(6) 1. ப்³ராஹ்மணவக்³கோ³

1. பட²மத்³வேப்³ராஹ்மணஸுத்தவண்ணனா

52. ப்³ராஹ்மணவக்³க³ஸ்ஸ பட²மே ஜராஜிண்ணாதி ஜராவஸேன ஜிண்ணா, ந ப்³யாதி⁴ஆதீ³னம் வஸேன ஜிண்ணஸதி³ஸத்தா ஜிண்ணா. வயோவுத்³தா⁴தி வயஸோ வுத்³தி⁴ப்பத்தியா வுத்³தா⁴, ந ஸீலாதி³வுத்³தி⁴யா. ஜாதிமஹல்லகாதி ஜாதியா மஹந்ததாய சிரரத்தஞ்ஞுதாய ஜாதிமஹல்லகா. தயோ அத்³தே⁴ அதிக்கந்தாதி பட²மோ, மஜ்ஜி²மோ, பச்சி²மோதி தயோ அத்³தே⁴ அதீதா. ததியம் வயம் அனுப்பத்தாதி ததோ ஏவ பச்சி²மம் வயம் அனுப்பத்தா. அகதப⁴யபரித்தாணாதி ஏத்த² ப⁴யபரித்தாணந்தி து³க்³க³திப⁴யதோ பரித்தாயகம் புஞ்ஞம், தம் அகதம் ஏதேஹீதி அகதப⁴யபரித்தாணா. பதிட்டா²கம்மந்தி ஸுக³திஸங்கா²தப்பதிட்டா²வஹம் கம்மம். உபஸம்ஹரீயதீதி ஸம்பாபீயதி. ‘‘உபனீயதீ’’தி வுத்தம், கிம் கேன உபனீயதீதி ஆஹ ‘‘அயஞ்ஹி ஜாதியா ஜரம் உபனீயதீ’’திஆதி³. அயந்தி லோகோ. ஜாதோ ந ஜாதபா⁴வேனேவ திட்ட²தி, அத² கோ² ததோ பரம் ஜரம் பாபீயதி, ஜராய ப்³யாதி⁴ம் பாபீயதி. ஏவம் பரதோ பரம் து³க்க²மேவ உபனீயதி.

தாயனட்டே²னாதி ரக்க²னட்டே²ன. நிலீயனட்டே²னாதி நிலீனட்டா²னபா⁴வேன. பதிட்டா²னட்டே²னாதி பதிட்டா²னபா⁴வேன. அவஸ்ஸயனட்டே²னாதி அவஸ்ஸயிதப்³ப³பா⁴வேன. உத்தமக³திவஸேனாதி பரமக³திபா⁴வேன.

பட²மத்³வேப்³ராஹ்மணஸுத்தவண்ணனா நிட்டி²தா.

2. து³தியத்³வேப்³ராஹ்மணஸுத்தவண்ணனா

53. து³தியே ப⁴ஜிதப்³ப³ட்டே²ன பரேஸம் பா⁴ஜிதப்³ப³ட்டே²ன பா⁴ஜனம், ப⁴ண்ட³கம்.

து³தியத்³வேப்³ராஹ்மணஸுத்தவண்ணனா நிட்டி²தா.

3-4. அஞ்ஞதரப்³ராஹ்மணஸுத்தாதி³வண்ணனா

54-55. ததியே யேஸம் ராகா³தீ³னம் அப்பஹானேன புரிஸஸ்ஸ அத்தப்³யாபா³தா⁴தீ³னம் ஸம்ப⁴வோ, பஹானேன அஸம்ப⁴வோதி ஏவம் ராகா³தீ³னம் பஹாயகோ அரியத⁴ம்மோ மஹானுபா⁴வதாய மஹானிஸம்ஸதாய ச ஸாமம் பஸ்ஸிதப்³போ³தி ஸந்தி³ட்டி²கோ. இமினா நயேன ஸேஸேஸு பதே³ஸுபி யதா²ரஹம் நீஹரித்வா வத்தப்³போ³. ஸத்³த³த்தோ² பன விஸுத்³தி⁴மக்³க³ஸம்வண்ணனாஸு (விஸுத்³தி⁴. மஹாடீ. 1.147) வுத்தனயேன வேதி³தப்³போ³. சதுத்த²ம் உத்தானத்த²மேவ.

அஞ்ஞதரப்³ராஹ்மணஸுத்தாதி³வண்ணனா நிட்டி²தா.

5. நிப்³பு³தஸுத்தவண்ணனா

56. பஞ்சமே ந காலந்தரே பத்தப்³ப³ந்தி யதா³ ஸச்சப்படிவேதோ⁴, ததா³ ஏவ லத்³த⁴ப்³ப³த்தா ந காலந்தரே பத்தப்³ப³ம். மக்³க³ஞாணேன உபனேதப்³ப³த்தா உபனேய்யம். உபனேய்யமேவ ஓபனேய்யிகந்தி ஆஹ ‘‘படிபத்தியா உபக³ந்தப்³ப³’’ந்தி.

நிப்³பு³தஸுத்தவண்ணனா நிட்டி²தா.

6. பலோகஸுத்தவண்ணனா

57. ச²ட்டே² ஆசரியபாசரியானந்தி ஆசரியானம்பி ஆசரியானம். நிரந்தரபு²டோ நேரயிகஸத்தேஹி நிரயகா³மிகம்மஸ்ஸ காரகானம் ப³ஹுபா⁴வா. உப⁴யம்பேதந்தி யதா²வுத்தம் அத்த²த்³வயம். க⁴னனிவாஸதந்தி கா³மானம் க⁴னஸன்னிவாஸதம். ஏகந்தேனேவ அத⁴ம்மோதி அயோனிஸோமனஸிகாரஹேதுகத்தா அனத்த²ஹேதுதாய ச நியமேனேவ அத⁴ம்மோ. ந அத⁴ம்மராகோ³தி அதி⁴ப்பேதோதி பரபரிக்கா²ரேஸு ராகோ³ விய ந மஹாஸாவஜ்ஜோதி கத்வா வுத்தம். ததா² ஹி ஸகஸகபரிக்கா²ரவிஸயோ ராகோ³ விஸமலோபோ⁴ விய ந ஏகந்ததோ அபாயுப்பத்திஜனகோ. பரபரிக்கா²ரேஸு உப்பஜ்ஜமானஸ்ஸ மஹாஸாவஜ்ஜதாய அத⁴ம்மராக³தா. லோப⁴ஸ்ஸ ஸமகாலோ நாம நத்தி² காயது³ச்சரிதாதீ³னம் விய அயோனிஸோமனஸிகாரஸமுட்டா²னத்தா. ஏஸாதி ஏஸோ பாபத⁴ம்மோ. ஸமலோபோ⁴ விஸமலக்க²ணாபா⁴வதோ. ததா² ஹி தம்ஸமுட்டா²னோ பயோகோ³ மிச்சா²சாரோதி ந வுச்சதி. அவத்து²படிஸேவனஸங்கா²தேனாதி யம் லோகியஸாது⁴ஸமனுஞ்ஞாதம் ராக³ஸ்ஸ வத்து²ட்டா²னம், ததோ அஞ்ஞஸ்மிம் வத்து²ஸ்மிம் படிஸேவனஸங்கா²தேன.

விவித⁴ஸஸ்ஸானந்தி ஸாலிவீஹிஆதி³னானப்பகாரஸஸ்ஸானம். து³ஸ்ஸஸ்ஸந்தி பச்சயதூ³ஸேன தூ³ஸிதம் ஸஸ்ஸம். ஸம்பஜ்ஜமானேதி நிப்ப²ஜ்ஜனதோ பகே³வ க³ப்³ப⁴பரிவுத்³தி⁴காலே. பாணகாதி ஸலபா⁴தி³பாணகா. பதந்தீதி ஸஸ்ஸானம் மத்த²கே பதந்தி. ஸலாகாமத்தமேவ ஸம்பஜ்ஜதீதி வட்³டி⁴த்வா க³ப்³ப⁴ம் க³ஹேதும் அஸமத்த²ம் ஸம்பஜ்ஜதி. தேதி வாளஅமனுஸ்ஸா. லத்³தோ⁴காஸாதி யக்கா²தி⁴பதீஹி அனுஞ்ஞாதத்தா லத்³தோ⁴காஸா.

பலோகஸுத்தவண்ணனா நிட்டி²தா.

