8. ஜம்பா³லீஸுத்தவண்ணனா

178. அட்ட²மே ஸந்தந்தி அங்க³ஸந்ததாய சேவ ஆரம்மணஸந்ததாய ச கமனீயம் மனோஹரம். சேதோவிமுத்திந்தி ரூபாரூபாவசரம் சித்தவிமுத்திம். தேனேவாஹ ‘‘அட்ட²ன்னம் ஸமாபத்தீனம் அஞ்ஞதரம் ஸமாபத்தி’’ந்தி. லேபமக்கி²தேனாதி லாகா²மக்கி²தேன. பாரிபந்தி²கே அஸோதே⁴த்வாதி காமச்ச²ந்தா³தி³பாரிபந்தி²கே அஸோதே⁴த்வா. யோ ஹி காமாதீ³னவபச்சவேக்க²ணாதீ³ஹி காமச்ச²ந்த³ம் ந ஸுட்டு² விக்க²ம்பே⁴த்வா காயப்பஸ்ஸத்³தி⁴வஸேன து³ட்டு²ல்லம் ஸுப்படிப்பஸ்ஸத்³த⁴ம் அகத்வா ஆரம்ப⁴தா⁴துமனஸிகாராதி³வஸேன தி²னமித்³த⁴ம் ந ஸுட்டு² படிவினோதே³த்வா ஸமத²னிமித்தமனஸிகாராதி³வஸேன உத்³த⁴ச்சகுக்குச்சம் ந ஸமூஹதம் கத்வா அஞ்ஞேபி ஸமாதி⁴பரிபந்தே² த⁴ம்மே ந ஸுட்டு² ஸோதே⁴த்வா ஜா²னம் ஸமாபஜ்ஜதி. ஸோ அஸோதி⁴தம் ஆஸயம் பவிட்ட²ப⁴மரோ விய அஸுத்³த⁴ம் உய்யானம் பவிட்ட²ராஜா விய ச கி²ப்பமேவ நிக்க²மதி. யோ பன ஸமாதி⁴பரிபந்தே² த⁴ம்மே ஸுட்டு² விஸோதே⁴த்வா ஜா²னம் ஸமாபஜ்ஜதி, ஸோ ஸுவிஸோதி⁴தம் ஆஸயம் பவிட்ட²ப⁴மரோ விய ஸுபரிஸுத்³த⁴ம் உய்யானம் பவிட்ட²ராஜா விய ச ஸகலம்பி தி³வஸபா⁴க³ம் அந்தோஸமாபத்தியம்யேவ ஹோதி.

ஆயமுகா²னீதி நதி³தளாககந்த³ரபத³ராதி³தோ ஆக³மனமக்³கா³. தே ச கந்த³ராயேவாதி ஆஹ ‘‘சதஸ்ஸோ பவிஸனகந்த³ரா’’தி. அபாயமுகா²னீதி அபக³மனமக்³கா³. அபேந்தி அபக³ச்ச²ந்தி ஏதேஹீதி ஹி அபாயா, தே ஏவ முகா²னீதி அபாயமுகா²னி. தானி ச உத³கனிக்க²மனச்சி²த்³தா³னீதி ஆஹ ‘‘அபவாஹனச்சி²த்³தா³னீ’’தி, அபாயஸங்கா²தானி உத³கனிக்க²மனச்சி²த்³தா³னீதி அத்தோ². ஸேஸம் ஸுவிஞ்ஞேய்யமேவ.

ஜம்பா³லீஸுத்தவண்ணனா நிட்டி²தா.