(7) 2. பத்தகம்மவக்³கோ³

1-4. பத்தகம்மஸுத்தாதி³வண்ணனா

61-64. து³தியஸ்ஸ பட²மே யே அனிட்டா² ந ஹோந்தி, தே இட்டா²தி அதி⁴ப்பேதாதி ஆஹ ‘‘அனிட்ட²படிக்கே²பேன இட்டா²’’தி. இட்டா²தி ச பரியிட்டா² வா ஹோது மா வா, இட்டா²ரம்மணபூ⁴தாதி அத்தோ². க³வேஸிதம்பி ஹி இட்ட²ந்தி வுச்சதி, தம் இத⁴ நாதி⁴ப்பேதம். மனேதி மனஸ்மிம். கந்தாதி வா கமனீயா, காமேதப்³பா³தி அத்தோ². மனம் அப்பாயந்தீதி இட்ட²பா⁴வேன மனம் வட்³டே⁴ந்தி. கம்மஸாத⁴னோ இத⁴ போ⁴க³-ஸத்³தோ³தி ஆஹ ‘‘போ⁴கா³தி பு⁴ஞ்ஜிதப்³பா³’’திஆதி³. த⁴ம்மூபகா⁴தம் கத்வா குஸலத⁴ம்மம் வினோதே³த்வா. உபனிஜ்ஜா²யீயந்தீதி உபஜ்ஜா²யாதி ஆஹ ‘‘ஸுக²து³க்கே²ஸு உபனிஜ்ஜா²யிதப்³ப³த்தா’’தி, ஸுக²து³க்கே²ஸு உப்பன்னேஸு அனுஸ்ஸரிதப்³ப³த்தாதி அத்தோ². ஸந்தி³ட்ட²ஸம்ப⁴த்தேஹீதி ஏத்த² தத்த² தத்த² ஸங்க³ம்ம தி³ட்ட²மத்தா நாதித³ள்ஹமித்தா ஸந்தி³ட்டா², ஸுட்டு² ப⁴த்தா ஸினேஹவந்தோ த³ள்ஹமித்தா ஸம்ப⁴த்தா.

விஸமலோப⁴ந்தி ப³லவலோப⁴ம். ஸுகி²தந்தி ஸஞ்ஜாதஸுக²ம். பீணிதந்தி தா⁴தம் ஸுஹிதம். ததா²பூ⁴தோ பன யஸ்மா ப³லஸம்பன்னோ ஹோதி, தஸ்மா ‘‘ப³லஸம்பன்னம் கரோதீ’’தி வுத்தம்.

ஸோப⁴னே காயிகவாசஸிககம்மே ரதோதி ஸூரதோ உகாரஸ்ஸ தீ³க⁴ம் கத்வா, தஸ்ஸ பா⁴வோ ஸோரச்சம், காயிகவாசஸிகோ அவீதிக்கமோ. ஸோ பன அத்த²தோ ஸுஸீலபா⁴வோதி ஆஹ ‘‘க²ந்திஸோரச்சே நிவிட்டா²தி அதி⁴வாஸனக்க²ந்தியஞ்ச ஸுஸீலதாய ச நிவிட்டா²’’தி. ஏகமத்தானந்தி ஏகம் சித்தந்தி அத்தோ². ராகா³தீ³னஞ்ஹி புப்³ப³பா⁴கி³யம் த³மனாதி³ பச்சேகம் இச்சி²தப்³ப³ம், ந மக்³க³க்க²ணே விய ஏகஜ்ஜ²ம் படிஸங்கா²னமுகே²ன பஜஹனதோ. ஏகமத்தானந்தி வா விவேகவஸேன ஏகம் ஏகாகினம் அத்தானம். தேனேவாஹ ‘‘ஏகம் அத்தனோவ அத்தபா⁴வ’’ந்திஆதி³. உபரூபரிபூ⁴மீஸூதி ச²காமஸக்³க³ஸங்கா²தாஸு உபரூபரிகாமபூ⁴மீஸு. கம்மஸ்ஸ ப²லம் அக்³க³ம் நாம. தம் பனேத்த² உச்சகா³மீதி ஆஹ ‘‘உத்³த⁴மக்³க³மஸ்ஸா’’தி. ஸுவக்³கே³ நியுத்தா, ஸுவக்³க³ப்பயோஜனாதி வா ஸோவக்³கி³கா. த³ஸன்னம் விஸேஸானந்தி தி³ப்³ப³ஆயுவண்ணயஸஸுக²ஆதி⁴பதேய்யானஞ்சேவ இட்ட²ரூபாதீ³னஞ்ச ப²லவிஸேஸானம். வண்ணக்³க³ஹணேன சேத்த² ஸகோ அத்தபா⁴வவண்ணோ க³ஹிதோ, ரூபக்³க³ஹணேன ப³ஹித்³தா⁴ ரூபாரம்மணம். து³தியததியசதுத்தா²னி உத்தானத்தா²னேவ.