7. வச்ச²கோ³த்தஸுத்தவண்ணனா

58. ஸத்தமே மஹாவிபாகந்தி உளாரப²லம் ப³ஹுவிபாகம். த⁴ம்மோ நாம கதி²தகதா² ‘‘அத்த²ம் த³ஹதி வித³ஹதீ’’தி கத்வா. அனுத⁴ம்மோ நாம படிகத²னம் ‘‘தம் அனுக³தோ த⁴ம்மோ’’தி கத்வா. ஸஹ த⁴ம்மேனாதி ஸஹத⁴ம்மோ, ஸோ ஏவ ஸஹத⁴ம்மிகோ. த⁴ம்மஸத்³தோ³ சேத்த² காரணபரியாயோதி ஆஹ ‘‘ஸகாரணோ’’தி. வாத³ஸ்ஸாதி வசனஸ்ஸ. அனுபாதோ அனுபச்சா² பவத்தி.

பரிபந்தே² திட்ட²தீதி பாரிபந்தி²கோ. பந்தே² ட²த்வா பரேஸம் ஸாபதேய்யம் சி²ந்த³னதோ பந்த²தூ³ஹனசோரோ. யதி³ பச்சவேக்க²ணஞாணம், கத²ம் தம் அஸேக்க²ந்தி ஆஹ ‘‘அஸேக்க²ஸ்ஸ பவத்தத்தா’’தி. இதரானீதி ஸீலக்க²ந்தா⁴தீ³னி. ஸயம்பீதி பி-ஸத்³தோ³ ‘‘அஸேக்க²ஸ்ஸ பவத்தா சா’’தி இமமத்த²ம் ஸம்பிண்டே³தி.

நிப்³பி³ஸேவனோதி விஸேவனரஹிதோ விக³தவிலோமபா⁴வோ. ந உபபரிக்க²ந்தீதி ந விசாரேந்தி. ஜாதிம் நிப்³ப³த்திம் யாதி உபக³ச்ச²தீதி ஜாதியோ, ஜாதோதி அத்தோ². தேனாஹ ‘‘யத்த² கத்த²சி குலஜாதே’’தி.

கேவலீதி கேவலவா, பாரிபூரிமாதி அத்தோ². தேனாஹ ‘‘பரிபுண்ணபா⁴வேன யுத்தோ’’தி. ஏதம் கேவலீதி பத³ம். அபி⁴ஞ்ஞாபாரந்தி அபி⁴ஜானஸ்ஸ பாரம். பரியந்தம் க³தத்தா பாரகூ³. ஏஸ நயோ ஸேஸபதே³ஸுபி. கே²த்தவினிச்ச²யஸவனேனாதி ‘‘இமேஹி ஸீலாதி³கு³ணஸம்பன்னா ஸதே³வகே லோகே புஞ்ஞஸ்ஸ கே²த்தம், தத³ஞ்ஞோ ந கே²த்த’’ந்தி ஏவம் கே²த்தவினிச்ச²யஸவனேன ரஹிதா.

வச்ச²கோ³த்தஸுத்தவண்ணனா நிட்டி²தா.

8. திகண்ணஸுத்தவண்ணனா

59. அட்ட²மே து³ராஸதா³தி து³ருபஸங்கமனா. க³ரஹா முச்சிஸ்ஸதீதி மயி ஏவம் கதே²ந்தே ஸமணோ கோ³தமோ கிஞ்சி கதே²ஸ்ஸதி, ஏவம் மே வசனமத்தம்பி ந லத்³த⁴ந்தி அயம் க³ரஹா முச்சிஸ்ஸதீதி. பண்டி³தாதி பண்டி³ச்சேன ஸமன்னாக³தா. தீ⁴ராதி தி⁴திஸம்பன்னா. ப்³யத்தாதி பரவாத³மத்³த³னஸமத்தே²ன வேய்யத்தியேன ஸமன்னாக³தா. ப³ஹுஸ்ஸுதாதி பா³ஹுஸச்சவந்தோ. வாதி³னோதி வாதி³மக்³க³குஸலா. ஸம்மதாதி ப³ஹுனோ ஜனஸ்ஸ ஸாது⁴ஸம்மதா. பண்டி³தாதி³ஆகாரபரிச்சே²த³ந்தி தேஸம் தேவிஜ்ஜானம் பண்டி³தாகாராதி³ஆகாரபரிச்சே²த³ம். ஆகாரஸத்³தோ³ காரணபரியாயோ, பரிச்சே²த³ஸத்³தோ³ பரிமாணத்தோ²தி ஆஹ ‘‘ஏத்தகேன காரணேனா’’தி.

யதா²தி யேனாகாரேன, யேன காரணேனாதி அத்தோ². தேனாஹ ‘‘யதா²தி காரணவசன’’ந்தி. ‘‘த்³வீஹிபி பக்கே²ஹீ’’தி வத்வா தே பக்கே² ஸரூபதோ த³ஸ்ஸேந்தோ ‘‘மாதிதோ ச பிதிதோ சா’’தி ஆஹ. தேஸம் பக்கா²னம் வஸேனஸ்ஸ ஸுஜாததம் த³ஸ்ஸேதும் ‘‘யஸ்ஸ மாதா’’திஆதி³ வுத்தம். ஜனகஜனிகாபா⁴வேன வினாபி லோகே மாதாபிதுஸமஞ்ஞா தி³ஸ்ஸதி, இத⁴ பன ஸா ஓரஸபுத்தவஸேனேவ இச்சி²தாதி த³ஸ்ஸேதும் ‘‘ஸம்ஸுத்³த⁴க³ஹணிகோ’’தி வுத்தம். க³ப்³ப⁴ம் க³ண்ஹாதி தா⁴ரேதீதி க³ஹணீ, க³ப்³பா⁴ஸயஸஞ்ஞிதோ மாதுகுச்சி²ப்பதே³ஸோ. யதா²பு⁴த்தஸ்ஸ ஆஹாரஸ்ஸ விபாசனவஸேன க³ண்ஹனதோ அச²ட்³ட³னதோ க³ஹணீ, கம்மஜதேஜோதா⁴து.

பிதா ச மாதா ச பிதரோ, பிதூனம் பிதரோ பிதாமஹா, தேஸம் யுகோ³ பிதாமஹயுகோ³, தஸ்மா ‘‘யாவ ஸத்தமா பிதாமஹயுகா³ பிதாமஹத்³வந்தா³’’தி ஏவமேத்த² அத்தோ² த³ட்ட²ப்³போ³. அட்ட²கதா²யம் பன த்³வந்த³ம் அக்³க³ஹேத்வா ‘‘யுக³ந்தி ஆயுப்பமாணம் வுச்சதீ’’தி வுத்தம். யுக³-ஸத்³த³ஸ்ஸ ச அத்த²கதா² த³ஸ்ஸிதா ‘‘பிதாமஹோயேவ பிதாமஹயுக³’’ந்தி. புப்³ப³புரிஸாதி புரிஸக்³க³ஹணஞ்சேத்த² உக்கட்ட²னித்³தே³ஸவஸேன கதந்தி த³ட்ட²ப்³ப³ம். ஏவஞ்ஹி ‘‘மாதிதோ’’தி பாளிவசனம் ஸமத்தி²தம் ஹோதி. அக்கி²த்தோதி அக்கே²போ. அனவக்கி²த்தோதி ஸத்³த⁴தா²லிபாகாதீ³ஸு அனவக்கி²த்தோ ந ச²ட்³டி³தோ. ஜாதிவாதே³னாதி ஹேதும்ஹி கரணவசனந்தி த³ஸ்ஸேதும் ‘‘கேன காரணேனா’’திஆதி³ வுத்தம். ஏத்த² ச ‘‘உப⁴தோ…பே… பிதாமஹயுகா³’’தி ஏதேன ப்³ராஹ்மணஸ்ஸ யோனிதோ³ஸாபா⁴வோ த³ஸ்ஸிதோ ஸம்ஸுத்³த⁴க³ஹணிகதாகித்தனதோ. ‘‘அக்கி²த்தோ’’தி இமினா கிரியாபராதா⁴பா⁴வோ. ஸம்ஸுத்³த⁴ஜாதிகாபி ஹி ஸத்தா கிரியாபராதே⁴ன கே²பம் பாபுணந்தி. ‘‘அனுபக்குட்டோ²’’தி இமினா அயுத்தஸம்ஸக்³கா³பா⁴வோ. அயுத்தஸம்ஸக்³க³ஞ்ஹி படிச்ச ஸத்தா ஸுத்³த⁴ஜாதிகா கிரியாபராத⁴ரஹிதாபி அக்கோஸம் லப⁴ந்தி.

தந்தி க³ரஹாவசனம். மந்தே பரிவத்தேதீதி வேதே³ ஸஜ்ஜா²யதி, பரியாபுணாதீதி அத்தோ². மந்தே தா⁴ரேதீதி யதா²அதீ⁴தே மந்தே அஸம்முட்டே² கத்வா ஹத³யே ட²பேதி.

