5. சூளவக்³கோ³
1. ஸம்முகீ²பா⁴வஸுத்தவண்ணனா
41. பஞ்சமஸ்ஸ பட²மே ஸம்முகோ² ப⁴வதி யேன ஸோ ஸம்முகீ²பா⁴வோ, புரதோ விஜ்ஜமானதா, தஸ்மா ஸம்முகீ²பா⁴வா. புஞ்ஞகம்மந்தி தா³னஸங்கா²தம் புஞ்ஞகம்மம். த்³வே த⁴ம்மா ஸுலபா⁴ பா³ஹிரத்தா யதா²ஸகம் பச்சயஸமவாயேன லப்³ப⁴னதோ. ஸத்³தா⁴ பன து³ல்லபா⁴ பசுரஜனஸ்ஸ அனவட்டி²தகிச்சத்தா. தேனேவாஹ ‘‘புது²ஜ்ஜனஸ்ஸா’’திஆதி³.
ஸம்முகீ²பா⁴வஸுத்தவண்ணனா நிட்டி²தா.
2. திடா²னஸுத்தவண்ணனா
42. து³தியே மச்ச²ரியமேவ மலம் மச்ச²ரியமலம், சித்தஸ்ஸ மலீனஸபா⁴வாபாத³னதோ விக³தம் மச்ச²ரியமலம் ஏத்தா²தி விக³தமச்ச²ரியமலம். கே³தா⁴பா⁴வேன கோசி கிஞ்சி தே³ந்தோபி தத்த² ஆஸத்திம் ந விஸ்ஸஜ்ஜேதி, அயம் பன ந தாதி³ஸோதி ஆஹ ‘‘விஸ்ஸட்ட²சாகோ³’’தி. மலீனஹத்தோ²வ சித்தவிஸுத்³தி⁴யா அபா⁴வதோ. தோ⁴தஹத்தோ²வ தோ⁴தஹத்தே²ன காதப்³ப³கிச்சஸாத⁴னதோ. தேன வுத்தம் – ‘‘சித்தே ஸுத்³தே⁴ விஸுஜ்ஜ²ந்தி, இதி வுத்தம் மஹேஸினா’’தி. யாசிதும் யுத்தோ யாசகானம் மனோரத²பூரணதோ. யாசயோகோ³ பயோகா³ஸஹேஹி யாசகேஹி ஸுட்டு² யுத்தபா⁴வதோ. தம்ஸமங்கீ³ ஏவ தத்த² ரதோ நாம, ந சித்தமத்தேனேவாதி ஆஹ ‘‘தா³னம்…பே… ரதோ நாம ஹோதீ’’தி.
‘‘உச்சா, ப⁴ந்தே’’தி வத்வா அயம் மம் உச்சதோ வத³தீதி சிந்தேய்யாதி புன ‘‘நாதிஉச்சா தும்ஹே’’தி ஆஹ, ஸரீரேனாதி அதி⁴ப்பாயோ. மேசகவண்ணஸ்ஸாதி நீலோபா⁴ஸஸ்ஸ. புச்சீ²தி பி⁴க்கூ² புச்சி². பூ⁴மியம் லேக²ம் லிக²ந்தோ அச்சீ²தி பட²மம் மஞ்சே நிபஜ்ஜித்வா உட்டா²ய பூ⁴மியம் லேக²ம் லிக²ந்தோ அச்சி² ‘‘அகீ²ணாஸவோதி மஞ்ஞனா ஹோதூ’’தி. ததா² ஹி ராஜா கீ²ணாஸவஸ்ஸ நாம…பே… நிவத்தி. த⁴ஜபக்³க³ஹிதாவாதி பக்³க³ஹிதத⁴ஜாவ. ஸிலாசேதியட்டா²னந்தி தூ²பாராமஸ்ஸ ச மஹாசேதியஸ்ஸ ச அந்தரே ஸிலாய கதசேதியட்டா²னம். சேதியம்…பே… அட்டா²ஸி ஸாவகஸ்ஸ தம் கூடாகா³ரந்தி கத்வா.
