(19) 4. ப்³ராஹ்மணவக்³கோ³

1-3. யோதா⁴ஜீவஸுத்தாதி³வண்ணனா

181-183. சதுத்த²ஸ்ஸ பட²மாதீ³னி உத்தானத்தா²னேவ.

4. அப⁴யஸுத்தவண்ணனா

184. சதுத்தே² ஸோசதீதி சித்தே உப்பன்னப³லவஸோகேன ஸோசதி, சித்தஸந்தாபேன அந்தோ நிஜ்ஜா²யதீதி அத்தோ². கிலமதீதி தஸ்ஸேவ ஸோகஸ்ஸ வஸேன காயே ச உப்பன்னது³க்கே²ன கிலமதி. பரிதே³வதீதி ஸோகுத்³தே³ஹகவஸேன தம் தம் விப்பலபந்தோ வாசாய பரிதே³வதி. உரத்தாளிந்தி உரத்தாளம், உரம் தாளேத்வாதி அத்தோ². தேனாஹ ‘‘உரம் தாளேத்வா’’தி. கங்கா²விசிகிச்சா²தி ஏத்த² ‘‘ஏகமேவித³ம் பஞ்சமம் நீவரணம். கிம் நு கோ² இத³’’ந்தி ஆரம்மணம் கங்க²னதோ கங்கா², ‘‘இத³மேவ வர’’ந்தி நிச்சே²தும் அஸமத்த²பா⁴வதோ ‘‘விசிகிச்சா²’’தி வுச்சதி – ‘‘த⁴ம்மஸபா⁴வம் விசினந்தோ கிச்ச²தி, விக³தா சிகிச்சா²’’தி வா கத்வா.

அப⁴யஸுத்தவண்ணனா நிட்டி²தா.

5. ப்³ராஹ்மணஸச்சஸுத்தவண்ணனா

185. பஞ்சமே ஏத்தா²தி ஏதஸ்மிம் ஸுஞ்ஞதானுபஸ்ஸனாதி⁴காரே. க்வசீதி கத்த²சி டா²னே, காலே, த⁴ம்மே வா. அத² வா க்வசீதி அஜ்ஜ²த்தம் ப³ஹித்³தா⁴ வா. அத்தனோ அத்தானந்தி ஸகத்தானம் ‘‘அயம் கோ², போ⁴ ப்³ரஹ்மா, மஹாப்³ரஹ்மா…பே… வஸீ பிதா பூ⁴தப⁴ப்³யான’’ந்திஆதி³னா (தீ³. நி. 1.42) பரேஹி பரிகப்பிதம் அத்தானஞ்ச கஸ்ஸசி கிஞ்சனபூ⁴தம் ந பஸ்ஸதீதி த³ஸ்ஸேந்தோ ‘‘கஸ்ஸசீ’’திஆதி³மாஹ. தத்த² பரஸ்ஸாதி பரஜாதி பரோ புரிஸோதி வா ஏவம் க³ஹிதஸ்ஸ. ந ச மம க்வசனீதி ஏத்த² மம-ஸத்³தோ³ அட்டா²னப்பயுத்தோதி ஆஹ ‘‘மம-ஸத்³த³ம் தாவ ட²பேத்வா’’தி. பரஸ்ஸ சாதி அத்தனோ அஞ்ஞஸ்ஸ. பரோ புரிஸோ நாம அத்தி² மமத்தா²ய டி²தோ. தஸ்ஸ வஸேன மய்ஹம் ஸப்³ப³ம் இஜ்ஜ²தீதி ஏகச்சதி³ட்டி²க³திகபரிகப்பிதவஸேன பரம் அத்தானம் தஞ்ச அத்தனோ கிஞ்சனபூ⁴தம் ந பஸ்ஸதீதி த³ஸ்ஸேந்தோ ‘‘ந ச க்வசனீ’’திஆதி³மாஹ. ஏத்த² ச நாஹம் க்வசனீதி ஸகஅத்தனோ ஸப்³பா⁴வம் ந பஸ்ஸதி. ந கஸ்ஸசி கிஞ்சனதஸ்மிந்தி ஸகஅத்தனோ ஏவ கஸ்ஸசி அத்தனியதம் ந பஸ்ஸதி. ந ச மமாதி ஏதம் த்³வயம் யதா²ரஹம் ஸம்ப³ந்தி⁴தப்³ப³ம், அத்தி²-பத³ம் பச்சேகம். ந ச க்வசனி பரஸ்ஸ அத்தா அத்தீ²தி பரஸ்ஸ அத்தனோ அபா⁴வம் பஸ்ஸதி. தஸ்ஸ பரஸ்ஸ அத்தனோ மம கிஞ்சனதா நத்தீ²தி பரஸ்ஸ அத்தனோ அனத்தனியதம் பஸ்ஸதி. ஏவம் அஜ்ஜ²த்தம் ப³ஹித்³தா⁴ க²ந்தா⁴னம் அத்தத்தனியஸுஞ்ஞதா-ஸுத்³த⁴ஸங்கா²ரபுஞ்ஜதா-சதுகோடிகஸுஞ்ஞதாபரிக்³க³ண்ஹனேன நிட்டா² ஹோதி. ஸேஸமேத்த² ஸுவிஞ்ஞேய்யமேவ.

