1. பட²மஉருவேலஸுத்தவண்ணனா

21. ததியஸ்ஸ பட²மே மஹாவேலா விய மஹாவேலா, விபுலவாலிகபுஞ்ஜதாய மஹந்தோ வேலாதடோ வியாதி அத்தோ². தேனாஹ ‘‘மஹாவாலிகராஸீதி அத்தோ²’’தி. உரு, மரு, ஸிகதா, வாலுகா, வண்ணு, வாலிகாதி இமே ஸத்³தா³ ஸமானத்தா², ப்³யஞ்ஜனமேவ நானம். தேனாஹ ‘‘உரூதி வாலிகா வுச்சதீ’’தி.

நஜ்ஜாதி நத³தி ஸத்³தா³யதீதி நதீ³, தஸ்ஸா நஜ்ஜா, நதி³யா நின்னகா³யாதி அத்தோ². நேரஞ்ஜராயாதி ‘‘நேலஞ்ஜலாயா’’தி வத்தப்³பே³ ல-காரஸ்ஸ ர-காரம் கத்வா ‘‘நேரஞ்ஜராயா’’தி வுத்தம், கத்³த³மஸேவாலபணகாதி³தோ³ஸரஹிதஸலிலாயாதி அத்தோ². கேசி ‘‘நீலம்-ஜலாயாதி வத்தப்³பே³ நேரஞ்ஜராயா’’தி வத³ந்தி. நாமமேவ வா ஏதம் தஸ்ஸா நதி³யாதி வேதி³தப்³ப³ம். தஸ்ஸா நதி³யா தீரே யத்த² ப⁴க³வா விஹாஸி, தம் த³ஸ்ஸேதும் ‘‘அஜபாலனிக்³ரோதே⁴’’தி வுத்தம். கஸ்மா பனாயம் அஜபாலனிக்³ரோதோ⁴ நாம ஜாதோதி ஆஹ ‘‘தஸ்ஸா’’திஆதி³. கேசி பன ‘‘யஸ்மா தத்த² வேதே³ ஸஜ்ஜா²யிதும் அஸமத்தா² மஹல்லகப்³ராஹ்மணா பாகாரபரிக்கே²பயுத்தானி நிவேஸனானி கத்வா ஸப்³பே³ வஸிம்ஸு, தஸ்மாஸ்ஸ அஜபாலனிக்³ரோதோ⁴தி நாமம் ஜாத’’ந்தி வத³ந்தி. தத்ராயம் வசனத்தோ² – ந ஜபந்தீதி அஜபா, மந்தானம் அனஜ்ஜா²யகாதி அத்தோ². அஜபாலந்தி ஆதி³யந்தி நிவாஸம் ஏத்தா²தி அஜபாலோதி. அபரே பன வத³ந்தி ‘‘யஸ்மா மஜ்ஜ²ன்ஹிகஸமயே அந்தோபவிட்டே² அஜே அத்தனோ சா²யாய பாலேதி ரக்க²தி, தஸ்மா ‘அஜபாலோ’திஸ்ஸ நாமம் ருள்ஹ’’ந்தி. ஸப்³ப³த்தா²பி நாமமேதம் தஸ்ஸ ருக்க²ஸ்ஸ.

பட²மாபி⁴ஸம்பு³த்³தோ⁴தி பட²மம் அபி⁴ஸம்பு³த்³தோ⁴, அனுனாஸிகலோபேனாயம் நித்³தே³ஸோ. தேனேவாஹ ‘‘ஸம்பு³த்³தோ⁴ ஹுத்வா பட²மமேவா’’தி. பட²மந்தி ச பா⁴வனபும்ஸகனித்³தே³ஸோ, தஸ்மா அபி⁴ஸம்பு³த்³தோ⁴ ஹுத்வா பட²மம் அஜபாலனிக்³ரோதே⁴ விஹராமீதி ஏவமேத்த² ஸம்ப³ந்தோ⁴ வேதி³தப்³போ³. அயம் விதக்கோதி அயம் ‘‘கின்னு க்²வாஹம்…பே… விஹரேய்ய’’ந்தி ஏவம் பவத்தவிதக்கோ. ஹத்தீ² ச வானரோ ச தித்திரோ ச ஹத்தி²வானரதித்திரா.