பத்தகம்மஸுத்தாதி³வண்ணனா நிட்டி²தா.

5. ரூபஸுத்தவண்ணனா

65. பஞ்சமே பமினோதி உளாரதாதி³விஸேஸம் ஏதேனாதி பமாணம், ருபகாயோ பமாணம் ஏதஸ்ஸாதி ரூபப்பமாணோ. ததோ ஏவ ரூபே பஸன்னோதி ரூபப்பஸன்னோ. கோ⁴ஸோதி சேத்த² து²திகோ⁴ஸோ. லூக²ந்தி பச்சயலூக²தா. த⁴ம்மாதி ஸீலாத³யோ கு³ணத⁴ம்மா அதி⁴ப்பேதா. இமேஸம் பன சதுன்னம் புக்³க³லானம் நானாகரணம் பாளியம்யேவ ஆக³தம். வுத்தஞ்ஹேதம் –

‘‘கதமோ ச புக்³க³லோ ரூபப்பமாணோ ரூபப்பஸன்னோ? இதே⁴கச்சோ புக்³க³லோ ஆரோஹம் வா பஸ்ஸித்வா பரிணாஹம் வா பஸ்ஸித்வா ஸண்டா²னம் வா பஸ்ஸித்வா பாரிபூரிம் வா பஸ்ஸித்வா தத்த² பமாணம் க³ஹேத்வா பஸாத³ம் ஜனேதி. அயம் வுச்சதி புக்³க³லோ ரூபப்பமாணோ ரூபப்பஸன்னோ.

‘‘கதமோ ச புக்³க³லோ கோ⁴ஸப்பமாணோ கோ⁴ஸப்பஸன்னோ? இதே⁴கச்சோ புக்³க³லோ பரவண்ணனாய பரதோ²மனாய பரபஸம்ஸனாய பரவண்ணஹாரிகாய தத்த² பமாணம் க³ஹேத்வா பஸாத³ம் ஜனேதி. அயம் வுச்சதி புக்³க³லோ கோ⁴ஸப்பமாணோ கோ⁴ஸப்பஸன்னோ.

‘‘கதமோ ச புக்³க³லோ லூக²ப்பமாணோ லூக²ப்பஸன்னோ? இதே⁴கச்சோ புக்³க³லோ சீவரலூக²ம் வா பஸ்ஸித்வா பத்தலூக²ம் வா பஸ்ஸித்வா ஸேனாஸனலூக²ம் வா பஸ்ஸித்வா விவித⁴ம் வா து³க்கரகாரிகம் பஸ்ஸித்வா தத்த² பமாணம் க³ஹேத்வா பஸாத³ம் ஜனேதி. அயம் வுச்சதி புக்³க³லோ லூக²ப்பமாணோ லூக²ப்பஸன்னோ.

‘‘கதமோ ச புக்³க³லோ த⁴ம்மப்பமாணோ த⁴ம்மப்பஸன்னோ? இதே⁴கச்சோ புக்³க³லோ ஸீலம் வா பஸ்ஸித்வா ஸமாதி⁴ம் வா பஸ்ஸித்வா பஞ்ஞம் வா பஸ்ஸித்வா தத்த² பமாணம் க³ஹேத்வா பஸாத³ம் ஜனேதி. அயம் வுச்சதி புக்³க³லோ த⁴ம்மப்பமாணோ த⁴ம்மப்பஸன்னோ’’தி (பு. ப. 171-172).