ஓட்ட²பஹதகரணவஸேனாதி அத்தா²வதா⁴ரணவஸேன. ஸனிக⁴ண்டு³கேடுபா⁴னந்தி ஏத்த² வசனீயவாசகபா⁴வேன அத்த²ம் ஸத்³த³ஞ்ச க²ண்ட³தி பி⁴ந்த³தி விப⁴ஜ்ஜ த³ஸ்ஸேதீதி நிக²ண்டு³, ஸோ ஏவ இத⁴ க²-காரஸ்ஸ க⁴-காரம் கத்வா ‘‘நிக⁴ண்டூ³’’தி வுத்தோ. கிடதி க³மேதி கிரியாதி³விபா⁴க³ம், தம் வா அனவஸேஸபரியாதா³னதோ க³மேந்தோ பூரேதீதி கேடுப⁴ம். வேவசனப்பகாஸகந்தி பரியாயஸத்³த³தீ³பகம், ஏகேகஸ்ஸ அத்த²ஸ்ஸ அனேகபரியாயவசனவிபா⁴வகந்தி அத்தோ². நித³ஸ்ஸனமத்தஞ்சேதம் அனேகேஸம்பி அத்தா²னம் ஏகஸத்³த³வசனீயதாவிபா⁴வனவஸேனபி தஸ்ஸ க³ந்த²ஸ்ஸ பவத்தத்தா. வசீபே⁴தா³தி³லக்க²ணா கிரியா கப்பீயதி விகப்பீயதி ஏதேனாதி கிரியாகப்போ, ஸோ பன வண்ணபத³ஸம்ப³ந்த⁴பத³த்தா²தி³விபா⁴க³தோ ப³ஹுகப்போதி ஆஹ ‘‘கிரியாகப்பவிகப்போ’’தி. இத³ஞ்ச மூலகிரியாகப்பக³ந்த²ம் ஸந்தா⁴ய வுத்தம். ஸோ ஹி மஹாவிஸயோ ஸதஸஹஸ்ஸபரிமாணோ நமாசரியாதி³ப்பகரணம். டா²னகரணாதி³விபா⁴க³தோ நிப்³ப³சனவிபா⁴க³தோ ச அக்க²ரா பபே⁴தீ³யந்தி ஏதேஹீதி அக்க²ரப்பபே⁴தா³, ஸிக்கா²னிருத்தியோ. ஏதேஸந்தி சதுன்னம் வேதா³னம்.

பத³ந்தி சதுப்³பி³த⁴ம், பஞ்சவித⁴ம் வா பத³ம், தம் பத³ம் காயதீதி பத³கோ, தேயேவ வா வேதே³ பத³ஸோ காயதீதி பத³கோ. தத³வஸேஸந்தி வுத்தாவஸேஸம் வாக்யம். ஏத்தாவதா ஸத்³த³ப்³யாகரணம் வத்வா புன ‘‘ப்³யாகரண’’ந்தி அத்த²ப்³யாகரணமாஹ. தம் தம் ஸத்³த³ம் தத³த்த²ஞ்ச ப்³யாகரோதி ப்³யாசிக்க²தி ஏதேனாதி ப்³யாகரணம், ஸத்³த³ஸத்த²ம். ஆயதிம் ஹிதம் தேன லோகோ ந யததி ந ஈஹதீதி லோகாயதம். தஞ்ஹி க³ந்த²ம் நிஸ்ஸாய ஸத்தா புஞ்ஞகிரியாய சித்தம்பி ந உப்பாதே³ந்தி.

அஸீதி மஹாஸாவகாதி அஞ்ஞாஸிகோண்ட³ஞ்ஞோ, வப்போ, ப⁴த்³தி³யோ, மஹானாமோ, அஸ்ஸஜி, நாளகோ, யஸோ, விமலோ, ஸுபா³ஹு, புண்ணஜி, க³வம்பதி, உருவேலகஸ்ஸபோ, நதீ³கஸ்ஸபோ, க³யாகஸ்ஸபோ, ஸாரிபுத்தோ, மஹாமோக்³க³ல்லானோ, மஹாகஸ்ஸபோ, மஹாகச்சானோ, மஹாகோட்டி²கோ, மஹாகப்பினோ, மஹாசுந்தோ³, அனுருத்³தோ⁴, கங்கா²ரேவதோ, ஆனந்தோ³, நந்த³கோ, ப⁴கு³, நந்தி³யோ, கிமிலோ, ப⁴த்³தி³யோ, ராஹுலோ, ஸீவலி, உபாலி, த³ப்³போ³, உபஸேனோ, க²தி³ரவனியரேவதோ, புண்ணோ மந்தானிபுத்தோ, புண்ணோ ஸுனாபரந்தகோ, ஸோணோ குடிகண்ணோ, ஸோணோ கோளிவிஸோ, ராதோ⁴, ஸுபூ⁴தி, அங்கு³லிமாலோ, வக்கலி, காளுதா³யீ, மஹாஉதா³யீ, பிலிந்த³வச்சோ², ஸோபி⁴தோ, குமாரகஸ்ஸபோ, ரட்ட²பாலோ, வங்கீ³ஸோ, ஸபி⁴யோ, ஸேலோ, உபவாணோ, மேகி⁴யோ, ஸாக³தோ, நாகி³தோ, லகுண்ட³கப⁴த்³தி³யோ, பிண்டோ³லோ பா⁴ரத்³வாஜோ, மஹாபந்த²கோ, சூளபந்த²கோ, பா³குலோ, குண்ட³தா⁴னோ, தா³ருசீரியோ, யஸோஜோ, அஜிதோ, திஸ்ஸமேத்தேய்யோ, புண்ணகோ, மேத்தகு³, தோ⁴தகோ, உபஸீவோ, நந்தோ³, ஹேமகோ, தோதே³ய்யோ, கப்போ, ஜதுகண்ணீ, ப⁴த்³ராவுதோ⁴, உத³யோ, போஸலோ, மோக⁴ராஜா, பிங்கி³யோதி ஏதே அஸீதி மஹாஸாவகா நாம.

கஸ்மா பனேதே ஏவ தே²ரா ‘‘மஹாஸாவகா’’தி வுச்சந்தீதி? அபி⁴னீஹாரஸ்ஸ மஹந்தபா⁴வதோ. ததா² ஹி த்³வே அக்³க³ஸாவகாபி மஹாஸாவகேஸு அந்தோக³தா⁴. தே ஹி ஸாவகபாரமிஞாணஸ்ஸ மத்த²கப்பத்தியா ஸாவகேஸு அக்³க³த⁴ம்மாதி⁴க³மேன அக்³க³ட்டா²னே டி²தாபி அபி⁴னீஹாரமஹந்ததாஸாமஞ்ஞேன ‘‘மஹாஸாவகா’’திபி வுச்சந்தி, இதரே பன பகதிஸாவகேஹி ஸாதிஸயம் மஹாபி⁴னீஹாரா. ததா² ஹி தே பது³முத்தரஸ்ஸ ப⁴க³வதோ காலே கதபணிதா⁴னா, ததோ ஏவ ஸாதிஸயம் அபி⁴ஞ்ஞாஸமாபத்தீஸு வஸினோ பபி⁴ன்னப்படிஸம்பி⁴தா³ ச. காமம் ஸப்³பே³பி அரஹந்தோ ஸீலவிஸுத்³தி⁴ஆதி³கே ஸம்பாதே³த்வா சதூஸு ஸதிபட்டா²னேஸு ஸுப்பதிட்டி²தசித்தா ஸத்த போ³ஜ்ஜ²ங்கே³ யதா²பூ⁴தம் பா⁴வேத்வா மக்³க³ப்படிபாடியா அனவஸேஸதோ கிலேஸே கே²பேத்வா அக்³க³ப²லே பதிட்ட²ஹந்தி, ததா²பி யதா² ஸத்³தா⁴விமுத்ததோ தி³ட்டி²ப்பத்தஸ்ஸ, பஞ்ஞாவிமுத்ததோ ச உப⁴தோபா⁴க³விமுத்தஸ்ஸ புப்³ப³பா⁴க³பா⁴வனாவிஸேஸஸித்³தோ⁴ மக்³க³பா⁴வனாவிஸேஸோ, ஏவம் அபி⁴னீஹாரமஹந்தத்தபுப்³ப³யோக³மஹந்தத்தா ஹி ஸஸந்தானே ஸாதிஸயஸ்ஸ கு³ணவிஸேஸஸ்ஸ நிப்பா²தி³தத்தா ஸீலாதீ³ஹி கு³ணேஹி மஹந்தா ஸாவகாதி மஹாஸாவகா. தேஸுயேவ பன யே போ³தி⁴பக்கி²யத⁴ம்மேஸு பாமோக்க²பா⁴வேன து⁴ரபூ⁴தானம் ஸம்மாதி³ட்டி²ஸங்கப்பாதீ³னம் ஸாதிஸயம் கிச்சானுபா⁴வனிப்ப²த்தியா காரணபூ⁴தாய தஜ்ஜாபி⁴னீஹாராபி⁴னீஹடாய ஸக்கச்சம் நிரந்தரம் சிரகாலஸம்பா⁴விதாய ஸம்மாபடிபத்தியா யதா²க்கமம் பஞ்ஞாய ஸமாதி⁴ஸ்மிஞ்ச உக்கட்ட²பாரமிப்பத்தியா ஸவிஸேஸம் ஸப்³ப³கு³ணேஹி அக்³க³பா⁴வே டி²தா, தே ஸாரிபுத்தமோக்³க³ல்லானா. இதரே அட்ட²ஸத்ததி தே²ரா ஸாவகபாரமியா மத்த²கே ஸப்³ப³ஸாவகானம் அக்³க³பா⁴வேன அட்டி²தத்தா ‘‘மஹாஸாவகா’’இச்சேவ வுச்சந்தி. பகதிஸாவகா பன அபி⁴னீஹாரமஹந்தத்தாபா⁴வதோ புப்³ப³யோக³மஹந்தத்தாபா⁴வதோ ச ‘‘ஸத்து²ஸாவகா’’இச்சேவ வுச்சந்தி. தே பன அக்³க³ஸாவகா விய மஹாஸாவகா விய ச ந பரிமிதா, அத² கோ² அனேகஸதா அனேகஸஹஸ்ஸா.