யே வுத்³த⁴மபசாயந்தீதி ஜாதிவுத்³தோ⁴, வயோவுத்³தோ⁴, கு³ணவுத்³தோ⁴தி தயோ வுத்³தா⁴. தேஸு ஜாதிஸம்பன்னோ ஜாதிவுத்³தோ⁴ நாம, வயே டி²தோ வயோவுத்³தோ⁴ நாம, கு³ணஸம்பன்னோ கு³ணவுத்³தோ⁴ நாம. தேஸு கு³ணஸம்பன்னோ வயோவுத்³தோ⁴ இமஸ்மிம் டா²னே வுத்³தோ⁴தி அதி⁴ப்பேதோ. அபசாயந்தீதி ஜேட்டா²பசாயிகாகம்மேன பூஜேந்தி. த⁴ம்மஸ்ஸ கோவிதா³தி ஜேட்டா²பசாயனத⁴ம்மஸ்ஸ கோவிதா³ குஸலா. தி³ட்டே²வ த⁴ம்மேதி இமஸ்மிம்யேவ அத்தபா⁴வே. பாஸம்ஸாதி பஸம்ஸாரஹா. ஸம்பராயே ச ஸுக்³க³தீதி ஸம்பரேதப்³பே³ இமம் லோகம் ஹித்வா க³ந்தப்³பே³ பரலோகேபி தேஸம் ஸுக³தியேவ. அயம் பனேத்த² பிண்ட³த்தோ² – க²த்தியா வா ஹோந்து ப்³ராஹ்மணா வா வேஸ்ஸா வா ஸுத்³தா³ வா க³ஹட்டா² வா பப்³ப³ஜிதா வா திரச்சா²னக³தா வா, யே கேசி ஸத்தா ஜேட்டா²பசிதிகம்மேன ஸீலாதி³கு³ணஸம்பன்னானம் வயோவுத்³தா⁴னம் அபசிதிம் கரோந்தி, தே இமஸ்மிஞ்ச அத்தபா⁴வே ஜேட்டா²பசிதிகாரகாதி பஸம்ஸம் வண்ணனம் தோ²மனம் லப⁴ந்தி, காயஸ்ஸ ச பே⁴தா³ ஸக்³கே³ நிப்³ப³த்தந்தீதி.

அஞ்ஞஸ்மிந்தி பரஸ்மிம். அத்தா ந ஹோதீதி அஞ்ஞோ, பரோ. ஸோ பனேத்த² ந யோ கோசி அதி⁴ப்பேதோ, அத² கோ² க³ருட்டா²னியோ. தேனாஹ ‘‘கஞ்சி க³ருட்டா²னே அட்ட²பேத்வா’’தி. பதிஸ்ஸதி க³ருனோ ஆணம் ஸம்படிச்ச²தீதி பதிஸ்ஸோ, ந பதிஸ்ஸோ அப்பதிஸ்ஸோ, பதிஸ்ஸயரஹிதோ, க³ருபஸ்ஸயரஹிதோதி அத்தோ².

ஸதே³வகேதி அவயவேன விக்³க³ஹோ ஸமுதா³யோ ஸமாஸத்தோ². ஸதே³வகக்³க³ஹணேன பஞ்சகாமாவசரதே³வக்³க³ஹணம் பாரிஸேஸஞாயேன இதரேஸம் பத³ந்தரேஹி ஸங்க³ஹிதத்தா. ஸமாரகக்³க³ஹணேன ச²ட்ட²காமாவசரதே³வக்³க³ஹணம் பச்சாஸத்திஞாயேன. தத்த² ஹி மாரோ ஜாதோ தன்னிவாஸீ ச ஹோதி. ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணம் பச்சாஸத்திஞாயேனேவ. ஸஸ்ஸமணப்³ராஹ்மணியா பஜாயாதி ஸாஸனஸ்ஸ பச்சத்தி²கஸமணப்³ராஹ்மணக்³க³ஹணம். நித³ஸ்ஸனமத்தஞ்சேதம் அபச்சத்தி²கானம் அஸமிதாபா³ஹிதபாபானஞ்ச ஸமணப்³ராஹ்மணானம் தேனேவ வசனேன க³ஹிதத்தா. காமம் ‘‘ஸதே³வகே’’திஆதி³விஸேஸனானம் வஸேன ஸத்தவிஸயோ லோகஸத்³தோ³தி விஞ்ஞாயதி துல்யயோக³விஸயத்தா தேஸம், ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³ அயம் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி பஜாவசனேன ஸத்தலோகக்³க³ஹணம்.