பச்சா²பா⁴கே³னாதி த⁴ம்மகதி²கஸ்ஸ தே²ரஸ்ஸ பிட்டி²பஸ்ஸேன. கோ³னஸோதி மண்ட³லஸப்போ. த⁴ம்மஸ்ஸவனந்தராய ப³ஹூனம் ஸக்³க³மக்³க³ப்படிலாப⁴ந்தராயோ ப⁴வேய்யாதி அதி⁴ப்பாயேன ‘‘த⁴ம்மஸ்ஸவனந்தராயம் ந கரிஸ்ஸாமீ’’தி சிந்தேஸி. விஸம் விக்க²ம்பே⁴த்வாதி விபஸ்ஸனாதேஜேன விஸவேக³ம் விக்க²ம்பே⁴த்வா. கா³தா²ஸஹஸ்ஸந்தி கா³தா²ஸஹஸ்ஸவந்தம். பட்டா²னகா³தா²யாதி பட்டா²பனகா³தா²ய, ஆதி³கா³தா²யாதி அத்தோ². பட்டா²ன…பே… அவஸானகா³த²ம் ஏவ வவத்த²பேஸி, ந த்³வின்னம் அந்தரே வுத்தம் கிலந்தகாயத்தா. ஸரபா⁴ணம் ஸாயன்ஹத⁴ம்மகதா². பக்³க³ண்ஹாதீதி பச்சக்க²ம் கரோந்தீ க³ண்ஹாதி, ஸக்கச்சம் ஸுணாதீதி அத்தோ². த⁴ம்மகத²னதி³வஸே த⁴ம்மகதி²கானம் அகிலமனத்த²ம் ஸத்³தா⁴ உபாஸகா ஸினித்³த⁴போ⁴ஜனம் மது⁴பானகஞ்ச தே³ந்தி ஸரஸ்ஸ மது⁴ரபா⁴வாய ஸப்பிமது⁴கதேலாதி³ஞ்ச பே⁴ஸஜ்ஜம். தேனாஹ ‘‘அரியவம்ஸம் கதே²ஸ்ஸாமீ’’திஆதி³. சதூஹி தா³டா²ஹி ட³ம்ஸித்வாதி த³ள்ஹத³ட்ட²பா⁴வத³ஸ்ஸனம். சரிஸ்ஸாமீதி ஸம்மானேஸ்ஸாமி, ஸக்கச்சம் ஸுணிஸ்ஸாமீதி அத்தோ². நிம்மதே²த்வாதி நிம்மத்³தி³த்வா, அபனேத்வாதி அத்தோ².
திடா²னஸுத்தவண்ணனா நிட்டி²தா.
3. அத்த²வஸஸுத்தவண்ணனா
43. ததியே அத்தோ² நாம ப²லம், தம் ஏதஸ்ஸ வஸோதி அத்த²வஸோ. ஹேது, அத்தோ² ஏதஸ்ஸ அத்தீ²தி அத்தோ², ஸோ ஏவாதி ஆஹ ‘‘தயோ அத்தே² தீணி காரணானீ’’தி. த⁴ம்மதே³ஸனா நாம உக்கட்ட²னித்³தே³ஸேன சதுன்னம் அரியஸச்சானம் பகாஸனாதி ஆஹ ‘‘சதுஸச்சத⁴ம்மம் பகாஸேதீ’’தி. அட்ட²கத²ம் ஞாணேன படிஸம்வேதீ³தி பாளிபதா³னம் அத்த²ம் விவரணஞாணேன படி படி ஸம்வேத³னஸீலோ ‘‘அயம் இமஸ்ஸ பா⁴ஸிதஸ்ஸ அத்தோ²’’தி. ஏதேன அத்த²படிஸம்பி⁴தா³ப்³யாபாரமாஹ. பாளித⁴ம்மம் படிஸம்வேதீ³தி பாளிக³திம் பாளிம் பத³விவரணம் படி படி ஸம்வேத³னஸீலோ. ஏதேன த⁴ம்மபடிஸம்பி⁴தா³ப்³யாபாரமாஹ.
அத்த²வஸஸுத்தவண்ணனா நிட்டி²தா.
4. கதா²பவத்திஸுத்தவண்ணனா
44. சதுத்தே² பவத்தினீதி யாவ அதி⁴ப்பேதத்த²னிக³மனா அவிச்சே²தே³ன பவத்தினீ. படிகா⁴தாபா⁴வேன அப்படிஹதா. நிய்யானிகா ஸப்பாடிஹீரகா.
கதா²பவத்திஸுத்தவண்ணனா நிட்டி²தா.
