7. புத்தஸுத்தவண்ணனா

87. ஸத்தமே ம-காரோ பத³ஸந்தி⁴கரோ ‘‘அஞ்ஞமஞ்ஞ’’ந்திஆதீ³ஸு விய. நிச்சலஸமணோதி தி²ரஸமணோ. அபி⁴ஸிஞ்சிதப்³போ³தி அபி⁴ஸேகோதி கம்மஸாத⁴னோ அபி⁴ஸேகஸத்³தோ³. தேனாஹ ‘‘அபி⁴ஸேகம் காதும் யுத்தோ’’தி.

பா³குலத்தே²ரோ வியாதி தே²ரோ ஹி மஹாயஸஸ்ஸீ, தஸ்ஸ புத்ததீ⁴தரோ நத்துபனத்தகா ஸுகு²மஸாடகேஹி சீவரானி காரேத்வா ரஜாபேத்வா ஸமுக்³கே³ பக்கி²பித்வா பஹிணந்தி. தே²ரஸ்ஸ நஹானகாலே நஹானகோட்ட²கே ட²பேந்தி. தே²ரோ தானி நிவாஸேதி சேவ பாருபதி ச. தேனேவேதம் வுத்தம்.

க²தி³ரவனமக்³கே³ ஸீவலித்தே²ரோ வியாதி ஸத்த²ரி கிர தம் மக்³க³ம் படிபன்னே தே³வதா ‘‘அம்ஹாகம் அய்யஸ்ஸ ஸீவலித்தே²ரஸ்ஸ ஸக்காரம் கரிஸ்ஸாமா’’தி சிந்தேத்வா ஏகேகயோஜனே விஹாரம் காரேத்வா ஏகயோஜனதோ உத்³த⁴ம் க³ந்தும் அத³த்வா பாதோவ உட்டா²ய தி³ப்³பா³னி யாகு³ஆதீ³னி க³ஹேத்வா ‘‘அம்ஹாகம் அய்யோ ஸீவலித்தே²ரோ கஹம் நிஸின்னோ’’தி விசரந்தி. தே²ரோ அத்தனோ அபி⁴ஹடம் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³பேஸி. ஏவம் ஸத்தா² ஸபரிவாரோ திம்ஸயோஜனிகம் கந்தாரம் ஸீவலித்தே²ரஸ்ஸ புஞ்ஞப²லம் அனுப⁴வமானோவ அக³மாஸி. தேனேவேதம் வுத்தம்.

அட்ட²கனாக³ரஸுத்தே ஆனந்த³த்தே²ரோ வியாதி அட்ட²கனாக³ரகோ கிர க³ஹபதி தே²ரஸ்ஸ த⁴ம்மதே³ஸனாய பஸீதி³த்வா பஞ்சஸதக்³க⁴னகம் விஹாரம் காரேத்வா அதா³ஸி. தம் ஸந்தா⁴யேதம் வுத்தம்.

பிலிந்த³வச்ச²த்தே²ரோ வியாதி தே²ரஸ்ஸ கிர இத்³தா⁴னுபா⁴வேன பஸன்னா மனுஸ்ஸா ஸப்பிஆதீ³னி ப³ஹூனி பே⁴ஸஜ்ஜானி அபி⁴ஹரிம்ஸு. பகதியாபி ச ஆயஸ்மா பிலிந்த³வச்சோ² லாபீ⁴ ஹோதி பஞ்சன்னம் பே⁴ஸஜ்ஜானம், லத்³த⁴ம் லத்³த⁴ம் பரிஸாய விஸ்ஸஜ்ஜேதி. தேனேதம் வுத்தம் ‘‘கி³லானபச்சயம் பிலிந்த³வச்ச²த்தே²ரோ வியா’’தி.

திண்ணம்பி ஸன்னிபாதேன நிப்³ப³த்தானீதி பித்தாதீ³னம் திண்ணம்பி விஸமானம் ஸன்னிபாதேன ஜாதானி. அதிஸீதாதி³பா⁴வேன உதூனம் பரிணாமோதி ஆஹ ‘‘அதிஸீதஅதிஉண்ஹஉதுதோ ஜாதானீ’’தி. புரிமஉதுதோ விஸதி³ஸோ உது உதுபரிணாமோ, ததோ ஜாதானி உதுபரிணாமஜானி, விஸபா⁴க³உதுதோ ஜாதானீதி அத்தோ². ஜங்க³லதே³ஸவாஸீனஞ்ஹி அனூபதே³ஸே வஸந்தானம் விஸபா⁴கோ³வ உது உப்பஜ்ஜதி, அனூபதே³ஸவாஸீனஞ்ச ஜங்க³லதே³ஸேதி. ஏவம் மலயஸமுத்³த³தீராதி³வஸேனபி உதுவிஸபா⁴க³தா உப்பஜ்ஜதியேவ. ததோ ஜாதானி உதுபரிணாமஜானி நாம.

அத்தனோ பகதிசரியானம் விஸமம் காயஸ்ஸ பரிஹரணவஸேன விஸமபரிஹாரஜானி. தானி பன அச்சாஸனஅதிட்டா²னாதி³னா வேதி³தப்³பா³னீதி ஆஹ ‘‘அச்சாஸனஅதிட்டா²னாதி³கா’’தி. ஆதி³-ஸத்³தே³ன மஹாபா⁴ரவஹணஸுதா⁴கோட்டனஅதே³ஸகாலசரணாதீ³னி ஸங்க³ண்ஹாதி. பரஸ்ஸ உபக்கமதோ நிப்³ப³த்தானி ஓபக்கமிகானி, அயம் சோரோதி வா பாரதா³ரிகோதி வா க³ஹேத்வா ஜண்ணுககப்பரமுக்³க³ராதீ³ஹி நிப்போத²னஉபக்கமம் பச்சயம் கத்வா உப்பன்னானீதி அத்தோ². தேனாஹ ‘‘வத⁴ப³ந்த⁴னாதி³உபக்கமேன நிப்³ப³த்தானீ’’தி. கேவலந்தி பா³ஹிரம் பச்சயம் அனபேக்கி²த்வா கேவலம், தேன வினாதி அத்தோ². தேனாஹ ‘‘புப்³பே³கதகம்மவிபாகவஸேனேவ ஜாதானீ’’தி.

புத்தஸுத்தவண்ணனா நிட்டி²தா.