9. அகுஸலமூலஸுத்தவண்ணனா

70. நவமே லுப்³ப⁴தீதி லோபோ⁴. து³ஸ்ஸதீதி தோ³ஸோ. முய்ஹதீதி மோஹோ. லோபா⁴தீ³னி பனேதானி அஸஹஜாதானம் பாணாதிபாதாதீ³னம் கேஸஞ்சி அகுஸலானம் உபனிஸ்ஸயபச்சயட்டே²ன, ஸஹஜாதானம் அதி³ன்னாதா³னாதீ³னம் கேஸஞ்சி ஸம்பயுத்தா ஹுத்வா உப்பாத³கட்டே²ன, ஸயஞ்ச அகுஸலானீதி ஸாவஜ்ஜது³க்க²விபாகட்டே²னாதி ஆஹ ‘‘அகுஸலானம் மூலானி, அகுஸலானி ச தானி மூலானீ’’தி. வுத்தம்பி சேதம் ‘‘ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ பாணம்பி ஹனதீ’’திஆதி³. யத³பீதி லிங்க³விபல்லாஸேன வுத்தந்தி ஆஹ ‘‘யோபி, பி⁴க்க²வே, லோபோ⁴’’தி. தத³பீதி ஏத்தா²பி ஏஸேவ நயோதி ஆஹ ‘‘ஸோபி அகுஸலமூல’’ந்தி. வினாபி லிங்க³விபல்லாஸேன அத்த²யோஜனம் த³ஸ்ஸேந்தோ ‘‘அகுஸலமூலம் வா’’திஆதி³மாஹ. ஸப்³ப³த்தா²தி ‘‘யத³பி, பி⁴க்க²வே, தோ³ஸோ, தத³பி அகுஸலமூல’’ந்திஆதீ³ஸு. அபி⁴ஸங்க²ரோதீதி ஏத்த² ஆயூஹதீதி அத்த²ம் வத்வா தஞ்ச ஆயூஹனம் பச்சயஸமவாயஸித்³தி⁴தோ ஸம்பிண்ட³னம் ராஸிகரணம் விய ஹோதீதி ஆஹ ‘‘ஸம்பிண்டே³தி ராஸிம் கரோதீ’’தி.

பாளியம் ‘‘வதே⁴னா’’திஆதீ³ஸு வதே⁴னாதி மாரணேன வா போத²னேன வா. வத⁴ஸத்³தோ³ ஹி ஹிம்ஸனத்தோ² விஹேட²னத்தோ² ச ஹோதி. ப³ந்த⁴னேனாதி அத்³து³ப³ந்த⁴னாதி³னா. ஜானியாதி த⁴னஜானியா, ‘‘ஸதம் க³ண்ஹத², ஸஹஸ்ஸம் க³ண்ஹதா²’’தி ஏவம் பவத்திதத³ண்டே³னாதி அத்தோ². க³ரஹாயாதி பஞ்சஸிக²முண்ட³ககரணம், கோ³மயஸிஞ்சனம், கீ³வாய குரண்ட³கப³ந்த⁴னந்தி ஏவமாதீ³னி கத்வா க³ரஹபாபனேன. தத்த² பஞ்சஸிக²முண்ட³ககரணம் நாம காகபக்க²கரணம். கோ³மயஸிஞ்சனம் ஸீஸேன கணோத³காவஸேசனம். குரண்ட³கப³ந்த⁴னம் க³த்³து³லப³ந்த⁴னம்.

காலஸ்மிம் ந வத³தீதி யுத்தகாலே ந வத³தி, வத்தப்³ப³காலஸ்ஸ புப்³பே³ வா பச்சா² வா அயுத்தகாலே வத்தா ஹோதி. அபூ⁴தவாதீ³தி யம் நத்தி², தஸ்ஸ வத்தா. தேனாஹ ‘‘பூ⁴தம் ந வத³தீ’’தி. அத்த²ம் ந வத³தீதி காரணம் ந வத³தி, அகாரணனிஸ்ஸிதம் நிப்ப²லம் வத்தா ஹோதி. த⁴ம்மம் ந வத³தீதி ஸபா⁴வம் ந வத³தி, அஸபா⁴வம் வத்தா அயதா²வாதீ³தி அத்தோ². வினயம் ந வத³தீதி ஸம்வரவினயம் ந வத³தி, ந ஸம்வரவினயப்படிஸம்யுத்தஸ்ஸ வத்தா ஹோதி, அத்தனோ ஸுணந்தஸ்ஸ ச ந ஸம்வரவினயாவஹஸ்ஸ வத்தாதி அத்தோ².

