(13) 3. ப⁴யவக்³கோ³

1. அத்தானுவாத³ஸுத்தவண்ணனா

121. ததியஸ்ஸ பட²மே அத்தானம் அனுவத³ந்தஸ்ஸ உப்பஜ்ஜனகப⁴யந்தி அத்தானம் அனுவத³ந்தஸ்ஸ பாபகம்மினோ உப்பஜ்ஜனகப⁴யம். த்³வத்திம்ஸகம்மகாரணே படிச்ச உப்பஜ்ஜனகப⁴யந்தி அகா³ரிகானம் வஸேன வுத்தம், அனகா³ரிகானம் பன வினயத³ண்ட³ம் படிச்ச உப்பஜ்ஜனகப⁴யம்பி த³ண்ட³ப⁴யந்தேவ ஸங்க²ம் க³ச்ச²தி. ஸேஸம் ஸுவிஞ்ஞேய்யமேவ.

அத்தானுவாத³ஸுத்தவண்ணனா நிட்டி²தா.

2. ஊமிப⁴யஸுத்தவண்ணனா

122. து³தியே கோதூ⁴பாயாஸஸ்ஸேதம் அதி⁴வசனந்தி ஏத்த² குஜ்ஜ²னட்டே²ன கோதோ⁴, ஸ்வேவ சித்தஸ்ஸ காயஸ்ஸ ச அதிப்பமத்³த³னமத²னுப்பாத³னேஹி த³ள்ஹஆயாஸட்டே²ன உபாயாஸோ. அனேகவாரம் பவத்தித்வா அத்தனா ஸமவேதம் ஸத்தம் அஜ்ஜோ²த்த²ரித்வா ஸீஸம் உக்கி²பிதும் அத³த்வா ஊமிஸதி³ஸதா த³ட்ட²ப்³பா³. யதா² ஹி பா³ஹிரம் உத³கம் ஓதிண்ணோ ஊமீஸு ஓஸீதி³த்வா மரதி, ஏவம் இமஸ்மிம் ஸாஸனே கோதூ⁴பாயாஸே ஓஸீதி³த்வா விப்³ப⁴மதி, தஸ்மா கோதூ⁴பாயாஸோ ‘‘ஊமிப⁴ய’’ந்தி வுத்தோ. ஓத³ரிகத்தஸ்ஸேதம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ கும்பீ⁴லேன கா²தி³தோ மரதி, ஏவம் இமஸ்மிம் ஸாஸனே ஓத³ரிகத்தேன ஓத³ரிகபா⁴வேன ஆமிஸகே³தே⁴ன மிச்சா²ஜீவேன ஜீவிககப்பனேன நாஸிதஸீலாதி³கு³ணதாய கா²தி³தத⁴ம்மஸரீரோ விப்³ப⁴மதி, தஸ்மா ஓத³ரிகத்தம் ‘‘கும்பீ⁴லப⁴ய’’ந்தி வுத்தம்.

அனுபட்டி²தாய ஸதியாதி காயக³தம் ஸதிம் அனுட்டா²பேத்வா. அஸம்வுதேஹீதி அபிஹிதேஹி. பஞ்சன்னேதம் காமகு³ணானம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ ஆவட்டே நிமுஜ்ஜித்வா மரதி, ஏவம் இமஸ்மிம் ஸாஸனே பப்³ப³ஜிதோ பஞ்சகாமகு³ணாவட்டே நிமுஜ்ஜித்வா விப்³ப⁴மதி. காமராகா³பி⁴பூ⁴தோ ஹி ஸத்தோ இதோ ச ஏத்தோ, ஏத்தோ ச இதோதி ஏவம் மனாபியரூபாதி³விஸயஸங்கா²தே ஆவட்டே அத்தானம் ஸம்ஸாரேத்வா யதா² ததோ ப³ஹிபூ⁴தே நேக்க²ம்மே சித்தம்பி ந உப்பாதே³தி, ஏவம் ஆவட்டேத்வா ப்³யஸனாபாத³னேன காமகு³ணானம் ஆவட்டஸதி³ஸதா த³ட்ட²ப்³பா³.