5. பண்டி³தஸுத்தவண்ணனா
45. பஞ்சமே பண்டி³தபஞ்ஞத்தானீதி பண்டி³தேஹி பட²மம் பஞ்ஞத்தானி. கதி²தானீதி ஸேய்யஸோ கதி²தானி. மஹாபுரிஸேஹீதி பு³த்³த⁴போ³தி⁴ஸத்தேஹி. கருணாதி கருணாசேதோவிமுத்தி வுத்தா. புப்³ப³பா⁴கோ³தி தஸ்ஸ உபசாரோ. த³மோதி இந்த்³ரியஸம்வரோ ‘‘மனச்ச²ட்டா²னம் இந்த்³ரியானம் த³மன’’ந்தி கத்வா. அத்தத³மனந்தி சித்தத³மனம். புண்ணோவாதே³ (ம. நி. 3.396) ‘‘ஸக்கி²ஸ்ஸஸி கோ², த்வம் புண்ண, இமினா த³மூபஸமேனா’’தி ஆக³தத்தா த³மோதி வுத்தா க²ந்திபி. ஆளவகே ஆளவகஸுத்தே (ஸம். நி. 1.246; ஸு. நி. 190) ‘‘ஸச்சா த³மா சாகா³’’தி ஏவம் வுத்தா பஞ்ஞாபி இமஸ்மிம் ஸுத்தே ‘‘த³மோ’’தி வத்தும் வட்டதி. ரக்க²னம் கோ³பனம் படிஜக்³க³னந்தி மாதாபிதூனம் மனுஸ்ஸாமனுஸ்ஸகதூபத்³த³வதோ ரக்க²னம், ப்³யாதி⁴ஆதி³அனத்த²தோ கோ³பனம், கா⁴ஸச்சா²த³னாதீ³ஹி வேய்யாவச்சகரணேன படிஜக்³க³னம். ஸந்தோ நாம ஸப்³ப³கிலேஸத³ரத²பரிளாஹூபஸமேன உபஸந்தகாயவசீஸமாசாரதாய ச. உத்தமட்டே²ன ஸந்தானந்தி மத்தேய்யதாதீ³ஹி ஸேட்ட²ட்டே²ன ஸந்தானம்.
இத⁴ இமேஸம்யேவ திண்ணம் டா²னானம் கரணேனாதி இமஸ்மிம் ஸுத்தே ஆக³தானம் திண்ணம் டா²னானம் கரணேன நிப்³ப³த்தனேன. ஏதானி…பே… காரணானீதி மாதுபட்டா²னம் பிதுபட்டா²னந்தி ஏதானி த்³வே உத்தமபுரிஸானம் காரணானி. உத்தமகிச்சகரணேன ஹி மாதாபிதுஉபட்டா²கா ‘‘உத்தமபுரிஸா’’தி வுத்தா. தேனாஹ ‘‘மாதாபிது…பே… வுத்தோ’’தி. அனுபத்³த³வபா⁴வேன கே²மம்.
பண்டி³தஸுத்தவண்ணனா நிட்டி²தா.
6. ஸீலவந்தஸுத்தவண்ணனா
46. ச²ட்டே² லோகியலோகுத்தரமிஸ்ஸகந்தி ஏத்த² ‘‘மனுஸ்ஸா புஞ்ஞம் பஸவந்தீ’’தி அவிஸேஸேன வுத்தத்தா பா⁴வனாமயஸ்ஸபி புஞ்ஞஸ்ஸ ஸங்க³ண்ஹனதோ லோகுத்தரஸ்ஸபி ஸம்ப⁴வோ த³ட்ட²ப்³போ³.
ஸீலவந்தஸுத்தவண்ணனா நிட்டி²தா.
