(15) 5. திகண்ட³கீவக்³கோ³
1. அவஜானாதிஸுத்தவண்ணனா
141. பஞ்சமஸ்ஸ பட²மே த³த்வா அவஜானாதீதி ஏத்த² ஏகோ பி⁴க்கு² மஹாபுஞ்ஞோ சதுபச்சயலாபீ⁴ ஹோதி, ஸோ சீவராதீ³னி லபி⁴த்வா அஞ்ஞம் அப்பபுஞ்ஞம் ஆபுச்ச²தி. ஸோபி தஸ்மிம் புனப்புனம் ஆபுச்ச²ந்தேபி க³ண்ஹாதியேவ. அத²ஸ்ஸ இதரோ தோ²கம் குபிதோ ஹுத்வா மங்குபா⁴வம் உப்பாதே³துகாமோ வத³தி ‘‘அயம் அத்தனோ த⁴ம்மதாய சீவராதீ³னி ந லப⁴தி, அம்ஹே நிஸ்ஸாய லப⁴தீ’’தி. ஏவம்பி த³த்வா அவஜானாதி நாம. ஏகோ பன ஏகேன ஸத்³தி⁴ம் த்³வே தீணி வஸ்ஸானி வஸந்தோ புப்³பே³ தம் புக்³க³லம் க³ரும் கத்வா க³ச்ச²ந்தே க³ச்ச²ந்தே காலே சித்தீகாரம் ந கரோதி, ஆஸனனிஸின்னட்டா²னம்பி ந க³ச்ச²தி. அயம்பி புக்³க³லோ ஸம்வாஸேன அவஜானாதி நாம. ஆதே⁴ய்யமுகோ²தி ஆதி³தோ தே⁴ய்யமுகோ², பட²மவசனஸ்மிம்யேவ ட²பிதமுகோ²தி அத்தோ². தத்தா²யம் நயோ – ஏகோ புக்³க³லோ ஸாருப்பம்யேவ பி⁴க்கு²ம் ‘‘அஸாருப்போ ஏஸோ’’தி கதே²தி. தம் ஸுத்வா ஏஸ நிட்ட²ம் க³ச்ச²தி, புன அஞ்ஞேன ஸபா⁴கே³ன பி⁴க்கு²னா ‘‘ஸாருப்போ அய’’ந்தி வுத்தேபி தஸ்ஸ வசனம் ந க³ண்ஹாதி. அஸுகேன நாம ‘‘அஸாருப்போ அய’’ந்தி அம்ஹாகம் கதி²தந்தி புரிமபி⁴க்கு²னோவ கத²ம் க³ண்ஹாதி. அபரோபிஸ்ஸ து³ஸ்ஸீலம் ‘‘ஸீலவா’’தி கதே²தி. தஸ்ஸ வசனம் ஸத்³த³ஹித்வா புன அஞ்ஞேன ‘‘அஸாருப்போ ஏஸோ பி⁴க்கு², நாயம் தும்ஹாகம் ஸந்திகம் உபஸங்கமிதும் யுத்தோ’’தி வுத்தேபி தஸ்ஸ வசனம் அக்³க³ஹேத்வா புரிமம்யேவ கத²ம் க³ண்ஹாதி. அபரோ வண்ணம்பி கதி²தம் க³ண்ஹாதி, அவண்ணம்பி கதி²தம் க³ண்ஹாதியேவ. அயம்பி ஆதே⁴ய்யமுகோ²யேவ நாம ஆதா⁴தப்³ப³முகோ², யம் யம் ஸுணாதி, தத்த² தத்த² ட²பிதமுகோ²தி அத்தோ².
லோலோதி ஸத்³தா⁴தீ³னம் இத்தரகாலப்பதிதத்தா அஸ்ஸத்³தி⁴யாதீ³ஹி லுலிதபா⁴வேன லோலோ. இத்தரப⁴த்தீதிஆதீ³ஸு புனப்புனம் ப⁴ஜனேன ஸத்³தா⁴வ ப⁴த்திபேமம். ஸத்³தா⁴பேமம்பி கே³ஹஸ்ஸிதபேமம்பி வட்டதி, பஸாதோ³ ஸத்³தா⁴பஸாதோ³. ஏவம் புக்³க³லோ லோலோ ஹோதீதி ஏவம் இத்தரஸத்³தா⁴தி³தாய புக்³க³லோ லோலோ நாம ஹோதி. ஹலித்³தி³ராகோ³ விய, து²ஸராஸிம்ஹி கோட்டிதகா²னுகோ விய, அஸ்ஸபிட்டி²யம் ட²பிதகும்ப⁴ண்ட³ம் விய ச அனிப³த்³த⁴ட்டா²னே முஹுத்தேன குப்பதி. மந்தோ³ மோமூஹோதி அஞ்ஞாணபா⁴வேன மந்தோ³, அவிஸயதாய மோமூஹோ, மஹாமூள்ஹோதி அத்தோ².
