7-8. மஹாமோக்³க³ல்லானஸுத்தாதி³வண்ணனா

167-168. ஸத்தமட்ட²மேஸு மஹாமோக்³க³ல்லானத்தே²ரஸ்ஸாதிஆதி³னா மோக்³க³ல்லானத்தே²ரஸ்ஸ ஹேட்டா² திண்ணம் மக்³கா³னம் ஸுக²படிபத³த³ந்தா⁴பி⁴ஞ்ஞபா⁴வோ, அரஹத்தமக்³க³ஸ்ஸ து³க்க²படிபத³கி²ப்பாபி⁴ஞ்ஞபா⁴வோ வுத்தோ, ஸாரிபுத்தத்தே²ரஸ்ஸ பன ஹேட்டி²மானம் திண்ணம் மக்³கா³னம் ஸுக²படிபத³த³ந்தா⁴பி⁴ஞ்ஞபா⁴வோ, அரஹத்தமக்³க³ஸ்ஸ ச ஸுக²படிபத³கி²ப்பாபி⁴ஞ்ஞபா⁴வோ த³ஸ்ஸிதோ. யம் பன வுத்தம் விஸுத்³தி⁴மக்³கே³ (விஸுத்³தி⁴. 2.801) ‘‘பு³த்³தா⁴னம் பன சத்தாரோபி மக்³கா³ ஸுக²படிபத³கி²ப்பாபி⁴ஞ்ஞாவ அஹேஸும், ததா² த⁴ம்மஸேனாபதிஸ்ஸ. மஹாமோக்³க³ல்லானத்தே²ரஸ்ஸ பன பட²மமக்³கோ³ ஸுக²படிபத³கி²ப்பாபி⁴ஞ்ஞோ அஹோஸி, உபரி தயோ து³க்க²படிபத³த³ந்தா⁴பி⁴ஞ்ஞா’’தி. யஞ்ச வுத்தம் அட்ட²ஸாலினியம் (த⁴. ஸ. அட்ட². 1476) ‘‘ததா²க³தஸ்ஸ ஹி ஸாரிபுத்தத்தே²ரஸ்ஸ ச சத்தாரோபி மக்³கா³ ஸுக²படிபத³கி²ப்பாபி⁴ஞ்ஞாவ அஹேஸும், மஹாமோக்³க³ல்லானத்தே²ரஸ்ஸ பன பட²மமக்³கோ³ ஸுக²படிபத³கி²ப்பாபி⁴ஞ்ஞோ உபரி தயோ து³க்க²படிபத³கி²ப்பாபி⁴ஞ்ஞா’’தி, தம் ஸப்³ப³ம் அஞ்ஞமஞ்ஞம் நானுலோமேதி. இமாய பாளியா இமாய ச அட்ட²கதா²ய ந ஸமேதி, தஸ்மா வீமம்ஸிதப்³ப³மேதம். தம்தம்பா⁴ணகானம் வா மதேன தத்த² தத்த² ததா² ததா² வுத்தந்தி க³ஹேதப்³ப³ம்.

மஹாமோக்³க³ல்லானஸுத்தாதி³வண்ணனா நிட்டி²தா.