7. ஸங்க²தலக்க²ணஸுத்தவண்ணனா
47. ஸத்தமே ஸமேச்ச ஸம்பூ⁴ய பச்சயேஹி கதம் ஸங்க²தம். நிமித்தானீதி ஸஞ்ஜானனஸ்ஸ நிமித்தானி. ஹேதுபச்சயஸமவாயே உப்பஜ்ஜனம் உப்பாதோ³, அத்தலாபோ⁴. வயோதி ப⁴ங்கோ³. டி²தஸ்ஸாதி உப்பாத³க்க²ணதோ உத்³த⁴ம் டி²திக்க²ணபத்தஸ்ஸ. ஸா பனஸ்ஸ அவத்தா² உப்பாதா³வத்தா²ய பி⁴ன்னாதி கத்வா அஞ்ஞத²த்தம் ஜராதி ச வுத்தா. யஸ்மா த⁴ம்மோ உப்பஜ்ஜமானோ ஏவ பி⁴ஜ்ஜதி, ததா² ஸதி உப்பாத³ப⁴ங்கா³ ஸமானக்க²ணா ஸியும், ந ச தம் யுஜ்ஜதி, தஸ்மா உப்பாதா³வத்தா²ய பி⁴ன்னா ப⁴ங்கா³பி⁴முகா²வத்தா² ஜராதி வேதி³தப்³பா³. யே பன ‘‘ஸங்கா²ரானம் டி²தி நத்தீ²’’தி வத³ந்தி, தேஸம் தம் மிச்சா². யதா² ஹி தஸ்ஸேவ த⁴ம்மஸ்ஸ உப்பாதா³வத்தா²ய பி⁴ன்னா ப⁴ங்கா³வத்தா² இச்சி²தா, அஞ்ஞதா² ‘‘அஞ்ஞம் உப்பஜ்ஜதி, அஞ்ஞம் நிருஜ்ஜ²தீ’’தி ஆபஜ்ஜதி, ஏவம் உப்பஜ்ஜமானஸ்ஸ ப⁴ங்கா³பி⁴முகா² த⁴ம்மா இச்சி²தப்³பா³. ஸா ச டி²திக்க²ணோ. ந ஹி உப்பஜ்ஜமானோ பி⁴ஜ்ஜதீதி ஸக்கா விஞ்ஞாதுந்தி.
ஸங்க²தந்தி தேபூ⁴மகா த⁴ம்மா பச்சயஸமுப்பன்னத்தா. யதி³ ஏவம் மக்³க³ப²லத⁴ம்மா கத²ந்தி ஆஹ ‘‘மக்³க³ப²லானி பனா’’திஆதி³. லக்க²ணகதா² ஹி யாவதே³வ ஸம்மஸனத்தா². உப்பாத³க்க²ணே உப்பாதோ³, ந டா²னப⁴ங்க³க்க²ணேஸு. கஸ்மா? உப்பாத³உப்பாத³க்க²ணானம் அஞ்ஞமஞ்ஞம் பரிச்சி²ன்னத்தா. யதா² ஹி உப்பாத³ஸங்கா²தேன விகாரேன உப்பாத³க்க²ணோ பரிச்சி²ன்னோ, ஏவம் உப்பாத³க்க²ணேனபி உப்பாதோ³ பரிச்சி²ன்னோ. ஸேஸத்³வயேபி ஏஸேவ நயோ. த⁴ம்மப்பவத்திமத்ததாயபி காலஸ்ஸ லோகஸமஞ்ஞாவஸேனேவ வுத்தம். லக்க²ணம் ந ஸங்க²தம், ஸங்க²தம் ந லக்க²ணந்தி நேஸம் பே⁴த³த³ஸ்ஸனம். அவத்தா²வதோ ஹி அவத்தா² பி⁴ன்னாவாதி. பரிச்சி²ன்னந்தி ஏத்த² உப்பாத³வயேஹி தாவ ஸங்க²தம் பரிச்சி²ன்னம் ஹோது, ஜராய பன தம் கத²ம் பரிச்சி²ன்னந்தி வுச்சதி? ந வுச்சதி பரிச்சே²தோ³ புப்³ப³ந்தாபரந்தமத்தேன, அத² கோ² ஸபா⁴வபே⁴தே³னாதி நாயம் தோ³ஸோ. ஸங்க²தம் த⁴ம்மஜாதம் பரிச்சி²ன்னம் தப்³ப³ந்தம் த⁴ம்மஜாதம் ஸங்க²தந்தி பஞ்ஞாயதி ஏவம் தேஸம் அபா⁴வேன நிப்³பா³னமேதந்தி லக்கி²தப்³ப³தோ ஸஞ்ஜானிதப்³ப³தோ. இதா³னி ‘‘யதா² ஹீ’’திஆதி³னா யதா²வுத்தமத்தம் உபமாஹி விபா⁴வேதி.
ஸங்க²தலக்க²ணஸுத்தவண்ணனா நிட்டி²தா.