அவஜானாதிஸுத்தவண்ணனா நிட்டி²தா.
2-3. ஆரப⁴திஸுத்தாதி³வண்ணனா
142-3. து³தியே ஆரப⁴தீதி ஏத்த² ஆரம்ப⁴-ஸத்³தோ³ கம்மகிரியஹிம்ஸனவீரியகோபனாபத்திவீதிக்கமேஸு வத்ததி. ததா² ஹேஸ ‘‘யம் கிஞ்சி து³க்க²ம் ஸம்போ⁴தி, ஸப்³ப³ம் ஆரம்ப⁴பச்சயா’’தி (ஸு. நி. 749) கம்மே ஆக³தோ. ‘‘மஹாரம்பா⁴ மஹாயஞ்ஞா, ந தே ஹோந்தி மஹப்ப²லா’’தி (ஸம். நி. 1.120; அ. நி. 4.39) கிரியாய. ‘‘ஸமணம் கோ³தமம் உத்³தி³ஸ்ஸ பாணம் ஆரப⁴ந்தீ’’தி (ம. நி. 2.51) ஹிம்ஸனே. ‘‘ஆரம்ப⁴த² நிக்க²மத², யுஞ்ஜத² பு³த்³த⁴ஸாஸனே’’தி (ஸம். நி. 1.185; நேத்தி. 29; பேடகோ. 38; மி. ப. 5.1.4) வீரியே. ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³. நி. 1.10, 195; ம. நி. 1.293) கோபனே. ‘‘ஆரப⁴தி ச விப்படிஸாரீ ச ஹோதீ’’தி (அ. நி. 5.142; பு. ப. 191) அயம் பன ஆபத்திவீதிக்கமே ஆக³தோ, தஸ்மா ஆபத்திவீதிக்கமவஸேன ஆரப⁴தி சேவ, தப்பச்சயா ச விப்படிஸாரீ ஹோதீதி அயமேத்த² அத்தோ². யதா²பூ⁴தம் நப்பஜானாதீதி அனதி⁴க³தத்தா யதா²ஸபா⁴வதோ ந ஜானாதி. யத்த²ஸ்ஸாதி யஸ்மிம் அஸ்ஸ, யம் டா²னம் பத்வா ஏதஸ்ஸ புக்³க³லஸ்ஸ உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தீதி அத்தோ². கிம் பன பத்வா தே நிருஜ்ஜ²ந்தீதி? அரஹத்தமக்³க³ம், ப²லப்பத்தஸ்ஸ பன நிருத்³தா⁴ நாம ஹோந்தி. ஏவம் ஸந்தேபி இத⁴ மக்³க³கிச்சவஸேன பன ப²லமேவ வுத்தந்தி வேதி³தப்³ப³ம்.
ஆரப⁴தீ ந விப்படிஸாரீ ஹோதீதி ஆபத்திம் ஆபஜ்ஜதி, தம் பனேஸ தே³ஸேதும் ஸபா⁴க³புக்³க³லம் பரியேஸதி, தஸ்மா ந விப்படிஸாரீ ஹோதி. ந ஆரப⁴தி விப்படிஸாரீ ஹோதீதி ஆபத்திம் ந ஆபஜ்ஜதி, வினயபஞ்ஞத்தியம் பன அகோவித³த்தா அனாபத்தியா ஆபத்திஸஞ்ஞீ ஹுத்வா விப்படிஸாரீ ஹோதீதி ஏவமேத்த² அத்தோ² த³ட்ட²ப்³போ³. ‘‘ந ஆரப⁴தி ந விப்படிஸாரீ ஹோதீ’’தி யோ வுத்தோ, கதரோ ஸோ புக்³க³லோ? ஓஸ்ஸட்ட²வீரியபுக்³க³லோ. ஸோ ஹி ‘‘கிம் மே இமஸ்மிம் காலே பரினிப்³பா³னேன, அனாக³தே மேத்தேய்யஸம்மாஸம்பு³த்³த⁴காலே பரினிப்³பா³யிஸ்ஸாமீ’’தி விஸுத்³த⁴ஸீலோபி படிபத்திம் ந பூரேதி. ஸோ ஹி ‘‘கிமத்த²ம் ஆயஸ்மா பமத்தோ விஹரதி, புது²ஜ்ஜனஸ்ஸ நாம க³தி அனிப³த்³தா⁴, தஸ்மா ஹி மேத்தேய்யஸம்மாஸம்பு³த்³த⁴ஸ்ஸ ஸம்முகீ²பா⁴வம் லபே⁴ய்யாஸி, அரஹத்தத்தா²ய விபஸ்ஸனம் பா⁴வேஹீ’’தி ஓவதி³தப்³போ³வ.