தத்த² ஆரோஹந்தி உச்சதம். ஸா ச கோ² தஸ்மிம் தஸ்மிம் காலே பமாணயுத்தா த³ட்ட²ப்³பா³. பரிணாஹந்தி நாதிகிஸதூ²லதாவஸேன பீணதம். ஸண்டா²னந்தி தேஸம் தேஸம் அங்க³பச்சங்கா³னம் ஸுஸண்டி²ததம் தீ³க⁴ரஸ்ஸவட்டாதி³யுத்தட்டா²னேஸு ததா²பா⁴வம். பாரிபூரிந்தி ஸப்³பே³ஸம் ஸரீராவயவானம் பரிபுண்ணதம் அவிகலதம். தத்த² பமாணம் க³ஹேத்வாதி தஸ்மிம் ரூபே ரூபஸம்பத்தியம் பமாணபா⁴வம் உபாதா³ய. பஸாத³ம் ஜனேதீதி அதி⁴மோக்க²ம் ஜனேதி உப்பாதே³தி.

பரவண்ணனாயாதி ‘‘அஸுகோ ஏதி³ஸோ ச ஏதி³ஸோ சா’’தி பரஸ்ஸ கு³ணவசனேன. பரதோ²மனாயாதி பரம்முகா² பரஸ்ஸ ஸிலாகு⁴ப்பாத³கேன அபி⁴த்த²வனேன பரேன து²திவஸேன, கா³தா²தி³உபனிப³ந்த⁴னேன வுத்தாய தோ²மனாயாதி வுத்தம் ஹோதி. பரபஸம்ஸனாயாதி பரம்முகா² பரஸ்ஸ கு³ணஸம்கித்தனேன. பரவண்ணஹாரிகாயாதி பரம்பரவண்ணஹாரிகாய பரம்பராய பரஸ்ஸ கித்தனஸத்³த³ஸ்ஸ உபஸம்ஹாரேன. தத்தா²தி தஸ்மிம் து²திகோ⁴ஸே.

சீவரலூக²ந்தி தூ²லஜிண்ணப³ஹுதுன்னகதாதி³சீவரஸ்ஸ லூக²பா⁴வம். பத்தலூக²ந்தி அனேகக³ந்தி²காஹடதாதி³பத்தஸ்ஸ லூக²பா⁴வம். விவித⁴ம் வா து³க்கரகாரிகந்தி து⁴தங்கா³தி³வஸேன பவத்தனானாவித⁴ம் து³க்கரசரியம். ஸீலம் வா பஸ்ஸித்வாதி ஸீலபாரிபூரிவஸேன விஸுத்³த⁴ம் காயவசீஸுசரிதம் ஞாணசக்கு²னா பஸ்ஸித்வா, ஜா²னாதி³அதி⁴க³மஸுத்³தி⁴ஸமாதி⁴ம் வா விபஸ்ஸனாபி⁴ஞ்ஞாஸங்கா²தம் பஞ்ஞம் வா பஸ்ஸித்வாதி அத்தோ².

