8. வேஸாரஜ்ஜஸுத்தவண்ணனா

8. அட்ட²மே ப்³யாமோஹவஸேன ஸரணபரியேஸனம் ஸாரஜ்ஜனம் ஸாரதோ³, ப்³யாமோஹப⁴யம். விக³தோ ஸாரதோ³ ஏதஸ்ஸாதி விஸாரதோ³, தஸ்ஸ பா⁴வோ வேஸாரஜ்ஜம். தம் பன ஞாணஸம்பத³ம், பஹானஸம்பத³ம், தே³ஸனாவிஸேஸஸம்பத³ம் கே²மஞ்ச நிஸ்ஸாய பவத்தம் சதுப்³பி³த⁴பச்சவேக்க²ணஞாணம். தேனாஹ ‘‘சதூஸு டா²னேஸூ’’திஆதி³. உஸப⁴ஸ்ஸ இத³ந்தி ஆஸப⁴ம், ஸேட்ட²ட்டா²னம். ஸப்³ப³ஞ்ஞுதபடிஜானனவஸேன அபி⁴முக²ம் க³ச்ச²ந்தி, அட்ட² வா பரிஸா உபஸங்கமந்தீதி ஆஸபா⁴, புப்³ப³பு³த்³தா⁴. இத³ம் பனாதி பு³த்³தா⁴னம் டா²னம் ஸப்³ப³ஞ்ஞுதமேவ வத³தி. திட்ட²மானோவாதி அவத³ந்தோபி திட்ட²மானோவ படிஜானாதி நாமாதி அத்தோ². உபக³ச்ச²தீதி அனுஜானாதி.

அட்ட²ஸு பரிஸாஸூதி ‘‘அபி⁴ஜானாமி கோ² பனாஹம், ஸாரிபுத்த, அனேகஸதம் க²த்தியபரிஸம் உபஸங்கமிதா…பே… ப்³ராஹ்மணபரிஸம் க³ஹபதிபரிஸம், ஸமணபரிஸம், சாதுமஹாராஜிகபரிஸம், தாவதிம்ஸபரிஸம், மாரபரிஸம், ப்³ரஹ்மபரிஸம் உபஸங்கமிதா, தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபஜ்ஜிதபுப்³பா³. தத்ர வத மம் ‘ப⁴யம் வா ஸாரஜ்ஜம் வா ஓக்கமிஸ்ஸதீ’தி நிமித்தமேதம், ஸாரிபுத்த, ந ஸமனுபஸ்ஸாமீ’’தி (ம. நி. 1.151) ஏவம் வுத்தபரிஸாஸு. அபீ⁴தனாத³ம் நத³தீதி பரதோ த³ஸ்ஸிதஞாணயோகே³ன விஸாரதோ³ அஹந்தி அபீ⁴தனாத³ம் நத³தி. ஸீஹனாத³ஸுத்தேனாதி க²ந்த⁴வக்³கே³ ஆக³தேன ஸீஹனாத³ஸுத்தேன.

‘‘தே³வமனுஸ்ஸானம் சதுசக்கம் வத்ததீ’’தி (அ. நி. 4.31) ஸுத்தஸேஸேன ஸப்புரிஸூபனிஸ்ஸயாதி³ப²லஸம்பத்திபவத்தி வுத்தா, புரிமஸப்புரிஸூபனிஸ்ஸயாதி³உபனிஸ்ஸயா பச்சி²மஸப்புரிஸூபனிஸ்ஸயாதி³ஸம்பத்திபவத்தி வா வுத்தா. ஆதி³-ஸத்³தே³ன தத்த² ச சக்கஸத்³த³ஸ்ஸ க³ஹணம் வேதி³தப்³ப³ம். விசக்கஸண்டா²னா அஸனி ஏவ அஸனிவிசக்கம். உரசக்காதீ³ஸூதி ஆதி³-ஸத்³தே³ன ஆணாஸமூஹாதீ³ஸுபி சக்கஸத்³த³ஸ்ஸ பவத்தி வேதி³தப்³பா³. ‘‘ஸங்க⁴பே⁴த³ம் கரிஸ்ஸாம சக்கபே⁴த³’’ந்திஆதீ³ஸு (பாரா. 409; சூளவ. 343) ஹி ஆணா ‘‘சக்க’’ந்தி வுத்தா. ‘‘தே³வசக்கம் அஸுரசக்க’’ந்திஆதீ³ஸு ஸமூஹோதி.