ஸாதூ⁴தி ஆயாசனத்தே² நிபாதோ. இத³ம் வுத்தம் ஹோதி – யாவ அபரத்³த⁴ம் வத ஆயஸ்மதா, ஏவம் ஸந்தேபி மயம் ஆயஸ்மந்தம் யாசாம, தே³ஸேதப்³ப³யுத்தகஸ்ஸ தே³ஸனாய, வுட்டா²தப்³ப³யுத்தகஸ்ஸ வுட்டா²னேன, ஆவிகாதப்³ப³யுத்தகஸ்ஸ ஆவிகிரியாய ஆரம்ப⁴ஜே ஆஸவே பஹாய ஸுத்³த⁴ந்தே டி²தபா⁴வபச்சவேக்க²ணேன விப்படிஸாரஜே ஆஸவே படிவினோதே³த்வா நீஹரித்வா விபஸ்ஸனாசித்தஞ்சேவ விபஸ்ஸனாபஞ்ஞஞ்ச வட்³டே⁴தூதி. அமுனா பஞ்சமேன புக்³க³லேனாதி ஏதேன பஞ்சமேன கீ²ணாஸவபுக்³க³லேன. ஸமஸமோ ப⁴விஸ்ஸதீதி லோகுத்தரகு³ணேஹி ஸமபா⁴வேனேவ ஸமோ ப⁴விஸ்ஸதீதி ஏவம் கீ²ணாஸவேன ஓவதி³தப்³போ³தி அத்தோ². ததியம் உத்தானமேவ.
ஆரப⁴திஸுத்தாதி³வண்ணனா நிட்டி²தா.
4-6. திகண்ட³கீஸுத்தாதி³வண்ணனா
144-6. சதுத்தே² படிகூலேதி அமனுஞ்ஞே அனிட்டே². அப்படிகூலஸஞ்ஞீதி இட்டா²காரேனேவ பவத்தசித்தோ. இட்ட²ஸ்மிம் வத்து²ஸ்மிம் அஸுபா⁴ய வா ப²ரதி, அனிச்சதோ வா உபஸம்ஹரதி உபனேதி பவத்தேதி. அனிட்ட²ஸ்மிம் வத்து²ஸ்மிந்தி அனிட்டே² ஸத்தஸஞ்ஞிதே ஆரம்மணே. மேத்தாய வா ப²ரதீதி மேத்தம் ஹிதேஸிதம் உபஸம்ஹரந்தோ ஸப்³ப³த்த²கமேவ வா தத்த² ப²ரதி. தா⁴துதோ வா உபஸம்ஹரதீதி த⁴ம்மஸபா⁴வசிந்தனேன தா⁴துதோ பச்சவேக்க²ணாய தா⁴துமனஸிகாரம் வா தத்த² பவத்தேதி. தது³ப⁴யம் அபி⁴னிவஜ்ஜேத்வாதி ஸபா⁴வதோ ஆனுபா⁴வதோ ச உபதிட்ட²ந்தம் ஆரம்மணே படிகூலபா⁴வம் அப்படிகூலபா⁴வஞ்சாதி தம் உப⁴யம் பஹாய அக்³க³ஹேத்வா, ஸப்³ப³ஸ்மிம் பன தஸ்மிம் மஜ்ஜ²த்தோ ஹுத்வாதி வுத்தம் ஹோதி. மஜ்ஜ²த்தோ ஹுத்வா விஹரிதுகாமோ பன கிம் கரோதீதி? இட்டா²னிட்டே²ஸு ஆபாத²ம் க³தேஸு நேவ ஸோமனஸ்ஸிதோ ஹோதி, ந தோ³மனஸ்ஸிதோ ஹோதி. உபேக்க²கோ விஹரேய்யாதி இட்டே² அரஜ்ஜந்தோ அனிட்டே² அது³ஸ்ஸந்தோ யதா² அஞ்ஞே அஸமபேக்க²னேன மோஹம் உப்பாதே³ந்தி, ஏவம் அனுப்பாதே³ந்தோ ச²ஸு ஆரம்மணேஸு ச²ளங்கு³பேக்கா²ய உபேக்க²கோ விஹரேய்ய. தேனேவாஹ ‘‘ச²ளங்கு³பேக்கா²வஸேன பஞ்சமோ’’தி. இட்டா²னிட்ட²ச²ளாரம்மணாபாதே² பரிஸுத்³த⁴பகதிபா⁴வாவிஜஹனலக்க²ணாய ச²ஸு த்³வாரேஸு பவத்தனதோ ‘‘ச²ளங்கு³பேக்கா²’’தி லத்³த⁴னாமாய தத்ரமஜ்ஜ²த்துபேக்கா²ய வஸேன பஞ்சமோ வாரோ வுத்தோதி அத்தோ². பஞ்சமம் ச²ட்ட²ஞ்ச உத்தானமேவ.