ஏவமேதஸ்மிம் சதுப்பமாணே லோகஸன்னிவாஸே பு³த்³தே⁴ஸு அப்பஸன்னா மந்தா³, பஸன்னா ப³ஹுகா. ரூபப்பமாணஸ்ஸ ஹி பு³த்³த⁴ரூபதோ உத்தரி பஸாதா³வஹம் ரூபம் நாம நத்தி². கோ⁴ஸப்பமாணஸ்ஸ பு³த்³தா⁴னம் கித்திகோ⁴ஸதோ உத்தரி பஸாதா³வஹோ கோ⁴ஸோ நாம நத்தி². லூக²ப்பமாணஸ்ஸ காஸிகானி வத்தா²னி மஹாரஹானி கஞ்சனபா⁴ஜனானி திண்ணம் உதூனம் அனுச்ச²விகே ஸப்³ப³ஸம்பத்தியுத்தே பாஸாத³வரே பஹாய பம்ஸுகூலசீவரஸேலமயபத்தருக்க²மூலாதி³ஸேனாஸனஸேவினோ பு³த்³த⁴ஸ்ஸ ப⁴க³வதோ லூக²தோ உத்தரி பஸாதா³வஹம் அஞ்ஞம் லூக²ம் நாம நத்தி². த⁴ம்மப்பமாணஸ்ஸ ஸதே³வகே லோகே அஸாதா⁴ரணஸீலாதி³கு³ணஸ்ஸ ததா²க³தஸ்ஸ ஸீலாதி³கு³ணதோ உத்தரி பஸாதா³வஹோ அஞ்ஞோ ஸீலாதி³கு³ணோ நாம நத்தி². இதி ப⁴க³வா இமம் சதுப்பமாணிகம் லோகஸன்னிவாஸம் முட்டி²னா க³ஹேத்வா விய டி²தோதி.

பமாணிம்ஸூதி பமாணம் அக்³க³ஹேஸும். நியகஜ்ஜ²த்தே தஸ்ஸ கு³ணம் ந ஜானாதீதி தஸ்ஸ அப்³ப⁴ந்தரே பவத்தமானம் ஸீலாதி³கு³ணம் ந ஜானாதி. ஸேஸம் ஸுவிஞ்ஞேய்யமேவ.

ரூபஸுத்தவண்ணனா நிட்டி²தா.

7. அஹிராஜஸுத்தவண்ணனா

67. ஸத்தமே த³ட்ட²விஸானேவாதி அவதா⁴ரணேன தி³ட்ட²விஸாத³யோ நிவத்தேதி. கட்ட²முகா²த³யோ ஹி சத்தாரோ ஆஸீவிஸா த³ட்ட²விஸோ, தி³ட்ட²விஸோ, பு²ட்ட²விஸோ, வாதவிஸோதி பச்சேகம் சதுப்³பி³தா⁴ ஹோந்தீதி விஸவேக³விகாரவஸேன ஸோளஸ வுத்தா. தேஸு த³ட்ட²விஸானம்யேவ இத⁴ க³ஹணம், ந இதரேஸந்தி த³ஸ்ஸேதி. ஸேஸம் ஸுவிஞ்ஞேய்யமேவ.

அஹிராஜஸுத்தவண்ணனா நிட்டி²தா.

8. தே³வத³த்தஸுத்தவண்ணனா

68. அட்ட²மே காலே ஸம்பத்தேதி க³ப்³ப⁴ஸ்ஸ பரிபாகக³தத்தா விஜாயனகாலே ஸம்பத்தே. போதகந்தி அஸ்ஸதரியா புத்தம். ‘‘ப²லம் வே கத³லிம் ஹந்தீ’’திஆதி³கா³தா²ய குக்குஜகேனேவ பத்தவட்டிபஸவஸ்ஸ உச்சி²ன்னத்தா ப²லுப்பத்தி கத³லியா பராப⁴வாய ஹோதீதி ஆஹ ‘‘ப²லம் வே கத³லிம் ஹந்தீ’’தி. குக்குஜகம் நாம கத³லியா புப்ப²னாளம். ததா² ப²லபாகபரியோஸானத்தா ஓஸதீ⁴னம் ‘‘ப²லம் வேளும் நள’’ந்தி வுத்தம். அயம் பனேத்த² பிண்ட³த்தோ² – யதா² அத்தனோ ப²லம் கத³லிவேளுனளே வினாஸேதி, க³ப்³போ⁴ ச அஸ்ஸதரிம், ஏவம் அத்தனோ கம்மபூ⁴தோ ஸக்காரோ அஸப்புரிஸம் வினாஸேதீதி.

தே³வத³த்தஸுத்தவண்ணனா நிட்டி²தா.

