுப்பத்தி, டா²னஸோ உப்பஜ்ஜனபஞ்ஞா. வட்³டி⁴அத்தே²தி வட்³டி⁴ஸங்கா²தே அத்தே².

யஸ்ஸம்தி³ஸம்ஸுத்தவண்ணனா நிட்டி²தா.

5-9. பத்த²னாஸுத்தாதி³வண்ணனா

135-9. பஞ்சமே ஹத்தி²ஸ்மிந்தி ஹத்தி²ஸிப்பே. ஹத்தீ²தி ஹி ஹத்தி²விஸயத்தா ஹத்தி²ஸன்னிஸ்ஸிதத்தா ச ஹத்தி²ஸிப்பம் க³ஹிதம். ஸேஸபதே³ஸுபி ஏஸேவ நயோ. வயதீதி வயோ, ஸோப⁴னேஸு கத்த²சி அபக்க²லந்தோ அவித்தா²யந்தோ தானி ஸந்தா⁴ரேதும் ஸக்கோதீதி அத்தோ². ந வயோ அவயோ, தானி அத்த²தோ ஸத்³த³தோ ச ஸந்தா⁴ரேதும் ந ஸக்கோதி. அவயோ ந ஹோதீதி அனவயோ. த்³வே படிஸேதா⁴ பகதிம் க³மேந்தீதி ஆஹ ‘‘அனவயோதி ஸமத்தோ²’’தி. ச²ட்டா²தீ³னி உத்தானத்தா²னேவ.

பத்த²னாஸுத்தாதி³வண்ணனா நிட்டி²தா.

10. ஸோதஸுத்தவண்ணனா

140. த³ஸமே திப்³பா³னந்தி திக்கா²னம். க²ரானந்தி கக்கஸானம். கடுகானந்தி தா³ருணானம். அஸாதானந்தி நஸாதானம் அப்பியானம். ந தாஸு மனோ அப்பேதி, ந தா மனம் அப்பாயந்தி வட்³டே⁴ந்தீதி அமனாபா.

ஸோதஸுத்தவண்ணனா நிட்டி²தா.

ராஜவக்³க³வண்ணனா நிட்டி²தா.