ப்³ராஹ்மணஸச்சஸுத்தவண்ணனா நிட்டி²தா.

6. உம்மக்³க³ஸுத்தவண்ணனா

186. ச²ட்டே² ஆகட்³டீ⁴யதீதி சித்தவஸிகோ லோகோ தத்த² தத்த² உபகட்³டீ⁴யதி. தேஸம்யேவேத்த² க³ஹணம் வேதி³தப்³ப³ந்தி யே அபரிஞ்ஞாதவத்து²கா சித்தஸ்ஸ வஸம் க³ச்ச²ந்தி, தேஸம்யேவ க³ஹணம். ந ஹி பரிஞ்ஞாதக்க²ந்தா⁴ பஹீனகிலேஸா சித்தஸ்ஸ வஸம் க³ச்ச²ந்தி, சித்தம் பன அத்தனோ வஸே வத்தேந்தி. ஸஹ ஸீலேனாதி சாரித்தவாரித்தஸீலேன ஸத்³தி⁴ம். புப்³ப³பா⁴க³படிபத³ந்தி து⁴தங்க³மாதி³ம் கத்வா யாவ கோ³த்ரபு⁴ஞாணம், தாவ பவத்தேதப்³ப³ம் ஸமத²விபஸ்ஸனாஸங்கா²தம் ஸம்மாபடிபத³ம். ஸேஸம் ஸுவிஞ்ஞேய்யமேவ.

உம்மக்³க³ஸுத்தவண்ணனா நிட்டி²தா.

7. வஸ்ஸகாரஸுத்தவண்ணனா

187. ஸத்தமே வஸ்ஸகாரோ ப்³ராஹ்மணோ மக³த⁴மஹாமத்தோதி ஏத்த² வஸ்ஸகாரோதி தஸ்ஸ ப்³ராஹ்மணஸ்ஸ நாமம். மஹதியா இஸ்ஸரியமத்தாய ஸமன்னாக³தோ மஹாமத்தோ. இஸ்ஸரியமத்தாயாதி ச இஸ்ஸரியப்பமாணேனாதி அத்தோ², இஸ்ஸரியேன சேவ வித்தூபகரணேன சாதி ஏவம் வா ஏத்த² அத்தோ² த³ட்ட²ப்³போ³, உபபோ⁴கூ³பகரணானிபி ஹி லோகே ‘‘மத்தா’’தி வுச்சந்தி. மக³த⁴ரஞ்ஞோ, மக³த⁴ரட்டே² வா மஹாமத்தோதி மக³த⁴மஹாமத்தோ. துதி³ஸஞ்ஞிதோ கா³மோ நிவாஸோ ஏதஸ்ஸாதி தோதே³ய்யோ. தேனேவாஹ ‘‘துதி³கா³மவாஸிகஸ்ஸா’’தி. துதி³கா³மவாஸிதா சஸ்ஸ தத்த² அதி⁴பதிபா⁴வேனாதி த³ட்ட²ப்³பா³. ஸோ ஹி தம் கா³மம் ஸோணத³ண்டோ³ விய, சம்பம் கூடத³ந்தோ விய, கா²ணுமதம் அதி⁴பதிபா⁴வேன அஜ்ஜா²வஸதி. மஹத்³த⁴னோ ஹோதி பஞ்சசத்தாலீஸகோடிவிப⁴வோ. பரிஸதீதி பரிஸாயம், ஜனஸமூஹேதி அத்தோ². தேனாஹ ‘‘ஸன்னிபதிதாய பரிஸாயா’’தி. அபி⁴ப்பஸன்னோதி ஏத்த² அபி⁴க்கமனத்தோ² அபி⁴-ஸத்³தோ³தி ஆஹ ‘‘அதிக்கம்ம பஸன்னோ’’தி, பஸாத³னீயம் டா²னம் அதிக்கமித்வா அப்பஸாத³னீயட்டா²னே பஸன்னோதி அதி⁴ப்பாயோ. தம் தம் கிச்சம் அத்த²ம் பஸ்ஸதீதி அத்த²த³ஸா, அலம் ஸமத்தா² படிப³லா அத்த²த³ஸா அலமத்த²த³ஸா, அலமத்த²த³ஸே அதிஸயந்தீதி அலமத்த²த³ஸதரா. தேனாஹ ‘‘அத்தே² பஸ்ஸிதும் ஸமத்தா²’’திஆதி³. நேவ ஸப்புரிஸம் ந அஸப்புரிஸம் ஜானாதி ஸப்புரிஸத⁴ம்மானம் அஸப்புரிஸத⁴ம்மானஞ்ச யாதா²வதோ அஜானனதோ. ஸேஸமேத்த² உத்தானமேவ.