வயதீதி வயோ, ஆதி³மஜ்ஜ²பரியோஸானேஸு கத்த²சி அபரிகிலமந்தோ அவித்தா²யந்தோ தே க³ந்தே² ஸந்தானேதி பணேதீதி அத்தோ². த்³வே படிஸேதா⁴ பகதிம் க³மேந்தீதி த³ஸ்ஸேதும் ‘‘அவயோ ந ஹோதீ’’தி வத்வா தத்த² அவயம் த³ஸ்ஸேதும் ‘‘அவயோ நாம…பே… ந ஸக்கோதீ’’தி வுத்தம்.

இதா⁴தி இமஸ்மிம் ஸுத்தே. ஏதந்தி ‘‘விவிச்சேவ காமேஹீ’’திஆதி³வசனம். ததியவிஜ்ஜாதி⁴க³மாய படிபத்திக்கமோ விஸுத்³தி⁴மக்³கே³ (விஸுத்³தி⁴. 1.70) ஸாதிஸயம் வித்தா²ரிதோ, ததா² இத⁴ அவத்துகாமதாய ப⁴யபே⁴ரவஸுத்தாதீ³ஸு (ம. நி. 1.34 ஆத³யோ) விய ஸங்கே²பதோ ச வத்துகாமதாய ‘‘த்³வின்னம் விஜ்ஜான’’மிச்சேவ வுத்தம்.

விஜ்ஜாதி புப்³பே³னிவாஸப்படிச்சா²த³கஸ்ஸ மோஹக்க²ந்த⁴ஸ்ஸ விஜ்ஜனட்டே²னபி விஜ்ஜா. மோஹோ படிச்சா²த³கட்டே²ன தமோதி வுச்சதி தமோ வியாதி கத்வா. காதப்³ப³தோ கரணம், ஓபா⁴ஸோவ கரணம் ஓபா⁴ஸகரணம், அத்தனோ பச்சயேஹி ஓபா⁴ஸபா⁴வேன நிப்³ப³த்தேதப்³ப³ட்டே²னாதி அத்தோ². அயம் அத்தோ²தி அயமேவ அதி⁴ப்பேதத்தோ². பஸம்ஸாவசனந்தி தஸ்ஸேவ அத்த²ஸ்ஸ தோ²மனாவசனம் படிபக்க²வித⁴மனபவத்திவிஸேஸானம் போ³த⁴னதோ. யோஜனாதி பஸம்ஸாவஸேன வுத்தபதா³னம் அத்த²த³ஸ்ஸனவஸேன வுத்தபத³ஸ்ஸ ச யோஜனா. அவிஜ்ஜா விஹதாதி ஏதேன விஜ்ஜனட்டே²ன விஜ்ஜாதி அயம்பி அத்தோ² தீ³பிதோதி த³ட்ட²ப்³ப³ம். யஸ்மா விஜ்ஜா உப்பன்னாதி ஏதேன விஜ்ஜாபடிபக்கா² அவிஜ்ஜா, படிபக்க²தா சஸ்ஸா பஹாதப்³ப³பா⁴வேன விஜ்ஜாய ச பஹாயகபா⁴வேனாதி த³ஸ்ஸேதி. இதரஸ்மிம்பி பத³த்³வயேதி ‘‘தமோ விஹதோ, ஆலோகோ உப்பன்னோ’’தி பத³த்³வயேபி. ஏஸேவ நயோதி யதா²வுத்தயோஜனம் அதிதி³ஸதி. தத்தா²யம் யோஜனா – ஏவம் அதி⁴க³தவிஜ்ஜஸ்ஸ தமோ விஹதோ வித்³த⁴ஸ்தோ. கஸ்மா? யஸ்மா ஆலோகோ உப்பன்னோ ஞாணாலோகோ பாதுபூ⁴தோதி. பேஸிதத்தஸ்ஸாதி யதா²தி⁴ப்பேதத்த²ஸித்³தி⁴ப்பத்திம் விஸ்ஸட்ட²சித்தஸ்ஸ, பட²மவிஜ்ஜாதி⁴க³மாய பேஸிதசித்தஸ்ஸாதி வுத்தம் ஹோதி.

விபஸ்ஸனாபாத³கந்தி இமினா தஸ்ஸ ஜா²னசித்தஸ்ஸ நிப்³பே³த⁴பா⁴கி³யதமாஹ. விபஸ்ஸனா திவிதா⁴ விபஸ்ஸகபுக்³க³லபே⁴தே³ன. மஹாபோ³தி⁴ஸத்தானஞ்ஹி பச்சேகபோ³தி⁴ஸத்தானஞ்ச விபஸ்ஸனா சிந்தாமயஞாணஸம்வட்³டி⁴தத்தா ஸயம்பு⁴ஞாணபூ⁴தா, இதரேஸம் ஸுதமயஞாணஸம்வட்³டி⁴தத்தா பரோபதே³ஸஸம்பூ⁴தா. ஸா ‘‘ட²பேத்வா நேவஸஞ்ஞானாஸஞ்ஞாயதனம் அவஸேஸரூபாரூபஜ்ஜா²னானம் அஞ்ஞதரதோ வுட்டா²யா’’திஆதி³னா அனேகதா⁴ அரூபமுக²வஸேன சதுதா⁴துவவத்தா²னே வுத்தானம் தேஸம் தேஸம் தா⁴துபரிக்³க³ஹமுகா²னம் அஞ்ஞதரமுக²வஸேன ச அனேகதா⁴வ விஸுத்³தி⁴மக்³கே³ (விஸுத்³தி⁴. 1.306) நானானயதோ விபா⁴விதா. மஹாபோ³தி⁴ஸத்தானம் பன சதுவீஸதிகோடிஸதஸஹஸ்ஸமுகே²ன பபே⁴த³க³மனதோ நானானயம் ஸப்³ப³ஞ்ஞுதஞ்ஞாணஸன்னிஸ்ஸயஸ்ஸ அரியமக்³க³ஞாணஸ்ஸ அதி⁴ட்டா²னபூ⁴தம் புப்³ப³பா⁴க³ஞாணக³ப்³ப⁴ம் க³ண்ஹாபேந்தம் பரிபாகம் க³ச்ச²ந்தம் பரமக³ம்பீ⁴ரம் ஸண்ஹஸுகு²மதரம் அனஞ்ஞஸாதா⁴ரணம் விபஸ்ஸனாஞாணம் ஹோதி, யம் அட்ட²கதா²ஸு ‘‘மஹாவஜிரஞாண’’ந்தி வுச்சதி. யஸ்ஸ ச பவத்திவிபா⁴கே³ன சதுவீஸதிகோடிஸதஸஹஸ்ஸப்பபே⁴த³ஸ்ஸ பாத³கபா⁴வேன ஸமாபஜ்ஜியமானா சதுவீஸதிகோடிஸதஸஹஸ்ஸஸங்கா² தே³வஸிகம் ஸத்து² வளஞ்ஜனகஸமாபத்தியோ வுச்சந்தி, ஸ்வாயம் பு³த்³தா⁴னம் விபஸ்ஸனாசாரோ பரமத்த²மஞ்ஜூஸாயம் விஸுத்³தி⁴மக்³க³ஸம்வண்ணனாயம் (விஸுத்³தி⁴. மஹாடீ. 1.144) த³ஸ்ஸிதோ, அத்தி²கேஹி ததோ க³ஹேதப்³போ³தி. இத⁴ பன ஸாவகானம் விபஸ்ஸனாசாரம் ஸந்தா⁴ய ‘‘விபஸ்ஸனாபாத³க’’ந்தி வுத்தம்.

