7-10. பட²மஅக³திஸுத்தாதி³வண்ணனா

17-20. ஸத்தமே ச²ந்தா³க³திந்தி ஏத்த² ஸந்தி⁴வஸேன ஸரலோபோதி த³ஸ்ஸேந்தோ ஆஹ ‘‘ச²ந்தே³ன அக³தி’’ந்தி. ச²ந்தா³தி ஹேதும்ஹி நிஸ்ஸக்கவசனந்தி ஆஹ ‘‘ச²ந்தே³னா’’தி, பேமேனாதி அத்தோ². ச²ந்த³ஸத்³தோ³ ஹேத்த² தண்ஹாபரியாயோ, அகுஸலச்ச²ந்த³பரியாயோ வா. ஸேஸேஸூதி ‘‘தோ³ஸாக³திம் க³ச்ச²தீ’’திஆதீ³ஸு.

ஏத்த² ச யோ ‘‘அயம் மே மித்தோதி வா, ஸந்தி³ட்டோ²தி வா, ஞாதகோதி வா, லஞ்சம் வா பன மே தே³தீ’’தி ச²ந்த³வஸேன அஸ்ஸாமிகம் ஸாமிகம் கரோதி, அயம் ச²ந்தே³ன அகத்தப்³ப³ம் கரோதி நாம. யோ ‘‘அயம் மே வேரீ’’தி சிரகாலானுப³த்³த⁴வேரவஸேன வா, தங்க²ணுப்பன்னகோத⁴வஸேன வா ஸாமிகம் அஸ்ஸாமிகம் கரோதி, அயம் தோ³ஸேன அகத்தப்³ப³ம் கரோதி நாம. யோ பன மந்த³த்தா மோமூஹத்தா யம் வா தம் வா அயுத்தம் அகாரணம் வத்வா அஸ்ஸாமிகம் ஸாமிகம் கரோதி, அயம் மோஹேன அகத்தப்³ப³ம் கரோதி நாம. யோ பன ‘‘அயம் ராஜவல்லபோ⁴தி வா விஸமே சோராதி³கே விஸமானி வா காயது³ச்சரிதாதீ³னி ஸமாதா³ய வத்தனேன விஸமனிஸ்ஸிதோ வா, அனத்த²ம்பி மே கரேய்யா’’தி பீ⁴தோ அஸ்ஸாமிகம் ஸாமிகம் கரோதி, அயம் ப⁴யேன அகத்தப்³ப³ம் கரோதி நாம.

யோ பன கிஞ்சி பா⁴ஜேந்தோ ‘‘அயம் மே ஸந்தி³ட்டோ² வா ஸம்ப⁴த்தோ வா’’தி பேமவஸேன அதிரேகம் தே³தி, ‘‘அயம் மே வேரீ’’தி தோ³ஸவஸேன ஊனகம் தே³தி, யோ முய்ஹந்தோ தி³ன்னாதி³ன்னம் அஜானமானோ கஸ்ஸசி ஊனம், கஸ்ஸசி அதி⁴கம் தே³தி, ‘‘அயம் இமஸ்மிம் அதீ³யமானே மய்ஹம் அனத்த²ம்பி கரேய்யா’’தி ஸீதோ கஸ்ஸசி அதிரேகம் தே³தி, ஸோ சதுப்³பி³தோ⁴பி யதா²னுக்கமேன ச²ந்தா³க³திஆதீ³னி க³ச்ச²ந்தோ அகத்தப்³ப³ம் கரோதி நாம.

நிஹீயதி தஸ்ஸ யஸோதி தஸ்ஸ அக³திகா³மினோ கித்தியஸோபி பரிவாரயஸோபி நிஹீயதி பரிஹாயதி. யஸ்ஸதி தேன கித்தீயதீதி ஹி யஸோ, கித்தி து²திகோ⁴ஸோ. யஸ்ஸதி தேன புரேசரானுசரபா⁴வேன பரிவாரயதீதி யஸோ, பரிவாரோ. அட்ட²மனவமத³ஸமானி உத்தானத்தா²னேவ.

சரவக்³கோ³ து³தியோ.