9-10. தண்ஹாஸுத்தாதி³வண்ணனா

199-200. நவமே தயோ ப⁴வே அஜ்ஜோ²த்த²ரித்வா டி²தம் ‘‘அஜ்ஜ²த்திகஸ்ஸ உபாதா³ய அட்டா²ரஸ தண்ஹாவிசரிதானீ’’திஆதி³னா வுத்தம் தம் தம் அத்தனோ கோட்டா²ஸபூ⁴தம் ஜாலமேதிஸ்ஸா அத்தீ²தி ஜாலினீ. தேனாஹ ‘‘தயோ வா ப⁴வே’’திஆதி³. தத்த² தத்தா²தி தஸ்மிம் தஸ்மிம் ப⁴வே, ஆரம்மணே வா. அபிசாதிஆதி³னா நித்³தே³ஸனயேன விஸத்திகாபத³ஸ்ஸ அத்த²ம் த³ஸ்ஸேந்தோ நித்³தே³ஸபாளியா ஏகதே³ஸம் த³ஸ்ஸேதி ‘‘விஸமூலா’’திஆதி³னா. அயஞ்ஹேத்த² நித்³தே³ஸபாளி (மஹானி. 3; சூளனி. மேத்தகூ³மாணவபுச்சா²னித்³தே³ஸோ 22, க²க்³க³விஸாணஸுத்தனித்³தே³ஸோ 124) –

‘‘விஸத்திகாதி கேனட்டே²ன விஸத்திகா? விஸதாதி விஸத்திகா, விஸடாதி விஸத்திகா, விஸாலாதி விஸத்திகா, விஸக்கதீதி விஸத்திகா, விஸம்ஹரதீதி விஸத்திகா, விஸம்வாதி³காதி விஸத்திகா, விஸமூலாதி விஸத்திகா, விஸப²லாதி விஸத்திகா. விஸபரிபோ⁴கா³தி விஸத்திகா. விஸாலா வா பன ஸா தண்ஹா ரூபே ஸத்³தே³ க³ந்தே⁴ ரஸே போ²ட்ட²ப்³பே³ குலே க³ணே ஆவாஸே லாபே⁴ யஸே பஸம்ஸாய ஸுகே² சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரே காமதா⁴துயா ரூபதா⁴துயா அரூபதா⁴துயா காமப⁴வே ரூபப⁴வே அரூபப⁴வே ஸஞ்ஞிப⁴வே அஸஞ்ஞிப⁴வே நேவஸஞ்ஞினாஸஞ்ஞிப⁴வே ஏகவோகாரப⁴வே சதுவோகாரப⁴வே பஞ்சவோகாரப⁴வே அதீதே அனாக³தே பச்சுப்பன்னே தி³ட்ட²ஸுதமுதவிஞ்ஞாதப்³பே³ஸு விஸடா வித்த²தாதி விஸத்திகா’’தி.

தத்த² (மஹானி. அட்ட². 3; ஸம். நி. டீ. 1.1.1 ஓக⁴தரணஸுத்தவண்ணனா) விஸதாதி வித்த²தா ரூபாதீ³ஸு தேபூ⁴மகத⁴ம்மப்³யாபனவஸேன. விஸடாதி புரிமவசனமேவ த-காரஸ்ஸ ட-காரம் கத்வா வுத்தம். விஸாலாதி விபுலா. விஸக்கதீதி பரிஸஹதி. ரத்தோ ஹி ராக³வத்து²னா பரேன தாளியமானோபி ஸஹதி, விப்ப²ந்த³னம் வா ‘‘விஸக்கன’’ந்தி வத³ந்தி. விஸம்ஹரதீதி ததா² ததா² காமேஸு ஆனிஸம்ஸம் த³ஸ்ஸேந்தீ விவிதே⁴ஹி ஆகாரேஹி நேக்க²ம்மாபி⁴முக²ப்பவத்திதோ சித்தம் ஸம்ஹரதி ஸம்கி²பதி. விஸம் வா து³க்க²ம், தம் ஹரதி உபனேதீதி அத்தோ². அனிச்சாதி³ம் நிச்சாதி³தோ க³ண்ஹந்தீ விஸம்வாதி³கா ஹோதி. து³க்க²னிப்³ப³த்தகஸ்ஸ கம்மஸ்ஸ ஹேதுபா⁴வதோ விஸமூலா, விஸம் வா து³க்க²து³க்கா²தி³பூ⁴தா வேத³னா மூலம் ஏதிஸ்ஸாதி விஸமூலா. து³க்க²ஸமுத³யத்தா விஸம் ப²லம் ஏதிஸ்ஸாதி விஸப²லா. தண்ஹாய ரூபாதி³கஸ்ஸ து³க்க²ஸ்ஸ பரிபோ⁴கோ³ ஹோதி, ந அமதஸ்ஸாதி ஸா விஸபரிபோ⁴கா³ வுத்தா. ஸப்³ப³த்த² நிருத்திவஸேன பத³ஸித்³தி⁴ வேதி³தப்³பா³. யோ பனேத்த² பதா⁴னோ அத்தோ², தம் த³ஸ்ஸேதும் புன ‘‘விஸடா வா பனா’’திஆதி³ வுத்தம்.