காமம் ஹேட்டி²மமக்³க³ஞாணானிபி ஆஸவானம் கே²பனஞாணானி ஏவ, அனவஸேஸதோ பன தேஸம் கே²பனம் அக்³க³மக்³க³ஞாணேனேவாதி ஆஹ ‘‘அரஹத்தமக்³க³ஞாணத்தா²யா’’தி. ஆஸவவினாஸனதோதி ஆஸவானம் நிஸ்ஸேஸம் ஸமுச்சி²ந்த³னதோ. ஆஸவானம் க²யே ஞாணம் ஆஸவக்க²யஞாணந்தி த³ஸ்ஸேந்தோ ‘‘தத்ர சேதம் ஞாண’’ந்தி வத்வா ‘‘க²யே’’தி ஆதா⁴ரே பு⁴ம்மம், ந விஸயேதி த³ஸ்ஸேந்தோ ‘‘தத்த² பரியாபன்னத்தா’’தி ஆஹ. அபி⁴னீஹரதீதி அபி⁴முக²ம் நீஹரதி, யதா² மக்³கா³பி⁴ஸமயோ ஹோதி, ஸவனம் தத³பி⁴முக²ம் பவத்தேதி. இத³ம் து³க்க²ந்தி து³க்க²ஸ்ஸ அரியஸச்சஸ்ஸ ததா³ பி⁴க்கு²னா பச்சக்க²தோ க³ஹிதபா⁴வத³ஸ்ஸனம். ஏத்தகம் து³க்க²ந்தி தஸ்ஸ பரிச்சி²ஜ்ஜ க³ஹிதபா⁴வத³ஸ்ஸனம். ந இதோ பி⁴ய்யோதி தஸ்ஸ அனவஸேஸதோ க³ஹிதபா⁴வத³ஸ்ஸனம். தேனாஹ ‘‘ஸப்³ப³ம்பி து³க்க²ஸச்ச’’ந்திஆதி³. ஸரஸலக்க²ணபடிவேதே⁴னாதி ஸபா⁴வஸங்கா²தஸ்ஸ லக்க²ணஸ்ஸ அஸம்மோஹதோ படிவிஜ்ஜ²னேன. அஸம்மோஹபடிவேதோ⁴தி ச யதா² தஸ்மிம் ஞாணே பவத்தே பச்சா² து³க்க²ஸச்சஸ்ஸ ஸரூபாதி³பரிச்சே²தே³ ஸம்மோஹோ ந ஹோதி, ததா² பவத்தி. தேனேவாஹ ‘‘யதா²பூ⁴தம் பஜானாதீ’’தி. து³க்க²ம் ஸமுதே³தி ஏதஸ்மாதி து³க்க²ஸமுத³யோ. யம் டா²னம் பத்வாதி யம் நிப்³பா³னம் மக்³க³ஸ்ஸ ஆரம்மணபச்சயட்டே²ன காரணபூ⁴தம் ஆக³ம்ம. பத்வாதி ச தது³ப⁴யவதோ புக்³க³லஸ்ஸ பவத்தியாதி கத்வா வுத்தம். பத்வாதி வா பாபுணனஹேது. அப்பவத்திந்தி அப்பவத்தினிமித்தம். தே வா ந பவத்தந்தி ஏத்தா²தி அப்பவத்தி, நிப்³பா³னம். தஸ்ஸாதி து³க்க²னிரோத⁴ஸ்ஸ. ஸம்பாபகந்தி ஸச்சி²கிரியாவஸேன ஸம்மதே³வ பாபகம்.

கிலேஸவஸேனாதி ஆஸவஸங்கா²தகிலேஸவஸேன. யஸ்மா ஆஸவானம் து³க்க²ஸச்சபரியாயோ தப்பரியாபன்னத்தா ஸேஸஸச்சானஞ்ச தம்ஸமுத³யாதி³பரியாயோ அத்தி², தஸ்மா வுத்தம் ‘‘பரியாயதோ’’தி. த³ஸ்ஸேந்தோ ஸச்சானீதி யோஜனா. ஆஸவானஞ்சேத்த² க³ஹணம் ‘‘ஆஸவானம் க²யஞாணாயா’’தி ஆரத்³த⁴த்தா. ததா² ஹி ‘‘காமாஸவாபி சித்தம் விமுச்சதீ’’திஆதி³னா ஆஸவவிமுத்திஸீஸேனேவ ஸப்³ப³கிலேஸவிமுத்தி வுத்தா. ‘‘இத³ம் து³க்க²ந்தி யதா²பூ⁴தம் பஜானாதீ’’திஆதி³னா மிஸ்ஸகமக்³கோ³ இத⁴ கதி²தோதி ‘‘ஸஹ விபஸ்ஸனாய கோடிப்பத்தம் மக்³க³ம் கதே²ஸீ’’தி வுத்தம். ஜானதோ பஸ்ஸதோதி இமினா பரிஞ்ஞாஸச்சி²கிரியாபா⁴வனாபி⁴ஸமயா வுத்தா. விமுச்சதீதி இமினா பஹானாபி⁴ஸமயோ வுத்தோதி ஆஹ ‘‘இமினா மக்³க³க்க²ணம் த³ஸ்ஸேதீ’’தி. ஜானதோ பஸ்ஸதோதி வா ஹேதுனித்³தே³ஸோ. யம் ஜானனஹேது காமாஸவாபி சித்தம் விமுச்சதீதி யோஜனா. த⁴ம்மானஞ்ஹி ஸமானகாலிகானம்பி பச்சயபச்சயுப்பன்னதா ஸஹஜாதகோடியா லப்³ப⁴தி. ப⁴வாஸவக்³க³ஹணேனேவ ஏத்த² ப⁴வராக³ஸ்ஸ விய ப⁴வதி³ட்டி²யாபி ஸமவரோதோ⁴தி தி³ட்டா²ஸவஸ்ஸபி ஸங்க³ஹோ த³ட்ட²ப்³போ³.

கீ²ணா ஜாதீதிஆதீ³ஹி பதே³ஹி. தஸ்ஸாதி பச்சவேக்க²ணஞாணஸ்ஸ. பூ⁴மிந்தி பவத்திட்டா²னம். யேனாதி⁴ப்பாயேன ‘‘கதமா பனஸ்ஸா’’திஆதி³னா சோத³னா கதா, தம் விவரந்தோ ‘‘ந தாவஸ்ஸா’’திஆதி³மாஹ. தத்த² ந தாவஸ்ஸ அதீதா ஜாதி கீ²ணா மக்³க³பா⁴வனாயாதி அதி⁴ப்பாயோ. தத்த² காரணமாஹ ‘‘புப்³பே³வ கீ²ணத்தா’’தி. ந அனாக³தா அஸ்ஸ ஜாதி கீ²ணாதி யோஜனா. ந அனாக³தாதி ச அனாக³தபா⁴வஸாமஞ்ஞம் க³ஹேத்வா லேஸேன சோதே³தி. தேனாஹ ‘‘அனாக³தே வாயாமாபா⁴வதோ’’தி. அனாக³தவிஸேஸோ பனேத்த² அதி⁴ப்பேதோ, தஸ்ஸ கே²பனே வாயாமோ லப்³ப⁴தேவ. தேனாஹ ‘‘யா பன மக்³க³ஸ்ஸா’’திஆதி³. ஏகசதுபஞ்சவோகாரப⁴வேஸூதி ப⁴வத்தயக்³க³ஹணம் வுத்தனயேன அனவஸேஸதோ ஜாதியா கீ²ணபா⁴வத³ஸ்ஸனத்த²ம். தந்தி யதா²வுத்தம் ஜாதிம். ஸோதி கீ²ணாஸவோ பி⁴க்கு².

ப்³ரஹ்மசரியவாஸோ நாம இத⁴ மக்³க³ப்³ரஹ்மசரியஸ்ஸ நிப்³ப³த்தனமேவாதி ஆஹ ‘‘பரிவுத்த²’’ந்தி. ஸம்மாதி³ட்டி²யா சதூஸு ஸச்சேஸு பரிஞ்ஞாதி³கிச்சஸாத⁴னவஸேன பவத்தமானாய ஸம்மாஸங்கப்பாதீ³னம்பி து³க்க²ஸச்சே பரிஞ்ஞாபி⁴ஸமயானுகு³ணா பவத்தி, இதரேஸு ச ஸச்சேஸு நேஸம் பஹானாபி⁴ஸமயாதி³வஸேன பவத்தி பாகடா ஏவ. தேன வுத்தம் ‘‘சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாபி⁴ஸமயவஸேனா’’தி. புது²ஜ்ஜனகல்யாணகாத³யோதி ஆதி³-ஸத்³தே³ன ஸத்தஸேக²ம் ஸங்க³ண்ஹாதி.

