10. யுக³னத்³த⁴ஸுத்தவண்ணனா

170. த³ஸமே ஸமத²புப்³ப³ங்க³மம் விபஸ்ஸனம் பா⁴வேதீதி இத³ம் ஸமத²யானிகஸ்ஸ வஸேன வுத்தம். ஸோ ஹி பட²மம் உபசாரஸமாதி⁴ம் வா அப்பனாஸமாதி⁴ம் வா உப்பாதே³தி, அயம் ஸமதோ². ஸோ தஞ்ச தம்ஸம்பயுத்தே ச த⁴ம்மே அனிச்சாதீ³ஹி விபஸ்ஸதி, அயம் விபஸ்ஸனா, இதி பட²மம் ஸமதோ², பச்சா² விபஸ்ஸனா. தேன வுச்சதி ‘‘ஸமத²புப்³ப³ங்க³மம் விபஸ்ஸனம் பா⁴வேதீ’’தி. விபஸ்ஸனாபுப்³ப³ங்க³மம் ஸமத²ம் பா⁴வேதீதி இத³ம் பன விபஸ்ஸனாயானிகஸ்ஸ வஸேன வுத்தம். ஸோ தம் வுத்தப்பகாரம் ஸமத²ம் அஸம்பாதே³த்வா பஞ்சுபாதா³னக்க²ந்தே⁴ அனிச்சாதீ³ஹி விபஸ்ஸதி. பட²மோ லோகுத்தரமக்³கோ³ நிப்³ப³த்ததீதி ஸோதாபத்திமக்³க³ம் ஸந்தா⁴ய வத³தி, லோகியமக்³க³வஸேனேவ வா இமிஸ்ஸா பாளியா அத்தோ² வேதி³தப்³போ³. கத²ம்? மக்³கோ³ ஸஞ்ஜாயதி, புப்³ப³பா⁴கி³யோ லோகியமக்³கோ³ உப்பஜ்ஜதி. ஆஸேவதி நிப்³பி³தா³னுபஸ்ஸனாவஸேன. பா⁴வேதி முச்சிதுகம்யதாவஸேன. ப³ஹுலீகரோதி படிஸங்கா²னுபஸ்ஸனாவஸேன. ஆஸேவதி வா ப⁴யதுபட்டா²னாதி³ஞாணவஸேன. பா⁴வேதி முச்சிதுகம்யதாதி³ஞாணவஸேன. ப³ஹுலீகரோதி வுட்டா²னகா³மினிவிபஸ்ஸனாவஸேன. ஸம்யோஜனானி பஹீயந்தி. அனுஸயா ப்³யந்தீ ஹோந்தீதி மக்³க³ப்படிபாடியா பஹீயந்தி ப்³யந்தீ ஹோந்தி.

த⁴ம்முத்³த⁴ச்சவிக்³க³ஹிதமானஸந்தி ஓபா⁴ஸாதீ³ஸு அரியத⁴ம்மோதி பவத்தம் உத்³த⁴ச்சம் விக்கே²போ த⁴ம்முத்³த⁴ச்சம், தேன த⁴ம்முத்³த⁴ச்சேன விபஸ்ஸனாவீதி²தோ உக்³க³மனேன விரூபம் க³ஹிதம் பவத்தியமானம் த⁴ம்முத்³த⁴ச்சவிக்³க³ஹிதமானஸம். வுத்தஞ்ஹேதம் –

‘‘த⁴ம்முத்³த⁴ச்சவிக்³க³ஹிதமானஸம் ஹோதி, அனிச்சதோ மனஸி கரோதி, ஓபா⁴ஸோ உப்பஜ்ஜதி, ஓபா⁴ஸோ த⁴ம்மோதி ஓபா⁴ஸம் ஆவஜ்ஜதி, ததோ விக்கே²போ உத்³த⁴ச்சம், தேன உத்³த⁴ச்சேன விக்³க³ஹிதமானஸோ அனிச்சதோ உபட்டா²னம் யதா²பூ⁴தம் நப்பஜானாதி. து³க்க²தோ…பே… அனத்ததோ உபட்டா²னம் யதா²பூ⁴தம் நப்பஜானாதி. ததா² அனிச்சதோ மனஸிகரோதோ ஞாணம் உப்பஜ்ஜதி…பே… பீதி பஸ்ஸத்³தி⁴ ஸுக²ம் அதி⁴மோக்கோ² பக்³க³ஹோ உபட்டா²னம் உபேக்கா² நிகந்தி உப்பஜ்ஜதி, நிகந்தி த⁴ம்மோதி நிகந்திம் ஆவஜ்ஜதி, ததோ விக்கே²போ உத்³த⁴ச்சம், தேன உத்³த⁴ச்சேன விக்³க³ஹிதமானஸோ அனிச்சதோ உபட்டா²னம் யதா²பூ⁴தம் நப்பஜானாதி. து³க்க²தோ…பே… அனத்ததோ உபட்டா²னம் யதா²பூ⁴தம் நப்பஜானாதீ’’தி (படி. ம. 2.6). ஸேஸமேத்த² உத்தானமேவ.

யுக³னத்³த⁴ஸுத்தவண்ணனா நிட்டி²தா.

படிபதா³வக்³க³வண்ணனா நிட்டி²தா.