அனுத்³த⁴ம்ஸேதீதி கிலமேதி விலோலதி. ராகா³னுத்³த⁴ம்ஸிதேனாதி ராகே³ன அனுத்³த⁴ம்ஸிதேன. மாதுகா³மஸ்ஸேதம் அதி⁴வசனந்தி. யதா² ஹி பா³ஹிரம் உத³கம் ஓதிண்ணோ சண்ட³மச்ச²ம் ஆக³ம்ம லத்³த⁴ப்பஹாரோ மரதி, ஏவம் இமஸ்மிம் ஸாஸனே மாதுகா³மம் ஆரப்³ப⁴ உப்பன்னகாமராகோ³ விப்³ப⁴மதி, தஸ்மா மாதுகா³மோ ‘‘ஸுஸுகாப⁴ய’’ந்தி வுத்தோ. மாதுகா³மோ ஹி யோனிஸோமனஸிகாரரஹிதம் அதீ⁴ரபுரிஸம் இத்தி²குத்தபூ⁴தேஹி அத்தனோ ஹாஸபா⁴வவிலாஸேஹி அபி⁴பு⁴ய்ய க³ஹேத்வா தீ⁴ரஜாதிகம்பி அத்தனோ ரூபாதீ³ஹி ஸம்பலோப⁴னவஸேன அனவஸேஸம் அத்தனோ உபகாரத⁴ம்மே ஸீலாதி³கே ஸம்பாதே³தும் அஸமத்த²ம் கரோந்தோ அனயப்³யஸனம் பாபேதி.

இமானி பன சத்தாரி ப⁴யானி பா⁴யித்வா யதா² உத³கம் அனோரோஹந்தஸ்ஸ உத³கம் நிஸ்ஸாய உத³கபிபாஸாவினயனம் ஸரீரஸுத்³தி⁴பரிளாஹூபஸமோ காயஉதுக்³கா³ஹாபனந்தி, ஏவமாதி³ ஆனிஸம்ஸோ நத்தி², ஏவமேவம் இமானி சத்தாரி ப⁴யானி பா⁴யித்வா ஸாஸனே அபப்³ப³ஜந்தஸ்ஸபி இமம் ஸாஸனம் நிஸ்ஸாய ஸங்கே²பதோ வட்டது³க்கூ²பஸமோ, வித்தா²ரதோ பன ஸீலானிஸம்ஸாதி³வஸேன அனேகவிதோ⁴ ஆனிஸம்ஸோ நத்தி². யதா² பன இமானி சத்தாரி ப⁴யானி அபா⁴யித்வா உத³கம் ஓரோஹந்தஸ்ஸ வுத்தப்பகாரோ ஆனிஸம்ஸோ ஹோதி, ஏவம் இமானி அபா⁴யித்வா ஸாஸனே பப்³ப³ஜந்தஸ்ஸபி வுத்தப்பகாரோ ஆனிஸம்ஸோ ஹோதி. மஹாத⁴ம்மரக்கி²தத்தே²ரோ பனாஹ ‘‘சத்தாரி ப⁴யானி பா⁴யித்வா உத³கம் அனோதரந்தோ ஸோதம் சி²ந்தி³த்வா பரதீரம் பாபுணிதும் ந ஸக்கோதி, அபா⁴யித்வா ஓதரந்தோ ஸக்கோதி, ஏவமேவம் பா⁴யித்வா ஸாஸனே அபப்³ப³ஜந்தோபி தண்ஹாஸோதம் சி²ந்தி³த்வா நிப்³பா³னபாரம் த³ட்டு²ம் ந ஸக்கோதி, அபா⁴யித்வா பப்³ப³ஜந்தோ ஸக்கோதீ’’தி.