இத்த²த்தாயாதி இமே பகாரா இத்த²ம், தப்³பா⁴வோ இத்த²த்தம், தத³த்த²ந்தி வுத்தம் ஹோதி. தே பன பகாரா அரியமக்³க³ப்³யாபாரபூ⁴தா பரிஞ்ஞாத³யோ இதா⁴தி⁴ப்பேதாதி ஆஹ ‘‘ஏவம்ஸோளஸவித⁴கிச்சபா⁴வாயா’’தி. தே ஹி மக்³க³ம் பச்சவேக்க²தோ மக்³கா³னுபா⁴வேன பாகடா ஹுத்வா உபட்ட²ஹந்தி, பரிஞ்ஞாதீ³ஸு ச பஹானமேவ பதா⁴னம் தத³த்த²த்தா இதரேஸந்தி ஆஹ ‘‘கிலேஸக்க²யாய வா’’தி. பஹீனகிலேஸபச்சவேக்க²ணவஸேன வா ஏதம் வுத்தம். து³தியவிகப்பே இத்த²த்தாயாதி நிஸ்ஸக்கே ஸம்பதா³னவசனந்தி ஆஹ ‘‘இத்த²பா⁴வதோ’’தி. அபரந்தி அனாக³தம். இமே பன சரிமகத்தபா⁴வஸங்கா²தா பஞ்சக்க²ந்தா⁴. பரிஞ்ஞாதா திட்ட²ந்தீதி ஏதேன தேஸம் அப்பதிட்ட²தம் த³ஸ்ஸேதி. அபரிஞ்ஞாமூலகா ஹி பதிட்டா². யதா²ஹ ‘‘கப³ளீகாரே சே, பி⁴க்க²வே, ஆஹாரே அத்தி² ராகோ³, அத்தி² நந்தீ³, அத்தி² தண்ஹா, பதிட்டி²தம் தத்த² விஞ்ஞாணம் விருள்ஹ’’ந்திஆதி³ (ஸம். நி. 2.64; கதா². 296; மஹானி. 7). தேனேவாஹ – ‘‘சி²ன்னமூலகா ருக்கா² வியா’’திஆதி³.

யஸ்ஸாதி புது²ஜ்ஜனஸ்ஸ. தஸ்ஸ ஹி ஸீலம் கதா³சி வட்³ட⁴தி, கதா³சி ஹாயதி. ஸேக்கா²பி பன ஸீலேஸு பரிபூரகாரினோவ, அஸேக்கே²ஸு வத்தப்³ப³மேவ நத்தி². தேனாஹ ‘‘கீ²ணாஸவஸ்ஸா’’திஆதி³. வஸிப்பத்தந்தி வஸீபா⁴வப்பத்தம். ஸுட்டு² ஸமாஹிதந்தி அக்³க³ப²லஸமாதி⁴னா ஸம்மதே³வ ஸமாஹிதம். தி⁴திஸம்பன்னந்தி அக்³க³ப²லதி⁴தியா ஸமன்னாக³தம். மச்சும் ஜஹித்வா டி²தந்தி ஆயதிம் புனப்³ப⁴வாபா⁴வதோ வுத்தம். கத²ம் புனப்³ப⁴வாபா⁴வோதி ஆஹ ‘‘ஸப்³பே³ பாபத⁴ம்மே பஜஹித்வா டி²த’’ந்தி. ஸப்³ப³ஸ்ஸபி ஞேய்யத⁴ம்மஸ்ஸ சதுஸச்சந்தோக³த⁴த்தா வுத்தம் ‘‘பு³த்³த⁴ந்தி சதுஸச்சபு³த்³த⁴’’ந்தி. பு³த்³த⁴ஸாவகாதி ஸாவகபு³த்³தா⁴ நமஸ்ஸந்தி, பகே³வ இதரா பஜா. இதரா ஹி பஜா ஸாவகேபி நமஸ்ஸந்தி. இதி ஏத்தகேன டா²னேன ஸம்மாஸம்பு³த்³த⁴ஸ்ஸ வஸேன கா³தா²னம் அத்த²ம் வத்வா இதா³னி ஸாவகஸ்ஸபி வஸேன அத்த²ம் யோஜேத்வா த³ஸ்ஸேதும் ‘‘அத² வா’’திஆதி³ வுத்தம். ஸாவகோபி கோ³தமோ முக²னிப்³ப³த்தேன ஸம்பத்தேன ஸம்ப³ந்தே⁴ன, யதோ ஸப்³பே³பி அரியஸாவகா ப⁴க³வதோ ஓரஸபுத்தாதி வுச்சந்தீதி.

நிவுஸ்ஸதீதி நிவாஸோ, நிவுத்தோ² க²ந்த⁴ஸந்தானோதி ஆஹ ‘‘நிவுத்த²க்க²ந்த⁴பரம்பர’’ந்தி. அவேதி, அவேதீ³தி பாட²த்³வயேனபி புப்³பே³னிவாஸஞாணஸ்ஸ கிச்சஸித்³தி⁴ம்யேவ த³ஸ்ஸேதி. ஏகத்தகாயஏகத்தஸஞ்ஞிபா⁴வஸாமஞ்ஞதோ வேஹப்ப²லாபி ஏத்தே²வ ஸங்க³ஹம் க³ச்ச²ந்தீதி ‘‘ச² காமாவசரே, நவ ப்³ரஹ்மலோகே’’இச்சேவ வுத்தம். இதரே பன அபசுரபா⁴வதோ ந வுத்தா. ஏகச்சானம் அவிஸயபா⁴வதோ ச அவசனம் த³ட்ட²ப்³ப³ம். ஜாதி கீ²யதி ஏதேனாதி ஜாதிக்க²யோ, அரஹத்தந்தி ஆஹ ‘‘அரஹத்தம் பத்தோ’’தி. ‘‘அபி⁴ஞ்ஞாயா’’தி வத்தப்³பே³ யகாரலோபேன ‘‘அபி⁴ஞ்ஞா’’தி நித்³தே³ஸோ கதோதி ஆஹ ‘‘ஜானித்வா’’தி. கிச்சவோஸானேனாதி சதூஹி மக்³கே³ஹி கத்தப்³ப³ஸ்ஸ ஸோளஸவித⁴ஸ்ஸ கிச்சஸ்ஸ பரியோஸானேன. வோஸிதோதி பரியோஸிதோ, நிட்டி²தோதி அத்தோ². மோனேய்யேன ஸமன்னாக³தோதி காயமோனேய்யாதீ³ஹி ஸமன்னாக³தோ. லபிதம் லபதீதி லபிதலாபனோ. அத்தபச்சக்க²தோ ஞத்வாதி இமினா தேஸம் விஜ்ஜானம் படிலத்³த⁴பா⁴வம் தீ³பேதி.

திகண்ணஸுத்தவண்ணனா நிட்டி²தா.

9. ஜாணுஸ்ஸோணிஸுத்தவண்ணனா

60. நவமே தே³ய்யத⁴ம்மஸ்ஸேதம் நாமந்தி யாக³ம் கரோந்தேன தா³தப்³ப³தே³ய்யத⁴ம்மம் ஸந்தா⁴ய வத³தி தத³ஞ்ஞஸ்ஸ பாளியம் தே³ய்யத⁴ம்மக்³க³ஹணேனேவ க³ஹிதத்தா. மதகப⁴த்தந்தி மதகே உத்³தி³ஸ்ஸ தா³தப்³ப³ப⁴த்தம், பிதுபிண்ட³ந்தி வுத்தம் ஹோதி. வரபுரிஸானந்தி விஸிட்ட²புரிஸானம், உத்தமபுரிஸானந்தி அத்தோ². ஸப்³ப³மேதம் தா³னந்தி யதா²வுத்தபே⁴த³ம் யஞ்ஞஸத்³தா⁴தி³தா³னம்.

ஜாணுஸ்ஸோணிஸுத்தவண்ணனா நிட்டி²தா.

