(8) 3. அபண்ணகவக்³கோ³

1-2. பதா⁴னஸுத்தாதி³வண்ணனா

71-72. ததியவக்³க³ஸ்ஸ பட²மே யவதி தேன ப²லம் மிஸ்ஸிதம் விய ஹோதீதி யோனி, ஏகந்திகம் காரணம். அஸ்ஸாதி யதா²வுத்தஸ்ஸ பி⁴க்கு²னோ. பரிபுண்ணந்தி அவிகலம் அனவஸேஸம். ஆஸவே கே²பேதீதி ஆஸவக்க²யோ, அக்³க³மக்³கோ³. இத⁴ பன அரஹத்தப²லம் அதி⁴ப்பேதந்தி ஆஹ ‘‘அரஹத்தத்தா²யா’’தி. து³தியம் உத்தானமேவ.

பதா⁴னஸுத்தாதி³வண்ணனா நிட்டி²தா.

3-5. ஸப்புரிஸஸுத்தாதி³வண்ணனா

73-75. ததியே பஞ்ஹத்தா²ய அபி⁴னீதோதி பஞ்ஹகரணத்தா²ய அபி⁴முக²ம் நீதோ. அலம்பி³தம் கத்வாதி அலம்ப³ம் கத்வா, அயமேவ வா பாடோ², விபலம்ப³ம் அகத்வாதி அத்தோ². அவஜானாதீதி அவஞ்ஞம் கரோதி, நிந்த³தீதி அத்தோ². சதுத்த²பஞ்சமே நத்தி² வத்தப்³ப³ம்.

ஸப்புரிஸஸுத்தாதி³வண்ணனா நிட்டி²தா.

6. குஸினாரஸுத்தவண்ணனா

76. ச²ட்டே² நக³ரம் பவிஸிதுகாமா உய்யானதோ உபேச்ச வத்தந்தி க³ச்ச²ந்தி ஏதேனாதி உபவத்தனம். யதே²வ ஹி கலம்ப³னதி³தீரதோ ராஜமாதுவிஹாரத்³வாரேன தூ²பாராமம் க³ந்தப்³ப³ம் ஹோதி, ஏவம் ஹிரஞ்ஞவதிகாய பாரிமதீரதோ ஸாலவனம் உய்யானம், யதா² அனுராத⁴புரஸ்ஸ தூ²பாராமோ த³க்கி²ணபச்சி²மதி³ஸாய, ஏவம் தம் உய்யானம் குஸினாராய த³க்கி²ணபச்சி²மதி³ஸாய ஹோதி. யதா² தூ²பாராமதோ த³க்கி²ணத்³வாரேன நக³ரம் பவிஸனமக்³கோ³ பாசீனமுகோ² க³ந்த்வா உத்தரேன நிவத்ததி, ஏவம் உய்யானதோ ஸாலபந்தி பாசீனமுகா² க³ந்த்வா உத்தரேன நிவத்தா, தஸ்மா தம் ‘‘உபவத்தன’’ந்தி வுச்சதி. அந்தரேதி த்³வின்னம் ஸாலருக்கா²னம் வேமஜ்ஜே². தத்த² ஹி பஞ்ஞாபியமானஸ்ஸ மஞ்சஸ்ஸ ஏகா ஸாலபந்தி ஸீஸபா⁴கே³ ஹோதி, ஏகா பாத³பா⁴கே³. தத்ரபி ஏகோ தருணஸாலோ ஸீஸபா⁴க³ஸ்ஸ ஆஸன்னோ ஹோதி, ஏகோ பாத³பா⁴க³ஸ்ஸ. அபிச யமகஸாலா நாம மூலக²ந்த⁴விடபபத்தேஹி அஞ்ஞமஞ்ஞம் ஸம்ஸிப்³பி³த்வா டி²தஸாலாதிபி வத³ந்தி.

த்³வேள்ஹகந்தி த்³விதா⁴கா³ஹோ, அனேகம்ஸக்³கா³ஹோதி அத்தோ². விமதீதி ஸம்ஸயாபத்தீதி ஆஹ ‘‘வினிச்சி²தும் அஸமத்த²தா’’தி. தம் வோ வதா³மீதி தம் ஸம்ஸயவந்தம் பி⁴க்கு²ம் ஸந்தா⁴ய வோ தும்ஹே வதா³மீதி. நிக்கங்க²பா⁴வபச்சக்க²கரணந்தி பு³த்³தா⁴தீ³ஸு தேஸம் பி⁴க்கூ²னம் நிக்கங்க²பா⁴வஸ்ஸ பச்சக்க²காரியா யாதா²வதோ தமத்த²ம் படிவிஜ்ஜி²த்வா டி²தம் ஸப்³ப³ஞ்ஞுதஞ்ஞாணமேவ. ஏத்தா²தி ஏதஸ்மிம் அத்தே².

குஸினாரஸுத்தவண்ணனா நிட்டி²தா.