தே³வபா⁴வஸாமஞ்ஞேன மாரப்³ரஹ்மேஸு க³ஹிதேஸுபி இதரேஹி தேஸம் லப்³ப⁴மானவிஸேஸத³ஸ்ஸனத்த²ம் விஸும் க³ஹணந்தி த³ஸ்ஸேந்தோ ‘‘மாரோ நாமா’’திஆதி³மாஹ. மாரோ ப்³ரஹ்மானம்பி விசக்கு²கம்மாய பஹோதீதி ஆஹ ‘‘ஸப்³பே³ஸ’’ந்தி. உபரீதி உபரிபா⁴கே³. ப்³ரஹ்மாதி த³ஸஸஹஸ்ஸிப்³ரஹ்மானம் ஸந்தா⁴யாஹ. ததா² சாஹ ‘‘த³ஸஹி அங்கு³லீஹீ’’திஆதி³. இத⁴ தீ³க⁴னிகாயாத³யோ விய பா³ஹிரகானம்பி க³ந்த²னிகாயோ லப்³ப⁴தீதி ஆஹ ‘‘ஏகனிகாயாதி³வஸேனா’’தி. வத்து²விஜ்ஜாதீ³தி ஆதி³-ஸத்³தே³ன விஜ்ஜாட்டா²னானி ஸங்க³ய்ஹந்தி. யதா²ஸகம் கம்மகிலேஸேஹி பஜாதத்தா நிப்³ப³த்தத்தா பஜா, ஸத்தனிகாயோ, தஸ்ஸா பஜாய. ஸதே³வமனுஸ்ஸாயாதி வா இமினா ஸம்முதிதே³வக்³க³ஹணம் தத³வஸிட்ட²மனுஸ்ஸலோகக்³க³ஹணஞ்ச த³ட்ட²ப்³ப³ம்.

ஏவம் பா⁴க³ஸோ லோகம் க³ஹேத்வா யோஜனம் த³ஸ்ஸேத்வா இதா³னி அபா⁴க³ஸோ லோகம் க³ஹேத்வா யோஜனம் த³ஸ்ஸேதும் ‘‘அபிசேத்தா²’’திஆதி³ வுத்தம். லோகவஸேன வுத்தானி ‘‘லோகீயந்தி ஏத்த² கம்மம் கம்மப²லானீ’’தி கத்வா. பஜாவஸேன ‘‘ஹேதுபச்சயேஹி பஜாதா’’தி கத்வா. ஸீலஸம்பன்னதரந்தி ஏத்த² பரிபுண்ணஸம்பன்னதா அதி⁴ப்பேதா ‘‘ஸம்பன்னம் ஸாலிகேதா³ர’’ந்திஆதீ³ஸு (ஜா. 1.14.1) விய. தேனாஹ ‘‘அதி⁴கதரந்தி அத்தோ²’’தி. பரிபுண்ணஞ்ஹி அதி⁴கதரந்தி வத்தும் அரஹதி. காரணந்தி யுத்திம். அத்த²ந்தி அவிபரீதத்த²ம். வட்³டி⁴ந்தி அதிவட்³டி⁴னிமித்தம்.

இமினா வசனேனாதி இமஸ்மிம் ஸுத்தே அனந்தரம் வுத்தவசனேன. ந கேவலம் இமினாவ, ஸுத்தந்தரம்பி ஆனேத்வா படிபா³ஹிதப்³போ³தி த³ஸ்ஸேந்தோ ‘‘ந மே ஆசரியோ அத்தீ²’’திஆதி³மாஹ. தத்த² ந மே ஆசரியோ அத்தீ²தி லோகுத்தரத⁴ம்மே மய்ஹம் ஆசரியோ நாம நத்தி². கிஞ்சாபி லோகியத⁴ம்மானம்பி யாதி³ஸோ லோகனாத²ஸ்ஸ அதி⁴க³மோ, ந தாதி³ஸோ அதி⁴க³மோ பரூபதே³ஸோ அத்தி². லோகுத்தரத⁴ம்மே பனஸ்ஸ லேஸோபி நத்தி². நத்தி² மே படிபுக்³க³லோதி மய்ஹம் ஸீலாதீ³ஹி கு³ணேஹி படினிதி⁴பூ⁴தோ புக்³க³லோ நாம நத்தி². ஸரந்தி கரணே ஏதம் பச்சத்தவசனந்தி ஆஹ ‘‘ஸரந்தேனா’’தி, ஸரந்தி வா ஸரணஹேது சாதி அத்தோ².