10. ஸங்கா³ரவஸுத்தவண்ணனா

61. த³ஸமே ஜிண்ணானம் ஹத்தி²ஸாலாதீ³னம் படிஸங்க²ரணம் புன பாகதிககரணம் ஜிண்ணபடிஸங்க²ரணம், தஸ்ஸ காரகோ ஜிண்ணபடிஸங்க²ரணகாரகோ. பா³ஹிரஸமயேதி ஸத்து²ஸாஸனதோ பா³ஹிரே அஞ்ஞதித்தி²யஸமயே. ஸப்³ப³சதுக்கேனாதிஆதீ³ஸு ஸப்³பே³ஸு த்³விபத³சதுப்பதா³தி³பே⁴தே³ஸு பாணேஸு ஏகேகஸ்மிம் சத்தாரோ சத்தாரோ பாணே வதி⁴த்வா யஜிதப்³ப³ம் யஞ்ஞம் ஸப்³ப³சதுக்கம் நாம. ஸேஸேஸுபி இமினா நயேன அத்தோ² வேதி³தப்³போ³. யஸ்ஸ வா தஸ்ஸ வாதி நிஸ்ஸக்கே ஸாமிவசனந்தி ஆஹ ‘‘யஸ்மா வா தஸ்மா வா’’தி. ஏவமஸ்ஸாயந்தி ஏத்த² அஸ்ஸூதி நிபாதமத்தந்தி ஆஹ ‘‘ஏவம் ஸந்தேபி அய’’ந்தி.

வட்³டே⁴ந்தோதி பட்ட²பேந்தோ. மக்³க³ப்³ரஹ்மசரியஸ்ஸ ஓக³த⁴ம் மூலம் பதிட்டா²பூ⁴தம் ப்³ரஹ்மசரியோக³த⁴ம். தேனாஹ ‘‘அரஹத்தமக்³க³ஸங்கா²தஸ்ஸா’’திஆதி³. உக்கட்ட²னித்³தே³ஸேன சேத்த² அரஹத்தமக்³க³ஸ்ஸேவ க³ஹணம் கதந்தி த³ட்ட²ப்³ப³ம். உத்தமம் பதிட்டா²பூ⁴தம் ஆரம்மணூபனிஸ்ஸயபா⁴வேன.

அப்பேஹி வேய்யாவச்சகராதீ³ஹி அத்தோ² ஏதிஸ்ஸாதி அப்பட்டா² த்த²-காரஸ்ஸ ட்ட²-காரம் கத்வா. தேனாஹ ‘‘யத்த² ப³ஹூ’’திஆதி³. யத்தா²தி யஸ்ஸம் படிபதா³யம். அப்போ ஸமாரம்போ⁴ ஏதஸ்ஸாதி அப்பஸமாரம்போ⁴. பாஸம்ஸாதி பஸம்ஸாரஹா. ஏதம் யேவ கதா²பேஸ்ஸாமீதி ஏதேனேவ ப்³ராஹ்மணேன கதா²பேஸ்ஸாமி.

ஸோப்பேனாதி நித்³தா³ய. பமாதே³னாதி ஜாக³ரியாதீ³ஸு அனனுயுஞ்ஜனதோ ஸதிவிப்பவாஸலக்க²ணேன பமாதே³ன. பச்சனீகபடிஹரணவஸேனாதி படிபக்கா²பனயனவஸேன. ததா² ஹி ப⁴க³வதோ ச ஸாஸனஸ்ஸ ச படிபக்கா² தித்தி²யா, தேஸம் ஹரணதோ படிஹாரியம். தே ஹி தி³ட்டி²ஹரணவஸேன தி³ட்டி²ப்பகாஸனே அஸமத்த²பா⁴வேன ச இத்³தி⁴ஆதே³ஸனானுஸாஸனீஹி ஹரிதா அபனீதா ஹோந்தீதி. ‘‘படீ’’தி வா அயம் ஸத்³தோ³ ‘‘பச்சா²’’தி ஏதஸ்ஸ அத்த²ம் போ³தே⁴தி ‘‘தஸ்மிம் படிபவிட்ட²ஸ்மிம், அஞ்ஞோ ஆக³ஞ்சி² ப்³ராஹ்மணோ’’திஆதீ³ஸு (ஸு. நி. 985; சூளனி. வத்து²கா³தா² 4) விய, தஸ்மா ஸமாஹிதே சித்தே விக³தூபக்கிலேஸே கதகிச்சேன பச்சா² ஹரிதப்³ப³ம் பவத்தேதப்³ப³ந்தி படிஹாரியம், அத்தனோ வா உபக்கிலேஸேஸு சதுத்த²ஜ்ஜா²னமக்³கே³ஹி ஹரிதேஸு பச்சா²ஹரணம் படிஹாரியம், இத்³தி⁴ஆதே³ஸனானுஸாஸனியோ ச விக³தூபக்கிலேஸேன கதகிச்சேன ச ஸத்தஹிதத்த²ம் புன பவத்தேதப்³பா³, ஹரிதேஸு ச அத்தனோ உபக்கிலேஸேஸு பரஸத்தானம் உபக்கிலேஸஹரணானி ஹோந்தீதி படிஹாரியானி ப⁴வந்தி, படிஹாரியமேவ பாடிஹாரியம். படிஹாரியே வா இத்³தி⁴ஆதே³ஸனானுஸாஸனிஸமுதா³யே ப⁴வம் ஏகேகம் பாடிஹாரியந்தி வுச்சதி. படிஹாரியம் வா சதுத்த²ஜ்ஜா²னம் மக்³கோ³ ச படிபக்க²ஹரணதோ, தத்த² ஜாதம் நிமித்தபூ⁴தே, ததோ வா ஆக³தந்தி பாடிஹாரியம்.

ஆக³தனிமித்தேனாதி ஆக³தாகாரஸல்லக்க²ணவஸேன. ஏஸ நயோ ஸேஸேஸுபி. ஏகோ ராஜாதி த³க்கி²ணமது⁴ராதி⁴பதி ஏகோ பண்டு³ராஜா. ஏவம்பி தே மனோதி இமினா ஆகாரேன தவ மனோ பவத்தோதி அத்தோ². தேன பகாரேன பவத்தோதி ஆஹ ‘‘ஸோமனஸ்ஸிதோ வா’’திஆதி³. ஸாமஞ்ஞஜோதனா விஸேஸே அவதிட்ட²தீதி அதி⁴ப்பாயேனேவம் வுத்தம். ‘‘ஏவம் தவ மனோ’’தி இத³ஞ்ச மனஸோ ஸோமனஸ்ஸிததாதி³மத்தத³ஸ்ஸனம், ந பன யேன ஸோ ஸோமனஸ்ஸிதோ வா தோ³மனஸ்ஸிதோ வா, தம்த³ஸ்ஸனம். ஸோமனஸ்ஸக்³க³ஹணேன சேத்த² ததே³கட்டா² ராகா³த³யோ ஸத்³தா⁴த³யோ ச த³ஸ்ஸிதா ஹோந்தி, தோ³மனஸ்ஸக்³க³ஹணேன தோ³ஸாத³யோ. து³தியந்தி ‘‘இத்த²ம்பி தே மனோ’’தி பத³ம். இதிபீதி ஏத்த² இதி-ஸத்³தோ³ நித³ஸ்ஸனத்தோ² ‘‘அத்தீ²தி கோ², கச்சான, அயமேகோ அந்தோ’’திஆதீ³ஸு (ஸம். நி. 2.15; 3.90) விய. தேனாஹ ‘‘இமஞ்ச இமஞ்ச அத்த²ம் சிந்தயமான’’ந்தி. பி-ஸத்³தோ³ வுத்தத்த²ஸம்பிண்ட³னத்தோ².

கதே²ந்தானம் ஸுத்வாதி கதே²ந்தானம் ஸத்³த³ம் ஸுத்வா. தஸ்ஸ வஸேனாதி தஸ்ஸ விதக்கிதஸ்ஸ வஸேன. அட்டகாரகேனாதி வினிச்ச²யகாரகேன.

ந அரியானந்தி அரியானம் மக்³க³ப²லசித்தம் ந ஜானாதீதி அத்தோ². தஞ்ஹி தேன அனதி⁴க³தத்தா சேதோபரியஞாணேனபி ந ஸக்கா விஞ்ஞாதும், அஞ்ஞம் பன சித்தம் ஜானாதியேவ. ஹேட்டி²மோ உபரிமஸ்ஸ சித்தம் ந ஜானாதீதிஆதீ³னிபி மக்³க³ப²லசித்தமேவ ஸந்தா⁴ய வுத்தானீதி வேதி³தப்³பா³னி. ஸோதாபன்னாத³யோபி ஹி அத்தனா அதி⁴க³தமேவ மக்³க³ப²லம் பரேஹி உப்பாதி³தம் ஸம்மா சேதோபரியஞாணேன ஜானிதும் ஸக்கோந்தி, ந அத்தனா அனதி⁴க³தம். ஸப்³பே³பி அரியா அத்தனோ ப²லம் ஸமாபஜ்ஜந்தி அதி⁴க³தத்தாதி த³ஸ்ஸேந்தோ ‘‘ஏதேஸு சா’’திஆதி³மாஹ. யதி³ அரியா அத்தனா அதி⁴க³தப²லம் ஸமாபஜ்ஜந்தி, உபரிமாபி ஹேட்டி²மம் ப²லம் ஸமாபஜ்ஜந்தி அதி⁴க³தத்தா லோகியஸமாபத்தியோ வியாதி கஸ்ஸசி ஆஸங்கா ஸியா, தன்னிவத்தனத்த²மாஹ ‘‘உபரிமோ ஹேட்டி²மம் ந ஸமாபஜ்ஜதீ’’தி.