தந்தம் வுச்சதி (தீ³. நி. டீ. 2.95 அபஸாத³னாவண்ணனா; ஸம். நி. டீ. 2.2.60) வத்த²வினனத்த²ம் தந்தவாயேஹி த³ண்ட³கே ஆஸஞ்சித்வா பஸாரிதஸுத்தவட்டி ‘‘தனீயதீ’’தி கத்வா, தம் பன ஸுத்தம் ஸந்தானாகுலதாய நித³ஸ்ஸனபா⁴வேன ஆகுலமேவ க³ஹிதந்தி ஆஹ ‘‘தந்தம் விய ஆகுலஜாதோ’’தி. ஸங்கே²பதோ வுத்தமத்த²ம் வித்தா²ரதோ த³ஸ்ஸேதும் ‘‘யதா² நாமா’’திஆதி³ வுத்தம். ஸமானேதுந்தி புப்³பே³னாபரம் ஸமம் கத்வா ஆனேதும், அவிஸமம் உஜும் காதுந்தி அத்தோ². தந்தமேவ வா ஆகுலம் தந்தாகுலம், தந்தாகுலம் விய ஜாதோ பூ⁴தோதி தந்தாகுலகஜாதோ. வினனதோ கு³லாதி இத்தி²லிங்க³வஸேன லத்³த⁴னாமஸ்ஸ தந்தவாயஸ்ஸ கு³ண்டி²கம் நாம ஆகுலபா⁴வேன அக்³க³தோ வா மூலதோ வா து³விஞ்ஞேய்யமேவ க²லிப³த்³த⁴தந்தஸுத்தந்தி ஆஹ ‘‘கு³லாகு³ண்டி²கம் வுச்சதி பேஸகாரகஞ்ஜியஸுத்த’’ந்தி.

ஸகுணிகாதி படபத³ஸகுணிகா. ஸா ஹி ருக்க²ஸாகா²ஸு ஓலம்ப³னகுடவா ஹோதி. தஞ்ஹி ஸா குடவம் ததோ ததோ திணஹீராதி³கே ஆனேத்வா ததா² வினதி, யதா² தே பேஸகாரகஞ்ஜியஸுத்தம் விய அக்³கே³ன வா அக்³க³ம், மூலேன வா மூலம் ஸமானேதும் விவேசேதும் வா ந ஸக்கா. தேனாஹ ‘‘யதா²’’திஆதி³. தது³ப⁴யம்பி ‘‘கு³லாகு³ண்டி²க’’ந்தி வுத்தம் கஞ்ஜியஸுத்தம் குலாவகஞ்ச. புரிமனயேனேவாதி ‘‘ஏவமேவ ஸத்தா’’திஆதி³னா வுத்தனயேனேவ. காமம் முஞ்ஜபப்³ப³ஜதிணானி யதா²ஜாதானிபி தீ³க⁴பா⁴வேன பதித்வா அரஞ்ஞட்டா²னே அஞ்ஞமஞ்ஞம் வினந்தி⁴த்வா ஆகுலப்³யாகுலானி ஹுத்வா திட்ட²ந்தி, தானி பன ந ததா² து³ப்³பி³வேசியானி யதா² ரஜ்ஜுபூ⁴தானீதி த³ஸ்ஸேதும் ‘‘யதா² தானீ’’திஆதி³ வுத்தம். ஸேஸமேத்த² ஹேட்டா² வுத்தனயமேவ.

அபாயாதி அவட்³டி⁴கா, ஸுகே²ன, ஸுக²ஹேதுனா வா விரஹிதாதி அத்தோ². து³க்க²ஸ்ஸ க³திபா⁴வதோதி ஆபாயிகஸ்ஸ து³க்க²ஸ்ஸ பவத்திட்டா²னபா⁴வதோ. ஸுக²ஸமுஸ்ஸயதோதி அப்³பு⁴த³யதோ. வினிபதிதத்தாதி விரூபம் நிபாதத்தா, யதா² தேனத்தபா⁴வேன ஸுக²ஸமுஸ்ஸயோ ந ஹோதி, ஏவம் நிபதிதத்தா. இதரோதி ஸம்ஸாரோ. நனு ‘‘அபாய’’ந்திஆதி³னா வுத்தோபி ஸம்ஸாரோ ஏவாதி? ஸச்சமேதம், நிரயாதீ³னம் பன அதி⁴மத்தது³க்க²பா⁴வத³ஸ்ஸனத்த²ம் அபாயாதி³க்³க³ஹணம். கோ³ப³லீப³த்³த³ஞாயேனாயமத்தோ² வேதி³தப்³போ³.

