(14) 4. புக்³க³லவக்³கோ³

1. ஸம்யோஜனஸுத்தவண்ணனா

131. சதுத்த²ஸ்ஸ பட²மே உபபத்திப்படிலாப⁴ம் ஸம்வத்தனிகானீதி உபபத்திபடிலாபி⁴யானி. ப⁴வபடிலாபி⁴யானீதி ஏத்தா²பி ஏஸேவ நயோ. யேஹீதி யேஹி ஸம்யோஜனேஹி ஹேதுபூ⁴தேஹி, கரணபூ⁴தேஹி வா. நனு ச ஸோதாபன்னஸ்ஸபி ஓரம்பா⁴கி³யானி ஸம்யோஜனானி அப்பஹீனானி, கஸ்மா பன ஸகதா³கா³மீயேவ இத⁴ க³ஹிதோதி ஆஹ ‘‘ஸகதா³கா³மிஸ்ஸாதி இத³ம் அப்பஹீனஸம்யோஜனேஸு அரியேஸு உத்தமகோடியா க³ஹித’’ந்தி. தத்த² அப்பஹீனஸம்யோஜனேஸூதி அப்பஹீனஓரம்பா⁴கி³யஸம்யோஜனேஸு. உத்தமகோடியா க³ஹிதந்தி உக்கட்ட²பரிச்சே²தே³ன க³ஹிதம். ஸகதா³கா³மிதோ பரஞ்ஹி அப்பஹீனஓரம்பா⁴கி³யஸம்யோஜனோ அரியோ நாம நத்தி². நனு ச ஸகதா³கா³மிஸ்ஸ பஹீனானிபி ஓரம்பா⁴கி³யானி ஸம்யோஜனானி அத்தி² தி³ட்டி²விசிகிச்சா²ஸீலப்³ப³தபராமாஸஸம்யோஜனானம் பஹீனத்தா, தஸ்மா ‘‘ஓரம்பா⁴கி³யானி ஸம்யோஜனானி அப்பஹீனானீ’’தி கஸ்மா வுத்தந்தி ஆஹ ‘‘ஓரம்பா⁴கி³யேஸு ச அப்பஹீனம் உபாதா³யா’’திஆதி³. யஸ்மா காமராக³ப்³யாபாத³ஸம்யோஜனானி ஸகதா³கா³மிஸ்ஸ அப்பஹீனானி, தஸ்மா தானி அப்பஹீனானி உபாதா³ய ‘‘ஓரம்பா⁴கி³யானி ஸம்யோஜனானி அப்பஹீனானீ’’தி வுத்தம், ந ஸப்³பே³ஸம் அப்பஹீனத்தாதி அதி⁴ப்பாயோ.

ஸம்யோஜனஸுத்தவண்ணனா நிட்டி²தா.

2. படிபா⁴னஸுத்தவண்ணனா

132. து³தியே படிபா⁴னம் வுச்சதி ஞாணம்பி ஞாணஸ்ஸ உபட்டி²தவசனம்பி, தம் இத⁴ அதி⁴ப்பேதம், அத்த²யுத்தம் காரணயுத்தஞ்ச படிபா⁴னமஸ்ஸாதி யுத்தப்படிபா⁴னோ. புச்சா²னந்தரமேவ ஸீக⁴ம் ப்³யாகாதும் அஸமத்த²தாய நோமுத்தப்படிபா⁴னமஸ்ஸாதி நோமுத்தப்படிபா⁴னோ. இமினா நயேன ஸேஸா வேதி³தப்³பா³. ஏத்த² பன பட²மோ கஞ்சி காலம் வீமம்ஸித்வா யுத்தமேவ பேக்க²தி திபிடகசூளனாக³த்தே²ரோ விய. ஸோ பன பஞ்ஹம் புட்டோ² பரிக்³க³ஹேத்வா யுத்தப்பத்தகாரணமேவ கதே²தி. து³தியோ புச்சா²னந்தரமேவ யேன வா தேன வா வசனேன படிபா³ஹதி, வீமம்ஸித்வாபி ச யுத்தம் ந பக்கே²தி சதுனிகாயிகபிண்ட³திஸ்ஸத்தே²ரோ விய. ஸோ பன பஞ்ஹம் புட்டோ² பஞ்ஹபரியோஸானம்பி நாக³மேதி, யம் வா தம் வா கதே²தியேவ, வசனத்த²ம் பனஸ்ஸ வீமம்ஸியமானம் கத்த²சி ந லக³தி. ததியோ புச்சா²ஸமகாலமேவ யுத்தம் பேக்க²தி, தம்க²ணம்யேவ ச நம் ப்³யாகரோதி திபிடகசூளாப⁴யத்தே²ரோ விய. ஸோ பன பஞ்ஹம் புட்டோ² ஸீக⁴மேவ கதே²தி, யுத்தப்பத்தகாரணோ ச ஹோதி. சதுத்தோ² புட்டோ² ஸமானோ நேவ யுத்தம் பேக்க²தி, ந யேன வா தேன வா படிபா³ஹிதும் ஸக்கோதி, திப்³ப³ந்த⁴காரனிமுக்³கோ³ விய ஹோதி லாளுதா³யித்தே²ரோ விய.

