9. ஸஸங்கா²ரஸுத்தவண்ணனா

169. நவமே ஸஸங்கா²ரேன து³க்கே²ன கஸிரேன அதி⁴மத்தபயோக³ம் கத்வாவ கிலேஸபரினிப்³பா³னத⁴ம்மோதி ஸஸங்கா²ரபரினிப்³பா³யீ. அஸங்கா²ரேன அப்பயோகே³ன அதி⁴மத்தபயோக³ம் அகத்வாவ கிலேஸபரினிப்³பா³னத⁴ம்மோதி அஸங்கா²ரபரினிப்³பா³யீ. த⁴ம்மானுஸாரீ புக்³க³லோ ஹி ஆக³மனம்ஹி கிலேஸே விக்க²ம்பே⁴ந்தோ அப்பது³க்கே²ன அகஸிரேன அகிலமந்தோவ விக்க²ம்பே⁴தும் ஸக்கோதி. ஸத்³தா⁴னுஸாரீ புக்³க³லோ பன து³க்கே²ன கஸிரேன கிலமந்தோ ஹுத்வா விக்க²ம்பே⁴தும், தஸ்மா த⁴ம்மானுஸாரிஸ்ஸ புப்³ப³பா⁴க³மக்³க³க்க²ணே கிலேஸச்சே²த³கம் ஞாணம் அத³ந்த⁴ம் திகி²ணம் ஸூரம் ஹுத்வா வஹதி. யதா² நாம திகி²ணேன அஸினா கத³லிம் சி²ந்த³ந்தஸ்ஸ சி²ன்னட்டா²னம் மட்ட²ம் ஹோதி, அதிஸீக⁴ம் வஹதி, ஸத்³தோ³ ந ஸுய்யதி, ப³லவவாயாமகிச்சம் ந ஹோதி, ஏவரூபா த⁴ம்மானுஸாரினோ புப்³ப³பா⁴க³பா⁴வனா ஹோதி. ஸத்³தா⁴னுஸாரினோ பன புப்³ப³பா⁴க³க்க²ணே கிலேஸச்சே²த³கம் ஞாணம் த³ந்த⁴ம் அதிகி²ணம் அஸூரம் ஹுத்வா வஹதி. யதா² நாம குண்டே²ன அஸினா கத³லிம் சி²ந்த³ந்தஸ்ஸ சி²ன்னட்டா²னம் ந மட்ட²ம் ஹோதி, அதிஸீக⁴ம் ந வஹதி, ஸத்³தோ³ ஸுய்யதி, ப³லவவாயாமகிச்சம் இச்சி²தப்³ப³ம் ஹோதி, ஏவரூபா ஸத்³தா⁴னுஸாரினோ புப்³ப³பா⁴க³பா⁴வனா ஹோதி. ஏவம் ஸந்தேபி நேஸம் கிலேஸக்க²யே நானத்தம் நத்தி², அனவஸேஸாவ கிலேஸா கீ²யந்தி.

ஸஸங்கா²ரஸுத்தவண்ணனா நிட்டி²தா.