யதோதி பு⁴ம்மத்தே² தோஸத்³தோ³தி ஆஹ ‘‘யஸ்மிம் காலே’’தி. ரத்தியோ ஜானந்தீதி ரத்தஞ்ஞூ, அத்தனோ பப்³ப³ஜிததி³வஸதோ பட்டா²ய ப³ஹூ ரத்தியோ ஜானந்தி, சிரபப்³ப³ஜிதாதி வுத்தம் ஹோதி. ரத்தஞ்ஞூனம் மஹந்தபா⁴வோ ரத்தஞ்ஞுமஹந்தம். பா⁴வப்பதா⁴னோ ஏஸ நித்³தே³ஸோ. ‘‘ரத்தஞ்ஞுமஹத்த’’ந்தி வா பாடோ². ஏஸ நயோ ஸேஸேஸுபி. தே²ரனவமஜ்ஜி²மானம் வஸேன விபுலபா⁴வோ வேபுல்லமஹந்தம். ஸிக்க²த்தயஸங்க³ஹிதஸ்ஸ ஸாஸனப்³ரஹ்மசரியஸ்ஸ ஜா²னாபி⁴ஞ்ஞாதி³வஸேன விபுலபா⁴வோ ப்³ரஹ்மசரியமஹந்தம். விஸிட்ட²ஸ்ஸ பச்சயலாப⁴ஸ்ஸ விபுலபா⁴வோ லாப⁴க்³க³மஹந்தம். சதுப்³பி³தே⁴ன மஹந்தேனாதி சதுப்³பி³தே⁴ன மஹந்தபா⁴வேன. மஹாபஜாபதியா து³ஸ்ஸயுக³தா³னகாலேதி ப⁴க³வதோ ஸங்கே⁴ கா³ரவஸ்ஸ பாகடகாலத³ஸ்ஸனமத்தம். ந ஹி ப⁴க³வா ததோ புப்³பே³ ஸங்கே⁴ கா³ரவரஹிதோ விஹாஸி.

பட²மஉருவேலஸுத்தவண்ணனா நிட்டி²தா.

2.து³தியஉருவேலஸுத்தவண்ணனா

22. து³தியே ஹுஹுங்கஜாதிகேனாதி ஸோ கிர தி³ட்ட²மங்க³லிகோ மானவஸேன கோத⁴வஸேன ச ‘‘ஹுஹு’’ந்தி கரோந்தோ விசரதி, தஸ்மா ஹுஹுங்கஜாதிகோதி வுச்சதி. ‘‘ஹுஹுக்கஜாதிகோ’’திபி பட²ந்தி, தேன ஸத்³தி⁴ம் ஆக³தாதி அத்தோ². ஜராஜிண்ணாதி ஜராய க²ண்ட³த³ந்தபலிதகேஸாதி³பா⁴வம் ஆபாதி³தா. வயோவுத்³தா⁴தி அங்க³பச்சங்கா³னம் வுத்³தி⁴மரியாத³ப்பத்தா. ஜாதிமஹல்லகாதி உபபத்தியா மஹல்லகபா⁴வேன ஸமன்னாக³தா. மஹத்தம் லந்தி க³ண்ஹந்தீதி மஹல்லகா, ஜாதியா மஹல்லகா, ந விப⁴வாதி³னாதி ஜாதிமஹல்லகா. வயோஅனுப்பத்தாதி பச்சி²மவயம் ஸம்பத்தா, பச்சி²மவயோ நாம வஸ்ஸஸதஸ்ஸ பச்சி²மோ ததியோ பா⁴கோ³. ஜிண்ணாதி வா போராணா, சிரகாலப்பவத்தகுலன்வயாதி வுத்தம் ஹோதி. வுத்³தா⁴தி ஸீலாசாராதி³கு³ணவுத்³தி⁴யுத்தா. மஹல்லகாதி விப⁴வமஹந்ததாய ஸமன்னாக³தா. மஹத்³த⁴னாதி மஹாபோ⁴கா³. அத்³த⁴க³தாதி மக்³க³ப்படிபன்னா ப்³ராஹ்மணானம் வதசரியாதி³மரியாத³ம் அவீதிக்கம்ம சரமானா. வயோஅனுப்பத்தாதி ஜாதிவுத்³த⁴பா⁴வம் அந்திமவயம் அனுப்பத்தா. ஸுதம் நேதந்தி ஏத்த² ஸுதம் நோ ஏதந்தி பத³ச்சே²தோ³. நோதி ச கரணத்தே² ஸாமிவசனம். தேனாஹ ‘‘அம்ஹேஹி ஸுத’’ந்தி.