படிபா⁴னஸுத்தவண்ணனா நிட்டி²தா.

3-4. உக்³க⁴டிதஞ்ஞூஸுத்தாதி³வண்ணனா

133-4. ததியே உக்³க⁴டிதஞ்ஞூதி ஏத்த² உக்³க⁴டனம் நாம ஞாணுக்³க⁴டனம், ஞாணேன உக்³க⁴டிதமத்தேயேவ ஜானாதீதி அத்தோ². ஸஹ உதா³ஹடவேலாயாதி உதா³ஹாரே உதா³ஹடமத்தேயேவ. த⁴ம்மாபி⁴ஸமயோ ஹோதீதி சதுஸச்சத⁴ம்மஸ்ஸ ஞாணேன ஸத்³தி⁴ம் அபி⁴ஸமயோ. அயம் வுச்சதீதி அயம் ‘‘சத்தாரோ ஸதிபட்டா²னா’’திஆதி³னா (விப⁴. 355) நயேன ஸம்கி²த்தேன மாதிகாய ட²பியமானாய தே³ஸனானுஸாரேன ஞாணம் பேஸேத்வா அரஹத்தம் க³ண்ஹிதும் ஸமத்தோ² புக்³க³லோ ‘‘உக்³க⁴டிதஞ்ஞூ’’தி வுச்சதி. விபஞ்சிதம் வித்தா²ரிதமேவ அத்த²ம் ஜானாதீதி விபஞ்சிதஞ்ஞூ. அயம் வுச்சதீதி அயம் ஸம்கி²த்தேன மாதிகம் ட²பேத்வா வித்தா²ரேன அத்தே² பா⁴ஜியமானே அரஹத்தம் பாபுணிதும் ஸமத்தோ² புக்³க³லோ ‘‘விபஞ்சிதஞ்ஞூ’’தி வுச்சதி. உத்³தே³ஸாதீ³ஹி நேதப்³போ³தி நேய்யோ. அனுபுப்³பே³ன த⁴ம்மாபி⁴ஸமயோதி அனுக்கமேன அரஹத்தப்பத்தி. ப்³யஞ்ஜனபத³மேவ பரமம் அஸ்ஸாதி பத³பரமோ. ந தாய ஜாதியா த⁴ம்மாபி⁴ஸமயோ ஹோதீதி தேன அத்தபா⁴வேன ஜா²னம் வா விபஸ்ஸனம் வா மக்³க³ம் வா ப²லம் வா நிப்³ப³த்தேதும் ந ஸக்கோதீதி அத்தோ². சதுத்த²ம் உத்தானமேவ.

உக்³க⁴டிதஞ்ஞூஸுத்தாதி³வண்ணனா நிட்டி²தா.

