5. அனுஸோதஸுத்தவண்ணனா

5. பஞ்சமே அனுஸோதம் க³ச்ச²தீதி ஸம்ஸாரஸோதஸ்ஸ அனுகூலபா⁴வேன க³ச்ச²தி. பச்சனீகபடிபத்தியாதி ஸம்ஸாரஸோதஸ்ஸ படிகூலவஸேன பவத்தனிப்³பி³தா³னுபஸ்ஸனாதி³படிபத்தியா. டி²தஸபா⁴வோதி அசலப்பஸாதா³தி³ஸமன்னாக³மேன டி²தஸபா⁴வோ. அனாகா³மீ ஹி அஸ்ஸத்³தி⁴யேஹி காமராக³ப்³யாபாதே³ஹி அகம்பனியசித்ததாய தம்ஹா லோகா அனாவத்தித⁴ம்மதாய ச டி²தஸபா⁴வோ நாம. ஓக⁴ம் தரித்வாதி காமோகா⁴தி³சதுப்³பி³த⁴ம் ஓக⁴ம் அதிக்கமித்வா. பரதீரம் க³தோதி நிப்³பா³னபாரம் க³தோ. ப்³ராஹ்மணோதி பா³ஹிதபாபதாய ப்³ராஹ்மணோதி ஸங்க²ம் க³தோ கீ²ணாஸவோ. தேனாஹ ‘‘ஸேட்டோ² நித்³தோ³ஸோ’’தி. பஞ்சவேரகம்மந்தி பாணாதிபாதாதி³பஞ்சது³ச்சரிதம். ஸஹாபி து³க்கே²ன ஸஹாபி தோ³மனஸ்ஸேனாதி கிலேஸபரியுட்டா²னே ஸதி உப்பன்னேன து³க்க²தோ³மனஸ்ஸேன ஸத்³தி⁴ம்பி. பரிபுண்ணந்தி திஸ்ஸன்னம் ஸிக்கா²னம் ஏகாயபி அனூனம். பரிஸுத்³த⁴ந்தி நிருபக்கிலேஸம். ப்³ரஹ்மசரியந்தி ஸேட்ட²சரியம். இமினா வாரேன ஸோதாபன்னஸகதா³கா³மினோ கதி²தா. கிம் பன தே ருத³ந்தா ப்³ரஹ்மசரியம் சரந்தீதி? ஆம, கிலேஸரோத³னேன ரோத³ந்தா சரந்தி நாம, ஸீலஸம்பன்னோ புது²ஜ்ஜனபி⁴க்கு² ஏத்தே²வ ஸங்க³ஹிதோ.

சேதோவிமுத்திந்தி ப²லஸமாதி⁴ம். பஞ்ஞாவிமுத்திந்தி ப²லஞாணம். ச²ஹாகாரேஹி பாரக³தோதி அபி⁴ஞ்ஞாபாரகூ³, பரிஞ்ஞாபாரகூ³, பா⁴வனாபாரகூ³, பஹானபாரகூ³, ஸச்சி²கிரியாபாரகூ³, ஸமாபத்திபாரகூ³தி ஏவம் ச²ஹி ஆகாரேஹி ஸப்³ப³த⁴ம்மானம் பாரம் பரியோஸானம் க³தோ. ஸேஸமேத்த² ஸுவிஞ்ஞேய்யமேவ.

அனுஸோதஸுத்தவண்ணனா நிட்டி²தா.