ஊமிப⁴யஸுத்தவண்ணனா நிட்டி²தா.

3. பட²மனானாகரணஸுத்தவண்ணனா

123. ததியே ப்³ரஹ்மகாயிகானம் தே³வானந்தி ஏத்த² ப்³ரஹ்மானம் காயோ ஸமூஹோதி ப்³ரஹ்மகாயோ, தப்பரியாபன்னதாய தத்த² க³தாதி ப்³ரஹ்மகாயிகா. ஏதாய ச ஸப்³ப³ஸ்ஸபி ப்³ரஹ்மகாயஸ்ஸ ஸமஞ்ஞாய ப⁴விதப்³ப³ம். ஆப⁴ஸ்ஸரானம் தே³வானந்திஆதி³னா பன து³தியஜ்ஜா²னபூ⁴மிகாதீ³னம் உபரி க³ஹிதத்தா கோ³ப³லீப³த்³த³ஞ்ஞாயேன தத³வஸிட்டா²னம் அயம் ஸமஞ்ஞா, தஸ்மா ‘‘ப்³ரஹ்மகாயிகானம் தே³வான’’ந்தி பட²மஜ்ஜா²னபூ⁴மிகானம்யேவ க³ஹணம் வேதி³தப்³ப³ம். ஸஹ ப்³யயதி க³ச்ச²தீதி ஸஹப்³யோ, ஸஹவத்தனகோ. தஸ்ஸ பா⁴வோ ஸஹப்³யதா, ஸஹபவத்தீதி ஆஹ ‘‘ஸஹபா⁴வம் உபக³ச்ச²தீ’’தி. கப்போ ஆயுப்பமாணந்தி ஏத்த² யதி³பி ப்³ரஹ்மபாரிஸஜ்ஜாதீ³னம் ஆயுனோ அந்தரம் அத்தி², உக்கட்ட²பரிச்சே²தே³ன பனேதம் வுத்தந்தி த³ஸ்ஸேந்தோ ‘‘பட²மஜ்ஜா²னம் அத்தி² ஹீன’’ந்திஆதி³மாஹ.

த்³வே கப்பா ஆயுப்பமாணந்தி ஏத்த² பன ஹீனஜ்ஜா²னேன நிப்³ப³த்தானம் வஸேன அயம் பரிச்சே²தோ³ கதோதி த³ஸ்ஸேதும் ‘‘து³தியஜ்ஜா²னம் வுத்தனயேனேவ திவித⁴ம் ஹோதீ’’திஆதி³ ஆரத்³த⁴ம். சத்தாரோ கப்பாதி ஏத்த² பன உக்கட்ட²பரிச்சே²தே³ன சதுஸட்டி² கப்பா வத்தப்³பா³தி த³ஸ்ஸேந்தோ ‘‘யம் ஹேட்டா² வுத்தம் ‘கப்போ த்³வே கப்பா’தி, கம்பி ஆஹரித்வா அத்தோ² வேதி³தப்³போ³’’தி ஆஹ. கத²ம் பனேத்த² அயமத்தோ² லப்³ப⁴தீதி ஆஹ ‘‘கப்போதி ச கு³ணஸ்ஸபி நாம’’ந்தி. தத்த² பட²மம் வுத்தோ கப்போ, ததோ ஏகேன கு³ணேன, ஏகஸ்மிம் வாரே க³ணனாயாதி அத்தோ². த்³வே கப்பா ஹோந்தீதி ஏகவாரக³ணனாய கப்பஸ்ஸ த்³விகு³ணிதத்தா த்³வே மஹாகப்பா ஹோந்தீதி அத்தோ². து³தியேனாதி து³தியவாரக³ணனாய. சத்தாரோதி து³தியவாரக³ணனாய த்³வீஸு கப்பேஸு த்³விகு³ணிதேஸு சத்தாரோ மஹாகப்பா ஹோந்தீதி அத்தோ². புன தே சத்தாரோ கப்பாதி வுத்தனயேன த்³வே வாரே கு³ணேத்வா யே சத்தாரோ கப்பா த³ஸ்ஸிதா, புன தே சத்தாரோ கப்பா சதுக்³கு³ணா ஹோந்தீதி அத்தோ². இத³ம் வுத்தம் ஹோதி – த்³வே வாரே கு³ணேத்வா யே சத்தாரோ கப்பா த³ஸ்ஸிதா, தேஸு சதுக்க²த்தும் கு³ணிதேஸு சதுஸட்டி² கப்பா ஸம்பஜ்ஜந்தீதி. ததா² ஹி சத்தாரோ ஏகஸ்மிம் வாரே கு³ணிதா அட்ட² ஹோந்தி, புன தே அட்ட² து³தியவாரே கு³ணிதா ஸோளஸ ஹோந்தி, புன தே ஸோளஸ ததியவாரே கு³ணிதா த்³வத்திம்ஸ ஹோந்தி, புன தே த்³வத்திம்ஸ சதுத்த²வாரே கு³ணிதா சதுஸட்டி² ஹோந்தி. தேனேவாஹ ‘‘இமேஹி சதூஹி கு³ணேஹி கு³ணிதா ஏகேன கு³ணேன அட்ட² ஹோந்தீ’’திஆதி³. ஏத்த² ச ஹேட்டா² உபோஸத²ஸுத்தே (அ. நி. 3.71) –