திகண்ட³கீஸுத்தாதி³வண்ணனா நிட்டி²தா.
7-10. அஸப்புரிஸதா³னஸுத்தாதி³வண்ணனா
147-150. ஸத்தமே அஸக்கச்சந்தி அனாத³ரம் கத்வா. தே³ய்யத⁴ம்மஸ்ஸ அஸக்கச்சகரணம் நாம அஸம்பன்னம் கரோதீதி ஆஹ ‘‘ந ஸக்கரித்வா ஸுசிம் கத்வா தே³தீ’’தி, உத்தண்டு³லாதி³தோ³ஸவிரஹிதம் ஸுசிஸம்பன்னம் கத்வா ந தே³தீதி அத்தோ². அசித்தீகத்வாதி ந சித்தே கத்வா, ந பூஜேத்வாதி அத்தோ². பூஜேந்தோ ஹி பூஜேதப்³ப³வத்து²ம் சித்தே ட²பேதி, ந ததோ ப³ஹி கரோதி. சித்தம் வா அச்ச²ரியம் கத்வா படிபத்திவிகரணம் ஸம்பா⁴வனகிரியா, தப்படிக்கே²பதோ அசித்தீகரணம் அஸம்பா⁴வனகிரியா. அகா³ரவேன தே³தீதி புக்³க³லே அக³ரும் கரோந்தோ நிஸீத³னட்டா²னே அஸம்மஜ்ஜித்வா யத்த² வா தத்த² வா நிஸீதா³பேத்வா யம் வா தம் வா ஆதா⁴ரகம் ட²பேத்வா தா³னம் தே³தி. அஸஹத்தா²தி ந அத்தனோ ஹத்தே²ன தே³தி, தா³ஸகம்மகரோதீ³ஹி தா³பேதி. அபவித்³த⁴ம் தே³தீதி அந்தரா அபவித்³த⁴ம் விச்சே²த³ம் கத்வா தே³தி. தேனாஹ ‘‘ந நிரந்தரம் தே³தீ’’தி. அத² வா அபவித்³த⁴ம் தே³தீதி உச்சி²ட்டா²தி³ச²ட்³ட³னீயத⁴ம்மம் விய அவக்கி²த்தகம் கத்வா தே³தி. தேனாஹ ‘‘ச²ட்³டே³துகாமோ விய தே³தீ’’தி. ‘‘அத்³தா⁴ இமஸ்ஸ தா³னஸ்ஸ ப²லமேவ ஆக³ச்ச²தீ’’தி ஏவம் யஸ்ஸ கம்மஸ்ஸகதாதி³ட்டி² அத்தி², ஸோ ஆக³மனதி³ட்டி²கோ, அயம் பன ந தாதி³ஸோதி அனாக³மனதி³ட்டி²கோ. தேனாஹ ‘‘கதஸ்ஸ நாம ப²லம் ஆக³மிஸ்ஸதீ’’திஆதி³. அட்ட²மாதீ³ஸு நத்தி² வத்தப்³ப³ம்.
அஸப்புரிஸதா³னஸுத்தாதி³வண்ணனா நிட்டி²தா.
திகண்ட³கீவக்³க³வண்ணனா நிட்டி²தா.
ததியபண்ணாஸகம் நிட்டி²தம்.