அகாலேதி அயுத்தகாலே. அஸபா⁴வம் வத³தீதி யம் நத்தி², தம் வத³தி. அனத்த²ம் வத³தீதி அகாரணனிஸ்ஸிதம் வத³தி. அகாரணனிஸ்ஸிதந்தி ச நிப்ப²லந்தி அத்தோ². ப²லஞ்ஹி காரணனிஸ்ஸிதம். அகாரணனிஸ்ஸிததா ச தத³வினாபா⁴வதோ அகாரணே நிஸ்ஸிதம், நிப்ப²லம் ஸம்ப²ந்தி வுத்தம் ஹோதி. அவினயம் வத³தீதி ந ஸம்வரவினயப்படிஸம்யுத்தம் வத³தி, அத்தனோ ஸுணந்தஸ்ஸ ச ந ஸம்வரவினயாவஹம் வத³தீதி வுத்தம் ஹோதி. ந ஹத³யே நிதே⁴தப்³ப³யுத்தகந்தி அஹிதஸம்ஹிதத்தா சித்தம் அனுப்பவேஸேத்வா நிதே⁴தும் அயுத்தம். கதே²தும் அயுத்தகாலேனாதி த⁴ம்மம் கதே²ந்தேன யோ அத்தோ² யஸ்மிம் காலே வத்தப்³போ³, ததோ புப்³பே³ பச்சா² ச தஸ்ஸ அகாலோ, தஸ்மிம் அயுத்தகாலே வத்தா. அபதே³ஸரஹிதந்தி ஸுத்தாபதே³ஸரஹிதம். ஸாபதே³ஸம் ஸகாரணம் கத்வா ந கதே²தீதி ‘‘ப⁴க³வதா அஸுகே ஸுத்தே ஏவம் வுத்த’’ந்தி ஏவம் ஸாபதே³ஸம் காரணஸஹிதம் கத்வா ந கதே²தி.

பரியந்தரஹிதந்தி பரிச்சே²த³ரஹிதம், ஸுத்தம் வா ஜாதகம் வா நிக்கி²பித்வா தஸ்ஸ அனுயோக³ம் உபமம் வா வத்து²ம் வா ஆஹரித்வா யம் ஸுத்தம் ஜாதகம் வா நிக்கி²பிதம், தஸ்ஸ ஸரீரபூ⁴தம் கத²ம் அனாமஸித்வா பா³ஹிரகத²ம்யேவ கதே²தி, நிக்கி²த்தம் நிக்கி²த்தமத்தமேவ ஹோதி, ‘‘ஸுத்தம் நு கோ² கதே²தி ஜாதகம் நு கோ², நாஸ்ஸ அந்தம் வா கோடிம் வா பஸ்ஸாமா’’தி வத்தப்³ப³தம் ஆபஜ்ஜதி. யதா² வடருக்க²ஸாகா²னம் க³தக³தட்டா²னே பாரோஹா ஓதரந்தி, ஓதிண்ணோ-திண்ணட்டா²னே விருள்ஹிம் ஆபஜ்ஜித்வா புன வட்³ட⁴ந்தியேவ, ஏவம் அட்³ட⁴யோஜனம்பி யோஜனம்பி க³ச்ச²தியேவ. க³ச்ச²ந்தே க³ச்ச²ந்தே பன மூலருக்கோ² வினஸ்ஸதி, அனுஜாதபாரோஹமூலானியேவ திட்ட²ந்தி, ஏவம் அயம்பி நிக்³ரோத⁴த⁴ம்மகதி²கோ நாம ஹோதி. நிக்கி²த்தம் நிக்கி²த்தமேவ கத்வா பஸ்ஸேனேவ பரிஹரந்தோ க³ச்ச²தி. யோ பன ப³ஹும்பி ப⁴ணந்தோ ‘‘ஏதத³த்த²மித³ம் வுத்த’’ந்தி நிக்கி²த்தஸுத்ததோ அஞ்ஞம்பி அனுயோகூ³பமாவத்து²வஸேன தது³பயோகீ³னம் ஆஹரித்வா ஆஹரித்வா ஜானாபேதும் ஸக்கோதி, ததா²ரூபஸ்ஸ த⁴ம்மகதி²கஸ்ஸ ப³ஹும்பி கதே²தும் வட்டதி. ந லோகியலோகுத்தரஅத்த²னிஸ்ஸிதந்தி அத்தனோ பரேஸஞ்ச ந லோகியலோகுத்தரஹிதாவஹம்.