படிவேத⁴னிட்ட²த்தா அரஹத்தமக்³க³ஞாணம் படிவேதோ⁴தி ‘‘ப²லக்க²ணே உப்பன்னம் நாமா’’தி வுத்தம். தேன படிலத்³த⁴ஸ்ஸபி தே³ஸனாஞாணஸ்ஸ கிச்சனிப்ப²த்தி பரஸ்ஸ பு³ஜ்ஜ²னமத்தேன ஹோதீதி ‘‘அஞ்ஞாஸிகோண்ட³ஞ்ஞஸ்ஸ ஸோதாபத்தி…பே… ப²லக்க²ணே பவத்தம் நாமா’’தி வுத்தம். ததோ பரம் பன யாவ பரினிப்³பா³னா தே³ஸனாஞாணப்பவத்தி தஸ்ஸேவ பவத்திதஸ்ஸ த⁴ம்மசக்கஸ்ஸ டா²னந்தி வேதி³தப்³ப³ம்.

த³ஸ்ஸிதத⁴ம்மேஸூதி வுத்தத⁴ம்மேஸு. வசனமத்தமேவ ஹி தேஸம், ந பன த³ஸ்ஸனம் தாதி³ஸஸ்ஸேவ த⁴ம்மஸ்ஸ அபா⁴வதோ. ப⁴க³வதோ ஏவ வா ‘‘இமே த⁴ம்மா அனபி⁴ஸம்பு³த்³தோ⁴’’தி பரஸ்ஸ வசனவஸேன த³ஸ்ஸிதத⁴ம்மேஸு. ‘‘த⁴ம்மபடிஸம்பி⁴தா³’’திஆதீ³ஸு (விப⁴. 718-721) விய த⁴ம்ம-ஸத்³தோ³ ஹேதுபரியாயோதி ஆஹ ‘‘ஸஹத⁴ம்மேனாதி ஸஹேதுனா’’தி. ஹேதூதி ச உபபத்திஸாத⁴னஹேது வேதி³தப்³போ³, ந காரகோ, ஸம்பாபகோ வா. நிமித்தந்தி சோத³னாய காரணம். தத்த² சோத³கோ சோத³னம் கரோதீதி காரணம், த⁴ம்மோ சோத³னம் கரோதி ஏதேனாதி காரணம். தேனாஹ ‘‘புக்³க³லோபீ’’திஆதி³. கே²மந்தி கேனசி அப்படிபா³ஹியபா⁴வேன அனுபத்³து³தம்.

அந்தராயோ ஏதேஸம் அத்தி², அந்தராயே வா நியுத்தாதி அந்தராயிகா. ஏவம்பூ⁴தா பன தே யஸ்மா அந்தராயகரா நாம ஹோந்தி, தஸ்மா ஆஹ ‘‘அந்தராயம் கரோந்தீதி அந்தராயிகா’’தி. அஸஞ்சிச்ச வீதிக்கமே நாதிஸாவஜ்ஜாதி கத்வா வுத்தம் ‘‘ஸஞ்சிச்ச வீதிக்கந்தா’’தி. ஸத்த ஆபத்திக்க²ந்தா⁴திஆதி³ நித³ஸ்ஸனமத்தம் இதரேஸம்பி சதுன்னம் ‘‘அந்தராயிகா’’தி வுத்தத⁴ம்மானம் தப்³பா⁴வே ப்³யபி⁴சாராபா⁴வதோ. இத⁴ பன மேது²னத⁴ம்மோ அதி⁴ப்பேதோதி இத³ம் அட்டு²ப்பத்திவஸேன வுத்தம் அரிட்ட²ஸிக்கா²பத³ம் (பாசி. 417) விய. யஸ்மா தம்க²ணம்பி காமானம் ஆதீ³னவம் தி³ஸ்வா விரதோ ஹோதி சே, விஸேஸம் அதி⁴க³ச்ச²தி, ந காமேஸு ஆஸத்தோ, தஸ்மா வுத்தம் ‘‘மேது²ன…பே…அந்தராயோ ஹோதீ’’தி. தத்த² யஸ்ஸ கஸ்ஸசீதி ந கேவலம் பப்³ப³ஜிதஸ்ஸேவ, அத² கோ² யஸ்ஸ கஸ்ஸசி. ததா² ஹி வுத்தம் ‘‘மேது²னமனுயுத்தஸ்ஸ, முஸ்ஸதேவாபி ஸாஸன’’ந்தி (ஸு. நி. 820).

தஸ்மிம் அனிய்யானிகத⁴ம்மேதி தஸ்மிம் பரேஹி பரிகப்பிதஅனிய்யானிகத⁴ம்மனிமித்தம். நிமித்தத்தே² ஹி இத³ம் கம்மஸம்யோகே³ பு⁴ம்மம்.

உபனிப³த்³தா⁴தி விரசிதா. தேனாஹ ‘‘அபி⁴ஸங்க²தா’’தி. புது²பா⁴வந்தி ப³ஹுபா⁴வம். புதூ²ஹி வா ஸிதாதி ப³ஹூஹி ஸமணப்³ராஹ்மணேஹி ஸிதா உபனிப³த்³தா⁴.

வேஸாரஜ்ஜஸுத்தவண்ணனா நிட்டி²தா.