5-8. ஸாவஜ்ஜஸுத்தாதி³வண்ணனா

135-8. பஞ்சமே ஸாவஜ்ஜோதி ஸதோ³ஸோ. ஸாவஜ்ஜேன காயகம்மேனாதி ஸதோ³ஸேன பாணாதிபாதாதி³னா காயகம்மேன. இதரேஸுபி ஏஸேவ நயோ. அயம் வுச்சதீதி அயம் புக்³க³லோ தீஹி த்³வாரேஹி ஆயூஹனகம்மஸ்ஸ ஸதோ³ஸத்தா கூ³த²குணபாதி³ப⁴ரிதோ பதே³ஸோ விய ‘‘ஸாவஜ்ஜோ’’தி வுச்சதி. ஸாவஜ்ஜேன ப³ஹுலந்தி யஸ்ஸ ஸாவஜ்ஜமேவ காயகம்மம் ப³ஹுலம் ஹோதி, அப்பம் அனவஜ்ஜம். ஸோ ‘‘ஸாவஜ்ஜேன ப³ஹுலம் காயகம்மேன ஸமன்னாக³தோ அப்பம் அனவஜ்ஜேனா’’தி வுச்சதி. இதரேஸுபி ஏஸேவ நயோ. கோ பன ஏவரூபோ ஹோதீதி? யோ கா³மத⁴ம்மதாய வா நிக³மத⁴ம்மதாய வா கதா³சி கரஹசி உபோஸத²ம் ஸமாதி³யதி, ஸீலானி பூரேதி. அயம் வுச்சதீதி அயம் புக்³க³லோ தீஹி த்³வாரேஹி ஆயூஹனகம்மேஸு ஸாவஜ்ஜஸ்ஸேவ ப³ஹுலதாய அனவஜ்ஜஸ்ஸ அப்பதாய ‘‘வஜ்ஜப³ஹுலோ’’தி வுச்சதி. யதா² ஹி ஏகஸ்மிம் பதே³ஸே து³ப்³ப³ண்ணானி து³க்³க³ந்தா⁴னி புப்பா²னி ராஸிகதானஸ்ஸு, தேஸம் உபரி தஹம் தஹம் அதி⁴முத்தகவஸ்ஸிகபாடலானி பதிதானி ப⁴வேய்யும், ஏவரூபோ அயம் புக்³க³லோ வேதி³தப்³போ³. யதா² பன ஏகஸ்மிம் பதே³ஸே அதி⁴முத்தகவஸ்ஸிகபாடலானி ராஸிகதானஸ்ஸு, தேஸம் உபரி தஹம் தஹம் து³க்³க³ந்தா⁴னி ப³த³ரபுப்பா²தீ³னி பதிதானி ப⁴வேய்யும். ஏவரூபோ ததியோ புக்³க³லோ வேதி³தப்³போ³. சதுத்தோ² பன தீஹி த்³வாரேஹி ஆயூஹனகம்மஸ்ஸ நித்³தோ³ஸத்தா ச சதுமது⁴ரப⁴ரிதஸுவண்ணவாதி விய த³ட்ட²ப்³போ³. ச²ட்டா²தீ³னி உத்தானத்தா²னேவ.

ஸாவஜ்ஜஸுத்தாதி³வண்ணனா நிட்டி²தா.

9-10. த⁴ம்மகதி²கஸுத்தாதி³வண்ணனா

139-140. நவமே அப்பஞ்ச பா⁴ஸதீதி ஸம்பத்தபரிஸாய தோ²கமேவ கதே²தி. அஸஹிதஞ்சாதி கதே²ந்தோ ச பன ந அத்த²யுத்தம் காலயுத்தம் கதே²தி. பரிஸா சஸ்ஸ ந குஸலா ஹோதீதி ஸோதும் நிஸின்னபரிஸா சஸ்ஸ யுத்தாயுத்தம் காரணாகாரணம் ஸிலிட்டா²ஸிலிட்ட²ம் ந ஜானாதீதி அத்தோ². ஏவரூபோதி அயம் ஏவம்ஜாதிகோ பா³லத⁴ம்மகதி²கோ ஏவம்ஜாதிகாய பா³லபரிஸாய த⁴ம்மகதி²கோத்வேவ நாமம் லப⁴தி. இமினா நயேன ஸப்³ப³த்த² அத்தோ² வேதி³தப்³போ³. ஏத்த² ச த்³வேயேவ ஜனா ஸபா⁴வத⁴ம்மகதி²கா, ந இதரே. இதரே பன த⁴ம்மகதி²கானம் அந்தோ பவிட்ட²த்தா ஏவம் வுத்தா. த³ஸமம் உத்தானமேவ.

த⁴ம்மகதி²கஸுத்தாதி³வண்ணனா நிட்டி²தா.

புக்³க³லவக்³க³வண்ணனா நிட்டி²தா.