‘‘யானி மானுஸகானி பஞ்ஞாஸ வஸ்ஸானி, சாதுமஹாராஜிகானம் தே³வானம் ஏஸோ ஏகோ ரத்திந்தி³வோ’’தி –

ஆதி³னா காமாவசரதே³வானமேவ ஆயுப்பமாணம் த³ஸ்ஸிதம். ஹேட்டா²யேவ –

‘‘தயோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, பி⁴க்க²வே, ஏகச்சோ புக்³க³லோ ஸப்³ப³ஸோ ரூபஸஞ்ஞானம் ஸமதிக்கமா…பே… ஆகாஸானஞ்சாயதனூபகா³னம் தே³வானம் ஸஹப்³யதம் உபபஜ்ஜதி. ஆகாஸானஞ்சாயதனூபகா³னம், பி⁴க்க²வே, தே³வானம் வீஸதி கப்பஸஹஸ்ஸானி ஆயுப்பமாண’’ந்தி (அ. நி. 3.117) –

ஆதி³னா அரூபாவசரானம்யேவ ஆயுப்பமாணம் வுத்தம். இத⁴ பன ரூபாவசரானமேவ ஆயுப்பமாணம் த³ஸ்ஸிதம். விப⁴ங்க³பாளியம் (விப⁴. 1022) பன ‘‘மனுஸ்ஸானம் கித்தகம் ஆயுப்பமாணம், வஸ்ஸஸதம் அப்பம் வா பி⁴ய்யோ’’திஆதி³னா தே³வமனுஸ்ஸானஞ்சேவ ரூபாரூபாவசரஸத்தானஞ்ச ஆயுப்பமாணம் த³ஸ்ஸிதம்.