வஸ்ஸகாரஸுத்தவண்ணனா நிட்டி²தா.

8. உபகஸுத்தவண்ணனா

188. அட்ட²மே நிப்³ப³த்திவஸேன நிரயம் அரஹதி, நிரயஸம்வத்தனியேன வா கம்முனா நிரயே நியுத்தோதி நேரயிகோ. அவீசிம்ஹி உப்பஜ்ஜித்வா தத்த² ஆயுகப்பஸஞ்ஞிதம் அந்தரகப்பம் திட்ட²தீதி கப்பட்டோ². நிரயூபபத்திம் பரிஹரணவஸேன திகிச்சி²தும் அஸக்குணேய்யோதி அதேகிச்சோ². அபரியாதி³ன்னாவாதி அபரிக்கீ²ணாயேவ. ஸசே ஹி ஏகோ பி⁴க்கு² காயானுபஸ்ஸனம் புச்ச²தி, அஞ்ஞோ வேத³னானுபஸ்ஸனம்…பே… சித்தானுபஸ்ஸனம். ‘‘இமினா புட்டே² அஹம் புச்சா²மீ’’தி ஏகோ ஏகம் ந ஓலோகேதி, ஏவம் ஸந்தேபி தேஸம் வாரோ பஞ்ஞாயதி ஏவ, பு³த்³தா⁴னம் பன வாரோ ந பஞ்ஞாயதி. வித³த்தி²சதுரங்கு³லம் சா²யம் அதிக்கமனதோ புரேதரம்யேவ ப⁴க³வா சுத்³த³ஸவிதே⁴ன காயானுபஸ்ஸனம், நவவிதே⁴ன வேத³னானுபஸ்ஸனம், ஸோளஸவிதே⁴ன சித்தானுபஸ்ஸனம், பஞ்சவிதே⁴ன த⁴ம்மானுபஸ்ஸனம் கதே²தி. திட்ட²ந்து வா ஏவம் சத்தாரோ. ஸசே ஹி அஞ்ஞே சத்தாரோ ஸம்மப்பதா⁴னேஸு, அஞ்ஞே இத்³தி⁴பாதே³ஸு, அஞ்ஞே பஞ்சிந்த்³ரியேஸு, அஞ்ஞே பஞ்சப³லேஸு, அஞ்ஞே ஸத்தபோ³ஜ்ஜ²ங்கே³ஸு, அஞ்ஞே அட்ட²மக்³க³ங்கே³ஸு பஞ்ஹே புச்சே²ய்யும், தம்பி ப⁴க³வா கதே²ய்ய. திட்ட²ந்து வா ஏதே அட்ட². ஸசே அஞ்ஞே ஸத்ததிம்ஸ ஜனா போ³தி⁴பக்கி²யேஸு பஞ்ஹே புச்சே²ய்யும், தம்பி ப⁴க³வா தாவதே³வ கதே²ய்ய. கஸ்மா? யாவதா ஹி லோகியமஹாஜனே ஏகம் பத³ம் கதே²ந்தே தாவ ஆனந்த³த்தே²ரோ அட்ட² பதா³னி கதே²தி. ஆனந்த³த்தே²ரே பன ஏகம் பத³ம் கதே²ந்தேயேவ ப⁴க³வா ஸோளஸ பதா³னி கதே²தி. கஸ்மா? ப⁴க³வதோ ஹி ஜிவ்ஹா முது³, த³ந்தாவரணம் ஸுபு²ஸிதம், வசனம் அக³ளிதம், ப⁴வங்க³பரிவாஸோ லஹுகோ. தேன வுத்தம் – ‘‘அபரியாதி³ன்னாவஸ்ஸ ததா²க³தஸ்ஸ த⁴ம்மதே³ஸனா, அபரியாதி³ன்னம் த⁴ம்மபத³ப்³யஞ்ஜன’’ந்தி.