உபரிமோதி ஸகதா³கா³மிஆதி³அரியபுக்³க³லோ. ஹேட்டி²மந்தி ஸோதாபத்திப²லாதி³ம். ந ஸமாபஜ்ஜதீதி ஸதிபி அதி⁴க³தத்தே ந ஸமாபஜ்ஜதி. கஸ்மாதி சே? காரணமாஹ ‘‘தேஸஞ்ஹீ’’திஆதி³, தேஸம் ஸகதா³கா³மிஆதீ³னம் ஹேட்டி²மா ஹேட்டி²மா ப²லஸமாபத்தி தேஸு தேஸுயேவ ஹேட்டி²மேஸு அரியபுக்³க³லேஸு பவத்ததி, ந உபரிமேஸூதி அத்தோ². இமினா ஹேட்டி²மம் ப²லசித்தம் உபரிமஸ்ஸ ந உப்பஜ்ஜதீதி த³ஸ்ஸேதி. கஸ்மாதி சே? புக்³க³லந்தரபா⁴வூபக³மனேன படிப்பஸ்ஸத்³த⁴த்தா. ஏதேன உபரிமோ அரியோ ஹேட்டி²மம் ப²லஸமாபத்திம் ஸமாபஜ்ஜதி அத்தனா அதி⁴க³தத்தா யதா² தம் லோகியஸமாபத்திந்தி ஏவம் பவத்தோ ஹேது ப்³யபி⁴சாரிதோதி த³ட்ட²ப்³ப³ம். ந ஹி லோகியஜ்ஜா²னேஸு புக்³க³லந்தரபா⁴வூபக³மனம் நாம அத்தி² விஸேஸாபா⁴வதோ, இத⁴ பன அஸமுக்³கா⁴டிதகம்மகிலேஸனிரோத⁴னேன புது²ஜ்ஜனேஹி விய ஸோதாபன்னஸ்ஸ ஸோதாபன்னாதீ³ஹி ஸகதா³கா³மிஆதீ³னம் புக்³க³லந்தரபா⁴வூபக³மனம் அத்தி². யதோ ஹேட்டி²மா ஹேட்டி²மா ப²லத⁴ம்மா உபரூபரிமக்³க³த⁴ம்மேஹி நிவத்திதா படிபக்கே²ஹி விய அபி⁴பூ⁴தா அப்பவத்தித⁴ம்மதம்யேவ ஆபன்னா. தேனேவ வுத்தம் ‘‘படிப்பஸ்ஸத்³த⁴த்தா’’தி.

அபிச குஸலகிரியப்பவத்தி நாம அஞ்ஞா, விபாகப்பவத்தி ச அஞ்ஞாதி அனந்தரப²லத்தா ச லோகுத்தரகுஸலானம் ஹேட்டி²மதோ உபரிமோ ப⁴வந்தரக³தோ விய ஹோதி. தம்தம்ப²லவஸேனேவ ஹி அரியானம் ஸோதாபன்னாதி³னாமலாபோ⁴. தே ஸசே அஞ்ஞப²லஸமங்கி³னோபி ஹோந்தி, ஸோதாபன்னாதி³னாமம்பி தேஸம் அவவத்தி²தம் ஸியா. தஸ்ஸ தஸ்ஸ வா அரியஸ்ஸ தம் தம் ப²லம் ஸதி³ஸந்தி கத்வா ந உபரிமஸ்ஸ ஹேட்டி²மப²லஸமங்கி³தாய லேஸோபி ஸம்ப⁴வதி, குதோ தஸ்ஸா ஸமாபஜ்ஜனந்தி த³ட்ட²ப்³ப³ம். ஹேட்டி²மா ச ஸோதாபன்னாத³யோ உபரிமம் ஸகதா³கா³மிப²லாதி³ம் ந ஸமாபஜ்ஜந்தி அனதி⁴க³தத்தா. ந ஹி அனதி⁴க³தம் ஸமாபத்திம் ஸமாபஜ்ஜிதும் ஸக்கா, தஸ்மா ஸப்³பே³பி அரியா அத்தனோயேவ ப²லம் ஸமாபஜ்ஜந்தீதி நிட்ட²மேத்த² க³ந்தப்³ப³ம்.

பவத்தேந்தாதி பவத்தகா ஹுத்வா, பவத்தனவஸேனாதி அத்தோ². ஏவந்தி யதா²னுஸிட்டா²ய அனுஸாஸனியா விதி⁴வஸேன படிஸேத⁴வஸேன ச பவத்திதாகாரபராமஸனம். ஸா ச ஸம்மாவிதக்கா நாம மிச்சா²விதக்கானஞ்ச பவத்திஆகாரத³ஸ்ஸனவஸேன பவத்ததி. தத்த² ஆனிஸம்ஸஸ்ஸ ஆதீ³னவஸ்ஸ ச விபா⁴வனத்த²ம் அனிச்சஸஞ்ஞமேவ, ந நிச்சஸஞ்ஞந்தி அத்தோ². படியோகி³னிவத்தனத்த²ஞ்ஹி ஏவ-காரக்³க³ஹணம். இதா⁴பி ஏவஸத்³த³க்³க³ஹணஸ்ஸ அத்தோ² பயோஜனஞ்ச வுத்தனயேனேவ வேதி³தப்³ப³ம். இத³ம்-க³ஹணேபி ஏஸேவ நயோ. பஞ்சகாமகு³ணராக³ந்தி நித³ஸ்ஸனமத்தம் த³ட்ட²ப்³ப³ம் தத³ஞ்ஞராக³ஸ்ஸ தோ³ஸாதீ³னஞ்ச பஹானஸ்ஸ இச்சி²தத்தா தப்பஹானஸ்ஸ ச தத³ஞ்ஞராகா³தி³கே²பஸ்ஸ உபாயபா⁴வதோ. ததா² வுத்தம் து³ட்ட²லோஹிதவிமோசனஸ்ஸ புப்³ப³து³ட்ட²மம்ஸகே²பனூபாயதா விய. லோகுத்தரத⁴ம்மமேவாதி அவதா⁴ரணம் படிக்கே²பபா⁴வதோ ஸாவஜ்ஜத⁴ம்மனிவத்தனபரம் த³ட்ட²ப்³ப³ம், தஸ்ஸ அதி⁴க³மூபாயானிஸம்ஸபூ⁴தானம் தத³ஞ்ஞேஸம் அனவஜ்ஜத⁴ம்மானம் நானந்தரியபா⁴வதோ.

சிந்தாமணிகவிஜ்ஜாஸரிக்க²கதந்தி இமினா ‘‘சிந்தாமணீ’’தி ஏவம் லத்³த⁴னாமா லோகே ஏகா விஜ்ஜா அத்தி², யாய பரேஸம் சித்தம் விஜானந்தீதி தீ³பேதி. ‘‘தஸ்ஸா கிர விஜ்ஜாய ஸாத⁴கோ புக்³க³லோ தாதி³ஸே தே³ஸகாலே மந்தம் பரிஜப்பித்வா யஸ்ஸ சித்தம் ஜானிதுகாமோ, தஸ்ஸ தி³ட்ட²ஹத்தா²தி³விஸேஸஸஞ்ஜானனமுகே²ன சித்தாசாரம் அனுமினந்தோ கதே²தீ’’தி கேசி. அபரே ‘‘வாசம் நிச்ச²ராபேத்வா தத்த² அக்க²ரஸல்லக்க²ணவஸேனா’’தி வத³ந்தி.

இத³ஞ்ச பன ஸப்³ப³ந்தி ‘‘ப⁴வம் கோ³தமோ அனேகவிஹிதம் இத்³தி⁴வித⁴ம் பச்சனுபோ⁴தீ’’திஆதி³னயப்பவத்தம் ஸப்³ப³ம்பி.

ஸங்கா³ரவஸுத்தவண்ணனா நிட்டி²தா.

ப்³ராஹ்மணவக்³க³வண்ணனா நிட்டி²தா.