தத்த² ஸம்மாஸம்பு³த்³தே⁴ன மனுஸ்ஸானம் தே³வானஞ்ச ஆயும் பரிச்சி²ந்த³மானேன சதூஸு அபாயேஸு பு⁴ம்மதே³வேஸு ச ஆயு ந பரிச்சி²ன்னம். தம் கஸ்மாதி? நிரயே தாவ கம்மமேவ பமாணம். யாவ கம்மம் ந கீ²யதி, தாவ பச்சந்தி. ததா² ஸேஸஅபாயேஸு. பு⁴ம்மதே³வானம்பி கம்மமேவ பமாணம். தத்த² நிப்³ப³த்தா ஹி கேசி ஸத்தாஹமத்தம் திட்ட²ந்தி, கேசி அட்³ட⁴மாஸம், கப்பம் திட்ட²மானாபி அத்தி²யேவ. தத்த² மனுஸ்ஸேஸு கி³ஹிபா⁴வே டி²தாயேவ ஸோதாபன்னாபி ஹோந்தி, ஸகதா³கா³மிப²லம் அனாகா³மிப²லம் அரஹத்தம்பி பாபுணந்தி, தேஸு ஸோதாபன்னாத³யோ யாவஜீவம் திட்ட²ந்தி, கீ²ணாஸவா பன பரினிப்³பா³யந்தி வா பப்³ப³ஜந்தி வா. கஸ்மா? அரஹத்தம் நாம ஸேட்ட²கு³ணம், கி³ஹிலிங்க³ம் ஹீனம், தம் ஹீனதாய உத்தமம் கு³ணம் தா⁴ரேதும் ந ஸக்கோதி, தஸ்மா தே பரினிப்³பா³துகாமா வா ஹோந்தி பப்³ப³ஜிதுகாமா வா. பு⁴ம்மதே³வா பன அரஹத்தம் பத்தாபி யாவஜீவம் திட்ட²ந்தி, ச²ஸு காமாவசரேஸு தே³வேஸு ஸோதாபன்னஸகதா³கா³மினோ யாவஜீவம் திட்ட²ந்தி, அனாகா³மினா ரூபப⁴வம் க³ந்தும் வட்டதி கீ²ணாஸவேன பரினிப்³பா³தும். கஸ்மா? நிலீயனோகாஸஸ்ஸ அபா⁴வா. ரூபாவசராரூபாவசரேஸு ஸப்³பே³பி யாவஜீவம் திட்ட²ந்தி, தத்த² ரூபாவசரே நிப்³ப³த்தா ஸோதாபன்னஸகதா³கா³மினோ ந புன இதா⁴க³ச்ச²ந்தி, தத்தே²வ பரினிப்³பா³யந்தி. ஏதே ஹி ஜா²னஅனாகா³மினோ நாம.

அட்ட²ஸமாபத்திலாபீ⁴னம் பன கிம் நியமேதி? பகு³ணஜ்ஜா²னம். யதே³வஸ்ஸ பகு³ணம் ஹோதி, தேன உபபஜ்ஜதி. ஸப்³பே³ஸு பகு³ணேஸு கிம் நியமேதி? நேவஸஞ்ஞானாஸஞ்ஞாயதனஸமாபத்தி. ஏகம்ஸேனேவ ஹி ஸோ நேவஸஞ்ஞானாஸஞ்ஞாயதனே உபபஜ்ஜதி. நவஸு ப்³ரஹ்மலோகேஸு நிப்³ப³த்தஅரியஸாவகானம் தத்ரூபபத்திபி உபரூபபத்திபி, ந ஹேட்டூ²பபத்தி. புது²ஜ்ஜனானம் பன தத்ரூபபத்திபி ஹோதி, உபரூபபத்திபி, ஹேட்டூ²பபத்திபி. பஞ்சஸு ஸுத்³தா⁴வாஸேஸு சதூஸு ச அரூபேஸு அரியஸாவகானம் தத்ரூபபத்திபி ஹோதி உபரூபபத்திபி. பட²மஜ்ஜா²னபூ⁴மியம் நிப்³ப³த்தோ அனாகா³மீ நவ ப்³ரஹ்மலோகே ஸோதே⁴த்வா மத்த²கே டி²தோ பரினிப்³பா³தி. வேஹப்ப²லம், அகனிட்ட²ம், நேவஸஞ்ஞானாஸஞ்ஞாயதனந்தி இமே தயோ தே³வலோகா ஸேட்ட²ப⁴வா நாம. இமேஸு தீஸு டா²னேஸு நிப்³ப³த்தஅனாகா³மினோ நேவ உத்³த⁴ம் க³ச்ச²ந்தி, ந அதோ⁴, தத்த² தத்தே²வ பரினிப்³பா³யந்தீதி இத³ம் பகிண்ணகம் வேதி³தப்³ப³ம்.