7. அசிந்தேய்யஸுத்தவண்ணனா

77. ஸத்தமே லோகசிந்தாதி லோகஸன்னிவேஸப்படிஸம்யுத்தா வீமம்ஸா. தேனாஹ ‘‘கேன நு கோ² சந்தி³மஸூரியா’’திஆதி³. நாளிகேராத³யோதி ஆதி³-ஸத்³தே³ன அவுத்தானம் ஓஸதி⁴திணவனப்பதிஆதீ³னம் ஸங்க³ஹோ. ஏவரூபா லோகசிந்தாதி ஏதி³ஸா வுத்தஸதி³ஸா அஞ்ஞாபி ஸா லோகசிந்தா.

அசிந்தேய்யஸுத்தவண்ணனா நிட்டி²தா.

8. த³க்கி²ணஸுத்தவண்ணனா

78. அட்ட²மே தா³னஸங்கா²தாய த³க்கி²ணாயாதி தே³ய்யத⁴ம்மஸங்கா²தாய த³க்கி²ணாய. விஸுத்³தி⁴ நாம மஹாஜுதிகதா. ஸா பன மஹப்ப²லதாய வேதி³தப்³பா³தி ஆஹ ‘‘மஹப்ப²லபா⁴வேனா’’தி. விஸுஜ்ஜ²தீதி ந கிலிஸ்ஸதி, அமலினா மஹாஜுதிகா மஹாவிப்பா²ரா ஹோதீதி அத்தோ². ஸுசித⁴ம்மோதி ராகா³தி³அஸுசிவித⁴மனேன ஸுசிஸபா⁴வோ. லாமகத⁴ம்மோதி ஹீனஸபா⁴வோ பாபகிரியாய. அகுஸலத⁴ம்மா ஹி ஏகந்தனிஹீனா. ஜூஜகோ ஸீலவா கல்யாணத⁴ம்மோ ந ஹோதி, தஸ்ஸ மஹாபோ³தி⁴ஸத்தஸ்ஸ அத்தனோ புத்ததா³னம் தா³னபாரமியா மத்த²கம் க³ண்ஹந்தம் மஹாபத²விகம்பனஸமத்த²ம் ஜாதம். ஸ்வாயம் தா³யககு³ணோதி ஆஹ ‘‘வேஸ்ஸந்தரமஹாராஜா கதே²தப்³போ³’’திஆதி³. உத்³த⁴ரதீதி ப³ஹுலம் பாபகம்மவஸேன லத்³த⁴ப்³ப³வினிபாததோ உத்³த⁴ரதி, தஸ்மா நத்தி² மய்ஹம் கிஞ்சி சித்தஸ்ஸ அஞ்ஞத்த²த்தந்தி அதி⁴ப்பாயோ.

பேதத³க்கி²ணந்தி பேதே உத்³தி³ஸ்ஸ தா³தப்³ப³த³க்கி²ணம். பாபிதகாலேயேவாதி ‘‘இத³ம் தா³னம் அஸுகஸ்ஸ பேதஸ்ஸ ஹோதூ’’தி தம்உத்³தி³ஸனவஸேன பத்தியா பாபிதகாலேயேவ. அஸ்ஸாதி பேதஸ்ஸ. பாபுணீதி ப²லஸம்பத்திலபா⁴பனவஸேன பாபுணி. அயஞ்ஹி பேதே உத்³தி³ஸ்ஸ தா³னே த⁴ம்மதா. ததா³ கோஸலரஞ்ஞோ பரிச்சாக³வஸேன அதிவிய தா³னஜ்ஜா²ஸயதம் பு³த்³த⁴ப்பமுக²ஸ்ஸ ச ஸங்க⁴ஸ்ஸ உக்கம்ஸக³தகு³ணவிஸிட்ட²தம் ஸந்தா⁴யாஹ ‘‘அஸதி³ஸதா³னம் கதே²தப்³ப³’’ந்தி.

த³க்கி²ணஸுத்தவண்ணனா நிட்டி²தா.

9-10. வணிஜ்ஜஸுத்தாதி³வண்ணனா

79-80. நவமே தம்ஸதி³ஸாதி யாதி³ஸா வணிஜ்ஜா பயுத்தா அயதா²தி⁴ப்பாயா அஞ்ஞா வா ஸம்பஜ்ஜதி, தாதி³ஸாவாதி அத்தோ². சே²த³ம் க³ச்ச²தீதி வினாஸம் பாபுணாதி. அதி⁴ப்பாயதோ பரா விஸிட்டா²தி பராதி⁴ப்பாயோ. தேனேவாஹ ‘‘அஜ்ஜா²ஸயதோ அதி⁴கதரப²லா ஹோதீ’’தி. சீவராதி³னா பச்சயேன வதே³ய்யாஸீதி சீவராதி³பச்சயஹேது மம் வதே³ய்யாஸி பத்தே²ய்யாஸி. அத² வா யதா³ சீவராதி³னா பச்சயேன அத்தோ² ஹோதி, ததா³ மம் யாசேய்யாஸீதி அத்தோ². ஸேஸம் ஸுவிஞ்ஞேய்யமேவ. த³ஸமம் உத்தானமேவ.

வணிஜ்ஜஸுத்தாதி³வண்ணனா நிட்டி²தா.

அபண்ணகவக்³க³வண்ணனா நிட்டி²தா.