4. ஸம்வரஸுத்தவண்ணனா

14. சதுத்தே² ஸம்வராதீ³னம் ஸாத⁴னவஸேன பத³ஹதி ஏதேஹீதி பதா⁴னானி. ஸம்வரந்தஸ்ஸ உப்பன்னவீரியந்தி யதா² அபி⁴ஜ்ஜா²த³யோ ந உப்பஜ்ஜந்தி, ஏவம் ஸதியா உபட்டா²னே சக்கா²தீ³னம் பித³ஹனே அனலஸஸ்ஸ உப்பன்னவீரியம். பஜஹந்தஸ்ஸாதி வினோதே³ந்தஸ்ஸ. உப்பன்னவீரியந்தி தஸ்ஸேவ பஹானஸ்ஸ ஸாத⁴னவஸேன பவத்தவீரியம். பா⁴வேந்தஸ்ஸ உப்பன்னவீரியந்தி ஏத்தா²பி ஏஸேவ நயோ. ஸமாதி⁴னிமித்தந்தி ஸமாதி⁴ ஏவ. புரிமுப்பன்னஸமாதி⁴ ஹி பரதோ உப்பஜ்ஜனகஸமாதி⁴ஸ்ஸ காரணம் ஹோதீதி ‘‘ஸமாதி⁴னிமித்த’’ந்தி வுத்தம்.

உபதி⁴விவேகத்தாதி க²ந்தூ⁴பதி⁴ஆதி³உபதீ⁴ஹி விவித்தத்தா வினிஸ்ஸடத்தா. தம் ஆக³ம்மாதி தம் நிப்³பா³னம் மக்³கே³ன அதி⁴க³மஹேது. ராகா³த³யோ விரஜ்ஜந்தி ஏத்த², ஏதேனாதி விராகோ³. ஏவம் நிரோதோ⁴பி த³ட்ட²ப்³போ³. யஸ்மா இத⁴ போ³ஜ்ஜ²ங்க³மிஸ்ஸகவஸேன இச்சி²தா, தஸ்மா ‘‘ஆரம்மணவஸேன வா அதி⁴க³ந்தப்³ப³வஸேன வா’’தி வுத்தம். தத்த² அதி⁴க³ந்தப்³ப³வஸேனாதி தன்னின்னதாவஸேன. வோஸ்ஸக்³க³பரிணாமிந்தி வோஸ்ஸக்³க³வஸேன பரிணாமிதம் பரிச்சஜனவஸேன சேவ பக்க²ந்த³னவஸேன ச பரிணாமனஸீலம். தேனாஹ ‘‘த்³வே வோஸ்ஸக்³கா³’’திஆதி³. க²ந்தா⁴னம் பரிச்சஜனம் நாம தப்படிப³த்³த⁴கிலேஸப்பஹானவஸேனாதி யேனாகாரேன விபஸ்ஸனா கிலேஸே பஜஹதி, தேனேவாகாரேன தன்னிமித்தக்க²ந்தே⁴ ச பஜஹதீதி வத்தப்³ப³தம் அரஹதீதி ஆஹ ‘‘விபஸ்ஸனா…பே… பரிச்சஜதீ’’தி. யஸ்மா விபஸ்ஸனா வுட்டா²னகா³மினிபா⁴வம் பாபுணந்தீ நின்னபோணபப்³பா⁴ரபா⁴வேன ஏகம்ஸதோ நிப்³பா³னம் பக்க²ந்த³தீதி வத்தப்³ப³தம் லப⁴தி, மக்³கோ³ ச ஸமுச்சே²த³வஸேன கிலேஸே க²ந்தே⁴ ச ராக³ம் பரிச்சஜதி, தஸ்மா யதா²க்கமம் விபஸ்ஸனாமக்³கா³னம் வஸேன பக்க²ந்த³னபரிச்சாக³வோஸ்ஸக்³கா³ வேதி³தப்³பா³. வோஸக்³க³த்தா²யாதி பரிச்சாக³வோஸ்ஸக்³க³த்தா²ய சேவ பக்க²ந்த³னவோஸ்ஸக்³க³த்தா²ய ச. பரிணமதீதி பரிச்சஜதி. தம் பன பரிணாமனம் வுட்டா²னகா³மினிபா⁴வப்பத்தியா சேவ அரியமக்³க³பா⁴வப்பத்தியா ச இச்சி²தந்தி ஆஹ ‘‘விபஸ்ஸனாபா⁴வஞ்ச மக்³க³பா⁴வஞ்ச பாபுணாதீ’’தி. ஸேஸபதே³ஸூதி ‘‘த⁴ம்மவிசயஸம்போ³ஜ்ஜ²ங்க³ம் பா⁴வேதீ’’திஆதீ³ஸு ஸேஸஸம்போ³ஜ்ஜ²ங்க³கோட்டா²ஸேஸு.

ப⁴த்³த³கந்தி அப⁴த்³த³கானம் நீவரணாதி³பாபத⁴ம்மானம் விக்க²ம்ப⁴னேன ராக³விக³மனேன ஏகந்தஹிதத்தா து³ல்லப⁴த்தா ச ப⁴த்³த³கம் ஸுந்த³ரம். ந ஹி அஞ்ஞம் ஸமாதி⁴னிமித்தம் ஏவம் து³ல்லப⁴ம் ராக³ஸ்ஸ உஜுவிபச்சனீகபூ⁴தம் அத்தி². அனுரக்க²தீதி ஏத்த² அனுரக்க²னா நாம அதி⁴க³தஸமாதி⁴தோ யதா² பரிஹானி ந ஹோதி, ஏவம் படிபத்திஸாஸன-தப்படிபக்க²விக³மனேனாதி ஆஹ ‘‘ஸமாதீ⁴’’திஆதி³. அட்டி²கஸஞ்ஞாதி³காதி அட்டி²கஜ்ஜா²னாதி³கா. ஸஞ்ஞாஸீஸேன ஹி ஜா²னம் வத³தி. ஸேஸமேத்த² உத்தானமேவ.

ஸம்வரஸுத்தவண்ணனா நிட்டி²தா.