பட²மனானாகரணஸுத்தவண்ணனா நிட்டி²தா.

4-6. து³தியனானாகரணஸுத்தாதி³வண்ணனா

124-6. சதுத்தே² தே த⁴ம்மேதி தே ‘‘ரூபக³த’’ந்திஆதி³னா நயேன வுத்தே ரூபாத³யோ த⁴ம்மே. அனிச்சதோதி இமினா நிச்சப்படிக்கே²பதோ தேஸம் அனிச்சதமாஹ, ததோ ஏவ ச உத³யவயவந்ததோ விபரிணாமதோ தாவகாலிகதோ ச தே அனிச்சாதி ஜோதிதம் ஹோதி. யஞ்ஹி நிப்³ப³த்தம் ஹோதி, தம் உத³யவயபரிச்சி²ன்னம். ஜராய மரணேன ச ததே³வ விபரீதம், இத்தரக்க²ணமேவ ச ஹோதீதி. து³க்க²தோதி இமினா ஸுக²ப்படிக்கே²பதோ தேஸம் து³க்க²தமாஹ. ததோ ஏவ ச அபி⁴ண்ஹப்படிபீளனதோ து³க்க²வத்து²தோ ச தே து³க்கா²தி ஜோதிதம் ஹோதி. உத³யவயவந்ததாய ஹி தே அபி⁴ண்ஹப்படிபீளனதோ நிரந்தரது³க்க²தாய து³க்க²ஸ்ஸேவ ச அதி⁴ட்டா²னபூ⁴தா. பச்சயயாபனீயதாய ரோக³மூலதாய ச ரோக³தோ. து³க்க²தாஸூலயோக³தோ கிலேஸாஸுசிபக்³க⁴ரணதோ உப்பாத³ஜராப⁴ங்கே³ஹி உத்³து⁴மாதபரிபக்கபபி⁴ன்னதோ ச க³ண்ட³தோ. பீளாஜனனதோ, அந்தோதுத³னதோ, து³ன்னீஹரணதோ ச ஸல்லதோ. அவட்³டி⁴ஆவஹனதோ அக⁴வத்து²தோ ச அக⁴தோ. அஸேரிபா⁴வஜனனதோ ஆபா³த⁴பத³ட்டா²னதாய ச ஆபா³த⁴தோ. அவஸவத்தனதோ அவிதே⁴ய்யதாய ச பரதோ. ப்³யாதி⁴ஜராமரணேஹி பலுஜ்ஜனீயதாய பலோகதோ. ஸாமினிவாஸிகாரகவேத³கஅதி⁴ட்டா²யகவிரஹதோ ஸுஞ்ஞதோ. அத்தப்படிக்கே²பட்டே²ன அனத்ததோ. ரூபாதி³த⁴ம்மா ஹி ந ஏத்த² அத்தா அத்தீ²தி அனத்தா. ஏவம் ஸயம்பி அத்தா ந ஹோந்தீதி அனத்தா. தேன அப்³யாபாரதோ நிரீஹதோ துச்ச²தோ அனத்தாதி தீ³பிதம் ஹோதி. லக்க²ணத்தயமேவ ஸுகா²வபோ³த⁴னத்த²ம் ஏகாத³ஸஹி பதே³ஹி விப⁴ஜித்வா க³ஹிதந்தி த³ஸ்ஸேதும் ‘‘தத்தா²’’திஆதி³ வுத்தம். பஞ்சமச²ட்டா²னி உத்தானத்தா²னேவ.

