1-6. பாணாதிபாதஸுத்தாதி³வண்ணனா

81-86. சதுத்த²ஸ்ஸ பட²மாதீ³னி உத்தானத்தா²னேவ. பஞ்சமே (ஸம். நி. டீ. 1.1.132) ‘‘நீசே குலே பச்சாஜாதோ’’திஆதி³கேன அப்பகாஸபா⁴வேன தமதீதி தமோ, தேன தமேன யுத்தோதி தமோ புக்³க³லோ வுச்சதி. ததா² ஹி தம்யோக³தோ புக்³க³லஸ்ஸ தப்³போ³ஹாரோ யதா² ‘‘மச்சே²ரயோக³தோ மச்ச²ரோ’’தி, தஸ்மா தமோதி அப்பகாஸபா⁴வேன தமோ தமபூ⁴தோ அந்த⁴காரம் விய ஜாதோ, அந்த⁴காரத்தம் வா பத்தோதி அத்தோ². வுத்தலக்க²ணம் தமமேவ பரம்பரதோ அயனம் க³தி நிட்டா² ஏதஸ்ஸாதி தமபராயணோ. உப⁴யேனபி தமக்³க³ஹணேன க²ந்த⁴தமோ கதி²தோ, ந அந்த⁴காரதமோ. க²ந்த⁴தமோதி ச ஸம்பத்திரஹிதா க²ந்த⁴பவத்தியேவ த³ட்ட²ப்³பா³. ‘‘உச்சே குலே பச்சாஜாதோ’’திஆதி³கேன பகாஸபா⁴வேன ஜோதேதீதி ஜோதி, தேன ஜோதினாயுத்தோதிஆதி³ ஸப்³ப³ம் வுத்தனயேன வேதி³தப்³ப³ம். இதரே த்³வேதி ஜோதிதமபராயணோ, ஜோதிஜோதிபராயணோதி இதரே த்³வே புக்³க³லே.

வேணுவேத்தாதி³விலீவேஹி பேளபா⁴ஜனாதி³காரகா விலீவகாரகா. மிக³மச்சா²தீ³னம் நிஸாத³னதோ நேஸாதா³, மாக³விகமச்ச²ப³ந்தா⁴த³யோ. ரதே²ஸு சம்மேன நஹணகரணதோ ரத²காரா, சம்மகாரா. புஇதி கரீஸஸ்ஸ நாமம், தம் குஸேந்தி அபனேந்தீதி புக்குஸா, புப்ப²ச²ட்³ட³கா. து³ப்³ப³ண்ணோதி விரூபோ. ஓகோடிமகோதி ஆரோஹாபா⁴வேன ஹேட்டி²மகோ, ரஸ்ஸகாயோதி அத்தோ². தேனாஹ ‘‘லகுண்ட³கோ’’தி. லகு விய க⁴டிகா விய டே³தி பவத்ததீதி லகுண்ட³கோ, ரஸ்ஸோ. கணதி நிமீலதீதி காணோ. தம் பனஸ்ஸ நிமீலனம் ஏகேன அக்கி²னா த்³வீஹிபி வாதி ஆஹ ‘‘ஏகச்சி²காணோ வா உப⁴யச்சி²காணோ வா’’தி. குணனம் குணோ, ஹத்த²வேகல்லம், ஸோ ஏதஸ்ஸ அத்தீ²தி குணீ. க²ஞ்ஜோ வுச்சதி பாத³விகலோ. ஹேட்டி²மகாயஸங்கா²தோ ஸரீரஸ்ஸ பக்கோ² பதே³ஸோ ஹதோ அஸ்ஸாதி பக்க²ஹதோ. தேனாஹ ‘‘பீட²ஸப்பீ’’தி. பதீ³பே பதீ³பனே ஏதப்³ப³ம் நேதப்³ப³ந்தி பதீ³பேய்யம், தேலகபாலாதி³உபகரணம். வுத்தந்தி அட்ட²கதா²யம் வுத்தம்.

ஆக³மனவிபத்தீதி ஆக³மனட்டா²னவஸேன விபத்தி ‘‘ஆக³மோ ஏத்தா²’’தி கத்வா. புப்³பு³ப்பன்னபச்சயவிபத்தீதி பட²முப்பன்னபச்சயவஸேன விபராவத்தி. சண்டா³லாதி³ஸபா⁴வா ஹிஸ்ஸ மாதாபிதரோ பட²முப்பன்னபச்சயோ. பவத்தபச்சயவிபத்தீதி பவத்தே ஸுக²பச்சயவிபத்தி. தாதி³ஸே நிஹீனகுலே உப்பன்னோபி கோசி விப⁴வஸம்பன்னோ ஸியா, அயம் பன து³க்³க³தோ து³ரூபோ. ஆஜீவுபாயவிபத்தீதி ஆஜீவனுபாயவஸேன விபத்தி. ஸுகே²ன ஹி ஜீவிகம் பவத்தேதும் உபாயபூ⁴தா ஹத்தி²ஸிப்பாத³யோ இமஸ்ஸ நத்தி², புப்ப²ச²ட்³ட³னஸிலாகோட்டனாதி³கம்மம் பன கத்வா ஜீவிகம் பவத்தேதி. தேனாஹ ‘‘கஸிரவுத்திகே’’தி. அத்தபா⁴வவிபத்தீதி உபதி⁴விபத்தி. து³க்க²காரணஸமாயோகோ³தி காயிகசேதஸிகது³க்கு²ப்பத்தியா பச்சயஸமோதா⁴னம். ஸுக²காரணவிபத்தீதி ஸுக²பச்சயபரிஹானி. உபபோ⁴க³விபத்தீதி உபபோ⁴க³ஸுக²ஸ்ஸ வினாஸோ அனுபலத்³தி⁴. ஜோதி சேவ ஜோதிபராயணபா⁴வோ ச ஸுக்கபக்கோ². ச²ட்ட²ம் உத்தானமேவ.

பாணாதிபாதஸுத்தாதி³வண்ணனா நிட்டி²தா.