9. பதா⁴னஸுத்தவண்ணனா

69. நவமே பத³ஹதி ஏதேஹீதி பதா⁴னானி. உத்தமவீரியானி ஸேட்ட²வீரியானி விஸிட்ட²ஸ்ஸ அத்த²ஸ்ஸ ஸாத⁴னதோ. கிலேஸானம் ஸம்வரத்தா²யாதி யதா² அபி⁴ஜ்ஜா²த³யோ ந உப்பஜ்ஜந்தி, ஏவம் ஸதியா உபட்டா²னேன கிலேஸானம் ஸம்வரணத்தா²ய. பஜஹனத்தா²யாதி காமவிதக்காதீ³னம் வினோத³னத்தா²ய. பதா⁴னந்தி தஸ்ஸேவ பஜஹனஸ்ஸ ஸாத⁴னவஸேன பவத்தவீரியம். குஸலானம் த⁴ம்மானம் ப்³ரூஹனத்தா²யாதி போ³ஜ்ஜ²ங்க³ஸங்கா²தானம் குஸலத⁴ம்மானம் வட்³ட⁴னத்தா²ய. பதா⁴னந்தி தஸ்ஸேவ வட்³ட⁴னஸ்ஸ ஸாத⁴னவஸேன பவத்தவீரியம்.

பதா⁴னஸுத்தவண்ணனா நிட்டி²தா.

10. அத⁴ம்மிகஸுத்தவண்ணனா

70. த³ஸமே விஸமந்தி பா⁴வனபும்ஸகமேதம். தேனாஹ ‘‘விஸமா ஹுத்வா’’தி. அஸமயேனாதி அகாலே. பு⁴ம்மத்தே² ஹேதம் கரணவசனம். பகட்ட²ம் பதா⁴னம் அஞ்ஜஸம் ஏதேஸந்தி பஞ்ஜஸா, அஞ்ஜஸம் பக³தா படிபன்னாதி வா பஞ்ஜஸா, பகதிமக்³க³கா³மினோ. ந பஞ்ஜஸா அபஞ்ஜஸா, அமக்³க³ப்படிபன்னா. தே பன யஸ்மா மக்³க³தோ அபக³தா நாம ஹோந்தி, தஸ்மா வுத்தம் ‘‘மக்³க³தோ அபக³தா’’திஆதி³.

கா³தா²ஸு பன ஏவமேத்த² ஸம்ப³ந்தோ⁴ வேதி³தப்³போ³. கு³ன்னம் சே தரமானானந்தி கா³வீஸு மஹோக⁴ம் தரந்தீஸு. ஜிம்ஹம் க³ச்ச²தி புங்க³வோதி யதி³ யூத²பதி உஸபோ⁴ குடிலம் க³ச்ச²தி. ஸப்³பா³ தா ஜிம்ஹம் க³ச்ச²ந்தீதி ஸப்³பா³ தா கா³வியோ குடிலமேவ க³ச்ச²ந்தி. கஸ்மா? நேத்தே ஜிம்ஹம் க³தே ஸதி தஸ்ஸ குடிலக³தத்தா. ஸோ ஹி தாஸம் பச்சயிகோ உபத்³த³வஹரோ ச. ஏவமேவந்தி யதா² சேதம், ஏவமேவ யோ மனுஸ்ஸேஸு பதா⁴னஸம்மதோ, யதி³ ஸோ அத⁴ம்மசாரீ ஸியா, யே தஸ்ஸ அனுஜீவினோ, ஸப்³பே³பி அத⁴ம்மிகா ஹோந்தி. ஸாமிஸம்பதா³ ஹி பகதிஸம்பத³ம் ஸம்பாதே³தி. யஸ்மா ஏததே³வம், தஸ்மா ஸப்³ப³ம் ரட்ட²ம் து³க்க²ம் ஸேதி, ராஜா சே ஹோதி அத⁴ம்மிகோ.

அத⁴ம்மிகஸுத்தவண்ணனா நிட்டி²தா.

பத்தகம்மவக்³க³வண்ணனா நிட்டி²தா.