பகட்டா²னம் உக்கட்டா²னம் ஸீலாதி³அத்தா²னம் போ³த⁴னதோ ஸபா⁴வனிருத்திவஸேன ச பு³த்³தா⁴தீ³ஹி பா⁴ஸிதத்தா பகட்டா²னம் வசனப்பப³ந்தா⁴னம் ஆளீதி பாளி, பரியத்தித⁴ம்மோ. புரிமஸ்ஸ அத்த²ஸ்ஸ பச்சி²மேன அத்தே²ன அனுஸந்தா⁴னம் அனுஸந்தி⁴, அத்த²முகே²ன பன பாளிப்பதே³ஸானம்பி அனுஸந்தி⁴ ஹோதியேவ. ஸ்வாயம் அனுஸந்தி⁴ புச்சா²னுஸந்தி⁴அஜ்ஜா²ஸயானுஸந்தி⁴யதா²னுஸந்தி⁴ஆதி³வஸேன சதுப்³பி³தோ⁴, தம்தம்தே³ஸனானம் பன புப்³பா³பரபாளிவஸேன அனுஸந்தி⁴வஸேன புப்³பா³பரவஸேனாதி பச்சேகம் யோஜேதப்³ப³ம். உக்³க³ஹிதந்தி ப்³யஞ்ஜனஸோ அத்த²ஸோ ச உத்³த⁴ம் உத்³த⁴ம் க³ஹிதம், பரியாபுணனவஸேன சேவ பரிபுச்சா²வஸேன ச ஹத³யேன க³ஹிதந்தி அத்தோ². வட்டது³க்க²னிஸ்ஸரணத்தி²கேஹி ஸோதப்³ப³தோ ஸுதம், பரியத்தித⁴ம்மோ. தம் தா⁴ரேதீதி ஸுதத⁴ரோ. யோ ஹி ஸுதத⁴ரோ, ஸுதம் தஸ்மிம் பதிட்டி²தம் ஹோதி ஸுப்பதிட்டி²தம் அரோகி³கம், தஸ்மா வுத்தம் ‘‘ஸுதஸ்ஸ ஆதா⁴ரபூ⁴தோ’’தி. தேனாஹ ‘‘யஸ்ஸ ஹீ’’திஆதி³. ஏகம் பத³ம் ஏகக்க²ரம்பி அவினட்ட²ம் ஹுத்வா ஸன்னிசீயதீதி ஸன்னிசயோ, ஸுதம் ஸன்னிசயோ ஏதஸ்மிந்தி ஸுதஸன்னிசயோ. அஜ்ஜோ²ஸாயாதி அனுப்பவிஸித்வா. திட்ட²தீதி ந ஸம்முஸ்ஸதி.