8. அஸங்க²தலக்க²ணஸுத்தவண்ணனா
48. அட்ட²மே அஸங்க²தஸ்ஸாதி வுத்தனயேன ந ஸங்க²தஸ்ஸ. தேனாஹ ‘‘பச்சயேஹீ’’திஆதி³. யதா² உப்பாதா³தீ³னம் பா⁴வேன ஸங்க²தத⁴ம்மஜாதம் ஸங்க²தந்தி பஞ்ஞாயதி, ஏவம் தேஸம் அபா⁴வேன நிப்³பா³னம் அஸங்க²தந்தி பஞ்ஞாயதி.
அஸங்க²தலக்க²ணஸுத்தவண்ணனா நிட்டி²தா.
9. பப்³ப³தராஜஸுத்தவண்ணனா
49. நவமே இத⁴ ஸால-ஸத்³தோ³ ருக்க²ஸாமஞ்ஞபரியாயோ, ந ருக்க²விஸேஸபரியாயோதி ஆஹ ‘‘மஹாஸாலாதி மஹாருக்கா²’’தி. குலஜேட்ட²கந்தி தஸ்மிம் குலே ஜேட்ட²பூ⁴தம் ஸாமிபூ⁴தம். ஸிலாமயோ ந பம்ஸுமயோ மிஸ்ஸகோ ச. கா³மம் கா³மூபசாரஞ்ச ட²பேத்வா ஸப்³ப³ம் அரஞ்ஞந்தி ஆஹ ‘‘அரஞ்ஞஸ்மிந்தி அகா³மகட்டா²னே’’தி. மஹந்தோ பப்³ப³தோ ஸேலோதி யோஜனா.
பப்³ப³தராஜஸுத்தவண்ணனா நிட்டி²தா.
10. ஆதப்பகரணீயஸுத்தவண்ணனா
50. த³ஸமே ஸரீரஸம்ப⁴வானந்தி ஸரீரே ஸம்பூ⁴தானம். து³க்கா²னந்தி அனிட்டா²னம். ப³ஹலானந்தி நிரந்தரப்பவத்தியா அவிரளானம். தாபனவஸேனாதி து³க்கா²பனவஸேன. திப்³பா³னந்தி குரூரானம். தாஸம் யதா²வுத்தானம் அதி⁴வாஸனாய பஹாதப்³ப³து³க்க²வேத³னானம் பஜஹனம் நாம க²மனமேவாதி ஆஹ ‘‘க²மனத்தா²யா’’தி. ஆணாபேத்வாதி ‘‘ஆதப்பம் கரணீய’’ந்தி பு³த்³தா⁴ணம் விதா⁴ய. லோகியலோகுத்தரமிஸ்ஸகா கதி²தா ஸஸம்பா⁴ரானம் மக்³க³த⁴ம்மானம் கதி²தத்தா.
ஆதப்பகரணீயஸுத்தவண்ணனா நிட்டி²தா.
11. மஹாசோரஸுத்தவண்ணனா
51. ஏகாத³ஸமே மஹாப³லவசோரோ மஹாசோரோதி ஆஹ ‘‘மஹந்தோ ப³லவசோரோ’’தி. ப³லவசோரோதி ச மஹாதா²மதாய மஹாபரிவாரதாய மஹாசோரியகம்மஸமத்த²தாய ச வேதி³தப்³போ³. மஹதம் கா³மனிக³மானம் விலுப்பனம் மஹாவிலோபோ. தம் தம் காரணம் பக்கி²பித்வாதி தம் தம் அகரணமேவ காரணம் கத்வா தப்படிப³த்³தா⁴ய கதா²ய பக்கி²பித்வா. அத்த²ம் கத²யிஸ்ஸந்தீதி தஸ்ஸ தஸ்ஸ அத்த²ஞ்ச கத²யிஸ்ஸந்தி. ஹரந்தாதி அபனேந்தா பரிஹரந்தா. த³ஸவத்து²காயாதி ‘‘ஸஸ்ஸதோ லோகோ’’தி (ம. நி. 1.269) ஆதி³த³ஸவத்து²ஸன்னிஸ்ஸிதாய. அந்தம் க³ஹேத்வா டி²ததி³ட்டி²யாதி தமேவ ஸஸ்ஸதாதி³அந்தம் க³ஹேத்வா அவிஸ்ஸஜ்ஜேத்வா டி²ததி³ட்டி²யா.
மஹாசோரஸுத்தவண்ணனா நிட்டி²தா.
சூளவக்³க³வண்ணனா நிட்டி²தா.
பட²மபண்ணாஸகம் நிட்டி²தம்.