தத்த² த⁴ம்மதே³ஸனாதி தந்திட்ட²பனா. த⁴ம்மபத³ப்³யஞ்ஜனந்தி ஏத்த² த⁴ம்மோதி பாளி. பஜ்ஜதி அத்தோ² ஏதேனாதி பத³ம். வாக்யஞ்ச பதே³னேவ ஸங்க³ஹிதம். அத்த²ம் ப்³யஞ்ஜேதீதி ப்³யஞ்ஜனம், அக்க²ரம். தஞ்ஹி பத³வாக்யம் பரிச்சி²ஜ்ஜமானம் தம் தம் அத்த²ம் ப்³யஞ்ஜேதி பகாஸேதி. ஏதேன அபராபரேஹி பத³ப்³யஞ்ஜனேஹி ஸுசிரம்பி காலம் கதே²ந்தஸ்ஸ ததா²க³தஸ்ஸ ந கதா³சி தேஸம் பரியாதா³னம் அத்தீ²தி த³ஸ்ஸேதி. கு³ணத⁴ம்ஸீதி கு³ணத⁴ம்ஸனஸீலோ. பக³ப்³போ³தி வாசாபாக³ப்³பி³யேன ஸமன்னாக³தோ.

உபகஸுத்தவண்ணனா நிட்டி²தா.

9. ஸச்சி²கரணீயஸுத்தவண்ணனா

189. நவமே நாமகாயேனாதி ஸஹஜாதனாமகாயேன. ஸேஸமேத்த² உத்தானமேவ.

ஸச்சி²கரணீயஸுத்தவண்ணனா நிட்டி²தா.

10. உபோஸத²ஸுத்தவண்ணனா

190. த³ஸமே துண்ஹீபூ⁴தம் துண்ஹீபூ⁴தந்தி ஆமேடி³தவசனம் ப்³யாபனிச்சா²வஸேன வுத்தந்தி ஆஹ ‘‘யதோ யதோ அனுவிலோகேதீ’’தி. அனுவிலோகேத்வாதி ஏத்த² அனு-ஸத்³தோ³பி ப்³யாபனிச்சா²வசனமேவாதி அனு அனு விலோகேத்வாதி அத்தோ², பஞ்சபஸாத³ப்படிமண்டி³தானி அக்கீ²னி உம்மீலேத்வா ததோ ததோ விலோகேத்வாதி வுத்தம் ஹோதி. அலந்தி யுத்தம், ஓபாயிகந்தி அத்தோ² ‘‘அலமேவ நிப்³பி³ந்தி³து’’ந்திஆதீ³ஸு (தீ³. நி. 2.272; ஸம். நி. 2.124-126) விய. புடப³ந்த⁴னேன பரிஹரித்வா அஸிதப்³ப³ம் புடோஸம் ஸம்ப³லம் அ-காரஸ்ஸ ஓ-காரம் கத்வா. தேனாஹ ‘‘பாதே²ய்ய’’ந்தி. ஸேஸமேத்த² ஸுவிஞ்ஞேய்யமேவ.

உபோஸத²ஸுத்தவண்ணனா நிட்டி²தா.

ப்³ராஹ்மணவக்³க³வண்ணனா நிட்டி²தா.