து³தியனானாகரணஸுத்தாதி³வண்ணனா நிட்டி²தா.

7. பட²மததா²க³தஅச்ச²ரியஸுத்தவண்ணனா

127. ஸத்தமே வத்தமானஸமீபே வத்தமானே விய வோஹரிதப்³ப³ந்தி ‘‘ஓக்கமதீ’’தி ஆஹ ‘‘ஓக்கந்தோ ஹோதீதி அத்தோ²’’தி. த³ஸஸஹஸ்ஸசக்கவாளபத்த²ரணோ ஸமுஜ்ஜலபா⁴வேன உளாரோ. தே³வானுபா⁴வந்தி தே³வானம் பபா⁴னுபா⁴வம். தே³வானஞ்ஹி பப⁴ம் ஸோ ஓபா⁴ஸோ அதி⁴ப⁴வதி, ந தே³வே. தேனாஹ ‘‘தே³வான’’ந்திஆதி³. ருக்க²க³ச்சா²தி³னா கேனசி ந ஹஞ்ஞதீதி அகா⁴, அஸம்பா³தா⁴. தேனாஹ ‘‘நிச்சவிவரா’’தி. அஸம்வுதாதி ஹேட்டா² உபரி கேனசி அபிஹிதா. தேனாஹ ‘‘ஹேட்டா²பி அப்பதிட்டா²’’தி. தத்த² பி-ஸத்³தே³ன யதா² ஹேட்டா² உத³கஸ்ஸ பிதா⁴யிகா ஸந்தா⁴ரிகா பத²வீ நத்தி² அஸம்வுதா லோகந்தரிகா, ஏவம் உபரிபி சக்கவாளேஸு தே³வவிமானானம் அபா⁴வதோ அஸம்வுதா அப்பதிட்டா²தி த³ஸ்ஸேதி. அந்த⁴காரோ ஏத்த² அத்தீ²தி அந்த⁴காரா. சக்கு²விஞ்ஞாணம் ந ஜாயதி ஆலோகஸ்ஸ அபா⁴வதோ, ந சக்கு²னோ. ததா² ஹி ‘‘தேனோபா⁴ஸேன அஞ்ஞமஞ்ஞம் ஸஞ்ஜானந்தீ’’தி வுத்தம். ஜம்பு³தீ³பே டி²தமஜ்ஜ²ன்ஹிகவேலாய புப்³ப³விதே³ஹவாஸீனம் அத்த²ங்க³மவஸேன உபட்³ட⁴ம் ஸூரியமண்ட³லம் பஞ்ஞாயதி, அபரகோ³யானவாஸீனம் உக்³க³மனவஸேன. ஏவம் ஸேஸதீ³பேஸுபீதி ஆஹ ‘‘ஏகப்பஹாரேனேவ தீஸு தீ³பேஸு பஞ்ஞாயந்தீ’’தி. இதோ அஞ்ஞதா² த்³வீஸு ஏவ தீ³பேஸு பஞ்ஞாயந்தி. ஏகேகாய தி³ஸாய நவனவயோஜனஸதஸஹஸ்ஸானி அந்த⁴காரவித⁴மனம்பி இமினாவ நயேன த³ட்ட²ப்³ப³ம். பபா⁴ய நப்பஹோந்தீதி அத்தனோ பபா⁴ய ஓபா⁴ஸிதும் நாபி⁴ஸம்பு⁴ணந்தி. யுக³ந்த⁴ரபப்³ப³தமத்த²கஸமப்பமாணே ஆகாஸே விசரணதோ ‘‘சக்கவாளபப்³ப³தஸ்ஸ வேமஜ்ஜே²ன சரந்தீ’’தி வுத்தம்.