அதச்ச²ந்தி அபூ⁴தத்த²ம். தேனாஹ ‘‘இதரம் தஸ்ஸேவ வேவசன’’ந்தி. அத² வா அபூ⁴தந்தி அஸந்தம் அவிஜ்ஜமானம். அதச்ச²ந்தி அததா²காரம்.

புஞ்ஞகம்மதோ ஏதி உப்பஜ்ஜதீதி அயோ, வட்³டி⁴. தப்படிக்கே²பேன அனயோ, அவட்³டீ⁴தி ஆஹ ‘‘அனயம் ஆபஜ்ஜதீதி அவட்³டி⁴ம் ஆபஜ்ஜதீ’’தி. மாலுவாஸிபாடிகா நாம தீ³க⁴ஸண்டா²னம் மாலுவாபக்கம், மாலுவாப²லபோட்ட²லிகாதி அத்தோ². ப²லிதாயாதி ஆதபேன ஸுஸ்ஸித்வா பி⁴ன்னாய. வடருக்கா²தீ³னம் மூலேதி வடருக்கா²தீ³னம் ஸமீபே. ஸகபா⁴வேன ஸண்டா²தும் ந ஸக்கோந்தீதி கஸ்மா ந ஸக்கோந்தி? ப⁴வனவினாஸப⁴யா. ருக்க²மூலே பதிதமாலுவாபீ³ஜதோ ஹி லதா உப்பஜ்ஜித்வா ருக்க²ம் அபி⁴ருஹதி. ஸா மஹாபத்தா சேவ ப³ஹுபத்தா ச மஹாகோலிரபத்தஸண்டா²னேஹி ததோ ச மஹந்ததரேஹி ஸாகா²விடபந்தரேஹி பத்தேஹி ஸமன்னாக³தா. அத² நம் ருக்க²ம் மூலதோ பட்டா²ய வினந்த⁴மானா ஸப்³ப³விடபானி ஸஞ்சா²தே³த்வா மஹந்தம் பா⁴ரம் ஜனேத்வா திட்ட²தி, ஸா வாதே வாயந்தே தே³வே வா வஸ்ஸந்தே ஓக⁴னஹேட்டா²க³தா ஓலம்ப³னஹேதுபூ⁴தம் க⁴னபா⁴வம் ஜனேத்வா தஸ்ஸ ருக்க²ஸ்ஸ ஸப்³ப³ஸாக²ம் பி⁴ஜ்ஜதி, பூ⁴மியம் நிபாதேதி. ததோ தஸ்மிம் ருக்கே² பதிட்டி²தவிமானம் பி⁴ஜ்ஜதி வினஸ்ஸதி. இதி தா தே³வதாயோ ப⁴வனவினாஸப⁴யா ஸகபா⁴வேன ஸண்டா²தும் ந ஸக்கோந்தி. ஏத்த² ச யம் ஸாக²ட்ட²கவிமானம் ஹோதி, தம் ஸாகா²ஸு பி⁴ஜ்ஜமானாஸு தத்த² தத்தே²வ பி⁴ஜ்ஜித்வா ஸப்³ப³ஸாகா²ஸு பி⁴ன்னாஸு ஸப்³ப³ம் பி⁴ஜ்ஜதி, ருக்க²ட்ட²கவிமானம் பன யாவ ருக்க²ஸ்ஸ மூலமத்தம்பி திட்ட²தி, தாவ ந நஸ்ஸதீதி வேதி³தப்³ப³ம். தத்த² தத்த² பலுஜ்ஜித்வாதி தத்த² தத்த² பி⁴ஜ்ஜித்வா. ஸேஸமேத்த² ஸுவிஞ்ஞேய்யமேவ.

அகுஸலமூலஸுத்தவண்ணனா நிட்டி²தா.