க²ந்தா⁴னஞ்ச படிபாடீதி பஞ்சன்னம் க²ந்தா⁴னம் ஹேதுப²லபா⁴வேன அபராபரப்பவத்தி. அப்³போ³ச்சி²ன்னம் வத்தமானாதி அவிச்சே²தே³ன வத்தமானா. தம் ஸப்³ப³ம்பீதி தம் ‘‘அபாய’’ந்திஆதி³னா வுத்தம் ஸப்³ப³ம் அபாயது³க்க²ஞ்ச வட்டது³க்க²ஞ்ச. மஹாஸமுத்³தே³ வாதக்கி²த்தா நாவா வியாதி இத³ம் பரிப்³ப⁴மனட்டா²னஸ்ஸ மஹந்தத³ஸ்ஸனத்த²ஞ்சேவ பரிப்³ப⁴மனஸ்ஸ அனவட்டி²ததாத³ஸ்ஸனத்த²ஞ்ச உபமா. யந்தே யுத்தகோ³ணோ வியாதி இத³ம் பன அவஸீபா⁴வத³ஸ்ஸனத்த²ஞ்சேவ து³ப்பமோக்க²பா⁴வத³ஸ்ஸனத்த²ஞ்சாதி வேதி³தப்³ப³ம்.

‘‘ஸமூஹக்³கா³ஹோதி தண்ஹாமானதி³ட்டீ²னம் ஸாதா⁴ரணக்³கா³ஹோ’’தி வத³ந்தி, ‘‘இத்த²ம் ஏவம் அஞ்ஞதா²’’தி பன விஸேஸம் அகத்வா க³ஹணம் ஸமூஹக்³கா³ஹோதி த³ட்ட²ப்³போ³. விஸேஸம் அகத்வாதி ச அனுபனிதா⁴னம் ஸமதோ அஸமதோ ச உபனிதா⁴னந்தி இமம் விபா⁴க³ம் அகத்வாதி அத்தோ². இத்த²ந்தி ஹி அனுபனிதா⁴னம் கதி²தம். ஏவம் அஞ்ஞதா²தி பன ஸமதோ அஸமதோ ச உபனிதா⁴னம். அஞ்ஞம் ஆகாரந்தி பரஸந்தானக³தம் ஆகாரம்.

அத்தீ²தி ஸதா³ ஸம்விஜ்ஜதீதி அத்தோ². ஸீத³தீதி நஸ்ஸதி. ஸம்ஸயபரிவிதக்கவஸேனாதி ‘‘கிம் நு கோ² அஹம் ஸியம், ந ஸிய’’ந்தி ஏவம் பரிவிதக்கவஸேன. பத்த²னாகப்பனவஸேனாதி ‘‘அபி நாம ஸாது⁴ பனாஹம் ஸிய’’ந்தி ஏவம் பத்த²னாய கப்பனவஸேன. ஸுத்³த⁴ஸீஸாதி தண்ஹாமானதி³ட்டீ²னம் ஸாதா⁴ரணா ஸீஸா. ‘‘இத்த²ம் ஏவம் அஞ்ஞதா²’’தி வுத்தஸ்ஸ விஸேஸஸ்ஸ அனிஸ்ஸிதத்தா ‘‘ஸுத்³த⁴ஸீஸா’’தி வுத்தா. தத்த² தி³ட்டி²ஸீஸேஹி தி³ட்டி²யா க³ஹிதாய தத³வினாபா⁴வினீ தண்ஹா த³ஸ்ஸிதா, சதூஹி ஸீஸேஹி த்³வாத³ஸஹி ச ஸீஸமூலகேஹி மானதி³ட்டீ²ஹி அயமேவ தண்ஹா த³ஸ்ஸிதாதி ஆஹ ‘‘ஏவமேதே…பே… தண்ஹாவிசரிதத⁴ம்மா வேதி³தப்³பா³’’தி. நனு ச மானதி³ட்டி²க்³கா³ஹோபி இதா⁴தி⁴ப்பேதோ, யதோ ‘‘தண்ஹாமானதி³ட்டி²வஸேன ஸமூஹக்³கா³ஹோ’’தி அட்ட²கதா²யம் வுத்தம், தஸ்மா கத²ம் தண்ஹாவிசரிதானீதி இத³ம் வசனம்? வுச்சதே – தி³ட்டி²மானேஸுபி தண்ஹாவிசரிதானீதி வசனம் அஞ்ஞமஞ்ஞம் விப்பயோகீ³னம் தி³ட்டி²மானானம் தண்ஹாய அவிப்பயோகா³னம் தம்மூலகத்தா தப்பதா⁴னதாய கதந்தி வேதி³தப்³ப³ம். த³ஸமம் உத்தானமேவ.

தண்ஹாஸுத்தாதி³வண்ணனா நிட்டி²தா.

மஹாவக்³க³வண்ணனா நிட்டி²தா.

சதுத்த²பண்ணாஸகம் நிட்டி²தம்.