பகு³ணாதி வாசுக்³க³தா. நிச்சலிகந்தி அவிபரிவத்தம். ஸம்ஸந்தி³த்வாதி அஞ்ஞேஹி ஸம்ஸந்தி³த்வா. ஸமனுக்³கா³ஹித்வாதி பரிபுச்சா²வஸேன அத்த²ம் ஓகா³ஹித்வா. பப³ந்த⁴ஸ்ஸ விச்சே²தா³பா⁴வதோ க³ங்கா³ஸோதஸதி³ஸம். ‘‘ப⁴வங்க³ஸோதஸதி³ஸ’’ந்தி வா பாடோ², அகித்திமம் ஸுக²ப்பவத்தீதி அத்தோ². ஸுத்தேகதே³ஸஸ்ஸ ஸுத்தமத்தஸ்ஸ ச வசஸா பரிசயோ இத⁴ நாதி⁴ப்பேதோ, வக்³கா³தி³வஸேன பன அதி⁴ப்பேதோதி ஆஹ ‘‘ஸுத்தத³ஸக…பே… ஸஜ்ஜா²யிதா’’தி, ‘‘த³ஸஸுத்தானி க³தானி, த³ஸவக்³கா³னி க³தானீ’’திஆதி³னா ஸல்லக்கே²த்வா வாசாய ஸஜ்ஜா²யிதாதி அத்தோ². மனஸா அனு அனு பேக்கி²தா பா⁴க³ஸோ நிஜ்ஜா²யிதா சிந்திதா மனஸானுபேக்கி²தா. ரூபக³தம் விய பஞ்ஞாயதீதி ரூபக³தம் விய சக்கு²ஸ்ஸ விபூ⁴தம் ஹுத்வா பஞ்ஞாயதி. ஸுப்படிவித்³தா⁴தி நிஜ்ஜடம் நிக்³கு³ம்ப³ம் கத்வா ஸுட்டு² யாதா²வதோ படிவித்³தா⁴.

அதி⁴கம் சேதோதி அபி⁴சேதோ, உபசாரஜ்ஜா²னசித்தம். தஸ்ஸ பன அதி⁴கதா பாகதிககாமாவசரசித்தேஹி ஸுந்த³ரதாய, ஸா படிபக்க²தோ ஸுத்³தி⁴யாதி ஆஹ ‘‘அபி⁴க்கந்தம் விஸுத்³த⁴ம் சித்த’’ந்தி. அதி⁴சித்தந்தி ஸமாதி⁴மாஹ. ஸோபி உபசாரஸமாதி⁴ த³ட்ட²ப்³போ³. விவேகஜம் பீதிஸுக²ம், ஸமாதி⁴ஜம் பீதிஸுக²ம், அபீதிஜம் காயஸுக²ம், ஸதிபாரிஸுத்³தி⁴ஜம் ஞாணஸுக²ந்தி சதுப்³பி³த⁴ம்பி ஜா²னஸுக²ம் படிபக்க²தோ நிக்க²ந்ததம் உபாதா³ய நேக்க²ம்மஸுக²ந்தி வுச்சதீதி ஆஹ ‘‘நேக்க²ம்மஸுக²ம் விந்த³தீ’’தி. இச்சி²திச்சி²தக்க²ணே ஸமாபஜ்ஜிதும் ஸமத்தோ²தி இமினா தேஸு ஜா²னேஸு ஸமாபஜ்ஜனவஸீபா⁴வமாஹ. நிகாமலாபீ⁴தி பன வசனதோ ஆவஜ்ஜனாதி⁴ட்டா²னபச்சவேக்க²ணவஸியோபி வுத்தா ஏவாதி வேதி³தப்³பா³. ஸுகே²னேவ பச்சனீகத⁴ம்மே விக்க²ம்பே⁴த்வாதி ஏதேன தேஸம் ஜா²னானம் ஸுக²ப்படிபத³தம் கி²ப்பாபி⁴ஞ்ஞதஞ்ச த³ஸ்ஸேதி.