ப்³யாவடாதி கா²த³னத்த²ம் க³ண்ஹிதும் உபக்கமந்தா. விபரிவத்தித்வாதி விவட்டித்வா. சி²ஜ்ஜித்வாதி முச்சா²பவத்தியா டி²தட்டா²னதோ முச்சித்வா, அங்க³பச்சங்க³சே²த³னவஸேன வா சி²ஜ்ஜித்வா. அச்சந்தகா²ரேதி ஆதபஸந்தபாபா⁴வேன அதிஸீதபா⁴வம் ஸந்தா⁴ய அச்சந்தகா²ரதா வுத்தா ஸியா. ந ஹி தம் கப்பஸண்டா²னஉத³கம் ஸம்பத்திகரமஹாமேக⁴வுட்ட²ம் பத²விஸந்தா⁴ரகம் கப்பவினாஸகஉத³கம் விய கா²ரம் ப⁴விதுமரஹதி, ததா² ஸதி பத²வீபி விலீயேய்ய, தேஸம் வா பாபகம்மப²லேன பேதானம் பகதிஉத³கஸ்ஸ புப்³ப³கே²ளபா⁴வாபத்தி விய தஸ்ஸ உத³கஸ்ஸ கா²ரபா⁴வாபத்தி ஹோதீதி வுத்தம் ‘‘அச்சந்தகா²ரே உத³கே’’தி.

பட²மததா²க³தஅச்ச²ரியஸுத்தவண்ணனா நிட்டி²தா.

8. து³தியததா²க³தஅச்ச²ரியஸுத்தவண்ணனா

128. அட்ட²மே ஆலீயந்தி ஆரமிதப்³ப³ட்டே²ன ஸேவீயந்தீதி ஆலயா, பஞ்ச காமகு³ணா. ஆரமந்தீதி ரதிம் விந்த³ந்தி கீளந்தி லளந்தி. ஆலீயந்தி வா அல்லீயந்தா அபி⁴ரமணவஸேன ஸேவந்தீதி ஆலயா, தண்ஹாவிசரிதானி. தேஹி ஆலயேஹி ரமந்தீதி ஆலயாராமா. யதே²வ ஹி ஸுஸஜ்ஜிதம் புப்ப²ப²லப⁴ரிதருக்கா²தி³ஸம்பன்னஉய்யானம் பவிட்டோ² ராஜா தாய ஸம்பத்தியா ரமதி, ஸம்முதி³தோ ஆமோதி³தப்பமோதி³தோ ஹோதி, ந உக்கண்டே²தி, ஸாயம்பி நிக்க²மிதும் ந இச்ச²தி, ஏவமிமேஹி காமாலயதண்ஹாலயேஹி ஸத்தா ரமந்தி, ஸம்ஸாரவட்டே பமுதி³தா அனுக்கண்டி²தா வஸந்தி. தேன தேஸம் ப⁴க³வா து³வித⁴ம்பி ஆலயம் உய்யானபூ⁴மிம் விய த³ஸ்ஸேந்தோ ‘‘ஆலயாராமா’’திஆதி³மாஹ. ஸேஸமேத்த² உத்தானமேவ.

து³தியததா²க³தஅச்ச²ரியஸுத்தவண்ணனா நிட்டி²தா.

9-10. ஆனந்த³அச்ச²ரியஸுத்தாதி³வண்ணனா

129-130. நவமே படிஸந்தா²ரத⁴ம்மந்தி பகதிசாரித்தவஸேன வுத்தம், உபக³தானம் பன பி⁴க்கூ²னம் பி⁴க்கு²னீனஞ்ச புச்சா²விஸ்ஸஜ்ஜனவஸேன சேவ சித்தருசிவஸேன ச யதா²காலம் த⁴ம்மம் தே³ஸேதியேவ, உபாஸகஉபாஸிகானம் பன உபனிஸின்னககதா²வஸேன. த³ஸமம் உத்தானமேவ.

ஆனந்த³அச்ச²ரியஸுத்தாதி³வண்ணனா நிட்டி²தா.

ப⁴யவக்³க³வண்ணனா நிட்டி²தா.