5. பஞ்ஞத்திஸுத்தவண்ணனா

15. பஞ்சமே அத்தபா⁴வோ ஏதேஸம் அத்தீ²தி அத்தபா⁴வினோ, தேஸம் அத்தபா⁴வீனம். தேனாஹ ‘‘அத்தபா⁴வவந்தான’’ந்தி. யாவ ச²த்திம்ஸாய இந்தா³னம் ஆயுப்பமாணம், தாவ பணீதே காமே பரிபு⁴ஞ்ஜீதி மந்தா⁴துராஜா கிர ஏகதி³வஸம் அத்தனோ பரிணாயகரதனம் புச்சி² – ‘‘அத்தி² நு கோ² மனுஸ்ஸலோகதோ ரமணீயதரம் டா²ன’’ந்தி. கஸ்மா தே³வ ஏவம் ப⁴ணஸி, கிம் ந பஸ்ஸஸி சந்தி³மஸூரியானம் ஆனுபா⁴வம், நனு ஏதேஸம் டா²னம் இதோ ரமணீயதரந்தி? ராஜா சக்கரதனம் புரக்க²த்வா தத்த² அக³மாஸி.

சத்தாரோ மஹாராஜானோ ‘‘மந்தா⁴துமஹாராஜா ஆக³தோ’’தி ஸுத்வா ‘‘தாவமஹித்³தி⁴கோ மஹாராஜா ந ஸக்கா யுத்³தே⁴ன படிபா³ஹிது’’ந்தி ஸகரஜ்ஜம் நிய்யாதேஸும். ஸோ தம் க³ஹேத்வா புன புச்சி² – ‘‘அத்தி² நு கோ² இதோ ரமணீயதரம் டா²ன’’ந்தி. அத²ஸ்ஸ தாவதிம்ஸப⁴வனம் கத²யிம்ஸு. ‘‘தாவதிம்ஸப⁴வனம், தே³வ, ரமணீயம், தத்த² ஸக்கஸ்ஸ தே³வரஞ்ஞோ இமே சத்தாரோ மஹாராஜானோ பாரிசாரிகா தோ³வாரிகபூ⁴மியம் திட்ட²ந்தி. ஸக்கோ தே³வராஜா மஹித்³தி⁴கோ மஹானுபா⁴வோ. தஸ்ஸிமானி உபபோ⁴க³ட்டா²னானி – யோஜனஸஹஸ்ஸுப்³பே³தோ⁴ வேஜயந்தபாஸாதோ³, பஞ்சயோஜனஸதுப்³பே³தா⁴ ஸுத⁴ம்மதே³வஸபா⁴, தி³யட்³ட⁴யோஜனஸதிகோ வேஜயந்தரதோ², ததா² ஏராவணோ ஹத்தீ², தி³ப்³ப³ருக்க²ஸஹஸ்ஸப்படிமண்டி³தம் நந்த³னவனம், சித்தலதாவனம், பா²ருஸகவனம், யோஜனஸதுப்³பே³தோ⁴ பாரிச்ச²த்தகோ கோவிளாரோ, தஸ்ஸ ஹேட்டா² ஸட்டி²யோஜனாயாமா பஞ்ஞாஸயோஜனவித்தா²ரா பஞ்சத³ஸயோஜனுப்³பே³தா⁴ ஜயஸுமனபுப்ப²வண்ணா பண்டு³கம்ப³லஸிலா, யஸ்ஸா முது³தாய ஸக்கஸ்ஸ நிஸீத³தோ உபட்³ட⁴காயோ அனுப்பவிஸதீ’’தி.

தம் ஸுத்வா ராஜா தத்த² க³ந்துகாமோ சக்கரதனம் அப்³பு⁴க்கிரி. தம் ஆகாஸே உட்ட²ஹி ஸத்³தி⁴ம் சதுரங்கி³னியா ஸேனாய. அத² த்³வின்னம் தே³வலோகானம் வேமஜ்ஜ²தோ சக்கரதனம் ஓதரித்வா பத²வியா ஆஸன்னே டா²னே அட்டா²ஸி ஸத்³தி⁴ம் பரிணாயகரதனப்பமுகா²ய சதுரங்கி³னியா ஸேனாய. ராஜா ஏககோவ அத்தனோ ஆனுபா⁴வேன தாவதிம்ஸப⁴வனம் அக³மாஸி. ஸக்கோ ‘‘மந்தா⁴தா ஆக³தோ’’தி ஸுத்வா தஸ்ஸ பச்சுக்³க³மனம் கத்வா ‘‘ஸ்வாக³தம், மஹாராஜ, ஸகம், தே மஹாராஜ, அனுஸாஸ மஹாராஜா’’தி வத்வா ஸத்³தி⁴ம் நாடகேஹி ரஜ்ஜம் த்³வே பா⁴கே³ கத்வா ஏகம் பா⁴க³மதா³ஸி. ரஞ்ஞோ தாவதிம்ஸப⁴வனே பதிட்டி²தமத்தஸ்ஸேவ மனுஸ்ஸக³ந்த⁴ஸரீரனிஸ்ஸந்தா³தி³மனுஸ்ஸபா⁴வோ விக³ச்சி², தே³வலோகே பவத்திவிபாகதா³யினோ அபரபரியாயவேத³னீயஸ்ஸ கம்மஸ்ஸ கதோகாஸத்தா ஸப்³ப³தா³ ஸோளஸவஸ்ஸுத்³தே³ஸிகதாமாலாமிலாயனாதி³தே³வபா⁴வோ பாதுரஹோஸி. தஸ்ஸ ஸக்கேன ஸத்³தி⁴ம் பண்டு³கம்ப³லஸிலாய நிஸின்னஸ்ஸ அக்கி²னிமிஸனமத்தேன நானத்தம் பஞ்ஞாயதி. தம் அஸல்லக்கே²ந்தா தே³வா ஸக்கஸ்ஸ ச தஸ்ஸ ச நானத்தே முய்ஹந்தி. ஸோ தத்த² தி³ப்³ப³ஸம்பத்திம் அனுப⁴வமானோ ததா³ மனுஸ்ஸானம் அஸங்க்²யேய்யாயுகதாய யாவ ச²த்திம்ஸ ஸக்கா உபபஜ்ஜித்வா சுதா, தாவ ஸக்கரஜ்ஜம் காரேத்வா ‘‘கிம் மே இமினா உபட்³ட⁴ரஜ்ஜேனா’’தி அதித்தோ காமேஹி ததோ சவித்வா அத்தனோ உய்யானே பதிதோ மனுஸ்ஸலோகே உதுகக்க²ளதாய வாதாதபேன பு²ஸிதக³த்தோ காலமகாஸி. தேன வுத்தம் ‘‘தே³வலோகே பன யாவ ச²த்திம்ஸாய இந்தா³னம் ஆயுப்பமாணம், தாவ பணீதே காமே பரிபு⁴ஞ்ஜீ’’தி.

பஞ்ஞத்திஸுத்தவண்ணனா நிட்டி²தா.