விபுலானந்தி வேபுல்லம் பாபிதானம் ஜா²னானம். விபுலதா நாம ஸுபா⁴விதபா⁴வேன சிரதரப்பவத்தியா, ஸா ச பரிச்சே²தா³னுரூபாவ இச்சி²தப்³பா³தி ‘‘விபுலான’’ந்தி வத்வா ‘‘யதா²பரிச்சே²தே³ன வுட்டா²தும் ஸமத்தோ²தி வுத்தம் ஹோதீ’’தி ஆஹ. பரிச்சே²த³காலஞ்ஹி அப்பத்வாவ வுட்ட²ஹந்தோ அகஸிரலாபீ⁴ ந ஹோதி யாவதி³ச்சி²தம் பவத்தேதும் அஸமத்த²த்தா. இதா³னி யதா²வுத்தே ஸமாபஜ்ஜனாதி³வஸீபா⁴வே ப்³யதிரேகவஸேன விபா⁴வேதும் ‘‘ஏகச்சோ ஹீ’’திஆதி³ வுத்தம். தத்த² லாபீ⁴யேவ ஹோதீதி இத³ம் படிலத்³த⁴மத்தஸ்ஸ ஜா²னஸ்ஸ வஸேன வுத்தம். ததா²தி இச்சி²திச்சி²தக்க²ணே. பாரிபந்தி²கேதி வஸீபா⁴வஸ்ஸ பச்சனீகத⁴ம்மே. ஜா²னாதி⁴க³மஸ்ஸ பன பச்சனீகத⁴ம்மா பகே³வ விக்க²ம்பி⁴தா, அஞ்ஞதா² ஜா²னாதி⁴க³மோ ஏவ ந ஸியா. கிச்சே²ன விக்க²ம்பே⁴தீதி கிச்சே²ன விஸோதே⁴தி. காமாதீ³னவபச்சவேக்க²ணாதீ³ஹி காமச்ச²ந்தா³தீ³னம் விய அஞ்ஞேஸம்பி ஸமாதி⁴பாரிபந்தி²கானம் தூ³ரஸமுஸ்ஸாரணம் இத⁴ விக்க²ம்ப⁴னம் விஸோத⁴னஞ்சாதி வேதி³தப்³ப³ம். நாளிகயந்தந்தி காலமானனாளிகயந்தமாஹ.

அட்ட²பிதஸங்கப்போதி ந ஸம்மாபணிஹிதஸங்கப்போ. அபி⁴ஞ்ஞாபாரகூ³தி ஸப்³பே³ஸம் லோகியலோகுத்தரத⁴ம்மானம் அபி⁴ஞ்ஞாய பாரம் க³தோ, ஸப்³ப³த⁴ம்மே அபி⁴விஸிட்டா²ய அக்³க³மக்³க³பஞ்ஞாய ஜானித்வா டி²தோதி அத்தோ². பரிஞ்ஞாபாரகூ³தி பஞ்சன்னம் க²ந்தா⁴னம் பரிஞ்ஞாய பாரம் க³தோ, பஞ்சக்க²ந்தே⁴ பரிஜானித்வா டி²தோதி அத்தோ². பா⁴வனாபாரகூ³தி சதுன்னம் மக்³கா³னம் பா⁴வனாய பாரம் க³தோ, சத்தாரோ மக்³கே³ பா⁴வேத்வா டி²தோதி அத்தோ². பஹானபாரகூ³தி ஸப்³ப³கிலேஸானம் பஹானேன பாரம் க³தோ, ஸப்³ப³கிலேஸே பஜஹித்வா டி²தோதி அத்தோ². ஸச்சி²கிரியாபாரகூ³தி நிரோத⁴ஸச்சி²கிரியாய பாரம் க³தோ, நிரோத⁴ம் ஸச்சி²கத்வா டி²தோதி அத்தோ². ஸமாபத்திபாரகூ³தி ஸப்³ப³ஸமாபத்தீனம் ஸமாபஜ்ஜனேன பாரம் க³தோ, ஸப்³பா³ ஸமாபத்தியோ ஸமாபஜ்ஜித்வா டி²தோதி அத்தோ². ப்³ரஹ்மசரியஸ்ஸ கேவலீதி யம் ப்³ரஹ்மசரியஸ்ஸ கேவலம் ஸகலபா⁴வோ, தேன ஸமன்னாக³தோ, ஸகலசதுமக்³க³ப்³ரஹ்மசரியவாஸோதி அத்தோ². தேனாஹ ‘‘ஸகலப்³ரஹ்மசரியோ’’தி, பரிபுண்ணமக்³க³ப்³ரஹ்மசரியோதி அத்தோ². ஸேஸம் ஸுவிஞ்ஞேய்யமேவ.

து³தியஉருவேலஸுத்தவண்ணனா நிட்டி²தா.